གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། བཅོ་ལྔ།

གཟའ་པ་སངས་དང་སྤེན་པ་གཉིས་ལ་གུང་གསེང་ཡིན་ན་ཡང་། གལ་སྲིད་ཆོས་ལུགས་པའི་ནང་མི་ཞིག་ཡིན་ཚེ། གཟའ་པ་སངས་ཀྱི་ཕྱི་དྲོ་ས་མ་རུབ་གོང་ནས་བཟུང་། གཟའ་སྤེན་པའི་ས་རུབ་གོང་བར་དུ། གློག་གི་ཅ་དངོས་དག་གཏན་ནས་བེད་སྤྱོད་བྱེད་ཆོག་གི་མེད་པ་མ་ཟད། རླངས་འཁོར་བཏང་ནས་གང་སར་འགྲོ་ཡང་ཆོག་གི་མེད་པ་ཡིན། གལ་སྲིད། ཁྱིམ་ཚང་དེ་ནི་ཆོས་ལུགས་པའི་ཁྱིམ་ཚང་ཞིག་མིན་ཚེ། དེ་དག་བརྩི་སྲུང་བྱེད་ཀྱི་མེད་པ་ཡིན། དེ་ཡིན་དུས་གུང་གསེང་འདི་རྒྱལ་ཁབ་ཀྱི་ལས་བྱེད་ཡོངས་ཀྱི་གུང་གསེང་ཆགས་ཀྱི་ཡོད།

ང་རང་ནམ་རྒྱུན་ལྟར་གཟའ་པ་སངས་ལ་ནང་དུ་བསྡད་ཡོད་ལ། མཚམས་རེར་ནང་མི་ལྷན་འཛོམས་ཡོད་པ་ལྟར། ནང་མི་ལྷན་འཛོམས་ཀྱི་ཆེད་དུ། ང་རང་གིས་ཟ་མ་མ་འདྲ་བ་ཁ་ཤས་ཤིག་བཟོས་པ་ཡིན། མཛའ་མོས་མོ་རང་གི་ཚོད་ཀྱི་སྒོང་སྤོར་ཞིག་བཟོས་སོང་། མོ་རང་གི་ཨ་ཅེ་ཡིས་སྒོང་སྤོར་ཞིག་བཟོས་ནས་འཁུར་ཡོང་འདུག དེ་ཡི་རྗེས་སུ་མོ་རང་གི་ཨ་མ་རྒན་མོ་དང་ཨ་མ་རྒན་མོ་གཉོར་སྐྱོང་བྱེད་མཁན་གྱི་ཧྲེས་ལེས་པེན་བུད་མེད་དེ་གཉིས་འབྱོར། དེ་ཡི་སྔོན་ཙམ་དེར་མོ་རང་གི་ཕ་རྒན་གྱིས་ནམ་རྒྱུན་ལྟར་མོ་རང་གི་ཨ་མ་ལ་མེ་ཏོག་ཞིག་དང་ང་ཚོ་ལ་ལག་སྐྱེས་རེ་ཉོས་ནས་སླེབས་སོང་།

