བཀའ་བློན་ཁྲི་པ་ཡང་བསྐྱར་བསྐོ་མིན་མི་མང་གི་ལག་ཏུ་ཡོད།

༧གོང་ས་མཆོག་གིས་བཙན་བྱོལ་བོད་མིའི་བཅའ་ཁྲིམས་ནང་གི་ཁོང་གི་སྐུ་དབང་ཡོད་ཚད་མི་མང་གིས་བདམས་པའི་ཆབ་སྲིད་ཀྱི་དབུ་ཁྲིད་དག་ལ་བགོ་བཤའ་རྒྱག་དགོས་པའི་གསུང་འཕྲིན་བསྩལ་བ་ལྟར། བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གིས་བཏོན་པའི་སྙན་ཐོ་དེ་འགྲེམས་སྤེལ་བྱས་རྗེས། མི་མང་ནང་གླེང་སློང་དང་དོགས་པ་སྣ་ཚོགས་ཤིག་ཡོང་གི་ཡོད་པའི་གནད་དོན་ཁག་ཅིག་གི་ཐད། བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གི་ཚོགས་མི་དང་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ལ་བཅར་འདྲི་བྱས་ཡོད།

དྲི་བ། བཅའ་ཁྲིམས་བསྐྱར་བཅོས་ཚོགས་ཆུང་གི་གྲུབ་ཆ་དང་ལས་རིམ་གྱི་ཐད་ནས་གསལ་བཤད་སྙིང་བསྡུས་ཤིག་གནང་རོགས།

ལན། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་སྐབས་ ༡༡ པའི་ཐོག་གི་གྲོས་ཆོད་བཞག་པ་ལྟར། ཚོགས་གཙོ་སྦྲེལ་པོ་གཉིས་དང་། བཀའ་བློན་ཁྲི་པ་ཟམ་གདོང་རིན་པོ་ཆེ། ཤེས་རིག་བཀའ་བློན་ཐུབ་བསྟན་ལུང་རིགས། སྤྱི་འཐུས་ཚོགས་ཟུར་པདྨ་འབྱུང་གནས་བཅས་བཀའ་སྤྱི་གཉིས་ལས་གྲུབ་པའི་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་ཞིག་བཙུགས་པ་རེད། ཕྱི་ཟླ་ ༣ ཚེས་ ༢༩ ཉིན་ནས་ཕྱི་ཟླ་ ༤ ཚེས་ ༡༡ པར་ཚོགས་ཆུང་གི་ཚོགས་མི་རྣམས་ཀྱིས་དོན་ཚན་རེ་རེ་བཞིན་ཞིབ་བསྡུར་བྱས་ཏེ་སྔོན་མའི་ཟིན་བྲིས་ལ་སྣོན་འཕྲི་སྤོར་གཅོག་དང་། ལྷག་པར་དུ་ཁྲིམས་ལུགས་མཁས་དབང་གདན་འདྲེན་གྱིས་ལམ་སྟོན་ཞུས་ཏེ། ད་ལྟ་བཀྲམས་ཟིན་པའི་ཟིན་བྲིས་དེ་གྲུབ་པ་རེད། དེའང་ལས་འཆར་ཚོགས་ཆུང་གི་སྙན་ཐོའི་ནང་གང་འཁོད་པ་དེར་གྲོས་ཚོགས་འཐུས་མིའི་མང་མོས་རྒྱབ་སྐྱོར་བྱུང་བ་གཞིར་བཟུང་། བཅའ་ཁྲིམས་བསྐྱར་བཅོས་ཟུར་འཛར་དང་པོ་གཞིར་བྱས་ཏེ་བཟོས་ཡོད། དེའི་ནང་སྔོན་གླེང་དང་དོན་ཚན་དང་པོ་གསར་འཇུག་བྱས་ཡོད་པ་དེ་ཟིན་བྲིས་གཉིས་ཀའི་ནང་གཅིག་གྱུར་རེད། ཡིན་ནའང་། རྒྱལ་ཁབ་ཀྱི་དབུ་ཁྲིད་ཅིག་མི་དགོས་པའི་ཐོག་ནས།  ༸གོང་ས་མཆོག་གི་སྐུ་དབང་དང་མཛད་འགན་གང་ཡོད་པ་དག  དམངས་གཙོའི་ཀ་བ་གསུམ་ལ་བགོ་བཤའ་བརྒྱབ་སྟེ་བཟོས་པ་དེར་མང་མོས་བྱུང་བ་རེད། གཉིས་པ།  མི་རིགས་ཀྱི་འགན་འཛིན་ཞིག་དགོས་པའི་ཆ་རྐྱེན་འོག བཅའ་ཁྲིམས་དོན་ཚན་ ༡༩ པའི་ནང་གི་༸གོང་ས་མཆོག་གི་སྐུ་དབང་དེ་དག  མི་རིགས་འགན་འཛིན་དང་བཀའ་བློན་ཁྲི་པ། སྤྱི་འཐུས་ཚོགས་གཙོ་བཅས་ལ་བགོ་བཤའ་རྒྱག་རྒྱུའི་ཟིན་བྲིས་གཉིས་པ་ཞིག་བཟོས་ཡོད་པ་རེད། ད་ལྟ་མི་མང་ལ་བཀྲམས་ཡོད་པ་དེ་ནི་ཟུར་འཛར་དང་པོའི་ནང་ཡོད་པ་དེ་དག་དང་། ལྷག་པར་དུ་༸གོང་ས་མཆོག་གི་གསུང་འཕྲིན་དང་གྲོས་ཚོགས་ནང་ལ་བགྲོ་གླེང་བྱུང་བའི་གནད་དོན་ཁག་ལ་གཞི་བཅོལ་བའི་ཐོག་ནས།  འགྱུར་བ་ཕྱིན་པའི་རིགས་ཟུར་དུ་བཏོན་ཞིང་། མི་མང་ལ་གཟིགས་བདེ་བའི་ཆེད་དུ་ཟུར་འཛར་གསུམ་པ་ཞིག་བཟོས་ཏེ།  ཕྱི་ཟླ་ ༤ པའི་ཚེས་ ༡༡ ཉིན་ཚོགས་དྲུང་ལས་ཁུངས་ལ་གཏན་འབེབས་དུས་ཚོད་ལྟར་ཕུལ་པ་དེ་རེད། 

