ཕྱི་ཚེས་བཅུ་ཉིན་ཞོགས་པ་སྔ་བོ་ཆུ་ཚོད་བཅུ་བའི་སྟེང་གི་མེག་ལོར་ནས་པ་ཏྲན་ཀོ་ཀྲེ་ལ་ལམ་དུ་བུད། དེ་རུ་འབྱོར་དུས་ཆུ་ཚོད་གསུམ་དང་ཕྱེད་རེད། པ་ཏྲན་ཀོ་ཀྲེ་ནས་ཨ་མྲའི་ཚལ་དུ་འབོད་པའི་པན་ཇབ་ཀྱི་གསེར་གྱི་ལྷ་ཁང་ཡོད་སའི་ཕྱོགས་སུ་འགྲོ་བའི་རླངས་འཁོར་དུ་ཆས་འགོ་བརྩམས། ས་རུབ་པ་དང་ཆུ་ཚོད་བརྒྱད་པ་ཡོལ་ཙམ་ཞིག་ལ་པན་ཇབ་གསེར་གྱི་ལྷ་ཁང་གི་འགྲམ་གྱི་རིན་མེད་མགྲོན་ཁང་དུ་ཅ་ལག་ཚང་མ་བཞག སྤྱིར་ན་པན་ཇབ་གསེར་གྱི་ལྷ་ཁང་དུ་ལྟ་སྐོར་དུ་ཡོང་མཁན་སུ་ཞིག་ཡིན་ཡང་། དེ་ནས་རིན་མེད་དུ་གནས་ཚང་བྱེད་ཆོག་གི་ཡོད། འོན་ཀྱང་། མི་མང་ལྷན་འདུས་ཀྱི་བསྡོད་ཀྱི་ཡོད་པ་ཞིག་རེད་འདུག ང་ནི་ཡོང་རོགས་ཕྱི་རྒྱལ་གྱི་བུད་མེད་ཅིག་ཡིན་དུས། ངེད་གཉིས་གཅིག་བུ་ཁང་ཆུང་ཞིག་སྤྲད་སོང་། དགོང་མོ་དེར་གསེར་གྱི་ལྷ་ཁང་གི་རིན་མེད་ཟ་མ་ཟ་སའི་སྤྱི་ཁང་དུ་སོང་ནས་གྲལ་བསྒྲིགས་མི་ཚོགས་ཀྱི་ཁྲོད་ནས་ཟ་མ་ཟས།
ཚེས་བཅུ་གཅིག་གི་ཞོགས་པ་སྔ་བོ་ནས་བླངས་དེ་པན་ཇབ་གསེར་གྱི་ལྷ་ཁང་ནང་དུ་ལྟ་སྐོར་ལ་སོང་། པན་ཇབ་ཀྱི་དད་ལྡན་ཕོ་མོ་མང་བོས་གཙང་གྲྭ་བྱེད་པ་དང་། ལྷ་ཁང་ནང་དུ་ཕོ་མོ་གཉིས་ཀྱིས་འདོན་པ་འདོད་བཞིན་འདུག གསེར་གྱི་ལྷ་ཁང་དེ་ནི་རྫིང་བུ་ཞིག་གི་དཀྱིལ་དུ་ཡོད་པ་དང་། ཞོགས་པའི་ཉི་མ་རི་རྩེ་ནས་ཤར་བ་དང་ངེད་གཉིས་དེ་ཡི་འགྲམ་དུ་ཡོད་དུས། དངོས་ནས་གསེར་འདོག་གི་ལྷ་ཁང་དེ་ནི་རྫིང་བུ་དེ་ཡི་དཀྱིལ་ནས་དངོས་ནས་ཧ་ལས་པའི་མཛེས་ཤིང་བརྗིད་ཉམས་འདུག གསེར་གྱི་ལྷ་ཁང་འདི་ལ་ལོ་ངོ་ལྔ་བརྒྱ་ནས་དྲུག་བརྒྱའི་བར་གྱི་ལོ་རྒྱུས་འདུག་ན་ཡང་། རང་ཉིད་ཀྱིས་པན་ཇབ་ཀྱི་སྐད་དང་ཡི་གེ་མི་ཤེས་དུས། དེ་ཡི་སྐོར་ལ་གསལ་བོ་ཞིག་ཤེས་ཐུབ་མ་བྱུང་།
