ཉེ་ཆར་ཁམས་ལི་ཐང་དགོན་ཆེན་དུ་ཚོགས་པའི་སྐབས་བཞི་བའི་མདོ་ཁམས་ཡུལ་གྱི་འཇང་དགུན་ཆོས་ཆེན་མོའི་སྟེང་། དགེ་འདུན་པ་ལྔ་སྟོང་ལྷག་གི་ཚོགས་དབུས་སུ་༸གོང་ས་མཆོག་གི་སྐུ་པར་གདན་འདྲེན་ཞུས་ཏེ། མི་མང་ལ་མཇལ་ཁ་དང་ཁ་བཏགས་སྒྲོན་འབུལ་ཞུས་ཡོད་འདུག
དགེ་ལུགས་སྤྱི་འཐུས་ཨ་ཀྲུག་ཚེ་བརྟན་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༡༥ ཉིན་སྐབས་བཞི་བའི་མདོ་ཁམས་ཡུལ་གྱི་འཇང་དགུན་ཆོས་ཆེན་མོ་དེ་ལི་ཐང་དགོན་ཆེན་དུ་ཚོགས་ཡོད་ཅིང་། ཐེངས་འདིའི་འཇང་དགུན་ཆོས་ཐོག་ལི་ཐང་དགོན་ཆེན་གྱི་དགོན་མ་ལག་ ༡༡༣ གཙོས་པའི་ཁམས་ཕྱོགས་ཀྱི་དགོན་སྡེ་གཞན་དང་། མདོ་སྨད་ཀྱི་རྔ་པ་ཀིརྟི་དགོན་པ་གཙོས་པའི་དགོན་སྡེ་ཆེ་ཆུང་ ༥༠ ཙམ་གྱི་སྐུ་ཚབ་བཅས་ཆོས་རྒྱུད་ཆེན་པོ་བཞི་དང་གཡུང་དྲུང་བོན་བཅས་པའི་དགེ་འདུན་པ་ ༥༠༠༠ ལྷག དེ་བཞིན་ས་གནས་འབྲེལ་ཡོད་དཔོན་རིགས་དང་ས་གནས་མི་མང་བཅས་འདུ་འཛོམས་གནང་ཡོད་འདུག་ལ། འཇང་དགུན་ཆོས་མཚན་ཕུད་ཀྱི་དགོང་མོར་ལི་ཐང་དགོན་ཆེན་གྱི་མཁན་པོ་ལས་ཟུར་དང་ལས་ཀྱི་སྣེ་མོ་དག་གིས་༸གོང་ས་མཆོག་དང་༸པཎ་ཆེན་སྐུ་ཕྲེང་བཅུ་བ་མཆོག་རྣམ་གཉིས་ཀྱི་སྐུ་པར་མཐོང་གྲོལ་རིན་པོ་ཆེ་གདན་དྲངས་ཏེ་བཞུགས་ཁྲིར་བཀོད་ཡོད་པར་མ་ཟད། དེར་ཡོད་སྐྱ་སེར་གཉིས་ཀྱིས་ཁ་བཏགས་ཕུལ་ཏེ་མཇལ་ཁ་ཞུས་ཡོད་འདུག
སྐབས་བཞི་བའི་མདོ་ཁམས་ཡུལ་གྱི་འཇང་དགུན་ཆོས་ཆེན་མོའི་ཐད་དགོན་པའི་མཚན་ཉིད་གྲྭ་ཚང་གིས་ཐོག་མར་མདོ་ཁམས་ཡུལ་གྱི་དགོན་སྡེ་ ༡༠༠ ལྷག་མགྲོན་འབོད་ཀྱི་འཆར་གཞི་བསྒྲིགས་ཏེ་རྫོང་སྲིད་གཞུང་ལ་སྙན་སེང་ཞུས་པར། རྫོང་གི་འབྲེལ་ཡོད་ཚན་པས་འཇང་དགུན་ཆོས་ཐོག་གྲྭ་པ་ ༡༠༠༠ ལས་བརྒལ་མི་ཆོག་པ་མ་ཟད། རྔ་པ་ཀིརྟི་དགོན་པ་མགྲོན་འབོད་བྱེད་མི་ཆོག་པའི་བཀའ་ཕེབས་ཡོད་ཀྱང་། མཚན་ཉིད་གྲྭ་ཚང་གི་གོ་སྒྲིག་པ་ཚོས་ཐེངས་འདིར་གྲྭ་བ་ག་ཚོད་འཛོམས་མིན་གསལ་ཁ་མ་བཟོས་ཤིང་། རྔ་པ་ཀིརྟི་དགོན་པ་ཕེབས་པ་ཡིན་ན་དགའ་བསུ་ཞུ་རྒྱུ་ཡིན་ཞེས་བརྡ་ལན་སྤྲད་ཡོད་འདུག ད་དུང་དགོན་པའི་བདེ་སྲུང་མི་སྣ་ཁག་གིས་རྫོང་སྲིད་གཞུང་དང་ས་གནས་ཉེན་རྟོག་ལས་ཁུངས་ལ་ཐེངས་འདིའི་འཇང་དགུན་ཆོས་ཀྱི་མཚན་ཕུད་ཆེན་མོའི་སྐབས། ༸གོང་ས་མཆོག་གི་སྐུ་པར་གདན་འདྲེན་ཞུ་རྒྱུ་ཡིན་སྐོར་བརྗོད་ཡོད་པར་མ་ཟད། གལ་སྲིད་དེ་ལ་རྫོང་སྲིད་གཞུང་དང་ཉེན་རྟོག་པས་ཐེ་ཇུས་བྱས་ཏེ་བཀག་འགོག་བྱས་པ་ཡིན་ན། ང་ཚོས་ཟིང་ཆ་བསླང་སྲིད་པའི་སྐོར་ཡང་བརྗོད་ཡོད་འདུག
ཉིན་བཅུའི་རིང་གི་འཇང་དགུན་ཆོས་ཆེན་མོའི་སྟེང་དགོན་པའི་སྐད་ཡིག་རྒྱུན་འཛིན་ཚོགས་པས་སྐད་ཡིག་སྲུང་སྐྱོབ་དང་འབྲེལ་བའི་ལས་འགུལ་སྤེལ་ཡོད་པ་དང་། ལི་ཐང་དགོན་ཆེན་གྱི་མཁན་པོ་ལས་ཟུར་དང་གནད་ཡོད་མི་སྣ་ཁག རྫ་སེར་ཤུལ་དགོན་པའི་ཁྲི་པ། མཁན་ཆེན་ཚུལ་ཁྲིམས་བློ་གྲོས། དཀར་མཛེས་སྐྱབས་མགོན་བཅས་ཀྱིས་སངས་རྒྱས་ཀྱི་བསྟན་པ་འཛིན་སྐྱོང་སྤེལ་གསུམ་བྱེད་ཕྱོགས་དང་། བོད་ཁ་ཆོལ་གསུམ་གྱི་མི་མང་གི་མཐུན་སྒྲིལ་ཐད་དགོན་སྡེ་ཁག་གིས་འགན་འཁུར་དགོས་པ། ལྷག་པར་དུ་དགོན་སྡེ་ཁག་ནི་མང་ཚོགས་ཀྱི་ཁུར་བོ་དང་ཁྲག་འཇིབས་མཁན་ལྟ་བུ་མ་ཡིན་པར་དངོས་ཡོད་ཀྱི་ཐོག་ནས་མང་ཚོགས་ལ་ཕན་ཐོགས་བྱེད་མཁན་ཡིན་པ་ར་སྤྲོད་བྱེད་སྟངས་བཅས་ཀྱི་སྐོར་ནས་གསུང་བཤད་གནང་ཡོད་འདུག་ལ། མི་མང་གི་གོས་ནས་ཀྱང་༸གོང་ས་མཆོག་གི་སྐུ་ཕྱྭའི་ཆེད་དུ་རྟ་ནོར་ལུག་གསུམ་སོགས་ཚེ་ཐར་གཏོང་བ་དང་ཁྱིམ་ཚང་དབུལ་བོར་རྒྱུ་ནོར་ཕུལ་བ་སོགས་བྱས་ཏེ་མི་མང་གི་མཐུན་སྒྲིལ་དང་དབུལ་སྐྱོར་གྱི་ལས་འགུལ་སྤེལ་ཡོད་འདུག
