རྣམ་རྒྱལ་གྲྭ་ཚང་། གམ་བཅར་པ་བསྟན་འཛིན་དགའ་བ།
གཟི་ལུམ་རང་བཟོ་ཙམ་མིན་པར་བརྟག་དཔྱད་དང་ཞིབ་འཇུག་སྔོན་དུ་སོང་ཞིང་། མིག་སྔའི་ཁེ་ཕན་དང་འབྲེལ་བའི་སྐྱོན་བརྗོད་དང་དགག་སྒྲུབ་གང་ཞིག་ཡིན་རུང་ཡར་རྒྱས་དང་མདུན་བསྐྱོད་ཀྱི་ཕྱོགས་སུ་གོམ་སྟབས་སྒྱུར་བཞིན་པའི་སྤྱི་སྒེར་ཚང་མས་སྤྲོ་སེམས་འཁོལ་བའི་ངང་ནས་དེ་དག་ངོས་ལེན་ཡང་དག་བྱ་དགོས་པ་ནི་སྐྱོན་བརྗོད་དེ་དག་ཡར་རྒྱས་ཀྱི་ཐེམ་སྐས་དང་འཇུག་སྒོ་ལྟ་བུ་ཡིན་པས་རེད་ལ། སྐྱོན་བརྗོད་ལ་གཡོལ་ཐབས་དང་བཙན་འགེབས་བྱ་སེམས་ཀྱི་འདུ་ཤེས་ནི་དུས་ནམ་ཡང་ཁུངས་འཁྱོལ་ཐབས་མེད་ཅིང་ཡར་རྒྱས་ཀྱི་འགོག་རྐྱེན་ཆེ་ཤོས་དེ་ཡིན།
དེ་བས་ན་སྐུ་ཞབས་བློ་བཟང་ཡེ་ཤེས་ཀྱིས་གྲྭ་ཚང་གི་དུས་འཁོར་སྐུ་བརྙན་དང་འབྲེལ་བའི་རྩོམ་ཡིག་ཅིག་དུས་བབ་དྲ་རྒྱའི་ནང་བཀོད་ཐོན་བྱུང་བར་ཐུགས་རྗེ་ཆེ་ཞུ་རྒྱུ་ཡིན། དེའི་རྒྱུ་མཚན་ནི་རྒྱུན་པར་བདག་གི་སེམས་ངོར་དུས་འཁོར་ཉམས་བཞེས་དང་རྒྱུན་འཛིན་གྱི་ཕྱོགས་ལ་དོ་འཁུར་གནང་མཁན་ནི་ང་ཚོའི་སྤྱི་ཚོགས་ནང་དགོན་སྡེ་རེ་ཟུང་ཞིག་ལས་མ་མཆིས་སྟབས་འདི་ནི་ཤིན་ཏུ་ཉེན་ཁའི་རང་བཞིན་ཞིག་ཏུ་བསམ་བཞིན་ཡོད། དེ་ལྟ་ནའང་དུས་འཁོར་གྱི་ཕྱོགས་ལ་ཐུགས་སྣང་དང་འགན་འཁུར་གནང་མཁན་སྐུ་ཉིད་ལྟ་བུའི་མི་སྒེར་པ་ཡང་ཇི་སྙེད་ཅིག་ཡོད་པ་ཤེས་རྟོགས་དང་རྒྱུས་ལོན་བྱུང་སྐབས་བདག་སེམས་ལྷོད་ལ་བབ་ཅིང་། བློ་དམན་བདག་གི་སེམས་ངལ་དེ་དག་ནི་བདག་ཉིད་ཁོ་ནའི་སྐྱོན་ཆ་ལས་གཞན་དུ་ཅི། དེ་བས་ན་སྐུ་ཉིད་ཀྱིས་དུས་འཁོར་གྱི་ཕྱོགས་ལ་དེ་ལྟའི་དོ་འཁུར་སྣང་བར་ཡི་རངས་བསྔགས་བརྗོད་ཞུ་བ་དང་ཆབས་ཅིག སླད་མར་ཡང་དེའི་ཕྱོགས་ལ་ཐུགས་སྣང་དང་འགན་འཁུར་མང་ཙམ་བཞེས་ཏེ་དུས་འཁོར་གྱི་ཆོ་ག་དང་འབྲེལ་བའི་གཞུང་ལུགས་རྒྱ་མཚོ་ལྟ་བུ་མཆིས་པ་འདི་དག་ཀུན་ཉམས་མེད་རྒྱུན་གནས་ཐུབ་རྒྱུར་ཕྱར་གྲུ་མཉམ་འདེགས་གནང་སྐྱོང་ཡོང་བའི་རེ་སྐུལ་ཞུ་རྒྱུ་ཡིན།
སྐུ་ཉིད་ཀྱིས་དུས་བབ་དྲ་རྒྱར་བཀོད་ཐོན་ལྟར་དུས་འཁོར་ལྷ་ཁང་གི་ ༸གོང་ས་མཆོག་གི་བཞུགས་ཁྲིའི་གཡོན་ཕྱོགས་ཀྱི་སྐུ་རྒྱུ་གསེར་ཟངས་ལས་གྲུབ་པའི་དུས་འཁོར་གྱི་སྐུ་བརྙན་དང་། བཞུགས་ཁྲིའི་ལྟག་རྒྱབ་ཀྱི་རྩིག་ངོས་སུ་བཞེངས་སྐྲུན་ཞུས་པའི་དུས་འཁོར་གྱི་ལྡེབས་རིས། དེ་བཞིན་དུས་འཁོར་གྱི་སྐུ་ཐང་རེ་ཟུང་གི་བཟོ་བཀོད་བཅས་ནི་སྐུ་ཉིད་ཀྱིས་དུས་འཁོར་གྱི་གཞུང་ལུགས་དང་འགལ་ཚུལ་གོ་བརྡ་མཛུབ་བཙུགས་སུ་གནང་དོན་ལྟར། དཔུང་པ་བཅུ་གཉིས་ལས་ཉེར་བཞི་མེད་པའི་བདེན་དངོས་ནི་སྐུ་ཉིད་ཀྱིས་ཐུགས་ཁྲལ་མ་གནང་གོང་ནས་སྐུ་བཅར་རྣམ་རྒྱལ་གྲྭ་ཚང་གིས་སྔོན་ཚུད་ནས་ཤེས་རྟོགས་དང་རྒྱུས་ལོན་བྱུང་ཡོད་ལ། མི་འགྱང་བར་བཟོ་བཅོས་གནང་རྒྱུའི་གོ་བསྡུར་ཡང་བྱུང་ཡོད། གཅིག་བྱས་ན། སྐུ་ཉིད་ཀྱིས་གནས་ཚུལ་འདི་ཤེས་རྟོགས་བྱུང་སྟེ་གོ་སྐབས་དམ་འཛིན་གྱིས་རང་ཉིད་སྐུ་སྒེར་གྱི་ཟུག་གཟེར་གཅོག་ཐབས་བྱས་པ་ཞིག་ནི་མིན་ཤས་ཆེ།
གང་ལྟར། དོན་དངོས་ལ་དེ་ལྟར་ཡིན་མིན་ཇི་ལྟར་ཡང་སྐུ་ཉིད་ཀྱིས་གསལ་བཤད་བྱས་པ་དེ་བདེན་པ་རེད་ལ། སྐུ་ཉིད་ཀྱི་རྩོམ་ཡིག་དེར་མཁར་རྔ་ཞེས་པ་ཞིག་ནས་མཆན་འགོད་གནང་དོན་ལྟར་སྐུ་རྒྱུ་གསེར་ཟངས་ལས་གྲུབ་པའི་དཔལ་དུས་ཀྱི་འཁོར་ལོའི་སྐུ་བརྙན་དེ་ཇོ་ནང་ཁལ་ཁ་རྗེ་བཙུན་དམ་པས་གསར་བཞེངས་ཞུས་ཏེ་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་ཕུལ་བ་ཡང་དངོས་བདེན་རེད། ཇོ་ནང་ཁལ་ཁ་རྗེ་བཙུན་དམ་པས་དགོངས་གཞི་དགོས་པ་གང་ཞིག་ལ་དགོངས་ནས་དེ་ལྟར་བཞེངས་སྐྲུན་གནང་མིན་སྐོར་ལ་བདག་རང་སྒེར་ངོས་ནས་བཀའ་འདྲི་ཞུ་རྒྱུ་མ་བྱུང་རུང་། གང་ལྟར་གཞུང་ལུགས་ལྟར་ན་དཔུང་པ་བཅུ་གཉིས་ལས་ཉེར་བཞི་མེད་པ་བདེན་དངོས་ཤིག་རེད།
ཡང་སྐུ་ཉིད་ཀྱིས་“ཕྱི་ལོ་ ༢༠༠༣ གྱི་ཡར་སྔོན་དུ་དུས་འཁོར་ལྷ་ཁང་དུ་ཡོང་ཚུལ་དང་། དུས་འཁོར་ལྷ་ཁང་ནི་རྣམ་རྒྱལ་གྲྭ་ཚང་གི་ཡིན་ཞིང་། རྣམ་རྒྱལ་གྲྭ་ཚང་ནི་དམིགས་བསལ་དུས་འཁོར་གྲྭ་ཚང་ཞིག་ཡིན་སྟབས་”ཞེས་གསུངས་པ་ སོགས་ཀྱི་བརྗོད་བབ་ལ་གཞིགས་ན་སྐུ་ཉིད་ནི་གྲྭ་ཚང་གི་སྐོར་ལ་རྒྱུས་མངའ་ཆེ་ཙམ་མེད་དམ་སྙམ་པའི་སྣང་བ་འགོག་མེད་དུ་འཆར་ཡང་། སྐུ་བརྙན་དང་འབྲེལ་བའི་གནད་དོན་འདི་གྲྭ་ཚང་གི་མཁན་རིན་པོ་ཆེ་ལས་གྲྭ་ཚང་གི་ཡིག་ཚང་སོགས་ལ་བཅར་མེད་པའི་དོགས་གནས་འདིས་ཁོ་བོ་ནི་མགོ་བོ་ཡོངས་སུ་རྨོངས་པར་གྱུར།
གང་ལགས་ཤེ་ན། གྲྭ་ཚང་གི་མཁན་པོ་རིམ་བྱོན་ནི་༸གོང་ས་༸སྐྱབས་ མགོན་ཆེན་པོ་མཆོག་གིས་ཐུགས་ཁུར་བླ་མེད་ཆེད་བཞེས་ཀྱིས་ཐད་བསྐོས་གནང་གི་ཡོད་སྟབས། ཁོང་རྣམས་ནང་བསྟན་གཞུང་ལུགས་དང་དེང་དུས་ཀྱི་སྐད་ཡིག་སོགས་ལ་མཁྱེན་རྒྱ་ཡངས་ཤིང་། ལྷག་བསམ་གཡོ་བ་མེད་པར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་ དགོངས་ལམ་སྟོན་ཐོག་ཤར་སྐྱོད་གནང་མཁན་ཞིག་ཡིན་པ་ནི་སྨོས་མ་དགོས་པ་ཞིག་ཡིན་ཡང་། གྲྭ་ཚང་གི་ཐུན་མོང་དང་ཐུན་མིན་གྱི་ཆོ་ག་སོགས་ལ་མྱོང་རྒྱུས་ཆ་ཚང་ཡོད་མེད་སྣ་ཚོགས་ཤིག་ཡོད། དེ་བས་ན་ད་ལྟའི་གྲྭ་ཚང་གི་མཁན་པོ་ཁྲོམ་ཐོག་སྤྲུལ་སྐུ་རིན་པོ་ཆེ་མཆོག་ཀྱང་དེ་དེ་བཞིན་ལགས་པས་གྲྭ་ཚང་གི་གནད་དོན་ཡོངས་རྫོགས་ལ་ཆ་རྒྱུས་ཡོད་པའི་ཁྱབ་པ་མེད། དེ་བས་ན་སྐུ་ཉིད་ཀྱིས་གནད་དོན་འདི་དྲ་རྒྱར་མ་བཀོད་གོང་གི་བརྟག་དཔྱད་བྱེད་སྟངས་དེ་མཆན་འགོད་པ་རེ་ཟུང་གིས་ཡང་དག་ཡིན་ཚུལ་གྱི་འུད་སྒྲོག་བྱས་ཀྱང་། དོན་དངོས་ཐོག་དཔྱད་ཐབས་འདི་ཡང་དག་པ་ཞིག་དང་མཐིལ་ཕྱིན་པ་ཞིག་མ་ཡིན་ལ་དེའི་གྲུབ་དོན་ཀྱང་། བློ་གྲོས་ཀྱི་ནོར་དང་ལྡན་པའི་སྐྱེ་བོ་རྣམས་མགུ་བ་སྐྱེ་བའི་གཏམ་ཞིག་མིན་ནོ། ། གཞན་ཡང་སྐུ་ཉིད་ཀྱི་རྩོམ་ཡིག་དེར་དག་ནོར་དུ་མ་ཞིག་ཡོད་པ་ནི་རྩོམ་ཡིག་དེར་གསལ་བ་ལྟར་ལགས་པས་འདིར་ཐུགས་རྗེའི་ལེགས་འབུལ་མཚོན་བྱེད་དུ་དག་བཅོས་བྱ་དགོས་བསམ་ཀྱང་དུས་ཁོམ་མ་བྱུང་བས་དགོངས་འགལ་མེད་པ་ཞུ།