དྲི་བ། དགོས་པ་རྒྱུ་མཚན་གང་དག་ལ་བརྟེན་ནས་གྲོས་ཚོགས་ཀྱི་ཁྲིམས་འཆར་དག་ཁྲིམས་ཀྱི་ངོ་བོ་ཆགས་པར་སྤྱི་འཐུས་ཚོགས་གཙོས་ཚད་འཛིན་མིང་རྟགས་འགོད་དགོས་པ་བཟོས་པ་ཡིན་ནམ།

ལན། ད་ལྟའི་བར་ཁྲིམས་བཟོ་རྒྱུ་དེ་སྤྱི་འཐུས་ལྷན་ཁང་ནས་བཟོ་བཞིན་ཡོད་པ་དང་། སྤྱི་འཐུས་ལྷན་ཁང་ནས་གཏན་འབེབས་བྱས་པའི་ཁྲིམས་འཆར་དེ་ཁྲིམས་ཀྱི་ངོ་བོར་འགྲོ་བར་༸གོང་ས་མཆོག་གིས་མཚན་རྟགས་བསྐྱོན་དགོས་ཀྱི་ཡོད།  མ་འོངས་པར་རྒྱལ་ཁབ་ཀྱི་དབུ་ཁྲིད་ཅིག་མེད་པའི་གནས་སྟངས་འོག་གདམ་ཀ་གསུམ་མ་གཏོགས་ཡོད་པ་མ་རེད། ཁྲིམས་འཆར་ཁྲིམས་སུ་འགྲོ་རྒྱུར་མཚན་རྟགས་འགོད་མཁན་དེ་ཁྲིམས་ཞིབ་པ་ཆེ་བ་དང་། བཀའ་བློན་ཁྲི་པ། སྤྱི་འཐུས་ཚོགས་གཙོ་གང་རུང་ཞིག་ཆགས་དགོས་པ་རེད།  ཁྲིམས་ཞིབ་པ་ཆེ་བས་མཚན་རྟགས་སྐྱོན་པ་ཡིན་ན། མ་འོངས་པར་ཁྲིམས་གཏན་འབེབས་བྱེད་སྟངས་དང་ཁྲིམས་ཀྱི་ཚིག་དོན་ལ་འགྲེལ་བཤད་རྒྱག་སྟངས་མ་འདྲ་བ་བྱུང་སྐབས། རང་བཙན་རྒྱལ་ཁབ་ཁག་ཅིག་ནང་བཅའ་ཁྲིམས་ཀྱི་ཁྲིམས་ཁང་ཟེར་ནས་ཟུར་དུ་འགྲེལ་བརྗོད་པ་ཡོད་ཀྱང་། རྒྱ་གར་དང་ང་ཚོར་མཚོན་ན་བཅའ་ཁྲིམས་དང་སྒྲིག་གཞི་ཁག་ལ་འགྲེལ་བརྗོད་མ་འདྲ་བ་ཡོང་སྐབས། ཁྲིམས་ཞིབ་ཁང་གིས་ཐག་གཅོད་གནང་དགོས་ཀྱི་ཡོད། ཁྲིམས་འཆར་ཞིག་ཁྲིམས་ཀྱི་ངོ་བོར་འགྲོ་རྒྱུར་མཚན་རྟགས་སྐྱོན་མཁན་དང་ཁྲིམས་ཐག་གཅོད་མཁན་གཉིས་ཆ་ཁྲིམས་ཞིབ་པ་ཆགས་པ་ཡིན་ན། དེ་ཏག་ཏག་ཅིག་བསྡད་ཡོད་པ་མ་རེད། གཉིས་པ། བཀའ་བློན་ཁྲི་པའི་མཚན་རྟགས་སྐྱོན་ན་གང་འདྲ་ཡོང་མིན་དེ་རེད།  ཁྲིམས་གཏན་འབེབས་སྐབས་གྲོས་ཚོགས་ནང་བཀའ་བློན་ཁྲི་པ་ཡོད་པ་མ་ཟད། བཀའ་ཤག་གིས་ཁྲིམས་འཆར་འཁྱེར་ཡོང་ཆོག་གི་རེད་ལ། དེ་ལ་བགྲོ་གླེང་གི་ཆ་ཤས་ཆ་ཚང་ལེན་ཆོག་གི་ཡོད། དེ་འདྲ་ཞིག་ལ་གྲོས་ཚོགས་ནས་གཏན་འབེབས་བྱས་ཏེ། བཀའ་བློན་ཁྲི་པས་མཚན་རྟགས་སྐྱོན་པ་ཡིན་ན། ཁྲིམས་འཆར་དེར་བསྐྱར་སློག་བྱེད་པའི་ཆ་རྐྱེན་ཡོད་སྟབས་བཀའ་བློན་ཁྲི་པས་ཁྲིམས་འཆར་བསྐྱར་སློག་བྱས་པ་ཡིན་ན། གྲོས་ཚོགས་དང་བཀའ་ཤག་བར་འགལ་ཟླ་ཤུགས་ཆེན་པོ་ཞིག་ཡོང་སྲིད་པ་རེད།  སི་ཝེ་ཌེན་སོགས་འཛམ་གླིང་རྒྱལ་ཁབ་ཁ་ཤས་ནང་གྲོས་ཚོགས་ཀྱི་ཁྲིམས་འཆར་ཁྲིམས་སུ་བཅས་པར་གྲོས་ཚོགས་ཚོགས་གཙོས་མཚན་རྟགས་སྐྱོན་གྱི་ཡོད་པ་རེད། དེ་ལྟར་བྱས་ན། ཁྲིམས་འཆར་བསྐྱར་སློག་བྱེད་པའི་ཆ་རྐྱེན་དེ་མེད་པ་ཆགས་འགྲོ་བ་རེད། གལ་སྲིད་བསྐྱར་སློག་གི་ཆ་རྐྱེན་ཡོད་པའི་དབང་དུ་བཏང་ཡང་། རྒྱ་གར་ལྟ་བུར་མཚོན་ན། སྲིད་འཛིན་གྱིས་ཐེངས་གཅིག་ལ་བསྐྱར་སློག་བྱ་ཆོག་གི་རེད། གྲོས་ཚོགས་ཀྱིས་ཡང་བསྐྱར་དེ་ག་རང་གཏན་འབེབས་བྱས་པ་ཡིན་ན།  དེ་བསྐྱར་དུ་བསྐྱར་སློག་གི་ལམ་ཁ་ཡོད་པ་མ་རེད། དེ་བརྟེན། དམིགས་བསལ་གྱི་འགལ་ཟླ་དེ་འདྲ་ཆགས་ཀྱི་ཡོད་པ་མ་རེད།

དྲི་བ། བཅའ་ཁྲིམས་ནང་སྔར་ཡོད་ཀྱི་ཚིག་བརྗོད་ལས་བཙན་བྱོལ་བོད་གཞུང་གི་ཚབ་ཏུ། བཙན་བྱོལ་བོད་མིའི་གཞུང་གི་སྒྲིག་འཛུགས་ཞེས་བསྒྱུར་དགོས་དོན་གང་ལ་ཐུག་ཡོད་དམ།  

