གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ཉེར་ལྔ།

མི་ཟེར་བ་ནི་འཚོ་བའི་ཆེད་དུ་འདུར་བཞིན་ཡོད་དམ། ཡང་ན། བདེ་སྐྱིད་ཀྱི་ཆེད་དུ་འདུར་བཞིན་ཡོད། དེ་མིན་གཞན་ཞིག་འཚོལ་གྱི་ཡོད་མེད་གང་ཡིན་བཤད་དཀའ་མོད། ཉིན་ལྟར་ལས་ཀ་འགྲོ་དགོས་པ་ནི། གང་དུ་བསྡོད་མིན་ལ་མ་བལྟས་པར། མི་ཞིག་གི་འཚོ་གནས་ཀྱི་ཁྲོད་དུ་བསྡོད་དགོས་དུས། ལས་ཀ་ཡག་སྡུག་ཟེར་བ་མེད་པར། རང་རང་གིས་གང་ཤེས་པ་དང་གང་འཇོན་པ་དེ་བྱེད་དགོས་པ་ཡིན་པ་དེ་ནི་མིའི་འཚོ་སྟངས་ཤིག་ཆགས་ཡོད་པ་ཡིན། དེ་ཡིན་དུས་རང་ཉིད་དུས་རྒྱུན་ལྟར་ལས་ཀ་ན་བྲེལ་བྲེལ་ཚབ་ཚབ་ཀྱིས་འདུར་བཞིན་པའི་སྐབས་སུ། ཁ་པར་གྱི་སྒྲ་དབྱངས་སྙན་མོ་ཞིག་རང་གི་ཨམ་ཕྲག་ནས་གྲགས་ནས་འོང་།

ངས་ཨ་རོགས། སུ་ཡིན་ཞེས་འདྲི་མི་དགོས་པར་ཁ་པར་ཡར་བཀྱགས་པ་དང་ནང་དུ་མི་མང་ཡོད་དུས། གཏོང་མཁན་ནི་ཆོས་སྒྲོན་རེད་འདུག ཆོས་སྒྲོན་ནི་ང་རང་གི་ངོ་ཤེས་ནས་ལོ་ངོ་གཉིས་འགྲོ་གྲབས་ཡོད། དེ་ནི་གྲོགས་པོ་བུ་ཆུང་རྒྱུད་ནས་ངོ་ཤེས་པ་ཡིན། ཁོ་མོ་ནི་ད་ལྟའི་འཆར་གྲོགས་པོ་བུ་ཆུང་གི་དགའ་རོགས་སུ་གྱུར་ཡོད། ཁོ་མོས་བཤད་ན། གཟའ་འཁོར་རྗེས་མའི་གཟའ་པ་སངས་ཉིན་ང་ཚོ་ཚང་མ་འཛོམས་ཀྱི་ཡོད། ཁྱེད་རང་ཡང་བུ་ཆུང་ནང་དུ་ཡོང་རོགས་གནོངས་ཟེར་ནས་བཤད་པ་དེར་ངས་ཀྱང་ཁས་ལེན་བྱས་པ་ཡིན།

ཆོས་སྒྲོན་ནི་བོད་ནས་ཆུང་དུས་སུ་རྒྱ་གར་དུ་ཡོང་བ་དང་དེ་ཡི་རྗེས་སུ་བལ་ཡུལ་ནས་བསྡད། རྗེས་སུ་རྒྱལ་ཁབ་འདིར་ལས་ཀ་བྱེད་དུ་ཡོང་བའི་བོད་ཀྱི་བུད་མེད་ཅིག་ཡིན། མོ་རང་གི་ལས་ཀ་ནི་བྱིས་པ་ནད་པ་ཞིག་གཉོར་སྐྱོང་བྱེད་རྒྱུ་དེ་ཡིན་ལ། མི་ཚང་དེས་མོ་རང་ནི་ལས་ལ་བརྩོན་པའི་བུད་མེད་ཅིག་དང་ཁ་ལན་མི་ལོག་པའི་བུད་མེད་ཅིག་ཡིན་པ་ཤེས་ནས། ག་ལེར་མོ་རང་མི་ཚང་དེ་ཡི་གཡོག་པོ་ལྟ་བུ་ཞིག་ཆགས་ནས་ལས་ཀ་བྱེད་ཀྱི་ཡོད་དུས། མཚམས་རེར་མོ་རང་གིས་རང་ཉིད་ཡུན་རིང་བསྡོད་མྱོང་སའི་རྒྱ་གར་སྐྱིད་སྣང་ཡོད་པ་ཞིག་དྲན་བཞིན་ཡོད་པ་རེད། མོ་རང་ནི་མི་ཚང་མར་འདྲིས་སླ་བའི་བུད་མེད་ཅིག་དང་། གྲོགས་པོ་བྱེད་པར་ལས་སླ་བོ་ཡོད་པའི་བུད་མེད་ཅིག་ཡིན།