ཆོས་ཕྱོགས་ཀྱི་མཛད་སྒོ་ཆེན་མོ་དེའི་ལས་དོན་ཁག་ཚན་པ་ ༥ ལ་བགོས་ཏེ་ལི་ཐང་ཤོག་དྲུག་སྐྱབས་མགོན་གཙོས་པའི་མཁན་ལས་ཟུར་ཁག་གིས་སྤྱི་ཁྱབ་འགན་འཛིན་དང་། མཁན་ཟུར་ཚ་སྟག་རིན་པོ་ཆེ་དང་མཁན་ཟུར་རྒྱ་ལུགས་སྤྲུལ་སྐུ་གཉིས་གཙོས་པའི་ལས་སྣེ་ཁག་གིས་བདེ་སྲུང་། མཁན་ཟུར་འཛམ་གླིང་སྤྲུལ་སྐུ་གཙོས་པའི་ལས་སྣེ་ཁག་གིས་དཔལ་འབྱོར། མཁན་ཟུར་བཞག་པ་སྤྲུལ་སྐུ་དང་མཚན་ཉིད་རྒན་དགེ་བཤེས་བསྟན་པ་སོགས་ཀྱིས་སྣེ་ལེན་པའི་ལས་འགན། མཁན་ཟུར་གཙང་ཤུལ་སྤྲུལ་སྐུ་གཙོས་པའི་ལས་སྣེ་ཁག་གིས་འཕྲོད་བསྟེན་བཅས་ཀྱི་ལས་འགན་འཁུར་ཡོད་འདུག ཐེངས་འདིར་ལས་བྱེད་མི་སྣ་མཆོད་མཇལ་དུ་ཡོང་སྐབས་བོད་ཆས་མ་གྱོན་པར་རྒྱ་ཆས་དང་ཉེན་རྟོག་པའི་སྒྲིག་ཆས་སོགས་གྱོན་ཏེ་ཡོང་མི་ཆོག་པའི་སྐོར་བརྗོད་ཡོད་སྟབས། ས་གནས་མི་མང་རྒན་དར་གཞོན་གསུམ་ཚང་མས་བོད་ལྭ་གྱོན་ཡོད་པར་མ་ཟད། རྫོང་སྲིད་གཞུང་གི་ལས་བྱེད་དང་ཀྲུང་དབྱང་བརྙན་འཕྲིན་ཁང་གཙོས་པའི་རྒྱ་ནག་གི་གསར་འགོད་པ་ཚོས་ཀྱང་བོད་ལྭ་གྱོན་ཏེ་བརྙན་ཕབ་བྱས་ཡོད་འདུག
མདོ་ཁམས་ཡུལ་གྱི་འཇང་དགུན་ཆོས་ཆེན་མོ་སྐབས་གསུམ་པ་བྲག་མགོ་དགོན་དུ་ཚོགས་ཡོད་འདུག
གསར་འགོད་པ། དོན་གོ
གངས་དཀར་ལྷུན་པོའི་མཐའ་ནས་བསྐོར་ཞིང་སྤང་ལྗོང་སྔོན་མོའི་ཁ་དོག་མཛེས། །ནགས་ཀློང་ཕྱུགས་མོའི་རི་ལུང་རྒྱན་པས་མཛེས་པའི་མེ་ཏོག་འཇའ་མཚོན་བཀྲ། །ལི་ཆུ་སྔོན་མོའི་འབབ་སྒྲ་ལྷང་ལྷང་བསིལ་རླུང་འཇམ་པོའི་ཕྱོགས་བཞིར་ཁྱབ། །རྟ་ལུག་ནོར་གྱི་ས་གཞིར་གཏམ་པའི་ལི་ཡུལ་རྩྭ་ཐང་ཚར་སྡུག་ལྡན། ། བཅས་པའི་སྙན་ཚིག་གི་རྒྱན་ཏེ་གུས་པ་ལི་ཡུལ་བུ་ཨ་འབྲུག་པས་
