གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ཞེ་བརྒྱད།

གངས་མཚོ་ངེད་གཉིས་མཚོ་དམར་པོའི་འགྲམ་གྱི་ངོ་མཚར་བའི་སྒེར་གཉེར་ཉ་རིགས་སྣ་ཚོགས་ལ་ལྟད་མོ་བལྟ་ས་ཞིག་ཡོད་པ་དེ་ཡི་ནང་དུ་སོང་། ནང་དུ་འཛུལ་བ་ལ་མི་གཅིག་ལ་ཨ་སྒོར་ཉེར་ལྔ་ལྷག་དགོས་ཀྱི་འདུག ནང་དུ་འཛུལ་མ་ཐག ཉ་རིགས་འདྲ་མིན་སྣ་ཚོགས་ཤིག་ཆུའི་བཙོན་རའི་ནང་དུ་བཅུགས་ཡོད་པ་མཐོང་དུས་སུ། མི་རྣམས་ངོ་མཚར་བའི་ཚུལ་གྱིས་ལྟ་བཞིན་ཡོད་ཀྱང་། ངའི་སེམས་སུ་སྙིང་རེ་རྗེ་སྙམ་ཞོར་དུ། མི་གཞན་དག་ལྟར་བང་བསྒྲིགས་ནས་ཆུའི་བཙོན་རའི་ནང་གི་ཉ་རིགས་དེ་དག་ལ་བལྟས། ཆུའི་བཙོན་ར་ཞེས་པའི་མིང་ཚིག་འདི་ནི་ངས་དེ་སྔོན་བོད་ཀྱི་ཐ་སྙད་གང་དུ་ཡང་མཐོང་མྱོང་མེད་ཀྱང་། མི་བཙོན་འཇུག་བྱེད་ས་ལ་བཙོན་ཁང་ཟེར་གྱི་ཡོད་པ་བཞིན། ངས་འདི་ནས་ཉ་རིགས་དག་འཇུག་སའི་ཆུ་མཛོད་ཀྱི་ར་བ་དེ་དག་གི་མིང་ལ་དེ་ལྟར་བཏགས་པ་ཡིན།

ཆུ་འོག་དུ་བསྐྱོད་པའི་གྲྭ་གཟིངས་ཤིག་གི་ནང་དུ་སོང་དུས། ད་གཟོད་ཆུའི་བཙོན་ར་ནང་གི་ཉ་དང་རྒྱ་མཚོའི་ནང་དུ་རང་དབང་གིས་བསྐྱོད་ཀྱིན་པའི་ཉ་རིགས་འདྲ་མིན་བར་གྱི་ཁྱད་པར་མཐོང་སོང་ལ། རྒྱ་མཚོའི་ནང་དུ་རང་དབང་གིས་བསྐྱོད་ཀྱིན་པའི་ཉ་རིགས་དེ་དག་ནི་མི་ཞིག་ལ་བཙོན་ན་རང་དབང་ལྡན་པ་དང་རང་ཁྱིམ་ཡོད་པ་དང་འདྲ་བོ་འདུག ཆུའི་བཙོན་རའི་ནང་དུ་ཡོད་པའི་ཉ་རིགས་དེ་དག་གིས་ཕ་ཡུལ་མེད་པ་དང་རང་དབང་བོར་བའི་མི་རིགས་བོད་པ་ངའི་སེམས་སུ་ལྷག་དུ་སྐྱོ་བ་ཞིག་འདྲེན་གྱི་འདུག གྲུ་གཟིངས་ཀྱི་ལྟ་སྐོར་དེ་ནི་སྐར་མ་བཅོ་ལྔ་ཙམ་གྱི་རིང་དུ་རེད་འདུག དེ་ཡི་རྗེས་སུ་ཉ་རིགས་འདྲ་མིན་གྱི་གླིང་ག་དེ་ནས་ཉ་རིགས་ཀྱི་སྐོར་ནས་བརྙན་འཕྲིན་སྐར་མ་སུམ་བཅུ་སོ་ལྔའི་རིང་དུ་ཡོད་པ་ཞིག་བསྟན་སོང་། བལྟ་ཡུལ་ནི་རྐུབ་སྟེགས་ཀྱི་སྟེང་དུ་ཡིན་ཡང་། རྐུབ་སྟེགས་དག་རང་བཞིན་གྱིས་འགུལ་བསྐྱོད་ཀྱི་ནུས་པ་ནི་གྲུ་གཟིངས་དུ་བསྐྱོད་པ་ལྟ་བུ་ཞིག་བཟོས་འདུག་སྟབས། བརྙན་འཕྲིན་ལ་བལྟ་སྐབས་སུ་གྲུ་གཟིངས་སུ་རང་ཉིད་ངེས་སུ་ཡོད་པའི་སྣང་བ་སྤྲོད་ཀྱི་འདུག

