ཐག་རིང་གི་མཛའ་མོ་གངས་དཀར་ལྷ་མཚོ་དང་འཕྲད་དེ་ཟླ་ངོ་བཞི་ལྷག་འདས་པའི་དེ་རིང་གི་བར་དུ་དགའ་སྐྱོའི་ཚོར་བ་སྣ་ཚོགས་ཤིག་གི་སྤྱི་སྡོམ་ནི། ལན་རེ་སྐྱོ་བའི་ཚོར་བ་ཕྲན་པུ་རེ་དང་མང་ཤོས་སུ་དགའ་སྣང་གི་ཚོར་བ་སྤྱིན་པའི་རིང་གི་འཚོ་བ་བསྐྱེལ་སྟངས་འདི་ལ་ཞིབ་དུ་བསམ་གཞིགས་བྱེད་ཐེངས་རེར། ང་རང་ཁོ་མོ་ལ་དུངས་པའི་ཚོར་བ་ནི་ཟབ་དུ་འགྲོ་བཞིན་འདུག
གངས་དཀའ་ལྷ་མཚོས་ང་རང་གི་ཆེད་དུ་བཏང་བའི་འགྲོ་སོང་ནི་ཉུང་ཉུང་མ་ཡིན་པར་ཧིན་སྒོར་ཁྲི་དྲུག་བདུན་ཙམ་ཞིག་ད་ལྟའི་བར་དུ་བཏང་ཚར་སོང་། མང་ཤོས་ནི་ང་རང་གི་སོ་གསུམ་བརྗེ་བོ་བརྒྱབས་པ་དང་གནམ་གྲུའི་གླ་ཆར་སོང་ཡོད། འདི་ནི་མི་ཞིག་གི་དཀའ་སྤྱད་སྡུག་རུས་ལ་བསྟེན་ནས་བྱུང་བའི་དངུལ་ཞིག་ཡིན་སྟབས། ང་རང་གིས་ཀྱང་མི་ཞིག་གི་དྲིན་ལན་དང་བཀའ་དྲིན་ལ་བསམ་ཤེས་མི་བྱེད་ག་ལ་སྲིད། བྱེད་དགོས་པ་ཞིག་ཀྱང་ལོས་ཡིན།
ངེད་གཉིས་ཉི་མ་འདི་དག་གི་རིང་དུ་རྒྱ་གར་བའི་གནའ་ཤུལ་གྱི་འགྲེམ་སྟོན་ཁང་དང་སྐད་གྲགས་ཆེ་བའི་ཁང་བརྩེགས་གསར་བ། དྲ་ཁང་དང་ཚོང་ཁང་། ཆུ་རྐྱལ་ར་བ་སོགས་ཡུལ་སྐོར་བའི་ལྗོངས་རྒྱུ་བྱེད་ས་མང་བོ་ཞིག་ལ་འགྲིམ་འགྲུལ་བྱེད་རྒྱུ་བྱུང་ལ། འཇིག་རྟེན་འདིའི་སྟེང་གི་མིའི་ནུས་པ་དང་འཚོ་བ་བསྐྱེལ་ལུགས། འཇོན་ཐང་བཅས་ལ་གནམ་ས་ལྟ་བུའི་ཁྱད་པར་ཡོད་པ་ངོས་སུ་མིག་གི་དཔྱིད་དང་རྣ་བའི་ལམ། སེམས་ཀྱི་གཏིང་སར་བཅས་ལ་ཚོར་བ་མང་བོ་ཞིག་བཞག་པའི་ཁྲོད་ཀྱི་ཚོར་བ་ཁ་ཤས་ནི། སྙིང་རྗེ་ཟེར་བའི་མིང་ཚིག་ལ་ངེས་པ་རྙེད་དུ་བཅུགས་པའི་ཡུལ་གྱང་རེ་ཟུང་བྱུང་ས་ནི། ཆེས་དབུལ་བའི་མི་ཚོས་འཚོ་བ་བསྐྱེལ་ལུགས་མཐོང་བ་ལས་རྟོགས་སུ་བཅུགས་པ་དང་། བརྩོན་པ་དང་ནུས་ཤུགས་ཡོད་ན་ཅི་ཡང་འགྲུབ་ཟེར་བའི་འབྱུང་གནས་ཀྱང་། ཡར་རྒྱས་ཀྱི་རྣམ་པ་མང་བོ་ཞིག་མིག་གི་དཔྱིད་དུ་མངོན་ཐེངས་རེ་ཤེས་སུ་བཅུགས་སོང་།
