རྒྱལ་བ་རིན་པོ་ཆེ། མྱི་རེད་དམ་ལྷ་རེད།

མྱི་གྲལ་དུ་སྐྱེ་བ་བླངས་དེ། མྱི་ཞིག་གི་ལས་ཀ་ཞིག་ལ་འཐམ་ནས་མྱི་ཡུལ་དུ་གསོན་ཡོད་པ་ཞིག་གི་སྟེང་ནས་སྐད་ཆ་བཤད་རྒྱུ་ཡིན་ན་ནི། ལྷ་དང་བསྲེས་ནས་སྐད་ཆ་དེ་ཡོང་མི་འོས་པ་ཞིག་རེད། དེ་ཡིན་དུས། མྱི་ཞིག་གི་སྐྱེ་བ་བླངས་ཡོད་པ་དང་། སྐྱེ་བ་དེ་ཡང་མྱི་འདྲ་འདྲའི་ནང་ནས་མ་འདྲ་བའི་མྱི་ཞིག་སྟེ། སྐྱེ་བུ་རླབས་ཆེ་བའི་མྱི་ཞིག་ལ་ངོས་འཛིན་བྱས་དེ་སྐད་ཆ་ཞིག་བཤད་དགོས་ཀྱི་ཡོད་དུས། བོད་མི་འདུས་བསྡོད་ཀྱི་ས་གནས་གང་ནས་ཡིན་ཡང་། རྒྱལ་བ་རིན་པོ་ཆེ་ནི་མྱི་ཞིག་གི་ཚད་དུ་བཟུང་དེ། མྱི་དེ་ཡང་རྒས་རྒྱུ་ཡོད་པ་དང་། སྡུག་ས་ནས་བཤད་ན། འཆི་བ་ཟེར་བ་དེ་ཡོང་རྒྱུ་ཡོད་པ་ནི་གདོན་མི་ཟ་བ་ཡིན་པ་དེ་ཡི་སྒང་ནས་བཤད་དགོས།

ང་ཚོ་ལ་རྒྱལ་བ་རིན་པོ་ཆེ་ཚང་གིས་མྱི་སྐད་བཤད་ནས། ང་ཚོ་ལ་མྱི་ལམ་ཞིག་དུ་འགྲོ་དགོས་པའི་རེ་སྐུལ་དེ་ནི་དམ་བཅའ་དམ་པོའི་སྒོ་ནས་གསུངས་ཀྱང་། མྱི་གཟུགས་སུ་ཡོད་པའི་འུ་ཅག་གིས་དུད་འགྲོ་ལྟ་བུའི་གཤིས་ཀ་གྱོང་བོ་དེ་འཁུར་ནས། ད་དུང་། ཡར་ཁོང་ལ་ཁྱེད་རང་ནི་མྱི་མ་ཡིན་དེ། ལྷ་ཡིན། ང་ཚོ་ལ་དངོས་གྲུབ་དགོས། ང་ཚོ་ལ་ཁྱེད་ཀྱི་བྱིན་རླབས་འཁོ་ཟེར་ནས་ལག་པ་གཞུ་ས་ཞིག་ཁོ་ནར་མུ་མཐུད་དུ་ཨུ་ཚུགས་ཀྱིས་བྱེད་དོན་གང་ལ་ཐུག་པ་ཡིན་ནམ་བསམ་ན་དངོས་ནས་སེམས་བསམ་པའི་གཏིང་ནས་སྐྱོ་དགོས་པ་ཞིག་མ་རེད་དམ།