ཞོགས་པ་ཆུ་ཚོད་དགུ་བ་ཙམ་ལ་ཕྱིར་རིན་མེད་མགྲོན་ཁང་དུ་ཡོང་ནས་ཅ་དངོས་དག་འཁུར་ནས་འགྲོ་གྲབས་བྱེད་ཀྱི་ཡོད་པའི་སྐབས་སུ། འདང་ནུབ་ངེད་གཉིས་ལ་ཁང་བ་གོ་སྒྲིག་བྱེད་མཁན་གྱི་མི་དེ་ཡོང་ནས། ཟིན་དེབ་འཐིག་པོ་ཞིག་དང་སྨྱུ་གུ་ཞིག་འཁུར་ཡོང་ནས། འདི་ལ་ཞལ་འདེབས་ཤིག་སྤྲོད་རོགས་གནོངས་ཟེར་བས། མཛའ་མོས་ང་ལ་སྐད་ཆ་དྲིས་དུས། ངས་སྤྲད་དགོས་པ་རེད། རང་གིས་སེམས་ཀྱི་ཡོང་ཚོད་ཅིག་སྤྲད་ན་འགྲིག་གི་རེད། ངེད་གཉིས་ཀྱིས་རིན་མེད་ཀྱི་ཟས་ཟོས། རིན་མེད་ཀྱི་མགྲོན་ཁང་དུ་བསྡད་པ་རེད། ཁོ་མོས་ཀྱང་དེ་ལྟར་བསམ་འདུག
ཨ་མའི་ཚལ་ནས་ལྡི་ལུར་ལམ་དུ་མི་འབུད་མེད་ཐབས་མེད་ཡིན། ངེད་གཉིས་མགྱོགས་པོ་ལྡི་ལུར་སླེབས་དགོས་ཀྱི་ཡོད་པ་ཡིན། ང་རང་གི་ཐོངས་ཆེན་རེག་མིན་གྱི་ཆེད་དུ། དེ་ཡི་བར་ནས་ལམ་ཐག་རིང་བ་དང་ཟ་མ་ཡང་ཡག་པོ་ཞིག་མ་རེག ལྡི་ལུའི་ཇོ་ནང་མགྲོན་ཁང་དུ་འབྱོར་དུས་ས་རུབ་ནས་ཡུན་རིང་ཞིག་མ་རེད། ཟ་མ་ཡིད་ཚིམ་པ་ཞིག་ཟ་རྒྱུ་བྱུང་། གཉིད་ཀྱང་སྐྱིད་པོ་ཞིག་ཁུགས་སོང་།
ངེད་གཉིས་སྔ་བོ་ཁོ་མོའི་རྒྱལ་ཁབ་ཀྱི་གཞུང་ཚབ་ཡོད་སའི་ལྡི་ལུ་གསར་བའི་ཕྱོགས་སུ་རྐང་གསུམ་སྤག་སྤག་ཞིག་གི་ནང་དུ་ཚ་བ་ཆེན་པོ་དེ་ཡི་ནང་དུ་སོང་། གཞུང་ཚབ་ཁང་གི་སྒོ་འགྲམ་ནས་ཁོ་མོའི་རང་གི་རྒྱལ་ཁབ་ཀྱི་སྐད་ཆ་མི་ཉུང་བ་ཞིག་སྒོ་སྲུང་བ་ཕོ་གསར་ཉམས་ཅན་དེར་བཤད་དུས། ངེད་གཉིས་ཀྱི་ལག་ཁྱེར་དང་ལུས་པོ་དག་ལ་ཞིབ་གཤེར་བྱས་རྗེས་སུ་ནང་དུ་བཏང་སོང་། དེ་དུས་གཞི་ནས་ངས་ཨེས་སུ་རལ་གྱི་རྒྱལ་དར་ལ་ཉམས་འཇོག་རྒྱུ་བྱུང་། སྔོན་ཆད་ངས་མཐོང་མྱོང་ཡོད་མེད་མི་དྲན་མོད། དེ་རིང་ནི་ངས་ཁོ་མོ་འདི་ཁྱེད་ཀྱི་རྒྱལ་ཁབ་ཀྱི་དར་ཆ་རེད་དམ་ཟེར་ནས་རླུང་གི་ཁྲོད་ན་ལྷབ་ལྷུབ་གཡུགས་ཀྱིན་པ་དེར་འཛུབ་མོ་བསྟན།
ང་རང་གིས་གཞུང་ཚབ་ཁང་འདིར་འབྱོར་ནས་སེམས་ནང་དུ་རང་གི་རིགས་ཀྱི་སྐོར་ལ་བསམ་བློ་ཞིག་མི་གཏོང་ཐབས་མེད་དུ་བཏང་། གཞུང་ཚབ་ཁང་གི་ནང་དུ་ངེད་གཉིས་ཀྱིས་མི་ཞིག་གིས་ཚུར་སྐད་གཏོང་རྒྱུར་སྒུག་ནས་བསྡད། ཡུན་རིང་སྒུག་མཐར། ཆུ་ཚོད་གསུམ་ཙམ་གྱི་རྗེས་སུ་མོ་རང་སོང་ནས་སྐད་ཆ་དྲིས་པའི་ལན་དུ་ང་རང་བོས། ངེད་གཉིས་ལྷན་དུ་ཨེས་སུ་རལ་གྱི་བུད་མེད་མགྲིན་ཚབ་པའི་ས་ནས་ངེད་གཉིས་ཀྱི་ནང་ནས་ང་རང་ལ་ཆ་རྐྱེན་གང་ཚང་དགོས་མིན་ཚང་མ་གསལ་བོ་གསུངས་བྱུང་།
