གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ཉེར་བཞི།

རླངས་འཁོར་ནི་སྔར་བཞིན་སྣུམ་ནག་གི་གཞུང་ལམ་སྟེང་དུ་ཤར་བསྐྱོད་ཀྱིས་རྗོ་སུ་ལམ་གྱི་ཕྱོགས་སུ་འགྲོ་བཞིན་ཡོད་ལ། མཛའ་མོས་ངས་གང་ཞིག་བཤད་བཞིན་པ་དེ་དག་ལ་ཉན་ནས་བསྡད་ཡོད། ངས་མུ་མཐུད་དུ། རྒྱལ་ཁབ་འདིའི་ནང་དུ་གཞན་མི་གནས་སྤོ་བྱེད་པ་ལ་དགའ་བསུ་མི་བྱེད་པའི་ཐད་དུ་ཁྱེད་རང་གིས་མོས་མཐུན་མི་བྱེད་དོན་གང་ཡིན་ཞེས་དྲིས་དུས། མོ་རང་གིས་དཔེར་ན་རྒྱལ་ཁབ་གཞན་ན་ཡོད་པའི་ཁ་ཆེ་མི་ཉུང་བ་ཞིག་ཕྱིར་ས་ཁུལ་འདིར་ཡོང་བར་རེ་བ་བྱེད་ཀྱི་ཡོད་པ་རེད། དེ་དག་ཡོང་བར་དགའ་བསུ་བྱས་པ་ཡིན་ན། ང་ཚོ་ལ་དཀའ་ངལ་མང་དུ་འགྲོ་བ་ཡིན།

ངས་དུས་རྒྱུན་དུ་མོ་རང་ནི་འགྲོ་བ་མི་སྤྱི་ལ་ལྟ་ཚུལ་གཅིག་པ་ཡོད་པར་ཡིད་ཆེས་བྱེད་ཀྱི་ཡོད་ན་ཡང་། མི་རིགས་རང་ལུགས་ཀྱི་ལྟ་བའི་འཇུ་བཟུང་ཁྲོད། མོ་རང་ནི་རང་གི་རིགས་ལ་ཤ་ཞེན་ཆེ་ཞིང་། རང་གི་རིགས་རུས་ཀྱི་བདེ་དོན་ཆེད་དུ། མི་གཞན་དག་གི་བདེ་སྡུག་ལ་ཁ་ཡ་བྱེད་པར་དེ་འདྲའི་གལ་ཆེན་པོ་མི་བྱེད་པ་འདིས། ངས་རང་གི་མཛའ་མོའི་མི་རིགས་རང་ལུགས་ཀྱི་ལྟ་བ་ནི་དངོས་ནས་མཁྲེགས་པོ་དང་། རང་གི་མི་རིགས་ཀྱི་ཆེད་དུ། མི་རིགས་གཞན་དག་གི་བདེ་སྡུག་ལ་དེ་འདྲའི་དོ་སྣང་བྱེད་པར་སྤྲོ་སྣང་མེད་པ་གཞི་ནས་ཤེས་སུ་བཅུགས་སོང་།

