གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ཉེར་བརྒྱད།

མི་ཁྱིམ་དུ་ཡོད་དུས། མི་ཁྱིམ་དེ་ནས་གུས་ལུགས་ཤིག་ཡོད་པ་བཞིན་ངས་ཀྱང་དེ་ལ་བརྩི་དགོས་པ་ཡིན། ཁ་ཤས་ཤིག་ལ་ངས་དང་ལེན་བྱེད་མི་ཐུབ་ས་ཡོད། དཔེར་ན་ངས་རང་གི་བོད་ཀྱི་གོམ་གཤིས་དང་མ་མཐུན་པའི་རིགས། རང་གི་ཕ་མ་ལ་གུས་བརྩི་བྱེད་སྟངས་ཀྱི་ཐད་ནས་མོས་མཐུན་ཡོད་མེད་ཀྱི་ཕྱོགས་ནས་ཡིན། ང་རང་ཕ་མའི་འཁྲིས་སུ་བསྡད་ནས་སྲུ་ཞུ་བྱེད་མ་ཐུབ་ཀྱང་། རྒྱང་རིང་ནས་དངུལ་སྒོར་རེ་སྐུར་ནས་འཚོ་བའི་ཁ་སྣོན་ལ་སྐུར་འདོད་ཡོད་པ་ལྟ་བུ་ཡིན།

བཟང་ངན་གང་ལ་ཐུག་ན་ཡང་། རང་ཉིད་ནི་བྱིས་པ་གཉིས་ཀྱི་ཕ་ལོ་ཆགས་ཡོད་དུས། རང་གི་བུ་མོ་དང་སྐྱེ་ལ་ཉེ་བའི་བུ་ཆུང་གཉིས་ལ་འགན་ཞིག་བླངས་དེ། ཁྲེལ་དང་ངོ་ཚ་ཡོད་པའི་ཕ་རྒན་ཞིག་ཆགས་པར་འབད་པ་བྱེད་རྒྱུ་དེ་ཡིན་དུས། ངས་མཛའ་མོའི་ཕ་རྒན་གྱི་འབོད་སྐུལ་དང་མཛའ་མོའི་མ་རྒན་གྱི་དྲིན་ལན་བཅས་ལ་བསམ་ནས། ལས་ཀ་གྲོལ་ནས་རང་ཉིད་ནང་དུ་ལྷོད་བསྡོད་བྱེད་འདོད་ཡོད་མེད་ལ་མ་བལྟས་པར། རང་ཉིད་ལས་ཀ་ནས་ཐང་ཆད་ཡོད་མེད་ལ་མ་བལྟས་པར། མོ་རང་གི་འདོད་པ་ལ་བསྟུན་ཇེ་མང་དུ་གཏོང་བ་དང་། མོ་དང་ལྷན་དུ་བདུན་མཇུག་གི་གུང་གསེང་བཅས་ལ། མོ་དང་མཉམ་དུ་དུས་ཚོད་མང་ཙམ་གཏོང་བར་བསམ་བློ་བཏང་བ་ལྟར། གུང་གསེང་ཉིན་མོ་དང་བོ་ལ་མོ་རང་གིས་གློག་བརྙན་སྙན་གྲགས་ཅན་ཞིག་ཕྱི་དྲོའི་དུས་ཚོད་ལྔ་བའི་སྟེང་དུ་འདུག་ཟེར་བ་ལྟར། ངེད་གཉིས་ཀྱིས་བུ་མོ་ཐར་མ་མཚོ་མོ་རང་གི་ཨ་མ་ལ་བལྟ་རུ་བཅུགས་ནས་ལམ་དུ་ཆས།