ང་ཚོ་མཉམ་དུ་འཛོམས་ཞེས་བཤད་དུས། ང་ཚོ་ཟེར་ན་བུད་མེད་གཞན་གཉིས། མོ་རང་གི་གྲོགས་མོ་ཡིན། གཉིས་ཀ་བོད་པ་ཡིན་ལ། རྒྱ་གར་ནས་སྐྱེ་བ་དང་མོ་རང་དང་འདྲ་བར་ལས་ཀ་བྱེད་དུ་ཡོང་བའི་གྲངས་ཡིན། ཁོ་མོ་གཉིས་ཀྱི་གཅིག་གི་མིང་ལ་དབྱངས་སྐྱིད་དང་ལྷག་སྒྲོན་ཟེར་གྱི་ཡོད། རྒྱལ་ཁབ་འདིར་བོད་པ་ཉུང་ཉུང་ཡིན་པ་དང་། མཚམས་རེར་ཟླ་ངོ་གཅིག་གཉིས་རེ་ཡི་རང་དུ་བོད་པ་རེ་འཛོམས་རྒྱུ་བྱུང་དུས་ཁོ་མོ་ཚོ་ཡང་སྐྱིད་པོ་བྱུང་གི་ཡོད་པ་མ་ཟད། ང་ཚོ་ཡང་སྣང་བ་སྐྱིད་པོ་ཞིག་ཡོང་གི་ཡོད། དུས་རྒྱུན་གྲོགས་པོ་བུ་ཆུང་། གྲོགས་པོ་བློ་བཀྲ ང་། བུད་མེད་དེ་གསུམ་བཅས་ཡིན། ང་ཚོ་རྒྱལ་ཁབ་འདི་ནས་མང་ཆེ་ཤོས་འཛོམས་ས་ནི། གྲོགས་པོ་བློ་བཀྲ་ཡི་ནང་དུ་ཡིན། མི་རིང་བར་གྲོགས་པོ་བློ་བཀྲ་བཟའ་མི་བཀང་བོ། ཀྲེ་ལ་བེས་ནས་ས་གནས་གཞན་དུ་གནས་སྤོར་དགོས་ཀྱི་ཡོད་པ་ཡིན།

གྲོགས་པོ་བློ་བཀྲའི་ཆེད་དུ་ཟེར་ན་རེད། ང་ཚོ་མ་མཛོམས་པར་ཡུན་རིང་སོང་ཡོད། སྔོན་ཆད་ཅིག་ལ་ང་རང་ཁོ་མོ་ཚོ་དང་ལྷན་དུ་སོང་བའི་སྐོར་གྲོགས་པོ་ཞིག་གི་རྒན་མོ་རྒྱུད་ནས་ཤེས་སོང་བ་དེ་ཡིས་ང་རང་གི་མཛའ་མོ་དང་མཛའ་མོའི་མ་རྒན་བཅས་ངའི་སྟེང་ལ་ཁོང་ཁྲོ་ཟ་བ་དེ་ནས་བཟུང་། ངས་ཀྱང་རང་སེམས་ན་ཉེས་པ་མེད་ན་གཤིན་རྗེ་ལ་འཇིགས་པ་མེད་ཅེས་བཤད་སྲོལ་ཡོད་པ་དེར་གཞིར་བཟུང་ན་ཡང་། དུས་ཚོད་ཆེས་མི་ཉུང་བ་ཞིག་ལ་མཛའ་མོ་ལ་བསྟུན་ནས་ཕྱི་ལ་ཁོང་ཚོས་མཉམ་དུ་སོང་མེད། ཨོ་རེད། ཁོང་ཚོས་མཉམ་དུ་འགྲོ་བཞིན་ཡོད་པ་དེ་ནི། ང་ཚོ་ཚང་མ་བོད་པ་ཡིན་པ་དང་གཞན་ཡུལ་ན་ཡོད་པ་གཅིག་པ་ཡིན་པས་འགྲོ་བཞིན་ཡོད་པ་ལས། བུ་དང་བུ་མོའི་བར་གྱི་འབྲེལ་བ་འདྲ་ཡོད་པས་མིན། ང་རང་གིས་སེམས་ནང་དུ་འདྲ་མིན་རེ་དྲན་མྱོང་ན་ཡང་། ཁ་ནས་སྐད་ཆ་གང་ཡང་བཏོན་མྱོང་མེད་ལ། རང་ཉིད་ལ་མཛའ་མོ་དང་བུ་མོ་ཞིག་གི་ཕ་རྒན་ཡིན་པའི་འགན་དང་། གྲོགས་པོ་ལ་གྲོགས་པོའི་ས་མཚམས་ནས་བསྡད་དེ་འཛོམས་ཀྱི་ཡོད།

