གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ཞེ་གསུམ།

སྔ་བོ་ནས་ཡར་བླངས་དེ་གངས་དཀར་ལྷ་མཚོའི་ཨ་མ་ཡིས་ང་ཚོ་གསུམ་རླངས་འཁོར་ས་ཚིགས་དུ་མོ་རང་གི་སྒེར་འཁོར་ནང་དུ་བསྐྱལ། ཝན་དང་ང་ཚོ་གསུམ་རྗོ་སུ་ལམ་རླངས་འཁོར་ས་ཚིགས་ནས་ཀྲེ་ལས་བས་གྲོང་ཁྱེར་གྱི་རླངས་འཁོར་ས་ཚིགས་དུ་འབྱོར་མ་ཐག ངེད་གཉིས་ཀྱིས་གླ་བྱེད་རླངས་འཁོར་ཞིག་ཁྲིད་ནས་རྒྱ་གར་གཞུང་ཚབ་ཁང་དུ་ང་རང་གི་ཐོངས་ཆེན་ལག་ཁྱེར་ཕྱིར་འགྱངས་བྱེད་ཆེད་དུ་བཅར།

གྲོང་ཁྱེར་ཀྲེ་ལས་བས་ནི་མཚོ་འགྲམ་ཞིག་དུ་ཆགས་ཡོད་ལ། རྒྱ་གར་གཞུང་ཚབ་ཁང་ཡོད་ས་ནས་མཚོ་འགྲམ་དུ་གོམ་པ་བརྒྱབས་ཚེ། སྐར་མ་ལྔ་དྲུག་ཞིག་ལས་འགྲོ་དགོས་ཀྱི་མི་འདུག གཞུང་ཚབ་ཁང་དུ་འབྱོར་མ་ཐག ཐོ་འགོད་བྱས་དེ་སྣེ་སྟོན་མའི་ཅུང་ཙམ་སྒུག་རོགས་ཟེར་བ་ལྟར། ངེད་གཉིས་ཀྱིས་ཡུན་རིང་སྒུག་དགོས་བྱུང་།

ཨེས་སུ་རལ་གྱི་སྒོར་མོ་ལ་ཤིས་ཀར་ཟེར་བ་དང་ཨ་སྒོར་གཅིག་ལ་ཤིས་ཀར་གསུམ་དང་ཕྱེད་ཡིན། ཤིས་དཀར་ཉིས་བརྒྱ་ཡིག་ཆ་བཟོ་བའི་ཆེད་དུ་དགོས་རབས་བཤད་པ་ལྟར་སྤྲད། ཡིག་ཆ་གཉིས་དགོས་པའི་ནང་ནས་གཅིག་གཟའ་ཟླ་བ་ལ་རེག་པ་དང་། གཞན་པ་དེ་ནི་ཟླ་བ་གཅིག་ཏག་ཏག་འགོར་ངེས་རེད་ཟེར། རྒྱུ་མཚན་ནི་ང་རང་གི་ལག་ཁྱེར་གྱི་འདྲ་བཤུས་རྒྱ་གར་དུ་བཏང་ནས་ང་རང་ལ་ཁྲིམས་འགལ་གྱི་ནག་ཉེས་སོགས་ཡོད་མེད་ལ་ཞིབ་གཤེར་བྱེད་དགོས་པ་དང་དེ་འདྲའི་སྐྱོན་ཆ་གང་ཡང་མེད་ཚེ་ཡིག་ཆ་དེ་རྒྱ་གར་ནས་ཚུར་ཐམ་ག་ཞིག་བརྒྱབས་དེ་ཕྱིར་གཞུང་ཚབ་དུ་འབྱོར་ངེས་རེད་ཟེར།