སྤྱིར་ན་ངའི་མཛའ་མོ་ནི་སེམས་རྒྱུད་བཟང་བ་དང་། མི་ལ་འགྲོགས་འདྲིས་བདེ་བ་དང་སེམས་ཐག་ཉེ་བའི་གྲངས་དུ་འགྲོ་ན་ཡང་། སེམས་ཧ་ཅང་སྙི་མོ་ཞིག་ཡོད་པ་དེ་ཡིས་མོ་རང་གི་མིག་ཆུ་ནི་དུས་རྟག་དུ་རང་ལག་དུ་ཡོད་པ་ཞིག་ཡིན། དེ་ཡིས་མོ་རང་ལ་རྟག་དུ་འཚོ་བ་ནི་སྐྱུར་མོ་ཞིག་དང་། ཉེ་འབྲེལ་ནི་རང་གི་དཀའ་ངལ་དུ་གྱུར་བཞིན་ཡོད། མཚམས་རེར་རང་གི་ཕ་མ་ལ་ཡང་སེམས་ཐག་ཅུང་རིང་དུ་འགྲོ་བར་སེམས་ཚོར་ཡང་བྱུང་གི་ཡོད། མོ་རང་གིས་ང་ལ་ཁྱེད་ཀྱིས་སྐད་ཆ་བཤད་ན་ཚིག་ཧ་ཅང་རྩུབ་མོ་དང་སྐད་ཤུགས་ཆེན་པོའི་སྒོ་ནས་བཤད་ཀྱི་འདུག་ཟེར། ངས་དེ་ནི་ཁྱེད་རང་གིས་ཉན་ཕྱོགས་ཤིག་རེད། ང་ནི་རྒྱུན་དུ་སྐད་ཆ་བཤད་སྟངས་འདི་འདྲ་ཞིག་ཡིན་པ་ཉིད་ནས་ཤེས་ན་རེད། སྐབས་རེར་ཁྱེད་རང་གིས་ངས་སྐད་ཆ་བཤད་ཀྱི་མི་འདུག་ཟེར། བཤད་ན་ཡང་ཚིག་རྩུབ་ཀྱི་རང་བཞིན་དུ་གྱུར་འདུག་ཟེར། དེས་ན་ངས་ཁྱེད་ལ་ཁ་བརྡ་ཇི་ལྟར་བྱེད་དགོས་པ་རེད་ཅེས་ག་ལེར་ངེད་གཉིས་ཀྱིས་རྒྱལ་ཁབ་འདིའི་མི་རིགས་གཞན་དག་ལ་འཛིན་པའི་ལྟ་སྟངས་སྐོར་གླེང་མཚམས་བཞག་པ་ཡིན།

བར་སྐབས་ཤིག་ལ་མོ་རང་གིས་ང་ལ་ཁྱེད་རང་གི་གྲོགས་པོ་བུ་ཆུང་ལ་དགའ་རོགས་ཡོད་པ་རེད་དམ་ཟེར། ངས་དེ་ཡི་སྐོར་མོ་རང་ལ་གསང་བ་མི་བྱེད་རང་བྱེད་ཡིན། རྒྱུ་མཚན་ནི་མོ་རང་གི་གྲོགས་མོ་དང་ང་རང་གི་གྲོགས་པོ་བུ་ཆུང་གི་བཟའ་ཐོར་ཟིན་པའི་བུད་མེད་ཤེས་རབ་ལྷ་མོ་ཁོ་གཉིས་སེམས་ཐག་ཉེ་བའི་གྲོགས་དུ་གྱུར་ཡོད་སྟབས། ངས་སྐད་ཆ་དྲང་མོ་བཤད་མི་ཉན་པ་ངས་ཤེས་ཀྱི་ཡོད། དེ་ཡི་སྟབས་ཀྱིས་ངས་མོ་རང་ལ་ངས་ཤེས་ཀྱི་མེད། ཡོད་རྒྱུ་མ་རེད་བསམ་གྱི་འདུག ཡོད་པའི་དབང་དུ་བཏང་ན་ཡང་། ཤེས་རབ་ལྷ་མོ་ལ་འབྲེལ་བ་མི་འདུག་ཞེས་བཤད་དུས། མོས་སྐད་ཆའི་ཚིག་ལ་ངར་ཤུགས་དང་བཅས། ཁྱེད་རང་གིས་དེ་ལྟར་བསམ་གྱི་འདུག་གམ་ཟེར། ངས་ཡིན་དང་ཡིན། ཁོ་གཉིས་ཁ་ཁ་བྱས་ཚར་བ་རེད། ཟླ་རེ་བུ་མོའི་ནུ་རིན་གྱི་སྒོར་མོ་དེ་དག་དུས་ཚོད་ལྟར་སྤྲོད་ཀྱི་ཡོད་པ་རེད། ད་མོ་རང་ལ་ག་རེ་དགོས་པ་རེད།