ལམ་བར་གྱི་འགྲུམ་འགྲུལ་མགྱོགས་མིན་ལ་བསྟེན། ངེད་གཉིས་སྔོན་དུ་སླེབས་དགོས་ན་ཡང་དུས་ཚོད་ལྔ་བ་ཟིན་གྲབས་དུས་སུ་གློག་བརྙན་ཁང་གི་སྒོ་འགྲམ་དུ་འབྱོར་བ་ན། ལས་མི་བུད་མེད་དེས། གློག་བརྙན་འགོ་བཙུགས་ནས་དུས་ཚོད་གཅིག་འགྲོ་གྲབས་ཡོད་པ་རེད། རྗེས་མ་དེ་ནི་ཆུ་ཚོད་བདུན་པའི་སྟེང་དུ་རེད་ཅེས་བཤད་དུས། ངའི་མཛའ་མོས་བུད་མེད་དེ་ཡི་སྐད་ཆ་ལ་ཡིད་ཆེས་མི་བྱེད་པར། མོ་རང་གིས་གློག་ཀླད་ནས་བརྡ་ཁྱབ་ངེས་སུ་དུས་ཚོད་ལྔ་བ་བྲིས་འདུག་ཟེར་ནས་ཁོ་གཉིས་ཀྱིས་གློག་ཀླད་བསྔོགས་ནས་བལྟས་སོང་། མཐར་ངའི་མཛའ་མོས་རང་གི་བལྟ་ནོར་ཐེབས་ཡོད་པ་དེར་ངེས་ལེན་མི་བྱེད་ཐབས་མེད་ཆགས། མཛའ་མོས་ངའི་ཨ་མ་ལ་ཁ་པར་བཏང་ནས་འུ་གཉིས་ཀྱིས་ཆུ་ཚོད་བདུན་པའི་སྟེང་གི་གློག་བརྙན་ལ་བལྟས་པ་ཡིན་ན། མོ་རང་གིས་བུ་མོ་ལ་བལྟ་ཐུབ་ཀྱི་འདུག་མིན་བྲིས་ཆོག་ཟེར།

ངེད་གཉིས་དུས་ཚོད་གཉིས་རིང་སྒུག་དགོས་པ་ཡིན་དུས། གློག་བརྙན་ཁང་དེ་ཡི་ཉེ་འགྲམ་དུ་སྐོར་གཡེང་རེ་བྱེད་དུ་སོང་། ལམ་འགྲམ་ཞིག་ནས་རྐུབ་སྟེགས་རིང་མོ་ཞིག་ནས་ངལ་གསོ་ཞོར་དུ། ངེད་གཉིས་གཞུག་ཕྱོགས་ག་རེ་བྱེད་མིན་སྐོར་ལ་གླེང་མོལ་བྱས། མོ་རང་གིས་བཤད་ན་ངེད་གཉིས་ལྷོ་ཕྱོགས་སུ་གནས་སྤོར་བར་གཉིས་ཀ་འདོད་མོས་ཡོད་ཀྱང་། དང་བོ་ཁྱེད་རང་གིས་ལས་ཀ་རེག་མིན་བལྟ་དགོས་ཟེར། ངས་དང་བོ་ཁང་བ་ཉོ་དགོས་མིན་སྐོར་ནས་བཤད། ངས་མོ་རང་ལ་དངུལ་ག་ཚོད་ཡོད་མེད་དང་ཕ་མ་གཉིས་ཀྱིས་རོགས་དངུལ་ག་ཚོད་ཐོབ་མིན་སོགས་ཞིབ་དུ་དྲིས་དུས། ཚང་མ་སྡོམ་ན་ངེད་ཚོར་འདུག་ཁང་སྟབས་བདེ་ཞིག་ཉོ་ཐུབ་པ་འདུག འོན་ཀྱང་། མོ་རང་ནི་ཡར་བཤད་ཀྱང་རེད། མར་བཤད་ཀྱང་རེད། ང་རང་ལ་ལས་ཀ་རེག་མིན་སྐོར་བཤད། རེག་རྗེས་སུ་དང་བོ་ཁང་བ་ཞིག་གླས། དེ་ནས་ག་ལེར་བལྟས་ན་འགྲིག་གི་རེད་ཟེར།