ཡང་སྐུ་ཉིད་ཀྱི་རྩོམ་ཡིག་དེར་མཆན་འགོད་པ་གཡུ་དྲུག་དཀར་ཞེས་པ་ཞིག་ནས་“རྣམ་རྒྱལ་གྲྭ་ཚང་གི་ཐུགས་རྗེ་ཆེན་པོའི་ལྷ་ཁང་”ཞེས་གཙུག་ལག་ཁང་དེའི་བདག་པོ་ངོ་མ་ སུ་ཞིག་ཡིན་མིན་ཙམ་ཡང་རྒྱུས་ལོན་མ་ཐུབ་པར་རང་བསམ་བདེན་རློམ་གྱིས་“རྣམ་རྒྱལ་གྲྭ་ཚང་གི་”ཞེས་གཙུག་ལག་ཁང་གི་བདག་པོ་རྣམ་རྒྱལ་གྲྭ་ཚང་ཡིན་པར་བྲིས་ཡོད། གལ་ཏེ་སྐུ་ཉིད་ཀྱི་དགོངས་པར་ཐུགས་རྗེ་ཆེན་པོའི་ལྷ་ཁང་དེ་རྣམ་རྒྱལ་གྲྭ་ཚང་གི་ཉེ་འཁྲིས་སུ་ཡོད་པའི་རྒྱུ་མཚན་གྱིས་རྣམ་རྒྱལ་གྲྭ་ཚང་གི་ཡིན་པར་དགོངས་ནས་དེ་ལྟར་བྲིས་ན་མཚན་ཉིད་གྲྭ་ཚང་ཡང་རྣམ་རྒྱལ་གྲྭ་ཚང་གི་ཡིན་པར་ཐལ་ཏེ། མཚན་ཉིད་གྲྭ་ཚང་རྣམ་རྒྱལ་གྲྭ་ཚང་གི་ཉེ་འཁྲིས་སུ་ཆགས་ཡོད་པའིི་ཕྱིར་དང་། གལ་ཏེ་མི་ཤེས་བཞིན་དུ་སྨྲ་སྒོར་ཚོད་འཛིན་གནང་མེད་ན་ནི་ད་ནས་བཟུང་གནད་དོན་འདི་ཚོའི་སྐོར་ལ་དགུན་གྱི་ཁུ་བྱུག་གི་བརྟུལ་ཞུགས་བཟུང་སྟེ་བསྡད་ན་ཤིན་ཏུ་མཛེས་པར་མཐོང་ངོ་། །
གཞན་ཡང་གཙུག་ལག་ཁང་གི་ཤར་སྒོའི་ངོས་སུ་ཕྱག་བྲིིས་གནང་བའི་རིན་ཆེན་ཕྲེང་བ་༼ སྡེ་དགེའི་བསྟན་འགྱུར་གེ ཤོག་གྲངས་ ༡༢༥༽ལས་དྲངས་པའི་“ཇི་སྲིད་སེམས་ཅན་འགའ་ཞིག་ཀྱང་། །གང་དུ་མ་གྲོལ་དེ་སྲིད་དུ། །དེ་ཕྱིར་བླ་ན་མེད་པ་ཡི། །བྱང་ཆུབ་ཐོབ་ཀྱང་གནས་གྱུར་ཅིག །”ཅེས་པའི་ཚིག་བཅད་འདི་སྐུ་ཉིད་ཀྱིས་ནོར་བཅོས་འདི་ལྟར་གནང་ཡོད་དེ་༼ཇི་སྲིད་སེམས་ཅན་འགའ་ཞིག་ཀྱང་། །གང་དུ་མ་གནས་དེ་སྲིད་དུ། །དེ་ཕྱིར་བླ་ན་མེད་པ་ཡི། །བྱང་ཆུབ་ཐོབ་ཅིང་གནས་གྱུར་ཅིག༽ཅེས་བཟོ་བཅོས་གནང་ཁུལ་བྱས་ཡོད། དེ་བས་ན་སྐུ་ཉིད་ལ་བཀའ་འདྲི་ཞུ་རྒྱུར་སྐུ་ཉིད་ཀྱིས་དག་བཅོས་དེ་ལྟར་གནང་བ་དེ་རྒྱ་བོད་ཀྱི་གཞུང་ལུགས་གང་ཞིག་ལ་ཁུངས་གཏུགས་ནས་གསུངས་སམ། ཡང་ན་རྒྱུ་མཚན་དང་དགོས་པ་གང་ཞིག་གཟིགས་ནས་དེ་ལྟར་གསུངས་པ་ཡིན་ནམ། གལ་ཏེ་གཞུང་ལུགས་ཀྱི་རྩ་ཁུངས་མ་ཆོད་པར་ར་ཐོན་ལུག་ཐོན་དུ་སྨྲས་ན་ནི་སྐུ་ཉིད་ཤིན་ཏུ་བླུན་ཏེ་གོང་དུ་དྲངས་པའི་རྣམ་གཞག་ཐམས་ཅད་བཤིག་པར་ཐལ་བའི་ཕྱིར་དང་། གཞུང་ལུགས་ཀྱི་ཁུངས་འདྲེན་བྱ་རྒྱུ་ཡོད་ན་ནི་སྐུ་ཉིད་ཀྱིས་སྟོན་རིགས་པ་ལ་དེ་ལྟར་གང་ཡང་མི་སྣང་བས་རང་བཟོ་ཁོ་ནར་ཟད།
གཞན་ཡང་གོང་དུ་དྲངས་པའི་ཚིག་བཅད་དེའི་ཚིག་རྐང་ཐ་མར་དམིགས་སུ་བཀར་ནས་སྐུ་ཉིད་ཀྱིས་བཟོ་བཅོས་འདི་ལྟར་གནང་ཁུལ་བྱས་ཡོད་དེ་གང་དུ་མ་གྲོལ་ཞེས་པའི་ཚབ་ཏུ་གང་དུ་མ་གནས་ཞེས་དང་། བྱང་ཆུབ་ཐོབ་ཀྱང་ཞེས་པའི་ཀྱང་སྒྲའི་ཚབ་ཏུ་ཅིང་ཡིན་ཚུལ་ནན་བཀོད་གནང་ཡོད། དེ་ལྟར་ཡིན་པའི་རྒྱུ་མཚན་ཁུངས་ལྡན་སྨྲ་རྒྱུ་ཡོད་དམ། འོ་ན་སྐུ་ཉིད་ལ་གཞུང་ལུགས་ཀྱི་རྩ་ཁུངས་སྨྲ་རྒྱུ་མེད་མོད་རང་ཉིད་ཀྱིས་གོ་བ་ལེན་ཕྱོགས་དེ་ལྟར་འཐད་ལྡན་དུ་མཐོང་ནས་སྨྲས་སོ་སྙམ་ནའང་མི་འཐད་དེ། གཞུང་ལུགས་ལ་ཁུངས་གཏུགས་མ་དགོས་པར་རང་ཉིད་ཀྱི་བློ་ནུས་དང་འཚམས་པར་དེ་ལྟར་བཟོ་བཅོས་གནང་དགོས་པར་འདོད་ན་ནི་སྐུ་ཉིད་ཀྱིས་གོ་བ་ལེན་དཀའ་བའི་གཞུང་ལུགས་ཇི་སྙེད་ཅིག་ཡོད་པ་དེ་དག་ཀུན་ཀྱང་རང་འདོད་ལྟར་བཟོ་བཅོས་གནང་དགོས་པར་ཐལ་བས་འདིར་དམིགས་སུ་བཀར་ནས་བརྗོད་དོན་ཅི། གཞན་ཡང་སྐུ་ཉིད་ཀྱིས་ཁུངས་དག་པ་དེ་མ་དག་པར་བཙན་བཅོས་གནང་བའི་ཚིག་ཟིན་ལྟར་བྱས་ན། ཚིག་ཧྲིལ་པོའི་སྟེང་ནས་གོ་བ་ཅི་ཡང་བླང་རྒྱུ་མེད་པ་མ་ཟད། སྨོན་ཚིག་ཅིག་ཡིན་པའི་གོ་བ་རགས་པ་ཙམ་ཡང་རྙེད་དཀའ་བའི་ཕྱིར་རོ། །
བོད་ཀྱི་བརྡ་སྤྲོད་རིག་པའི་གཞུང་ལུགས་ལྟར་བྱས་ན་ཅིང་ཞེས་པ་ནི་ཚིག་ཕྲད་ཅིག་ཏུ་བཞེད་ལ་དེ་ཡང་ལྷག་བཅས་སྟོན་པའི་ཚིག་ཕྲད་ཅིག་ཏུ་མཁས་པ་རྣམས་ཀྱིས་བཞེད། རྒྱུ་མཚན་དེ་བས་ན་བྱང་ཆུབ་ཐོབ་ཀྱང་ཞེས་པའི་ཀྱང་སྒྲའི་ཚབ་ཏུ་ཅིང་སྒྲ་བཙན་སྦྱོར་བྱས་ན་ནི་སྨོན་ཚིག་གི་དོན་སྟོང་བར་གྱུར་རོ།། དེའི་རྒྱུ་མཚན་ནི་ཅིང་སྒྲ་ལྷག་བཅས་ཀྱི་ཕྲད་ཡིན་པ་དང་སྐབས་འདིའི་ཚིག་བཅད་ཀྱི་ཅིང་སྒྲ་དེས་ལྷག་བཅས་ཀྱི་འཇུག་ཡུལ་གང་ཞིག་སྟོན་མིན་བརྟག་ན་མཚམས་སྦྱོར་ལྷག་བཅས་ལས་གཞན་སྟོན་པར་མ་མཐོང་ཞིང་། མཚམས་སྦྱོར་ལྷག་བཅས་ལ་ནང་གསེས་གསུམ་ཡོད་པ་ལས་བྱ་བས་བྱ་བ་འདྲེན་པར་འཇུག་པ་ལས་གཞན་གཉིས་ལ་འཇུག་ཐབས་མེད། དེ་བས་ན་ལྷག་བཅས་སྟོན་པའི་ཕྲད་ཅིང་སྒྲས་སྐབས་འདིར་དོན་ཅི་ཡང་སྟོན་མི་ནུས་སོ།། རིན་ཆེན་ཕྲེང་བ་ལས་དྲངས་པའི་ཚིག་བཅད་ལྟར་བྱང་ཆུབ་ཐོབ་ཀྱང་ཞེས་སྔར་གྱི་ཚིག་ཟིན་ལྟར་བྱས་ན་དོན་སྟོན་ནུས་པར་མ་ཟད། ཚིགས་བཅད་འདི་སྨོན་ཚིག་ཅིག་ཡིན་པ་ཡང་ལམ་སང་རྟོགས་ཐུབ་ལ། སྐབས་འདིའི་ཀྱང་སྒྲའི་ནུས་པས་མི་མཐུན་པའི་ཚིག་རྒྱན་སྟོན་ནོ། ། འོ་ན། ཁ་ཅིག་གིས་སྐབས་འདིའི་ཀྱང་སྒྲའི་ནུས་པས་མི་མཐུན་པའི་ཚིག་རྒྱན་སྟོན་ཚུལ་འདི་གཞུང་ལུགས་ཀྱི་རྒྱབ་རྟེན་ཅི་ཞིག་ཡོད་དམ་ཞེ་ན། རང་ལུགས་སི་ཏུ་འགྲེལ་ཆེན་ལ་གཞུང་ཁུངས་གཏུགས་ནས་བརྗོད་པ་ལས་གཞུང་ལུགས་ཀྱི་ རྒྱབ་རྟེན་གང་ཡང་མེད་པར་བྱུང་རྒྱལ་དུ་ཁོ་བོ་སྨྲ་བར་མི་སྤྲོའོ།།
ཡང་ཁ་ཅིག་གིས་ཀྱང་སྒྲའི་ནུས་པས་མི་མཐུན་པའི་ཚིག་རྒྱན་མི་སྟོན་པར་སྨྲ་སྒོ་ལས་ཡང་སྒྲ་བསྣན་པའི་དོན་ལ་འཇུག་ཚུལ་གསུངས་པ་ལྟར་སྐབས་འདིའི་ཀྱང་སྒྲས་ཀྱང་ཡང་སྒྲ་བཞིན་དུ་བསྣན་པའི་དོན་ལ་འཇུག་གོ་སྙམ་ནའང་མི་འཐད་དེ། སི་ཏུ་འགྲེལ་ཆེན་གྱི་གཞུང་དུ་ཀྱང་སྒྲ་བསྣན་པར་མི་འཇུག་པ་ལེགས་བཀག་ཟིན་པས་དེས་གོ་ཆོད་པར་བྱས་ཏེ་འདིར་སླར་ཡང་བཀག་དོན་མ་མཆིས་སོ།།