ཕ་ཡུལ་གངས་ཅན་གྱི་ལྗོངས་སུ་ཡོད་པའི་ལི་ཐང་ཡུལ་དགོན་གཉིས་ལ་རྗེས་སུ་ཡིད་རང་དང་། མདོ་ཁམས་འཇང་དགོན་ཆོས་སྐབས་རྒྱལ་བའི་སྐུ་པར་མཐོང་གྲོལ་རིན་པོ་ཆེ་བདེན་འདྲེན་ནས་མི་མང་གི་རེ་བ་སྐོང་ཐུབ་པ་དེ་དང་། མི་རིགས་ཀྱི་ལ་རྒྱ་སྙིང་དབུས་སུ་བཅང་ནས་ལས་དོན་བསྒྲུབས་པ་དེ་ལ་ལི་ཐང་སྐྱབས་མགོན་གཙོས་པའི་བྱམས་ཆེན་ཆོས་འཁོར་གླིང་གི་མཁན་བླ་འདུས་སྡེ་ཡོངས་དང་རྒྱ་ཆེ་མང་ཚོགས་ལ་སྙིང་ཐག་པ་ནས་ཐུགས་རྗེ་ཆེ་ཞུ། ཁ་དྲོ་བཀྲ་ཤིས། བར་ཆད་མེད་པར་ཤོག །
གཟིགས་དང་། ཅིག་སྒྲིལ་ལ་ནུས་པ་ག་ཚོད་འདུག གཟིགས་དང་།
ལི་ཐང་མི་དམངས་རྣམས་ལ་སྔར་ནས་ད་བར་སེམས་ཤུགས་དང་སྙིང་སྟོབས་དེ་འདྲའི་ཡོད།
གཞིས་ལུས་མི་མང་གི་སྙིང་སྟོབས་ལ་གུས་འདུད་ཞུ།
ཆིག་སྒྲིལ་ནི་སྟོབས་ཤུགས་ཡིན་ཟེར་བ་ནི་འདི་ལྟ་བུ་ཞིག་ལ་ཟེར་བ་ནི་ཅིས་ཀྱང་ཡིན་ངེས། བོད་ཀྱི་སྥྱི་ཚོགས་སུ་འདུས་ཆེ་བ་དང་སྒྲིལ་ཆེ་བ་ནི་གྲྭ་བཙུན་ཡིན་པར་རྟེན་དགྱ་ནག་འདི་ཚང་གིས་གྲྭ་བར་ཆེས་ཆེར་ལྡང་ཞིང་དེ་ལ་མིང་ཤས་ངན་པ་བཟོ་ཐབས་ལ་འབད་བཞིན་ཡོད། འདི་ལྟར་ཆོས་དད་རང་མོས་ཀྱི་རྒྱབ་ལྗོངས་ཡོད་པའི་ལས་འགུལ་གང་མང་སྤེལ་ཞིང་།་དགྱ་ནག་གི་ཁྲིམས་ལ་ལྟོས་ཤེས་ཀྱིས་ལས་འགུལ་རེ་རྩོམ་པ་ནི་དངོས་གནས་སྟོད་པར་འོས་དང་བ་བྱ་བ་ལམ་འགྲོ་ཡོང་བའི་སྨོན་ལམ་དང་རྒྱབ་སྐྱོར་ཅི་རིགས་བྱེད་དགོས་པ་ཞིག་རེད་བཀྲ་ཤིས་པར་ཤོག
