ལོ་རྒྱུས་ཀྱི་བདག་དབང་རང་བཞིན་ལྡན་པའི་བོད་རྒྱལ་ཁབ་ཀྱི་མཚན་འཛིན་དབུ་ཁྲིད་ཀྱི་མཚན་གནས་དེ་༸གོང་ས་མཆོག་ལ་འབུལ་དགོས་ཀྱི་འདུག
དེ་རིང་ཉིན་རྒྱབ་ཆུ་ཚོད་ ༢ ནས་བཟུང་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པའི་ཚོགས་ཞུགས་པ་ཡོངས་ཚོགས་ཆུང་བཅུ་ལ་ཆ་བགོས་བྱས་ཏེ། ཚོགས་ཆུང་སོ་སོ་ནས་ཚོགས་གཙོ་གཅིག་དང་ཚོགས་དྲུང་གཉིས་རེ་བསྐོ་འདེམས་བྱས་རྗེས།བཅའ་ཁྲིམས་བསྐྱར་བཅོས་ཟིན་བྲིས་ཚོགས་ཆུང་གི་སྙན་ཐོའི་སྔོན་གླེང་དང་།དོན་ཚན་དང་པོའི་སྐོར་ལ་བགྲོ་གླེང་དང་བསམ་ཚུལ་བསྡུ་རུབ་གནང་མགོ་བརྩམས་ཡོད་པ་རེད།གོང་གསལ་གླེང་གཞི་དོན་ཚན་ཁག་གི་ཐད་བསམ་ཚུལ་ག་འདྲ་བྱུང་མིན་ཚོགས་ཞུགས་པ་རྣམས་ལ་བཅར་འདྲི་ཞུས་པར།
ཚོགས་ཆུང་དྲུག་པའི་ཚོགས་གཙོ་སྤྱི་འཐུས་འབའ་སྐལ་བཟང་རྒྱལ་མཚན་ལགས་ཀྱིས་བརྗོད་དོན། དེ་རིང་ཕྱི་དྲོ་ཚོགས་ཆུང་དྲུག་པའི་ནང་གལ་ཆེ་ཤོས་ཏེ།སྔོན་གླེང་ནང་གྲོས་མཐུན་དོན་ཚན་བཅུ་བདུན་བཞག་པ་དེར་དགེ་སྐྱོན་ཅི་ཡོད་སྐོར་དང་།དེ་བཞིན་སྔོན་གླེང་ནང་བོད་བཙན་པོའི་དུས་སྐབས་ནས་བཟུང་སྟེ་རྒྱལ་རབས་རིམ་བྱུང་ཅི་ཡོད་ཚང་མ་གསལ་བོར་འགོད་དགོས་པའི་བསམ་ཚུལ་མང་པོ་ཡོང་གི་འདུག དེར་མ་ཟད།༸གོང་ས་མཆོག་གི་གསུང་འཕྲིན་དང་འབྲེལ་བའི་ཐོག་ནས་ཚང་མས་སེམས་འཚབ་ཆེ་ཤོས་ནི།་༸གོང་ས་མཆོག་དང་བོད་མི་དམངས་བར་གྱི་ལས་སྨོན་གྱི་འབྲེལ་བ་དེ་ངོ་བོ་གསལ་བོ་ཞིག་གི་ཐོག་ནས་མཚོན་དགོས་པ་དང་། དེ་མིན་སྔོན་གླེང་ནང་སྐུ་དབང་ཡོང་རྫོགས་མི་མང་ལ་རྩིས་སྤྲོད་ཅེས་བཀོད་འདུག་པ་དེ། གོང་ས་མཆོག་གི་གསུང་འཕྲིན་ནང་གསལ་མི་འདུག་པར་མ་ཟད། གཤམ་འོག་གི་དོན་ཚན་དང་པོའི་ནང་གསེས་དོན་ཚན་གསུམ་ལ་ཡང་འགལ་ཟླ་ལྟ་བུ་ཆགས་འདུག་པའི་སྐོར་ལ་གླེང་སློང་ཤུགས་ཆེན་པོ་ཡོང་གི་འདུག ཅེས་བརྗོད་བྱུང་། 
ཚོགས་ཆུང་གཉིས་པའི་ཚོགས་ཞུགས་པ་བོན་གཞིས་རྒྱལ་བ་སྨན་རི་དགོན་པའི་བླ་སྤྲུལ་ཉི་མ་གྲགས་པ་ལགས་ཀྱིས་བརྗོད་དོན། སྤྱིར་བཏང་༸གོང་ས་མཆོག་གིས་དགོངས་པ་རྒྱ་ཆེན་པོ་བཞེས་ཏེ།དེ་སྔ་ནས་བོད་རྒྱ་ཆེའི་མི་མང་ལ་དམངས་གཙོའི་ལམ་སྟོན་གནང་སྟེ་ད་ལྟའི་བར་འགྲོ་བཞིན་པ་ཞིག་རེད། ལྷག་དོན་ཉེ་ཆར་བཅའ་ཁྲིམས་བསྐྱར་བཅོས་ཀྱི་གནས་ཚུལ་དེ་ནི། ༸གོང་ས་མཆོག་གིས་གཞུང་གི་སྲིད་དབང་གི་འགན་ཆ་ཚང་མི་མང་གིས་བདམས་པའི་མགོ་ཁྲིད་ལ་རྩིས་སྤྲོད་གནང་རྒྱུའི་དགོངས་པ་བཞེས་ཏེ་མར་གསུང་འཕྲིན་བསྩལ་བ་ཞིག་ཆགས་ཡོད་པ་རེད། དེ་