ཡང་སྐུ་ཉིད་ཀྱིས་ཡི་གེ་དག་པ་དེ་མ་དག་པར་བཅོས་ནས་རང་མདོག་དམར་རྗེན་དུ་བསྟན་པ་དེའི་གཤམ་འོག་དེ་མ་ཐག་ཏུ་ཡང་བསྐྱར་དུག་སྦྲུལ་གྱིས་གླ་རྩིའི་དྲི་ཚོར་བ་ལྟར་“ཏཱ་ལའི་བླ་མའི་དགེ་རྩ་”ཞེས་མིག་གི་ལྟ་མི་ཕོད་པ་ཞིག་བྲིས་འདུག་ཅེས་འུད་སྒྲོག་གནང་འདུག དེ་ནི་སྐུ་ཉིད་ཀྱིས་དགེ་རྩ་ཞེས་པ་དེ་མི་གྲོངས་ཚར་བའི་རྗེས་འཇུག་གི་དགེ་རྩ་ཁོ་ནའི་དོན་དུ་བཀྲལ་བ་ཁོ་ནས་ལན་ཏེ་གཞན་ནི་བློ་གྲོས་ཀྱི་ནོར་དང་ལྡན་པ་སུ་ཞིག་གིས་ཀྱང་དེ་ནི་ནོར་འཁྲུལ་ཞིག་ཏུ་མཐོང་མི་སྲིད་ལ། དོན་དངོས་ཀྱི་ཆ་ནས་ཀྱང་མཚན་བྱང་དེ་ནི་༸གོང་ས་༸སྐྱབས་མགོན་ཆེན་པོ་མཆོག་གིས་དགོངས་པ་རྒྱ་ཆེར་བཞེས་ཏེ་དེ་ལྟར་མཚན་བྱང་དུ་བཏགས་པ་ཞིག་ཡིན་པ་ནི་སྐུ་སྒེར་ཡིག་ཚང་གི་དྲ་རྒྱར་བལྟས་ན་གནག་རྫིས་ཀྱང་རྟོགས་སླ་བ་ཞིག་རེད།
སྤྱིར་དགེ་རྩ་ཞེས་པ་ནི་དགེ་བའི་རྩ་བ་ཞེས་པ་དེ་ཚིག་བསྡུས་གནང་བ་ལས་གྲུབ་པའི་མིང་ཚིག་ཅིག་ཡིན་ལ། དེའི་གོ་དོན་ནི་གྲོངས་ཟིན་པའི་རྗེས་འཇུག་གི་དགེ་རྩ་ཁོ་ནར་གོ་རྒྱུ་མིན་པར་འཚོ་ཞིང་གནས་པའི་མིའི་རིགས་ཀྱི་དགེ་རྩར་ཡང་གོ་ཆོག་སྟེ་བཟང་སྤྱོད་སྨོན་ལམ་ནང་། བདག་གི་དགེ་བའི་རྩ་བ་འདི་ཀུན་ཀྱང་། །བཟང་པོ་སྤྱོད་ཕྱིར་རབ་ཏུ་བསྔོ་བར་བགྱི། ཞེས་དང་། སྤྱོད་འཇུག་སྨོན་ལམ་ནང་། བདག་གིས་བྱང་ཆུབ་སྤྱོད་པ་ལ། །འཇུག་པ་རྣམ་པར་བརྩམས་པ་ཡི། །དགེ་བ་གང་དེས་འགྲོ་བ་ཀུན། །བྱང་ཆུབ་སྤྱོད་ལ་འཇུག་པར་ཤོག །ཅེས་དང་། གཞན་ཡང་གནས་བརྟན་ཕྱག་མཆོད་ནང་། བདག་གཞན་དགེ་བའི་རྩ་བ་འདི་ཡི་མཐུས། །ཕན་བདེའི་འབྱུང་གནས་བསྟན་པ་འཕེལ་གྱུར་ཅིག །ཅེས་སོགས་ཀྱི་སྨོན་ཚིག་ཇི་སྙེད་ཅིག་ཡོད་པ་འདི་དག་ཀུན་ཀྱང་སྐུ་ཉིད་ཀྱིས་གོ་བ་ལེན་སྟངས་ལྟར་བྱས་ན་འདི་དག་དགེ་རྩ་མིན་པར་ཐལ་བས་མི་འདོད་བཞིན་དུ་སྐྱོན་གྱིས་རེག་པར་འགྱུར་རོ། །
དེ་བས་ན་གནད་དོན་ཕྱི་མ་འདི་ནི་སྐུ་ཉིད་ཀྱི་བསམ་བློའི་གོ་རྟོགས་ཀྱི་ནུས་པས་མ་འདང་བ་ཞིག་ཡིན་སྟབས། སྐུ་ཉིད་ཀྱིས་དོགས་སློང་བྱས་པ་ནི་སྨྲ་བརྗོད་རང་དབང་ལྡན་པའི་མང་གཙོའི་སྤྱི་ཚོགས་འདིའི་ནང་དེ་ལྟར་དོགས་སློང་བྱེད་ཆོག་པ་དང་བྱེད་རུང་བ་ཞིག་ཀྱང་རེད། དེ་ལྟ་ནའང་གོང་གི་ཚིག་བཅད་དག་པ་དེ་མ་དག་པར་བཙན་བཟོས་བྱས་པ་ནི་ཤིན་ཏུ་མི་འོས་པ་ཞིག་ཡིན་ལ་སྐུ་ཉིད་ལ་རྒྱུ་མཚན་དཔང་རྟགས་གང་ཡང་མེད་པར་རང་བསམ་བདེན་རློན་གྱིས་བབ་ཅོལ་དུ་སྐྱོན་བརྗོད་དེ་ལྟར་བྱེད་ཕོད་པའི་ཐུགས་སྟོབས་ལྡན་ན། རང་སྐྱོན་ངོས་ལེན་བྱ་ཕོད་པའི་ཐུགས་སྟོབས་ཀྱང་དེ་དེ་བཞིན་མཆིས་ངེས་པས་སྐུ་ཉིད་ཀྱིས་བཙན་བཅོས་གནང་བའི་ཚིག་ཟིན་དེ་དག་གཞུང་ལུགས་ཀྱི་ཁུངས་སྐྱེལ་ར་ སྤྲོད་བྱ་རྒྱུ་ཡོད་ན་དེ་ལྟར་དང་། དེ་ལྟར་མ་མཆིས་ན་སྐུ་ཉིད་ཀྱི་ཕྱག་ཟུང་གི་པད་མོར་མགུལ་དར་དཀར་གཙང་ཞིག་བསྣམས་ཏེ་སྐུ་སྒེར་ཡིག་ཚང་གི་ལས་སྣེ་ལྷན་རྒྱས་དང་། སྐུ་བཅར་རྣམ་གྲྭ་མཁན་སློབ་འདུས་པ་རྒྱ་མཚོའི་དབུས་སུ་སྒོ་གསུམ་གུས་ཕྱག་སྔོན་དུ་བཏང་བའི་ཐོག་ནས་མཐོལ་བཤགས་འབུལ་རྒྱུའི་ཐུགས་སྟོབས་ཤིག་མ་མཆིས་རུང་། དུས་བབ་དྲ་རྒྱའི་ཐོག་ནས་སྐུ་སྒེར་ཡིག་ཚང་དང་རྣམ་རྒྱལ་གྲྭ་ཚང་ལ་རང་སྐྱོན་ངེས་ལེན་དང་དགོངས་སེལ་ཡོངས་ཁྱབ་ཏུ་མ་གནང་ན། གཅིག་ནས་སྐུ་ཉིད་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་ཁྱད་གསོད་དང་སྐུར་འདེབས་བྱས་པར་མཚོན་ལ། གཉིས་ནས་བཟང་སྤྱོད་ཀྱི་འགན་འཁྲི་དང་ཡོངས་སུ་འགལ་ཡོད། གསུམ་ནས་རྩེ་རྣམ་རྒྱལ་གྲྭ་ཚང་གི་གྲྭ་མང་ཡོངས་ལའང་མཚན་དམོད་དང་མཐོང་ཆུང་བཏང་བར་ཡང་མཚོན་པས་དེ་ནི་དག་ཐབས་མེད་པའི་ནག་ཉེས་ཆེན་པོ་ཞིག་རེད་ལ། མི་རབས་ཕྱི་མ་ཚོར་ཡང་མིག་དཔེ་ངན་སྟོན་བྱས་པ་ཞིག་ཀྱང་རེད།
དེ་བས་ན་རང་སྐྱོན་ངོས་ལེན་ཕོད་པའི་ཐུགས་སྤོབས་ནི་མི་གཞི་ཚད་ལྡན་ཡིན་མིན་གྱི་ཚད་གཞི་འཇལ་བྱེད་ཀྱི་ཚངས་ཐིག་དེ་ཡིན་སྟབས། དོན་མེད་སྐྱོན་བརྗོད་བྱ་ཕོད་པའི་ཐུགས་སྤོབས་ལས་ཀྱང་གལ་གནད་དུ་འཛིན་དགོས་པ་ཞིག་རེད། དེ་བས་ན་རང་སྐྱོན་ངོས་ལེན་བྱེད་པ་ནི་དཔྱོད་ཤེས་མིག་རྒྱང་གི་བློ་མིག་ལྡན་པ་རྣམས་ཀྱི་ཐབས་ལ་མཁས་པའི་མཛངས་སྤྱོད་ཅིག་རེད་ལ། རང་ཉིད་གཡང་གཟར་ལས་སྐྱོབ་བྱེད་ཀྱི་ཐར་ལམ་ཉག་ཅིག་ཡིན་པའང་སྐུ་ཉིད་ཀྱིས་མ་ བརྗེད་ཐུགས་བཅངས་གནང་རོགས། དེ་ལྟར་སྐུ་ཉིད་ཀྱིས་ཟེར་རྒྱུས་ཕོངས་པའི་རང་རྟགས་ཟང་མར་བསྟན་པའི་ད་རེས་ཀྱི་ཐལ་སྤྱོད་འདིའི་ཉམས་མྱོང་ལ་ཕྱོགས་བསྡོམས་ཡང་དག་བྱས་པ་བརྒྱུད་སླད་ཕྱིན་ཆད་དེ་ལྟར་མི་ཡོང་བ་ནི་གུས་པས་ཁྱེད་ལ་བཅོལ་བའི་རེ་བ་ཉག་ཅིག་ཡིན།
གོང་འཁོད་རྩོམ་ཡིག་འདི་ནི་གུས་པ་རང་ཉིད་སྒེར་གྱི་ལྟ་ཚུལ་ལས་རྣམ་རྒྱལ་གྲྭ་ཚང་གཞུང་གི་ལྟ་ཚུལ་ཡིན་པའི་ཁྱབ་པ་མེད་དེ་གུས་པ་རང་ཉིད་སྒེར་གྱིས་བྲིས་པ་ཁོ་ནའི་ཕྱིར་རོ།།
གཞུང་ལུགས་ཀྱི་ཁུངས་མི་འདྲ་བ་ཡང་ཡོད་སྲིད་པས། གང་ལྟར་དཔྱད་པ་མཐར་ཕྱིན་པ་ཅིག་བྱས་ནས་ཡོང་ཁུངས་ར་སྤྲོད་ཆ་ཚང་ཅིག་བྱུང་ན་ཀུན་ལ་ཕན་ཐོག་ཆེ། དགེའོ། །
གམ་བཅར་པའི་དཔྱད་རྩོམ་འདིར། ཐོག་མར་གུ་ཡངས་དང་ཡར་ཐོན་གྱི་རྣམ་པ་གསལ་པོ་འདུག ཡིན་ན་ཡང་མཇུག་དེར་རང་རྒྱལ་གཞན་ཕམ་གྱི་ཚིག་ཚོགས་ཀྱང་མི་ཉུང་བ་ཞིག་སྤེལ་འདུག གང་ལྟར་ངས་བཤད་འདོད་པ་ཞིག་ལ། གམ་བཅར་བས་༼བཞུགས་ཁྲིའི་ལྟག་རྒྱབ་ཀྱི་རྩིག་ངོས་སུ་བཞེངས་སྐྲུན་ཞུས་པའི་དུས་འཁོར་གྱི་ལྡེབས་རིས། དེ་བཞིན་དུས་འཁོར་གྱི་སྐུ་ཐང་རེ་ཟུང་གི་བཟོ་བཀོད་བཅས་ནི་སྐུ་ཉིད་ཀྱིས་དུས་འཁོར་གྱི་གཞུང་ལུགས་དང་འགལ་ཚུལ་གོ་བརྡ་མཛུབ་བཙུགས་སུ་གནང་དོན་ལྟར། དཔུང་པ་བཅུ་གཉིས་ལས་ཉེར་བཞི་མེད་པའི་བདེན་དངོས་ནི་སྐུ་ཉིད་ཀྱིས་ཐུགས་ཁྲལ་མ་གནང་གོང་ནས་སྐུ་བཅར་རྣམ་རྒྱལ་གྲྭ་ཚང་གིས་སྔོན་ཚུད་ནས་ཤེས་རྟོགས་དང་རྒྱུས་ལོན་བྱུང་ཡོད་ལ། མི་འགྱང་བར་བཟོ་བཅོས་གནང་རྒྱུའི་གོ་བསྡུར་ཡང་བྱུང་ཡོད། ༽ཅེས་པ་དེར་ད་དུང་དོགས་པ་ཞིག་འདུག