དོན་གཅོད་གསར་བསྐོ་ཕྱིར་བསྡུའམ་ལས་བཅར་ཕྱིར་འགྱངས།

ལུང་ཚན་ཆོ་གའི་ཕྱོགས་ལྷུང་མ་གནང་རོགས་ལགས་ལ་ཞུ་རྒྱུར། ཐུབ་བསྟན་རྒྱ་མཚོ་རྩ་ཆེན་རེད་ཅེས་སུ་ཀྱང་བཤད་ཀྱིན་མི་འདུག ཚང་མས་གླེང་གིན་པ་ནི། ཁ་སང་བསྐོས་འཇོག་བྱས་པ་ཡིན་པའི་དྲིལ་བསྒྲགས་རྗེས། དེ་རིང་གསང་བའི་ངང་ནས་ཕྱིར་བསྡུ་བྱ་སྟངས་ཀྱི་དོན་གཅོད་ལས་གནས་བསྐོ་སྟངས་འདིར་ཡ་མཚར་གྱིན་ཡོད་པ་རེད། གལ་སྲིད་ཐུབ་བསྟན་རྒྱ་མཚོ་སྐྱོན་ཅན་ཡིན་པར་ཆ་བཞག་ན། བཀའ་ཤག་གིས་སྔོན་ལ་མ་བརྟག་མ་དཔྱད་པར་བསྐོ་དོན་ཅི་ཡིན་ནམ། གལ་སྲིད་ཐུབ་བསྟན་རྒྱ་མཚོ་སྐྱོན་བྲལ་ཡིན་པར་ཆ་བཞག་ན། བཀའ་ཤག་གིས་བསྐོ་འཇོག་བྱས་པ་ཡོང་ཁྱབ་གསལ་བསྒྲགས་སྤེལ་རྗེས་མི་མང་ལ་འགྲེལ་བཤད་ཅི་ཡང་མེད་པར་ཕྱིར་བསྡུ་བྱ་དོན་ཅི་ཡིན་ནམ། དོགས་པ་རྣམ་རྟོགས་གསུམ་རང་ཤུགས་ཀྱིས་སྐྱེས་ཆོག་སྟེ། གཅིག དེ་སྔོན་ཁ་ཆེན་དབང་ཆེན་ཞིག་གི་ངོ་སོ་བཟུང་ནས་བཀའ་ཤག་གིས་ཐུབ་བསྟན་རྒྱ་མཚོར་བརྟག་དཔྱད་ཞིབ་འཇུག་མ་བྱས་པར་དོན་གཅོད་དུ་བསྐོ་འཇོག་བྱས་པ་དང་། གཉིས། ཐུབ་བསྟན་རྒྱ་མཚོ་འཇོག་བྱས་རྗེས་ཁ་ཆེན་དབང་ཆེན་ཞིག་གི་བློར་མ་བབས་པར་བརྒྱུད་སྐུལ་ལ་བརྟེན་ནས་ཐུབ་བསྟན་རྒྱ་མཚོ་ལས་དབྱུང་བཏང་བ། གསུམ། བཀའ་ཤག་གིས་དོན་གཅོད་གཙོས་པའི་གཞུང་གི་ལས་གནས་གལ་ཆེན་དུ་མི་སྣ་བསྐོ་འཇོག་བྱ་སྐབས། དུས་རྒྱུན་བརྟག་དཔྱད་ཞིབ་འཇུག་གནང་གི་མེད་པར་ར་བཟི་ལྟར་རང་སྣང་གང་དྲན་དུ་བཞག་ཏེ། སྤྱི་བའི་ལས་དོན་ལ་ཤ་ཚ་སྙིང་ཉེ་དང་དོ་གལ་གནང་གི་མཚོན་དགོས། དེ་གསུམ་ལས་གཞན་པའི་རྒྱུ་མཚན་ཅིག་ཕྱར་དེ་བཀའ་ཤག་གི་ཐེངས་འདིའི་ལས་དོན་སྒྲུབ་སྟངས་ལ་དཀར་རྩི་བྱུགས་ཐབས་འདུག ད་བར་དུ་འུ་ཚོས་གྲོས་ཚོགས་ནང་དུ་རྟོན་བཞི་འཇུག་ལྡོག་ཟེར་ནས་མ་ཎི་འདོན་འདོན་བྱེད་བཞིན་པ་མ་ཡིན། གང་ཟག་ལ་མི་རྟོན་པར་ཆོས་ལ་རྟོན་དགོས་པ་གལ་ཏུ་བཟུང་སྟེ་ཚང་མས་གནད་དོན་ལ་དཔྱད་དགོས་པར་མཐོང་།

བཙན་བྱོལ་བོད་མིའི་སྒྲིག་འཛུགས་ཀྱི་དྲྭ་བ་དང་དྲྭ་ལམ་གཞན་བརྒྱུད་ནས་ངས་ཕྷོ་རང་སིར་གནས་སྡོད་བྱེད་བཞིན་པའི་ཐུབ་བསྟན་རྒྱ་མཚོའི་དོན་གཅོད་དུ་བསྐོ་བཞག་ཟིན་པའི་ཁྱབ་བསྒྲགས་སྤེལ་བ་མཐོང་བྱུང་།

དྲྭ་ལམ་གཞན་དག་ནས་སྐབས་དེར་ཁོ་བོད་ནས་སོག་སྒར་དང་དེ་ནས་ཝ་ན་མཐོ་སློབ་དེ་ནས་ཕྷོ་རང་སིར་ཕྱིན་པ་དང་དེར་ཁྲིམས་ཀྱི་སློབ་སྦྱོང་དང་དེ་རྗེས་ཁྲིམས་ལུགས་སྐོར་བོད་བསྒྱུར་བྱས་པ་སོགས་ཀྱི་སྐོར་བོཀད་པ་ཤེས་རྟོགས་བྱུང་།

དེ་ནི་བཀའ་ཤག་གིས་གཞུང་འབྲེལ་ཐོག་ནས་བསྐོ་བཞག་བྱས་པ་མ་ཟད་སྤྱི་ཚོགས་ཐོག་ཏུ་དྲྭ་ལམ་བརྒྱུད་ནས་ཀྱང་གནས་ཚུལ་གསལ་བསྒྲགས་བྱས་ཟིན། ད་ཆ་ཁོར་མི་ཁ་ཤས་ཀྱིས་ཉེས་འཛུགས་ཡི་འཕྲིན་བྱུང་ཚུལ་སོགས་རྐྱེན་གྱིས་དགོངས་ཞུ་བྱེད་དགོས་ཚུལ་གླེང་བཞིན་འདུག

ཐུབ་བསྟན་རྒྱ་མཚོ་དོན་གཅོད་དུ་བསྐོ་བཞག་མ་བྱས་པའི་གོང་དུ་འཛིན་སྐྱོང་གིས་རྒྱུ་མཚན་ཅིའི་ཕྱིར་ཞིབ་འཇུག་བྱས་མེད་དམ། བསྐོ་བཞག་བྱས་ཟིན་ནས་ཡང་མ་འགྲིག་པའི་གནད་ལུགས་དང་ད་དུང་ཁོར་དམིགས་བསལ་གྱི་བརྒྱབ་ལྗོངས་སུ་རྒྱུ་མཚན་གཞན་ཡོད་འདོག་གིས་གནད་ལུགས་འགྲེལ་བཤད་བྱེད་བཞིན་ཡོད།

