འཛམ་གླིང་འདིའི་ཐོག་ལྟ་གྲུབ་མི་འདྲ་བ་མང་པོ་ཡོད་པའི་ནང་། ལྟ་བ་མི་འདྲ་བ་དེར་ཁམས་དང་མོས་པ་སྣ་ཚོགས་དགོས་ཀྱི་ཡོད་དུས། ལྟ་བ་མི་འདྲ་བའི་གྲུབ་དོན་མིའི་སེམས་པ་བཟང་པོ་དགོས་པའི་བསླབ་བྱ་གཅིག་གྱུར་ཡིན་པ་དེ་ཆོས་ལུགས་ཚང་མས་དད་པ་བྱ་དགོས་པའི་རྒྱུ་མཚན་ཆགས་ཡོད། ཅེས་༧གོང་ས་མཆོག་གིས་གསུངས།
ཝེ་ཊི་ནམ་གྱི་ནང་པས་གསོལ་འདེབས་ཞུས་དོན་ལྟར། དེ་རིང་ཕྱི་ཚེས་ ༢༨ ཉིན་གྱི་ཞོགས་པའི་ཆུ་ཚོད་ ༩།༣༠ ཐོག་༧གོང་ས་མཆོག་གིས་བཞུགས་སྒར་ངྷ་ས་ཐེག་ཆེན་ཆོས་གླིང་གཙུག་ལག་ཁང་དུ། ཝེ་ཊི་ནམ་ནས་ཕེབས་པའི་ནང་པའི་ཆོས་ཞུ་བ་ ༤༨༠ གཙོས་པའི་ཕྱི་རྒྱལ་མི་རིགས་དང་ངྷ་སར་གནས་སྡོད་བོད་རིགས་བཞི་སྟོང་ ༤༠༠༠ བརྒལ་བར། རྗེ་ཙོང་ཁ་པ་ཆེན་པོས་མཛད་པའི་༼ རྟེན་འབྲེལ་བསྟོད་པ ༽བཀའ་ཁྲིད་གནང་མགོ་བཙུགས་ཡོད་ལ། སང་ཉིན་ཉིན་རྒྱབ་མང་ཚོགས་ལ་སྤྱན་རས་གཟིགས་ཀྱི་བཀའ་དབང་བཅས་སྩོལ་འཆར་ཡོད་འདུག
གསུང་ཆོས་མགོ་འཛུགས་མ་གནང་གོང་༧གོང་ས་མཆོག་གིས་ཆོས་ཞུ་བ་ཚོར་བཀའ་སློབ་གནང་དོན། དེ་རིང་གི་ཆོས་དང་འབྲེལ་བའི་གདུལ་བྱ་གཙོ་བོ་ཝེ་ཊི་ནམ་རང་ནས་ཕེབས་པ་ཆགས་ཡོད། ངོས་རང་ཨ་རི་དང་ཧྤ་རན་སི། ཨོ་སི་ཊོ་ལི་ཡ་བཅས་སུ་ཝེ་ཊི་ནམ་གྱི་ནང་པ་མང་པོར་ཐུག་གྱི་ཡོད། ཐེངས་འདིར་ཝེ་ཊི་ནམ་ནས་ཕེབས་པ་འདི་གྲངས་འབོར་མང་ཤོས་ཆགས་ཡོད། ཝེ་ཊི་ནམ་ནས་ཆོས་དོན་གཉེར་ལ་ཕེབས་མཁན་ཚོར་འཚམས་འདྲི་དང་དགའ་བསུ་ཡོད། ངོས་ནས་ནམ་རྒྱུན་ཆོས་འབྲེལ་བྱེད་སྐབས་སྔོན་ལ་སངས་རྒྱས་ཀྱི་ཆོས་ངོ་སྤྲོད་བྱ་རྒྱུ་གལ་ཆེ་ཤོས་སུ་བརྩི་ཡི་ཡོད། གང་ཡིན་ཟེར་ན། ང་ཚོར་སངས་རྒྱས་ཀྱི་ཆོས་ལ་གོ་རྟོགས་གང་ཡང་མེད་པར། སངས་རྒྱས་ཀྱི་ཆོས་པ་ཡིན་ལབ་ནས་སྐྱབས་འགྲོའི་ཚིག་ཙམ་བཏོན་པ་དེས། ནང་པའི་ཆོས་བྱེད་ཀྱི་ཡོད་དྲན་གྱི་ཡོད། དཀོན་མཆོག་གསུམ་པོར་གོ་རྟོགས་གང་ཡང་མེད་པར་དད་པ་གཙོ་བོར་བྱས་ཏེ་འགྲོ་བ་འདི་སྔར་གྱི་འགྲོ་སྟངས་ཤིག་ཆགས་ཡོད། ད་ལྟ་འགྲོ་སྟངས་དེས་ཚད་ལོངས་ཀྱི་ཡོད་པ་མ་རེད། རྒྱ་གར་མཁས་པའི་གཞུང་ནང་། དབང་རྟུལ་དད་པའི་རྗེས་འབྲང་། དབང་རྣོན་ཆོས་ཀྱི་རྗེས་འབྲང་ཟེར་བའི་གདུལ་བྱ་མི་འདྲ་བ་གཉིས་ཡོང་གི་ཡོད། དབང་རྣོན་ཆོས་ཀྱི་རྗེས་འབྲང་ཟེར་བ་དེ། སྐྱབས་སུ་འགྲོ་སའི་ཡུལ་གང་དག་ཡིན་པ་ཤེས་པའི་ཐོག་སྐྱབས་སུ་སོང་ན། ཕན་ཐོགས་ག་རེ་ཡོད་པ་རེད། རྒྱུ་མཚན་ག་རེ་ཡོད་པ་རེད། དེའི་ཐོག་བསམ་བློ་བཏང་སྟེ། སྐྱབས་སུ་སོང་ན་དབང་རྣོན་ཆོས་ཀྱི་རྗེས་འབྲང་མཁན་ཡིན་པ་རེད། དཀོན་མཆོག་གསུམ་པོ་ངོ་མ་ཤེས་པར། ཕ་མེས་ནས་དཀོན་མཆོག་གསུམ་ལ་སྐྱབས་སུ་འགྲོ་བཞིན་ཡོད་པས་རྩ་ཆེན་པོ་ཆགས་ཡོད་པ་རེད་ཟེར་ནས་འགྲོ་མཁན་དེ་དབང་རྟུལ་དད་པའི་རྗེས་འབྲང་རེད། ང་ཚོ་དུས་རབས་ཉེར་གཅིག་པའི་ནང་བསྡད་ཡོད་པ་རེད། སོ་སོས་ཆོས་དད་བྱ་རྒྱུ་དེའང་དུས་རབས་ཉེར་གཅིག་པ་དང་འཚམ་པ་ཞིག་དགོས་རྒྱུ་ཤིན་ཏུ་གལ་ཆེན་ཆགས་ཡོད། སྔོན་ཆད་སྦམ་པོ་བྱས་ཏེ་ཁུངས་མ་འཁྱོལ་ཡང་ཡིན་མདོག་མདོག་གིས་འགྲོ་བསྡད་པའི་དུས་ཚོད་དེ་ཡོལ་ཟིན་པ་རེད། ཅེས་གསུངས་སོང་།
ཡང་ཁོང་གིས་རྗེ་ཙོང་ཁ་པས་དབུ་མའི་ལྟ་བར་གཞི་བཅོལ་ཏེ་རྟེན་འབྲེལ་བསྟོད་པ་བརྩམས་དགོས་དོན་སྐོར་གསུངས་དོན། མགོན་པོ་ཀླུ་སྒྲུབ་ཀྱིས་སྟོང་ཉིད་སྐོར་རྩལ་དུ་བཏོན་ནས་གསུངས་ཡོད་པ་རེད། སྟོང་ཉིད་སྐོར་གསུངས་པའི་སྐབས་སྟོང་པ་ཉིད་ཀྱི་དོན་དེ་རྟེན་ཅིང་འབྲེལ་བར་འབྱུང་བ་རེད། སྟོང་པའི་དོན་དེ་རྟེན་འབྱུང་གི་དོན་ལ་དང་སྦྲེལ་ཏེ། རྟེན་འབྱུང་སྟོང་པ་དང་སྟོང་པ་རྟེན་འབྱུང་ཟེར་བའི་ཤེར་ཕྱིན་སྟོང་ཉིད་ཀྱི་དོན་བཤད་ཡོང་སྐབས། ཀླུ་སྒྲུབ་ཀྱིས་རྩལ་དུ་བཏོན་ནས་གསུང་ཡོང་གི་ཡོད། མགོན་པོ་ཀླུ་སྒྲུབ་ཀྱིས་དབུ་མ་རིགས་ཚོགས་དྲུག་དང་། དབུ་མ་རྩ་བ་ཤེས་རབ། སྟོང་ཉིད་བདུན་ཅུ་བ། རིན་ཆེན་ཕྲེང་བ་སོགས་གསུངས་ཡོད་པ་རེད། དེ་དག་ནང་སྟོང་དང་རྟེན་འབྱུང་གི་དོན་གཅིག་རྩལ་དུ་བཏོན་ནས་གསུངས་ཡོད་པ་དེ། བོད་གངས་ཅན་གྱི་མཁས་གྲུབ་གཉིས་ལྡན་གྱི་སྐྱེས་བུ་དམ་པ། ཆོས་རྗེ་བློ་བཟང་གྲགས་པས་མཛད་པའི་རྟེན་འབྲེལ་བསྟོད་པ་འདི་རེད། རྟེན་འབྲེལ་བསྟོད་པ་བརྩམས་པའི་དུས་ཚོད་དེ་ཡང་རྗེ་རིན་པོ་ཆེས་དཔྱད་འཇོག་ཟུང་འབྲེལ་གྱི་ཐོག དབུ་མའི་ལྟ་བ་ཉམས་ཞིབ་གནང་སྟེ། མཐའ་མར་སྟོང་པ་རྟེན་འབྱུང་གི་དོན་ལ་འཇོག་རྒྱུ་དང་། རྟེན་འབྱུང་སྟོང་པའི་དོན་ལ་འཇོག་རྒྱུའི་གོ་བ་དཔྱིས་ཕྱིན་པའི་ཐོག་ངེས་པ་རྙེད་མཚམས། སྟོན་པ་ཐུབ་པའི་དབང་པོར་རྒྱུ་མཚན་མཐོང་བའི་སྒོ་ནས། དམིགས་བསལ་དད་པ་ཞིག་འཁྲུངས་ཏེ་བསྟན་བཅོས་འདི་བརྩམས་པ་རེད། རྩ་བ་ཤེར་ཕྱིན་གྱི་དགོངས་པ་ཀླུ་སྒྲུབ་ཀྱིས་སྟོང་ཉིད་རིམ་པ་གཏན་ལ་ཕབ་སྟེ། དེའི་རྩ་དོན་སྟོང་པ་དང་རྟེན་འབྱུང་གི་སྙིང་པོ་གསུངས་ཡོད་པ་དེའི་ཐོག སངས་རྒྱས་ཀྱི་ཆོས་ཟེར་གང་འདྲ་ཞིག་ཡིན་པ་ངོ་སྤྲོད་བྱ་དགོས་པ་རེད། བཞི་བརྒྱ་པའི་ནང་ལ། བཅོམ་ལྡན་འདས་ཀྱི་བཀའ་ལ་ཐེ་ཚོམ་ཡོད་མཁན་གྱི་མི་ཞིག་ལ། དང་པོ་སྟོང་པ་ཉིད་བསྟན་པའི་ཐོག་ནས་རྒྱུ་མཚན་ངོ་འཕྲོད་པ་ཞིག་ཡོང་དགོས་པ་རེད། ཅེས་གསུངས་བྱུང་།
ལྟ་གྲུབ་འདྲ་མིན་གྱི་ཐོག་ནས་མིའི་སེམས་ལ་ཞི་བདེ་བསྐྲུན་ཐབས་སྐོར་ལ། ཆོས་ཀྱི་དགོས་པ་ཆོས་ལུགས་ཚང་མས་སེམས་ལ་མ་སྐྱིད་པ་ཡོང་བ་ཉུང་དུ་བཏང་སྟེ་སེམས་སྐྱིད་པོ་བཟོ་བ་དང་། རེ་བ་བརླགས་ཡོད་པ་དང་། སེམས་འཁྲུག་ཡོད་པ་དེ་ཚོ་སེལ་རྒྱུ་དེ་ཡིན་པ་རེད། འཛམ་གླིང་ཐོག་ཆོས་བརྒྱུད་མང་པོ་ཞིག་ཡོད་པ་རེད། ཆོས་ལུགས་དེ་གཉིས་སྡེ་ཚན་གཉིས་སུ་དབྱེ་ན། འཇིག་རྟེན་བཀོད་པ་འདོད་མཁན་གྱི་ཆོས་བརྒྱུད་སྡེ་ཚན་གཅིག་ཡོད། དེའི་ནང་ཡེ་ཤུ་དང་ཁ་ཆེ། ཇེའུ། ཧིན་དུ་སོགས་ཆོས་བརྒྱུད་མང་པོ་ཞིག་ཡོད། སྡེ་ཚན་གཞན་པ་དེའི་ནང་། འཇིག་རྟེན་བཀོད་པ་པོ་ཡོད་པ་མ་རེད། རང་རང་གི་རྒྱུ་དང་རྐྱེན་ལ་བརྟེན་ནས་བྱུང་བ་རེད་ཅེས་བཤད་ཀྱི་ཡོད་ལ། དེའི་ནང་སངས་རྒྱས་པ་དང་གཅེར་བུ་བ། གྲངས་ཅན་ལྷག་མེད་པ་བཅས་ཡོད། དེ་གསུམ་པོས་འཇིག་རྟེན་བཀོད་པ་པོ་འདོད་ཀྱི་མེད་ལ། རྒྱུ་དང་རྐྱེན་ཙམ་ལ་བརྟེན་ནས་བདེ་སྡུག་འབྱུང་གི་ཡོད་པ་རེད་ལབ་ཀྱི་ཡོད། སྡེ་ཚན་གཉིས་ཀས་དགོས་པ་དང་དམིགས་ཡུལ་སེམས་ལ་ཞི་བདེ་ཡོང་རྒྱུ་དང་། སེམས་ལ་དངངས་སྐྲག་དང་མ་སྐྱིད་པ་ཡོང་བ་ཉུང་དུ་གཏོང་རྒྱུ་དེ་རེད། ཅེས་གསུངས་སོང་།
ཆོས་ལུགས་ཀྱི་དམིགས་ཡུལ་གཞན་ཕན་ཡིན་པ་ལས་ལྟ་གྲུབ་ཀྱི་རྣམ་གཞག་མིན་པའི་ཐད་ལ། ཆོས་ལུགས་ཁག་ནང་འཇིག་རྟེན་བཀོད་པ་པོ་ཡོད་པ་རེད་གསུང་མཁན་དང་ཡོད་མ་རེད་གསུང་མཁན། སྐྱེས་པ་སྔ་ཕྱི་ཡོད་པ་རེད་གསུང་མཁན་དང་ཡོད་མ་རེད་གསུང་མཁན། གང་ཟག་གི་བདག་ཡོད་པ་རེད་གསུང་མཁན་དང་ཡོད་མ་རེད་གསུང་མཁན་སོགས་མི་འདྲ་བ་མང་པོ་ཡོད། སངས་རྒྱས་པའི་གཞུང་དུ་གཙོ་བོ་བརྟག་དཔྱད་ཀྱི་ལམ་ནས་གཏན་ལ་ཕབ་ཀྱི་ཡོད་པ་རེད། ལྟ་བ་ཕྱིན་ཅི་ལོག་པ་ཡིན་ནའང་། གདུལ་བྱའི་ཁམས་དང་མོས་པའི་ཁྱད་པར་དེས། ཕྱིན་ཅི་ལོག་པའི་ལྟ་བ་ཕན་ཐོགས་ཡོད་པ་ཞིག་ཡོང་གི་ཡོད། བཅོམ་ལྡན་འདས་ཀྱིས་སྐབས་རེར། ཕུང་པོ་ལྔ་ནི་འཁུར་རོ། ཁུར་འཁུར་པོ་ནི་གང་ཟག་གོ་གསུང་ཡོང་སྐབས། སྡུག་བསྔལ་བའི་ཕུང་པོ་ལས་དོན་གཞན་པའི་སྡུག་བསྔལ་འཁུར་མཁན་གྱི་བདག་ཡོད་པ་འདྲ་བོ་ཞིག་གསུང་གི་ཡོད། དེ་ནི་དགོས་པའི་དབང་གིས་གསུངས་བ་ཞིག་རེད། དངོས་བསྟན་གྱི་དོན་དག་དེ་ཕྱིན་ཅི་ལོག་པ་རེད། དེ་བཅོམ་ལྡན་འདས་ཀྱིས་མ་མཁྱེན་པའི་དབང་གིས་གསུངས་བ་མ་རེད། ཤེས་བཞིན་བཞིན་དུ་དགོས་པ་རྒྱུ་མཚན་ལ་བལྟས་ནས་གསུངས་བ་རེད། དགོས་པ་རྒྱུ་མཚན་ནི་ཕུང་པོ་ལས་དོན་གཞན་པའི་བདག་འདོད་མཁན་གྱི་བདག་ཅིག་ཡོད་པ་རེད་གསུང་བ་ཡིན་ན། བྱམས་པ་དང་བརྩེ་བར་ཕན་ཐོགས་ཡོད་མཁན་གྱི་གདུལ་བྱ་ཞིག་ལ། ཕུང་པོ་ལྔ་ནི་འཁུར་རོ་གསུངས་ན། ཕྱིན་ཅི་ལོག་པའི་ལྟ་བ་ཡིན