མོ་རང་གིས་ང་ལ་ཁྱེད་རང་གིས་དེ་ལྟར་བསམ་གྱི་འདུག་གམ་ཟེར། ངས་དེས་ན་ཁྱེད་རང་གིས་བལྟས་ན་ག་རེ་བསམ་གྱི་འདུག ང་རང་ཤེས་རབ་ལྷ་མོ་ཡིན་ན། ཁ་ཁ་བྱས་ཟིན་པ་རེད། དོན་མེད་དུ་རོགས་པ་དགོས་མིན་གཉིས་ཀ་བུ་ཆུང་ལ་རོགས་སྐུལ་བྱེད་མི་སྲིད། དངོས་ནས་རོགས་པ་འདྲ་དགོས་གལ་བྱུང་ན། མོ་རང་གིས་འབོད་སྐུལ་བྱེད་མི་དགོས་པར་བུ་ཆུང་ཁོ་རང་ཏན་ཏན་སླེབས་ངེས་རེད་སྙམ་གྱི་ཡོད། མོ་རང་གིས་དགོས་མི་དགོས་གཉིས་ལ་རོགས་སྐུལ་བྱས། ཐ་མ་དེར་རོགས་བྱས་པ་དེར་བཀའ་དྲིན་ཆེ་མེད་པར། གང་བྱས་པ་དེར་ངན་བྱས་རབས་དང་དྲང་མོ་མ་བྱས་རབས་བཤད་པ་དེ་ནི་དངོས་ནས་ཡག་པོ་མ་རེད་སྙམ་གྱི་འདུག

ངའི་མཛའ་མོ་ཡིས་ག་ལེར་སྐད་ཆ་ཉུང་དུ་ཕྱིན་ནས་ངས་གང་བཤད་པ་དག་ལ་ཉན་ནས་མདུན་ཕྱོགས་ཀྱི་གཞུང་ལམ་དུ་དམིགས་པ་གཏད་ནས་རླངས་འཁོར་གཟབ་ནན་གྱིས་གཏོང་གི་ཡོད། ང་དང་བུ་མོ་ཐར་མ་མཚོ་གཉིས་ལྟག་རྒྱབ་ཀྱི་རྐུབ་སྟེགས་སྟེང་དུ་ཡོད་ལ། བུ་མོ་ཡང་ག་ལེར་གཉིད་ཁུགས་པའི་འགོ་བརྩམས། ནང་དུ་སླེབས་པ་དང་ང་རང་གིས་ཅ་དངོས་ཚང་མ་གང་དུ་གཏོགས་པ་དེར་བཞག་ནས་ཁ་ལག་ཞིག་བཟོས་རྗེས་དཀྲུས་ཁང་དུ་འཛུལ།

ཕྱིར་ཉིན་ནི་སྔ་བོ་ནས་ལས་ཀ་རྒྱུན་ལྡན་དུ་སོང་། ལས་ཀ་ནི་སྔར་བཞིན་ཡིན་ཞིང་། ང་རང་གིས་ཉིན་གུང་གི་ཁ་ལག་ཟ་བའི་དུས་ཀྱི་སྐར་མ་ལྔ་དྲུག་ཞིག་དང་། འཚིག་ཇ་འཐུང་བའི་སྐར་མ་ཁ་ཤས། དེ་མ་གཏོགས་ལས་ཀ་འགོ་བཙུགས་ནས་ཚར་རེག་བར་དུ་ངལ་གསོ་མེད་པ་ཉིན་ལྟར་གཅིག་པ་ཡིན། ལས་ཀ་བྱེད་སའི་སྤྱིན་བདག་གིས་ང་ལ་ལས་ཀ་མཚམས་བཞག་རྗེས་སུ་ངས་ཁྱེད་རང་ལ་སྐད་ཆ་ཞིག་བཤད་དགོས་ཀྱི་ཡོད་ཅེས་བཤད་པ་ལྟར། ང་རང་གིས་ལས་མཚམས་བཞག་མ་ཐག སྤྱིན་བདག་གིས་འགྲམ་དུ་སོང་། སྤྱིན་བདག་གིས་ད་ནི་དབྱར་ཁ་སླེབས་སྟབས། ཟ་མ་ཟ་མཁན་ཡང་ཉུང་དུ་འགྲོ་བཞིན་ཡོད་པ་ཡིན། དེ་ཡིན་དུས་ཨ་ཧོས་སང་ཉིན་ནས་ཟ་ཁང་གཞན་པ་དེར་ལས་ཀ་བྱེད་དུ་གཏོང་གི་ཡིན། ངས་ཁྱེད་རང་གཏོང་འདོད་ཡོད་ཀྱང་། མ་བྱན་ཆེན་མོས་ཁྱེད་རང་འདི་ནས་དགོས་ཀྱི་ཡོད། ཁྱེད་རང་གིས་དེ་ཡིན་དུས་ཁོ་རང་གི་ཚབ་དུ་གཙང་མ་བཟོ་བ་དང་ག་རེ་རོགས་དགོས་མིན་དེ་དག་བྱེད་དགོས་ཀྱི་ཡོད། ཟླ་ངོ་ལྔའི་རིང་དུ་ཟེར། ངའི་སེམས་ནང་དུ་དེ་ནི་ང་རང་གིས་རྒྱུན་དུ་བྱེད་ཀྱིན་པ་ཞིག་རེད། ཁོ་ཡོད་མེད་ལ་ཁྱད་པར་མེད་པ་ཡིན་སྙམ་ཞོར། འགྲིག་གི་རེད་ཅེས་ལན་བཏབས་པ་ཡིན། ངས་གོ་སྐབས་དེ་བཟུང་ནས་ང་རང་གི་གླ་ཆ་སྤར་དགོས་ཀྱི་ཡོད་རབས་བཤད་ན་འགྲིག་ཡང་། ངས་རང་ཉིད་བོད་མི་ཞིག་ཡིན་པའི་འགན་ཞིག་གམ། བོད་མི་ཟེར་བ་ནི་བཟང་བོ་ཞིག་དང་ལས་ལ་བརྩོན་པ་ཞིག་ཡིན་པར་བདེན་དབུང་བྱེད་ཆེད་དུ་དེ་ལྟར་ལན་བཏབས་པ་ཡིན།