བོད་མིའི་སྒྲིག་འཛུགས་འགོ་པའི་ལས་ཀའི་བརྒྱུད་རིམ་དང་བྱེད་བབ་འདི་ལ་དཔག་ནས་ལས་དོན་ཚགས་ཚུད་དང་ཐག་གཅོད་གཏན་འཁེལ་མེད་པར་བྱ་སྒྲོ་རླུང་འཁྱེར་རམ་རི་བོང་ཅལ་སྒྲོགས་ཀྱིས་ནང་ཚུལ་ཡོད་པ་ཞིག་མངོན་བཞིན་འདུག

ཐུབ་བསྟན་རྒྱ་མཚོས་ཀྱང་རང་ཉིད་ཀྱི་བརྒྱབ་ལྗོངས་སུ་ནག་ཉེས་ཚབས་ཆེ་ཡོད་ན་དགོངས་ཞུ་བྱེད་དགོས་ལ་གལ་ཏེ་ནག་ཉེས་ཆེན་པོ་ཞིག་མེད་ཚེ་ངེས་པར་དུ་བཀའ་ཤག་གི་བཀའ་ཁྲི་ཟམ་དོང་དང་ལས་བྱེད་འདམེས་བསྐོའི་འབྲེལ་ཡོད་དེར་ཐ་གཅིག་ཏུ་གནད་དོན་དེ་རང་གར་མ་བཞག་པར་གསལ་པོ་བཟོ་དགོས།

ད་ཆ་རང་བཚན་དང་རང་ཡུལ་སོགས་མེད་ནའང་ཡང་དག་པའི་ཕྱི་གསལ་ནང་གསལ་གྱི་དམངས་གཙོའི་སྟེང་འགྲོ་བཞིན་ཡོད་སྟབས་བཀའ་ཁྲི་ཟམ་དོང་མ་གཏོགས་འགྲིག་གི་མེད་ན་༸ རྒྱལ་བ་རིན་པོ་ཡིན་ཀྱང་ངེས་པར་དུ་རྒྱུ་མཚན་གསལ་བཤད་བྱེད་དགོས་ལ་བྱེད་ཆོག་གི་རེད།

བཀས་བཀོད་བརྒྱུད་འཛིན་དང་ཞིང་བྲན་ལམ་ལུགས་ཀྱི་རིང་ལུགས་ད་ཆ་འཇུག་བསྒྲིལ་ཟིན་པ་མ་ཟད་ད་དུང་སྲིད་དབང་སྒེར་གཅོད་དང་། ཉམས་ཆུང་ལ་ཐུག་ཚོད། དྲང་བདེན་མེད་པའི་གནས་ཚུལ་ཅི་ཞིག་ཐོན་ཚེ་ངེས་པར་དུ་སྙིང་སྟོབས་ཆེན་པོས་རྩོད་དགོས། ཕམ་པར་རྒྱག་དགོས།

བཀའ་ཤག་གིས་ངོས་ནས་ཁོར་ནག་ཉེས་ཅི་ཞིག་ཡོད་མེད་གསལ་བཤད་ངེས་པར་དུ་བྱེད་དགོས། ཐུབ་བསྟན་གྱིས་ངོས་ནས་ནག་ཉེས་ཡོད་ཚེ་ངེས་པར་དུ་ཁས་ལེན་ཞུ་དགོས། ཕར་ཚུར་གཞི་མེད་སྐྱོན་འཛུགས་བྱེད་རུང་།

ད་ཕལ་ཆེར་ཟམ་གདོང་འདི་ཡང་ཆང་གིས་བཟི་ཡོད་ས་རེད།

༸གོང་ས་མཆོག་གིས་སྲིད་དབང་མི་མང་གི་བདམས་པའི་དབུ་ཁྲིད་ལ་རྩིས་སྤྲོད་བྱས་པའི་དུས་འདིར་སྐུ་ཚབ་དོན་གཅོད་ཅིག་སྐོས་པ་དང་ལས་གནས་རྩིས་སྤྲོད་ཀྱང་མ་བྱས་པ་ཕོ་སྒྱུར་གཏོང་བ་འདི་ནི་ཡག་བཏགས་ཞིག་མ་རེད། བྱས་ཉེས་དང་བྱས་རྗེས་ཇི་ཡོད་གོ་མིང་མ་སྤྲད་གོང་ནས་བཏགས་དཔྱད་བྱས་ཏེ་གནད་དོན་ཐག་གཅོད་བྱས་དགོས་པ་ལས་བྱི་པའི་རྩེ་མོ་ལྟར་བྱ་རྒྱུ་ཞིག་མ་རེད། དེ་བས་ཀྱང་བཀའ་བཤག་ནས་རྒྱུ་མཚན་ཁ་གསལ་མེད་པར་དགོངས་ཞུ་དགོས་ལུགས་ཀྱི་ལམ་སྟོན་ནི་མི་བུ་བྱེ་བྲག་པ་ཞིག་གི་མདུན་ལམ་ལ་དགག་རྡོ་འཕེན་པ་རང་རེད།

