གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ཞེ་བདུན།

ཁ་སང་ཕྱི་དྲོ་ནས་བཟུང་ཇོའུ་མི་རིགས་ཀྱི་སྲོལ་རྒྱུན་རང་བཞིན་གྱི་དུས་ཆེན་ཞིག་རེད། དུས་དྲན་འདི་ནི་ཆོས་ལུགས་ཀྱི་བྱེད་སྒོ་ཞིག་ཡིན་ལ། ཆུ་ཚོད་ཉེར་བཞིའི་རིང་དུ་རྒྱལ་ཁབ་ཀྱི་དངོས་ནས་འགྲིམ་འགྲུལ་ཡོངས་སུ་རྫོགས་པ་མཚམས་འཇོག་གི་འདུག ཆོས་པ་དག་གིས་ཆོས་ཀྱི་ཆོ་ག་ཕྱག་ལེན་བྱེད་ཀྱི་ཡོད་པ་དང་ཆོས་ལུགས་པ་མིན་མཁན་དག་གིས་ཀྱང་། རང་ཉིད་ཇོའུ་མི་རིགས་ཤིག་ཡིན་དུས། ཆུ་ཚོད་ཉེར་བཞིའི་རིང་དུ་འགྲིམ་འགྲུལ་མི་བྱེད་པར་སྲོལ་རྒྱུན་ལ་གུས་བཀུར་བྱེད་ཀྱི་འདུག གལ་སྲིད། ཉིན་འདི་ལ་རླངས་འཁོར་རེ་གཉིས་རེ་གཞུང་ལམ་དང་སྲུང་བར་དུ་མཐོང་རྒྱུ་ཡོད་ཚེ། དེ་ནི་ཁ་ཆེ་བ་ཞིག་དང་དེ་མིན་ཛ་དྲག་གི་དོན་རྐྱེན་གང་ཞིག་འཕྲད་མཁན་གྱི་མི་ཞིག་ཡིན་པར་བཤད་ཆོག་པར་བརྩི་བཞིན་འདུག

ད་དུང་། ཆུ་ཚོད་ཉེར་བཞིའི་རིང་དུ་ཇོའུ་མི་རིགས་ཚང་མས་ཟས་ཆད་ཀྱི་ཕྱག་ལེན་ཞིག་བྱེད་ཀྱི་ཡོད། ཉིན་མོ་འདིར་ཁོང་ཚོས་རང་རང་གིས་བྱས་ཟིན་པའི་ནག་ཉེས་དང་ནོར་འཁྲུལ་དག་ལ་ཕྱིར་དྲན་དང་བཟོད་གསོལ་བྱེད་དགོས་པར་བཤད། དེ་ཡི་སྟབས་ཀྱི་ཉིན་བཀང་བོར་ཕྱི་ལོག་དུ་འགྲོ་ས་མེད་པར་གངས་མཚོའི་ཨ་མ་དང་ངེད་གསུམ་ཕྱི་ལོག་དུ་གོམ་བཀང་ཡང་མ་ནུར་བར་བསྡད་པ་དང་། གངས་མཚོ་མོ་རང་གིས་ཆུ་ཚོད་ཉེར་བཞིའི་རིང་དུ་ཟས་ཁམ་བཀང་ཡང་ཟས་མ་སོང་། མོ་རང་གི་མ་རྒན་གྱིས་རང་ཉིད་ལོ་ན་མཐོ་བའི་ཟས་ཁམ་བཀང་ཡང་མ་ཟས་པར་བསྡད་ན་འགྲིག་གི་མེད་གསུངས་སོང་། ༡༡།༡༠།༠༨