ཚང་མ་ཅོག་རྩེ་ཡི་མཐའ་རུ་འཛོམས་ནས་ང་རང་གི་བཟོས་པའི་ཟ་མ་དེ་དག་ལ་རོལ་བཞིན། ཚང་མས་ང་ལ་བསྟོད་བསྔགས་གནངས། ཉི་ཧོང་གི་ཟ་མ། ཐེ་ལན་ཀྲའི་ཟ་མ། ད་དུང་། ཁོང་ཚོའི་རྒྱལ་ཁབ་ཀྱི་དགའ་ཤོས་བྱེད་པའི་ཕྱུར་ཐིགས་དང་ཤ་མོག་བསྲེས་མ་ཞིག དེ་དང་ལྷན་དུ་ཅོག་རྩེ་ཡི་སྒང་དུ་འཐུང་ཆུ་མངར་མོའི་རིགས་ཀྱི་བཀང་ནས་ཡོད་ལ། ཚང་མ་རང་རང་གི་ས་ནས་གང་ལ་དགའ་བ་དེར་མོས་པ་བྱེད་ཀྱིན་ཟས་ལ་རོལ་གྱི་ཡོད། མཛའ་མོའི་ཨ་མ་རྒན་མོ་ནི། དུས་རྒྱུན་དུ་ང་རང་གིས་བཟོས་པའི་བོད་ཟས་རིགས་ལ་དངོས་ནས་ཧ་ཅང་དགའ་བོ་བྱེད་ཀྱི་ཡོད། དེ་རིང་ངས་བོད་ཟས་གང་ཡང་བཟོས་མེད་དུས། མོ་རང་གི་སེམས་པ་ཅུང་ཕམ་འདུག་ལ། ཡང་དང་བསྐྱར་དུ་མོ་རང་ནི་ཟ་མ་གསར་བའི་རིགས་ལ་གོམ་འདྲིས་མེད་རབས་བཤད། མོ་ནི་ད་ལོ་དགུང་ལོ་གྱ་བཅུ་གྱ་བརྒྱད་རེད། མོ་རང་གི་མི་ཚེ་ནང་དུ་སྐད་ཡིག་བཞི་ལ་ཐོག་པ་མེད་ལ། སྐད་ཡིག་གཉིས་ཀྱི་སྒང་ནས་དེབ་ཀྱང་མང་བོ་བྲིས་ཡོད།

ཚང་མས་ཟ་མ་ཟོས་ཚར་བ་མ་ཟད། རང་རང་གི་ས་ནས་ལྷོད་ལྷོད་དུ་བསྡད་ཡོད། མཛའ་མོས་སྡེར་མ་དང་ཤེལ་ཕོར་སྟོང་བ། ལྕགས་ཚེབ་དང་ལྕགས་ཐུར་སོགས་བསྡུ་གསོག་བརྒྱབས། ངས་མོ་རང་ལ་རོགས་པ་བྱེད་ཅེས་བཤད་ཀྱང་། མོ་རང་གིས་ཁྱེད་རང་སོང་ནས་གད་སྙིགས་གཡུགས་དེ་འོང་ན་འགྲིག་ཟེར། ཧྲེས་ལེས་པེན་གྱི་བུད་མེད་དེ་ཡིས་སྡེར་མ་དང་ཤེལ་ཕོར་སྟོང་བ་དག་ཐབ་ཚང་དུ་འཁུར་བཞིན་འདུག ང་རང་གད་སྙིགས་འཕྱོ་རུ་སོང་ནས་ཕྱིར་སླེབས་དུས། མོ་རང་ད་དུང་ཐབ་ཚང་དུ་སྡེར་མ་སོགས་དཀྲུ་བཞིན་འདུག མང་ཤོས་ཤིག་གཙང་དཀྲུ་སྒམ་ནང་དུ་བཞག་ཚར་འདུག མོ་རང་གི་ཨ་ཅེ་ཡིས་ཕྱི་རུ་མོ་རང་གི་ཨ་མ་རྒན་མོར་ཁ་བརྡ་བྱེད་ཀྱི་འདུག་ལ། གཞན་དག་གིས་རང་རང་གི་ས་ན་ཁ་པར་དང་གློག་ཀླད་གསར་བའི་རིགས་ལ་མ་ཁོམ་པར་བསྡད་འདུག