རྒྱལ་ཁབ་འདིའི་ནང་གི་ཚོང་ཁང་ཆེས་མང་ཤོས་ཤིག་གི་ནང་དུ་བྱིས་པའི་རྩེད་ཆོས་མང་ཤོས་ཤིག་རྒྱ་ནག་ནས་བཟོས་པ་རྐྱང་རྐྱང་ཡིན་པ་ལྟར། སྤྱི་གླིང་འདིའི་ཚོང་ཁང་ནང་གི་དྲན་རྟེན་གྱི་ལག་སྐྱེས་དག་ཡང་རྒྱ་ནག་ནས་བཟོས་པ་ཤ་སྟག་རེད་འདུག འདིར་ཟ་ཁང་ཞིག་ཡོད་ལ་དེ་ཡི་ཐོག་རྩེ་ཡི་གཡིབ་ནི་དུ་ཁང་གི་བཟོ་ལྟ་ལྟ་བུ་ཞིག་ཡིན། དེ་ཡི་མཐོ་ཚད་ནི་ཁང་བརྩེགས་བརྒྱད་དགུ་ཞིག་འདུག དེ་ཡི་སྟེང་དུ་བུད་ནས་ཕྱོགས་ཡོངས་ལ་བལྟས་དུས། མཚོ་དམར་པོའི་ཕར་ཚུར་གྱི་རྒྱལ་ཁབ་དག་གི་གྲོང་ཁྱེར་གྱི་མཛེས་ལྗོངས་མཐོང་གི་འདུག

དེ་རིང་འདི་ནས་མཐོང་བའི་ཉ་རིགས་དག་ནི་སྔོན་ཆད་རང་ཉིད་ཀྱི་མི་ཚེ་ཡི་ནང་དུ་བརྙན་འཕྲིན་དག་གི་ནང་ནས་མཐོང་བ་ལས་ངེས་སུ་མིག་གི་མཐོང་བ་ནི་ཐོག་དང་བོ་ཡིན་དུས། དངོས་ནས་མ་འདྲ་བ་ཞིག་འདུག བོད་པ་དག་གིས་ཆེས་དགའ་མོས་བྱེད་སའི་བྱུ་རུའི་ར་ཅོ་ཡང་མཐོང་རྒྱུ་འདུག དངོས་ནས་བཤད་ན་བོད་པ་འདི་དག་འབུ་སྲིན་གྱི་རིགས་ཤིག་སྐེ་རུ་བཏགས་ནས་རང་ཉིད་ཀྱི་སྣང་བ་སྤྲོ་བོ་ཡོད་པའི་རྒྱུ་མཚན་དེ་ལ་སྙིང་བོ་ཞིག་ཡོད་དམ་ཅི་སྔ་མོ་ནས་སྙམ་མྱོང་ན་ཡང་། ཆུ་ནང་གི་འབུ་རིགས་ཤིག་ཡིན་པ་ག་ལ་ཤེས། གང་ལྟར། སེམས་ཅན་འབུ་སྲིན་གྱི་རིགས་སུ་གཏོགས་པའི་བྱུ་རུའི་དམར་པོའི་སྐེ་རྒྱན་ལ་དགའ་མཁན་དེ་དག་ཡ་རེ་ང་བའི་ངེས་ཤེས་ཟབ་མོ་འདི་ནས་མིག་ལ་བསྟན་སོང་།