འདང་ནུབ་ང་དང་གངས་མཚོ། བློ་དོན་བཟའ་མི་གསུམ། ང་ཚོ་བུ་ཆུང་བཟའ་མི་གཉིས་ཀྱི་ནང་དུ་དགོང་ཟས་ལ་རོལ་དུ་སྐད་བཏང་བ་ལྟར་སོང་། བུ་ཆུང་བཟའ་མི་གཉིས་ཀྱི་ནང་དུ་ང་ཚོས་བོད་ཀྱི་ཁ་ཟས་ཤ་མོག་མོག་དང་ཤ་མེད་མོག་མོག་བཅས་བཟོས་པ་ཡིན། བུ་ཆུང་གི་ནང་དུ་འབྱོར་དུས་བོད་པ་ཞིག་གི་ནང་དུ་འབྱོར་བ་ལྟ་བུའི་ཚོར་བ་སྟེར་གྱི་འདུག སྒོ་ཡོལ་བོད་ཀྱི་སྒོ་ཡོལ་ཞིག་རེད་འདུག་ལ། ༧རྒྱལ་བའི་སྐུ་དཔར་ཞིག་གི་མདུན་དུ་བདུན་ཚར་ཞིག་ཕུལ་འདུག བརྩིགས་ངོས་སུ་བོད་ཀྱི་ཐང་ག་དང་མ་ཎི་ཐང་ག་བཅས་བཀལ་འདུག

དགོང་ཟས་རྗེས་སུ་ང་དང་གངས་མཚོ། བློ་དོན་བཟའ་མི་གསུམ་བཅས་གངས་མཚོའི་མ་རྒན་གྱི་ནང་དུ་ཡོང་། གངས་མཚོ་དང་བློ་དོན་གྱི་རྒན་མོ་གཉིས་ཀྱི་ཁ་བརྡ་འདྲ་བྱས་ནས་བསྡད། མི་རིང་བར་ཁོང་ཚོ་ཚང་མ་ཉལ་དུ་འགྲོ་སོང་། བློ་དོན་ངེད་གཉིས་ཀྱིས་འགྲོ་བ་མིའི་རིགས་ཀྱི་སྐོར་དང་བོད་ཀྱི་མ་འོངས་པའི་སྐོར་ལ་བསམ་གཞིགས་གང་བྱེད་ཀྱི་ཡོད་མེད་སོགས་གླེང་ནས་ནམ་ཕྱེད་ཀྱི་ཆུ་ཚོད་གཉིས་དང་ཕྱེད་ཀ་་བར་དུ་བསྡད་པ་ཡིན། བློ་དོན་ཁོ་རང་གི་སེམས་ཁོང་དུའང་བོད་མི་རིགས་ཀྱི་འཇིག་ཉེན་དང་རང་གི་བུ་རྒྱུད་དག་ལ་བཅིངས་པའི་སེམས་ཁོང་གི་རེ་བ་ཆེས་མི་ཉུང་བ་ཞིག་འདུག་ལ། རང་ཉིད་བོད་མི་ཞིག་གི་སྐྱེ་བ་དེར་འགན་ཞིག་ཡོད་པར་ངེས་འཛིན་གསལ་བོ་ཞིག་སྐྱེ་བཞིན་འདུག

