གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ང་གཉིས།

ཁ་སང་རི་ལ་ཡར་འཛེགས་མར་འཛེགས་ཆེས་མང་བོ་ཞིག་བྱས་སྟབས། ད་ནི་དངོས་ནས་རྐང་ལག་ཚང་མ་རང་རང་གི་སར་འཇོག་ས་ཞིག་ཡོད་ན་ཅི་མ་རུང་སྙམ་པའི་སྣང་བ་ཞིག་སྟེར་གྱི་འདུག་པས་ཞོགས་པ་ཆུ་ཚོད་བཅུ་བ་ཡོལ་རེག་བར་དུ་ཉལ། ཡར་བླངས་པ་དང་མོ་རང་གི་གྲོགས་མོ་ཝན་གྱིས་ངེད་གཉིས་མཚོ་འགྲམ་དུ་མོ་རང་གི་རླངས་འཁོར་གྱིས་བསྐྱལ་སོང་། ཁོ་མོའི་སྒྲུང་གཏམ་ཞིག་གི་འཕྲོར་ཀློག་བཞིན་འདུག ངས་མཚོ་དམར་པོའི་འགྲམ་གྱི་བུད་མེད་གཅེར་བུ་དག་གི་སྒེག་པའི་ཉམས་དང་མཛེས་པའི་གཟུགས། འགྱུར་བའི་སྟངས་སྟབས་བཅས་ལ་ཧད་ཀྱིན་བསམ་བློ་དེ་ཡི་ཕྱོགས་སུ་འཁྲུལ་ནས་བསྡད། མུ་མཐུད་དུ་བསམ་བློའི་རང་དབང་ནི་ཚོད་འཛིན་མེད་པར་ཤག་ཤག་ཏུ་འཕྱོ་བའི་རྒྱ་མཚོའི་རླབས་རྒྱུན་དང་སྡེབས་ནས། སྒྲ་རྡུལ་འཕྲུལ་ཆས་ནང་གི་གླུ་དབྱངས་སྙན་མོ་ཞིག་ཀྱང་རྣ་ལམ་དུ་ཟུག་ནས་འོང་།

མཚོ་དཀྱིལ་དུ་གྲུ་གཟིང་ཆེན་པོ་ཞིག་བསྐྱོད་ཀྱིན་འདུག་པ་དེ་ནི་རྒྱལ་ཁབ་གང་ཞིག་ནས་དོལ་བསྐྱེལ་གྲུ་གཟིང་ཞིག་ཡིན་པ་རྒྱང་རིང་ནས་བལྟས་ན་ཤེས་ཀྱི་འདུག་ལ། མཁའ་དབྱིངས་སུ་གནམ་གྲུ་ཞིག་འཕུར་ནས་འོང་གི་ཡོད་པ་དེ་ནི་འདི་ཁུལ་གྱི་གནམ་ཐང་དེར་འབབ་རྒྱུ་ཡིན་པ་ཤེས་ཀྱི་འདུག སྐབས་དེར་ང་རང་གིས་ཐ་མག་འཐེན་འཕྲོ་དེ་ལ་སླར་ཡང་མེ་ཞིག་བསྒོས་དུས། གངས་མཚོས་ང་རང་ལ་མང་བོ་མ་འཐེན། ཁྱེད་རང་གི་འཕྲོད་རྟེན་ལ་གནོད་ཡོང་ཟེར། ངས་ཀྱང་འཐད་པའི་བརྡ་ལ་མགོ་བོ་གཡུགས་ཙམ་བྱས་པ་ཡིན།

ཨོ་རེད། ད་དུང་འདང་ནུབ་ང་རང་ལ་རྨི་ལམ་ཁྱད་མཚར་ཞིག་བྱུང་། དེ་ནི་ཧྲ་རན་སི་ན་ཡོད་པའི་བུ་ཆུང་བསྟན་འཛིན་རྣམ་སྲས་དང་ཁོ་མོའི་ཨ་མ་གཉིས་རེད། ཁོ་བོའི་མ་རྒན་གྱིས་བསྟན་འཛིན་རྣམ་སྲས་རྒྱ་གར་དུ་ང་རང་བསྡོད་སའི་ཁང་མིག་ནང་དུ་བཞག་འདུག་ལ། ངས་བསྟན་འཛིན་རྣམ་སྲས་མཐོང་མ་ཐག  ཨ་ཙི། ད་ངས་གང་བྱེད། བུ་ཆུང་འདིས་བོད་སྐད་ནི་མི་ཤེས། གྲོད་ཁོག་ཡང་ལྟོགས་ཡོད་ས་རེད། གཅིན་པ་ཡང་གཏོང་དགོས་ངེས་རེད་སྙམ་ནས་གཅིན་པ་གཏོང་སར་འཁྲིད་དེ་གཅིན་པ་གཏོང་རོགས་ཞེས་བཤད་དུས་དེ་མ་ཐག་གཅིན་པ་བཏང་སོང་། སྐབས་དེར་འདིས་བོད་སྐད་ཤེས་ཀྱི་འདུག་སྙམ་ནས་ང་རང་དགའ་ཞོར་དུ་བང་དུ་བཟུང་ནས་ཟ་མ་སྤྲད་དུས་ཧ་ཅང་ལྟོགས་ཡོད་པའི་ཚུལ་དང་བཅས་ཟ་བཞིན་འདུག