ཞུ་ག་ལ་དགོས། ངོ་མ་དགའ་འོས་པའི་གཏམ་བཟང་ལོས་ཡིན། སྔར་ཡིན་ན། ལི་ཐང་སྤུན་གསུམ་ཟེར་ནས་ཡོངས་གྲགས་ཀྱིས་བོད་མི་རིགས་ཀྱི་དོན་དུ་བྱས་རྗེས་རླབས་ཆེན་འཇོག་ཡོད་པར་བཤད་རབས་ཡོད། སྤྱིར་དེཆོས་ཕྱོགས་ཀྱི་བྱ་བ་ཞིག་ཡིན་ཀྱང་བོད་ཀྱི་རྩ་དོན་འབྲེལ་བ་ཤིན་ཏུ་ཆེན་པོ་ཡོད། ས་ཁུལ་ཞིག་ཏུ་སྐད་འབོད་རྒྱག་པ་ལས་ལས་འགུལ་དེ་ལྟ་བུའི་རིགས་ལ་ནུས་པ་ཆེ་བ་དང་རྒྱ་ནག་ལ་བརྡ་ལན་ཤུགས་ཆེ་བ་སྤོྲད་ཀྱིན་ཡོད། བྱུང་ན། བོད་མདོ་དབུས་ཁམས་སྟོད་ཀྱི་ས་ཁུལ་བཞི་ཀ་ལས་གྲ་བ་གང་མང་གདན་འདེྲན་ཞུ་ཐུབ་ན་ཞེ་དྲག་ཡག་པོ་རེད། ང་ཚོས་མཁྱེན་གསལ་བཞིན། བོད་མི་རིགས་ཡོངས་རྫོགས་འཛོམས་ནས་ཆོས་ཕྱོགས་ཀྱི་བྱ་བ་ནི་བོད་རང་སྐྱོངས་ནས་ལ་བྱེད་ཐུབ་རྒྱུ་ཡོང་མི་སྲིད་པ་ཡིན་པས། བྱུང་ན་བོད་རང་སྐྱོངས་ལྗོངས་ཀྱི་ཕྱི་ལ་གནས་པའི་བོད་ཀྱི་ས་ཁུལ་ལ་གནང་ཐུབ་ན་ཡག་པོ་ཡོད། དེ་སྔོན་སེར་ཤུལ་དང་ཡུལ་ཤུལ་ས་ཁུལ་ལ་ཡང་འཇང་དགུན་ཆོས་སོགས་ཐེངས་ཁ་ཤས་འཚོགས་པ་གོ་མྱོང་ཡོད།
ངོ་མ་དགའ་འོས་བ་ཞིག་དང་གཏམ་བཟང་ཞིག་ཡིན་པས་སེམས་གཏིང་ནས་ཁམས་ལི་ཐང་མ་དགོན་གཙོའི་རིས་མེད་ཀྱི་ཆོལ་གསུམ་བླ་སྤྲུལ་ཚང་མ་ལ་དམིགས་གསལ་གྱི་ཐུགས་རྗེ་ཆེ་ཞུ་བཞིན་ཡོད།
མི་རིགས་ཀྱི་ལ་རྒྱ་བོད་མིའི་བདེན་དོན་གང་མྱུར་འགྲུབ་པར་ཤོག
གཞི་ལུས་མི་དམངས་ཀྱིས་སྙིང་སྟོབས་དང་དཔའ་ངར་ལ་གུས་འདུད་དང་བཅས་རྗེས་སུ་ཡི་རངས་ཞུ།
ཆོས་ཀྱི་ལས་འགུལ་མཉམ་ཏུ་མི་རིཊ་ལས་འགུལ་སྤེལ་བ་བཀྲ་ཤིས་བདེ་ལེགས་ཡོད།
མི་མང་འདུ་འཛོམས་ཀྱང་ཧ་ལས་པའི་ཆེན་པོ་བྱུང་སྟེ། གསེར་རྟ་བླ་རུང་དགོན་གྱི་མཁན་ཆེན་ཁྲིམས་བློ་གྲོས་མཆོག་གིས་བཀའ་སློབ་ཀྱི་སྐབས་སུ་ཚོད་རྩིས་བྱས་ན། དེ་རིང་འདིར་ཆོས་མཇལ་དུ་ཡོང་མཁན་མི་མང་ཁྲི་བཞི་ལྔ་ཙམ་ཡོད་ས་རེད་ཅེས་གསུངས་འདུག གང་ལྟར་འདྲ་པར་ནང་དུ་ལྟས་ན་ཆོས་མཇལ་དུ་ཡོང་མཁན་མི་མང་རྣམས་ཀྱིས། ལུས་ལ་གསེར་དངུལ་གཡུ་བྱུ་སོགས་ཀྱི་རྒྱན་ཆ་ཚད་ལས་བརྒལ་བ་དང་། དེང་སང་གཟབ་སྤྲས་སུ་རྩིས་སྲོལ་ཡོད་པའི་རྒྱ་སེར་དང་གོས་ཆེན་སོགས་ཀྱི་ཆས་གོས་གཅིག་ཀྱང་མཐོང་རྒྱུ་མི་འདུག ཆོས་མཇལ་བ་འདི་རྣམས་རྒྱན་གོས་ཤིན་ཏུ་དགའ་བའི་ལི་ཐང་པའི་མི་མང་རེད་ཟེར་ན་བདེན་པ་འདྲ་བ་ཞིག་གཏན་ནས་མི་འདུག ནམ་རྒྱུན་ལི་ཐང་པ་རྣམས་མི་ཚོགས་ཆེན་པོ་འཛོམས་ས་ཞིག་ཏུ་འགྲོ་ན་ཚད་ལས་བརྒལ་བའི་གཟབ་སྤྲས་དང་རྒྱུན་ཆ་འདོགས་སྲོལ་ཡོད། འོན་ཀྱང་དེ་རིང་ནི་ཆེས་ཡ་མཚན་པ་རེད།
འཇང་དགུན་ཆོས་ཆེན་མོ་ལེགས་གྲུབ་བྱུང་བར་དགའ་བསུ་དང་།ལི་ཐང་ཡུལ་དགོན་གཉིས་ཀྱི་སྙིང་སྟོབས་ལ་ཡི་རངས་ཞུ།
འཇང་དགུན་ཆོས་ལེགས་གྲུབ་བྱུང་བ་བཀྲ་ཤིས་པ་རང་རེད་།
མ་ཚད་ལི་ཐང་དགོན་གྱི་སྐྱབས་མགོན་གཙོ་བོར་གྱུར་པའི་ལི་ཐང་མི་མང་ཡོངས་ཀྱི་སྣིང་སྟབས་དང་ལྷ་བསམ་ལ་སྔར་ནས་ད་བ་བར་དུ་བོད་བསྟན་པ་ཆབ་སྲིད་དང་༌གོང་ས་མཆོག་གི་ལམ་སྟོན་ལ་ཤར་སྐྱོད་བྱེད་མཁན་ཞིག་པས་བསྔགས་བྲཇོད་ཞུ་།
དེ་རིང་ཡང་གོང་ས་མཆོག་གི་སྐུ་པར་གདན་འདྲེན་ཞུ་བའི་སྣིང་སྟབས་ལ་གཞིས་བཞུགས་བོད་ཟླ་ཡོངས་ཀྱི་ཚབ་ཞུ་ནས་ཐུགས་རྗེ་ཆེ་ཞུ་།
ལི་ཐང་བ་ཚོས་དུས་རྒྱུན་དུ་བཟང་ཕྱོགས་ཀྱི་ལས་འགུལ་འདི་འདྲིའི་རིགས་སྤེལ་གྱིན་འདུག་རྗེས་སུ་ཡི་རང་ཡོད།
ཁམས་ལི་ཐང་དགོན་ཆེན་དུ་ཚོགས་པའི་སྐབས་བཞི་བའི་མདོ་ཁམས་ཡུལ་གྱི་འཇང་དགུན་ཆོས་ཆེན་མོའི་སྟེང་། དགེ་འདུན་པ་ལྔ་སྟོང་ལྷག་གི་ཚོགས་དབུས་སུ་༸གོང་ས་མཆོག་གི་སྐུ་པར་གདན་འདྲེན་ཞུས་ཏེ། མི་མང་ལ་མཇལ་ཁ་དང་ཁ་བཏགས་སྒྲོན་འབུལ་ཞུས་གནང་བ་སོགས་ཀྱི་གནས་ཚུལ་གོ་མ་ཐག་དགའ་སྤྲོས་མིག་ཆུ་དབང་མེད་དུ་ཤོར་པ་ལས་ཚིག་གཅིག་ཀྱང་ཞུ་ཐུབ་མ་སོང་།
དེ་རིང་གཏམ་བཟང་ཞིག་མཐོས་རྒྱུ་འདུག་པས་ངེད་རང་ཧ་དགའ།