ང་ཚོས་ཞོགས་ཇ་འཐུང་རྗེས་སུ། བློ་དོན་བཟའ་མི་གསུམ། བུ་ཆུང་བཟའ་མི་གཉིས་དང་གངས་མཚོའི་གྲོགས་མོ་ཝན་བཟའ་མི་གཉིས་བཅས་ང་ཚོ་མི་དགུ་རྗོ་སུ་ལམ་གྱི་གནའ་ཤུལ་གྲགས་ཅན་དུ་འབོད་པའི་གྲོང་ཁྱེར་རྙིང་བའི་ནང་གི་ཡེ་ཤེས་སྐུ་གྲོངས་སའི་ལྷ་ཁང་དང་དེ་ཡི་འགྲམ་གྱི་གནའ་ཤུལ་གྱི་ཚོང་རྭ། ཨེས་སུ་རལ་གྱི་རྒྱལ་བོ་སྒྲེས་བས་ཀྱི་ཕོ་བྲང་གི་མཁར་ཤུལ་སྟོང་བ་དེར་བལྟ་སྐོར་དུ་སོང་། གལ་སྲིད། གནམ་འོག་འདི་ནས་ཡེ་ཤེས་སྟོན་པ་ལ་དད་གུས་བྱེད་མཁན་གྱི་སྐྱེ་བུ་ཞིག་ཡིན་ན། ཡེ་ཤེས་སྐུ་གྲོངས་ཡུལ་འདིར་ངེས་སུ་མཇལ་ཐུབ་པར་རེ་བ་ཡོད་པར་བཤད་ཀྱི་ཡོད་ལ། དེ་རིང་ཡང་ཕར་བལྟས་ཚོད་ཀྱིས་ཤར་ཕྱོགས་པའི་ངོ་གདོང་འཁུར་བའི་མི་ཡང་མི་ཉུང་བ་ཞིག་ཡེ་ཤེས་སྟོན་པ་སྐུ་གྲོངས་སའི་ལྷ་ཁང་འདིར་མཇལ་དུ་སླེབས་འདུག  ལྷག་པར་དུ། མཁར་གྲོང་རྙིང་བ་འདི་ན། ཆོས་ལུགས་ཆེན་པོ་གསུམ་གྱི་གནས་ཆེན་གསུམ་འདུག ཡེ་ཤེས་པ་དག་གི་རྗེས་མཇུག་ཚོར་ཡེ་ཤེས་གྲོངས་སའི་ལྷ་ཁང་། ཁ་ཆེ་བ་དག་ལ་གསེར་དང་དངུལ་གྱི་ལྷ་ཁང་གཉིས། ཇོའུ་ཆོས་ལུགས་པ་དག་ལ་རྡོ་ཡི་མཁར་བརྩིགས་ཤིག འདི་དག་ནི་ཆོས་ལུགས་ཆེན་པོ་འདི་གསུམ་གྱི་དད་པ་དང་ཡིད་ཆེས་བྱེད་ཡུལ་ཞིག་ཡིན་ལ། དེ་དག་གི་མཐའ་འཁོར་དུ་རང་རང་གི་ཆོས་ལུགས་ལ་དད་མོས་བྱེད་མཁན་གྱི་མི་ནི་རྟག་དུ་མཐོང་རྒྱུ་ཡོད་རབས་བཤད།

རྒྱལ་བོ་དེ་ཡི་མཁར་ཤུལ་སྟོང་བ་དེར་འཛུལ་བ་ལ་རིན་པ་སྤྲོད་དགོས་ཀྱི་འདུག རིན་གོང་ཡང་ཆུང་ཆུང་མ་རེད། གང་ལྟར། ངེད་ཀྱི་མཛའ་མོའི་འཛིན་བྱང་གཏོགས་སོང་། མཛའ་མོས་ང་རང་ལ་ཁོ་མོས་གང་ནུས་ཅི་ཐུབ་ཀྱིས་ངོ་སྤྲོད་བྱེད་པ་དང་བལྟ་སྐོར་འགྲོ་ཡུལ་ཞིག་ལ་ངས་འདོད་པ་ཡོད་མེད་ལ་མ་བལྟས་པར་མོ་རང་གིས་གང་ཐུབ་ཀྱིས་དངུལ་གཏོང་རྐྱང་བྱེད་ངེས་ཡིན། ནང་དུ་སོང་ནས་གནའ་མཁར་སྟོང་བ་དེ་ལ་བལྟས་པ་དང་། གནའ་ཤུལ་དེ་ཡི་སྐོར་གྱི་བརྙན་འཕྲིན་ཐུང་ཐུང་ཞིག་ཀྱང་བསྟན་སོང་། ༡༣།༡༠།༠༨

ཝན་བཟའ་མི་གཉིས་ཀྱིས་མགྲོན་དུ་བོས་པ་དང་། ངེད་གཉིས་ཁོང་བཟའ་མི་གཉིས་ཀྱི་རླངས་འཁོར་ནང་དུ་བསྡད་ནས་རྗོ་སུ་ལམ་ནས་རྒྱལ་ཁབ་འདིའི་ལྷོ་ཕྱོགས། ཨེས་ལ་ཀྲི་ཟེར་བའི་གྲོང་ཁྱེར་དེ་ཡི་ཕྱོགས་སུ་ཁ་ཕྱོགས། ཁོང་བཟའ་མི་གཉིས་ལ་བུ་མོ་གཉིས་ཡོད། བུ་མོ་ཆེ་བའི་མིང་ལ་ཡག་རྡན་དང་ཆུང་བའི་མིང་ལ་ཝོས་ནས་ཟེར་གྱི་ཡོད།