བོད་མིའི་སྒྲིག་འཛུགས་ཀྱི་འཛིན་སྐྱོང་དབང་ཚད་གང་ཞིག་ཡིན་ན་དེ་སྔོན་བཞིན་༧སྐུ་སྒེར་ཡིག་ཚང་ལ་འབྲེལ་བ་བྱེད་མི་དགོས་པར་གནས་ལུགས་ཐག་གཅོད་ཆོག་པ་འདི་༧རྒྱལ་བ་དོན་གྱི་བདག་པོའི་བཀའ་ཡིན་ལ་དམིགས་བསལ་ཁོང་གིས་སྐུ་དབང་བོད་མའི་སྒྲིག་འཛུགས་ཀྱི་བཀའ་ཤག་ལ་གནང་བའི་དབང་ཚད་ཀྱང་རེད་། མཁྱིན་གསལ་བཞིན་འདི་ལག་ལེན་དུ་བསྟར་ནས་དུས་ཡོན་ཐུང་ངུ་ལས་མ་སོང་བའི་འཚམས་འདིར་ང་ཚོའི་སྤྱི་ཚོགས་ནང་ཐོག་མར་སྦར་སིལ་དོན་བཅོད་གསར་པ་ཐུབ་བསྟན་རྒྱ་མཚོའི་སྐོར་ཡུལ་དེའི་མང་ཚོགས་ནང་ལབ་གླེང་སྣ་ཚོགས་བྱུང་མཐར་འབྲེལ་ཡོད་མི་མང་གི་བཀའ་ཤག་ལ་ཁོ་པ་ཡུལ་དེའི་དོན་བཅོད་མི་འོས་ཚུལ་རྣམ་འགྱུར་གསལ་སྟོན་ཐོག་འདོད་བློ་མ་ཁེངས་པའི་སྐྱོན་བརྗོད་བར་མཚམས་མེད་པ་བཀའ་དྲུང་ཡིག་ཚང་དུ་འབྱོར་བ་སོགས་ཕྱོགས་གཞན་ཞིག་ནས་བཤད་ན་ད་དུང་རེ་འགས་རྒྱབ་སྐྱོར་དང་རེ་འགས་སྐྱོན་བརྗོད་བྱས་ཁུལ་སོགས་དཔུང་སྒྲིག་ནས་ཡུལ་དེའི་མི་མང་ནང་ཆིག་སྒྲིག་གཏོར་བའི་བྱ་བ་ཐབས་སྡུག་འདྲ་སྤེལ་དང་བཞིན་འདུག་ན་འདི་དགྲ་དགའ་གཉེན་སྡུག་གི་བྱ་བ་ཞིག་ཡིན་སྟབས་འཛིན་སྐྱོང་བཀའ་ཤག་གི་སྐབས་དེར་ཐུགས་བསམ་ཆེ་བཞེད་ཀྱི་ཁོང་ལ་ལུགས་འཐུན་དགོངས་ཞུ་གནང་ན་ལེགས་ཚུལ་བཀའ་ཕེབས་པ་དེར་ཁོ་པས་དངོས་ཡོད་གནས་ལུགས་མ་རྟོགས་པ་དང་བཀའ་དྲེན་ལ་བསམ་ཞིབ་མ་ཤེས་པར་ཉིན་ཆར་བོད་ཀྱི་དུས་བབ་གསར་འགོད་པར་བཀའ་དེར་ཁས་ལེན་ཐུབ་ས་མ་རེད་ཅེས་གསལ་བསྒྲགས་ནད་བརྗོད་བྱེད་འདུག། སྤྱིར་མང་གཙོའི་གཞུང་དང་སྒྲིག་འཛུགས་ག་འདྲ་ཞིག་ཡིན་ན་རང་གི་ཁྲིམས་མཐུན་གྱི་དབང་ཆ་རྩོད་ལེན་བྱེད་པའི་རང་དབང་ཡོད་པ་དེར་མཚམས་དང་ཚད་ངེས་ཅན་ཞིག་མེད་ཀྱང་གནད་ལུགས་དེའི་གཞུང་དང་སྒྲིག་འཛུགས་ལ་གནོད་ན་ཁྲིམས་ཐོག་ནས་གང་མགྱོགས་ནག་ཉེས་ཅན་དུ་ཐག་གཅོག་བྱེད་པར་དགོས་པ་དང་རྒྱུ་མཚན་མེད་པ་མ་རེད། དེས་ན་དངོས་ཡོད་ཐུབ་བསྟན་རྒྱ་མཚོའི་རང་སྒེར་དང་མང་ཚོགས་ཀྱི་འདོད་བབས་ནོར་ཡོད་མེད་ཐད་ད་ཐེངས་གསལ་བཤད་འོས་འཚམས་ཤིག་མེད་ན་ཁོ་པས་ཧམ་བཤད་འདི་ཧ་ལས་པའི་རྫབ་ཆེན་རེད་། འདི་བོད་གཞུང་དང་ཟམ་དགོང་རིན་པོ་ཆེར་བརྩི་བཀུར་མ་བྱེད་པའི་གནས་ཚུལ་ཙམ་ག་ལ་ཡིན་། ༧གོང་ས་མཆོག་གི་བཀའ་དགོངས་ལྟར་བཀའ་ཤག་གི་དབུ་ཁྲིད་པའི་སྲིད་གཞུང་འདིའི་གོམ་པ་མདུན་སྤོ་བྱེད་སྟངས་ཐད་མ་འོངས་བོད་ཀྱི་མདུན་ལམ་ཐོག་བསམ་ན་བོད་རིགས་ཙམ་མ་ཚད་རྒྱལ་སྤྱིའི་མི་མང་ཡོངས་ནས་དོ་སྣང་ཆེ་པོ་བྱེད་བཞིན་པའི་སྐབས་འདིར་ཁོ་པས་རང་སྒེར་གྱི་དོན་ཅན་ཐོག་ནས་རང་རེའི་སྒྲིགས་འཛུགས་ཀྱི་དབུ་ཁྲིད་བཀའ་ཤག་གི་བཀའ་ལ་ངོ་རྒེར་རྣམ་འགྱུར་ཐོན་པ་འདི་ལོ་རྒྱུས་ཀྱི་འགྱུར་འཚམས་འདིའི་ནང་ཆེས་མ་འོས་པ་དང་དགྲ་བོ་རྒྱ་ནག་ལ་དགོས་པའི་བརྙན་འཕྲིན་ལེ་ཚན་ཞིག་ཡིན་པས་ཧམ་བཤད་འདིའི་་དགྲ་དགའ་གཉེན་སྡུག་གི་ལོ་རྒྱུས་ཀྱི་ནག་ཉེས་ཐོག་མ་དེ་བཞག་པ་རེད།