ངས་དེ་ལྟར་ག་ལེར་བསྡད་ནས་དུས་ད་ལྟ་ལ་ཐུག་པ་རེད། གནས་ཚུལ་མི་ལེགས་པ་ཁ་ཤས་ཤིག་ཀྱང་གཅིག་རྗེས་གཉིས་མཐུད་དུ་བྱུང་བ་རེད། ད་ནི་ཉམ་མྱོང་དེ་ལ་བརྟེན་ནས་གནས་ཚུལ་དེ་ལས་ཚབ་ཆེ་བ་ཞིག་མ་ཡོང་གོང་དེར། ངེད་གཉིས་ཀྱིས་རང་གི་བུ་དང་བུ་མོ་ཚོ་ནང་ཞིག་འཛིན་ཐུབ་པ་ཡིན་ན་ཡག་པོ་འདུག ང་རང་ཁང་བ་གླ་བར་འདོད་པ་དངོས་ནས་མེད། ཉོ་ཐུབ་པ་ཡིན་ན། དངོས་ནས་སྐབས་འདི་ལ་གང་སར་ཐབས་ཤེས་བཞག དེ་ནས་གློག་ཀླད་ནང་གི་བརྡ་ཁྱབ་དག་ལ་ཉུལ། དེ་ནས་ཁ་པར་འདྲ་བརྒྱབས། ལས་ཀ་དེ་དག་འགོ་བཟུང་ན་ཡག་ས་རེད། ད་གང་ལྟར། ངས་འདི་ལྟར་བལྟས་དུས། ཁྱེད་རང་གི་བཤད་ཕྱོགས་དང་བྱེད་ཕྱོགས་གང་ལ་བལྟས་ན་ཡང་། ངེད་གཉིས་བུ་ཆུང་སྐྱེ་ནས་ཚར་རེག་བར་དུ་མུ་མཐུད་དུ་ཁྱེད་ཀྱི་ཨ་མའི་ནང་དུ་ལུས་རྒྱུ་རེད།

མཛའ་མོས་ཀྱང་ངས་བཤད་པའི་སྐད་ཆ་དེར་བདེན་ཁ་སྤྲད། ངེད་གཉིས་ཕྱིར་གློག་བརྙན་ཁང་ནང་གི་ཟ་ཁང་དེར་འཚིག་ཇ་ཞིག་དང་ཞོར་ཟས་ཤིག་རོལ་ནས་གློག་བརྙན་སྟོན་པར་སྒུག གློག་བརྙན་ནི་གནའ་བོའི་རྟོགས་འཆར་རང་ལུགས་ཀྱི་སྒྲུང་ཞིག་ཡིན་པ་དང་། དེབ་གཟུགས་སུ་བཏོན་ནས་ལོ་ངོ་ལྔ་བཅུ་ལྷག་སོང་ཡོད་པ་ཞིག་རེད། ནང་དོན་ནི་བུད་མེད་ཅིག་གི་སྐོར་ཡིན་ལ། བུད་མེད་དེ་ནི་ཆུང་དུས་ནས་ཕ་མ་གྲོངས་ནས་སྲི་མོ་ཞིག་ཡོད་པ་དེ་ཡིས་ནང་གི་རྒྱུ་ནོར་ཡོད་ཚད་བདག་བཟུང་བྱས་རྗེས། མོ་རང་ལ་མིང་ངན་བཟོས་ནས་ཁྱིམ་དེ་ནས་ཕྱིར་འཕུད་དེ། དྭ་ཕྲུག་སློབ་གྲྭ་ཞིག་དུ་བཏང་བ་ནས། བུད་མེད་དེ་འཚར་ལོངས་བྱུང་རྗེས་སུ། ཕྱུག་བདག་ཞིག་གི་བུ་མོའི་དགེ་རྒན་དུ་སོང་ནས། ཕྱུག་བདག་དེ་དང་བརྩེ་བ་ཆགས་པའི་སྐོར་ཞིག་རེད།