གཞི་བཞུགས་སྤུན་ཟླ་རྣམས་ཀྱི་སྙིང་སྟོབས་དང་ལས་འགུལ་དེ་ལྟར་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ།
འཇང་དགུན་ཆོས་ཀྱི་ཆོག་ཐོག་དེ་ལོ་ལྟར་བར་ཆད་མེད་པར་ཚོགས་ཐུབ་པའི་བཀྲིས་སྨོན་འདུན་ཡོད།
བྱ་དེ་ཁྲུང་ཁྲུང་དཀར་མོ།།
གཤོག་རྩལ་ང་ལ་གཡོར་དང་།།
ཐག་རིང་རྒྱང་ལ་མི་འགྲོ།
ལི་ཐང་བསྐོར་ནས་སླེབས་འོང་།།
འཇམ་དགུན་ཆོས་ཆེན་མོ་ལེགས་གྲུབ་བྱུང་བ་ལ་འཚམས་འབྲི་ཞུ།
བཤད་སྒྲུབ་ཀྱི་བསྟན་པ་འཛིན་སྐྱོང་སྤེལ་གསུམ་གཞོལ་བའི་དམ་པའི་སྐྱེས་བུ་རྣམས་སྐུ་ཚེ་རྒྱལ་མཚན་བརྟན་ཅིང། བསྟན་སྲིད་ཀྱི་བྱ་བ་གེགས་རྐྱེན་ཕྲ་མོ་ཙམ་མེད་པར་འདོད་དོན་ལྷུན་གྱིས་གྲུབ་སྟེ་བོད་ཁ་བ་ཅན་ལ་བདེ་སྐྱིད་ཀྱི་ཉི་མ་མྱུར་དུ་འཆར་བའི་སྨོན་འདུན་ཞུ།
བཀྲ་ཤིས་བདེ་ལེགས་གྲངས་མེད་ཞུ་བ་དང་ཆབ་གཅིག་ལས་འགུལ་སྤེལ་བསྟང་ལ་རྗེས་སུ་ཡི་རངས་ཡོད།
འཇང་དགུན་ཆོས་ལེགས་འགྲུབ་བྱུང་པ་འདི་ནི་ངོ་མ་ལེགས་པོ་རེད། མ་ཟད་༧གོང་ས་སྐྱབས་མགོན་ཆེན་པོ་མཆོག་གི་སྐུ་པར་གདན་འདྲེན་གནང་པ་ཧ་ཀྱང་ཡག་པོ་རེད། འོན་ཀྱང་རང་ཉིད་ཀྱི་ལས་དོན་གང་ཡོད་སོགས་དངོས་ཟིན་པའི་ཐོག་ནས་རང་དོན་མ་འཁྱོར་བ་ཞིག་རྒྱུ་གལ་ཆེན་རེད་ཐུགས་རྗེ་ཆེ།
འཇང་དགུན་ཆོས་རྒྱས་འཚོག་ཐུབ་པ་ལ་རྗེས་སུ་ཡི་རང་ཡོད་ལ། ཡིད་བཞིན་ནོར་བུའི་སྐུ་པར་གདན་འདྲེན་འདིས་རྒྱ་མིའི་གང་བྱེད་ཅི་ཤེས། བློ་འཚོབ་ཆེན་པོ་འདུག གཞིས་ཀྱི་སྤུན་ཟླ་འདི་ཚོའི་སྙིང་སྟོབས་ནི་ཕུལ་དུ་བྱུང་བ་ཞིག་ཅི་ཕྱིར་མིན། ལོ་ཞུགས་མའི་འཇང་རྒུན་ཆོས་ལ་ཡང་བར་ཆད་མེད་པར་འདི་བཞིན་གནང་ཐུབ་པའི་སྨོན་འདུན་ཡོད།
ལས་འགུལ་དར་གྱི་མདུད་པ་ལ་རྗེས་སུ་ཡི་རང་ཡོད།