ཆུ་ཚོད་ལྔ་ཙམ་གྱི་རྗེས་སུ་ཨེས་ལ་ཀྲི་གྲོང་ཁྱེར་དུ་ཡོད་པའི་ཝན་བཟའ་མི་དག་གི་ནང་དུ་སླེབས། དེ་ནས་ཤིང་ཏོག་གི་ཁུ་འཁྱགས་པ་ཤེལ་ཕོར་གཅིག་འཐུང་རྗེས། གངས་མཚོས་རེ་འདོད་ལྟར་མཚོ་དམར་པོའི་འགྲམ་དུ་ལྟ་སྐོར་ལ་སོང་། མཚོ་དམར་པོའི་འགྲམ་དུ་ཁང་བརྩེགས་མཐོན་པོ་མི་ཉུང་བ་ཞིག་མཐོང་ཐུབ་ལ། དེ་དག་ནི་མགྲོན་ཁང་དང་ཚོང་ཁང་ཁོ་ན་ཡིན་རབས་བཤད། མཚོ་དམར་པོའི་ཕར་ཕྱོགས་སུ་ཡང་གྲོང་ཁྱེར་ཞིག་མཐོང་གི་འདུག མོ་ལ་དྲིས་དུས། དེ་ནི་རྒྱལ་ཁབ་གཞན་ཞིག་ཡིན་པ་དང་མིང་ལ་རྗོར་རྡན་ཟེར་གྱི་ཡོད་པ་དང་། དེ་ཡི་གོང་དུ་སོ་སྒྲེས་ཨ་རབ་སྤེས་ཡ་ཡོད། མཚོ་འདིའི་ཚུར་ཕྱོགས་ནས་ཡར་དུ་སོང་ན་ཨེས་རྒྱབ་དུ་སླེབས་ཀྱི་ཡོད་པ་རེད། ཚང་མ་ཁ་ཆེ་རྒྱལ་ཁབ་རེད་ཟེར།

ཚོང་འདུས་ཁྲོམ་རྭ་ཆེན་མོ་ཞིག་གི་ནང་དུ་མོ་རང་གིས་ང་རང་ལ་གོན་པ་གསར་བ་སྟོད་ཐུང་གཉིས་དང་དོར་མ་གཉིས། མོ་རང་གིས་ངའི་གྱོན་ཆོས་དག་ལ་བཏང་བའི་འགྲོ་སོང་གི་ཕྱོགས་སུ་འདང་ཞིག་བརྒྱབས་དུས། ངས་རྒྱ་གར་ནས་ལོ་གཅིག་གི་གླ་ཆ་རེད་འདུག་སྙམ་ནས། མོ་རང་ལ་ང་རང་ལ་དེ་འདྲའི་གྱོན་ཆོས་མང་བོ་ཞིག་མི་དགོས་ཚུལ་དང་ང་རང་ལ་གྱོན་ཆོས་རྒྱ་གར་དུ་ཉོས་པ་དག་ད་ལྟ་ཡང་ཡོད་པ་རེད་ཅེས་བཤད་དུས། མོས་ཁྱེད་རང་གི་དེ་དག་ནི་དབྱར་ལྭ་རེད། ད་ནི་དགུན་ཁ་སླེབས་ཀྱི་ཡོད་པ་རེད། ཕྱིར་རྗོ་སུ་ལམ་དུ་སོང་ན་དངོས་ནས་གྲང་མོ་ཡོད་པ་རེད་ཟེར། འགྲོ  མགྱོགས་པོ་བྱོས། ཝན་གྱིས་རླངས་འཁོར་བཏང་ནས་འུ་གཉིས་བསུ་རུ་ཡོང་འདུག ཚོང་ཁང་འདིའི་ཕྱི་ན་ཡོད་པ་རེད་ཟེར།