དུས་འཁོར་གྱི་སྐུ་བརྙན་དེ་ཁལ་ཁ་རྗེ་བཙུན་དམ་པས་བཞེངས་ཏེ། ༸མགོན་པོ་༸མཆོག་ལ་ཕུལ་བ་ཞིག་ཡིན་ན་དོ་དོ་ཏན་ཏན་བྱེད་པ་ལས་བྱུང་རྒྱལ་དུ་ཁྲལ་འཁྱོལ་ཙམ་ཞིག་ཁྱོན་ནས་གནང་གི་མ་རེད། གཅིག་བྱས་ན་གཞུང་ལུགས་སོ་སོ་ནས་གསུང་ཚུལ་མི་འདྲ་བ་ཡོད་པའི་དབང་གིས། ཆོས་རྗེ་ཇོ་ནང་གི་གཞུང་ལུགས་ལྟར་བྱས་ཏེ་བཞེངས་པ་ཞིག་ཀྱང་ཡིན་ཤས་ཆེ། གང་ལྟར་ལམ་སང་ནོར་འདུག་ཅེས་སྐྱོན་བརྗོད་བྱེད་མཁན་གྱིས་སྐྱོན་བརྗོད་ཆོག་ཆོག་དང་། ནོར་འདུག་ཅེས་ཁས་ལེན་མཁན་ཚོས་ཀྱང་ཁས་ལེན་ཆོག་ཆོག་ཅིག་ཨེ་ཡོད། དཔྱད་པ་མི་ཉུང་ཐག་གཅོད་མི་སྔ། །ཞེས་གསུང་རྒྱུན་ལ་ཡོད་པ་བཞིན་ད་དུང་ཞིབ་འཇུག་བྱེད་དགོས་ཀྱི་འདུག དཔེར་ན། ཡོངས་གྲགས་ལ་མེད་པའི་མགོན་པོ་ཀླུ་སྒྲུབ་ཀྱི་ཞལ་ཐང་ཕྱག་ན་རྡོ་རྗེ་བསྣམས་པ་ཞིག་ཀྱང་དེང་སང་མཇལ་རྒྱུ་འདུག དེ་ཡང་ནོར་བ་རེད་ཅེས་སུ་ཞིག་གིས་བརྗོད་ཐུབ། མ་ཟད་ཇོ་ནང་གི་གཞུང་ལུགས་ནས་གསུངས་པའི་དུས་འཁོར་སྐོར་ལ་བརྟག་དཔྱད་ཉིད་ནས་མ་གནང་བར་འགྲིག་དང་ནོར་གྱི་ཐག་ཆོད་བྱས་ན་རན་པོ་མི་འདུག་པས་ད་དུང་ཡང་དཔྱད་ཞིབ་གནང་རྒྱུ་གལ་ཆེ།།
ཡག་པོ་འདུག དེ་ཡང་ཚོགས་བསགས་གི་བྱ་བ་ཞིག་ཡིན་ལ་རིག་གཞུང་སྲུང་སྐྱོབ་གིས་ངོ་བོ་གཙང་མ་ཞིག་ཡིན
བློ་བཟང་ཡེ་ཤེས་ལགས་ཀྱི་རྣམ་་རྒྱལ་གྲྭ་ཚངགི་དུས་འཁོར་གསེར་སྐུ་བཟོ་བཅོས་བྱེད་རོགས་ཞེས་པ་དེ་ངོ་མ་ནོར་ཡོད་ཡག་པོ་རེད། ཐུགས་རྗེ་ཆེ་ཞུ། འོན་ཀྱང་གསལ་བསྒྲགས་བྱས་པ་དེའི་དུས་ཚོད་དེ་དག་དག་ཞིག་རེད་མེད་པ་འདྲ་བོ་ཞིག་མཐོང་སོང་། གང་ཡིན་ཟེར་ན་ཁོང་གི་སྤྱི་ཟླ་༥བའི་༢༩ དང་སྤྱི་ཟླ་དྲུག་པའི་༣༠ཞེས་ནོར་བཅོས་བྱས་པ་དེ་ཡང་དོག་པ་ཞིག་རེད་གསལ་བསྒྲགས་བྱས་པ་དང་གསེར་སྐུ་མཐོང་བ་རྣམ་རྒྱལ་མཁོན་པོ་མཇལ་བ་དག་གི་པར་ལ་ཟླ་གཅིག་འགོར་འདུག
གམ་བཅར་བ་་་་་བསྟན་འཛིན་དགའ་བ་ལགས།
༸ཁལ་ཁ་རྗེ་བཙུན་པ་ལ་སྐྱོན་འཛུགས་མ་བྱེད་རོགས་གནང་། ཁོང་གིས་དད་པ་དམ་ཚིག་བླ་ན་མེད་པས་གོང་ས་མཆོག་ལ་ཞབས་བསྟན་དུ་ཕུལ་ན་ཁྱེད་ཅག་གིས་ཁོང་ལ་རྣམ་གྲྭ་ཚང་གི་སྐྱོན་ཞྭ་གཡོག་གི་ཡིན་ནམ།
གལ་ཏེ་ཇོ་ནང་བ་ཞིག་གིས་འདིས་འགན་ཁུར་ཡོད་ན་ཞབས་འདྲེན་དེ་བཞག་སྲིད་གི་མ་རེད། ཡིད་མ་ཆེས་ན་ཇོ་ནང་བའི་དགོན་པ་དག་ཏུ་བལྟ་རུ་སོང་དང་ཤེས།
ཁྱོད་ཀྱིས་སྐྱག་འགོ་གཉང་བཏུམ་གིས་རང་སྐྱོན་འགེབས་ཐབས་ཀྱི་གཏམ་མ་བཤད་ན་མཛེས་གི་རེད། དུས་འཁོར་ལ་དཔུང་པ་བཅུ་གཉིས་ལས་ཉེར་བཞི་མེད་པ་རྣམ་རྒྱལ་གྲྭ་ཚང་གིས་སྔོན་ཚུད་ནས་ཤེས་རྟོགས་དང་རྒྱུས་ལོན་བྱུང་ཡོད་ན་ལོ་དེ་འདྲེའི་མང་བོ་ཞིག་ལ་ཁུང་མེད་ཀྱི་འདྲེ་འསྐུ་འདྲ་བོ་བསམ་བཞིན་དུ་བཞག་པ་ཡིན་ནམ། དང་བོ་བཟོ་དུ་ནས་མ་ཤེས་ན་ཡར་འཇོག་པའི་ཉིན་མོ་མ་ཤེས་པ་ངོ་མི་ཚ་བར་ད་དུང་གཞན་ལ་ལག་པ་ཕྱི་རྒྱུ་ཡིན་ནམ།
མི་ལོ་དུ་མའི་རང་དུ་འཛམ་གླིང་མི་མང་གི་མདུན་སར་ཞབས་འདྲེན་བྱས་པའི་ལེ་ལན་སྦྱིན་བདག་ལ་འགེལ་རྒྱུ་ཡིན་ནམ། ཁྱེད་ཚོའི་ངན་མཚང་རི་འདྲ་བོ་དེ་ ཇོ་ནང་ཁལ་ཁ་རྗེ་བཙུན་དམ་པའི་སྦྱིན་བདག་བྱས་པ་ལ་འགེལ་ཐབབས་བྱེད་པ་ནི་ངོ་ཚ་མི་ཤེས་པའི་གཏམ་ཡིན་པ་སུ་ཡིས་ཡང་ཤེས་ཐུབ།
ཁྱོད་ཀྱིས་གཞན་གྱི་ཡིག་སྐྱོན་འཕྲན་བུའི་རིགས་ཚུན་ཆད་ཀྱི་གཞན་སྐྱོན་ཁབ་ཙམ་ལ་ཡང་སྐྱོན་བརྗོད་ནས་རང་སྐྱོན་རི་བོ་འདྲ་བོ་དེ་འགེབས་ཐུབ་བསམ་གི་ཡོད་དམ། དེ་ནི་ཁྱོད་ཀྱིས་རྒྱ་ཆེའི་གཟིགས་མཁན་ཡོངས་རྫོགས་མགོ་སྒོར་གཏོང་ཐུབ་པའི་ཀུན་སློང་དང་རེ་བ་བྱེད་པ་ཀུན་གྱིས་ཤེས་སླ། རང་སྐྱོན་ངོས་མ་ལེན་ཡང་གཞན་ལ་མ་འགེལ་རོགས་གནང་།
སྡེ་བསྟན་༼ཀེ་པའི་ལྡེབ༡༢༦༽སྐྱེས་རབས་ཀྱི་སྤྲིངས་ཡིག་གི་ཁོངས་སུ་བཞུགས་པའི་རིན་འཕྲེང་གི་རྩ་བར། ཇི་སྲིད་སེམས་ཅན་འགའ་ཞིག་ཀྱང་། །གང་དུ་མ་གྲོལ་དེ་སྲིད་དུ། །དེ་ཕྱིར་བླ་ན་མེད་པ་ཡི། །བྱང་ཆུབ་ཐོབ་ཀྱང་གནས་གྱུར་ཅིག །ཅེས་འབྱུང་ཞིང་། དེ་ནི་གལ་ཏེ། སེམས་ཅན་རྣམས་སངས་རྒྱས་མ་ཐོབ་ན་བདག་སངས་རྒྱས་ཐོབ་པའི་སྐལ་པ་ཅན་དུ་གྱུར་ཀྱང་ཕྱིར་བསྣུལ་ཏེ། སེམས་ཅན་རྣམས་གྱི་ཕྱིར་བྱང་སེམས་ཀྱི་རྟེན་ཏུ་གནས་པ་འཇམ་དཔལ་དབྱངས་ལྟ་བུར་གྱུར་ཅིག ཅེས་པ་སྟེ། འདི་ལ་དཔེ་མེད་པ་རྫི་བོ་ལྟ་བུའི་སེམས་བསྐྱེད་ཅེས་བྱ་ཞིང་། དེ་ནི་སེམས་བསྐྱེད་ཚད་མཐོ་ཤོས་ཡིན་སྟབས་ དེ་ལྟར་ངག་ཏུ་བརྗོད་དེ་སྨོན་ལམ་བཏབ་པའི་ཕན་ཡོན་ཡང་རིན་ཆེན་ཕྲེང་པའི་སྔར་གྱི་ཚིགས་བཅད་དེ་གའི་མཇུག་ཏུ།དེ་ལྟར་བརྗོད་པའི་བསོད་ནམས་གང་། །གལ་ཏེ་དེ་ནི་གཟུགས་གྱུར་ན།་།གང་གཱའི་བྱེ་མ་སྙེད་ཀྱི་ནི། །འཇིག་རྟེན་ཁམས་སུ་ཤོང་མི་འགྱུར། །ཞེས་དམིགས་བསལ་ད་མགོན་པོ་ཀླ་ཉིད་ཀྱིས་གསུངས་སོ། ། དེས་ན་དེའི་ཐད་གཡུ་དྲུག་དཀར་ལགས་ལ་ཐལ་མོ་སྦྱོར་རེ་ཆེར་མི་འདུག་པས་དེའི་ངོས་ལེན་དགོས་སར་ངོས་ལེན་དགོས་ངེས་རེད། ད་དུང་དོགས་པ་ཡོད་ན་དཔེ་མཛོད་དུ་ཕེབས་ནས་དཔེ་བསྡུར་བསྟན་འགྱུར་ལ་གཟིགས་དགོས། ངས་འདི་ལྟར་བྲིས་པ་ནི་དོན་ངོ་མ་གོ་བརྡ་སྤྲོད་པའི་ཆེད་ཙམ་ཡིན་ལགས། འོན་ཀྱང་གམ་གཅར་པས་བླ་བཟང་ཡེ་ཤེས་ལ་སྒེར་གྱི་ཟུག་གཟེར་གཅོག་ཆེད་རེད་ཟེར་བ་ནི་ཤེས་ཡོན་པའི་རང་དབང་གི་གླེང་སློང་ལ་འཇིགས་སྐུལ་དུ་འགྱུར་སྲིད་ཅིང་། ཁོང་གི་ངོས་ནས་ཀྱང་ཐུགས་ཀྱི་ཟུག་གཟེར་སྟངས་འཛིན་མ་ཐུབ་པའི་རྟགས་རེད་པས། གང་ལྟར་དེར་ཡང་ངོས་ལེན་ཡོད་པ་དགོས། གཡུ་དྲུག་དཀར་གྱི་ས་ནས་རྒྱལ་ཁ་ཆུང་ཆུང་ཞིག་རག་པ་དེས་རྫིག་ར་བསྐྱེད་ནས་ཐུགས་མ་བདེ་བ་སེལ་བར་ཁ་སབ་བྱས་ཡོད་ཀྱང་དེས་ཀྱང་དོན་ལ་ཕན་མི་ཐོགས་པ་ཡིན། སྐད་ཆ་མང་སོང་། དགོངས་དག
༼ དཔུང་པ་བཅུ་གཉིས་ལས་ཉེར་བཞི་མེད་པའི་བདེན་དངོས་ནི་སྐུ་ཉིད་ཀྱིས་ཐུགས་ཁྲལ་མ་གནང་གོང་ནས་སྐུ་བཅར་རྣམ་རྒྱལ་གྲྭ་ཚང་གིས་སྔོན་ཚུད་ནས་ཤེས་རྟོགས་དང་རྒྱུས་ལོན་བྱུང་ཡོད་ལ། མི་འགྱང་བར་བཟོ་བཅོས་གནང་རྒྱུའི་གོ་བསྡུར་ཡང་བྱུང་ཡོད།༽
