གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ང་གཅིག

དེ་རིང་ཁོ་མོས་ང་རང་ཨེས་སུ་རལ་གྱི་འགྲེམ་སྟོན་ཁང་ཆེ་ཤོས་ཤིག་དུ་ཁྲིད། འགྲེམ་སྟོང་ཁང་འདི་ནི་ཨེས་སུ་རལ་གྱི་རྒྱལ་ས་རྗོ་སུ་ལམ་དུ་ཡོད་ལ། ནང་གི་ཅ་དངོས་མང་ཤོས་ཤིག་ལོ་ངོ་སྟོང་ཕྲག་དུ་མ་ཞིག་རྒྱུད་ནས་འོང་བ་ཤ་སྟག་རེད་འདུག མང་ཤོས་ཤིག་ཁྱིམ་མཚེས་རྒྱལ་ཁབ་ཨེས་རྒྱབ་ནས་བྱུང་བ་འདུག དེའི་ནང་གི་དམིགས་བསལ་གྱི་མཚོན་བྱེད་གལ་ཆེ་ཤོས་ཤིག་ཡོད་པ་དེ་ནི་རྡོ་དཀར་དམར་དམག་གསུམ་ཞིག་ཡོད་པ་དེ་ནི་ཆོས་ལུགས་གསུམ་གྱི་ཚབ་མཚོན་དུ་ཁོང་ཚོས་ངེས་འཛིན་བྱེད་ཀྱི་འདུག ཆོས་ལུགས་གསུམ་དེ་ནི་རྗོ་ཤུ ཁ་ཆེ། ཡེ་ཤེས་བཅས་རེད། ད་དུང་། ཁོང་ཚོས་ཆོས་རྒྱུད་ཆེན་པོ་འདི་གསུམ་ཁྱིམ་གཅིག་ལས་མཆེད་པའི་སྤུན་མཆེད་ཡིན་པར་གླེང་གི་འདུག་ལ། གཏམ་རྒྱུད་དེ་ནི་དངོས་ནས་བདེན་པ་ཁུངས་ཐུབ་ཡོད་མེད་བཤད་མི་ཤེས་ཀྱང་། ཆོས་ལུགས་གསུམ་གྱི་མཐུན་སྒྲིལ་མཚོད་བྱེད་དུ་དངོས་ནས་ཕན་པོ་འདུག་སྙམ་སོང་། ཆོས་ལུགས་འདི་གསུམ་གྱི་རྗེས་ཞུགས་པ་དག་གིས་ཀྱང་ཚབ་མཚོན་འདི་ལ་བརྩི་བཀུར་དང་མཐོང་ཆེན་གནང་ཐུབ་ཚེ། རྒྱལ་ཁབ་ཀྱི་བདེ་འཇག་དང་ཞི་བདེ་ལ་ཏན་ཏན་ཕན་པ་ཡོད་ངེས་རེད་འདུག ང་རང་ནི་འཛམ་གླིང་གི་མི་དག་གིས་གནའ་དངོས་རྩ་ཆེན་ཟེར་ནས་རྡོ་ཆས་དུས་རབས་ཀྱི་ཅ་དངོས་དེ་དག་རྩ་ཆེ་བར་བརྩི་བ་དང་དེ་དུས་ཀྱི་མི་རབས་ལ་རྒྱུལ་ལུས་སུ་འདོད་པ་དག་གིས་དངོས་ཡོད་དང་མི་མཐུན་པའི་བྱ་བྱེད་དག་ལ་དངོས་ནས་སེམས་སྐྱོ་མཁན་གྱི་གྲངས་ཤིག་ཡིན། ༥།༡།༠༩