་ཀྱང་། ཁོང་ལ་ཕན་གྱི་ཡོད་པ་རེད། ཕྱིན་ཅི་ལོག་པའི་ལྟ་བ་དེ་ཕྱིན་ཅི་ལོག་པ་ཡིན་པ་མཁྱེན་བཞིན་དུ། དགོས་དབང་གིས་ལྟ་བ་གསུང་གི་ཡོད་པ་རེད། དེ་ག་རེ་མཚོན་གྱི་ཡོད་པ་རེད་ལབ་ན། འཛམ་གླིང་འདིའི་ཐོག་ལྟ་གྲུབ་མི་འདྲ་བ་མང་པོ་ཡོད་པའི་ནང་། ལྟ་བ་མི་འདྲ་བ་དེར་ཁམས་དང་མོས་པ་སྣ་ཚོགས་དགོས་ཀྱི་ཡོད་དུས། ལྟ་བ་མི་འདྲ་བའི་གྲུབ་དོན་མིའི་སེམས་པ་བཟང་པོ་དགོས་པའི་བསླབ་བྱ་གཅིག་གྱུར་ཡིན་པ་དེ་ཆོས་ལུགས་ཚང་མས་དད་པ་བྱ་དགོས་པའི་རྒྱུ་མཚན་ཆགས་ཡོད། ལྟ་གྲུབ་མི་འདྲ་བ་རེ་ཡོད་པ་དེ་རྩོད་པ་རྩོད་རྒྱུའི་ཆེད་དུ་མ་རེད། དགོས་དོན་མི་ལ་ཕན་དགོས་ཀྱི་ཡོད་པ་རེད། མི་ལ་ཕན་ན་ལྟ་བ་ཕྱིན་ཅི་ལོག་ནའང་འགྲིག་པ་རེད། བཅོམ་ལྡན་འདས་ཀྱིས་དགོས་པའི་དབང་གིས་མཁྱེན་བཞིན་དུ་ཕྱིན་ཅི་ལོག་པའི་ལྟ་བ་གསུངས་ཡོད་པ་རེད། ཅེས་གསུངས་བྱུང་།
གསར་འགོད་པ། དཔལ་ལྡན།
དྲ་གྲོགས་བརྩོན་རྒྱམ་ལགས།
བསྟོད་མི་ཤེས་མཁན་ཞིག་གིས་བསྟོད་པ་ལས། །
སྨད་མི་ཤེས་མཁན་ཞིག་གིས་སྨད་ན་དགའ། །ཞེས་པ་ཅིས་མི་བདེན། ཁྱེད་ཀྱིས།༼༧གོང་ས་མཆོག་སངས་རྒྱས་དངོས་སུ་ཕྱོན་ནས་བཀའ་ཆོས་གནང་པ་འདི་ནི་ངོ་མ་རིན་ཐང་མེད་པ་ཞིག་རེད།༽ ཅེས་པ་༸གོང་ས་མཆོག་ལ་བསྔགས་བརྗོད་ཡིན་ནམ་ཡང་ན་དམའ་འབེབ་ཡིན་ཡག་པོ་བྱས་ནས་བསམ་བློ་མཐོང།།
༧གོང་ས་མཆོག་སངས་རྒྱས་དངོས་སུ་ཕྱོན་ནས་བཀའ་ཆོས་གནང་པ་འདི་ནི་ངོ་མ་རིན་ཐང་མེད་པ་ཞིག་རེད། ད་དུང་མི་གང་མང་ཞིག་གི་བློ་ཁ་ཆོས་སུ་བསྒྱུར་མི་ཐུབ་པ་ནི་ཐབ་སྐྱོ་བོ་རེད་ཟེར་གྱི་ཡོད་དེ་ནི་ངའི་རང་གི་མཐོང་སྟངས་ཤིག་གི་འདི་འདྲ་བྲིས་པ་ཡིན། ཕྱི་རྒྱལ་མི་རིགས་འདི་ཚོ་སྙིང་རྗེ་སྐད་མ་གོ་ན་ཡང་༧གོང་ས་མཆོག་གི་སྐུ་དངོས་སུ་མཇལ་དུ་མིག་ཆུ་རང་དབང་མེད་པར་ཐོན་གྱི་འདུག་འདི་ཚོའི་དད་པ་ནི་ངོ་རིན་ཐང་གཞན་ན་མེད་པ་ཞིག་རེད། བོད་མི་ཚོ་དེ་འདྲ་ཞིག་མིན་པས་རྒྱུ་མཚན་གང་ཡིན་ནམ།