ད་ལོ་རིཊ་གཅིག་རྐང་འཛིན་གྱི་ལས་རིམ་འགྱུར་བ་བཏང་ཡོད།

༧གོང་ས་མཆོག་གི་ཐུགས་རེ་དང་སྐུ་སྒེར་ཡིག་ཚང་གི་རོགས་དངུལ་འོག ཕྱི་ལོ་ ༢༠༠༤ ལོ་ནས་བོད་གཞུང་ཤེས་རིག་ལས་ཁུངས་འོག་རིགས་གཅིག་རྐང་འཛིན་གྱི་ལས་གཞི་ཞིག་མགོ་འཛུགས་བྱས་ཡོད་ཀྱང་། རྒྱུ་རྐྱེན་སྣ་ཚོགས་ཀྱི་དབང་གིས་ལས་གཞི་འདི་དེ་ཙམ་ལམ་ལྷོང་ཡོང་བར་ཆད་མཐུད་རིམ་པར་བྱུང་ཡོད་ལ། གནད་དོན་དེར་སྤྱི་འཐུས་གྲོས་ཚོགས་ནང་དུའང་གླེང་སློང་སྔ་རྗེས་སུ་བྱུང་ཡོད། བོད་གཞུང་ཤེས་རིག་ལས་ཁུངས་ཀྱིས་རིགས་གཅིང་རྐང་འཛིན་གྱི་ལས་རིམ་ཐོག་བསྐྱར་དུ་ཞིབ་འཇུག་བརྒྱུད། འདི་ལོར་རྣམ་པ་གསར་པ་ཞིག་གི་ཐོག་ནས་བསྐྱར་དུ་མགོ་འཛུགས་བྱས་ཏེ། ཉེ་ཆར་སྐབས་དྲུག་པའི་རིགས་གཅིག་རྐང་འཛིན་ཉམས་ཞིབ་པ་གསར་བསྡུ་གནང་ཡོད།

འདི་གའི་གསར་འགོད་པས་ཤེས་རིག་དྲུང་འཕར་བཀྲ་ཤིས་དོན་གྲུབ་ལགས་སུ་ད་ལོའི་རིགས་གཅིག་རྐང་འཛིན་གྱི་ཉམས་ཞིབ་པ་གསར་བསྡུ་དང་འབྲེལ་བའི་ཐོག་བཅར་འདྲི་ཞུས་པར་ཁོང་གིས་ཐོག་མའི་བྱུང་རིམ་སྐོར་ནས་ངོ་སྤྲོད་གནང་དོན། ང་ཚོ་བཙན་བྱོལ་དུ་ཐོག་མར་འབྱོར་དུས་ནས་ཤེས་ཡོན་རྨང་གཞི་འཛུགས་རྒྱུར་འབད་བརྩོན་གནང་ཡོད་པ་ལྟར། ༡༩༩༨ ལོའི་མི་འབོར་ཞིབ་བཤེར་ནང་ཡིག་རྨོངས་སེལ་ཚད་བརྒྱ་ཆ་ ༧༤ ། ༦ ཙམ་དང་། ༢༠༠༩ ལོར་བརྒྱ་ཆ་༨༤ ལྷག་ཏུ་བསླེབས་ཡོད། དེས་ཅི་ཞིག་སྟོན་གྱི་ཡོད་ཟེར་ན། ང་ཚོའི་གཞི་རིམ་ཤེས་ཡོན་གྱི་རྨང་གཞི་ཡག་པོ་བྱུང་ཡོད་པ་བསྟན་ཡོད། རྨང་གཞི་མེད་པའི་སྐབས་སུ་རྨང་གཞིའི་སྐོར་བཤད་རྒྱུ་ལས་རིགས་གཅིག་རྐང་འཛིན་ཐོག་ཤུགས་བརྒྱབ་ནའང་ནུས་པ་དེ་ཙམ་ཐོན་རྒྱུ་ཁག་པོ་རེད། ད་ཆ་ང་ཚོར་རྨང་གཞིའི་ཤེས་ཡོན་གང་འཚམ་འགྲིགས་ངེས་ཡོད་དུས། ༸གོང་ས་མཆོག་གི་བཀའ་དགོངས་བཞིན་ངེས་པར་དུ་རིགས་གཅིག་རྐང་འཛིན་ཐོག་ཤུགས་སྣོན་རྒྱག་དགོས། རིགས་གཅིག་རྐང་འཛིན་ཅི་ཙམ་མང་དུ་ཐོན་ཐུབ་ན། སྤྱི་ཚོགས་ནང་གསར་གཏོད་བྱ་ཐུབ་མཁན་དེ་ཙམ་གྱིས་མང་དུ་འགྲོ་བ་རེད། ཅེས་དང་།

