གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། བཅུ་དྲུག

གཟའ་སྤེན་པའི་ཉིན་འདི་ལ་ངེད་གཉིས་མོ་རང་གི་གྲོགས་མོ་དང་། ང་རང་གི་གྲོགས་པོ་རྡོར་རྒྱལ་གྱི་བུ་མོའི་ལོ་གསུམ་ལོན་པའི་སྐྱེས་སྐར་ལ་འགྲོ་བར་ཁ་སང་ནས་བཤད་ཡོད་ལ། ང་རང་ཡང་ཆུ་ཚོད་བརྒྱད་དང་ཕྱེད་ཀ་བར་དུ་ལྷོད་ལྷོད་ཅིག་ཉལ་ཐུབ་ངེས་བསམ་ནས་ཉལ་ཡོད་ན་ཡང་། ཞོགས་པ་ཆུ་ཚོད་བདུན་དང་ཕྱེད་ཀ་ཙམ་ཞིག་ལ་ང་རང་གི་གཉིད་མ་སད་ཀྱི་བར་དེར། མཛའ་མོ་ངུ་བཞིན་པའི་སྐད་ཅིག་ཐོས་སོང་། དེ་ནས་ང་རང་གིས་མགོ་བོ་ཡར་བཀྱགས་ནས་བལྟས་དུས། མོ་རང་གིས་བུ་མོ་ཐར་མ་མཚོ་མཆན་ཞབས་དུ་འཛིན་བཞིན། མིག་ཆུ་ཁྲོམ་ཁྲོམ་བཞུར་ཞོར་དུ་ང་རང་གི་ཉལ་སའི་འགྲམ་དུ་སླེབས་འདུག

ངས་མོ་རང་ལ་ག་རེ་བྱུང་སོང་། ག་རེ་བྱུང་སོང་ཞེས་དྲིས་དུས། མོ་རང་གིས་ཁྱེད་རང་ཡར་ལ་ལོངས་དང་། བུ་མོ་ལ་བལྟ་རོགས། ང་རང་དཀྲུས་ཁང་དུ་སོང་ནས་དཀྲུས་ཤིག་བརྒྱབས། དེ་ནས་ང་ཚོ་འགྲོ སྐད་ཆ་ཚང་མ་ལམ་བར་དུ་བཤད་ཆོག་ཟེར། ངས་གང་བྱུང་འདི་བྱུང་མ་ཤེས་ཀྱང་། ཚོད་དཔག་ཞིག་བྱེད་ཐུབ་པ་དེ་ནི་ཉིན་འགའི་སྔོན་དུ་ང་ཚོའི་བར་དུ་བྱུང་བའི་གནས་ཚུལ་དེ་དང་འབྲེལ་བ་ཡོད་པ་ཞིག་ཡིན་པ་ཤེས་སོང་། གང་ལྟར། ངས་སྒྲ་སྙན་ཆུང་ཆུང་དེ་བླངས་ནས། བུ་མོ་ཉལ་སའི་ནང་དུ་བཞག་ནས། ངས་བུ་མོའི་ཉལ་སའི་འགྲམ་དུ་བརྡུང་ལེན་ཞིག་བྱེད་ཁུལ་བྱས། དེ་དུས་བུ་མོས་ཀྱང་དགའ་བོ་ཡོད་པའི་ངང་ནས་ཡང་བསྐྱར་ཞེས་མོ་རང་གི་ཨ་མའི་སྐད་ཀྱི་སྟེང་ནས་བཤད།

མཛའ་མོས་དཀྲུས་བརྒྱབས་ཚར་ནས་སླེབས་ན་ཡང་། ད་དུང་། མིག་མཐར་མཆི་མ་ཡང་ཡང་འཁོར་གྱིན་འདུག དེ་ནས་ང་རང་གིས་མཛའ་མོས་གོན་པ་བརྗེ་བོ་བརྒྱབས་ཚར་རེག་བར་དུ་སྒུག ང་རང་གིས་དབྱར་ལྭ་སྟབས་བདེ་ཞིག་གོན་ཞིང་། རང་གི་རྒྱབ་ཁུགས་ཕྲག་པར་འཁུར། བུ་མོ་ཐར་མ་མཚོ་ལག་པར་བཟུང་ནས་འོག་ཤོད་དུ་ཡོང་དུས། མོ་རང་གི་ཨ་ཅེ་ཡི་གཟའ་མི་དག་འདང་ནུབ་མོ་རང་གི་ཨ་མ་ཡི་ནང་དུ་བསྡད་པ་ཡིན་དུས། རྐུབ་སྟེགས་སྙི་མོ་རིང་བོ་དེ་ཡི་སྟེང་ན། མོ་རང་གི་ཨ་ཅེ་དང་ཨ་མ་ཚ་མོ། དེ་ཡི་ཟུར་དུ་ཨ་ཅེ་ཡི་ཁྱོ་ག་བཅས་འདུག མཛའ་མོས་དེ་དག་གི་ཕྱོགས་སུ་ཡང་མི་བལྟ་བར་སྒོ་རུ་འབུད་རྩིས་བྱས་སོང་།