རིང་ཕྱི་དྲོ་བཅའ་ཁྲིམས་བསྐྱར་བཅོས་ཟིན་བྲིས་ནང་བཀོད་པའི་སྔོན་གླེང་གི་སྐོར་ལ་བགྲོ་གླེང་དང་སོ་སོའི་བསམ་ཚུལ་ཕུལ་བ་རེད། ང་རང་གི་བསམ་ཚུལ་ཡིན་ནི།༸གོང་ས་མཆོག་གིས་མར་བསྩལ་བའི་བཀའ་ཡིག་དེའི་ནང་དུ་བོད་ཀྱི་འདས་པའི་རྒྱལ་རབས་ལོ་རྒྱུས་དང་ད་ལྟའི་གནས་སྟངས།ལྷག་པར་དུ་བཅའ་ཁྲིམས་བསྒྱུར་བཅོས་གཏོང་དགོས་པའི་དགོས་པ་རྒྱུ་མཚན་དང་བཅས་པ་གསལ་བོ་གསལ་རྐྱང་བཀོད་འདུག དེར་བརྟེན།༸གོང་ས་མཆོག་གི་གསུང་འཕྲིན་དེ་སྔོན་གླེང་གི་ཚབ་ཏུ་བཀོད་པ་ཡིན་ན། གཞིས་བྱེས་མི་མང་ཚང་མས་ཀློག་སྐབས་རྒྱུ་མཚན་གནད་དོན་གོ་འཛོལ་མེད་པར་མཐོང་ཐུབ་པ་ཞིག་དང་། ཕྱིའི་མི་ཡིས་བལྟ་དུས་ཀྱང་གསལ་བོ་རྟོགས་ཡོང་བར་མ་ཟད། སྔོན་གླེང་ལ་༸གོང་ས་མཆོག་གི་གསུང་འཕྲིན་ཇི་མ་ཇི་བཞིན་དུ་བཀོད་ན། བོད་མི་གཞིས་བྱེས་ཡོངས་ལ་གོ་བརྡ་འཕྲོད་པ་དང་ཆ་འཇོག་ཡོང་བར་ཕན་ཐོགས་ཆེན་པོ་འདུག་བསམ་སོང་། ཞེས་བརྗོད་བྱུང་།
གས་ཆུང་གཉིས་པའི་ཚོགས་ཞུགས་པ་ཨེ་ཛི་རེལ་བོད་དོན་ཐེབ་རྩ་ཚོགས་པའི་གཡུ་སྒྲོན་དོན་ལྡན་ལགས་ཀྱིས་བརྗོད་དོན། ངས་བཅའ་ཁྲིམས་བསྐྱར་བཅོས་ཟིན་བྲིས་ཀྱི་སྔོན་གླེང་དང་འབྲེལ་བའི་ཐོག་ནས་གནད་འགག་ཆེན་པོ་གཉིས་མཐོང་གི་འདུག དང་པོ།བོད་གཞུང་གི་མིང་དེ་སྒྲིག་འཛུགས་ལ་བརྗེ་བོ་བརྒྱབ་པ་ཡིན་ན་ཉེན་ཁ་ཆེན་པོ་འདུག གཉིས་པ།༸གོང་ས་མཆོག་གི་ཆབ་སྲིད་ཀྱི་མཚན་གནས་དེ་མི་མང་གིས་བདམས་པའི་དབུ་ཁྲིད་ཀྱིས་ལེན་དགོས་ནའང་། ལོ་རྒྱུས་ཀྱི་བདག་དབང་རང་བཞིན་ལྡན་པའི་བོད་རྒྱལ་ཁབ་ཀྱི་མཚན་འཛིན་དབུ་ཁྲིད་ཀྱི་མཚན་གནས་ཤིག་ཕུལ་དགོས་རྒྱུ་འདུག རྒྱུ་མཚན། ང་ཚོས་ད་ལྟ་ནས་བོད་གཞུང་གི་མིང་དེ་སྒྲིག་འཛུགས་ལ་བརྗེ་བོ་བརྒྱབ་པ་དང་། ༸གོང་ས་མཆོག་གི་མཚན་གནས་ཡོངས་སུ་རྫོགས་པ་མེད་པ་བཟོས་པ་ཡིན་ན། མ་འོངས་པར་༸གོང་ས་མཆོག་མི་བཞུགས་པའི་དུས་ཤིག་དང་། བོད་གཞུང་གི་ཆེ་མཐོང་དང་བདག་དབང་ཉམ་ཆག་བྱུང་བའི་དཀའ་ཉེན་གྱི་དུས་ཤིག་སླེབས་ཡོང་གི་རེད། དེ་དུས་ཐབས་ཤེས་རྩ་བ་ནས་མེད་པའི་གནས་སྟངས་དེ་འདྲ་ཆགས་སྲིད་པ་རེད། དེ་འདྲའི་གནས་སྟངས་མི་འབྱུང་བའི་ཆེད་དུ། ད་ལྟའི་དཀལ་ངལ་ཆུང་ཚེགས་ལ་གཡོལ་ཆེད་བློས་གཏོང་ཆེན་པོ་མི་གནང་བར་གདོང་ལེན་བྱ་རྒྱུ་དེ་གལ་ཆེན་པོ་རེད།ཅེས་བརྗོད་བྱུང་། གསར་འགོད་པ། ཚེ་རིང་རྒྱལ།
སྤྱི་འཐུས་འབའ་སྐལ་བཟང་རྒྱལ་མཚན་ལགས་ཀྱིས་གསུང་པ་དེ་རྣ་བར་འགྲོ་བོ་བྱེ་བྲག་འདུག།་སོང་ཙམ་བཀའ་དྲིན་ཤིན་ཏུ་ཆེ།