སྐྱབས་བཅོལ་བའི་ཁེ་གྱོང་།

སེར་བྱེས་སློབ་ཕྲུག འཇམ་དབྱངས་མཁས་བཙུན།

བོད་ཀྱི་དུས་བབ་དྲ་བའི་བསམ་ཤོག་ཚན་པར། “ ཁྱེད་རང་ཕྱི་ཡུལ་ལ་སྐྱབས་བཅོལ་དུ་ཡོང་བའི་ཐད། ད་ཆར་ངོས་འཛིན་གང་འདྲ་གནང་གི་ཡོད་དམ ” ཞེས་པའི་དྲི་གཞི་དེར་ང་རང་གི་བསམ་ཚུལ་དེ་ཁེ་ཕན་ཡོད་པར་བདམས་པ་ཡིན། མ་གཞི་ཕྱི་ཡུལ་དུ་སྐྱབས་བཅོལ་ལ་ཡོང་བར་ཁེ་གྱོང་གཉིས་ཀའི་ཆ་འདུག་མོད། སྤྱི་ཡོངས་ཀྱི་ཆ་ནས་བསམ་བློ་བཏང་ཡོང་ན། ཁེ་ཕན་ཕྲན་བུ་ཆེ་བའི་སྣང་བ་ཞིག་ངང་ངམ་ཤུགས་ཀྱིས་སྦྱིན་ཡོང་གི་འདུག

ཕྱི་ལོ་ ༢༠༠༥ ལོའི་ཡར་སྔོན་གྱི་མཁས་བཙུན་ནི་ནགས་ཤོད་དམ་འབྲི་རུའི་ཡུལ་དུ་ཆགས་པའི་གཞིས་དགོན་ཆུང་ཆུང་ཞིག་ཏུ་དཔེ་འཛིན་རྐྱང་རྐྱང་གིས་ནེ་ཙོའི་འདོན་པ་ཅི་བཞིན་ཚིག་གཅིག་གི་འབྲུ་དོན་ཡང་གྲོལ་ཐུབ་ཀྱི་མེད་མོད། ད་དུང་སྡུག་རུས་དང་ཨུ་ཚུགས་ཀྱིས་བློ་ལ་སྐྱོར་བསྡད་པ་རེད། རྒྱ་དམར་གྱི་ཚགས་དམ་པའི་སྲིད་ཞུས་ཀྱི་འོག་ནས་གར་ཡོད་དང་གང་ཡིན་ཙམ་ཡང་མི་ཤེས་ཀྱང་། སྔོན་བསགས་ལས་ཀྱི་བག་ཆགས་མཐུག་པོ་ཞིག་གིས་བརྩི་བཀུར་དང་དད་འདུན་གྱིས་༸གོང་ས་མཆོག་གི་སྐུ་པར་འགའ་མཆོད་སྒམ་ནང་སྦས་ཏེ། མཚམས་རེར་ལྐོག་ལྐོག་སིལ་སིལ་མགོ་ལ་འཇོག་ཙམ་དང་ཞལ་ལ་མཇལ་ཙམ་རེ་བྱས། སྐབས་རེར་ཁམས་པའི་ཕོ་གསར་ཡིན་མདོག་གིས་ཁམས་ཆས་རེ་གྱོན་ཏེ། རྔམ་རྔམ་རྫིག་རྫིག་གིས་ཁྲོམ་དང་གྲོང་རྡལ་འགའ་རེར་མྱུལ། ལན་རེར་དགྲ་བཅོམ་པའི་ནུས་མཐུ་ཡོད་མདོག་གིས་འདར་འདར་སིག་སིག་གིས་གྲོང་ཆོག་རེར་སོང་སྟེ་དཀོར་ཟས་དང་དཀོར་དངུལ་བསྡུས་ཏེ། སྣང་བར་གང་དྲན་དང་འཚོ་བ་གང་སྐྱིད་ཀྱིས་མི་ལོ་བཅོ་ལྔ་དོན་མེད་དུ་བསྐྱལ།  

༢༠༠༥ ལོར་ཇོ་མོ་གླང་མ་བརྒྱུད་དེ་བཙན་བྱོལ་དུ་ཡོང་སྟེ། བཙན་བྱོལ་ལུང་པར་༼ཀཱ་ཅ༽ཡི་མིང་གི་ཆོ་ལོའི་འོག་ནས་བོད་དབྱིན་གཉིས་གཙོས་པའི་དེང་རབས་ཀྱི་སློབ་ཚན་མང་དག་ཅིག་ལ་བསླབ་པ་སློབ་གཉེར་གྱི་སྐལ་བ་ལྡན་ཞིང་། དུས་རབས་ཀྱི་འགྱུར་འགྲོས་དང་འཛམ་གླིང་གི་འཕེལ་ཕྱོགས་ལྟར་བརྡ་འཕྲིན་གྱི་ལམ་ཆེན་སྟེང་གོམ་པ་ཁྱ་ཁྱོར་གྱིས་སྤོ་ཤེས་ཙམ་བྱུང་བ་འདིས། ང་སྐྱབས་བཅོལ་དུ་ཡོང་བ་ལ་ཁེ་ཕན་ཡོད་པར་བསམ་ཤོག་འཕེན་པའི་སྤོབས་པ་དང་འདེང་ཚོད་དེ་བསྩལ་བ་རེད། ད་དུང་རིགས་རྒྱུད་གཅིག་པའི་ཧི་མ་ལ་ཡའི་སྤུན་ཟླ་མང་པོ་ཞིག་དང་མཉམ་ཟ་མཉམ་འཐུང་གིས་ར་མ་ལུག་གི་སྐད་བརྡའི་ཁྲོད་ནས་ངུ་མ་དགོད་ཀྱི་འཚོ་བ་བསྐྱལ་ཏེ། ད་ཆར་ར་མ་ལུག་གི་མི་ཞིག་ཆགས་ཐུབ་པ་བྱུང་བ་སོགས་ནི་སྐྱབས་བཅོལ་ལ་ཡོང་བའི་མཇུག་འབྲས་མངོན་འགྱུར་བྱུང་བ་ཞིག་ཏུ་ངོས་འཛིན་བྱེད་རྒྱུ་ཡིན།