མཛའ་མོ་ངེད་གཉིས་ཀྱིས་ལས་ཀ་དེ་དག་ཚར་རྗེས་སུ་མཚོ་འགྲམ་དུ་བཅར། མཚོ་འགྲམ་དེ་ནི་དངོས་ནས་སྐྱིད་སྣང་ལྡན་པ་ཞིག་དང་མི་མང་སྣ་འདུས་ཤིག་རེད། དེ་ཁུལ་དུ་ཡོད་པའི་མགྲོན་ཁང་མང་ཤོས་ཤིག་གོང་ཆེན་ཡིན་པ་དང་ཕྱུག་ཆེན་དག་བསྡོད་ས་ལྟ་བུ་རེད་འདུག་ལ། འཚིག་ཇ་འཐུང་ས་དང་ཟ་ཁང་སོགས་ཀྱང་དངོས་ནས་ཧ་ལས་པའི་བརྫིག་པོ་འདུག་པ་མ་ཟད། སྤུས་གཙང་ཁམས་ལེགས་ཀྱང་རེད་འདུག ཆེད་དུ་ཡུལ་བསྐོར་བ་རྒྱུ་ཆེན་དང་རྒྱལ་ཁབ་འདིའི་ནང་གི་མི་ཆེན་དཔོན་ཆེན་ཚོའི་ལོང་སྤྱོད་བྱེད་ས་ལྟ་བུ་ཡིན་པར་བཤད།

ཉིན་རྒྱབ་དུ་ངེད་གཉིས་ཁོ་མོའི་གྲོགས་པོ་ཁ་ཤས་དང་མཉམ་གཅིག་དུ་གྲོང་ཁྱེར་ནང་གི་ཟ་ཁང་ཆུང་ཆུང་ཞིག་གི་ནང་དུ་ཁོང་ཚོའི་སྲོལ་རྒྱུན་གྱི་གཟའ་པ་སངས་ཀྱི་ཟ་མའི་རིགས་ཟ་རུ་སོང་བ་ཡིན། ཧ་ཅང་ཞིམ་པོ་འདུག་ལ་ཚང་མ་ཕར་བལྟས་ཚོད་ཀྱི་བཅུད་ཆེན་ཤ་སྟག་རེད། ཟ་ཁང་ཆུང་ཆང་དེ་ནས་རྒ་ལས་ཡ་སླར་ཡང་ཐུག་སྐབས་ང་རང་ལ་ཐུན་མོང་མ་ཡིན་པའི་ཚོར་སྣང་ཞིག་སླེབས་པ་ནི། ཁོ་མོ་དང་འཕྲད་སྐབས་ཆེས་གྲོགས་པོ་རྙིང་བ་ཞིག་དང་འཕྲད་པ་ལྟ་བུ་བྱུང་།

ཕྱི་དྲོ་མཛའ་མོའི་ཨ་ཅེ་ནང་མི་གསུམ་གྱིས་མགྲོན་དུ་བོས་པ་ལྟར། ངེད་གཉིས་གཟའ་མི་གསུམ་གྱི་སྒེར་འཁོར་ནང་དུ་བསྡད་ནས་མོ་རང་གི་ཨ་ཅེ་ཡི་ནང་དུ་བཅར། དགོང་ཟས་དངོས་ནས་གྲྭ་རྒྱས་པོ་ཞིག་བཟོས་འདུག མོ་རང་གི་ཨ་ཅེ་ནི་རི་མོ་སྒྱུ་རྩལ་བ་དང་སེམས་ཁམས་གསོ་སྐྱོང་རིགས་པའི་ཆེད་སྤྱོང་བ་ཞིག་རེད་འདུག་ལ། ཁྱོ་ག་ནི་གློག་ཀླད་ཆེད་མཁས་པ་ཞིག་རེད། ཁོང་བཟའ་མི་གཉིས་ལ་བུ་མོ་གཅིག་ལས་མེད་པ་དང་། བུ་མོའི་མིང་ལ་ཤས་ར་ཟེར་གྱི་འདུག