འགྲོ་བ་མིའི་རིགས་ཀྱི་ཚད་འཛིན་གྱི་བྱེད་ལས་ནི་སྲོག་ཆགས་གཞན་དག་ལས་ཆེས་ཁྱད་དུ་འཕགས་པ་ཞིག་ཡིན་པ་མིག་གིས་མཐོང་དུ་བཅུགས་པ་དང་། ཉའི་རིགས་ཀྱི་ཁ་དོག་དང་ཉའི་རིགས་ཀྱི་ཐུན་མོང་མ་ཡིན་པའི་གནས་ཡུལ་དག་ཞིབ་དུ་མཐོང་དུས། ཉའི་རིགས་ལ་ཡང་ཆེས་ངོ་མཚར་ལྡན་པའི་བྱུང་བ་ཞིག་ཡོད་པའི་ངེས་ཤེས་སྐྱེས་སོང་། རི་མོ་སྒྱུ་རྩལ་བ་དག་གིས་པུར་རྩེ་ནས་འབྲི་དཀའ་བའི་ཁ་དོག་ཉའི་རིགས་ཀྱི་ཁ་དོག་འདི་དག་ཇི་ལྟར་གྲུབ་པ་ཡིན་ནམ། ཕལ་ཆེར། གཅིག་ཐང་ན་སྐྱེ་བ་སྔོན་མ་བུད་མེད་ཁ་དོག་འདྲ་མིན་ལ་དགའ་བ་ཚོའི་རྣམ་ཤེས་ཉྭ་རུ་སྐྱེ་བ་ཡིན་སྲིད། ཧ་ཧ་ཧ་་  གླེན་པ་ངས་དྲན་ལུགས་འདི་ཇི་འདྲའི་ཁྱད་མཚར་ཞིག་འདུག་སྙམ་བཞིན་དེ་རིང་འདི་ནས་འབྲི་མཚམས་བཞག

མོས་ང་རང་ལ་དགུན་ལྭ་མི་ཉུང་བ་ཞིག་ཉོས་པ་དང་། ང་རང་གི་བསམ་བློ་ཡང་ཧིན་སྒོར་གྱི་ཕྱོགས་སུ་དེད་ནས་སོང་། དགུན་ལྭ་དེ་དག་གི་རིན་པ་ནི་དངོས་ནས་ཧིན་སྒོར་གཅིག་ཁྲི་ལྷག་རེད། ད་བསམ་བློ་དེ་ཡི་ཕྱོགས་སུ་མི་གཏོང་བ་བྱེད། ད་ནི་རང་ཉིད་རྒྱ་གར་དུ་ཧིན་སྒོར་བེད་སྤྱོད་བྱེད་མཁན་གྱི་མི་དེ་ནི་མ་རེད་སྙམ་ནས། མོ་རང་གིས་ཕྱི་བཞིན་དུ་བགྲེང་ནས་ཁ་རོག་གེར་མོ་རང་གིས་གང་དུ་འགྲོ་ཟེར་བ་དེ་ཡི་ཕྱོགས་སུ་འགྲོ་རྐྱང་བྱས་པ་ཡིན། མོ་རང་གིས་ང་རང་མཚོ་དམར་པོའི་འགྲམ་གྱི་མི་ཚོགས་སྣ་འདུས་ཀྱི་ཁོར་ཡུག་ཞིག་དུ་ཁྲིད་སོང་།