ཁོང་གིས་ང་ཚོ་ལ་མྱི་ཞིག་གི་སྐྱེ་བ་རང་ནས་མྱི་ཞིག་གི་སྐད་ཆ་གོ་མི་གོ་མེད་པ་གསལ་བོ་དག་པོ་ཞིག་གསུངས་ཀྱང་། ང་ཚོས་ད་དུང་དེ་ལ་ཡ་ལན་མི་བྱེད་པར། འགན་འཁུར་མི་ལེན་པར། རང་འགོ་རང་ཐོན་བྱེད་པར་མི་འབད་པར། སྒྱིད་ལུག་གི་ངང་ཚུལ་འདི་བསྟུད་མར་སྲུང་དེ། རྒྱལ་བ་རིན་པོ་ཆེ་ཁ་ལ་འཁྱེར་ནས་ཕྱོགས་རིས་ཀྱི་མིག་ཟུང་ལ། མི་སེམས་ཀྱི་ཁ་དོག་ལ་རིགས་ཞེན་གྱི་ལ་རྒྱ་དང་། མདུན་བསྐྱོད་ཀྱི་སྙིང་སྟོབས་སོགས་མེད་པ་འདི་རྒྱལ་བ་རིན་པོ་ཆེ་ལན་པ་ཡིན་མི་སྲིད། དེ་ཡིན་དུས། ང་ཚོས་ད་ནི་ཁོང་ལ་དངོས་ནས་དགའ་བཞིན་གུས་བཞིན་ཡོད་ན། རྒྱལ་བ་རིན་པོ་ཆེ་ཚང་གི་ཁ་ལ་ཉན་རན་ཡིན། འཛམ་གླིང་མི་མང་ལ་བོད་ནི་གསོན་ཡོད་པར་ངོ་སྤྲོད་བྱེད་རན་ཡིན། རྒྱལ་བ་རིན་པོ་ཆེ་ཚང་གིས་བོད་མི་དག་སྐྱོང་ནས་འཚར་ལོངས་བྱུང་ཡོད་པ་སྟོན་རན་ཡིན། དེ་མིན་མུ་མཐུད་དུ། སྤྱན་རས་གཟིགས་མཁྱེན་ནོ་ཟེར་ནས་ཁ་ཞེ་མི་མཚུངས་ཤིང་། རང་བློ་རང་ལ་གསལ་བའི་མངོན་ལྐོག་གི་བྱེད་ལུས་དེ་དག་མཚམས་བཞག་ན་ད་ལྟ་ནི་རྒྱལ་བ་རིན་པོ་ཆེ་ཚང་སྐུ་འཚོ་ཞིང་བཞུགས་ཡོད་པ་ཡིན། དེ་མིན་་་་་་་

ཕྱིས་སུ་བློ་འགྱོད་ཟེར་ན་རེད། ལེ་འདའ་ཟེར་ན་རེད། མྱ་ངན་ཟེར་ན་རེད། འཁུན་སྒྲ་ཟེར་ན་རེད། དྲན་གདུང་ཟེར་ན་རེད། གཏན་ནས་མི་འདོད་པའི་སེམས་ཚོར་ཆེས་མང་བོ་མང་བོ་ཞིག་མ་བསགས་ན་ཡག་གི་རེད། ཤེས་མཁན་མང་ལ། བཤད་མཁན་མང་ལ། རྐུབ་སྟེགས་སྲུང་མཁན་མང་ལ། དོན་དངོས་ལ་རྒྱལ་བ་རིན་པོ་ཆེ་ཚང་གི་བཀའ་དང་དུ་བླངས་དེ། རྒྱལ་བ་རིན་པོ་ཆེ་ཚང་མྱི་ཞིག་གི་ཐད་དུ་བཞག་ནས་སྤྱི་སྒེར་གང་གི་ཕྱོགས་སུ་འབད་འབུངས་བྱེད་མཁན་ཉུང་བའི་གནས་སྟངས་འདིས་དེ་རིང་དེ། རྒྱལ་བ་རིན་པོ་ཆེ་ཚང་གི་མྱི་ལུས་གསོན་པོ་འདིས་མྱི་སྐད་གསོན་པ་ཞིག་གསུང་ཡོད་པ་བོད་མི་གར་ཡོད་གར་འདུག་ཚང་མས་བློ་རྩེ་སྒྲིམ་རན་ཡིན།

གནམ་སྔོན་པོ། ཨ་ཤུ་རེ་གོ ང་མྱི་ཆུང་ཆུང་ཞིག་ལ་སེམས་སྡུག་གི་ཤི་རུ་འཇུག་ས་རེད་་་་