སྐབས་དེ་དུས་ནི་ང་རང་གིས་གང་ཞིག་བྱུང་བ་དེ་དག་ནི་ཁོང་ཚོའི་བར་དུ་བྱུང་བ་ཞིག་ཡིན་པ་ཤེས་ན་ཡང་། ངས་ཀྱང་ཁོང་ཚོ་ལ་ཁ་གྲགས་པར་སྒོ་རུ་འབུད་ན་མི་འགྲིག་པ་ང་རང་གིས་ལོས་ཤེས། ངས་ཚང་མ་ལ་ཞོགས་པ་བདེ་ལེགས་ཞུས་པ་དང་། བདེ་མོ་བཞག་ནས་མོ་རང་གི་རྗེས་སུ་སྒོ་ཕྱི་ལ་འགྲོ་རྩིས་བྱས་དུས། ཨ་ཅེ་ཡིས་ཁྱོ་གའི་ང་རང་ལ་ཁྱེད་རང་གིས་སྒྲ་སྙན་བརྡུང་བ་ཡིན་ནམ་ཟེར། ངས་བརྡུང་ཁུལ་ཞིག་བྱས་ཡིན། བུ་མོའི་ཆེད་དུ་ཞེས་བཤད་དུས། ཁོ་རང་གིས་སྙན་མོ་འདུག ཁྱེད་རང་གིས་ང་ཚོ་ཡོད་སར་བརྡུང་ན་མ་ཆོག་པ་རེད་དམ་ཟེར་ནས་དགོང་ལ་འཛུམ་གྱིས་བཀང་། ང་རང་གིས་འཁེང་ཆུང་གི་ངང་ཚུལ་དང་བཅས་རང་ཉིད་ཀྱི་ཡག་པོ་ཞིག་བརྡུང་མི་ཤེས་པའི་སྐོར་གྱི་ལན་གསལ་བོ་ཞིག་སྤྲད་རྗེས་སྒོ་ཕྱི་ལ་ཐོན། མཛའ་མོ་ནི་རླངས་འཁོར་གྱི་འགྲམ་དུ་སླེབས་འདུག ངས་བུ་མོ་ཐར་མ་མཚོ་རླངས་འཁོར་ནང་དུ་བཞག་ནས་ནང་དུ་འབུད་རྩིས་བྱས་དུས། མོ་རང་གིས་ངེད་གསུམ་གཅིག་བྱས་ན་སྐྱེ་སྐར་གྱི་རྗེས་སུ་མཚོ་འགྲམ་དུ་འགྲོ་ན་ཐང་། དེ་ཡིན་དུས་ཆུ་རྐྱལ་གོན་པའི་རིགས་ཁྱེད་རང་དང་བུ་མོ་ལ་དགོས་པ་དག་ངས་འཁུར་ཡོད། རེད་དེ། ང་རང་གི་གོན་པ་བརྗེད་འདུག ཁྱེད་རང་སོང་ནས་དེ་འཁུར་ཡོང་རོགས་ཞུ་ཟེར།

ང་རང་བསྐྱར་དུ་སྒོ་ནང་དུ་འཛུལ་ནས་ཚང་མའི་ཕྱོགས་སུ་སྟབས་མི་བདེ་བའི་ཚོར་བ་ཞིག་དང་བཅས་བལྟ་ཞོར་དུ། ཀུ་རེ་དང་བཅས་ནང་དུ་ཡོང་ནས་མོ་རང་གི་ཆུ་རྐྱལ་གོན་པ་འཁུར་ནས་རླངས་འཁོར་འགྲམ་དུ་འབྱོར་དུས། མོ་རང་གིས་དགོངས་དག ད་དུང་ཁྱེད་རང་ཕྱིར་ནང་དུ་མ་སོང་ན་འགྲིག་གི་མི་འདུག བུ་མོ་དང་ང་ཚོའི་གཟུགས་པོའི་སྟེང་ལ་ཉི་འགོག་ཞུགས་སྣུམ་དགོས་ཀྱི་འདུག་ཟེར། ང་རང་ཕྱིར་ཚོར་བ་སྟབས་མི་བདེ་བ་ཞིག་འཁུར་ནས་ནང་དུ་འཛུལ་དུས་སུ། ང་སླར་ཡང་ཐོན་ཡོད་ཅེས་བཤད་དུས། ཁོང་ཚོ་ཚང་མས་ངའི་ཕྱོགས་སུ་བལྟས།