དབུགས་ཐག་གཅིག་གི་ན་ཟུག
གང་ཞིག་ཡང་དག་ཡིན་མིན་གྱི་གནད་དོན་དེ་ད་ལྟ་ནས་བཤད་དཀའ་མོད། མ་གཞི་ཐུབ་བསྟན་རྒྱ་མཚོ་མི་སྒེར་གྱི་ལེགས་ཉེས་དགེ་སྐྱོན་གྱི་གནད་དོན་དེ་དོན་དག་ཆུང་ཆུང་ཞིག་རེད། ཡིན་ནའང་། ཐེངས་འདིའི་སྐུ་ཚབ་དོན་གཅོད་བསྐོ་འཇོག་ཕྱིར་བསྡུའི་གནད་དོན་གྱི་བརྒྱུད་རིམ་ཧྲིལ་བོར་རག་ཙམ་བལྟས་པ་ཙམ་གྱིས་ཀྱང་། ཟམ་གདོང་གི་མགོ་ཁྲིད་པའི་བཀའ་ཤག་གི་ལས་དོན་སྒྲུབ་ཕྱོགས་ཐད་བློ་ཕམ་དང་ཡི་ཆད། དོགས་སློང་ཞིག་མི་སྐྱེས་རང་སྐྱེས་ཆགས་ཤིག་སོང་ལ། གངས་ཅན་སྐྱིད་ཤོངས་ཀྱི་མགོ་བདེ་དྲན་འཕྲུལ་དང་རང་དོན་ཁེ་གཉེར་བ་འདི་ཚོས། ཁ་སང་བརྟག་དཔྱད་བསམ་ཞིབ་མཐིལ་ཕྱིན་ཡིན་མདོགས་ཀྱིས་༸གོང་ས་མཆོག་ལ་སྙན་འབུལ་ཞུས་ཏེ་དོན་གཅོད་དུ་བསྐོ་འཇོག་བྱས་ཟིན་ཚུལ་བོད་མི་མང་ལ་ཡོངས་ཁྱབ་གསལ་བསྒྲགས་དང་། དེ་རིང་། བསྐྱར་དུ་མི་སྒེར་གང་དེ་གཙོས་པའི་བོད་མིའི་སྤྱི་ཚོགས་ཁྲོད་གསལ་བརྗོད་མི་བྱེད་པའི་ཐག་གཅོད་བྱས་ཡོད་ལུགས་བརྗོད་དེ་གསང་དོན་ཆེན་པོ་ཞིག་ཡོད་མདོགས་ཀྱིས། དོན་གཅོད་ཕྱིར་བསྡུ་བྱས་པའི་ལས་དོན་བྱེད་ཕྱོགས་འདི་དག་ནི། དངོས་གནས་ཡ་མཚན་པ་སྐྱི་གཡའ་ཞིག་མ་ཡིན་ནམ། བྱེད་ཕྱོགས་འདི་དག་ནི་སྔ་དྲོ་སྒྲིག་པ་ཕྱི་དྲོ་གཏོར་འགྲོ་བའི་བྱིས་པ་སྣབས་ལུག་ཅིག་གི་རྩེད་སྲོལ་དུ་མི་སྣང་ངམ། ཅི་འདྲི་བློ་ཕམ་པ་ལ། ཡིད་སྐྱོ་བ་ལའང་། ཟམ་གདོང་གི་དབུ་ཁྲིད་པའི་བཀའ་ཤག་འདིས་རྩ་ལ་གཙང་འགྲོའི་ལས་དོན་སྒྲུབ་ཕྱོགས་དང་། སྤེན་པ་ཚེ་རིང་དང་ཀརྨ་ཆོས་འཕེལ་གཉིས་ཀྱི་རྒྱུད་སྐུལ་འཁྲབ་ཚན་རས་མོས་སུ་སྐོར་བའི་པའི་ཟ་འདྲེ་འགོང་རྒན་སྤྱི་འཐུས་དེ་ཚོའི་ཕྱོགས་འཁྱེར་ནང་དཀྲིགས་ཕྱོགས་འདི་ལ་བལྟས་འོང་དུས། འདས་པའི་ལོ་ངོ་ལྔ་བཅུ་ལྷག་གི་རིང་༸གོང་ས་མཆོག་དང་བོད་མི་མང་གིས་དཀའ་སྡུག་ཧུར་བསྐྱེད་ཀྱིས་སྒྲུབ་པའི་བོད་དོན་བདེན་པའི་འཐབ་རྩོད་ལ་གྲུབ་འབྲས་བླ་ལྷག་ཅིག་མ་བྱུང་འདི་ལ་ཅི་ཁག་བསམ་པ་ཞིག་མི་དྲན་རང་དྲན་ཆགས་སོང་། ཁེ་སྔོན་བཅའ་ཁྲིམས་བསྐྱར་བཅོས་ཟིན་བྲིས་མི་མང་མང་ཚོགས་ཁྲོད་བཀྲམས་སྐབས་འགྲེམས་ནོར་ཐེབས་པ་དང་། ཡང་། བཅའ་ཁྲིམས་བསྐྱར་བཅོས་ཟིན་རྗེས་ཀྱི་གྲུབ་དོན་ཁྲིམས་ཡིག་༸གོང་ས་མཆོག་ལ་སྤྱན་འབུལ་མཚན་རྟགས་ཞུ་སྐབས། བཅའ་ཁྲིམས་ནང་དོན་ཚན་ཆད་ལྷག་ཤོར་འདུག་པ་དེ་འདི་དག་ལས། གངས་ཅན་སྐྱིད་ཤོངས་ཀྱི་ཟ་འདྲེ་མགོ་བདེ་འདི་ཚོས་ད་ལྟའི་བར་རང་དོན་ཁེ་གཉེར་གྱིས་སྤྱི་དོན་ཡོད་ཚད་སྣང་མེད་ཉམ་ཆག་ཏུ་གཏོང་བཞིན་པ་གསལ་བོ་ཆགས་པ་ཞིག་ཡིན་པར་མ་ཟད། རྒྱལ་ཁབ་གཞན་གྱི་མི་སེར་དང་སྐྱབས་བཅོལ་བའི་གཤོག་པ་གཉིས་ཐོག་མཁན་གྱི་ཟ་འདྲེ་མགོ་བདེ་ཅན་འདི་དག་གིས་འདས་ནས་ད་ལྟའི་བར་རང་འཚོ་རྒྱལ་འཚོང་གི་ལས་དོན་ཁོ་ན་སྒྲུབ་ཏེ་རྒྱ་ཆེ་བོད་མི་མང་ལ་མཐོང་ཆུང་བྱས་པ་ཞིག་དང་། རང་སྲོག་འབེན་བཙུགས་ཀྱིས་འཐབ་བརྩོད་གནང་བཞིན་པའི་རྒྱ་ཆེ་གཞིས་ལུས་མི་མང་གི་རེ་བའི་མིག་ཟུང་ལ་ཐལ་འཚུབ། དཀའ་སྡུག་ཁྱད་གསོད་ཀྱིས་ཆ་ལུགས་གོམས་སྲོལ་མི་གཅིག་པའི་ཕྱིའི་མི་ཡུལ་དུ་གཉའ་སྒུར་ཞུ་འདེབས་ཀྱིས་སྐྱབས་བཅོལ་དུ་སྡོད་པའི་བཙན་བྱོལ་མི་མང་ངོ་གདོང་ལ་སྦག་བཙོག་བྱུགས་པ་ཞིག་མ་ཡིན་ནམ། འདི་དག་གི་ལས་སྟངས་བཅའ་སྟངས་ལ་བལྟ་དུས། མ་འོངས་པར་རྒྱལ་སྤྱི་ལ་ཁ་ཕྱོགས་ཏེ་བདེན་པ་བདེན་པ་ཞེས་བརྗོད་རྒྱུར་ངོ་གནོང་དགོས་པ་ཞིག་དང་། རྒྱ་དམར་སྒེར་གཅོད་པར་ཁ་གཏད་དེ་ཕྱི་གསལ་ནང་གསལ་གྱིས་སྐད་རྒྱག་རྒྱུར་སྤོབས་པ་བྲལ་བ་ཞིག་མི་ཆགས་པའི་ངེས་བ་མི་འདུག ཀྱེ་མ་ཀྱི་ཧུད། ཅི་འདྲིའི་འཇིགས་ཡེར་བ་ལའང་། འདི་འདྲའི་སྙིང་ན་བ་ལའང་། ད་ནི། བོད་མི་རིགས་འཆི་གསོན་གྱི་སོ་མཚམས་ནས་འཚར་ལོངས་བྱུང་བའི་མི་རབས་གསར་བའི་གཞོན་སྐྱེས་ཚོས་བདེན་པ་ཚུགས་ཐུབ་ཀྱི་མི་གཞིའི་སྒལ་ཚིགས་ཤིག་དྲང་པོར་བསྲིངས་ཏེ་འདས་པའི་བྱུང་རིམ་ལ་བསྐྱར་ཞིབ་དང་། ད་ལྟའི་གནས་སྟངས་ལ་ཞིབ་འཇུག་ཡག་པོ་ཞིག་མ་བྱས་པར། ད་དུང་ཟ་འདྲེ་ཀླད་ལྗང་འདི་ཚོའི་ཕྱོགས་ལྷུང་གདོན་འདྲེ་ཡི་བསླུ་བྲིད་ཀྱི་འོག་མུ་མཐུད་མགོ་འཐོམ་བསྡད་པ་ཡིན་ན། ནམ་ཞིག་ལོ་རྒྱུས་ཐོག་སྙན་པའི་གྲགས་པ་ཕྱོགས་བཞིར་རྒྱས་མྱོང་བའི་བོད་བཙན་པའི་གདོང་རྒྱུ་འདི་སྟོང་ཞིང་ཡལ་བར་འགྱུར་རྒྱུ་ཡིན་པ་ནི་གདོན་མི་ཟའོ། དེ་བས་ང་ཚོ་ཟ་འདྲེ་འགོང་རྒན་འདི་ཚོའི་གདོན་འདྲེ་དྲན་འཕྲུལ་གྱི་དཀྱིལ་འཁོར་ཁྲོད་ནས་ཕྱིར་བུད་དེ་བདེན་པའི་མིག་ཟུང་བཙལ་ཞིང་། ལ་རྒྱའི་དཔུང་བ་འདེགས་ཏེ་བོད་གངས་ཅན་པའི་ཕྱི་ནང་སྣོད་བཅུད་གཉིས་ལ་གསོན་ཤུགས་གསར་བ་ཞིག་དང་འཚོལ་སྙེགས་རྣལ་ཞིག་བསྐྱར་གསོ་བྱེད་པར་འབད་དགོས་སོ།