དེ་ལྟར་སྔོན་ཚུད་ནས་མཁྱེན་ཡོད་ན་སྐྱོན་བརྗོད་བྱེད་མཁན་ཞིག་ལ་བསྒུག་བསྡད་པ་ཡིན་ནམ། གནད་དོན་དེ་མཁྱེན་ནས་དུས་ཡུན་ཅི་ཙམ་སོང་ཡོད། མི་འགྱང་བར་བཟོ་བཅོས་གནང་རྒྱུའི་གོ་བསྡུར་ག་དུས་གནང་། བློ་བཟང་ཡེ་ཤེས་ཀྱིས་ཤེས་པའི་སྔ་ཉིན་དེར་རམ་ཡང་ན་་་་་་་་་་་་་་་་།
༼གཅིག་བྱས་ན། སྐུ་ཉིད་ཀྱིས་གནས་ཚུལ་འདི་ཤེས་རྟོགས་བྱུང་སྟེ་གོ་སྐབས་དམ་འཛིན་གྱིས་རང་ཉིད་སྐུ་སྒེར་གྱི་ཟུག་གཟེར་གཅོག་ཐབས་བྱས་པ་ཞིག་ནི་མིན་ཤས་ཆེ།༽
སྐད་ཆ་དེ་ཡག་པོ་ཞིག་རྩ་བ་ནས་མ་རེད། སྐད་ཆ་འདིས་འགྲེལ་བཤད་མི་དགོས་པའི་ཟུར་དང་ངོས་མང་པོ་ཞིག་གསལ་བོར་བསྟན་འདུག
༼གོང་འཁོད་རྩོམ་ཡིག་འདི་ནི་གུས་པ་རང་ཉིད་སྒེར་གྱི་ལྟ་ཚུལ་ལས་རྣམ་རྒྱལ་གྲྭ་ཚང་གཞུང་གི་ལྟ་ཚུལ་ཡིན་པའི་ཁྱབ་པ་མེད་དེ་གུས་པ་རང་ཉིད་སྒེར་གྱིས་བྲིས་པ་ཁོ་ནའི་ཕྱིར་རོ།།༽
ཁྱེད་རང་སྒེར་གྱིས་བྲིས་པ་ཁོ་ན་ཡིན་ན་ཁྱེད་རང་སྒེར་གྱི་ལྟ་ཚུལ་ལས་རྣམ་རྒྱལ་གྲྭ་ཚང་གཞུང་གི་ལྟ་ཚུལ་ཡིན་པས་ཁྱབ་པ་མེད་པར་གྱུར་ཅིག
ད་དུང་༼ཡིན་པའི་ཁྱབ་པ་མེད་༽ཅེས་པའང་ཡིན་པས་ཞེས་བཅོས་ན་འཐད་དོ།།
གམ་བཅར་བ་བསྟན་འཛིན་དགའ་བ་ལགས་ལ་ ཞུ་རྒྱུ་
བོད་མི་སྐྱིད་སྡུག་མཉམ་མྱོང་ཟེར་བ་དེས་ འཆན་གནད་དོན་ཅན་ཞིག་བཀོད་འདུག་པས་ ལེན་ཞིག་སྐྱོན་ཐུབ་པ་མིན་འདུག་གམ་།།
གུས་པར་འོས་པའི་སྐུ་ཞབས་གམ་བཅར་བ་ལགས། སྐུ་ཉིད་ཀྱིས་རྒྱུ་མཚན་ལྟར་སྣང་གི་རི་ལ་དོན་མེད་ཚིག་ཚོགས་ཀྱི་ཚེར་ཕུང་ཞིག་བསྐྲུན་རྗེས་རྒྱལ་རྔ་རྡུང་བ་སྔ་དྲགས་སོང་། རིན་ཆེན་ཕྲེང་བའི་ནང་གི་ཇི་སྲིད་སེམས་ཅན་འགའ་ཞིག་ཀྱང་། ། གང་དུ་མ་གནས་དེ་སྲིད་དུ།། དེ་ཕྱིར་བླ་ན་མེད་པ་ཡི།། བྱང་ཆུབ་ཐོབ་ཅིང་གནས་གྱུར་ཅིག་ཞེས་པའི་ཚིག་དེའི་དོན་ཁྱེད་ཀྱི་རྣམ་དཔྱོད་ཀྱི་ཡུལ་ལས་འདས་ཡོད་ངེས་པས་དང་པོར་ངས་ཁྱེད་ལ་ཚིག་དེའི་དོན་འཆད་རྒྱུ་ཡིན་པས་ལག་གཉིས་ཐལ་མོ་སྦྱར་ནས་ཉོན་ཅིག ནམ་མཁའ་ཇི་སྲིད་ཀྱི་བར་ཏུ་སེམས་ཅན་ཐམས་ཅད་སྨྲོས་ཅི་དགོས། འགའ་ཞིག་གམ་རེ་ཟུང་ཡིན་ཀྱང་གང་གི་འཐོབ་བྱ་མཐར་ཐུག་གི་མྱང་འདས་ལ་མ་གནས་པ་དེ་སྲིད་དུ། སེམས་ཅན་དེ་དག་གི་ཕྱིར་དུ་བདག་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་ཅིང་སེམས་ཅན་དེ་དག་གི་ཆེད་དུ་ནམ་མཁའ་ཇི་སྲིད་ཀྱི་བར་དུ་བདག་གནས་པར་གྱུར་ཅིག འདི་ནི་རིན་ཆེན་ཕྲེང་བའི་ཚིག་དེའི་དོན་འགྲེལ་ཡིན། གལ་ཏེ་ང་ཡང་ཁྱེད་རང་ལྟར་ཚིག་ཤོམ་ལ་མཉེས་མཁན་ཞིག་ཡིན་ཚེ་ཚིག་འདི་ཁོ་ནའི་སྟེང་ནས་ལམ་རིམ་ཞིག་འཆད་ཆོག་མོད། ང་རང་ཚིག་ཤོམ་ལ་དགའ་བོ་མེད་པ་དང་གསེར་ལས་དཀོན་པའི་དུས་ཚོད་སྟོང་པ་དེ་ཁྱེད་ལ་ཤག་འགྱེད་ནས་འཕྲོ་བརླག་གཏོང་འདོད་མེད་པས་འདི་ཙམ་གྱིས་ཆོག་པར་བྱ། སྐབས་འདིར་ཁྱེད་ཀྱིས་ཚིག་རྐང་ཐ་མའི་ཅིང་སྒྲ་དེ་ལྷག་བཅས་ཡིན་མིན་དང་ལྷག་བཅས་གསུམ་ལས་གང་ཡིན་ཀྱང་བདེ་ལེགས་ཏུ་རྟོགས་ཐུབ་པས་དོན་མེད་ཚིག་ཚོགས་ཀྱི་ཉོག་མི་དཀྲུག་པར་བྱ། ཁྱེད་ལྟར་ན་ཚིག་རྐང་ཐ་མ་དེའི་དོན་ཆུབ་ཐོབ་ན་ཡང་གནས་པར་གྱུར་ཅིག་ཟེར་དགོས་ལ། དེ་ལ་གོ་རྒྱུ་ཅི་ཡང་མེད།
སྐུ་ཞབས་གམ་བཅར་བ་ལགས། ཚིག་གཅིག་བཤད་ན་༧གོང་ས་མཆོག་གིས་ཅིག་ཅིག་ཅིག། ཚིག་གཉིས་བཤད་ན་༧གོང་ས་མཆོག་གི་ཉིག་ཉིག་ཉིག སྐད་ཆ་དེ་མཚམས་འཇོག་རོགས། ༧གོང་ས་མཆོག་དང་ངེད་གཉིས་ཀྱི་བགྲོ་གླེང་བར་འབྲེལ་བ་ཅི་ཡང་མེད། དོན་དངོས་ཀྱི་ཆ་ནས་ཀྱང་མཚན་བྱང་དེ་ནི་༸གོང་ས་༸སྐྱབས་མགོན་ཆེན་པོ་མཆོག་གིས་དགོངས་པ་རྒྱ་ཆེར་བཞེས་ཏེ་དེ་ལྟར་མཚན་བྱང་དུ་བཏགས་པ་ཞིག་ཡིན་པ་ནི་སྐུ་སྒེར་ཡིག་ཚང་གི་དྲ་རྒྱར་བལྟས་ན་གནག་རྫིས་ཀྱང་རྟོགས་སླ་བ་ཞིག་རེད། གོང་གི་འདི་ཁྱེད་ཀྱི་སྐད་ཆ་རེད། སྐུ་སྒེར་ཡིག་ཚང་གི་གི་དྲ་ངོས་སུ་ངས་ཅི་ལྟར་ཅེར་ཀྱང་། བསྔོ་རྟེན་བྱུང་འཛིན་གྱི་མིང་དེ་༧གོང་ས་མཆོག་གིས་དགོངས་པ་རྒྱ་ཆེར་བཞེས་ཏེ་བཏགས་པ་ཞིག་རེད་ཅེས་པ་ཞིག་མཐོང་མ་སོང་མོད། དེ་ནི་ངས་མ་མཐོང་བ་ཙམ་ལས་ཁྱེད་ཀྱིས་སྐུར་འདེབས་བྱས་པ་ཡིན་མི་སྲིད། རྒྱུ་མཚན་ནི་ཁྱེད་གམ་བཅར་བ་ཡིན་པས་སོ།
ཁྱེད་ཀྱིས་སྨོན་ཚིག་ཁ་ཤས་ཤིག་དྲངས་ནས་དགེ་རྩ་ཞེས་པ་དེར་འདས་གསོན་གཉིས་ཀྱི་དགེ་རྩ་ཡོད་པར་བཙན་གྱིས་སྒྲུབ་ཁུལ་བྱས་ཡོད་མོད། ཁྱེད་ལྟར་ན། གོང་དུ་བརྗོད་པའི་དགེ་རྩ་དེ་༧གོང་ས་མཆོག་གི་དགེ་བའི་རྩ་བར་འཇུག་པ་ལས་འོས་མེད་ལ། སྐབས་འདིར་བསྔོ་རྟེན་ལས་ཁུངས་དེ་འམ། ཡང་ན་གཤིན་གསོན་གྱི་ཆེད་དུ་ཕུལ་བའི་དངུལ་དངོས་དེ་དག་ཁོང་གི་དགེ་བའི་རྩ་བར་ཐལ་བའི་ཐལ་བ་དེ་ཁྱེད་ཀྱི་སྤྱི་གཙུག་ཏུ་ཐོག་ལྟར་འབབ་ལ། དེ་ལྟ་ན་ལས་ཁུངས་དེའི་ནང་གི་གྲྭ་བ་དེ་ཚོ་ཆོས་ཅན། ཁོང་གི་དགེ་བའི་ཡན་ལག་ཡིན་པར་ཐལ། ལས་ཁུངས་དང་དད་རྫས་དེ་དག་ཁོང་གི་དགེ་བའི་རྩ་བ་ཡིན་པའི་ཕྱིར། ད་དུང་ཐལ་བ་མང་དག་ཅིག་མཆིས་མོད། ཤི་ཟིན་པའི་རོ་ལ་སླར་མདུང་གིས་མི་སྣུན་པར་བྱ།
སྐུ་བཅར་བ་ལགས། སྐུ་བཅར་བའི་ཁྲོད་ན་བོད་ཡིག་ཤེས་མཁན་བརྫྲ་འཕྲིན་ལས་གཅིག་བུ་མ་གཏོགས་མེད་མོད། དེ་རིང་གང་ཞིག་ནས་བོད་ཡིག་ཕྲན་བུ་ཤེས་མཁན་གྱི་སྐུ་བཅར་བ་ཞིག་ཐུག་པར་སེམས་གཏིང་ནས་དགའ་ཞིང་སྤྲོ་ཡོད། སྐུ་ཉིད་ལ་ད་དུང་རེ་བ་ཞིག་ཞུ་རྒྱུ་ཡོད་པ་ནི་རྗེས་མར་མི་ཤེས་པའི་གནས་ལ་ཨུ་ཚུགས་མི་བྱེད་པར་འཚལ། །
ལས་ཀ་གྲོལ་ནས་ནང་དུ་འགྲོ་བའི་ལམ་བར་དུ་མེ་འཁོར་ནང་བྲིས་པ་ཞིག་པས་གཏགས་ནོར་དང་ཡིག་ནོར་ཕྲན་བུ་ཡོད་སྲིད་པས། གདོན་འདྲེ་མཐོང་བ་ལྟར་ཧ་ལས་མདོག་མི་བྱེད་པར་འཚལ།།