གུང་གསེང་ཉིན་གཉིས་པ་དེར། ང་རང་ནང་དུ་ལྷོད་ལྷོད་ཅིག་བསྡད་ནས་དྲ་ཐོག་ལ་ཉུལ་བ་དང་རང་གི་གྲོགས་པོ་དག་ལ་གདོང་དེབ་རྒྱུད་ནས་ཁ་བརྡ་རེ་བྱེད་འདོད་ཡོད་ཀྱང་། མཛའ་མོས་མོ་རང་གི་གྲོགས་མོ་དང་ང་རང་གི་གྲོགས་པོ་བུ་ཆུང་གི་བཟའ་ཐོར་བུད་མེད། ཤེས་རབ་ལྷ་མོ་དང་བུ་མོ་པདྨ་གཉིས་ལ་ཆུ་རྐྱལ་རལ་བ་ཞིག་ནས་ཐུག་རྒྱུ་བྱས་ཡོད་ཟེར། དེ་ནས་ང་ཚོས་ཟ་མ་ཞིག་བཟོས་ནས་འཁུར་དགོས། ཁོ་གཉིས་ཀྱིས་ཟ་མ་འཁྱེར་མི་འདུག ང་ཚོར་སྒུག་ནས་འདུག་གི་རེད། ཁྱེད་རང་འགྲོ་ཡི་ཡིན་ནམ་ཟེར། དངོས་ནས་བཤད་ན་ང་རང་འགྲོ་འདོད་མེད་པ་མོ་རང་གིས་ཤེས་ངེས་རེད། ཡིན་ཡང་། ངས་བསམ་བློ་ཞིག་བཏང་ན། ད་ལྟ་ནི་མོ་རང་གི་གྲོད་ཁོག་ཆེ་བའི་སྒང་ལ། ཅ་དངོས་དག་འཁུར་རྒྱུ་དཀའ་ངལ་ཡོད་ལ། བུ་མོ་ཡང་མཉམ་དུ་ཁྲིད་ནས་འགྲོ་དགོས་དུས་དཀའ་ལས་ཁག་ངེས་རེད། ང་འགྲོ་ཡི་ཡིན་ཞེས་རྣམ་འགྱུར་མི་འདོད་པའི་ཚུགས་ཀ་ཞིག་བསྟན།

ཟ་མ་ཚང་མ་གྲྭ་སྒྲིག་ཟིན་པ་དང་ངས་མོ་རང་གི་རླངས་འཁོར་ནང་དུ་བཞག དེ་དུས་མོ་རང་གིས་ཁྱེད་རང་གི་གདོང་གཤིས་འགྱུར་འདུག ཁྱེད་རང་འགྲོ་འདོད་མེད་ན་མ་སོང་ན་འགྲིག་གི་རེད་ཟེར། ངས་ང་རང་གི་གདོང་གཤིས་འགྱུར་མེད་ཅེས་སྐད་འགོ་ཐོན་ཙམ་བཤད་དུས། མོས་ཁྱེད་རང་ཁོང་ཁྲོ་ཟ་དགོས་དོན་གང་རེད། ངས་ངོ་མ་ཤེས་མ་སོང་ཟེར། ངས་ང་རང་ཁོང་ཁྲོ་ཟ་མེད་ཅེས་བཤད་། ཅུང་ཙམ་ཞིག་གི་རྗེས་སུ་ང་རང་གཟའ་འཁོར་རྗེས་མ་དེར་གྲོགས་པོ་བུ་ཆུང་ནང་དུ་འགྲོ་རྒྱུ་ཡིན་ཞེས་བཤད་དུས། མོ་རང་གིས་གཟའ་འཁོར་རྗེས་མ་དེར་རོགས་སྐྱོབས་ཚོགས་པ་དེས། སློབ་མ་ཚོ་དང་མཉམ་དུ་སྐུའི་འཁྲུངས་སྐར་ཡིན་ཟེར་ནས་བརྡ་ཁྱབ་སྔོན་མ་ནས་བཏང་འདུག ཁྱེད་རང་དེར་འགྲོ་རྒྱུ་མིན་ནམ་ཟེར།