ཆོས་སྒྲོན་དང་གྲོགས་པོ་བུ་ཆུང་གཉིས་ཀྱང་། དང་བོ་ངོ་ཤེས་སྟངས་དེ་འདྲ་ཡིན་ཟེར་ན་འགྲིག་གི་ཡོད། ཕྱིས་སུ་གྲོགས་པོ་བུ་ཆུང་ཁ་ཁར་སོང་བ་རེད་ལ། ཁ་ཁར་མ་སོང་བའི་སྔོན་དུ་ཁོ་གཉིས་ལ་འབྲེལ་བ་ཡང་བྱུང་བ་རེད། དེ་ཡི་སྐོར་ནི་ཤེས་མཁན་ཐོག་མ་ང་ཡིན་ཟེར་ན་ཆོག གཅིག་བྱས་ན། ང་རང་གིས་དེ་རིང་རང་གི་མི་ཚེ་དང་འགྲོགས་ནས་འོང་བའི་སྐོར་འབྲི་བཞིན་ཡོད་དུས། ཁོ་གཉིས་ཀྱི་གནས་ཚུལ་འདིར་ཟུར་དུ་བྲིས་པ་དེར་ང་ལ་ཀུ་ཡངས་ཡོད་པར་སྙམ་ནས་ཁོ་གཉིས་ལ་སྐད་ཆ་ཡང་མ་དྲིས་པར་འབྲི་བཞིན་ཡོད། གྲོགས་པོ་བུ་ཆུང་རྒྱལ་ཁབ་འདིར་དེང་ཐོག་སླེབས་དུས། སོ་ནམ་སློབ་མའི་མིང་ཐོག་ནས་སླེབས་ཡོད་པ་དང་། སོ་ནམ་སློབ་མའི་དུས་སྐབས་སུ། ཁོ་རང་གི་བུ་མོའི་ཨ་མ་ཤེས་རབ་ལྷ་མོ་ནི། དང་བླང་རོགས་རམ་པ་ཡིན་དུས། ཁོ་དང་འབྲེལ་བ་བྱུང་ནས་ཕྱིས་སུ་ཁོ་གཉིས་མཉམ་དུ་བསྡད་པ་ཡིན།