དངོས་ནས་བཤད་ན་དབྱར་ཁ་སླེབས་པ་དང་ཟ་མ་ཟ་མཁན་དམིགས་བསལ་གྱིས་ཉུང་དུ་གང་ཡང་སོང་མེད། ང་རང་གིས་ལས་ཀ་དག་ནི་རྒྱུན་ལྡན་ལྟར་བྱེད་ཀྱི་ཡོད། མ་འགྲིག་ས་གཅིག་ཡོད་པ་དེ་ནི་ངས་ལས་ཀ་ལ་གཡོ་སྒྱུ་མ་བྱས་པར་མི་གཉིས་གསུམ་ཞིག་གི་ལས་ཀ་དེ་ང་རང་གིས་བྱས་པ་དེ་ཡིས་ལན་འདུག དངོས་ནས་བཤད་ན་ཁོང་ཚོ་ལ་ཟ་ཁང་གཞན་པ་དེར་ལས་ཀ་བྱེད་མཁན་གྱི་མི་འཁོ་ཡོད་པ་དེ་ཡིན། མི་གཞན་ཞིག་ལ་གླ་ཆ་སྤྲོད་འདོད་མེད་པའི་ཧམ་སེམས་ཁོ་ན་རེད། དེ་དག་སེམས་ཁོང་ནས་གསལ་བོ་ཤེས་ན་ཡང་། ང་རང་གིས་ལས་ཀ་འདི་ནས་དུས་ཡུན་ག་ཚོད་ཅིག་བསྐྱེལ་མིན་དེ་ནི་ད་ལྟ་གསལ་བོ་མི་ཤེས་པའི་ཡིན། དེ་ཡི་རིང་དུ་གཏམ་ངན་མེད་པར་ཤུ་རེ་བྱེད་ཐུབ་པ་ཡིན་ན། བོད་པ་ཟེར་བའི་མིང་ཞིག་ལ་ཡང་ཕན་ངེས་རེད་སྙམ་ནས། ལས་རོགས་སུ་ལ་ཡང་ཁ་ལན་ལོག་མྱོང་མེད། དངོས་ནས་མཚམས་རེར་དཀའ་ངལ་འདུག མི་གཅིག་གི་སྒང་ན་མི་རིགས་ཤིག་གི་བསམ་བློ་འདི་འཁུར་ནས་ལས་ཀ་བྱེད་དུས་སུ། རྗེས་སུ་ཕན་ཐོག་རེ་ཡོང་བར་རེ་བ་ཡོད་པ་དེར་བསམ་ནས་དཀའ་ངལ་དག་ལ་གདོང་ལེན་གང་ཐུབ་བྱེད་ཀྱིན་ལས་ཀ་ནས་འབད་བརྩོན་ལྷོད་མེད་བྱས་པ་ཡིན།