ཁོང་གིས་མུ་མཐུད་དུ་གསུངས་དོན། ༢༠༠༤ ལོ་ནས་རིགས་གཅིག་རྐང་འཛིན་གྱི་སློབ་ཡོན་མགོ་བཙུགས་ཡོད་ཀྱང། སྒྲིག་ཞུགས་ཀྱི་སློབ་ཡོན་ལས་གཞི་དེ་ཤེས་རིག་སློབ་ཡོན་ནང་སྔོན་མ་ནས་ཡོད་བསྡད་པ་ཞིག་རེད། སློབ་ཡོན་དང་ས་མིག་སྔོན་མ་ལས་མང་དུ་ཕྱིན་ཡོད། ༢༠༠༤ ལོར་༸གོང་ས་མཆོག་གིས་རིགས་གཅིག་རྐང་འཛིན་ཆེད་ཧིན་སྒོར་འབུམ་ ༢༠༠ གསོལ་རས་གནང་ཡོད། ང་ཚོས་སྒྲིག་ཞུགས་དང་སྒྲིག་ཞུགས་མ་ཡིན་པ་གཉིས་སུ་དབྱེ་སྟེ་སློབ་ཡོན་འབུལ་བཞིན་ཡོད་ལ། སྒྲིག་ཞུགས་པ་ཚོར་མཐོ་རིམ་སློབ་གྲྭའི་རྒྱུན་ལྡན་འགྲོ་སྟངས་བཞིན་ལག་བསྟར་བྱེད་ཀྱི་ཡོད། སྒྲིག་ཞུགས་མ་ཡིན་པ་ཕྱི་ལོགས་མཐོ་སློབ་ཁག་ཏུ་སྦྱང་རྒྱུ་མེད་པའི་བོད་ཀྱི་རིག་གནས་སྐོར་ཡིན། དང་ཐོག་ང་ཚོས་མི་ལྔ་ཙམ་བསྡུས་ཏེ་རིམ་བཞིན་ས་མིག་མང་དུ་གཏོང་རྒྱུར་ཐག་གཅོད་བྱས་ཏེ། ༢༠༠༤ ལོ་ནས་ ༢༠༠༨ བར་ལོ་རེར་སྒྲིག་ཞུགས་དང་སྒྲིག་མ་ཡིན་པ་ ༥ རེ་བསྡུས་ཡོད། ཅེས་བརྗོད་བྱུང་།

ཡང་གསར་འགོད་པས་ཞིབ་འཇུག་རྣམ་གྲངས་དང་བརྗོད་གཞིའི་ཐོག་ཆ་རྐྱེན་ཅི་འདྲ་དགོས་ཀྱི་ཡོད་མེད་དྲིས་སྐབས། སྒྲིག་ཞུགས་ཉམས་ཞིབ་ཀྱི་བརྒྱུད་ལམ་བོད་ཡིག་ཡིན་དགོས་པའི་ངེས་པ་མེད། དེར་གཙོ་བོ་སློབ་གྲྭའི་བརྒྱུད་རིམ་ཆ་ཚང་ཞིག་དགོས་པ་རེད། འོན་ཀྱང་ད་བར་བོད་ཡིག་མ་ཡིན་པ་རྐྱང་བསླེབས་འདུག སྒྲིག་ཞུགས་མ་ཡིན་པ༌བོད་ཡིག་ཁོ་ན་རེད། སྒྲིག་ཞུགས་ཚོས་སོ་སོས་བརྗོད་གཞི་བདམས་པ་དེར་མཐོ་སློབ་ཀྱིས་ངོས་ལེན་བྱས་ན། ཟླ་བ་ ༦ རེའི་མཚམས་སུ་ཞིབ་འཇུག་བྱས་ཏེ་རྩོམ་ཡོན་སྤྲོད་ཀྱི་ཡོད། སློབ་ཡོན་རྫོགས་མཚམས་ང་ཚོར་མཐའ་མའི་ཆེད་རྩོམ་གྱི་ངོ་བཤུས་འབུལ་དགོས་ལ། སྒྲིག་ཞུགས་མ་ཡིན་པ་ཚོར། ཐོག་མ་ནས་བརྗོད་གཞི་མང་པོ་ཡོད་པར་མ་ཟད། དེར་སོ་སོའི་འདོད་མོས་བཞིན་གདམ་ག་བྱས་ན་འགྲིག་གི་ཡོད་ཀྱང་། རྗེས་སུ་སྤྱི་ཚོགས་ནང་སློབ་སྟོན་པའམ་ཆེད་རྩོམ་ཞིབ་འཇུག་པ་རག་དཀའ་བ་དང་བརྗོད་གཞི་ཉིས་ཟློས་མི་ཡོང་ཆེད་ང་ཚོས་ལོ་རེར་བརྗོད་གཞི་ ༡༠ གཏན་ཁེལ་བྱས་པ་ཡིན། སྒྲིག་ཞུགས་པ་ཚོས་བརྗོད་གཞི་བཅུ་ལས་གང་རུང་ཞིག་ལ་སྙན་ཞུ་ཕུལ་ཏེ་འགྲན་རྩོད་བྱ་དགོས་པ་བཟོས་ཡོད། ཅེས་བརྗོད་བྱུང་།

རིགས་གཅིག་རྐང་འཛིན་ཐོག་མཐུན་རྐྱེན་དང་ལམ་སྟོན་པ་མ་རག་པའི་དཀའ་ངལ་ཡོད་མེད་དྲིས་པར།  རིགས་གཅིག་རྐང་འཛིན་ནང་ཞུགས་མཁན་ཚོར་འདོད་པ་ཁེངས་ཀྱི་མེད་པ་ཡོང་སྲིད་པ་རེད། ལས་གཞི་འདི་ ༢༠༠༩ དང་ ༢༠༡༠ ལོར་རེ་ཞིག་མཚམས་འཇོག་གིས་བསྐྱར་ཞིབ་བྱ་དགོས་བྱུང་བ་རེད། ༢༠༠༥ ལོར་ཚུད་རྒྱུགས་ནང་མི་ ༥ བྱུང་བའི་ནང་མི་ ༢ དགོངས་པ་ཞུས་པ་རེད། ༢༠༠༦ ལོར་མི་ ༡ ལས་མ་བྱུང་བ་རེད། ཚུད་རྒྱུགས་ནང་ཞུགས་མཁན་ཉུང་དུ་འགྲོ་བཞིན་འདུག་ལ། ཞུགས་མཁན་གྱི་སྤུས་ཚད་ཀྱང་འདོད་བློ་ཁེངས་པ་ཞིག་ཡོང་གི་མི་འདུག སློབ་སྟོན་པ་རག་མིན་དང་མཐུན་རྐྱེན་ཆ་ཚང་བ་ཞིག་སྦྱར་ཐུབ་ཡོད་མིན་དེ་ཡང་། སློབ་སྟོན་པ་འཇོག་རྒྱུ་དང་ཟབ་སྦྱོང་སྤྲོད་རྒྱུ་ཙམ་མིན་པར། ཁོང་ཚོར་ཞོར་ལས་ལས་གཞན་པའི་རང་དབང་ཆ་ཚང་བ་སྤྲད་ཡོད། སློབ་སྟོན་པ་བསྐོ་མ་ཐུབ་པ་མིན་ཡང། དེས་སློབ་གཉེར་བར་ཚོད་འཛིན་བྱེད་རྒྱུ་མང་དྲགས་ན་ཕན་ལས་གནོད་ཆེ་བའི་གནད་འགག་ཅིག་ཡོད། འོན་ཀྱང། སྒྲིག་ཞུགས་མ་ཡིན་པའི་རང་དབང་ཉམས་ཞིབ་ཀྱི་ལམ་ཁ་དེར་འགྲོ་རྒྱུ་ཡིན་ལབ་མཁན་ཚོས་སྐབས་རེར་ཁོང་ཚོར་སློབ་སྟོན་པ་དགོས་ཀྱི་འདུག ཉམས་ཞིབ་བྱེད་སྟངས་ཤེས་ཀྱི་མི་འདུག་ཅེས་བཤད་སྟབས། ང་ཚོས་གནས་སྟངས་ལ་བལྟས་ཏེ་ཟབ་སྦྱོང་ཐེངས་གཉིས་ཙམ་གོ་སྒྲིག་བྱས་ཡོད།  