༧་ས་མཆོག་གིས་ཐད་བསྐོས་གནང་བའི་མཁན་པོ་ཚང་མ་ ༸གོང་ས་༸སྐྱབས་མགོན་ཆེན་པོ་མཆོག་གི་བཀའ་ དགོངས་ལམ་སྟོན་ཐོག་ཤར་སྐྱོད་གནང་མཁན་ཞིག་ཡིན་པ་ནི་སྨོས་མ་དགོས་པ་ཞིག་ཡིན་ཟེར་བ་དེ་ལ་དོགས་པ་ཡོད་ གང་ཡིན་ཟེར་ན་ ཉེ་བའི་ལོ་ཤས་སྔོན་ལ་རྣམ་གྲྭའི་མཁན་པོ་ལྡན་མ་བློ་ཆོས་ཟེར་བ་དེའི་ཐེ་ཝན་དང་སེང་ག་པུར་རྡོ་རྗེ་ཤུགས་ལྡན་ཆོས་ཚོགས་ཁག་ནས་བཀའ་གདམ་པའི་རིང་ལུགས་གཙང་མ་སྐྱོངས་མཁན་ཁྱེད་ཚོ་མ་ཏོག་མེད་ཚུལ་སོགས་བཀའ་སློབ་གནང་བ་དང་དངུལ་འབོར་ཆེན་ཞིག་བློ་གླིང་གྲྭ་ཚང་ལ་ཕུལ་ཚུལ་སོགས་ཡོང་གྲགས་ཡིན་ འོ་ནས་༧་གོང་ས་མཆོག་གིས་ཁོང་རྡོ་རྗེ་ཤུགས་ཚོགས་པ་ལ་འགྲེལ་བ་བྱེད་དགོས་ཞེས་ལམ་སྟོན་ཡོད་གི་རེད་དམ
རྣམ་དཔྱོད་ལྡན་པའི་བློ་བཟང་ཡེ་ཤེས་ལགས་ཀྱི་སྙིང་སྟོབས་ལ་གུས་འདུད་དང་མངགས་བརྗོད་བྱེད་བཞིན་ཡོད་ རྣམ་རྒྱལ་གྲ་ཚང་གི་བསྟན་དགའ་ལགས་ནས་ ཧམ་པ་རི་ཙམ་ཤོད་ན་ བདེན་པ་གཡག་ཙམ་ཐོབ་གིན་རེད་བསམ་པ་དང་ དེང་སྐབས་༧གོང་ས་མཆོག་གིས་ཐུགས་རྗེས་ལས་བཀས་བཀོད་རྒྱུན་འཛིན་གྱི་ལམ་ལུགས་སོགས་མེད་པ་ཆགས་ཟིན་པ་ཞིག་རེད་ མཁྱེན་གིན་ཡོད་ཤག་ལགས་ ད་དུང་ཁ་སོང་ལྕམ་སྐུ་ཞབས་ཀྱིས་རྟུམ་དྲི་གཏོང་པ་མ་རེད་ གུས་གཡོག་མོས་གཏོང་པ་ཡིན་ཟེརབ་ལྟར་ཆགས་འདུག་ རྣམ་རྒྱལ་གྲ་ཚང་དེ་བོད་མི་ས་ཡ་དྲུག་གིས་༧གོང་ས་མཆོགི་གྲ་ཚང་ཞིག་ལ་ངོས་འཇིན་གནང་གིན་ཡོད་པ་དང་ དུད་འཁོར་གྲ་ཚང་ཞིག་རྩིས་ཐང་བཞག་གིན་ཡོད་ ནོར་འཁྲུག་ཡོད་པ་ཤེས་བཞིན་དུ་མཐོང་ཆུང་ཁྱད་གསད་བྱས་ཏེ་སྣང་མེད་བཞག་ནུས་པ་ ཧ་ཅང་བློ་ཁོག་རེད་ལ་འགན་མ་འཁུ་བའི་རྟགས་རེད་ལ་༧གོང་ས་མཆོག་གི་སྙན་ལ་གསན་ཡོང་བསམ་པའི་འཚེར་སྣང་དང་ཞེད་སྣང་གང་ཡང་མེད་པ་ ཨ་ཙི་ བྱས་སྟངས་འདིས་ དཔེར་ན་ ཁྱིམ་མཚེས་བླ་མར་དད་པ་མེད་ཟེར་ རྣམ་འགྱུར་བསྟན་འདུག་ ངོ་མི་ཚར་བ་དཔེ་རང་རེད་ ད་དུང་དམངས་ལ་སྡིགས་ར་དང་ཞེད་སྣང་བཀོད་དེ་༧གོང་ས་མཆོག་གི་མཚན་བེད་སྤྱོད་བྱས་འདུག་པ་དེས་ འོས་ཤིག་མཚམ་པའི་གནང་ཏངས་ཤིག་རྩ་བ་ཉིད་ནས་མ་རེད་ གནང་སྟངས་དེར་བསྟས་ན་ གཞིས་ལུས་མི་མང་རྣམས་སྨྲ་བརྗོད་རང་དབང་མེད་ལ་ རང་ཅག་བཙན་བྱོལ་ནང་ལ་ཡང་སྨྲ་བརྗོད་རང་དབང་མེད་པ་ཆགས་འགྲོ་གིན་མིན་འདུག་གམ་ ནང་པའི་སྟོན་པ་མགོ་ནས་བསྣུབ་པ་ཞིག་མ་རེད་དམ་ བསྟན་དགའ་ལགས་ཐུགས་བསམ་བཞེས་ཏེ་ལེན་ཞིག་ཡོད་པ་ཞུ་།
སྐུ་ཉིད་དང་རྣམ་རྒྱལ་གྲ་ཚང་གི་འགན་འཁུ་བ་རྣམས་ནས་རྒྱུ་མཚན་དཔང་རྟགས་གང་ཡང་མེད་པར་རང་བསམ་བདེན་རློན་གྱིས་བབ་ཅོལ་དུ་ཧམ་བརྗོད་དེ་ལྟར་བྱེད་ཕོད་པའི་ཐུགས་སྟོབས་ལྡན་ན། རང་སྐྱོན་ངོས་ལེན་བྱ་ཕོད་པའི་ཐུགས་སྟོབས་ཀྱང་དེ་དེ་བཞིན་མཆིས་ངེས་པས་ནོར་འཁྲུག་གང་ཡང་ཤོར་མེད་པ་མེད་པ་ཁུངས་སྐྱེལ་ར་ སྤྲོད་བྱ་རྒྱུ་ཡོད་ན་དེ་ལྟར་དང་། དེ་ལྟར་མ་མཆིས་ན་སྐུ་ཉིདདང་ རྣམ་གྲྭ་མཁན་སློབ་འདུས་པ་རྒྱ་མཚོས་སྒོ་གསུམ་གུས་ཕྱག་ཟུང་གི་པད་མོར་མགུལ་དར་དཀར་གཙང་ཞིག་བསྣམས་ཏེ་༧གོང་ས་མཆོག་གི་སྐུ་མདུན་དུ་སྒོ་གསུམ་གུས་ཕྱག་སྔོན་དུ་བཏང་བའི་ཐོག་ནས་མཐོལ་བཤགས་འབུལ་རྒྱུའི་ཐུགས་སྟོབས་ཤིག་ངོས་པ་དགོས་རྒྱུ་དང་། དུས་བབ་དྲ་རྒྱའི་ཐོག་ནས༧གོང་ས་མཆོག་དང་གཞེས་བྱེས་བོད་མི་མང་རྣམས་ལ་རང་སྐྱོན་ངེས་ལེན་དང་དགོངས་སེལ་ཡོངས་ཁྱབ་ཏུ་མ་གནང་ན། གཅིག་ནས་ ཁྱིམ་མཚེས་བླ་མར་དད་པ་མེད་ཟེར་ རྣམ་འགྱུར་དངོས་བསྟན་དང་ ༸གོང་ས་༸སྐྱབས་མགོན་ཆེན་པོ་མཆོག་ལ་ཁྱད་གསོད་དང་སྐུར་འདེབས་བྱས་པར་མཚོན་ལ། གཉིས་ནས་ ནང་པའི་སྟོན་པ་མགོ་ནས་བསྣུབ་པ་དང་བཟང་སྤྱོད་ཀྱི་འགན་འཁྲི་དང་ཡོངས་སུ་འགལ་ཡོད། གསུམ་ནས་རང་དབང་དམངས་གཙོ་ལ་རྡོལ་རོལ་མཐོང་ཆུང་བཏང་བར་ཡང་མཚོན་པས་དེ་ནི་དག་ཐབས་མེད་པའི་ནག་ཉེས་ཆེན་པོ་ཞིག་རེད་ལ། མི་རབས་ཕྱི་མ་ཚོར་ཡང་མིག་དཔེ་ངན་སྟོན་བྱས་པ་ཞིག་ཀྱང་རེད།
རྣམ་རྒྱལ་གྲ་ཚང་གི་གསེར་སྐུ་བཞེངས་སྟངས་མ་འགྲིག་ན་ཆོས་ལུགས་པའི་སྡེ་ཡིས་ཐག་བཅད་ན་བཟང་གི མི་སྐྱ་ཚོར་ཇུས་གཏོགས་མེད་གི
བོད་ཀྱི་ཁ་བརྒྱུན་ནང་ལྷ་སྐུ་ཐིག་ཚད་ཡག་པོ་མེད་ན་བཀྲ་མ་ཤིས་པ་ཡོངས་ཚུལ་བརྗོད་གསལ་ལ་རྡ་ས་ལ་ག་དུས་ཡིན་ཡང་ཁ་ཆག་སྣ་རལ་བདེ་པོ་མེད་པའི་རྒྱུ་མཚན་ཡང་འདི་ཡིན་སྲིད། དུས་སྐུ་འདི་མྱུར་དུ་བརྗེ་བོ་བྱས་ན་ལེགས་པ་འདུག
གང་ལྟར་རྣམ་རྒྱལ་གྲྭ་ཚང་གི་དུས་འཁོར་གྱི་སྐུ་བརྙན་དེ་ལ་སྐྱོན་ཡོད་པ་ཁས་བླངས་འདུག་པས་དེ་གས་འཐུས། མཁན་པོ་རིམ་པ་གཙོས་ལས་ཀྱི་སྣེ་བ་དག་གིས་ཐུགས་སྣང་མ་གནང་བར་ད་བར་བཞག་པ་འདི་ཡ་འཚར་སྐྱེས་སོང་། དཔེ་མི་སྲིད་པའི་ཞབས་འདྲེན་བཞག་འདུག།
སྔོན་མ་ནས་ཤེས་ཡོད་ན་ད་ལྟ་བར་འཇོག་དགོས་དོན་གང་ཡིན་ནམ།
བརྒྱ་བཤད་སྟོང་བཤད་ཅི་ཙམ་བྱས་ཀྱང་རྣམ་རྒྱལ་གྲྭ་ཚང་གིས་ཞབས་འདྲེན་ཞུས་འདུག། བློ་བཟང་ཡེ་ཤེས་ལགས་ལ་ངན་ཁག་གཡས་དཀྲི་གཡོན་དཀྲི་བྱེད་རྒྱ་ལྷག་མི་འདུག།
མི་འདི་ཚོ་དངོས་གནས་ང་ཚ་ཞིག་མི་འདུག དུ་རུང་གམ་བཅར་པ་ཟེར་བའི་མིང་སྙན་པོ་ཞིག་བྲིས་འདུག། ཁྱོད་ཚོ་ད་བུ་མོ་མཛེས་མ་ཚོའི་གམ་བཅར་པ་ཞིག་ཡིན་པ་ཐག་གི་ཆོད།
དུ་རུང་ཁྱོད་ཚོའི་མཁན་པོས་ཕྱག་གནམ་ལ་གཡུག དབུ་ཐད་ལ་གཡུག་བཞིན། དེ་བཟོ་བཅོས་གཏན་ནས་བྱེད་ཆོག་གི་མ་རེད། འདི་༧རྒྱལ་བ་རིན་པོ་ཆེའི་ཐུགས་བཀོད་ལྟར་བཞེངས་པ་རེད། དེ་ཁག་པོ་ཞེ་དྲག་རེད། དེ་མིན་གཞན་མེད་ན་ད་ཕེབས་རོགས།
སྐྱོན་ལ་ངོས་ལེན་དང་མཚང་ལ་རང་ངོ་ཟིན་པ་རྣམ་དཔྱོད་ཅན་གྱི་གཟི་བརྗིད་དང་གསོན་ཤུགས་རེད་མོད། འོན་ཀྱང་ཤེས་བཞིན་བསམ་བཞིན་དུ་ལོ་འདི་འདྲའི་རིང་ལ་ནག་ཉེས་དུར་སྦས་བྱས་བ་སུ་ལ་ངོ་རྒོད་ཡིན་ནམ། གལ་སྲིད་ཕྱིར་རྒྱལ་མི་གཅིག་གིས་འདི་ལྟར་གསལ་འདོན་བྱས་ཡོད་ཚེ་འདི་དག་གི་ནག་ཉེས་སུ་ལ་འགལ་བ་དགོས་པ་རེད། ཡང་གཅིག་གཅིག་གི་མགོ་ཐོག་ལ་གཡུགས་རེ་བྱེད་དགོས་པ་རེད་དམ། མཐའ་མར་༧གོང་ས་མཆོག་གི་སྐུ་ཐོག་ལ་འཕེན་ངེས་རེད། ་གསེར་དུ་བཞེངས་བའི་དུས་འཁོར་ཟིངས་སྐུ་དང་ལྡེངས་རིས་གཉིས་བྱས་ན་དང་ཐོག་ལྡེངས་རིས་བཞེངས་བ་རེད་འདུག། ཁྱེད་ཚོས་དུས་འཁོར་གྱི་ལྡེབས་རིས་ལ་སྐྱོན་ཡོད་པ་ཤེས་བཞིན་དུ་བསྐྱར་དུ་སྐྱོན་ཅན་གྱི་ཟིངས་སྐུ་ཅིག་ཅི་ལ་བཞེངས་དགོས་པ་རེད། གོང་གི་འགྲེལ་བརྗོད་པའི་བཤད་པ་ལྟར་ན་གོང་གི་སྐྱོན་ཤོར་བའི་གནས་ཚུལ་དེ་ལོ་བརྒྱད་དགུའི་གོང་ནས་ཤེས་ཡོད་ཚུལ་བཤད་གི་འདུག ཤེས་ནས་ལོ་འདི་འདྲ་མང་པོ་ཞིག་ཕྱིན་འདུག ད་བར་གོ་རྒྱུ་གྲགས་རྒྱུ་ཅི་ཡང་མེད་པ་ཅི་ལ་རེད་།
