གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། སོ་བརྒྱད།

ཕྱིར་མགྲོན་ཁང་དུ་འབྱོར་དུས་སུ་ས་རུབ་སོང་། ཆུ་ཚོད་བརྒྱད་ཙམ་རེད། ངེད་གཉིས་ཀྱི་མགྲོན་ཁང་གི་སྒོ་ཐག་ཐག་ཐག་བརྡུང་བཞིན་འདུག མོ་རང་སོང་ནས་སྒོ་ཕྱེ་སོང་། ཁོ་མོས་བཤད་རྒྱུར་ཐོ་འགོད་བྱེད་དུ་ཤོག་ཟེར་གྱི་འདུག་ཟེར། སྐབས་དེར་ཁོ་མོས་རྒྱབ་ཁུག་ཆུང་ཆུང་དེ་བསྔོགས་སོང་། གློ་བུར་དུ་ཁོ་མོ་ཧང་སངས་པའི་རྣམ་འགྱུར་དང་ཟེར་རྒྱུར། འུ་གཉིས་ཀྱི་ལག་ཁྱེར་འཁྱེར་མི་འདུག་ཟེར། དེ་དུས་ང་རང་ཡང་འཚབ་འཚུབ་དུ་གྱུར་སོང་།

ང་རང་དེ་མ་ཐག མགྲོན་ཁང་གི་འགན་འཛིན་རྒྱ་གར་བ་དེ་ཡི་གམ་དུ་སོང་ནས་གསལ་བཤད་ཅིག་བྱས་ཀྱང་། མི་དེ་ཡིས་རྣམ་འགྱུར་གློ་བུར་དུ་འགྱུར་ནས། ངས་ཞུས་པའི་སྐད་ཆ་ཚིག་གཅིག་ཀྱང་མི་ཉན་པར། ཁྱེད་གཉིས་ད་ལྟ་རང་ཅ་དངོས་དག་བསྡུ་གསོག་བརྒྱབས་ནས་ཕྱི་རུ་འབུད་མ་གཏོགས། ང་རང་ལ་གཉེན་རྟོག་པའི་བཙོན་ཁང་དུ་འཇུག་ངེས་རེད། ད་ལྟ་བར་དུ་ཆུ་ཚོད་དེ་དག་གི་རིན་ཞིག་སྤྲད་ནས་ཕྱི་ལོག་དུ་འབུད་དགོས་ཟེར། ང་རང་ཕྱིར་མགྲོན་ཁང་དུ་ཡོང་ནས་གངས་དཀར་ལྷ་མཚོ་ལ་དེ་ལུགས་བཤད་དེ་ངེད་གཉིས་ཀྱིས་ཅ་ལག་མགྱོགས་པོ་བསྡུ་གསོག་བརྒྱབས་དེ་མགྲོན་ཁང་དེ་ནས་ཕྱི་ལ་ཐོན།

སྲང་ལམ་ནས་གློག་ཀླད་ཁང་ཞིག་དུ་སོང་ནས་ལག་ཁྱེར་གྱི་འདྲ་བཤུས་ཤིག་མོ་རང་གིས་དྲ་རྒྱ་བརྒྱུད་ནས་ཕྱིར་འདོན་དགོས་བསམ་ན་ཡང་། དྲ་ཁང་དེ་ཡི་རྒྱ་གར་བུད་མེད་དེའི་ལག་ཁྱེར་གྱི་ཨང་གྲངས་འཁྱེར་ཕྱོགས། དེ་མེད་ན་དྲ་ཁང་ནས་གློག་ཀླད་བེད་སྤྱོད་གཏོང་ཆོག་གི་མ་རེད་ཟེར་བའི་སྐད་ཆ་དེ་ཡིས་ང་རང་རེ་ཞིག་རིང་ཧད་དུ་བཅུགས་སོང་། རྒྱ་གར་གྱི་ས་གནས་ཆེས་མང་བོ་ཞིག་ལ་བསྐྱོད་མྱོང་ན་ཡང་། དྲ་ཁང་དུ་གློག་ཀླད་བེད་སྤྱོད་གཏོང་བ་ལ་ལག་ཁྱེར་གྱི་ཨང་གྲངས་སྟོན་དགོས་པ་ཞིག་རིག་མྱོང་གང་ན་ཡོད། གོ་བ་དང་བོ་ཡིན། ན་བའི་སྒང་ལ་རྡོག་བརྫུས་ཟེར་བ་འདི་མིན་ན་གང་རེད། ངེད་གཉིས་ཨ་ཐང་ཆད་དེ་ཕྱིར་རྡེ་ར་སྒྲོང་དུ་འགྲོ་བའི་རླངས་འཁོར་འབབ་ཚིགས་དུ་ཡོང་། རྒྱ་གར་ཇ་ཁང་ཆུང་ཆུང་ཞིག་གི་ནང་ནས་ཆུ་ཚོད་དགུ་དང་ཕྱེད་ཀའི་རླངས་འཁོར་ལ་སྒུག་པ་ཡིན།