ལྷག་པར་དུ་རང་ཉིད་ཅེས་པའི་ལ་རྒྱ་དང་དཔའ་མཛངས་བཅས་ལ་བརྟེན་ནས་མི་ཡུལ་འདིར་ཁྱད་དུ་འཕགས་པའི་གོམ་སྟབས་ཤིག་སྤོ་ཐུབ་པའི་གདེང་ཚོད་དེ་ཡང་རྙེད་དུ་བཅུགས། འཛམ་གླིང་གི་ཆེས་མཐོའི་མི་སྣ་མང་བོ་ཞིག་ལ་ཤོག་བུའི་སྟེང་དང་དེབ་ཀྱི་ནང་གི་གཟུགས་རིས་དེ་ཚོ་མ་གཏོགས། འཛམ་གླིང་གི་མི་དམངས་སྤྱི་ལ་འབྱུང་བཞིན་པའི་དཀའ་ངལ་དང་སྡུག་བསྔལ་དངོས་ཀྱི་ཚོར་བ་སེམས་རྒྱུད་དུ་མྱོང་ཐུབ་ཀྱི་མེད་པའི་གནས་ལུགས་དེ་ཡང་ཤེས་སུ་བཅུགས་སོང་།
ང་རང་གི་གོམ་པ་སྤོ་ཐེངས་རེ་དང་བསམ་བློ་གཏོང་ཐེངས་རེར། ཟ་མ་ཟ་ཐེངས་རེ། ཉལ་ཐེངས་རེ། བླངས་ཐེངས་རེ། མིག་ཕྱེ་བཙུམ་གྱི་བར་དུ། གནས་ལུགས་དང་རྒྱུ་མཚན་ལ་བརྟག་དཔྱད་བྱས་དེ་འགྲོ་དུས་ཀྱི་ང་རང་གི་སེམས་ནང་དུ་འགན་འཁུར་ལྕི་མོ་ཞིག་སླེབས་ཀྱི་འདུག དེ་ནི་མི་ཚེ་འདི་སུའི་ཆེད་དུ་རེད་ཅེས་པའི་དྲི་ལན་ངོ་མ་ཞིག་རྙེད་ཐུབ་མིན་གྱི་སེམས་འཁུར་གཅིག་བུ་རེད།
བོད་པ་ཆེས་མང་བོ་ཞིག་གི་གསལ་ལེ་རྒྱལ་ཟེར་བ་ནི། ཁྲེལ་གཞུང་དང་ཕྱི་ཐག་མེད་པ། ངོ་ཚ་དོར་བའི་མི་ཁྱུ་གཅིག་ལ་ངོས་འཛིན་བྱེད་པའམ་ཡང་ན་གཞན་བསྟེན་ཁོ་ནའི་འཚོ་བ་བསྐྱེལ་བ་ལས་ལས་ཀ་བྱེད་མི་འདོད་མཁན་ཤ་སྟག་དུ་འདོད་ཀྱིན་ཡོད་པ་རེད། ངས་བསམ་བློ་ཞིག་བཏང་ན། གསལ་ལེ་རྒྱལ་དུ་འབོད་པའི་ཕྱི་རྒྱལ་དང་འགྲོགས་པའི་བུ་དང་བུ་མོ་གཞན་དག་གི་བསམ་ཚུལ་ངས་ཤེས་ཀྱི་མེད་ཀྱང་། ང་རང་གངས་དཀར་ལྷ་མཚོ་དང་འགྲོགས་དོན་ངས་ཀྱང་གསལ་བོ་མ་ཤེས་གོང་དུ་མི་མང་བོ་ཞིག་གི་ཕལ་ཆེར་ཐག་བཅད་ཚར་ཡོད་ན་ཐང་། དེ་ལ་ཁྱད་པར་གང་ཡང་མི་འདུག
ངེད་གཉིས་འགྲོགས་འདྲིས་བྱུང་ས་ནི། རྡ་ས་མེག་ལོར་རྒན་རྗེའི་དག་ཞིང་གི་ཟ་ཁང་དུ་ཡིན། དེ་དུས་ང་རང་དག་ཞིང་ཟ་ཁང་གི་མ་བྱན་ཡིན། ང་ཚོས་ཟ་ཁང་དུ་ཟ་མ་ཟ་རུ་ཡོང་མཁན་མང་ཤོས་ནི་ཡུལ་སྐོར་སྤྲོ་འཁྱམས་དུ་ཡོང་མཁན་གྱི་ཕྱི་རྒྱལ་བ་ཡིན། ཟ་མ་ཡང་ཕྱི་རྒྱལ་བའི་ཟ་མ་རྐྱང་རྐྱང་བཟོ་ཡི་ཡོད། ཟ་ཁང་ནང་གི་འགན་འཛིན་གྱིས་ང་རང་ལ་དབྱིན་དགེ་རུ་ངོ་སྤྲོད་བྱས་ནས་ངེད་གཉིས་ཟླ་ངོ་གཅིག་ལྷག་གི་རིང་དུ་ཕན་ཚུན་བར་དུ་དགེ་སློབ་ཀྱི་བར་ནས་བསྡད། དེ་དུས་ང་རང་གཅིག་བུའི་དབྱིན་དགེ་ཡང་མིན། ང་རང་ལ་རོགས་པ་རྒྱ་མཚོ་ཡང་ཡོད། གང་ལྟར། ངེད་གཉིས་སྔ་གཞུག་བྱས་དེ་ཉིན་གཅིག་ལ་ཆུ་ཚོད་གསུམ་ཙམ་གྱི་རིང་དུ་དབྱིན་ཡིག་ཁྲིད་ཀྱི་ཡོད།
འདི་ལྟར་ཟླ་ངོ་གཅིག་ཙམ་གྱི་རྗེས་སུ་ཁོ་མོའི་ང་རང་ལ་བརྩེ་བ་ནི་ཆུ་དྭངས་མོ་ལྟ་བུ་རེད། ཧ་ཅང་དྲི་མ་མེད་པ་ཞིག་ཡིན་ཟེར་བའི་ཁ་པར་ནང་དུ་འཕྲིན་ཐུང་ཞིག་སྐུར་ནས་འགོ་བཙུགས་དེ་ངེད་གཉིས་ཀྱི་ཐོག་མའི་གླེང་གཞི་དེ་ནས་འགོ་བརྩམས་པ་ཡིན། ཉིན་མ་དེ་ནི་ང་རང་གི་གུང་གསེང་རེད། ངེད་གཉིས་རྒྱུགས་ཆུ་ཞིག་གི་འགྲམ་ནས་ཉིན་བཀང་བོར་ལུས་སོང་། ཕྱི་དྲོ་ངེད་གཉིས་ལྷན་དུ་ཁོ་མོ་བསྡོད་སའི་མགྲོན་ཁང་ནང་དུ་སོང་། སྤྱིར་ན་ང་རང་ལས་ཀ་བྱེད་སའི་ཟ་ཁང་དུ་ཉལ་གྱི་ཡོད་མོད། ངེད་གཉིས་ངོ་ཤེས་དེ་ཉིན་དེ་ཡི་བར་དུ་མཉམ་དུ་ཉལ་མྱོང་མེད་ལ། ཕོ་མོའི་བར་གྱི་སྐད་ཆ་གང་ཡང་མེད། དེ་ཉིན་སྐད་ཆ་འགོ་དང་ལུས་པོ་གཞུག་དུ་ཁྲིད་ནས། ཁོ་མོའི་མགྲོན་ཁང་ནང་དུ་ངེད་གཉིས་ལྷན་དུ་བསྡད། ༩།༥།༠༨དགོང་མོ་དེར་ཐོག་མའི་ལུས་འབྲེལ་བྱུང་། དེ་ཡང་ཕན་ཚུན་ལ་དྲི་བ་གང་ཡང་མེད་པར་རང་དབང་གི་ཚོར་བ་ཞིག་གིས་ངེད་གཉིས་ཀྱི་བར་ན་འགྱིག་ཤུབ་སོགས་གང་ཡང་མེད་པར་འདོད་པའི་བདེ་བ་ལ་ཞུགས་སྟངས་དེ་ཡང་ཕྱི་རྒྱལ་བའི་ལུགས་ངས་མི་ཤེས་ལ། ཕྱི་རྒྱལ་བ་དག་ལ་ལུགས་གཞན་དག་ཞིག་ཡོད་པ་ཁོ་མོས་ཀྱང་ང་ལ་གང་ཡང་བཤད་མ་སོང་ལ། ཁོ་མོ་ལ་ཡང་དེ་འདྲའི་ཁྱད་མཚར་གྱི་འཁྲིག་པ་སྤྱོད་སྟངས་ཤིག་ཡོད་མེད་ཀྱང་མི་ཤེས། ང་རང་འཚབ་འཚུབ་དང་བྲེལ་བྲེལ་ངང་ཁོ་མོའི་སྟེང་དུ་ཞོན། ༢༠།༨།༠༨
མུ་འགོད།