ཡུལ་འདི་ནི་ན་གཞོན་གྱི་འཇིག་རྟེན་ཞིག་དུ་འབོད་ཆོག་པ་དང་། དེང་རབས་རོལ་དབྱངས་ཀྱི་དབྱངས་རྟ་མཚོ་དམར་པོའི་རླབས་དང་འགྲོགས། མཚོ་དམར་པོའི་འགྲམ་གྱི་བསིལ་རླུང་དང་བསྡེབས། མི་ཚོགས་ཀྱི་སེམས་དང་རྣ་བུའི་བུ་གར་འཛུལ་གྱིན་འདུག མཚོ་ནང་དུ་ཆུ་རྐྱལ་བྱེད་བཞིན་པའི་ཕོ་མོ་རྒན་གཞོན་ཁྱད་མེད་དུ་མཐོང་བ་དང་། རང་རང་གི་སྣང་བ་གང་དྲན་ལ་རོལ་བཞིན། གསར་འགྲོགས་ཀྱི་ན་གཞོན་དག་གིས་གཅིག་གིས་གཅིག་ལ་འཁྱིད་པ་དང་། འདྲིས་ཟིན་པའི་རིགས་ཀྱི་རང་རང་གི་སྣང་བ་འགྲོ་བའི་སྐད་ཆ་རེ་བཤད་ཀྱིན། རྒན་པ་དག་གིས་ཚགས་ཤོག་རེ་ཀློག་པ་དང་། དེབ་ཀློག་པ། ལྟད་མོ་བལྟ་བ་བཅས། མི་སྣ་སྣ་འདུས་དང་བྱེད་ལས་སྣ་འདུས་རེད། ན་གཞོན་དག་གི་འགྲན་སེམས་བྱེད་ས་དང་རྒན་པ་དག་གི་ཞེན་ཆགས་བྱེད་ས། བྱིས་པ་ཚོའི་སྣང་བ་སྐྱིད་པོ་བྱེད་སའི་མཚོ་དམར་པོའི་འགྲམ་ནས་ཉི་མ་ནུབ་ཀྱིན་པ་བདག་གིས་ངེས་སུ་མཐོང་།

ཁ་སང་དེ་རིང་མོ་རང་གི་སེམས་ཁྲལ་ཆེ་ཤོས་ནི་ང་རང་གི་ཟླ་ངོ་གསུམ་གྱི་རྗེས་སུ་ཐོངས་ཆེན་རྫོགས་དུས་གང་བྱེད་མིན་དེ་ཡི་སྐོར་རེད། འདི་ནི་དངོས་ནས་ཡ་མཚན་རེད། ང་རང་ལ་སེམས་ཁྲལ་ཡོད་ན་ཆོག་མོད། ང་རང་ལ་སེམས་ཁྲལ་མེད་པར་མོ་རང་གིས་ངའི་དོན་དུ་ཟེར་ན་རེད། ང་རང་འདི་ནས་བསྡོད་ཐུབ་མིན་གྱི་སྐོར་ལ་སེམས་ཁྲལ་མང་དུ་བྱེད་ཀྱི་འདུག འདི་ནི་ཁོ་མོས་ང་རང་ལ་གཅེས་པའི་དན་རྟགས་ཤིག་མིན་འགྲོ  ༡༥།༡༠།༠༨
 