ངས་མོ་རང་ལ་དཀྲུ་རོགས་བྱས་ནས་ཚར་དུ་བཅུགས་པ་དང་། ཤིང་ཏོག་རིགས་གཏུབ་ནས་ཅོག་རྩེ་སྒང་དུ་བཞག དེ་དང་འབྲེལ་མོ་རང་གི་ཨ་ཅེ་ཡིས་མོ་རང་གི་འཁུར་ནས་འོང་བའི་སྒོང་སྤོར་འཁུར་ནས་སླེབས། ཞོར་དུ་ཇ་དང་འཚིག་ཇ། ཚ་བོའི་རིགས་འཐུང་རྒྱུ་འཁུར་འདུག ང་ཚོ་སླར་ཡང་ཅོག་རྩེ་མཐའ་རུ་འཛོམས་ཀྱང་། ཟ་མ་ཟ་དུས་བཞིན་ཚང་མ་འཛོམས་མེད། རང་རང་གི་འདོད་པ་ལྟར། ཁ་ཤས་ཤིག་ཕྱི་ན་བསྡད་ཡོད། མཛའ་མོའི་མ་རྒན་གྱིས་བུ་མོ་ཐར་མ་མཚོ་དང་ལྷན་དུ་ཁྱམས་རྭ་རུ་ཡོད་ལ། དེ་ཡི་འགྲམ་དུ་མོ་རང་གི་ཕ་རྒན་ཡང་ཡོད།

ད་ནི་ཅུང་ལྷོད་ལྷོད་ཆགས་འདུག་པའི་ང་རང་གིས་སྒོང་སྤོར་ཟ་ཞོར་དུ་གློག་ཀླད་ཀྱི་ཁ་ཕྱེ་ནས་དྲ་རྒྱུའི་འཇིག་རྟེན་ལ་ཉུལ་ཞོར་དུ། གཟའ་པ་སངས་ཀྱི་ཀུན་གླེང་ལེའུ་ཚན་ལ་ཉན་པ་ཡིན། ཆུ་ཚོད་གཅིག་མ་འགྲོ་ཙམ་སོང་རྗེས་སུ་བུ་མོ་ཉལ་རན་འདུག་པའི་ང་རང་གིས་ཉན་མཚམས་བཞག་ནས་བུ་མོ་ཉལ་སའི་ནང་དུ་འཇོག་པར་སོང་། བུ་མོ་དངོས་ནས་ཐང་ཆད་ཡོད་པ་འདྲ། སྐར་མ་བཅོ་ལྔ་ཙམ་གྱི་རྗེས་སུ་གཉིད་དུ་གཡུར་སོང་། ང་རང་ག་ལེར་སྐེས་འཛེགས་རྒྱུད་དེ་འོག་ཤོད་དུ་ཡོང་ཞོར། དེ་རིང་རྒྱ་གར་དུ་ཡོད་པའི་ཕ་མ་གཉིས་དང་ནུ་མོ་ལྷ་མོ་སྐྱིད་ལ་ཁ་པར་བརྒྱབས་པའི་སྐོར་ལ་བསམ་བློ་ཞིག་བཏང་།

ངས་མཛའ་མོ་ལ་རང་གི་ཕ་མ་གཉིས་དང་ནུ་མོ་ལ་ཁ་པར་ཁྲོད་དུ་ཁ་བརྡ་གང་བྱས་པ་དང་། གཟའ་ཉི་མའི་ཉིན། ནུ་མོ་ལ་སྒོར་མོ་ཁ་ཤས་ཤིག་སྐུར་དགོས་ཀྱི་ཡོད། མོ་རང་གི་དབྱར་ཁའི་གུང་གསེང་དུ་སླེབས་འདུག་པ་དང་། དབྱར་ལྷམ་ཞིག་དང་དབྱར་ལྭ་སྲབ་སྲབ་ཁ་ཤས་ཤིག་དགོས་ཀྱི་ཡོད་ཟེར་ནས་བཤད་ཀྱི་འདུག་ཞེས་མོ་རང་ལ་བཤད་དུས། མོ་རང་གིས་ཀྱང་འགྲིག་གི་རེད་དང་མ་རེད་ཅེས་ལན་མེད་ན་ཡང་། རྣམ་འགྱུར་ངན་པ་གང་ཡང་བསྟན་མ་སོང་།

མུ་འགོད།