གངས་མཚོ་ངེད་གཉིས་འཛམ་གླིང་ཆེས་དམའ་བའི་ས་ཁུལ་དུ་ངེས་འཛིན་བྱེད་པའི་མཚོ་ཤི་བོའི་འགྲམ་གྱི་མགྲོན་ཁང་ཞིག་དུ་ཐོ་འགོད་བྱས་ནས་དེ་ཁུལ་གྱི་ཇོའུ་མི་རིགས་ཀྱི་གནའ་བོའི་མི་སྣ་དག་གིས་རང་ཉིད་ཀྱི་མི་རིགས་ཀྱི་རིག་གཞུང་ཆེད་དུ་རང་སྲོག་བློས་གཏོང་བྱེད་སའི་རི་སྒང་ཞིག་དུ་ཡར་འཛེགས་པ་ཡིན། སྐབས་དེར་ང་རང་གིས་ནུ་མོ་དང་ངེད་ཚོ་རྒྱ་གར་དུ་ཡོང་བའི་ལམ་ཁའི་ཚོར་བ་ཞིག་ལ་ཕྱིར་དྲན་བྱུང་། སྟོད་མངའ་རི་ཁུལ་གྱི་རི་བྲག་གི་ངང་ཚུལ་དང་དེ་ཡི་ཁྲོད་ཀྱི་དཀའ་ཚེགས་ཆེ་བའི་མདུན་བསྐྱོད་ཀྱི་སྤོབས་པ་དག་གིས་ངའི་ནུ་མོ་ལོ་ན་བཅུ་ཡི་སྟེང་ནས་རྐང་འཐུང་དུ་བོད་ནས་འཁྲིད་ཡོང་དུས། དཀའ་ཚེགས་དང་སུན་སྣང་མི་བྱེད་པར་ང་ཡི་རྐང་རྗེས་སུ་ཤར་མར་འོང་གི་ཡོད། མཚམས་རེར། ང་ལ་ཕུ་བོ། ང་ཚོས་ངལ་ཞིག་གསོས་ཞེས་དྲིས་ཚེ། ངས་རི་བོ་དེ་ཡི་ཕར་ཕྱོགས་ནས་ངལ་གསོ་བྱེད་ཆོག་གི་རེད།

ཨ་རོགས། ཨ་རོགས་ཞེས་བོས་པའི་སྐད་དེ་ཡིས་ང་རང་ཕྱིར་དྲན་ལས་དྲངས། འབོད་མཁན་ནི་རང་ཉིད་ཀྱི་མཉམ་དུ་ཡོད་པའི་མཛའ་མོ་རེད། ཁོ་མོས་ང་ལ་ཅི་ཞིག་ལ་བསམ་བློ་བཏང་ནས་བསྡད་ཡོད་ཟེར། ངས་རང་ཉིད་རྒྱུད་མྱོང་བའི་ལམ་ཕྲན་ཞིག་གི་སྐོར་ལ་བསམ་བློ་འཁོར་དུ་བཅུགས་སོང་ཞེས་ལན་བཏབས། རི་སྒང་དེ་ནས་མར་བལྟས་པ་ཡིན་ན་མཚོ་ཤི་བོའི་མཛེས་སྡུག་དང་ཕར་ཕྱོགས་ཀྱི་རྒྱལ་ཁབ་གཞན་གྱི་ཡུལ་ལྗོངས་སོགས་མཐོང་ཐུབ་ཀྱི་འདུག རི་ངོས་འདི་ནས་ཐ་མག་ཞིག་འཐེན་ཞོར་དུ་ངས་ཇོའུ་མི་རིགས་ཀྱི་གནའ་བོའི་སྙིང་སྟོབས་ཀྱིས་དེ་རིང་གི་མི་རིགས་འདི་ཉིད་རང་ས་ན་གསོན་གནས་ཐུབ་ཡོད་པ་དང་། རང་གི་རིག་གཞུང་དར་སྤེལ་ཧ་ལས་པ་བྱིན་ཡོད་པ་དེར། གནའ་བོའི་མི་རབས་དེ་ཡི་བཀའ་དྲིན་ནི་གཞལ་དུ་མེད་པ་ཞིག་ཡིན་པ་ངེས་ཤེས་རྙེད་དུ་བཅུགས།

དགོང་མོ་མཚོ་ཤི་བོའི་འགྲམ་གྱི་མགྲོན་ཁང་སྤུས་གཙང་དེ་ལ་ཤིས་ཀར་སུམ་བརྒྱ་དང་གྱ་བཅུ་ཞག་གཅིག་གི་རིན་དུ་སྤྲད་དུས་སུ། རང་དབང་མེད་པར་དེ་ཡི་ཁ་གྲངས་ཧིན་སྒོར་ལ་བསམ་བློ་འཁོར་དུ་བཅུགས། དེ་ནི་ཧིན་སྒོར་ལྔ་སྟོང་མ་ཟིན་ཙམ་ཞིག་རེད། དེ་ནི་རང་ཉིད་ཀྱི་རྡ་ས་མེག་ལོར་དག་ཞིང་གི་ཟ་ཁང་གི་ཟླ་ངོ་གསུམ་གྱི་གླ་ཆ་རེད་འདུག་སྙམ་གྱིན། གློག་ཀླད་ཀྱི་ཁ་ཕྱེ་ནས་སྙན་ཚིག་ཚན་པ་གསུམ་བྲིས་རྗེས་སུ། ཤེལ་གྱི་སྒོ་ཆེན་པོ་དེ་ཕྱེ་ནས་ཁྱམས་རྭ་དེ་ནས་ཉི་མ་ནུབ་ཀྱིན་པའི་མཚོ་ཤི་བོའི་མཛེས་སྡུག་ལ་བལྟས། ༡༥།༡།༠༨

ཞོགས་ཉལ་གང་ཙམ་ཞིག་བརྒྱབས་རྗེས། མགྲོན་ཁང་གི་ཞོགས་ཟས་ནི་རིན་མེད་ཡིན་དུས། ཞོགས་ཟས་དངོས་ནས་ཧ་ལས་པའི་གྲྭ་རྒྱས་པོ་ཡོད་པ་དེ་དག་ཡིད་ཚིམས་པ་ཞིག་ཟས་པའི་རྗེས་སུ། དེ་ཡི་འགྲམ་གྱི་རི་བྲག་གི་ཁོར་ཡུག་ལ་རྐང་འཐུང་གི་འགྲུལ་བསྐྱོད་ཆུ་ཚོད་གཉིས་རིང་དུ་བྱས་ཀྱང་། རི་ལུང་དེ་དག་གི་ཁྱད་ཆོས་དང་མཛེས་སྡུག་ནི་རང་ཉིད་འོང་སའི་ཕ་ཡུལ་བོད་ཀྱི་མཛེས་སྡུག་དང་གཏན་ནས་བསྡུར་ཐབས་མེད་ནའང་། འདི་དག་གིས་འབད་ཞིང་ཧུར་བརྩོན་གྱིས་རང་ཉིད་ཀྱི་ཁོར་ཡུག་ལ་སྲུང་སྐྱོབས་བྱེད་སྟངས་འདི་དག་གིས་རང་ཉིད་ལ་རྒྱལ་ཁབ་ཞིག་ཡོད་རྒྱུ་ན། འདི་ལྟར་རང་བྱུང་ཁམས་ལ་སྲུང་སྐྱོབས་བྱེད་ལུགས་འདྲ་མིན་ཞིག་ཡོད་པའི་ངེས་ཟིན་ཐོབ་དུ་བཅུགས་སོང་།

ཕྱི་དྲོ་ངེད་གཉིས་ཀྱིས་རླངས་འཁོར་མུ་མཐུད་དུ་ལྷོ་ཕྱོགས་ཨེས་ལ་ཀྲི་ཡི་ཕྱོགས་སུ་ཁ་ཕྱོགས་དེ་སོང་། དངོས་ནས་བཤད་ན་ངེད་གཉིས་ཀྱི་རླངས་འཁོར་མ་རེད། ཁོ་མོའི་རླངས་འཁོར་རྙིང་ཀོག་ཞིག་ཡོད་པ་དེ་ཡིན། གཏོང་མཁན་ཡང་མོ་རང་རེད། ངས་འགྲམ་ནས་སྐད་ཆ་རེ་བཤད་རོགས་ལས་གང་ཡང་ཕན་མི་ཐོག་པ་ཡིན། ༡༦།༡།༠༩

མུ་འགོད།