སྐད་ཡིག་ཚགས་པར་གྱི་གསར་འགོད་པ་འབྲོག་རྡོར་གྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། ཉེ་ཆར་རྔ་པ་བོད་རིགས་རང་སྐྱོང་ཁུལ་འབར་ཁམས་འབྲིང་རིམ་མི་མང་ཁྲིམས་ཁང་གིས་རྩོམ་པ་པོ་འབྲོག་རུ་ཚུལ་ཁྲིམས་ལགས་ཀྱི་ནང་མར་བརྡ་ཡིག་ཅིག་སྤྲད་ཡོད་པའི་ནང་། མི་འགྱང་པར་འབྲོག་རུ་ཚུལ་ཁྲིམས་ལ་དུས་བཀག་བཙོན་འཇུག་གི་ཁྲིམས་ཐག་གཅོད་རྒྱུའི་ཐག་གཅོད་བྱས་ཡོད་པ་ལྟར། ཟླ་འདིའི་ཕྱི་ཚེས་ ༨ ཉིན་འབྲོག་རུ་ཚུལ་ཁྲིམས་ཀྱི་ཕ་རྒན་དང་ཕུ་བོ་བཅས་མི་གསུམ་འབར་ཁམས་སུ་ཕྱིན་ཡོད་ཀྱང་། ཁྲིམས་ཁང་གིས་ནང་མི་འབྱོར་བའི་སྔར་ཉིན་ཏེ། ཕྱི་ཚེས་ ༧ ཉིན་འབྲོག་རུ་ཚུལ་ཁྲིམས་དང་གྲྭ་བ་གཅིག་བཅས་སོ་སོར་ལོ་ ༤ དང་ཟླ་བ་ ༦ གི་ཁྲིམས་ཐག་བཅད་དེ། ནང་མི་ཚོར་ཁྲིམས་ཐག་བཅད་ཟིན་པའི་ཡིག་ཆ་ཙམ་ལས་ཁྲིམས་རྭ་ཚོགས་པའི་གོ་སྐབས་སྤྲད་མི་འདུག
ཕྱིས་སུ་ནང་མིས་རེ་སྐུལ་ཡང་ཡང་ཞུས་མཐར་སྐར་མ་ ༡༠ རིང་ཐུག་འཕྲད་ཀྱི་གོ་སྐབས་སྤྲད་ཡོད་ཅིང་། སྐབས་དེར་འབྲོག་རུ་ཚུལ་ཁྲིམས་ལ་བཙོན་ཁང་ནས་མནར་གཅོད་བཏང་བའི་དབང་གིས་གཟུགས་པོའི་གནས་སྟངས་སྐྱོ་བོ་ཆགས་འདུག་ཟེར་ཞིང་། འབར་ཁམས་ནས་མཚོ་སྔོན་གྱི་བཙོན་ཁང་དུ་གནས་སྤོར་བྱ་དགོས་པའི་རེ་བ་བཏོན་ཡང་ངོས་ལེན་གཏན་ནས་མ་བྱས་པར། ཟླ་གཅིག་ལྷག་གི་རྗེས་ནས་ཁོང་ཁྲིན་ཏུའུ་གྲོང་ཁྱེར་གྱི་བཙོན་ཁང་ཞིག་ཏུ་བསྐྱལ་རྒྱུ་ཡིན་ཚུལ་བརྗོད་འདུག
རང་ལོ་ ༢༨ ཡིན་པའི་རྩོམ་པ་པོ་འབྲོག་རུ་ཚུལ་ཁྲིམས་ལགས་ནི། ༡༩༨༢ ལོར་མཚོ་ལྷོ་ཁུལ་མང་ར་རྫོང་མགོ་མང་གྲོང་རྡལ་གྱི་འབྲོག་རུ་སྡེ་བ་ནས་སྐྱེས་ཤིང་། རང་ལོ་བརྒྱད་ཀྱི་སྟེང་མདོ་སྨད་ཀླུ་ཚང་དགོན་པར་རབ་ཏུ་བྱུང་སྟེ། འབྲོག་རུའི་ཆོས་ཁང་དང་ཀླུ་ཚང་དགོན། དྷི་ཚ་དགོན། རེབ་གོང་། རྔ་བ་སྒོ་མང་དགོན་པ་སོགས་ནས་སློབ་གཉེར་གནང་ཞིང་། སྔ་ཕྱིར་འབྲོག་རུ་སྡེ་བའི་དུས་དེབ་༼གསེར་ཐང་གི་མེ་ཏོག༽ གི་རྩོམ་སྒྲིག་པ་དང་། ༢༠༠༧ ལོར་ཁོང་རང་ཉིད་ཀྱི་ཆེད་དེབ་༼དུངས་པའི་དབྱངས་རྟ།༽ ཞེས་པ་དཔར་སྐྲུན་བྱས་ཡོད།
འབྲོག་རུ་ཚུལ་ཁྲིམས་ལགས་ཀྱིས་༼ཁ་བའི་ཚེ་སྲོག ༽ཅེས་པའི་ཚགས་པར་གཙོ་གཉེར་གནང་སྟབས། རྒྱ་ནག་གཞུང་གིས་ཚགས་པར་དེའི་ནང་སྲིད་ཀྱི་གནད་དོན་ཡོད་ཚུལ་བརྗོད་དེ། སྔ་ཕྱི་ཐེངས་གཉིས་ལ་བཀག་འགོག་བྱས་ཡོད་ཅིང་། ༢༠༡༠ ཟླ ༥ ཚེས ༢༤ ཉིན་འབྲོག་རུ་ཚུལ་ཁྲིམས་དང་མཚོ་སྔོན་འབའ་ཁ་སྒང་ནས་ཡིན་པའི་ཁོང་གི་གྲོགས་པོ་ཁ་སྒང་ཚུལ་ཁྲིམས་གཉིས་ཀྱིས་མཚོ་སྔོན་ཡུལ་ཤུལ་ས་ཡོམ་ལ་མྱ་ངན་ཆེད་དེབ་ཅིག་ཕྱོགས་བསྒྲིགས་གནང་བཞིན་པའི་སྐབས་སུ། རྒྱ་གཞུང་གི་ཉེན་རྟོག་པས་རྔ་པ་སྒོ་མང་དགོན་པའི་རང་ཤག་ནས་འཛིན་བཟུང་བྱས་ཡོད། ཐེངས་འདིར་འབྲོག་རུ་ཚུལ་ཁྲིམས་དང་ལྷན་དུ་གྲྭ་བ་གཞན་ཞིག་ལའང་ལོ་ ༤ དང་ཟླ་ ༦ གི་ཁྲིམས་ཐག་བཅད་ཡོད་པ་དེ་ནི། ཐོག་མར་ཁོང་དང་མཉམ་དུ་འཛིན་བཟུང་བྱས་པའི་འབའ་ཁ་སྒང་ནས་ཡིན་པའི་ཚུལ་ཁྲིམས་ཟེར་བ་དེ་ཡིན་མིན་གསལ་ཁ་བྱུང་མི་འདུག
གསར་འགོད་པ། དོན་གོ