ངས་རྨི་ལམ་དེར་ཕྱིར་དྲན་བྱེད་བཞིན་པའི་སྐབས་ཏག་ཏག་དེར། གངས་མཚོ་དང་མོ་རང་གི་གྲོགས་མོ་ཝན་གཉིས་གཙང་སྤྱོད་ནས་ཚུར་ང་རང་ཡོད་སའི་མཚོ་འགྲམ་དུ་འབྱོར་སོང་། གངས་མཚོས་བཤད་ན་ངེད་གཉིས་ཀྱི་བྱིས་པ་དེར་ཆེ་རུ་འགྲོ་བཞིན་ཡོད་སྟབས། མོ་རང་ལ་གཅིན་པ་ཡང་ཡང་འབབ་ཀྱི་ཡོད་པ་རེད་ཟེར། ངེད་གཉིས་ཀྱི་བྱིས་པ་བདེ་ཐང་རེད་འདུག་ཟེར་ནས་ང་ལ་གཏམ་བཟང་ཞིག་བཤད་སོང་།

མི་ནི་རྨི་ལམ་དང་འབྲེལ་བ་ཡོད་མེད་གང་ལྟར་ཡང་། རྨི་ལམ་དེས་ང་རང་ཉིན་བཀང་བོར་བསམ་གཞིགས་ཀྱི་གྲོང་བརྡལ་ཞིག་དུ་བསྐྱལ་ནས། བསྟན་འཛིན་རྣམ་སྲས་དངོས་ནས་ཁྱེད་རང་གི་ཚེ་སྲོག་དང་ངའི་ཁྲག་རྒྱུན་ལ་གང་ཞིག་གི་འབྲེལ་བའི་གཏོགས་པ་ཡིན་ནམ་ཅི། ༡༧།༡།༠༩

གངས་མཚོས་གྲོགས་མོ་ཝན་དང་ངེད་གསུམ་ང་རང་ལ་ལས་ཀ་ཞིག་འཚོལ་དུ་ཟ་ཁང་ཁ་ཤས་ཤིག་གི་སྒོ་འགྲམ་རེ་རེ་བཞིན་ཉུལ་ནས་ཟ་ཁང་དག་གི་འགན་འཛིན་དག་ལ་ཐུག་འཕྲད་བྱས་ནས་སྐད་ཆ་བཤད། མཐའ་མ་དེར་འབར་མའི་ཡུལ་བཀོད་ཀྱི་བཟོས་པའི་མགྲོན་ཁང་ཆེས་མཛེས་ཤིང་ལྟ་ན་སྡུག་པ་ཞིག་གི་ནང་དུ་སླེབས། མགྲོན་ཁང་དེ་ཡི་འགན་འཛིན་ཞིག་ནས་ཁོང་ཚོར་ཟ་ཁང་དུ་མ་བྱན་ཞིག་དགོས་ཀྱི་ཡོད། ཁྱེད་རང་སང་ཉིན་ཆུ་ཚོད་བཅུ་བའི་སྟེང་དུ་ཤོག་དང་། ང་ཚོས་ཁྱེད་རང་གི་ལག་ཟས་ཀྱི་བྲོ་བ་ཞིག་བལྟ་དགོས་ཀྱི་ཡོད། དེ་ནས་ང་ཚོས་འགན་འཛིན་ལྷན་ཚོགས་ཀྱིས་ཐག་གཅོད་བྱེད་ངེས་རེད་ཅེས་བཤད་པའི་སྐད་ཆ་དེ་ཡིས་ང་རང་ལ་དགའ་སྣང་ཁྱད་པར་ཞིག་སྤྲད།

ཉིན་མ་འདི་དག་གི་རིང་དུ་ངེད་གཉིས་གངས་མཚོའི་གྲོགས་མོ་ཝན་བཟའ་མི་རྣམས་ཀྱི་ནང་དུ་བསྡད་པའི་རིང་དེར་ངས་བརྩམས་སྒྲུང་{བརྩེ་དུང་གི་དུར་ས་}ཞེས་པའི་དངོས་སྒྲུང་དེའི་ཚན་པ་ཁ་ཤས་ཤིག་འབྲི་ཐུབ་སོང་། ད་ནི་སང་ཉིན་ནས་ལས་ཀ་རེག་མིན་གྱི་སྐོར་ལ་ངས་རང་ཉིད་ལ་རྒྱུས་མངའ་ཡོད་པའི་ཟ་མ་ཞིག་དང་བྲོ་བཅུད་ལྡན་པ་ཞིག་གིས་ཁོང་ཚོས་ང་ལ་བལྟ་སྟངས་ཡག་པོ་ཞིག་སླེབས་པར་འབད་འབུངས་བྱེད་དགོས་པ་ཡིན་དུས། ངས་སང་ཉིན་ཁོང་ཚོ་ཟ་མ་ཅི་ཞིག་བཟོས་ན་ལེགས་སམ། ༢༠།༡།༠༩

མུ་འགོད།