ཨ་ཅེ་ཡི་རྒན་པོའི་མིང་ལ་མེ་ཝལ་དང་ཁོ་མོའི་མིང་ལ་ཀ་རན་ཟེར་གྱི་འདུག མེ་ཝལ་ངེད་གཉིས་ཀྱིས་དགོང་ཟས་ཀྱི་རྗེས་སུ་བོད་རྒྱའི་བར་གྱི་གནད་དོན་སེལ་ཐབས་སུ་ལམ་ཁ་གང་ཞིག་འཚོལ་བཞིན་ཡོད་པ་རེད་ཅེས་དྲིས་པའི་ལན་དུ། ང་རང་གིས་འཚེ་མེད་ཞི་བའི་ལམ་ཁ་ཁོ་ན་ཡག་ཤོས་རེད་ཅེས་བསམ་ཚུལ་བཤད་དུས། ཁོས་ང་ལ་ད་ལྟའི་བར་དུ་འཛམ་གླིང་གི་རྒྱལ་ཁབ་ཆེས་མང་བོ་ཞིག་ཤོར་མྱོང་ན་ཡང་། རྒྱལ་ཁབ་གང་ཞིག་དམག་འཐབ་མ་བྱས། ཤ་ཁྲག་གི་འགྲོ་སོང་མ་བཏང་བར་རང་དབང་བསྐྱར་གསོ་བྱེད་མཁན་གྱི་རྒྱལ་ཁབ་སུ་ཞིག་ཡང་ལོ་རྒྱུས་ཀྱི་སྟེང་ནས་བྱུང་མྱོང་མེད་པ་རེད་ཅེས་བཤད་དུས། ཁོ་རང་གི་གྲོགས་པོ་གཞན་དེ་གཉིས་ཀྱིས་གླེང་ཕྱོགས་བོད་ཀྱི་གོམ་གཤིས་ཐད་དུ་བསྒྱུར་སོང་།

བཟའ་མི་གསུམ་ནི་ཕར་བལྟས་ཚོད་ཀྱི་སྐྱིད་སྣང་ལྡན་པ་ཞིག་འདུག་ལ། ཁང་བ་ཡང་དངོས་ནས་ཧ་ལས་པའི་བརྫིག་པོ་ཞིག་ཉོས་ནས་ལོ་ཁ་ཤས་ཤིག་སོང་འདུག ནང་གི་ཅ་དངོས་ཚང་མ་དེང་རབས་ཀྱི་ཅ་ལག་རྐྱང་རྐྱང་རེད། ནང་གི་ཆ་རྐྱེན་ཡང་ཧ་ལས་པའི་ཡག་པོ་འདུག དགོང་མོ་ངེད་གཉིས་དེ་ནས་བསྡོད་རྒྱུར་སྐུལ་བ་ལྟར། ངེད་གཉིས་ལ་གྲྭ་སྒྲིག་བྱས་པའི་ཉལ་ཁང་དུ་བྱིན་པ་ཡིན། ༡༣།༩།༠༨

མཛའ་མོའི་ཨ་ཅེ་ཡིས་ནང་ནས་ཞོགས་ཇ་དལ་འཐུང་ཞིག་བྱས་ནས་ང་ཚོ་གསུམ་སྙན་གྲགས་ཆེ་བའི་བྲག་ཕུགས་ཤིག་ལ་ལྟ་སྐོར་དུ་སོང་། བྲག་ཕུགས་དེ་ཡི་ནང་གི་བྲག་ཛ་མཛེར་དེ་དག་ལ་ལོ་ངོ་ས་ཡ་གཅིག་ལྷག་གི་ལོ་རྒྱུས་ལྡན་རབས་ཟེར། སྐབས་དེར་དངོས་ནས་དངོས་ཁམས་རིགས་པའི་ཞིབ་དཔྱོད་ཀྱི་གྲུབ་འབྲས་དེ་དག་གིས་ཐོན་འབྲས་དེ་དག་ནི་རང་ཡུལ་གྱི་བོད་མི་དག་གི་ཐོད་པ་ལྟིག་ཞིང་གནས་ཆེན་དུ་འབོད་པའི་ཡུལ་དེ་དག་ལ་ཞིབ་འཇུག་རེ་བྱེད་ཐུབ་ན་སྐྱིད་པ་ལའང་སྙམ་ཞོར་དུ་ང་རང་ཁོ་གཉིས་ཀྱི་འགྲེལ་བཤད་ལ་ཉན་བཞིན་་ཁོ་གཉིས་ཀྱི་རྗེས་སུ་སོང་། དངོས་ནས་ཚ་བ་ནི་ཧ་ཅང་ཚ་བོ་འདུག མོ་རང་གི་ཨ་ཅེ་ཀ་རན་གྱིས་ང་ཚོ་གསུམ་ལ་ཤིང་ཏོག་རིགས་དང་འོ་མ་བསྲེས་པའི་འཁྱག་སྤྲི་རེ་ཉོས་དུས། ངའི་སེམས་སུ་ཕྱི་རྒྱལ་བས་རང་རང་གི་སྒོར་མོ་རང་རང་གི་གཏོང་སྲོལ་ཡོད་པ་ཡིན་ན་ཡང་། ངའི་མཛའ་མོ་དང་ཨ་ཅེ་ཡི་འབྲེལ་བ་འདིས་བོད་ཀྱི་གོམ་གཤིས་དང་ཐག་ཉེ་བོ་ལྟ་བུ་ཞིག་འདུག་ཨང་བསམ་དུ་བཅུགས།

ཕྱིར་ལོག་ནས་མཛའ་མོའི་ཨ་ཅེ་ཡིས་ཁོང་ཚོའི་ཟས་རིགས་ཁ་ཤས་ཤིག་བཟོས་ཤིང་། ངས་ཤ་མེད་འཐེན་ཐུག་བརྔོས་མ་ཞིག་བཟོས་པ་དེར། ཁོང་ཚོ་ཚང་མས་དགའ་བོ་བྱུང་། དོ་ནུབ་ཀྱང་སླར་ཡང་ངེད་གཉིས་མོ་རང་གི་ཨ་ཅེ་ཡི་ནང་དུ་བསྡོད་རྒྱུ་ཐག་བཅད་སོང་། ངེད་གཉིས་ནི་འགྲུལ་བ་ལྟ་བུ་ཞིག་ཆགས་ཡོད། ཡར་མར་ཉུལ་ནས་བསྡད་ཡོད་པ་རེད། གཅིག་ནས་ང་རང་རྒྱལ་ཁབ་འདི་ལ་གསར་དུ་འབྱོར་བ་དང་། གཉིས་ནས་མོ་རང་ལ་ཡང་ལས་ཀ་མེད། གསུམ་ནས་མོ་རང་གིས་ང་རང་གི་ཐོངས་ཆེན་ཕྱིར་འགྱངས་ཀྱི་ཆེད་དུ་སེམས་ཚེགས་ཀྱིས་མོ་རང་གི་ལས་ཀ་ཞིག་གསར་དུ་འཚོལ་བའི་མདུན་པ་དེ་ད་ལྟ་མེད་པར་གྱུར་ཡོད། ༡༤།༩།༠༨

མི་ཞེས་པ་འདི་ལ་ཐུན་མོང་མ་ཡིན་པའི་ཤེས་པ་ཞིག་གི་དབང་སྒྱུར་ཡོད་སྟབས། སེམས་ནང་གི་དྲན་ཚུལ་མཐའ་དག་ལ་མི་འདྲ་བའི་ཆ་མང་བོ་ཞིག་ཡོད་པ་ཡིན་དུས། འཛམ་གླིང་འདིར་འཚོ་བཞིན་པའི་སྐྱེ་བོ་མིའི་རིགས་ཀྱི་ངལ་རྩོལ་དང་འཇོན་ཐང་ཡང་དེ་མཚུངས་ཀྱི་མི་འདྲ་བའི་ཕྱོགས་ཧ་ཅང་མང་བོ་ཞིག་བྱུང་གི་ཡོད་པ་དེ་ཡང་ཅི་ཡང་སྲིད་པ་ཞིག་ལོས་ཡིན།