བོད་གཞུང་བཀའ་ཤགའམ་ད་ལྟའི་མིང་བྱང་གསར་པ་དབུས་བོད་མིའི་སྒྲིག་འཛུགས་སམ་གནས་ཚུལ་དེ་འདྲ་བ་ཞིག་མང་པོ་ཡོང་དུས་བཀའ་ཤག་གིས་རྟག་དཔྱད་ཞིབ་འཇུག་གནང་དགོས་པ་ནི་ཤིན་ཏུ་གལ་གནད་ཆེན་པོ་ཡིན། སྤྱིར་བོད་རིགས་ཞིག་ཡིན་པའི་ཆ་ནས་ལྟ་བ་དང་གཤིས་སྤྱོད་གང་རུང་ཐོག་རང་རྒྱལ་ལ་ཞེན་ཁོག་དང་ལ་རྒྱ་ཡོད་པར་སྨོས་མི་དགོས། ཡིན་ནའང་རང་ངོས་ནས་མིག་མཐོང་ལག་འཛིན་ཐོག་ནས་དཔེ་མཚོན་ཐུང་ཐུང་ཞུ་ན།
དབུས་བོད་མིའི་སྒྲིག་འཛུགས་ལྷན་ཁང་ཁག་ནང་ལས་བྱེད་ཆེ་ཕྲ་ཆུང་གསུམ་ཡོད་དུས་དེའི་ནང་ནས་ལས་ཁུངས་ཁག་གཅིག་ནང་ལས་མེད་ཐོག་བསྡད་མཁན་ཡོད་པ་ནི་ཤོད་མི་དགོས ད་དུང་ངའི་གནས་རིམ་དྲུང་གཞོན་ཡིན། ངའི་གནས་རིམ་དྲུང་ལས་ཡིན། ངའི་གནས་རིམ་སྡེ་འགན་ཡིན་ཟེར་ནས་གནས་རིམ་མཐོ་པོ་ཡིན་ཚུལ་བཤད་ནས་སྡོད་ཀྱིན་འདུག
ཞོགས་པ་ཆུ་ཚོད་དགུ་པའི་ཐོག་ལས་ཁུངས་སུ་འབྱོར་མ་ཐག་ལས་བཅར་དེབ་ནང་མིང་རྟགས་དང་ཆུ་ཚོད་བྲིས་རྗེས་མཚམས་རེ་བཀའ་བློན་དང་དྲུང་ཆེ་ཐུག་སྐབས་འཛུམ་མདངས་དང་སྤྲེལ་ལད་འཁྲབ་ནས་མགོ་ཡང་སྒུར་ཙམ་བྱས་ནས་ལས་ཁུངས་ནང་ཡར་འགྲོ་དང་མར་འགྲོ་གཞན་ལས་ཀ་བྱེད་སར་སྐད་ཆ་སྙན་མོ་འདྲ་བཤད་མཚམས་རེ་སྨན་རྩིས་ཁང་ལ་སྨན་པ་བསྟེན་དུ་འགྲོ་བའི་ཡིན་ཁུལ་བྱས་ནས་ལས་ཁུངས་ཀྱི་ཕྱི་ལོགས་སུ་ཆུ་ཚོད་གཅིག་ལྷག་ཙམ་རིང་བསྡད་ནས་ལས་ཁུངས་ནང་མཐོང་རྒྱུ་མེད་པར་ཆགས་འགྲོ་ཀྱིན་འདུག ལྷན་ཁང་ཆེ་བ་ཁག་ཅིག་ནང་འཛིན་སྐྱོང་དང་དྲུང་ཆེ་ཚོས་འོག་གི་ལས་ཀ་བྱེད་སྟངས་ལ་རྟོགས་གཟིགས་ནན་པོ་བྱ་དགོས་ཀྱིན་འདུག
ལྷན་ཁང་གཅིག་གི་ནང་ས་མིག་སྟོང་པ་ཡོད་པ་དང་ས་མིག་དེའི་ཚབ་མི་སླེབས་རྗེས་ལས་ཀ་ཡོད་མེད་ལ་ལྟས་ཀྱིན་མི་འདུག
མི་དེ་ཡང་གནས་རིམ་མཐོ་ཙམ་ཡིན་དུས་ལས་ཀ་ཡོད་མེད་ལ་མ་བལྟས་པར་ཅུང་གནས་རིམ་དམའ་བའི་རིགས་ཅིག་ལ་ལས་ཀ་ལྷག་བསམ་རྣམ་དག་བྱེད་ཀྱིན་ཡོད་ནའང་གནས་རིམ་གྱི་ཐོག་ནས་མཐོང་ཆུང་དང་དམའ་འབེབས་བྱེད་ཀྱིན་འདུག
བཀའ་ཤག་རྙིང་པ་དུས་ཡུན་རྫོགས་ཙམ་དང་་བཀའ་ཤག་གསར་པ་ལས་འགན་བཞེས་རྒྱུའི་མཚམས་ལ་ལྷན་ཁང་ཁག་ཏུ་གཞི་འཇུག་ཡག་པོ་གནང་དགོས་པ་ནི་ཤིན་ཏུ་གལ་གནད་ཆེ་བ་མཐོང་།
ངེས་པར་དུ་བཀའ་ཤག་གསར་བའི་སྐབས་གཞི་འཇུག་བྱས་རྗེས་ད་ལྟའི་ལས་ཁུངས་ནང་ལས་མེད་ལ་བསྡད་པ་རེ་བཟུང་མ་འོངས་ལས་ཀའི་ཐོག་མཐུན་ཤོར་མེད་འགྲོ་བ་ནི་གལ་གནད་ཆེ།
ལྷན་ཁང་ཆེ་བ་ཁག་གཅིག་ནང་ས་མིག་སྟོང་པའི་ཚབ་ལས་བྱེད་གསར་པ་སླེབས་པ་ཡིན་ན་ས་མིག་སྟོང་པ་དེ་ལས་འགན་གང་འདྲ་ཞིག་ཡོད་མེད་ལྟ་དགོས་པ་ནི་ཤིན་ཏུ་གལ་གནད་ཆེ་བ་ཞིག་ཡིན།