ངེད་གཉིས་གཞུང་ཚབ་ཁང་གི་ལྟག་རྒྱབ་ཀྱི་ཁྲོམ་ཆེན་ཞིག་དུ་སོང་ནས་འདྲ་དཔར་ཕྱེད་ཅིག་བརྒྱབས། ས་དེ་ནས་མོ་རང་གི་རེ་འདོད་ལྟར། ཤིང་ཏོག་ཁུ་བ་དང་བག་ལེབ་མེ་བསྲེག བོད་ནས་ཚུར་སླེབས་པའི་ཕྱུ་ར་སོགས་ཉོས། ཧིན་སྒོར་སུམ་བརྒྱ་ལྷག་གི་ཉིན་གོང་ཟ་མ་སྟབས་བདེ་ཞིག་ཟས། དེ་དུས་ངས་ཁོ་མོར་གཡག་དང་འབྲི་ཡི་ཁྱད་པར་འགྲེལ་བཤད་བྱེད་དགོས་བྱུང་། རྒྱུ་མཚན་ནི་ཕྱུ་ར་ཚོང་ས་དེ་ཡི་ཕྱུ་རའི་མིང་ལ་གཡག་གི་ཕྱུ་ར་ཟེར་ནས་བྲིས་པ་དེ་ལས་མཆེད་པ་རེད།
ངེད་གཉིས་ཀྱིས་འགྲིམ་འགྲུལ་ལས་ཁུངས་ཤིག་བཙལ་ནས་རྙེད་པ་ལྟར། རྒྱ་གར་འགྲིམ་འགྲུལ་ཁང་དེ་ནས་ང་རང་ལ་གནམ་གྲུའི་འཛིན་བྱང་ཉོ་བའི་གོང་ཚད་དྲིས་དུས། ཧིན་སྒོར་ཁྲི་གསུམ་དང་སུམ་སྟོང་རེད་འདུག ཁོ་མོས་ང་རང་འཁྲིད་ནས་ཉེ་འགྲམ་གྱི་དངུལ་འདྲེན་གློག་སྒམ་ཡོད་ས་ཞིག་འཚོལ་དུ་སོང་། ཁོ་མོས་དངུལ་འདོན་ཐེངས་གཉིས་ལ་ཧིན་སྒོར་ཁྲི་གསུམ་དང་བཞི་སྟོང་ང་ཡི་གནམ་གྲུའི་འཛིན་བྱང་ཆེད་དུ་ཕྱིར་བཏོན། ད་དུང་། ང་རང་འགྲིམ་འགྲུལ་བྱེད་ཆོག་པའི་འགྲིམ་འགྲུལ་བདེ་འཇག་གི་ཡིག་ཆ་བཟོ་བའི་ཆེད་དུ་ཡང་ཧིན་སྒོར་སུམ་སྟོང་ནས་བཞི་སྟོང་གནས་ཀྱི་ཡོད་པ་རེད། ཁོ་མོས་འདི་དག་འཕངས་སེམས་མེད་པར་བཏང་ནས་ཡོང་དུས། དངོས་ནས་ང་རང་ལ་ཚོར་བ་ཁྱད་མཚར་རེ་སྤྲད་ནས་འོང་གི་འདུག
ད་དུང་། ཁོ་མོས་ང་ལ་གནམ་གྲུའི་འཛིན་བྱང་ཉོས། ཡིག་ཆའི་དངུལ་ཡང་གྲྭ་སྒྲིག་བྱས། ཡིན་ཡང་། ཐོངས་ཆེན་རེག་མིན་ཤེས་ཀྱི་མེད་པ་རེད། འདི་ནི་མགྲིན་ཚབ་མས་བཤད་པ་ལྟར་ངེད་གཉིས་ཀྱིས་ལས་ཀ་བྱེད་ཀྱི་ཡོད་པ་རེད། ངའི་སེམས་ནང་དུ་གངས་དཀར་ལྷ་མཚོ་ངས་ཁྱེད་རང་ལ་དྲིན་ལན་འདི་དག་ཇི་ལྟར་ཁ་གསབ་བྱེད་དགོས་སམ། ངོ་མ་ཁོ་མོས་འདི་ལྟར་རང་ཉིད་ལོ་མང་རིང་དུ་དཀའ་ཚེགས་ཆེས་མང་བོ་ཞིག་རྒྱུད་ནས་བསགས་དེ་འོང་བའི་དངུལ་དེ་དག་འཕངས་མེད་དུ་ང་ཡི་ཆེད་དུ་བཏང་ནས་འོང་དུས། ང་རང་ལ་བཤད་མི་ཤེས་པའི་ཚོར་སྣང་ཞིག་གི་སྒོ་ལྕགས་ལྷོད་ཀྱིས་ཕྱེ་ནས་འོང་གི་འདུག ༡༢།༨།༠༨
མུ་འགོད།