ལན། འགྱུར་བ་གཙོ་བོ་དེ་བཙན་བྱོལ་བོད་གཞུང་དེ་བཙན་བྱོལ་བོད་མིའི་གཞུང་གི་སྒྲིག་འཛུགས་སུ་བསྒྱུར་བ་དེ་རེད། དེ་དང་འབྲེལ་བའི་ཐོག་ནས་ཚིག་བརྗོད་གཞན་དག་ལའང་འགྱུར་བ་ཕྱིན་པ་རེད། ང་ཚོ་བཙན་བྱོལ་ལ་བསླེབས་པ་ནས་བཟུང་བཙན་བྱོལ་བོད་གཞུང་དང་བཀའ་ཤག་གི་ཡིག་ཆའི་ནང་། བཙན་བྱོལ་བོད་མིའི་གཞུང་གི་སྒྲིག་འཛུགས་ཞེས་བེད་སྤྱོད་བཏང་ཡོད། ཡིན་ནའང་། བཅའ་ཁྲིམས་ནང་ལ་ད་ལྟའི་བར་དུ་བཙན་བྱོལ་བོད་གཞུང་ཞེས་འཁོད་བསྡད་ཡོད་པ་རེད།  བོད་ཟླ་ ༡ ཚེས་ ༡༥ ཉིན་ ༸གོང་ས་མཆོག་གི་གསུང་ཆོས་ཤིག་དང་འབྲེལ་ཏེ་མང་ཚོགས་ལ་བཀའ་སློབ་ཅིག་གནང་བའི་ནང་། ང་ཚོས་ངོས་ནས་བཙན་བྱོལ་བོད་གཞུང་༼government༽ཞེས་ལབ་ཀྱི་མེད་པར། བཙན་བྱོལ་བོད་མིའི་གཞུང་གི་སྒྲིག་འཛུགས་༼ Central Tibetan Administration ༽ཞེས་ལབ་ཀྱི་ཡོད་པ་དང་།  བོད་པའི་ཚིག་གི་ནང་གཞུང་ཟེར་བ་ལ་གོ་དོན་འདྲ་མི་འདྲ་མང་པོ་ཞིག་ཡོད་པས། མཐའ་གཅིག་ཏུ་༼ government ༽ལ་གོ་མི་དགོས་པའི་བཀའ་སློབ་ཅིག་གནང་ཡོད་པ་རེད། གཉིས་པ། གྲོས་ཚོགས་ཚོགས་དུས་ ༡༡ པའི་ཐོག་བཀའ་བློན་ཁྲི་པས་གྲོས་ཚོགས་ནང་ལ་གསལ་བཤད་ཅིག་གནང་ཡོད་པའི་ནང་།  དེང་སང་རྒྱ་ནག་གི་བརྒྱུད་སྐུལ་དང་ཡང་ན་ཡུལ་མི་སོ་སོའི་རང་མོས་ཀྱི་ཐོག་ནས་ཡིན་མིན་གང་ལྟར་ཀྱང་། བོད་པའི་དར་ཆ་སྒྲེངས་བ་དང་འབྲེལ་བའི་ཐོག་ནས། བཙན་བྱོལ་གཞུང་ཞེས་པ་དེ་འགྲིག་མིན་ཐད་གནས་ཚུལ་མང་པོ་ཞིག་ཡོང་བཞིན་ཡོད་པ་དང་། ལྷག་པར་དུ་ཁྲིམས་ལ་གཏུགས་བཞག་པའི་གནས་ཚུལ་ཡང་ཡོང་གི་ཡོད་པ་རེད། དེའི་ཐད། རྒྱ་གར་གཞུང་གི་ངོས་ནས་དགག་བྱ་བཏོན་བཞག་པ་དེ་འདྲ་ཡོད་པ་མ་རེད། 