ང་རང་མཛའ་མོ་གངས་དཀར་ལྷ་མཚོ་ལ་བརྟེན་ནས་ཟ་འཐུང་འགྲོ་འདུག་ཡོད་ཚད་ཀྱི་འབྱུང་གནས་ད་ལྟའི་འཆར་ཁོ་མོ་ཆགས་ཡོད་ལ། ང་རང་ལ་སྒོར་མོ་སྐར་བཀང་གི་ཡོང་ཁུངས་མེད་པར་ཁོ་མོས་ལོ་མང་རང་གི་གསོག་དངུལ་ཁྲོད་དུ་ང་རང་འཚོ་ཡོད་ཀྱང་། ད་ལྟའི་འཆར་ང་ལ་དམིགས་བསལ་གྱིས་དཀའ་ངལ་གང་ཡང་འཕྲད་ཀྱི་མེད། འདི་ནི་བོད་པ་དག་གིས་འབོད་བཞིན་པའི་གསལ་ལེ་རྒྱལ་ཞིག་གི་ཕྱི་རོལ་ཞིག་ན་འཚོ་བ་ཞིག་མི་རིགས་གཞན་གྱི་བུད་མེད་གཅིག་ལ་བསྟེན་མཁན་གྱི་ང་རང་རེད། འདི་ནི་ཁོ་མོས་ང་ལ་བཅིངས་པའི་དགའ་བ་ཡིན་པར་བཤད་ཆོག ཡིན་ཡང་། ང་རང་གིས་སྒོར་མོ་གཅིག་ཡང་འཚོལ་མི་ཐུབ་པའི་གནས་སྐབས་འདིར། ང་རང་གི་སེམས་ནང་དུ་མ་བདེ་བའི་ཚོར་བ་ཕྲན་པུ་རེ་བྱུང་གི་འདུག་ན་ཡང་། གནས་སྐབས་རིང་གི་འཚོ་བ་འདི་ལྟར་མི་བསྐྱལ་རང་དབང་དང་གདམ་ག་གཞན་ང་ལ་ལུས་མེད། འོན་ཀྱང་། ཁོ་མོ་ད་ལྟའི་འཆར་ང་ལ་ཧ་ཅང་བཟང་གི དེ་རིང་ངེད་གཉིས་ཁོ་མོའི་ཨ་ཅེ་ཡི་ནང་དུ་ཁ་ཁར་ནས་ཕྱིར་མོ་རང་གི་ཨ་མ་ཡི་ནང་རྗོ་སུ་ལམ་གྱི་གྲོང་བརྡལ་ར་མོ་ཀྲི་ལ་ཡོང་།

ལམ་བར་དུ་ངེད་གཉིས་ཚོང་ཁང་དང་དཔེ་ཁང་ཆེས་མང་བོ་ཞིག་ལ་ཉུལ་སྐབས། ང་རང་གི་སེམས་ནང་དུ་ཨ་ཙི་བོད་མི་ཚོ་ལ་ཡང་ནང་ཞིག་ཡོད་རྒྱུ་ན། དེ་རིང་ང་རང་གི་དཔེ་དེབ་དེ་དག་ཡང་ཚོང་ཁང་ཞིག་གི་ནང་དུ་འདི་ལྟར་བཤམས་ཡོད་ངེས་རེད་སྙམ་ཞོར། ཁོ་མོས་རང་ཉིད་ལ་འཁོ་བའི་དཔེ་དེབ་གཉིས་ཉོས་པ་དང་། གཞན་ངེད་གཉིས་ཀྱིས་ཟས་རིགས་དང་སྐོམ་ཆུ་མངར་མོའི་རིགས་ཁ་ཤས་ཤིག་ཉོས་སོང་། དེ་དུས་ངའི་སེམས་ནང་དུ་སྒོར་མོ་དེ་དག་ཧིན་སྒོར་ལ་བརྩིས་ཤིག་བརྒྱབས་དུས། ཉིན་ཁ་ཤས་ཀྱི་ཟ་མ་ལྷོད་ལྷོད་དུ་ཟ་བྱེད་དང་འཐུང་བྱེད་གཉིས་ཀ་འདུག་བསམ་པ་གློ་བུར་དུ་ཡིད་ལ་རང་དབང་མེད་པར་འཁོར་སོང་། འདི་ལྟར་གཞན་ཡུལའམ་མི་ཡུལ་གྱི་འཚོ་བ་གསར་བ་འདི་ལ་ཐུན་མོང་གི་སྣང་ཚུལ་དང་མི་གཅིག་པའི་ང་རང་གི་ཚོར་རྟོགས་ཁ་ཤས་ཀྱི་ང་རང་ལ་རྟག་དུ་ངལ་གསོ་དང་ཞི་བདེ་བསྐྲུན་གྱི་འདུག ང་རང་གཞན་ཡུལ་དུ་ཡོད་ཀྱང་། ང་རང་ལ་གཞན་ཡུལ་དུ་ཡོད་པའི་ཚོར་སྣང་སྐྱོ་བོ་དེ་འདྲ་གང་ཡང་མེད་པར་བདེ་སྐྱིད་དང་བཅས་འཚོ་བཞིན་ཡོད་མོད། བརྗེད་དུ་དཀའ་བ་ནི། རང་ཉིད་གང་དུ་སོང་ཡང་བོད་མི་བྲོས་བྱོལ་བ་ཞིག་ཡིན་པ་བརྗེད་ཐབས་མེད་ཀི ༡༧།༩།༠༨

མུ་འགོད།