ཟབ་སྦྱོང་སྤྲོད་པ་དང་སློབ་སྟོན་པ་བསྐོ་རྒྱུ་སོགས་ཆ་རྐྱེན་མང་པོ་བཟོས་པ༌ཡིན་ན། སྒྲིག་ཞུགས་དང་སྒྲིག་ཞུགས་མ་ཡིན་པ་གཉིས་ཀྱི་ཐོག་མའི་དམིགས་ཡུལ་འདྲེས་འགྲོ་བཞིན་ཡོད་སྟབས། ལོ་གཉིས་རིང་མཚམས་འཇོག་བྱས་ཏེ། གནད་དོན་དེར་བསྐྱར་ཞིབ་རིམ་པར་བྱས་ཡོད། ད་ལོ་རྣམ་པ་གསར་པ་ཞིག་གི་ཐོག་ལས་གཞི་བསྐྱར་འཛུགས་གནང་ཐུབ་པ་བྱུང་བ་རེད། ཅེས་བརྗོད་བྱུང་།

འདི་ལོ་ནས་རིགས་གཅིག་རྐང་འཛིན་གྱི་ཚུད་རྒྱུགས་ལ་འགྱུར་བ་གཏོང་དོན་ཅི་ཡིན་དང་དེའི་དགེ་མཚན་སྐོར་དྲིས་སྐབས། ད་བར་ང་ཚོས་སྒྲིག་ཞུགས་མ་ཡིན་པའི་རིགས་གཅིག་རྐང་འཛིན་ཐེངས་ ༥ ཙམ་བསྡུས་ཡོད་ལ། ལས་རིམ་དེར་ཞུགས་མཁན་ཚོར་རིགས་གཅིག་རྐང་འཛིན་ཐོག་མི་ཚེ་ཧྲིལ་པོ་གཏོང་ཐུབ་པའི་ཆོད་སེམས་བརྟན་པོ་དགོས་ལ། ཆོད་སེམས་ཡོད་པ་བཞིན་དཀའ་ལས་རྒྱག་ཐུབ་མཁན་ཞིག་དགོས་པ་རེད། ང་ཚོའི་སྤྱི་ཚོགས་ནང་དེ་འདྲ་ཉུང་ངུ་ལས་མེད་ལ། ཕར་ཞིབ་འཇུག་བྱས་སྐབས། སྤྱི་ཚོགས་ནང་ཤེས་ཡོན་ཐོག་རྩེ་ཕུལ་གྱི་ལམ་ལ་ཞུགས་མཁན་ཧ་ལམ་དཀོན་པོ་ཡིན་དུས། ལས་གཞི་དེར་འགྱུར་བ་ཞིག་གཏོང་དགོས་བྱུང་བ་རེད། སྔོན་མ་ཡིན་ན། ཟླ་རེར་སློབ་ཡོན་ ༤༥༠༠ རེ་སྤྲད་ཅིང་། དེའི་ཟུར་དུ་ལས་ཀ་བྱ་ཆོག་གི་མེད། ཚུད་རྒྱུགས་ནང་ཞུགས་མཁན་མང་ཆེ་བ་བོད་ནས་ཕེབས་མཁན་གསར་འབྱོར་བ་ཡིན་པ་དང་། ཁོང་ཚོ་ཕལ་ཆེ་བའི་སྡོད་ས་ངྷ་ས་ཡིན་སྟབས། ཟས་སོང་དང་ཁང་གླ༌སོགས་འཚོ་བའི་དཀའ་ངལ་འཕྲད་ཀྱི་ཡོད་པ་དངོས་ཡོད་རེད། ཅེས་གསུངས་སོང་།  

ཁོང་གིས་མུ་མཐུད་དུ་གསུངས་དོན། ཁོང་ཚོའི་སློབ་ཡོོན་སྤར་ཏེ་སྲི་ཞུའི་ལས་བྱེད་སྤྱི་མཚུངས་ལྟར་བྱ་རྒྱུ་དེའང་གཞི་རིམ་གྱི་ལྟ་གྲུབ་དང་མཐུན་གྱི་མི་འདུག