 ཡིན་ནའང་། སྔོན་མ་ང་ཚོ་བཙན་བྱོལ་ལ་བསླེབས་པའི་སྐབས་སུ། རྒྱ་གར་སྲིད་བློན་དང་པོ་ནེ་རུ་ཡིས་བཙན་བྱོལ་གཞུང་ཞེས་ལབ་ན་ཏག་ཏག་བསྡད་ས་མ་རེད་ཅེས་པའི་དགོངས་ཚུལ་ཞིག་གསུངས་ཡོད་པ་རེད།  ད་ལྟའི་གནས་སྐབས་ལ་ཁྲིམས་ལ་གཏུག་མཁན་གྱི་གནས་ཚུལ་ཁ་ཤས་ཡོང་གི་འདུག  དེ་བཞིན། རྒྱ་གར་སྤྱི་ཚོགས་ནང་གི་གནད་ཡོད་མི་སྣ་ཁག་ཅིག་གིས་ཀྱང་བཙན་བྱོལ་བོད་གཞུང་དང་བཙན་བྱོལ་གྱི་གྲོས་ཚོགས་ཞེས་མིང་བཏགས་པ་ཡིན་ན། རྒྱ་དཀར་ནག་གཉིས་ཀྱི་གྲོས་མཐུན་ཡིག་ཆ་དེ་ཚོ་དང་འགལ་བསྡད་ཡོད་པའི་སྐོར་གྱི་བསམ་ཚུལ་ཤུགས་ཆེན་པོ་གསར་འགོད་བརྒྱུད་ལམ་ཁག་ནང་ཐོན་བསྡད་ཡོད། དེར་བརྟེན། མ་འོངས་པར་ཁྲིམས་ཁང་ཞིག་ནས་བཙན་བྱོལ་གཞུང་ཞེས་བེད་སྤྱོད་གཏོང་ཆོག་གི་མ་རེད་ཅེས་བཤད་པ་ཡིན་ན།  སྐབས་དེར་རང་བཞིན་གྱིས་དཀའ་ངལ་ཞིག་འཕྲད་ཡོང་གི་རེད།  དེར་མ་ཟད། བཀའ་ཁྲི་མཆོག་གིས་གྲོས་ཚོགས་ནང་འགྲེལ་བཤད་སྐྱོན་པའི་ནང་། གནད་དོན་གཞན་ཞིག་ནི་རྒྱ་ནག་གཞུང་གིས་ནུབ་ཕྱོགས་རྒྱལ་ཁབ་ཁག་གི་མགོ་ཁྲིད་ཚོར་བོད་དོན་དང་འབྲེལ་བའི་སྐད་ཆ་བཤད་སྐབས། ཁྱེད་ཚོས་༸རྒྱལ་བ་རིན་པོ་ཆེར་རྒྱབ་སྐྱོར་བྱས་པ་ཡིན་ན་ཁ་བྲལ་ལ་རྒྱབ་སྐྱོར་བྱེད་ཀྱིན་ཡོད་པ་རེད་ཅེས་བརྗོད་དེ།  བཙན་བྱོལ་བོད་མིའི་བཅའ་ཁྲིམས་ལུང་འདྲེན་བྱེད་བཞིན་པའི་གནས་ཚུལ་མང་པོ་ཡོང་གི་ཡོད་པ་རེད། བོད་མིའི་རྩ་དོན་ལ་གནོད་པ་སྐྱེལ་འདོད་ཡོད་མཁན་ཚོར་ལག་པ་འཆང་ས་མེད་པ་བཟོ་བའི་གནས་སྟངས་ཤིག་གི་འོག་ནས། བཙན་བྱོལ་བོད་གཞུང་དེ་བཙན་བྱོལ་བོད་མིའི་གཞུང་གི་སྒྲིག་འཛུགས་ལ་བསྒྱུར་དགོས་པའི་གནད་དོན་དེ་འདྲ་ཞིག་རེད།