འདང་དགོང་ང་རང་ལ་ཆེས་རྨི་ལམ་ལྟས་ངན་ཞིག་རྨིས་པ་དེ་ནི། བོད་མི་ཞིག་གི་གོ་ན་མི་འདོད་པ་ཞིག་རེད། དེ་རིང་ང་ནི་མཛའ་མོ་དང་མཉམ་དུ་སྲོག་ཆགས་སྣ་འདུས་ཀྱི་སྤྱི་གླིང་ཞིག་དུ་ལྟ་སྐོར་དུ་སོང་ན་ཡང་། ཉིན་བཀང་བོར་འདང་གི་རྨི་ལམ་དེ། རྒྱལ་བ་རིན་པོ་ཆེ་ཞིང་གཞན་དུ་ཕེབས་པ་ཞིག་རྨིས་པ་དེར་བསམ་བློ་བཏང་བ་ཡིན། དེ་དུས་གཞི་ནས་རང་ཉིད་ཆུང་དུས་སུ་དྲིན་ཆེན་མ་ལོའི་ཨ་མ་ཡི་ཨ་མ་གྲོངས་པའི་རྨི་ལམ་ཞིག་རྨིས་དེ། ཕྱིར་ཉིན་ཉིན་བཀང་བོར་ངུས་དུས། དྲིན་ཆེན་མ་ལོའི་ཅིའི་ཕྱིར་ངུ་བཞིན་ཡོད་ཟེར། དེ་དུས་ངས་རང་གིས་རྨི་ལམ་བཤད་དུས། དྲིན་ཆེན་མ་ལོས་མི་གསོན་པོ་ཤི་བ་རྨིས་པ་ཡིན་ན་ཚེ་ཐག་རིང་བོ་འདུག་པའི་རྟགས་རེད། དེ་ནི་ཡག་པོ་རེད། ངུ་དགོས་པ་མ་རེད། དེ་ཡིན་དུས་ད་ནི་ཨ་མ་རྒན་མོ་ཚེ་ཐག་རིང་བོ་འདུག་ཁོ་ཐག་རེད་ཟེར་བ་དྲན་སོང་། དངོས་ནས་བདེན་པ་ཡིན་ས་རེད། ད་ལྟ་ཡང་ངའི་མ་ལོའི་མ་རྒན་གསོན་ནས་ཡོད། དེ་འདྲ་ཡིན་ན་བཟང་བ་ལ། རྒྱལ་བ་རིན་པོ་ཆེ་སྐུ་ཚེ་རིང་བ་དེ་ལས་ཡག་ཞིག་གང་ན་ཡོད་སྙམ་གྱིན་མཛའ་མོ་དང་མོའི་གྲོགས་མོ་གཉིས་ཀྱི་རྗེས་སུ་མགོ་བོ་ནང་དུ་བཀུགས་ནས་སོང་།

ཕལ་ཆེར། ཟླ་ངོ་གཅིག་གི་རིང་དུ་ང་རང་གི་འཚོ་བ་དང་འགྲོ་འདུག་ནི་རྒྱུན་ལྡན་ལྟ་བུ་ཡིན་དུས། རྨི་ལམ་འདི་དམིགས་བསལ་ཞིག་ཡིན་དུས། ཞོགས་པ་སྔ་བོ་ཉིན་ཐོ་འབྲི་དེབ་ཀྱི་ཁ་ཕྱེ་དགོས་བྱུང་བ་རེད། ༨།༡༡།༠༨

དེ་རིང་ནི་ངས་སྔོན་ཆད་བཤད་མྱོང་བའི་མཆི་ལམ་སྙེགས་པའི་ལོ་ལོན་གཉིས་ཀྱི་ནང་ནས་རྒན་ཤོས། མོ་རང་གི་ཨ་ནེ་ཀྲ་མ་རུས་མི་ཡུལ་ཁམས་དང་གྱེས་སོང་། ང་རང་ཐོག་མར་ཁོ་མོ་དང་འཕྲད་དུས་སུ། གངས་མཚོ་ངེད་གཉིས་སླར་ཡང་ང་ཚོ་མཇལ་ཡོང་གསུངས་དེ་ངེད་གཉིས་ལ་བསྐྱེལ་མ་བྱས་པ་དེ་བདག་གིས་མིག་ལམ་དུ་ཤར་ནས་འོང་། ཡིན་ཡང་། ཟླ་ངོ་གཉིས་ཀྱི་རྗེས་ཀྱི་དེ་རིང་ཁོ་མོ་ཁང་བ་འདིའི་ནང་དུ་མི་འདུག དེ་རིང་འདིར་འཛོམས་པ་ནི། ཁོ་མོར་སྙིང་ཉེ་བའི་ཉེ་དུ་དང་ངོ་ཤེས་དག་རེད། ཁོ་མོར་གཉོར་སྐྱོང་བྱེད་མཁན་གྱི་ཝེས་ལས་ཕེན་བུད་མེད་དེས་བཤད་ན། {ཁྱེད་རང་གིས་ཇི་ལྟར་ཤེས་ཀྱི་ཡོད། ང་རང་ལ་བརྩེ་དུང་སྤྲོད་མཁན་གྱི་མི་ཞིག་དགོས་ཀྱི་ཡོད་}ཅེས་པའི་གླུ་དབྱངས་དེ་ཉན་ཞོར་དུ་འཇིག་རྟེན་འདི་དང་ཁ་གྱེས་སོང་ཟེར། དངོས་ནས་དེ་འདྲའི་རང་དབང་ཞིག སྐྱིད་པ་ལའང་གཟེར་ཟུག་གང་ཡང་མེད་པར་གླུ་དབྱངས་དེ་འདྲའི་སྙན་མོ་ཞིག་ཉན་ནས་བསམ་སོང་།