༼ ཐུབ་བསྟན་རྒྱ་མཚོ་དང་སྦར་སིལ་སྐུ་ཚབ་དོན་གཅོད ༽
གལ་སྲིད་མི་ཞིག་ལ་འདི་ལྟ་བུའི་གླེང་རྙོག་ཅིག་བྱུང་སྐབས། མི་དེའི་དགེ་སྐྱོན་གཉིས་ཀ་གླེང་ཡོང་རྒྱུ་དེ་ནི་བོད་པ་ཙམ་མིན་པར་འཛམ་གླིང་སྤྱི་སྲོལ་ཞིག་ཡིན་ལ། གླེང་སློང་བྱ་དགོས་པ་ཞིག་དང་། གླེང་སློང་དེ་བརྒྱུད་ནས་སྐྱོན་ཆ་ཡོད་ན་ཐེར་འདོན་དང་བཟང་ཆ་ཡོད་ན་གདེང་འཇོག་ཐོབ་ཡོང་བའང་ཆོས་ཉིད་ཡིན།
འོན་ཀྱང་མི་སུ་འདྲ་ཞིག་ཡིན་རུང་། དེ་ལ་དགེ་སྐྱོན་གཉིས་ཀ་རང་ཆས་སུ་ཡོད་པ་ལྟར། སྐུ་ཞབས་ཐུབ་བསྟན་རྒྱ་མཚོར་ཡང་སྐྱོན་ཆ་འགའ་རེ་ཡོད་སྲིད་མོད། མི་ཞིག་གི་དགེ་སྐྱོན་ངོས་འཛིན་བྱེད་སྟངས་ལ་མི་ཀུན་གྱི་ངོས་འཛིན་མཐུན་སྣང་དུ་གྲུབ་པ་ཞིག་མིན། ངས་སྐྱོན་ཆར་མཐོང་བ་དེ་གཞན་གྱིས་བཟང་ཆར་མཐོང་སྲིད་ལ། ངས་བཟང་ཆར་མཐོང་བ་དེར་མི་གཞན་གྱིས་སྐྱོན་ཆར་ངོས་འཛིན་བྱེད་ཀྱང་སྲིད།
དེ་བཞིན། ང་དང་ང་ལྟ་བུའི་ནུབ་གླིང་གི་བོད་པ་མང་པོ་ཞིག་གིས་སྐུ་ཞབས་ཐུབ་བསྟན་རྒྱ་མཚོའི་སྟེང་གི་བཟང་ཆར་ངོས་འཛིན་ཐོབ་ཡོད་པ་དེ། ཧྥ་རན་སི་དང་སྦེལ་འཇམ་ཁུལ་གྱི་བོད་མི་རྙིང་པ་རེ་ཟུང་གིས་ཞན་ཆར་བགྲང་གི་ཡོད་པའི་ཆ་གཅིག་ནི། སྐུ་ཞབས་ཐུབ་བསྟན་རྒྱ་མཚོ་ལགས་ཀྱིས་ངོ་དགའ་སྤྲེལ་ལད་འཁྲབ་སྟངས་རྩ་ནས་མི་ཤེས་ཤིང་། གཞན་ལ་བསྟུན་མཁས་བྱེད་པར་ཁྱོན་ནས་མི་སྤྲོ་བ། མཐོ་དམན་བར་མ་ཀུན་ལ་ལྟ་སྟངས་གཅིག་གྱུར་འོག་ནས་འབྲེལ་འདྲིས་བྱེད་པ་དེ་རེད།
སྤྱི་ཚོགས་ཤིག་གམ་རྩ་འཛུགས་ཤིག་གི་དབུ་འཁྲིད་མཁན་ཞིག་ལ་མཚོན་ན། གཤིས་ཀ་འདིས་མི་རེ་ཟུང་ལ་ཕོག་ཐུག་བཏང་ཡོད་སྲིད་ལ། སྐབས་འཕྲལ་གྱི་འབྲེལ་ལམ་ཐོག་ལའང་སྐྱོན་གནས་རེ་ཟུང་ཤོར་ཡོད་སྲིད་མོད། ཕུགས་སུ་མི་ཚང་མས་ཡིད་ཆེས་དང་གོང་བཀུར་ཐོབ་པའི་རླབས་ཆེན་གྱི་སྤྱོད་ཚུལ་ཞིག་ཡིན་པར་མ་ཟད། སྤྱི་ཚོགས་དེའི་ཕུགས་ཀྱི་ཁེ་ཕན་དང་ཆེ་མཐོང་ལའང་ཁ་འབྲལ་ཐབས་མེད་པ་དང་ཆེས་མེད་དུ་མི་རུང་བའི་བཟང་སྤྱོད་ཅིག་ཡིན།
ཡུ་རོབ་བོད་མི་ཁ་འཐོར་གྱི་སྤྱི་ཚོགས་ཆུང་ཆུང་དེའི་ནང་ལ་མཚོན་ན། སྐུ་ཞབས་ཐུབ་བསྟན་རྒྱ་མཚོ་ལགས་ནི། ཤེས་ཡོན་དང་འཇོན་ཐང་། ལྷག་བསམ་དང་ལ་ཞེན། ཧུར་རྩོན་དང་བརྟན་ཚིགས་ཕྱོགས་གང་ཐད་ནས་གཞོན་སྐྱེས་ཚོའི་ཁྲོད་འབུར་དུ་ཐོན་ཡོད་པ་ཞིག་ཡིན་ལ། ནུབ་ཕྱོགས་སུ་ཕེབས་རྗེས་དུས་ཚོད་མང་ཆེ་བ་སྒེར་དོན་ལས་སྤྱི་དོན་ཐོག་བཏང་ཟིན་པའི་གང་ཟག་ཅིག་ཡིན་པ་ཡོངས་གྲགས་ཡིན།
སྐུ་ཞབས་ཐུབ་བསྟན་རྒྱ་མཚོ་ལགས་བོད་ཕྱི་ནང་གཉིས་ཀར་རྒྱུས་མངའ་ཆེ་ཞིང་། བཙན་བྱོལ་དུ་འབྱོར་བའི་མི་ལོ་ ༢༠ རིང་ལ་རྒྱ་གར་ནས་སུ་ཇ་བོད་ཁྱིམ་ནས་ཝར་ནཱ་མཐོ་སློབ་བཅས་ཀྱི་སློབ་གསོ་ཐོབ་ཅིང་། ༡༩༩༨ ལོར་སྒེར་ངོས་ནས་ཧྥ་རན་སིར་འབྱོར་རྗེས་ཀྱང་། ཕ་རི་སིའི་སོར་བྷོན་གཙུག་ལག་སློབ་གཉེར་ཁང་ ( Sorbonne Université Paris ) དུ་ལོ་བཞིའི་རིང་ཁྲིམས་ཀྱི་སློབ་སྦྱོང་གནང་བའི་གྲུབ་དོན་དུ་ ༢༠༠༩ ལོར་མཉམ་འབྲེལ་རྒྱལ་ཚོགས་ཀྱི་བཅའ་ཁྲིམས་ Charter of the United Nations བོད་བསྒྱུར་གནང་ཡོད།
ཐེངས་འདིའི་གླེང་རྙོག་གི་ཐད་ནས་ཅུང་ཙམ་བཤད་ན། གསར་འབྱོར་དང་རྙིང་འབྱོར་གྱི་བར་ཁྱད་ཅིག་དང་། རྒན་པ་དང་གཞོན་པའི་འཐབ་རྩོད་ཅིག སྒེར་འཁོན་ཕྱོགས་འཐེན་གྱི་ཤན་ཤུགས་མི་ཉུང་བ་ཞིག་ཐེབས་ཡོད་པ་མིན་འགྲོ་དྲན་གྱི་ཡོད། གང་ཡིན་ཟེར་ན། སྔོན་ཆད་ཧྥ་རན་སིའི་བོད་རིགས་ཚོགས་པར་གླེང་རྙོག་རབ་དང་རིམ་པ་བྱུང་བ་དང་བསྟུན་ཏེ། ༢༠༠༣ ལོར་མང་མོས་ཐོག་སྐུ་ཞབས་ཐུབ་བསྟན་རྒྱ་མཚོ་ལགས་ཚོགས་གཙོར་བདམས་ཐོན་བྱུང་ཡོད། འོན་ཀྱང་། སྐབས་དེ་ཤེད་ཅིག་ནས་སྔར་གྱི་ཚོགས་པའི་འབྲེལ་ཡོད་འགའ་ཞིག་གིས་སྤྱི་བའི་ལས་དོན་ཐོག་མཉམ་རུབ་བྱེད་ཀྱི་མེད་པ་མངོན་གསལ་ཡིན་ལ། བོད་རིགས་ཚོགས་པ་དང་བོད་དོན་རྒྱབ་སྐྱོར་བ་སྐོར་ཞིག་གི་བར་དང་། བོད་རིགས་ཚོགས་པ་དང་ཧྥ་རན་སིའི་གཞུང་གི་བར། དེ་བཞིན། བོད་རིགས་ནང་ཁུལ་ཕན་ཚུན་བར་བཅས་སུའང་དཀྲུག་ཤིང་སྔ་ཕྱིར་བྱེད་ཀྱི་ཡོད་པའི་དོགས་པ་ཡོད།
༢༠༡༡། ༦། ༤ ཉིན།