དྲི་བ།  དགའ་ལྡན་ཕོ་བྲང་ཕྱོགས་ལས་རྣམ་རྒྱལ་གྱི་ཚབ་ལ་བདེན་པ་ཉིད་རྒྱལ་གྱུར་ཅིག་ཅེས་བཀོད་འདུག་པས་ན། བདེན་པ་ཉིད་རྒྱལ་གྱུར་ཅིག་ཅེས་པ་འདིས་གཞུང་ཞིག་གི་ངོ་བོ་གསལ་བོར་མཚོན་ཐུབ་ཀྱི་ཡོད་དམ།   

ལན། འདིའི་ཐད་ལ་ཡིག་ངག་གཉིས་ཐོག་ནས་བསམ་ཚུལ་གསུང་མཁན་མང་པོ་འབྱོར་སོང་། ཡིན་ནའང་། མཐའ་མ་ག་འདྲ་ཞིག་གཏན་འབེབས་ཡོང་མིན་དེ་རྒྱལ་ཡོངས་ཚོགས་ཆེན་ཐེངས་གཉིས་པ་དང་གྲོས་ཚོགས་ཀྱི་སྐབས་ལ་གཏན་འབེབས་ཡོང་གི་རེད།  ཚོགས་ཆུང་གི་ངོས་ནས་རྒྱ་གར་གཞུང་གི་རྒྱལ་རྟགས་ནང་། ནང་པའི་ལྟ་གྲུབ་ལ་གཞི་བཅོལ་ཏེ་༼སཱའ་ངྷེ་ནའེ། ཇཱ་ཡའེ་ཏཱེ་༽ཞེས་བཀོད་ཡོད་པས།  ང་ཚོ་བོད་པའི་འཐབ་རྩོད་ཀྱང་བདེན་པའི་འཐབ་རྩོད་ཡིན་སྟབས། བདེན་པ་ཉིད་རྒྱལ་གྱུར་ཅིག་ཅེས་བཞག་པ་རེད། དེ་མིན་༼ བོད་མང་གཙོའི་གཞུང་རྒྱལ་གྱུར་ཅིག ༽ ༼ བོད་ཆོས་སྲིད་གཉིས་ཀྱི་མང་གཙོའི་གཞུང་རྒྱལ་གྱུར་ཅིག༽ ལ་སོགས་པའི་བསམ་ཚུལ་མང་པོ་འདུག  དགའ་ལྡན་ཕོ་བྲང་ནི་རྒྱལ་བ་རིན་པོ་ཆེའི་བླ་བྲང་གི་མཚན་ཡིན་ལ། དགའ་ལྡན་ཕོ་བྲང་གི་གཞུང་དེ་བཅའ་ཁྲིམས་བསྐྱར་བཅོས་སྐབས་འགྱུར་བ་འགྲོ་དགོས་པ་དེ་རྒྱལ་བ་རིན་པོ་ཆེས་བཀའ་གནང་ཡོད་པས། སྐུ་སྒེར་ཡིག་ཚང་ཡང་དགའ་ལྡན་ཕོ་བྲང་བླ་བྲང་ལ་བསྒྱུར་དགོས་པ་དང་། བཙན་བྱོལ་བོད་གཞུང་གི་རྒྱལ་རྟགས་སྟེང་གི་ཚིག་ལའང་འགྱུར་བ་གཏོང་དགོས་པ་ཞིག་རང་བཞིན་གྱིས་ཆགས་ཡོད་པ་རེད། དེའི་ཚབ་ལ་ཚིག་བརྗོད་གང་ཞིག་འོས་མིན་ཐད་ཚོགས་ཆུང་གི་ངོས་ནས་ད་ལྟའི་གནས་སྐབས་ལ་བདེན་པ་ཉིད་རྒྱལ་གྱུར་ཅིག་ཅེས་པའི་བསམ་ཚུལ་འདི་བཏོན་པ་རེད།  ཡིན་ནའང་། མང་ཚོགས་ནང་བསམ་ཚུལ་མང་པོ་ཡོང་གི་ཡོད་པར་བརྟེན། གྲོས་ཚོགས་ནང་ཚིག་བརྗོད་གང་གི་ཐོག་བསམ་ཚུལ་མང་པོ་སྤུངས་ཐུབ་མིན་གྱི་སྟེང་ནས་གཏན་འབེབས་བྱ་དགོས་པ་རེད།