མི་ཤི་རྗེས་སུ་དེ་ཡི་ལོ་རྒྱུས་གླེང་ན། ད་གཟོད་ཚང་མ་སྙན་མོ་དང་ཡག་པོ་རྐྱང་རྐྱང་ཡིན་ཟེར་སྲོལ་ཞིག་ཡོད་པ་ལྟར། ཁོ་མོ་བཞུད་ཤུལ་དུ་ཉེ་འབྲེལ་དག་གིས་དེ་རིང་ཁོ་མོའི་སྐོར་གླེང་ནས་འོང་དུས། ཀྲ་མ་རུས་ནི་བསམ་བློ་ཀུ་ཡངས་པ། བརྩེ་ཞིང་དུངས་པའི་མི་ཞིག་ཡིན་པ། ཀུན་ལ་བྱམས་པ་སོགས་ཀྱི་ཡ་རབས་ཀྱི་ཤུལ་རྗེས་རྐྱང་རྐྱང་གླེང་གི་འདུག དངོས་ནས་ཉན་དེ་འོང་དུས། ཁོ་མོ་ནི་བུད་མེད་ཡ་རབས་ཤིག་ཡིན་པ་འདྲ། མོ་རང་ཤི་རྗེས་སུ་མོ་རང་གི་ཕུང་བོ་དོན་མེད་དུ་དུར་ས་ཞིག་ནས་ས་འོག་དུ་སྤས་པ་ལས། སྨན་ཁང་ཞིག་དུ་ཕུང་བོའི་སྐོར་ལ་སློབ་སྤྱོང་བྱེད་མཁན་གྱི་གསར་སློབ་དག་གི་ཞིབ་འཇུག་བྱེད་ས་ཞིག་ལ་མ་ཤི་སྔོན་ནས་ཞལ་འདེབས་ཕུལ་འདུག

མི་ཤི་བ་དང་ཁྲིམས་རྩོད་པ་ཞིག་ཀྱང་སླེབས་འདུག ཁྲིམས་རྩོད་པ་དེ་ནི་ཁོ་མོ་གསོན་དུས་སུ་ཁོ་མོའི་ཁ་ཆེམས་དག་ཁྲིམས་ཐོག་ནས་ཡི་གེ་ཕབ་དུ་བཅུགས་ནས། ཁ་ཆེམས་དང་ཤུལ་བཞག་གི་རྒྱུ་ནོར་སོགས་ཀྱི་ཁུངས་སྣེ་ཁྲིམས་རྩོད་པ་བུད་མེད་དེ་ཡི་དབང་དུ་ཡོད་རབས་འདུག ཁྲིམས་རྩོད་པ་བུད་མེད་དེ་ཡི་ཤུལ་བཞག་གི་རྒྱུ་ནོར་དེ་དག་ལས་དངུལ་དག་ཉེ་འབྲེལ་སུ་སུ་ལ་སྤྲོད་དགོས་ཀྱི་ཡོད་མེད་དང་། རྒྱུ་དངོས་དག་སུ་ལ་དབང་ཆོག་མིན་སོགས་དེ་ནས་ཁོང་ཚོ་ཉེ་འབྲེལ་དག་གི་ལག་དུ་ཁོ་མོའི་ཁ་ཆེམས་ཀྱི་ཡི་གེ་ཞིག་བཞག ༡༩།༡༡།༠༨

མུ་འགོད།