ལོ་ངོ་གཉིས་གསུམ་རིང་དུ་མཉམ་དུ་བསྡད་པའི་མཐར་བུ་མོ་ཆུང་ཆུང་སྙིང་རྗེ་མོ་ཞིག་ཀྱང་ཡོད། མིང་ལ་པདྨ་ཟེར་བ་ཡིན། མ་འགྲིག་ས་ཕྱོགས་གཉིས་ཀ་ཡོད་ངེས་ཡིན། ཕན་ཚུན་ལ་བསམ་ཤེས་དང་བཟོད་བསྲན་གྱི་མཐར་མ་འཁྱོངས་པར་བུ་མོ་པདྨ་ཨ་མ་ཡི་མཉམ་དུ་ཡོད། བུ་ཆུང་གིས་ཟླ་རེ་ལ་ནུ་རིན་རེ་སྤྲོད་ཀྱི་ཡོད་པ་དང་གཟའ་འཁོར་གཅིག་གི་ནང་དུ་ཐེངས་ཁ་ཤས་ཤིག་ལ་ཐུག་འཕྲད་བྱེད་དུ་འགྲོ་བཞིན་ཡོད། གཟའ་པ་སངས་མང་ཤོས་ཤིག་ལ་ཁོ་རང་གི་སར་བླངས་དེ་ཉིན་བཀང་བོར་བལྟ་བཞིན་ཡོད། དངོས་ནས་བཤད་ན། ཁ་ཁ་བྱེད་དགོས་ཟེར་མཁན་ནི་བུ་ཆུང་ཁོ་རང་ཡིན་པ་ལས་ཤེས་རབ་ལྷ་མོ་མིན། ཤེས་རབ་ལྷ་མོ་ལ་ཁ་མང་བ་དང་བུ་ཆུང་ཁོ་རང་འཁྱམ་ཉུལ་ལ་ཅུང་དགའ་བ་དང་། གྲོགས་པོ་ཁ་ཤས་དང་འཛོམས་དུས་སུ་ཨ་རག་འཐུང་བར་དགའ་བ་ཡིན། དུས་ཚོད་ལྟར་ཕྱིར་ནང་དུ་མི་སླེབས་པ་སོགས་ཁོ་རང་གི་ཕྱོགས་ན་ནོར་འཁྲུལ་ཡོད་ཏན་ཏན་ཡིན་དུས། ཤེས་རབ་ལྷ་མོའི་ཁ་དེ་ནི་ནམ་རྒྱུན་མི་ཡོད་མེད་གཉིས་ཀ་ལ་བསྡོད་མི་ཚུགས་པ་ཡིན་དུས། ཁོ་གཉིས་མཐར་ཁ་ཁར་སོང་བ་རེད།

ང་རང་གི་བསམ་ཕྱོགས་ནོར་མེད་པ་མིན་ན། བུ་ཆུང་ཁོ་རང་གིས་དངོས་ནས་རང་ཉིད་བོད་ཀྱི་བུད་མེད་ཅིག་དང་མཉམ་པོར་བཟའ་ཚང་མ་བྱས་པ་དེ་ནོར་འཁྲུལ་དུ་བསམ་བཞིན་ཡོད་ལ། ང་ཚོ་ག་དུས་འཛོམ་ན་ཡང་ཆོས་སྒྲོན་གྱིས་ཐབ་ཚང་དུ་ལས་ཀ་བྱེད་བཞིན་པ་དེར་སྟོན་བཞིན། བལྟས་དང་བོད་པའི་བུད་མེད་ཅིག་ཡིན་ན་ད་སྐྱིད་པོ་འདུག་ག་ཟེར་ཞོར། ང་ཚོ་ལ་ཡང་ཡང་བཤད་པ་དེ་སོགས་ལ་བལྟས་ན། ཁོ་རང་ཆོས་སྒྲོན་དང་ཁ་ཐུག་ནས་ཤེས་རབ་ལྷ་མོ་ལ་བརྩེ་བ་མེད་པར་གྱུར་བ་དང་། ཁོ་མོ་དང་མཉམ་དུ་བསྡོད་འདོད་མེད་པའི་བསམ་བློ་ཤུགས་ཆེ་རུ་འགྲོ་བ་ཡིན་སྙམ་གྱི་ཡོད། གང་ལྟར། དེང་སང་བུ་ཆུང་དང་ཆོས་སྒྲོན་གཉིས་ནི་དགའ་རོགས་ཀྱི་མིང་ཐོག་དུ་ཡོད། ཕན་ཚུན་གཉིས་ཀ་ལ་ལས་ཀའི་བྲེལ་ན་ཡང་། གཟའ་མཇུག་ཕལ་ཆེ་བ་ལ་བུ་ཆུང་གི་ནང་དུ་འཛོམས་ཀྱི་ཡོད་པ་རེད།

དེ་ཡིན་དུས་ཁ་པར་གཏོང་མཁན་དེ་ནི་ཆོས་སྒྲོན་ཡིན་ལ། ངས་ཆོས་སྒྲོན་ལ། ཡ་འགྲིག་གི་རེད། ང་ཡོང་ཆོག་ཞེས་ལན་བཏབས་པ་ཡིན།

མུ་འགོད།