ཡང་བསྐྱར་འདངས་རེ་བརྒྱབས་ན། བདག་ནི་ཟམ་གདོང་རིན་པོ་ཆེ་ལ་གུས་བརྩི་དང་ཁོའི་ཆབ་སྲིད་གནང་ལྟངས་ལ་སྤོབས་པ་ཡོད་མཁན་ཞིག་ཡིན། དེ་རིང་་་་་་ཟམ་གདོང་ཚང་གིས་་་་་་”བཀའ་ཁྲི་མཆོག་གིས། ཁྱེད་རང་གིས་ང་ལ་སྒེར་གྱི་དཀའ་ངལ་ཞིག་འདུག་ལབ་ནས་དགོངས་པ་ཞུ་བའམ། ཡང་ན་སྦར་སིལ་དོན་གཅོད་ཀྱི་གླ་ཕོགས་ཡུ་རོབ་ནང་གི་མཐོ་རིམ་ལས་བྱེད་གླ་ཕོགས་ནང་བཞིན་བོད་གཞུང་གིས་སྤྲོད་ཐུབ་ཀྱི་མེད་ཙང་། ཁྱེད་རང་གིས་རྒྱུ་མཚན་དེར་བརྟེན་ནས་དོན་གཅོད་ལས་ཀ་ནས་དགོངས་པ་ཞུ་རོགས་ཅེས་སྐུལ་སློང་བྱས་བྱུང་”‘་་་་་ཞེས་བ་འདི་བདེན་ནི་ཐབས་སྐྱོ་བ་དང་སྐྱུགས་བྲོ་བ་ཞིག་མ་རེད་དམ།

སྤྱིར་ཧྥ་རིན་སིའི་བོད་རིགས་ཚོགས་པ་དང་ཕྱི་རྒྱལ་གྱི་རོགས་ཚོགས་ཁག་གི་ནང་རྙོག་དྲ་ཆེན་པོ་འདུག རོགས་ཚོགས་ཀྱི་གནས་ཚུལ་གཞན་ཞིག་རེད། བོད་རིགས་ཚོགས་པ་ནི་ལོ་ཉི་ཤུའི་རིང་ལ་མི་ཁ་ཤས་ཀྱི་དབང་ཆ་སྒེར་གཅོད་བྱས་པ་རེད། དེས་གསར་རྙིང་བར་ལའང་འགལ་བ་བྱུང་བ་རེད། བོད་རིགས་མང་ཆེ་བས་དབང་ཆ་སྒེར་གཅོད་པ་ཚོར་ངོ་རྒོལ་བྱས་པ་རེད། དེའི་རྒྱབ་ན་དོན་གཅོད་ཁང་དང་ཧྷ་རིན་སིའི་རྙིང་འབྱོར་མང་པོ་ཡོད་པ་རེད། མཐར་མང་མོས་འོས་བསྡུ་བྱས་ནས་སྒེར་གཅོད་པ་ཚོ་ཕམ་ནས་ཐུབ་བསྟན་རྒྱ་མཚོར་རྒྱལ་ཁ་ཐོབ་པ་རེད། ཚོགས་པ་རྩིས་ལེན་སྐབས་ཚོགས་པ་ལ་ཧྥ་སྒོར་གཅིག་སྟོང་མ་གཏོགས་མི་འདུག་ཟེར། ད་དུང་བུ་ལོན་ཡང་མང་པོ་འདུག་ཟེར། སྒེར་གཅོད་ཕྱོགས་ཁག་གིས་ཐུབ་བསྟན་རྒྱ་མཚོའི་ཕྱོགས་ཁག་ལ་ནམ་རྒྱུན་འཁོན་ལན་རློག་གི་ཡོད་པ་རེད། ཕྱོགས་ཁག་གཞན་དེར་ལྷག་བསམ་དང་ལ་རྒྱ་མེད་ཡང་ཧྥ་སྐད་དང་དབྱིན་སྐད་ཤེས་མཁན་འགའ་ཤས་ཡོད་པ་རེད། ཡིན་ནཡང་ཐུབ་བསྟན་རྒྱ་མཚོ་ཕྱོགས་ལ་བོད་རིགས་གྲངས་མང་ཞིང་ལྷག་བསམ་ལ་རྒྱ་ཅན་ཡོད་ན་ཡང་སྐད་རང་མགོ་ཐོན་ནི་ཉུང་ཉུང་རེད། ཐུབ་བསྟན་རྒྱ་མཚོ་ལོ་ཤས་ལ་ཚོགས་གཙོར་བསྡད་ནས་ལས་འགུལ་མང་པོ་སྤེལ་ནས་ཚོགས་པ་ཡར་རྒྱས་ལ་སོང་བ་རེད་ཟེར། ལོ་ཤས་རྗེས་ནས་ཚོགས་གཙོར་འདུག་པ་ལ་ལོ་ཚད་བཀག་ཡོད་པས་ལྷ་བ་ཞིག་ཚོགས་གཙོར་བསྐོས་བ་རེད། ཁོས་ཁོའི་ཚབ་ལ་ཐུབ་བསྟན་རྒྱ་མཚོ་ཡང་བསྐྱར་ཚོགས་གཙོར་བཞག་པ་རེད། འདི་ན་ཡར་མར་ལ་ཡིག་འབྲེལ་བྱས་ནས་ཁྲག་དཀྲིག་དཀྲིག་བྱེད་མཁན་ཚོ་ནི་དེ་སྔོན་དབང་ཆ་སྒེར་གཅོད་བྱེད་མཁན་དེ་ཚོ་ཡིན་པ་འདྲ།