ཡང་ཁ་སྔོན་སྐུ་ཞབས་བློ་བཟང་ཡེ་ཤེས་ཀྱིས་རྣམ་རྒྱལ་གྲྭ་ཚང་གི་མཁན་པོ་ལ་འདྲི་གཅོད་བྱས་དུས་མཁན་པོས་བཤད་ན་དེ་ནི་༧གོང་ས་མཆོག་ཐུགས་དགོངས་ལྟར་བཞེངས་བ་ཡིན་ཚུལ་བཤད་ནས་སྐྱོན་མེད་ཡིན་ཞེས་ནན་གྱིས་གསུངས་འདུག དེ་ནི་རང་སྐྱོན་རང་གིས་སྦས་བ་དང་རང་སྐྱོན་གཞན་ལ་ཕྱིས་བ་མ་རེད་དམ།
འགྲེལ་བརྗོད་པའི་བཤད་ཚུལ་ཞིག་ལ་མཁན་པོ་ལ་འདྲི་གཅོད་བྱས་བ་་ལས་རྣམ་རྒྱམ་གྲྭ་ཚང་ལ་འབྲེལ་གཏུགས་དང་འདྲི་གཅོད་མ་བྱས་བ་ལྟར་ན་མཁན་པོ་ལ་སྡང་སེམས་ཡོད་སྐོར་སོགས་རྣམ་རྟོག་གིས་སྒྲོ་འདོགས་གང་མང་ཞིག་བཤད་ཀི་འདུག བཤད་ཚུལ་དེ་ནི་ཡག་པོ་ཁྱོན་ནས་མི་འདུག
ཁྱེད་ཀྱིས་སྐྱོན་ངོས་ལེན་གནང་བ་ནི་བླ་མེད་ཞིག་རེད་མོད། རྣམ་རྟོག་གིས་སྒྲོ་འདོགས་དེ་ནི་ཞེན་ལོག་ཞིག་ཅི་ན་མིན།
གོང་གི་རྩོམ་ཡིག་ནང་དུ་སྐྱོན་ངོས་ལེན་གྱི་སྒོ་ནས་བློ་བཟང་ཡེ་ཤེས་ལགས་ལ་ཐུགས་རྗེ་ཆེ་ཞུ་དང་ཆབས་ཅིག་ཡིག་ཚང་ལ་སྐད་ཆ་འདྲི་རུ་མ་ཡོང་དེ་ཐེ་ཚོམ་གྱི་སྐད་ཆ་ཞིག་གཞན་གང་ཡང་ཞུ་མི་འདུག
གཙོ་བོ་གཡུ་དྲུག་དཀར་ལགས་ཀྱི་མཆན་བཀོད་པ་ནང་དུ་“ཇི་སྲིད་སེམས་ཅན་འགའ་ཞིག་ཀྱང་། །གང་དུ་མ་གྲོལ་དེ་སྲིད་དུ། །དེ་ཕྱིར་བླ་ན་མེད་པ་ཡི། །བྱང་ཆུབ་ཐོབ་ཀྱང་གནས་གྱུར་ཅིག །”ཅེས་པའི་ལུང་ཚིག་འདི་དང་“ཏཱ་ལའི་བླ་མའི་དགེ་རྩ་”ཟེར་བ་ནོར་ཡོད་པའི་སྐྱོན་བརྗོད་བྱས་པ་ལན་རྩད་དུ་བཏོན་པ་ཞིག་མཐོང་སོང། གཡུ་དྲུག་དཀར་ལགས་ཀྱིས་བྲིས་པ་ཡང་གོང་གི་དེ་མ་རེད། འདི་“ཏ་ལའི་བླ་མའི་དགེ་རྩ་”རེད། དེ་ལ་གམ་བཅར་བས་ཞིབ་མོ་བལྟས་མི་འདུག ཁ་ཤས་ཀྱིས་རྩོམ་ཞིབ་མོ་ཞིག་མ་ཀློག་པར་སྐྱོན་བརྗོད་གང་ཐུབ་བྱེད་པ་མ་འོས་པ་ཞིག་ཏུ་སེམས།
ཟིན་བྲིས་པ་སུ་ཞིག་ཡིན་རུང་ཚོར་འདུ་དང་རིག་པ་གཉིས་ལས་ཕྱི་མ་འདེམས་དགོས་པ་ནི་གཞུང་ལུགས་སྨྲ་བ་དག་གི་ལངས་ཕྱོགས་ཡིན་པ་མ་བརྗེད་རོགས་ཞེས་ཞུ་འདོད་བྱུང་ལ། དེ་དང་མཉམ་དུ་གནས་ཚུལ་འདི་དང་འདི་ལྟ་བུའི་རིགས་དུས་ནམ་ཡང་ང་ཚོས་སྣང་ཆུང་མི་བྱེད་པར་གླེང་བསླངས་དགོས་པར་སྙམ། དེ་ལྟར་བྱས་ན་དགཟོད་ང་ཚོའི་སྤྱི་ཚོགས་ཁྱོན་ཡོངས་ནས་ནོར་བར་དགག་རྒྱག་དང་བཟང་པོར་གཟེངས་བསྟོད་ཀྱི་ལུགས་སྲོལ་འཆུགས་མེད་ཅིག་རྒྱུན་སྐྱོང་ཐུབ་པ་དེའོ། །
གང་ལྟར་ལག་གཉིས་མཐའ་མོ་སྦྱར་ནས་ཞུ་རྒྱུ་རྡ་ས་རྣམ་རྒྱལ་གྲྭ་ཚང་བོད་གཞི་བྱེས་གཉིས་ཀྱི་རེ་ཡུལ་ཡིན་པས་ད་ཕྱིན་ཁོང་ཡོད་ལུང་ཡོད་གནང་རོགས་ཞུ་རྒྱུ་ཡིན། བློ་བཟང་ཡེ་ཤེས་བཙོས་པའི་དག་བཅོས་གནང་མཁན་རྣམས་ལ་ཐུགས་རྗེ་ཆེ་ཞུ།
ཐོག་མར་བློ་བཟང་ཡེ་ཤེས་ལགས་དང་བསྟན་འཛིན་དགའ་བ་ལགས་རྣམ་གཉིས་ཀྱིས་དོན་གནད་གལ་ཆེན་ཞིག་ལ་ཐུགས་སྣང་གནང་བར་ཐུགས་རྗེ་ཆེ་ཞུ་རྒྱུ་དང་། འདི་ནི་བོད་སྤྱི་དོན་ལ་འབྲེལ་བ་ཡོད་པ་ཞིག་ཡིན་སྟབས། དྲ་གྲོགས་ཚང་མས་ཀྱང་བགྲོ་གླེང་དཔྱད་བསྡུར་གནང་བ་ཧ་ཅང་ལེགས་མོད། ཕན་ཚུན་ལ་ཚིག་རྩུབ་དང་། སྒེར་གྱི་མཚང་འབྲི། ཆོས་ལུག་གྲུབ་མཐར་དམའ་འབེབས། ཆོལ་ཁའི་ཕྱོགས་ལངས་ཀྱི་གསུང་མོལ་རིགས་མི་གནང་རྒྱུར་འབོད་སྐུལ་ཞུ་བཞིན་ཡོད།
གམ་བཅར་བ་ལགས།
ཁྱེད་ཀྱིས་ཕྱོགས་གཅིག་ནས་ནོར་འཁྲུལ་ཁས་ལེན་བྱེད་བཞིན་དུ་ཕྱོགས་གཅིག་ནས་གཡོ་རྒྱུའི་ཁུག་མགོ་བསྟན་ཏེ་ཕ་རོལ་བོར་འཇིགས་བསྐུལ་དང་། ནག་ཉེས་ཡོད་ཚད་དུས་སྐུའི་སྦྱིན་བདག་གི་མགོར་འཇོག་ཐབས་བྱེད་པ་ནི་ཤིན་ཏུ་ཐ་ཆད་རེད། དཔེར་ན་འབྱོར་ལྡན་ཞིག་གིས་མཆོད་རྟེན་ཞིག་བཞེངས་ན་དེའི་ཐིག་ཚད་ཀྱང་སྦྱིན་བདག་གིས་བྱེད་དགོས་སམ། ཡང་ན་རྗེས་སུ་ཆ་ཚད་ལ་ནོར་འཁྲུལ་ཡོད་ན་ནག་ཉེས་སྦྱིན་བདག་གི་མགོར་འགེལ་རྒྱུ་ཡིན་ནམ། ལས་རྒྱུ་འབྲས་ཟེར་བ་ཞིབ་འཕྲ་མི་ཤེས་ན་ཡང་། སྐུ་ཡི་གམ་བཅར་ཞིག་ཡིན་པའི་ཆ་ནས་བཟང་སྤྱོད་ཀྱི་དྲི་ཙམ་ཡང་མི་བྲོ་བ་ག་རེ་ཡིན་ནམ།
ངས་བལྟས་ན་དུས་སྐུའི་སྦྱིན་བདག་ཇོ་ནང་ཁལ་ཁ་རིན་པོ་ཆེར་ནག་ཉེས་སྤུ་ཙམ་མེད་པ་མ་ཟད། བློ་བཟང་ཡེ་ཤེས་ཀྱི་རྩོམ་ཡིག་དེ་ལས་ལེགས་ཆ་ལེན་རྒྱུ་ལས་ཉེས་མེད་ཉེས་འཛུགས་བྱས་ན་བཟང་སྤྱོད་དང་འགལ་བ་རེད་བསམ་གི
གང་ལྟར་སེམས་དཀར་སོགས་ཀྱིས་གསུངས་པ་ལྟར། ད་ཕྱིན་ཆལ་ཆོལ་རེ་འབྲི་འདོད་ན་རང་མིང་དངོས་ལས་༧གོང་ས་མཆོག་གི་མཚན་ཀྱང་མཉམ་དུ་ཁྱེར་མ་ཡོང་རོགས། ངོ་མ་ཡིན།
མི་འདི་ཚོར་ངོ་ཚ་ཟེར་བ་ཞིག་མེད་པ་ག་རེ་ཡིན་ནམ། ད་དུང་སྐུ་བཅར་ཡིན་ན་ཅིག་ཟེར་བཞིན་རྫིག་རྫིག་བྱེད་ཀི་འདུག
གལ་ཏེ་ཁྱེད་ཚོས་དུས་སྐུའི་དཔུང་ལག་གི་མང་ཉུང་ནོར་བ་སྔོན་ནས་ཤེས་ཡོད་ན། མི་ལོ་བརྒྱད་དགུའི་རིང་གྲགས་འགུལ་མེད་པར་འཇོག་དོན་ཅི་ཡིན་ནམ། ད་དུང་དུས་འཁོར་ལྷ་ཁང་ནང་གི་ལྡེབ་བྲིས་བཞེངས་ནས་ལོ་ག་ཚོད་ཕྱིན་ཡོད་དམ། རང་སྐྱོན་གཞན་ལ་བཙན་འགེལ་བྱེད་པའི་ཁྲེལ་མེད་ཟེར་བ་ཞིག་གནམ་འོག་འདིར་ཡོད་ན་ཁྱོད་མིན་ན་སུ་ཡིན་ནམ།
ངས་དེ་རིང་ཇོ་ནང་ཁལ་ཁ་རིན་པོ་ཆེ་རྩར་གཅོད་བྱས་མོད། ཁོང་སོག་ཡུལ་དུ་བཞུགས་ཡོད་ཟེར། ཁོང་དང་འབྲེལ་ཡོད་འགའ་ལ་སྐད་ཆ་དྲིས་དུས། ང་ཚོས་གསལ་བོར་མི་ཤེས་མོད། རིན་པོ་ཆེས་དུས་སྐུ་བཞེངས་དུས་དུས་འཁོར་ལྷ་ཁང་ནང་གི་དུས་འཁོར་ལ་ཆགས་འཇོག་བྱས་པ་འམ། ཡང་ན་འབྲེལ་ཡོད་ལ་བཀའ་འདྲི་ཞུས་ཏེ་མ་དཔེ་ཞིག་ལ་བསྟུན་ཡོད་པ་ཐག་གཅོད་བྱེད་ཐུབ།
གང་ལྟར་རིན་པོ་ཆེ་དུས་སྐུའི་སྦྱིན་བདག་ཡིན་པ་ལས། སྐུ་འདྲའི་བཀོད་འདོམ་པ་དང་། སྐུ་འདྲ་བཞེངས་མཁན་མ་རེད་ཅེས་ཟེར།