མོ་རང་གིས་ཨ་མས་ཁྱེད་རང་གི་ག་རེ་ལུས་འདུག་ཟེར། ངས་ཉི་འགོག་ཞུགས་སྣུམ་དགོས་ཀྱི་འདུག གཅིག་བྱས་ན་ང་ཚོ་སྐྱེ་སྐར་གྱི་རྗེས་སུ་མཚོ་འགྲམ་དུ་འགྲོ་ན་ཐང་ཞེས་བཤད་དུས། མོ་རང་ཡར་བླངས་དེ་ཡོང་ནས་ང་རང་ལ་བལྟ་རོགས་བྱས་ན་ཡང་། ང་རང་གིས་མཛའ་མོས་གང་དུ་ཡོད་པ་བཤད་ཡོད་པ་ཡིན་དུས། ང་རང་གིས་རྙེད་སོང་། ང་རང་ཕྱི་ལ་ཐོན་དུས་མོ་རང་རླངས་འཁོར་ནང་དུ་མིག་ཆུ་ཁྲོམ་ཁྲོམ་བཞུར་གྱིན་འདུག་ལ། མོ་རང་གི་མ་རྒན་གྱིས་རླངས་འཁོར་གྱི་སྒེའུ་ཁུངས་འགྲམ་དུ། རང་གི་བུ་མོ་ལ་དགོངས་དག་ཞུ་བཞིན་འདུག

ང་རང་རླངས་འཁོར་དུ་འཛུལ་ཞོར། མོ་རང་གི་ཨ་མ་ལ་བདེ་མོ་བཞག ང་ཚོ་ནི་སྐྱེ་སྐར་དུ་འགྲོ་བའི་ས་ཆ་ནི། ཀྲེ་ལེ་བེས་ཞེས་པའི་དེང་དུས་སུ་ནེའུ་ཡོག་གཉིས་པར་གྲགས་པའི་གྲོང་ཁྱེར་དེ་ཡི་འགྲམ་གྱི་གྲོང་གསེབ་ཞིག་ལ་འགྲོ་ཡི་ཡོད་ལ། རྗོ་སུ་ལམ་ནས་དེ་ཡི་བར་དུ་རླངས་འཁོར་བཏང་ནས་སོང་ན། ཆུ་ཚོད་གཅིག་ཙམ་འགོར་གྱི་ཡོད། སྤྱིར་ན་སྐྱེ་སྐར་ནི་དུས་ཚོད་བཅུ་གཅིག་སྟེང་དུ་འཛོམས་དུས་བཟོས་ཡོད་ཀྱང་། ང་ཚོ་ཆུ་ཚོད་དགུ་བ་མ་ཟིན་ཙམ་ནས་ཕྱི་ལ་ཐོན་ཡོད་པ་རེད། ལམ་བར་དུ་ངས་མོ་རང་ལ་གནས་ཚུལ་གང་བྱུང་མིན་སྐོར་ནས་དྲི་བ་དྲིས། མོ་རང་གིས་མིག་མཐའ་མཆི་མ་འཁོར་ཞོར་དུ། ང་རང་གི་ཨ་ཅེ་ནི་དངོས་ནས་འདྲེ་མོ་རེད། མོ་རང་གིས་ང་ལ་ཕྲག་དོག་བྱེད་ཀྱི་ཡོད་པ་རེད། ང་དང་ཕ་མ་བར་གྱི་འབྲེལ་བ་དེ་འདྲ་ཞིག་མོ་རང་ལ་མ་ཐོབ་པ་དེར་ངན་སེམས་བཅིངས་ཀྱིན་ཡོད་པ་རེད་ཅེས་བསྡིག་དམོད་དང་བཅས་སྐད་ཆའི་འགོ་བརྩམས་སོང་།