ཆུ་རྐྱལ་ར་བའི་འགྲམ་དུ་སླེབས་པ་དང་ངས་ཅ་དངོས་དག་འཁུར་ནས་མོ་རང་དང་བུ་མོ་བཅས་ང་ཚོ་འཛིན་བྱང་ཉོ་རུ་སོང་། འཛིན་བྱང་རེ་ལ་ཨ་སྒོར་བཅུ་གསུམ་རེད་འདུག མོ་རང་གིས་ང་ལ་བཅུ་མཉམ་དུ་ཉོས་ན་གོང་ཅུང་ཁེ་བ་འདུག ག་རེ་བྱེད་ཀྱི་ཡིན་ཟེར། ངས་བལྟས་ན། ཐེངས་དེ་འདྲའི་མང་བོ་ཞིག་ལ་འདིར་ཡོང་ཐུབ་ཁག་པོ་རེད། ཁྱེད་རང་གིས་བུ་ཆུང་སྐྱེ་བར་ཟླ་ངོ་གཉིས་མ་གཏོགས་མི་འདུག་མོད། དེ་ལས་གཅིག་རེ་ཉོས་ན་མ་རེད་དམ་ཞེས་བཤད་པ་དེར། མོས་ཀྱང་ཁས་བླངས་ནས་མི་རེ་ལ་ཨ་སྒོར་བཅུ་གསུམ་རེ་ཆུ་རྐྱལ་ར་བར་འཛུལ་གླར་སྤྲད། སྐབས་དེར་ངའི་སེམས་སུ། དངོས་ནས་ང་རང་གི་འདོད་པ་ལྟར་བྱེད་ཐུབ་པ་ཞིག་ཡིན་ན། ཁ་རྩོད་མེད་པར། བསམ་ཤེས་བྱེད་ཐུབ་རྒྱུ་ན། ཁ་སང་དེ་རིང་གཉིས་ཀའི་གློག་བརྙན་ལ་སོང་ནས་ཨ་སྒོར་བདུན་བཅུ་ལྷག་དང་དེ་རིང་གི་ཨ་སྒོར་སུམ་བཅུ་བཅས་སྡོམ་ན་ཨ་སྒོར་བརྒྱ་འདི། ངས་རྒྱང་རིང་གི་ཕ་མ་གཉིས་ལ་སྐུར་ནས་སེམས་པ་དགའ་རུ་འཇུག་ངེས་ཡིན། ད་ནི་རང་གིས་སྟོང་འདང་ཞིག་རྒྱགས་པ་ལས་གང་ཡོད།

ཕྱོགས་ངོས་གཞན་ནས་བཤད་ན། འདི་ཡང་མཛའ་མོའི་སེམས་པ་དགའ་བྱེད་ཆགས་ཡོད་ལ། བུ་མོ་ཐར་མ་མཚོ་ཡང་ཆུ་བསྐྱལ་བྱེད་སར་དངོས་ནས་དགའ་བ་བཅས་ཡིན་དུས་། དེ་ཡང་ཆུད་ཟོས་ཤིག་མ་རེད་ལ། གཞན་ཡུལ་ནས་གཞན་ཡུལ་གྱི་འཚོ་བ་བསྐྱེལ་ལུགས་དེར་བསྟུན་ལོས་དགོས། དེ་མ་བསྟུན་པ་ཡིན་ན་ངེད་གཉིས་ལ་མི་དགོས་ས་ནས་ཁ་རྩོད་ཡོང་ངེས་ཡིན། ཁ་རྩོད་བྱེད་པ་བུ་མོས་མཐོང་ན་ཡག་པོ་མེད། མོ་རང་གི་གཟུགས་པོའི་བདེ་ཐང་ལ་ཡང་གནོད། འདི་དག་སྙམ་ནས། རང་ཉིད་ལ་འདོད་པ་ཡོད་མེད་ལ་མ་བལྟས་པར། ཆུ་རྐྱལ་རྭ་བའི་ནང་དུ་འཛུལ།