ད་དུང་ཤེས་གསལ་ལྟར་ན། རྣམ་གྲྭས་ནམ་རྒྱུན་འདོན་བཞིན་པའི་དུས་ཆོག་རྒྱལ་བ་སྐལ་བཟང་རྒྱ་མཚོས་མཛད་པའི་དུས་ཆོག་རེད་ཟེར། དེས་ན་བློ་བཟང་ཡེ་ཤེས་ཀྱིས་དྲངས་པའི་དུས་འཁོར་ཆོ་ག་དེ་ཡིན་རྒྱུ་རེད། ཁྱེད་ཀྱིས་མི་ལོ་དུ་མའི་དུས་འཁོར་ཆོ་ག་བཏོན་བཏོན་ནས་ད་དུང་དུས་འཁོར་ལ་ཕྱག་ག་ཚོད་ཡོད་པ་མ་ཤེས་པ་ངོ་མི་ཚའམ།
གཞན་གྱིས་ནོར་འཁྲུལ་ངོ་སྤྲོད་བྱས་ཡོང་དུས་ངོས་ལེན་བྱེད་པའི་སྤོབས་པ་མེད་ན་ཡང་། ཕར་ཉེས་འཛུགས་དང་དྲག་སྤྱོད་པའི་སྤྱོད་ངན་བསྟན་ཏེ་འཇིགས་བསྐུལ་བྱེད་རྒྱུར་ངོ་མི་ཚའམ། ཡ་མི་ངན་ནམ།
དངོས་གནས་བཤད་ན་ལག་ཐལ་མོ་སྦྱར་ཏེ་གནོངས་འགྱོད་ཁྱེད་ཀྱིས་བྱེད་དགོས་པ་ལས་བློ་བཟང་ཡེ་ཤེས་དང་། མཆན་འདེབས་མཁན་རྣམས་ཀྱིས་བྱེད་དགོས་དོན་མེད་ཀི
ད་ཡིན་ན་དུས་འཁོར་གྲྭ་ཚང་གིས་ཞབས་འདྲེན་ཞུས་སོང་། ད་ཕྱིན་ད་དུང་མྱི་ཁ་འཇོག་འདོད་ཡོད་ན། ༧གོང་ས་མཆོག་མཉམ་དུ་དྲུད་མ་ཡོང་རོགས། ཐུགས་རྗེ་ཆེ།
རྣམ་གྲྭ་བསྟན་འཛིན་དགའ་བ་ལགས། སྐུ་ཉིད་ཞལ་བདེ་བ་ལ་དཔེ་རང་རེད། དོན་ངོ་མ་སྐུ་རྒྱུ་གསེར་ཟངས་ལས་གྲུབ་པའི་དུས་འཁོར་གྱི་སྐུ་བརྙན་འདི་དང་། རྩིག་ངོས་གྱི་ལྡེབས་རིས་འདི་གཉིས་བཞེངས་གྲུབ་ནས་དུས་ཡུན་ག་ཚོད་འགྲོ་ཀྱི་ཡོད་རེད། བོད་གཞི་བྱེས་གཉིས་ཀྱི་རེ་བ་བྱེད་ས་རྣམ་རྒྱལ་གྲྭ་ཚང་ལྟའུ་ཁོང་ལུང་རྒྱུ་མཚན་མེད་པ་དེང་དུས་རྒྱ་དམར་གཡོ་འོག་ཏུ་ཡོད་པའི་དགོན་པ་ཁ་ཤས་བལྟའུ་ཡུལ་སྐོར་སྤྲོ་འཁྱམས་འགྲོ་ས་འདྲ་བོ་རེད་ན་སྐྱོ་བ་ལ།
སྐུ་ཉིད་ནས་བརྗོད་བྱ་དང་བརྗོད་བྱེད་བཟང་བའི་རྩོམ་ཤིག་དྲ་རྒྱར་བཀོད་པར་གུས་འདོད་ཞུ། འོན་ཏང་ཉིད་ཀྱིས་གསུང་ན་སྐུ་འདྲ་དེ་ཁལ་ཁ་རྗེ་བཙུན་གྱིས་ཕུལ་བ་རེད་ཅེས་གསུང་བ་ལྟར་ན་སྐུ་འདྲ་དེ་༸རྒྱལ་བའི་དགོངས་གཞི་ལྟར་བཞེངས་བ་མིན་ལས་ཆེ། མཐོ་དམན་གྱི་བོད་མི་མང་པོ་ཞིག་གིས་སྡིགས་ར་དང་ནོར་འཁྲུལ་མདུན་དུ་༸རྒྱལ་བའི་མཚན་བེད་སྤྱོད་གཏོང་དགོས་པའི་རྒྱུ་མཚན་གང་།
སྐུ་ཡི་གམ་བཅར་བ་ཞེས་༸གོང་ས་མཆོག་མཉམ་དུ་ཁུར་མ་ཡོང་རོགས། རྣམ་གྲྭ་ནི་༸གོང་ས་མཆོག་གི་ཞབས་རིམ་སྒྲུབ་མཁན་ཞིག་དང་དུས་འཁོར་གྲྭ་ཚང་ཡིན་པས་༸དུས་འཁོར་སྐུ་ཡི་བཟོ་དབྱིབས་ལ་འགན་འཁྲི་ལོས་ཡོད།
དངོས་གནས་གུ་ཡངས་དཀྱེལ་ཡངས་ཀྱི་སྒོ་ནས་གསལ་བཤད་དང་ཕ་རོལ་བོའི་སྐད་ཆ་ལ་ཉན་པའམ་བརྟག་པ་དེས་ཀྱང་ཉིད་ཀྱི་ཤེས་ཡོན་མཚོན་ཐུབ་པས་དགའ་ཡོད། བཀའ་དྲིན་ཆེ། ཚིག་མཚོན་མེད་པའི་རྩོམ་ཡིག་ཁ་གསལ་འདི་ལྟ་བུ་ཡང་དང་བསྐྱར་དུ་དར་བའི་སྨོན་ལམ་འདེབས།
གམ་བཅར་བའི་མིང་ཅན་ལགས། ཐུགས་ཁུར་གནང་པ་ལེགས་ཀྱང་། སྐུ་ཉིད་ཀྱིས་སྐབས་བབས་ཀྱི་བརྗོད་བྱའི་གནད་དོན་ངོ་མ་བོར་ནས་རང་བཞིན་ཇེ་རྩོག་དང་གླེང་གཞི་རྙོག་འཛིང་ཇེ་ཆེ་རུ་བཏང་སོང་།
དང་པོ་གུ་བཤངས་དང་ཞི་ཉམས་ཤིན་ཏུ་ཆེ་མདོག་གི་རྣམ་འགྱུར་དང་།
བར་དུ་ཞེན་ཁོག་གིས་རང་མཚང་བསྟན་ཏེ་རྩ་བ་བོར་ནས་ཡལ་ག་ལ་འཇུས་པ།
ཐ་མར་བློ་ཡེ་ལགས་ཀྱི་མངོན་འདོད་ཡོད་མེད་ལ་མ་ལྟོས་བར་བཙན་གྱིས་ནོངས་པ་མེད་ཀྱང་ནོངས་འགྱོད་བྱེད་དགོས་པའི་དྲག་པོས་འཇིགས་སྐུལ་བྱས་འདུག་པ་སོགས་ལ་རིན་ཐང་ཅི་ཡང་མི་འདུག་པ་དྲྭ་གྲོགས་རིག་སྨྲ་བ་དག་གིས་ཀྱང་དེ་ལྟར་ལུས་འདོད།
ཁྱད་པར་རྣམ་གྲྭའི་མཁན་པོ་དག་ཐད་བསྐོས་གནང་བ་པོས་རྒྱུས་ལོན་མེད་པའི་སྒོ་ནས་བསྐོ་བཞག་མཛད་པ་འོལ་ཚོད་ཡིན་འདུག་པ་ལྟ་བུའི་ཤོད་ཚུལ་འདི་ཉིད་ལ་བལྟས་ན།
དམིགས་ཡུལ་ཅན་གྱིས་ཟུར་གྱི་ཕྲ་མོའི་སྐད་ངག་དབྱངས་རྟ་རུ་བསྒྱུར་བ་ག་ལ་ཡིན། དངོས་གནས་བཤད་སྟངས་ལེགས་པོ་མི་འདུག
ད་དུང་ཕྱོགས་གཉིས་ཀྱི་ངོས་ནས་ཁྱོད་ཤི་ང་གསོན་གྱི་འཐབ་རྩོད་མིན་པར། རྩོད་པ་ཆོས་ཕྱོགས་སུ་ཞི་བར་བྱ་བའི་སྒོ་ནས་གནད་དོན་གཙོ་བོ་ཁ་གསལ་གཏིང་གསལ་མཛད་དགོས་པ་འདི་གནད་ཀྱི་དོན་པོ་རེད།
གལ་ཏེ་གམ་བཅར་བས་ཤོད་ཚུལ་དེ་བདེན་ན། ཅིའི་ཕྱིར་རྣམ་གྲྭས་ལོ་ནས་ལོ་བསྟུད་ནས་བུ་ཇོ་སོགས་ཀྱི་དུས་འཁོར་གཞུང་ལུགས་ཚད་ལྡན་རྣམས་དང་མི་མཐུན་པའི་སྐུ་དེ་འདྲ་ཞིག་འཇོག་ཕོད་པ་ཡང་ངོ་མཚར་ཆེ།
གནད་དོན་འདི་འདྲ་བ་དག་གིས། དམ་པ་གོང་མའི་གསུང་རྒྱུན་དུ་ཞལ་སློབ་ངན་པས་བླ་མ་ཟོག་པོར་གཏོང་ཞེས་པས་དཔེ་རུ་འགྱུར་མི་སྲིད་པའང་མིན།
དོན་གནད་འདི་གུས་པར་མཚོན་ན་རྒྱ་ཆེ་ས་ཞིག་ནས་བློ་གཡེང་ཆེན་པོ་འདུག་པས། བཤད་ཡམ་འདི་མཐོང་ཐོས་བྱུང་མ་ཐག་ནས་བདེན་རྫུན་གསལ་བོ་འཕྲལ་དུ་བཟོ་དགོས་པའི་འབོད་སྐུལ་ཞུས་ཁུལ་བྱས་པ་ཡིན།
གལ་དེ་ནོར་འཁྲུལ་ཡིན་ཚེ་མ་དག་རྒྱུན་འབྱམས་ཀྱི་ཐལ་ཆ་ཆེན་པོ་འགྲོ་མི་སྲིད་པ་ཡང་མ་རེད།
གམ་བཅར་་་བསྟན་དགས།
དུས་སྐུ་ལ་དཔུང་པ་བཅུ་གཉིས་ལས་ཉེར་བཞི་མེད་པའི་བདེན་དངོས་ནི་སྐུ་ཉིད་ཀྱིས་ཐུགས་ཁྲལ་མ་གནང་གོང་ནས་སྐུ་བཅར་རྣམ་རྒྱལ་གྲྭ་ཚང་གིས་སྔོན་ཚུད་ནས་ཤེས་རྟོགས་དང་རྒྱུས་ལོན་བྱུང་ཡོད་ལ། མི་འགྱང་བར་བཟོ་བཅོས་གནང་རྒྱུའི་གོ་བསྡུར་ཡང་བྱུང་ཡོད། ཅེའ་ཟེར།
ངོ་ཚ་མེད་པའི་གཏམ་མ་རེད་དམ། དུས་སྐུ་བཞེང་ནས་ལོ་ག་ཚོད་སོང་ཡོད། ཤེས་ཡོད་ན་ད་བར་དུ་ཅེས་ཕྱིར་སྣང་མེད་བྱས་པ་ཡིན། གོ་བསྡུར་གནང་ནས་ག་ཚོད་འགོར་ཡོད། ཞབས་འདྲེན་འཛམ་གླིང་ལ་ཅེས་ཕྱིར་བཞག་པ་ཡིན།
ད་དུང་ཇོ་ནང་ཁལ་ཁ་རྗེ་བཙུན་ལ་ལག་པ་ཕྱི་ཐབས་བྱེད་པ་ནི་ཁྲེལ་མེད་གཡོ་རྒྱུའི་གཏམ་རེད། ཁོང་སྦྱིན་བདག་ལས་སྐུའི་བཟོ་བཀོད་ཚད་ལྡན་ཡིན་མིན་གཟིགས་བཞིབ་བྱེད་པ་ཁྱེད་ཚོས་འགན་མ་རེད་དམ།
ད་ཡིན་ན་དངོས་གནས་བློ་བཟང་ཡེ་ཤེས་ཀྱིས་འཇོན་འདུག རྣམ་རྒྱལ་གྲྭ་ཚང་གིས་སྐད་ཤོར་འདུག ཡག་པོ་རེད།
མི་ཚོས་ཡག་པོས་སྐྱོན་འཛུགས་དང་བསམ་ཚུལ་བཏོན་དུས་ཐུགས་རྗེ་ཆེ་གསུང་དགོས་པ་ལས། དེ་ལ་རང་ཉིད་ཀྱི་ངོ་གདོང་དང་ང་རྒྱལ་དབང་གིས་ཚིག་ངན་དེ་ལྟར་བཤད་རྒྱུ་མེད་སྙམ། ཁྱེད་ཀྱི་རྩོམ་ཡིག་འདི་མཐོང་རྗེས། དངོས་གནས་ཁྱེད་དང་འདྲ་བའི་ང་རྒྱལ་དང་རང་གཤིས་ཚར་བའི་གྲྭ་བཙུན་ཚོར་སྐྱུག་དམས་ལངས་ཡོང་།