དེ་རིང་གཟའ་མིག་དམར་ཉིན་ཨབ་གྷན་སྲིད་འཛིན་གྱི་སྤུན་མཆེད་ལྐོག་གསོད་གཏོང་མཁན་ལག་དམར་བསད་དེ། ཁོའི་ཕུང་བོ་ཀཱན་ཌཱ་ཧར་(Kandahar) གྲོང་ཁྱེར་གྱི་ཁྲོམ་གཞུང་གི་རྩིག་ངོགས་ཤིག་ཏུ་སྐར་མ་ ༢༠ ཙམ་རིང་ཕྱང་ཡོད་འདུག
ཨབ་གྷན་སྲིད་འཛིན་གྱི་ཕྱེད་སྤུན་མཆེད་ཀཱར་ཛའེ་ (Ahmed Wali Karzai) ནི་ཟླ་འདིའི་ཚེས་ ༡༢ ཉིན་ལྐོག་གསོད་བཏང་ཡོད་ཅིང་། ལག་དམར་ནི་ཁོང་གི་སྐུ་སྲུང་དམག་གི་མགོ་དཔོན་དང་སྐྱེས་ཡུལ་གཅིག་པ་ཡིན་པ་མ་ཟད། འདས་པའི་ལོ་ ༧ ཙམ་རིང་འགྲོག་འདྲིས་ཟབ་མོ་ཡོད་མཁན་གྱི་གྲོགས་པོ་ཞིག་ཡིན་འདུག
ཀཱར་ཛའེ་ཟེར་བ་དེ་ཨབ་གྷན་ལྷོ་ཕྱོགས་ས་ཁུལ་ནང་དབང་ཤུགས་ཆེན་པོ་ཡོད་མཁན་ཞིག་ཡིན་སྟབས། ཁོང་ལྐོག་གསོད་བཏང་རྗེས་ཏཱ་ལི་བྷན་སྒྲིག་འཛུགས་ཀྱིས་ཀཱར་ཛའེ་ལྐོག་གསོད་བཏང་པའི་རྒྱབ་ལྗོངས་ན་ཁོ་ཚོ་ཡོད་ཚུལ་དང་། ཁོས་དབྱིན་ཇི་དང་ཨ་རི་སོགས་དང་མཉམ་འབྲེལ་བྱེད་ཀྱི་ཡོད་པར་བརྟེན་ལྐོག་གསོད་བཏང་པ་ཡིན་ལུགས་བསྒྲགས་ཡོད་པ་རེད། འོན་ཀྱང་། ཨབ་གྷན་གཞུང་གིས་དོན་རྐྱེན་དེ་ནང་ཁུལ་ལ་རྩོད་རྙོག་བྱུང་པ་ཞིག་ཡིན་པ་དང་ཏཱ་ལེ་བྷན་ལ་འབྲེལ་པ་ཡོད་མེད་བཅས་ཀྱི་དོགས་གཞི་གཉིས་ཡོང་གི་ཡོད་འདུག
ཨབ་གྷན་ནང་ཨ་རི་དང་རྒྱལ་ཚོགས་དམག་གི་ཐེ་ཇུས་མགོ་བཙུགས་པ་ནས་ལོ་རེ་བཞིན་ཨབ་གྷན་ནང་གི་དྲག་སྤྱོད་པའི་འཇིགས་རྒོལ་ཤུགས་ཆེ་རུ་འགྲོ་བཞིན་ཡོད་འདུག
གསར་འགོད་པ། བནྡེ་སྐྱབས།
དཀོན་མཆོག་མཁྱེན། དེ་འདྲ་མ་བྱེད་བུ། ཨོ་མ་ནིཔདྨེ་ཧྰོུ།
ཕན་ཐོག་མེད་པའི་ལས་འདི་འདྲ་ངོ་མ་སྙིང་རྗེ་ཡུལ་ལས་མ་འདས། འདི་ལྟར་མི་ཡོང་པར་མྱུར་དུ་ཞི་འགྲིག་ཡོང་བའི་སྨོན་འདུན་ཞུ།