དམག་ཁུལ་ཨང་ ༣༨ ནང་སོག་ལ་ཆེད་གཏོང་།

སོག་རིགས་མི་མང་གིས་རྒྱ་གཞུང་ལ་གཞི་རྒྱ་ཆེ་བའི་ངོ་རྒོལ་ཁྲོམ་སྐོར་བྱས་སྟབས། རྒྱ་གཞུང་གིས་དམག་ཁུལ་ཨང་ ༣༨ ནང་སོག་ཏུ་མངགས་གཏོང་བྱས་ཡོད་འདུག 

ཕྱི་ཚེས་ ༡༡ ཉིན་རྒྱ་རིགས་རླངས་འཁོར་བ་ལོ་བ་ཞིག་གིས་སོག་རིགས་མའོ་རི་ཀིན་བསམ་བཞིན་དམར་གསོད་བཏང་བས་རྐྱེན་གྱིས། ཕྱི་ཚེས་༢༥ཉིན་སོག་རིགས་སློབ་མ་དང་མང་ཚོགས་༢༠༠༠ལྷག་གིས་ནང་སོག་་ཡིས་ལིན་ཧའོ་ཐི་སྲིད་གཞུང་གི་སྒོ་འགྲམ་དུ་ངོ་རྒོལ་སྐད་འབོད་བྱེད་མགོ་བཙུགས་པ་ནས་བཟུང་།ད་ལྟའི་བར་ནང་སོག་གི་ས་ཁུལ་སོ་སོར་རྒྱ་གཞུང་ལ་ངོ་རྒོལ་གྱི་ལས་འགུལ་འདྲ་མིན་བྱུང་བཞིན་པ་ལྟར། ཁ་སང་ཕྱི་ཚེས་ ༣༠ ཉིན་ནང་སོག་ཧོ་ཧི་ཧོ་ཐི་གྲོང་ཁྱེར་དུ། ཧོ་ཧི་ཧོ་ཐི་སློབ་ཆེན་དང་། ནང་སོག་སྐད་ཡིག་སློབ་གླིང་སོགས་གཙོས་པའི་ནང་སོག་མི་རིགས་ཀྱི་སློབ་གྲྭ་ཁག་གི་སློབ་མས་གཙོས་པའི་མི་མང་སྟོང་ཕྲག་མང་པོ་མཉམ་འཛོགས་ཐོག་གཞི་རྒྱ་ཆེ་བའི་ངོ་རྒོལ་ཁྲོམ་སྐོར་ཞིག་བྱས་ཡོད་པ་དང་།དེ་དང་བསྟུན་ནས་ཨ་རི་དང་།འཇར་མན་དང་ཉི་ཧོང་། ཕྱི་སོག་པོ་རྒྱལ་ཁབ། དབྱིན་ཇི། ཧོ་ལན་ཌི། སུད་སི་བཅས་ཀྱི་སོག་རིགས་རྣམས་ཀྱིས་ཀྱང་། ནང་སོག་མི་མང་ལ་གདུང་སེམས་མཉམ་བསྐྱེད་མཚོན་ཆེད་རྒྱ་ནག་གི་གཞུང་ཚབ་ཁང་ཁག་གི་སྒོ་འགྲམ་དུ་ངོ་རྒོལ་སྐད་འབོད་བྱས་ཡོད་པར་མ་ཟད། རྒྱ་གཞུང་ལ་དགོས་འདུན་དོན་ཚན་གསུམ་བཏོན་སྟེ།གཅིག ནང་སོག་ཀུའུ་ཞིས་ཝུ་ཆི་ས་ཁུལ་གྱི་ཕྱུགས་རྫི་མའོ་རི་ཀིན་བསམ་བཞིན་དམར་གསོད་བཏང་བའི་དོན་རྐྱེན་དྲང་བདེན་ཐག་གཅོད་མ་བྱུང་བ་དེ་ནི། སོག་རིགས་མི་མང་གི་ཆེ་མཐོང་དང་ཁེ་དབང་ལ་བརྩི་འཇོག་མ་བྱས་ཤིག་ཡིན་པས།གང་མགྱོགས་དྲང་བདེན་ཐག་གཅོད་བྱ་དགོས། གཉིས། རྒྱ་གཞུང་གིས་ནང་སོག་རྩྭ་ཐང་ལ་གཏོར་བརླག་བཟོ་རྒྱུ་འཕྲད་དུ་མཚམས་འཇོག་བྱས་ཏེ་རང་བྱུང་ཁོར་ཡུག་ལ་སྲུང་སྐྱོབ་བྱ་དགོས།གསུམ།ནང་སོག་མི་རིགས་ཀྱི་ཁྲིམས་མཐུན་ཁེ་དབང་ལ་སྲུང་སྐྱོབ་བྱེད་དགོས་པའི་འབོད་སྐུལ་བྱས་ཡོད་པ་རེད། 

གསར་ལམ་ཁག་ཏུ་གནས་ཚུལ་ཐོན་པ་ལྟར་ན། ད་ལྟ་རྒྱ་གཞུང་གིས་གྲོང་ཁྱེར་ཡོངས་ལ་དྲག་ཆས་དམག་མི་མང་པོ་འགྲེམས་འཇོག་བྱས་ཏེ། ནང་སོག་ཁུལ་གྱི་སློབ་གྲྭ་ཁག་ལ་བཀག་སྡོམ་གྱིས་སློབ་མ་རྣམས་སློབ་གྲྭའི་ཕྱི་ལོགས་སུ་འགྲོ་རུ་འཇུག་གི་མེད་པར་མ་ཟད། ངོ་རྒོལ་སྐད་འབོད་བ་མང་པོ་འཇུ་བཟུང་བཀག་ཉར་བྱེད་བཞིན་ཡོད་པར་མ་ཟད། མི་མང་ཡར་ལངས་འབྱུང་བར་དོགས་ཏེ་རྒྱ་ནག་ཧི་པེ་ཞིང་ཆེན་པའོ་ཏེན་དུ་རྟེན་གཞི་བྱས་པའི་དམག་ཁུལ་ཨང་༣༨ནང་སོག་ཏུ་ཆེད་གཏོང་བྱས་ཡོད་འདུག