དྲི་བ། ༸གོང་ས་མཆོག་གི་སྐུ་དབང་དང་འབྲེལ་བ་མེད་པའི་འོས་བསྡུའི་ལས་རིམ་གྱི་དུས་ཡུན་དང་ཁྲིམས་ཞིབ་པའི་ལས་ཡུན་གཉིས་ལའང་འགྱུར་བ་བཏང་འདུག  དེར་དགོས་པ་རྒྱུ་མཚན་ཅི་ཞིག་ཡོད་དམ།

ལན། སྔོན་མ་ལྕགས་དཔར་ནང་འཇུག་སྐབས་ཉི་མ་ ༡༢༠ དེ་ ༡༣༠ ལ་ནོར་བ་མིན་ནམ་བསམ་གི།  དམིགས་བསལ་ཉི་མ་ ༡༣༠ འཇོག་དགོས་དོན་མི་འདུག  ད་ཐེངས་ཚོགས་ཆུང་ནང་ཉི་མ་ ༡༢༠ བྱས་ན་མ་འགྲིག་མི་འདུག་པའི་བསམ་ཚུལ་བྱུང་སྟེ་ཟླ་བ་ ༤  ཡུན་ཚད་ལྟར་བཞག་པ་རེད།  ད་ལྟའི་གནས་སྟངས་མང་པོ་ཞིག་ལ་བལྟས་ནའང་། འོས་བསྡུའི་ལས་རིམ་འགྲོ་སྟངས་དང་།  ས་གནས་སོ་སོ་ནས་གྲངས་བཤེར་གྱིས་འོས་གྲངས་ཡར་སླེབས་ཏེ་ཕྱོགས་བསྡོམས་བྱེད་པའི་བར་དུས་ཚོད་མང་པོ་ཞིག་ལྷག་ཡོད་པ་དང་། གསང་བ་ཉར་མ་ཐུབ་པའི་གནས་སྟངས་སོགས་ཀྱི་རྐྱེན་པས།  ཉི་མ་ཉུང་རུ་གཏོང་དགོས་པའི་བསམ་ཚུལ་དེ་འདྲ་ཡོང་གི་འདུག  དེར་བརྟེན།  སྤྱི་འཐུས་འོས་བསྡུ་ཆེན་མོ་དང་འཕར་མའི་འོས་བསྡུ། བཀའ་བློན་ཁྲི་པའི་འོས་བསྡུ་ཆེན་མོ་དང་འཕར་མའི་འོས་བསྡུ་བཅས་ཉི་མ་ ༡༢༠ ནང་ཚུད་གནང་ཐུབ་པའི་གནས་སྟངས་ཤིག་ཆགས་ཡོད་པ་རེད། གཉིས་པ། ཁྲིམས་དཔོན་ཅིག་བསྐོ་བཞག་བྱེད་པར་རང་ལོ་ ༥༠ ལོན་དགོས་པ་དང་། དེང་དུས་ཀྱི་ཁྲིམས་ལུགས་གཙུག་ལག་ཁང་ཆེན་པོ་ཞིག་ནས་ཁྲིམས་རྩོད་པའིི་ལག་འཁྱེར་ཐོབ་མཁན། དེ་མིན་ཁྲིམས་ཞིབ་ཁང་དུ་ཁྲིམས་དཔོན་གྱི་ལས་ཀ་ལོ་བཅུ་ལ་བྱས་མྱོངས་མཁན་དེ་འདྲ་ཞིག   ད་ལྟ་ཡིན་ནའང་།  ང་ཚོ་བོད་པའི་སྤྱི་ཚོགས་ནང་ལ་སྟོན་རྒྱུ་མེད་པའི་གནས་སྟངས་ཆགས་འདུག་པའི་རྐྱེན་གྱིས།   སྤྱི་འཐུས་གྲོས་ཚོགས་སྐབས་ ༡༡ ཐོག་ལོ་ ༥ འཕར་འགྱངས་ཀྱི་བསྐྱར་བཅོས་གྲོས་འཆར་ཅིག་ཁྲིམས་ཞིབ་ཁང་ནས་བསྣམས་ཕེབས་པ་རེད། ཡིན་ནའང་། དེ་གྲོས་ཚོགས་ནང་གཏན་འབེབས་བྱེད་ཐུབ་མེད་པ་རེད།  ལོ་ ༥ གཏན་འབེབས་མ་ཐུབ་པ་དེ་རང་འཇགས་ཁྱེར་ཡོང་བ་ཡིན་ན། སྔོན་གྱི་གྲོས་ཚོགས་ཀྱི་ལས་རིམ་དེ་བསྐྱར་ཟློས་བྱས་པ་ཞིག་མ་གཏོགས་མེད་པས་རྐྱེན་གྱིས་ལོ་ ༡༠ བྱས་ཏེ་ཁྱེར་ཡོང་བ་རེད།  

