ཧྥ་རན་སིར་བོད་ཀྱི་རིག་གཞུང་དུས་སྟོན།

ཧྥ་རན་སིའི་བོད་ཀྱི་རིག་གཞུང་དུས་སྟོན་ཐེངས་གསུམ་པ་དེ་བདུན་ཕྲག་སྔོན་མའི་གཟའ་མཇུག་ཏུ་ཚོགས་ཡོད་ཅིང་། དུས་སྟོན་ཐོག་བོད་པ་དང་ཡུལ་མི་ཆིག་སྟོང་བརྒྱད་བརྒྱ་ཙམ་འདུ་འཛོམས་བྱུང་ཡོད།

 ལོ་ལྟར་ཧྥ་རན་སི་བོད་རིགས་ཚོགས་པས་གོ་སྒྲིག་འོག་འཚོགས་བཞིན་པའི་བོད་ཀྱི་རིག་དུས་སྟོན་དེ་ཕྱི་ཟླ་༤ ཚེས་ ༣༠ དང་ཕྱི་ཟླ་ ༥ ཚེས་༡ སྟེ། བདུན་སྔོན་མའི་རེས་གཟའ་སྤེན་པ་དང་ཉི་མའི་ཉིན་རྒྱལ་ས་ཕ་རི་སིའི་ཉེ་འཁྲིས་ (Bios de Vincennes) ས་ཁུལ་དུ་ཚོགས་ཡོད་ལ། དུས་སྟོན་མཛོད་སྒོའི་ཐོག་ཧྥ་རན་སིའི་གྲོང་ཚོ་སང་གྷི་ར་སིན་(ville de saint gratien) གྱི་སྤྱི་ཁྱབ་པ་ལྕམ་སྐུ་ (Jacqueline Eustache-Biniou) ལགས་སྐུ་མགྲོན་དུ་ཕེབས་ཏེ། ཐེངས་འདིའི་དུས་སྟོན་སྦྱིན་བདག་གི་མཚན་གནས་བཞེས་ཡོད་འདུག

ཉིན་གཉིས་རིང་གི་དུས་སྟོན་ཐོག་ཧྥ་རན་སི་བོད་རིགས་ཚོགས་པའི་ཟློས་གར་ཚོགས་པ་དང་། བོད་ཀྱི་དཔལ་ཡོན་སློབ་གྲྭ བོད་ཀྱི་དཀྱིལ་འཁོར་རོལ་དབྱངས་ཚོགས་པ་སོགས་ཀྱིས་གནའ་དེང་གི་གཞས་དང་ཞབས་བྲོ་ཁག་གཅིག་གཟིགས་འབུལ་ཞུས་ཡོད་པ་དང་། ཁང་གསར་སྐལ་བཟང་ཚེ་རིང་གི་༼ ངའི་གྲོགས་པོ་འབྱོར་ལྡན། ༽ ཞེས་པ་དང་། ལྕེ་ནག་ཚང་རྡོ་རྗེ་ཚེ་རིང་( ལྗང་བུ། ) ཡི་༼ མཚོ་སྔོན་པོ། ༽ ཨ་ནན་ཁ་ཐི་རིན་(Anne-Catherine Cravate)དང་མེ་ཤེལ་ལེ་ཇིན་(Michel Leine)གཉིས་ཀྱི་༼ འགའ་ཤས་ཀྱི་རྨི་ལམ་དང་གཞན་ཚོའི་སྡུག་བསྔལ། ༽ ལོ་ཌི་ཝེ་སི་གྷརའི་(Ludovic Segarra)༼ རྐུ་ལ་ཤོར་པའི་བྱིས་པ། ༽ ཧྥུ་རན་རེ་ཅལ་(Franz Reichien) གྱི་༼ བོད་ཀྱི་གསོ་བ་རིག་པ། ༽ སོགས་བོད་པ་དང་ཕྱི་གླིང་བས་བཟོ་སྐྲུན་བྱས་པའི་བོད་སྐོར་གྱི་དངོས་བྱུང་གློག་བརྙན་ཁག་ཅིག་གཟིགས་འབུལ་ཞུས་ཡོད་པ་མ་ཟད། སྐབས་འབྲེལ་གློག་བརྙན་དེ་དག་བཟོ་མཁན་ནམ་འབྲེལ་ཡོད་མི་སྣས་རང་རང་གི་གློག་བརྙན་སྐོར་ལ་ངོ་སྤྲོད་དང་དོགས་གཅོད་ལན་འདེབས་ཀྱང་གནང་ཡོད།

དེ་བཞིན་གསར་འགོད་པ་དང་སྲིད་དོན་ཉམས་ཞིབ་པ་ཨེ་ལོ་ཌི་བྷེ་ནག་ (Elodie  Bernard) ལགས་ཀྱིས་ཉིས་སྟོང་བརྒྱད་ལོའི་ཞི་རྒོལ་ཆེན་མོའི་སྔ་ཕྱི་ཞེས་པ་དང་། བོད་རིགས་ཚོགས་པའི་ཚོགས་གཙོ་ཐུབ་བསྟན་རྒྱ་མཚོས་རྔ་བ་ཀིརྟི་དགོན་པའི་ད་ལྟའི་ཛ་དྲག་གི་གནས་སྟངས། སྨན་པ་ལྷ་རྗེ་ཚང་བན་དེ་ཚེ་རིང་ལགས་ཀྱིས་བོད་སྨན་གྱི་ཕན་ནུས་ཞེས་པའི་བརྗོད་གཞིའི་ཐོག་བགྲོ་གླེང་གཏམ་བཤད་ཀྱང་གནང་ཡོད་འདུག