ས་གནས་མང་ཚོགས་ཀྱིས་བསམ་འཆར་ཡིག་ཆ་ཕུལ་བ་དང་། ཡང་ས་གནས་ཀྱི་མི་སྐོར་ཞིག་གིས་རྒྱབ་སྐྱོར་གང་བྱས་ནའང་འདྲ། བཀའ་ཁྲི་མཆོག་གིས་༼བཀའ་ཤག་ལ་ཁྱོད་སྐུ་ཚབ་དོན་གཅོད་དུ་མི་བསྐོ་རྒྱུའི་གནས་ཚུལ་གཞན་ཞིག་འབྱོར་ཡོད། དེ་བཀའ་ཤག་གིས་ཁྱོད་ལ་མི་བཤད་རྒྱུའི་ཐག་བཅད་ཡོད།༽ཅེས་གསུང་ཡོད་ན། སྐད་ཆ་འདི་ལ་གནད་འགག་འདུག

སྤྱི་ལོ་༢༠༡༠ ལོའི་ཟླ་བ་བཅིུག་པར་ང་རང་སྒེར་གྱི་གནས་ཚུལ་ཞིག་གམ་ཡང་ན་སྤྲོ་འཁྱམས་ཐེངས་ཤིག་གི་ཚུལ་དུ་ཧྥ་རན་སིར་ཕྱིན་པ་ཡིན། སྐབས་དེར་མི་གང་མང་ཞིག་གིས་ཐུབ་བསྟན་རྒྱ་མཚོའི་སྐོར་ལ་ལབ་གླེང་མང་ཞིང་། ཧྥ་རན་སིར་ཐུབ་བསྟན་རྒྱ་མཚོ་ཟེར་བ་ཞིག་ཡོད་པ་སྐབས་དེར་ཐོས་པ་ཐེངས་དང་པོ་ཡིན། མི་ལ་ལ་ཞིག་གིས་ཁོང་ལ་ཤེས་ཡོན་གྱི་གཤོག་རྩལ་རྒྱས་མེད་ཀྱང་ལྷག་བསམ་དང་ལ་རྒྱའི་རེ་འདུན་ཁྲི་ཕྲག་གིས་ཀློང་ན་ཁོང་ལས་ལྷག་པའི་མི་ཞིག་ཧྥ་རན་སིར་རྙེད་རྒྱུ་མེད་ཟེར། ཡང་མི་ལ་ལ་ཞིག་གིས་ཁོང་ལ་ཤེས་འཇོན་མེད་ཁར་མི་ལ་འབྲེལ་བ་བྱེད་སྟངས་དེ་བས་ཀྱང་ཤེས་ཀྱིན་མ་རེད་ཟེར། ཁོང་གིས་སྐད་ཆ་བཤད་སྟངས་ཞིག་གིས་མི་མང་པོའི་སེམས་ལ་བཅོས་མེད་ཀྱིས་རྨ་ཁ་ཡང་བཟོ་ཡོད་ཚུལ་སོགས་ཀྱང་བཤད་ཀྱིན་འདུག ༢༠༠༨་ལོར་དེ་གའི་བོད་མི་ཞིག་གིས་རྒྱ་ནག་གཞུང་ཚབ་ཀྱི་རྒྱལ་དར་མར་བབས་ཏེ་བོད་ཀྱི་རྒྱལ་དར་ཞིག་བསྒྲེངས་ཡོད་པ་ནི་ལོ་རྒྱུས་ཀྱི་འཕེལ་རིམ་ཁྲོད་ན་དུས་སྐབས་དེ་དང་བསྟུན་པའི་བོད་ཀྱི་དབའ་བོ་ཡིན་མིན་མི་ཤེས་ཀྱང་བོད་ལ་དུང་བའི་གངས་ཕྲུག་སྟག་ངར་མ་ཞིག་དང་འདྲ་བ་ནི་བརྗོད་མི་དགོས་པ་རེད། ཁོ་བོས་ཀྱང་ལོ་དེར་སོག་ཡུལ་གྱི་རྒྱ་ནག་གཞུང་ཚབ་ཀྱི་མདུན་དུ་བོད་ཀྱི་རྒྱལ་དར་སྒྲེངས་འཛུགས་བྱས་ཡོད་པས་ད་ཆར་ཡོབ་རོབ་སླེབས་པ་ཡིན། ཡིན་ནའི་ཐུབ་བསྟན་རྒྱ་མཚོ་ཁོང་གིས་མི་དེར་ཁ་རྡུང་བཏང་ཡོད་པ་དང་རྒྱ་ནག་གཞུང་ཚབ་ཀྱི་རྒྱལ་དར་མར་བབས་ཏེ་བོད་ཀྱི་རྒྱལ་དར་སྒྲེང་འཛུགས་བྱས་པ་ནི་རང་ཉིད་སྐད་གྲགས་ཡོང་ཕྱིར་རེད་ཅེས་བཤད་ཡོད་པས་མི་ལྷག་བསམ་ཅན་དང་ལ་རྒྱ་ཡོད་མཁན་ཞིག་གི་ངག་ནས་སྐད་ཆ་དེ་འདྲ་ཐོན་སྲིད་དམ། གང་ལྟར་ཁོང་ཆབ་སྲིད་ལ་དོ་སྣང་ཅན་ཞིག་དང་བོད་ཀྱི་ཆབ་སྲིད་ཀྱི་གར་སྟེགས་སུ་སླེབས་ན་འདོད་པའི་མི་ཞིག་ཡིན་པར་ཐེ་ཚོམ་མེད། ཁོང་ལ་ཡོ་རོབ་སྤྱི་འཐུས་ཤིག་གི་རྐུབ་སྟེགས་ཀྱང་རེག་མེད་པས་སྐུ་ཚབ་དོན་གཅོད་དུ་གསར་བསྐོ་བྱས་པ་ནི་བཙན་བྱོལ་བོད་མིའི་སྒྲིག་འཛུགས་ཁག་གིས་སྡིག་པ་མི་བཙུམས་དང་། ཡང་ན་མུན་ནག་མདའ་འཕེན། ཡང་ན་འུ་ཐུག་ཐབས་ཟད་ཀྱིས་གནས་ཚུལ་ཞིག་ཏུ་བརྩི་རྒྱུ་རེད། ཁོང་གིས་རང་བོས་ནས་དགོངས་པ་ཞུ་ཐུབ་ས་མ་རེད་ཟེར་བ་དང་། ལས་ཀ་གཅིག་ཀྱང་བྱས་མེད་པས་རྩ་དགོངས་ཞུ་ཟེར་བ་ཡང་ཡ་མཚན་རེད། ད་ནི་སླར་ཡང་ཏའི་སི་ཏུ་བྱང་ཆུབ་རྒྱལ་མཚན་གྱི་དུས་རབས་ལ་ཕྱིར་འཁོར་བ་གྲགས།