དྲི་བ། བཅའ་ཁྲིམས་དོན་ཚན་ཉེར་གཅིག་པའི་ནང་དུ། ཡུན་ཚད་གཉིས་བསྟུད་མར་བཀའ་བློན་ཁྲི་པའམ་བཀའ་བློན་གྱི་ལས་ཁུར་བྱེད་བཞིན་པ་མ་ཡིན་པ། ཞེས་པའི་འོས་ཆོས་དེ་ཕྱིར་བསྡུ་བྱེད་དགོས་པའི་རྒྱུ་མཚན་གང་ལ་ཐུག་ཡོད་དམ།

ལན། ཚོགས་ཆུང་གི་བསམ་ཚུལ་ནི་ད་ལྟ་ཁྱོད་རང་གིས་བཤད་པ་དེ་དང་། བཀའ་བློན་ཁྲི་པའི་ལས་རོགས་བཀའ་བློན་དག་གི་འོས་གཞི་གྲོས་ཚོགས་ནང་འཁྱེར་མི་དགོས་པར།  བཀའ་བློན་ཁྲི་པ་རང་གིས་བསྐོ་བཞག་བྱེད་ཆོག་པ་བཟོས་ཡོད་པ་དེ་གཉིས་ཀར་འབྲེལ་བ་ཡོད་པ་རེད། ཚོགས་ཆུང་གི་བསམ་ཚུལ་ནི། བཀའ་བློན་ཁྲི་པ་མི་མང་གིས་ཐད་ཀར་འོས་འདེམས་བྱེད་བཞིན་ཡོད་པས། ཁོང་གི་ལས་དོན་ཚགས་ཚུད་པོ་ཡོང་ཆེད་བཀའ་བློན་ལས་རོགས་རྣམས་ཁོང་གི་འདོད་པ་གཞིར་བཟུང་བསྐོ་དགོས་པ་དེ་གལ་ཆེན་པོ་རེད།  བཀའ་བློན་ཁྲི་པར་མི་མང་གི་དབང་ལུང་ཡོད་ནའང་།  ཁོང་གིས་འོས་བབས་ཆེ་ཤོས་སུ་མཐོང་གི་ཡོད་པའི་གང་ཟག་དེ་གྲོས་ཚོགས་ཀྱིས་བཀག་པ་ཡིན་ན། མ་འོངས་པར་བཀའ་ཤག་གི་ལས་དོན་མ་འགྲུབ་པའི་གནས་སྟངས་བྱུང་སྐབས། བཀའ་ཤག་གི་ངོས་ནས་གྲོས་ཚོགས་ལ་ཁག་འགེལ་གྱིས་རྒྱུ་མཚན་འདྲེན་སྲིད་པ་རེད།  དེར་བརྟེན། བཀའ་བློན་ཁྲི་པ་ཁོ་རང་གི་འདོད་པ་ཡོད་པའི་མི་ཞིག་བསྐོ་ཐུབ་པ་ཡིན་ན།  བཀའ་ཤག་ཚགས་ཚུད་པོ་དང་དོན་འགྲུབ་པ་ཞིག་ཡོང་གི་རེད་བསམ་ནས། བཀའ་བློན་ཁྲི་པས་བཀའ་བློན་ལས་རོགས་རྣམས་ཐད་ཀར་བསྐོ་བཞག་བྱ་ཆོག་པ་བཟོས་པ་རེད། དེ་དང་འབྲེལ་ཡོད་ཀྱི་བཀའ་བློན་ཁྲི་པ་བསྟུད་མར་ཐེངས་གཉིས་བྱས་པའི་རྗེས་ལ་ཡང་བསྐྱར་བསྐོ་བཞག་བྱེད་འོས་མིན་གྱི་གནད་དོན་དེ། བཀའ་བློན་ཁྲི་པ་དེའི་འཇོན་ཐང་དང་ལས་དོན་འགྲུབ་མིན་ལ་རག་ལས་ཡོད་པ་དང་། ཡང་བསྐྱར་བསྐོ་བཞག་བྱ་མིན་དེ་མི་མང་གི་ལག་ན་ཡོད་པ་རེད། བཀའ་བློན་ཁྲི་པའི་ངོས་ནས་བཀའ་བློན་བསྟུན་མར་ཐེངས་གཉིས་གནང་མྱོང་མཁན་ཞིག་ཡང་བསྐྱར་བསྐོས་ན་ཕན་ཐོགས་འདུག་པའི་བསམ་ཚུལ་ཡོད་ཚེ། དེ་བསྐྱར་དུ་བསྐོ་ཆོག་པའི་ལམ་ཁ་ཞིག་འཇོག་པའི་ཆེད་དུ།  འོས་ཆོས་ནང་གསེས་དོན་ཚན་༼ཇ༽དེ་ཕྱིར་འཐེན་བྱས་པ་རེད། ཡིན་ནའང་། གཏན་འབེབས་བྱེད་ཐུབ་མིན་དེ་གྲོས་ཚོགས་ནང་འགྲོ་དགོས་པ་རེད་མ་གཏོགས། བཅའ་ཁྲིམས་བསྐྱར་བཅོས་ཚོགས་ཆུང་གིས་གང་བཟོས་པ་ཚང་མ་གཏན་འབེབས་གནང་ཟིན་པ་དེ་འདྲ་མ་རེད།
 