ཝན་བཟའ་མི་དག་གི་ནང་གི་ཆ་རྐྱེན་ནི་དངོས་ནས་ཡག་པོ་འདུག ཁང་བ་གསར་བ་རེད་འདུག་ལ། ནང་གི་ཅ་དངོས་ཡོད་ཚད་དེང་རབས་ཀྱི་ཅ་དངོས་་རྐྱང་རྐྱང་རེད་འདུག ཁང་བ་ཕྱི་ནང་གང་དུ་སོང་ཡང་། དེང་རབས་ཀྱི་ཁྱད་ཆོས་འདུག་པ་མ་ཟད། ཁང་བའི་སྒོ་ཕྱེ་བ་ལ་ཡང་གློག་གི་ཨང་གྲངས་བསྒྲིགས་ནས་བཞག་འདུག ཁང་བ་འདི་ནི་ལོ་གཅིག་ལྷག་གི་སྔོན་དེར་ཉོས་པ་ཞིག་རེད་འདུག

ཞོགས་པ་སྔ་བོ་ངེད་གཉིས་མོ་རང་གི་གྲོགས་མོ་མ་ཡ་ཟེར་བ་ཞིག་བསུ་རུ་སླེབས་སོང་། ངེད་གཉིས་མ་ཡ་དང་འགྲོགས་ནས་མཚོ་དམར་པོའི་འགྲམ་གྱི་སྒེར་གཉེར། ཉ་རྩྭ་ཆེན་ཞིག་ཡོད་པ་དེ་ཡི་ནང་དུ་ལྟ་སྐོར་དུ་སོང་། ནང་དུ་འཛུལ་བར་ཨ་སྒོར་ཉི་ཤུ་མི་གཅིག་ལ་དགོས་ཀྱི་འདུག དངོས་ནས་བཤད་ན་ཉ་འདི་དག་ནི་མི་དག་གིས་བཟུང་བཙོན་དུ་ཐེབས་པ་ཤ་སྟག་ཡིན། ངས་ཉ་དེ་དག་གི་རང་དབང་འཕྲོག་མཁན་གྱི་འགྲོ་བ་མི་དག་ལ་དངོས་ནས་སེམས་གཏིང་ནས་སྙིང་རྗེ་ཤོར་སོང་། ལྷག་དུ་ཉ་དེ་དག་ལ་ཡང་སེམས་གཏིང་ནས་སྙིང་རེ་རྗེའང་སྙམ་ན་ཡང་། རང་ཉིད་ནི་ལྟ་སྐོར་བའི་ཚུལ་དུ་ཉ་ཆེན་འདི་དག་གི་འགྲམ་དུ་སླེབས་ཡོད་པ་རེད།

མཚོ་འགྲམ་གྱི་སྒེར་གཉེར་ར་སྐོར་འདིའི་ནང་དུ་ཆུ་ནང་གི་ངལ་གསོ་བྱེད་ས་དང་། ཆུ་ནང་གི་འཕུར་གཉེལ་གཏོང་མཁན་གྱི་བུད་མེད་ཀྱང་ཡོད་ལ། ཟ་ཁང་དང་འཚིག་ཇ་འཐུང་ས་ཡང་འདུག ཡོད་ཚད་ལ་རིན་གོང་ལོག་གར་རེད། མཛའ་མོ་ངེད་གཉིས་ཀྱིས་ཉིན་བཀང་བོར་དེ་ནས་བཏང་། དངོས་ནས་བཤད་ན་རང་ཉིད་ནི་བསམ་རྒྱུ་དྲན་རྒྱུ་མེད་པའི་མི་ལྟ་བུ་ཞིག་ཆགས་ནས། མཚོ་འགྲམ་དེ་ཡི་བུད་མེད་གཅེར་བུ་མ་དག་གི་རྐུབ་དང་འོ་མའི་ཆེ་ཆུང་ལ་བལྟས་དེ་བསྡད་ཡོད་པ་རང་གི་མཛའ་མོས་ག་ལ་ཤེས།  ཚིམས་སྣང་མེད་པའི་སྣང་བ་འདི་སྐྱེ་བ་ཕོ་ཡོད་ཚད་ལ་ཡོད་དམ། ཡང་ན། ང་ལྟ་བུའི་གསལ་ལེ་རྒྱལ་རྐྱང་རྐྱང་གི་མིག་དང་སེམས་པའི་ངལ་གསོ་བྱེད་སྟངས་ཤིག་ཡིན་ནམ། ༡༤།༡༠།༠༨

མུ་འགོད།