ཆུ་ཚོད་དགུ་དང་ཕྱེད་ཀ་སླེབས་སོང་། རླངས་འཁོར་འབབ་ཚིགས་དུ་སོང་ནས་སྐད་ཆ་བསྐྱར་འདྲི་ཞིག་གི་ལན་དུ། དོ་ནུབ་རླངས་འཁོར་འགྲོ་མཁན་མི་འདུག་ཟེར་བ་གོ་རྗེས། ང་རང་ལ་ལྷག་དུ་བྲེལ་འཚུབ་ཆེ་རུ་སོང་། ཁོ་མོ་ལ་སྐད་ཆ་དྲིས་དེ་ངེད་གཉིས་ཀྱིས་གླ་བྱེད་རླངས་འཁོར་ལ་སྐད་ཆ་བཤད། ཁ་ཤས་ཀྱི་ཧིན་སྒོར་དྲུག་བརྒྱ་ནས་བདུན་བརྒྱ་བར་གྱི་སྐད་ཆ་བཤད་ཀྱི་འདུག སྐབས་དེར་གྲོགས་པོ་བརྩོན་འགྲུས་ལ་ཁ་པར་བཏང་ནས་ངེད་གཉིས་ལ་ཀ་ལི་མིན་གྲོང་དུ་ཡོང་གི་ཡོད། བཀྲིས་འཁྱིལ་མགྲོན་ཁང་ནང་དུ་ངེད་གཉིས་ལ་འདང་ནུབ་ཀྱི་ཁང་བ་དེ་ལེན་རོགས་ཞུས་པ་ཡིན།

ཡར་མར་བཅོ་བརྒྱད་ཅིག་བཤད་པའི་མཐར་ཧིན་སྒོར་སོ་གཅིག་གི་ལམ་ཁར། ཧིན་སྒོར་ལྔ་བརྒྱ་སྤྲད་ནས་ཕྱིར་རྡེ་ར་སྒྲོང་དུ་ཡོང་། རྡེ་ར་སྒྲོང་ནས་ཀ་ལི་མིན་གྲོང་བར་རྐང་གསུམ་སྤག་སྤག་ཞིག་གླས་དེ་ཀ་ལི་མིན་གྲོང་དུ་འབྱོར་གྲབས་ཡོད་དུས་སུ། རྐང་གསུམ་སྤག་སྤག་གི་ཁ་ལོ་བ་ར་བཟི་དེ་ཡིས་རྙོག་དྲ་མང་བོ་ཞིག་བཤད་འགོ་བཙུགས། ཡོང་ས་ནས་བཤད་པའི་སྒོར་མོ་དེ་ལས་བསྡབས་གཉིས་དགོས། མི་སྟེར་ན་ཁོ་མི་འགྲོ་ཟེར་ནས་ངེད་གཉིས་ས་སྟོང་དེ་ནས་མཚན་དཀྱིལ་དུ་ས་རུ་འབབ་དུ་བཅུགས། ངས་མི་དེ་ཡིས་སྐྱག་རྫུན་དང་འགོ་སྐོར་གཏོང་ལུགས་དེ་མཐོང་ནས་གླ་ཆ་སྐར་གང་ཡང་མི་སྟེར། ཁྱེད་རང་གིས་ངེད་གཉིས་འགྲོ་ས་བར་དུ་མི་བསྐྱལ་བ་ཡིན་ན་ཞེས་བཤད་དུས། ཁོ་རང་དང་ཁོ་རང་གི་རོགས་པ་དེ་གཉིས་ཀྱིས་ངས་སྟེང་ལ་ཤོར་ནས་བརྡུང་གྲབས་བྱེད་ཀྱིན་པའི་སྐབས་དེར། མོ་རང་གིས་གཡུགས་ཤོག་ཟེར་ནས་སྒོར་མོ་བཏོན་ནས་སྤྲད་སོང་། རྐང་ལམ་ཞིག་བརྒྱུད་དེ་སྤྱི་ལེ་གཅིག་ལྷག་ཙམ་གྱི་རྗེས་སུ་བཀྲིས་འཁྱིལ་མགྲོན་ཁང་དུ་སླེབས་དུས། མཚན་དཀྱིལ་ཏག་ཏག་ལ་འཁེལ་འདུག

གངས་དཀར་ལྷ་མཚོས་ཅ་ལག་ཚང་མ་རྒྱབ་ཁུག་ཆེ་ཆུང་གཉིས་ནས་ཕྱིར་བཏོན་རྗེས། ཚ་ལུ་མ་གཉིས་ཀྱི་ཤུན་འཔག་བླངས་དེ་ཟ་ཞོར་དུ་ང་རང་ལ་སྒུག ཕར་བལྟས་ཚོད་ཀྱིས་མོ་རང་ཡང་ཐང་ཧ་ཅང་ཆད་འདུག་ལ། ཁོ་མོས་ཟེར་རྒྱུར། ངས་བཤད་མྱོང་། ཡུལ་བསྐོར་ལྗོངས་རྒྱུ་བྱེད་རྒྱུ་ལས་སླ་བོ་མ་རེད། བལྟས་དང་། མཚམས་མཚམས་སུ་བཤད་མི་ཤེས་པའི་དོན་དག་བྱུང་ངེས། དེ་ནས་ཁོ་མོས་སྒྲ་གདངས་མི་དག་པའི་ཨམ་སྐད་ཀྱིས་ང་རང་ལ་ཨ་རོགས་ཟེར། ༢༤།༠༨།༠༨

མུ་འགོད།