སྐབས་དེར་བོད་རིགས་ཚོགས་པའི་ཚོགས་གཙོ་ཐུབ་བསྟན་རྒྱ་མཚོ་ལགས་ཀྱིས་གསུང་བཤད་གནང་དོན། དུས་སྟོན་འདི་ལོ་རེ་བཞིན་འཚོགས་ཀྱི་ཡོད་པ་རེད། དུས་ཡུན་ཉིན་གཉིས་རིང་རེད། ཐོག་མར་བོད་རིགས་ཚོགས་པ་ཧྥ་རན་སིའི་གཞུང་ལ་གསར་འཛུགས་དེབ་སྐྱེལ་བྱས་སྐབས་ཀྱི་ཡིག་ཆའི་ནང་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་དང་། ཧྥ་རན་སིའི་མི་དམངས་བར་རིག་གཞུང་བརྗེ་རེས་ཀྱིས་མཚོན་པའི་རིག་གཞུང་བྱེད་སྒོ་གཙོ་བོ་སྤེལ་རྒྱུ་ཡིན་ཞེས་འཁོད་ཡོད།  ཡིན་ན་ཡང་ད་བར་དུ་བྱེད་སྒོ་གཙོ་བོ་ངོ་རྒོལ་སྐད་འབོད་དང་སྐུའི་འཁྲུངས་སྐར་སྲུང་གཙི་སོགས་མ་གཏོགས་རིག་གཞུང་གི་བྱེད་སྒོའི་སྒང་ལ་ལས་ཀ་དེ་ཙམ་བྱེད་ཐུབ་ཡོད་པ་མ་རེད།

དེར་བརྟེན། ང་ཚོས་དུས་སྟོན་གོ་སྒྲིག་བྱ་དགོས་པའི་དམིགས་ཡུལ་གཙོ་བོ་དེ་རེད། དེ་ནས་དུས་ཡུན་ཉིན་གཉིས་ལས་མེད་ནའང་དུས་སྟོན་འདི་འདྲ་ཞིག་གོ་སྒྲིག་བྱས་པ་ཡིན་ན། བོད་པ་ཚོ་ཡིན་ན་རེད། ཡུལ་མི་ཚོ་ཡིན་ནའང་རེད། ཚང་མ་མཉམ་དུ་འཛོམས་ནས་བོད་སྐད་བཤད་པ་དང་། བོད་ཆས་གྱོན་པ། དེ་བཞིན་ནང་ཆོས་བཤད་འཆད་ཉན། དཀྱིལ་འཁོར་བཞེངས་པ། བོད་དོན་སྐོར་ལ་སྐད་ཆ་བཤད་པ། གློག་བརྙན་སྟོན་པ། བོད་པའི་གཞས་དང་ཞབས་བྲོ་འཁྲབ་པ། བཙན་བྱོལ་སྤྱི་ཚོགས་ནང་ཐོན་སྐྱེད་བྱས་པའི་ཅ་ལག་རིགས་འགྲེམས་སྟོན་དང་། ཚོང་འབྲེལ་བྱེད་སའི་ཁོར་ཡུག་དང་གོ་སྐབས་བསྐྲུན་པར་ཕན་ཐོགས་ཆེན་པོ་ཡོད་པ་མ་ཟད། བོད་རིགས་ཚོགས་པ་རང་གི་དཔལ་འབྱོར་འདུ་འགོད་ལའང་ཕན་ཐོགས་ཆེན་པོ་རེད།  དུས་སྟོན་འདི་གཅིག་བུའི་སྒང་ནས་བོད་རིགས་ཚོགས་པས་ལོ་རེ་བཞིན་ཡུ་སྒོར་སུམ་སྟོང་ནས་བཞི་སྟོང་ལྷག་འདུ་འགོད་བྱེད་ཐུབ་ཀྱི་ཡོད། ༽ ཅེས་དུས་སྟོན་འདིའི་དམིགས་ཡུལ་དང་། ཕན་ཐོགས་བཅས་ཀྱི་སྐོར་ངོ་སྤྲོད་གནང་བྱུང་།

ཧྥ་རན་སིའི་བོད་ཀྱི་རིག་གཞུང་དུས་སྟོན་འདི་ཕྱི་ལོ་༢༠༠༩ ལོ་ནས་མགོ་འཛུགས་ཀྱིས་ད་ལོའི་བར་ཐེངས་གསུམ་ཚོགས་ཡོད་པ་དང། ཐེངས་འདིའི་དུས་སྟོན་སྟེང་བོད་པ་དང་ཧྥ་རན་སིའི་ཡུལ་མི་ ༡༨༠༠ ཙམ་འདུ་འཛོམས་བྱུང་ཡོད་འདུག

ཧྥ་རན་སིའི་འདི་གའི་གསར་འགོད་པ་ཟླ་བ་ཚེ་རིང་ལགས་ཀྱིས་བཏང་འབྱོར་བྱུང་།