དེ་ནས་ང་ཚོས་ལོ་གཉིས་རིང་བསྐྱར་ཞིབ་བྱས་ཏེ། ལས་ཀ་བྱེད་ཀྱི་ཡོད་མེད་ལྟོས་མེད་ཐོག་ཉམས་ཞིབ་ཀྱི་སྤུས་ཚད་དང་གྲུབ་འབྲས་གཙོ་བོར་བཟུང་ཡོད། ང་ཚོས་སྔོན་མ་རིགས་གཅིག་རྐང་འཛིན་གྱི་སློབ་མ་བསྡུས་པ་རེད། ད་ལྟ་ང་ཚོས་རིགས་གཅིག་རྐང་འཛིན་སློབ་གཉེར་བ་མིན་པར། རིགས་གཅིག་རྐང་འཛིན་ཉམས་ཞིབ་པ་སྐྱེད་སྲིང་གི་ལས་གཞི་ཞིག་སྤེལ་གྱི་ཡོད། སློབ་ཁོངས་སུ་སྐྱ་སེར་ཕོ་མོ་རྒན་གཞོན་གྱི་ཁྱད་པར་མེད་ཐོག་ལོ་ཚད་ལའང་ཚད་བཀག་མེད། ཚུད་རྒྱུགས་སྐབས་ངག་རྒྱུགས་ལ་བརྒྱ་ཆ་ ༢༥ ཡོད་པ་ཕུད། གཞན་བརྒྱ་ཆ་ ༧༥ ནི་སྙན་འབུལ་བའི་ཤེས་ཡོན་གྱི་ཉམས་མྱོང་དང་། གྲུབ་འབྲས། འཆར་གཞི་སོགས་ཡིག་ཆ་ཁག་གཞི་རྩར་བཞག་སྟེ་འདེམས་སྒྲིག་གནང༌བཞིན་ཡོད། འདེམས་སྒྲིག་གནང་ཕྱོགས་ཐད་སྒྲིག་གཞིའི་དགོངས་དོན་བཞིན་ཚོགས་ཆུང་ཟུར་འཛུགས་གནང་ཡོད་པ་དང་། ཚོགས༌ཆུང་ནང་ཤེས་རིག་གི་ཚོགས་མི་གཅིག་མ་གཏོགས་གཞན་ཚང་མ་ཕྱི་ལོགས་ནས་ཡོང་བ་རེད། ཅེས་བརྗོད་ཡོད།

ཡང་ཁོང་ལ་རིགས་གཅིག་རྐང་འཛིན་གྱི་ཉམས་ཞིབ་པ་སློབ་ཐོན་སྐབས། ལག་འཁྱེར་དང་ཐོབ་ཐང་གང་འདྲ་ཡོད་མེད་དྲིས་པར་ཁོང་གིས། ང་ཚོའི་ལས་གཞི་དེ་སྒྲིག་ཞུགས་མ་ཡིན་པ་རེད། ང་ཚོའི་སློབ་ཡོན་གྱི་དུས་ཡུན་ལོ་གསུམ་རྒྱས་བཅད་ཡོད་ནའང་། གལ་སྲིད་བཟློག་ཏུ་མེད་པའི་དཀའ་ངལ་འཕྲད་ཚེ་ཉམས་ཞིབ་དུས་ཚོད་ཕར་འགྱང་བྱ་ཆོག་གི་རེད། རིགས་གཅིག་རྐང་འཛིན་གནང་མཁན་དག་གི་ཉམས་ཞིབ་རྫོགས་རྒྱུར་སྔ་ཕྱི་ཡོང་གི་ཡོད་སྟབས། མི་རེར་མཛད་སྒོ་རེ་འཚོགས་རྒྱུ་ཡོང་གི་མི་འདུག ཡིན་ནའང་། མཐའ་མའི་ཆེད་རྩོམ་ལ་ཆེད་ལས་མཁས་པའི་ཚོགས་ཆུང་བཙུགས་ཏེ་ཞིབ་འཇུག་མཐིལ་ཕྱིན་བྱས་མཐར༌སྒྲུབ་ཕྱོགས་ཀྱི་རྒྱབ་གཉེར་འབྱོར་རྗེས། ཆེད་རྩོམ་དམ་བཅའི་རྣམ་པ་ཞིག་གི་ཐོག་བགྲོ་གླེང་གི་ལས་རིམ་ཞིག་འཚོགས་དགོས་ལ། དམ་བཅའ་དེའི་ཐོག་རྒྱབ་གཉེར་ཐོབ་ཚེ། ད་གཟོད་ལག་འཁྱེར་སྤྲོད་ཀྱི་ཡོད་པ་རེད། ལག་འཁྱེར་དེ་ནི། ༼རིགས་གཅིག་རྐང་འཛིན་ཉམས་ཞིབ་པ༽ ཞེས་པའི་སློབ་ཐོན་ལག་འཁྱེར་ཙམ་ལས། འབུམ་རམས་པ་ Ph.d  དང། གཙུག་ལག་རབ་འབྱམས་པ་ MA  སོགས་དང་ཐོབ་མཚུངས་ཡིན་ཟེར་བའི་ལག་འཁྱེར་གང་ཡང་སྤྲོད་རྩིས་མེད། ང་ཚོའི་ལག་འཁྱེར་དེར་སྤྱི་ཚོགས་ཀྱིས་ཚུར་གོང་ཚད་རྒྱག་རྒྱུ་བྱུང་ན་བཟང་བ་ལས། དང་པོ་ནས་ཕར་གོང་ཚད་རྒྱག་རྒྱུ༌དང་རྗེས་འབྲང་བྱ་རྒྱུའི་བསམ་བློ་གཏོང་གི་མེད། ཅེས་བརྗོད་ཡོད།

འདི་གའི་གསར་འགོད་པས་སྐབས་དང་པོའི་རིགས་གཅིག་རྐང་འཛིན་སློབ་ཐོན་པ་ལྷ་ཆབ་སྦྱིན་པ་ལགས་སུ། རིཊ་གཅིག་རྐང་འཛིན་གྱི་ཉམས་ཞིབ་ལ་གྲུབ་འབྲས་གང་འདྲ་བྱུང་ཡོད་མེད་དང་། སྤྱི་ཡོངས་ནས་ལས་གཞི་འདིའི་ཐོག་ལྟ་ཚུལ་ཅི་ཡོད་སྐོར་དྲིས་སྐབས་ཁོང་གིས་ལན་འདེབས་གནང་དོན། ང་ལ་མཚོན་ན། རིཊ་གཅིག་རྐང་འཛིན་གྱི་ཉམས་ཞིབ་ལས་གཞིའི་ཐོག་འདོད་པ་ཁྱོན་ནས་ཁེངས་མ་སོང་། གཙོ་བོ་ཉམས་ཞིབ་བརྒྱུད་རིམ་ཁྲོད་མཐུན་རྐྱེན་མ་འདང་བའི་དཀའ་ངལ་བྱུང་སོང་། ཟླ་རེར་ཧིན་སྒོར་བཞི་སྟོང་ཙམ་མ་གཏོགས་ཉམས་ཞིབ་ཀྱི་རྒྱུ་ཆ་དང་། ཉམས་ཞིབ་ཆེད་འགྲོ་སྐྱོད་ཀྱི་མཐུན་རྐྱེན་གཅིག་ཀྱང་སྦྱར་ཡོད་པ་མ་རེད། གཉིས་པ། ཐོག་མའི་ཆ་རྐྱེན་ནང་། རིཊ་གཅིག་རྐང་འཛིན་སློབ་ཐོན་སྐབས། གཞུང་ལ་སྲི་ཞུ་བསྒྲུབ་དགོས་སྐོར་བཀོད་ཡོད་ཀྱང་། ང་ཚོ་སློབ་མཐར་ཕྱིན་རྗེས་ཤེས་རིག་གིས་ལས་ཀ་གང་ཡང་གོ་སྒྲིག་བྱས་མ་སོང་ལ། ཉམས་ཞིབ་རྫོགས་ཏེ་གྲུབ་ཡར་ཕུལ་ཡོད་ཀྱང་། མཛད་སྒོ་དང་བགྲོ་གླེང་དེ་འདྲ་ཚོགས་མེད་པ་མ་ཟད། ལག་འཁྱེར་ཡང་ད་བར་སྤྲད་མ་སོང་། ལྷག་པར་དུ། འདི་ལོར་ཡིག་རྒྱུཊ་གཏོང་མི་དགོས་པར་རིཊ་གཅིག་རྐང་འཛིན་ནང་ཚུད་ཐབས་བྱས་པ་དེས། ལག་འཁྱེར་མེད་པའི་གསར་འབྱོར་བ་མང་པོ་ཞིག་ལ་དཀའ་ངལ་འཕྲད་ངེས་རེད་དྲན་གྱི་འདུག ཅེས་བརྗོད་བྱུང་།  

གསར་འགོད་པ། དཔལ་ལྡན།