 དྲི་བ། བཅའ་ཁྲིམས་བསྐྱར་བཅོས་ཟིན་བྲིས་ནང་༸གོང་ས་མཆོག་གི་སྐུ་དབང་དང་ཐད་ཀར་འབྲེལ་བ་མེད་པའི་དོན་ཚན་རེ་འགར་བསྒྱུར་བཅོས་གནང་འདུག་སྟབས།   ད་ཐེངས་ཀྱི་བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་ལ་དེ་དག་བསྒྱུར་བཅོས་གཏོང་བའི་དབང་ཚད་ཡོད་དམ། 

ལན། བཅའ་ཁྲིམས་བསྐྱར་བཅོས་ཚོགས་ཆུང་གི་ལས་དོན་གྱི་གཞི་འཇོག་ས་གཙོ་བོ་དེ། ༸གོང་ས་མཆོག་གི་གསུང་འཕྲིན་དང་འབྲེལ་བ་ཡོད་པའི་ཐོག་ནས་རེད། ཡིན་ནའང་། བཅའ་ཁྲིམས་བསྐྱར་བཅོས་འགྲོ་དགོས་ཀྱི་ཡོད་སྟབས། གནད་དོན་གཞན་ཁ་ཤས་བསྐྱར་བཅོས་བྱ་ཆོག་པ་དེ་ལས་འཆར་ཚོགས་ཆུང་གི་སྙན་ཐོའི་ནང་ཡོད་པ་རེད། གཞན་དག་གྲོས་ཚོགས་ནང་བགྲོ་གླེང་བྱུང་ཟིན་པའི་གནད་དོན་ཁག་རེད།  ཡིན་ནའང་། གྲོས་ཚོགས་ནང་ལ་བགྲོ་གླེང་བྱུང་ཟིན་པའི་གནད་དོན་ཆ་ཚང་ལ་ང་ཚོས་ལག་པ་འཆང་རྒྱུ་ཡོད་པ་མ་རེད། གནད་དོན་འགའ་ཤས་ལ་ད་ཐེངས་ལག་པ་འཆང་བ་ཡིན་ན།  སྤྱིར་བཏང་གི་བཅའ་ཁྲིམས་བསྐྱར་བཅོས་གནང་བར་དོ་ཕོག་འགྲོ་སྲིད་པ་དེ་འདྲའང་ཡོད་པ་རེད། འབྲེལ་བ་ཡོད་མེད་ཀྱི་གནད་དོན་དེ་ནི།  ལྟ་སྟངས་མ་འདྲ་བ་གཉིས་དང་། འགྲེལ་བཤད་རྒྱག་སྟངས་མི་འདྲ་བ་གཉིས་ཀྱི་ཐོག་ནས་བཤད་དགོས་པ་རེད། ཚོགས་ཆུང་གི་ལྟ་སྟངས་ནི་བཀའ་བློན་ཁྲི་པ་ཐད་ཀར་མི་མང་གིས་འོས་འདེམས་བྱས་པ་ནས་བཟུང་།  ད་བར་བཅའ་ཁྲིམས་དང་སྒྲིག་གཞི་ཁག་ལ་འགྱུར་བ་ཕྱིན་ཡོད་པ་མ་རེད། ད་ལྟ་མི་མང་གིས་འོས་འདེམས་བྱས་པའི་མགོ་ཁྲིད་ལ་སྐུ་དབང་རྩིས་སྤྲོད་བྱ་དགོས་ཀྱི་ཡོད་སྟབས། མི་མང་གིས་འོས་འདེམས་བྱས་པའི་མགོ་ཁྲིད་ཀྱི་སྐུ་དབང་ལ་ཡང་འགྱུར་བ་གཏོང་དགོས་པ་ཞིག་ཆགས་ཡོད་སྟབས། བཅའ་ཁྲིམས་བསྐྱར་བཅོས་ཁྲོད་དེ་དག་ཁྱེར་ཡོང་བ་ཞིག་རེད།

གསར་འགོད་པ། ཚེ་རིང་རྒྱལ།