གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ང་གསུམ།

ཁ་སང་ཐེ་ལན་གྲི་ཟ་ཁང་དེའི་འགན་འཛིན་གྱིས་བཤད་པ་ལྟར་དེ་རིང་སྔ་བོ་ཆུ་ཚོད་བཅུ་བའི་སྟེང་དུ་ང་རང་ཟ་ཁང་དེའི་ཐབ་ཚང་དུ་སོང་ནས་རང་གི་གང་ཤེས་པའི་ཁ་ཟས་ཤིག་བཟོས་ཟེར་བ་ལྟར་དུ་འཐེན་ཐུག་བརྔོས་མ་ཤ་ཡོད་དང་ཤ་མེད་གཉིས་སྡེར་མ་བཞི་དང་ཤ་མོག་བརྔོས་མ་ཁུ་ནུར་ཡོད་པ་ཞིག་བཟོས་དེ་ཁོང་ཚོ་འགན་འཛིན་ལྷན་རྒྱས་སུ་བྲོ་བ་ལྟ་རུ་བཅུགས་པ་ཡིན། འགན་འཛིན་བཞི་བོས་ཁ་གཅིག་གྲགས་ཀྱིས་དངོས་ནས་བྲོ་བ་འདུག་ཟེར་ནས་བསྔགས་བརྗོད་བྱས་སོང་། ཡིན་ཡང་། འགན་འཛིན་ལོ་ན་རྒན་པ་དེའི་ངེད་ཅག་གི་ཟ་ཁང་གི་ཟ་མ་ཐེ་ལན་གྲིའི་ཁ་ཟས་ཡིན་སྟབས། ཁྱེད་རང་གི་ཐེ་ལན་གྲིའི་ཁ་ཟས་ཁ་ཤས་ཤིག་བཟོས་དེ་དེའི་བྲོ་བ་ག་འདྲ་ཡོད་མེད་དུ་བལྟ་དགོས་པ་དེ་ནི་གལ་ཆེན་པོ་ཆགས་ཡོད་པ་རེད་ཟེར་བས་འགན་འཛིན་གཞོན་པ་དེའི་ང་དང་གངས་འཚོ་གཉིས་ལ་དེ་ནི་ངེད་ཅག་མ་བྱན་ཆེན་མོ་ཁོ་རང་ཡོང་རོགས་བར་དུ་སྒུག་ནས་ད་གཟོད་ཁོ་རང་གི་གང་བཟོས་པ་དེ་ནས་ཁྱེད་རང་གི་གཅིག་བཟོས་དེ་བལྟས་ན་འགྲིག་གི་རེད། ཐོག་མར་ང་ཚོ་འགྲོ་ནས་སྐོམ་ཆུ་རེ་དང་ཡང་ན་འཚིག་ཇ་རེ་འཐུང་ནས་ཁོ་རང་སླེབས་རོགས་བར་དུ་སྒུག་ཟེར་བས་ངེད་ཅག་གིས་མ་བྱན་སླེབས་རེག་བར་དུ་སྒུག་པ་ཡིན།

ཐེ་ལན་གྲི་ནས་ཡིན་པའི་མ་བྱན་རྒན་པ་དེ་ལ་འགན་འཛིན་གྱིས་ང་རང་ངོ་སྤྲོད་གནང་སོང་། མ་བྱན་དེས་དབྱིན་སྐད་ཆ་ཆོར་ཞིག་ལས་མི་ཤེས་ཀྱང་ཤེས་པ་དེ་དག་བརྒྱུད་ངེད་གཉིས་ཀྱིས་ཕན་ཚུན་ལ་གོ་བརྡ་འཕྲོད་མི་འཕྲོད་བྱེད་ཞོར་དུ་ང་རང་གི་ཐེ་ལན་གྲིའི་ཟ་མ་དང་ཁུ་བའི་རིགས་ཁ་ཤས་ཤིག་བཟོས་དེ་ཁོང་ཚོ་ལ་ཟ་རུ་བཅུགས། ཁོང་ཚོས་དངོས་ནས་ཞིམ་པོ་འདུག  ཁྱེད་རང་ཁོམ་པ་ཡོད་ན་དགོང་དྲོ་དུས་ཚོད་བདུན་པའི་སྟེང་དུ་ཡོང་ནས་ཐབ་ཚང་གི་མ་བྱན་གྱི་ག་རེ་བཟོ་བཞིན་འདུག་པ་དེ་ལ་བལྟས་དེ་ཆུ་ཚོད་གཉིས་རིང་དུ་བསྡད་ན་འགྲིག་གི་རེད་ཅེས་འའགན་འཛིན་གཞོན་པ་དེའི་ང་རང་ལ་བཤད་པ་ལྟར་སོང་། ངས་ཐེ་ལན་གྲིའི་མ་བྱན་དེའི་ང་རང་ལ་བྱ་ཤ་ཁ་ཤས་ཤིག་ལག་པར་བཞག་ནས་གཏུབ་དུ་བཅུགས་དུས་སུ་ང་རང་གི་སེམས་ནང་དུ་སྐྱོ་སྣང་ཞིག་སླེབས་པ་ནི། ང་རང་གི་འདོད་པ་ལས་ཀ་འདི་འདྲ་ཞིག་བྱེད་རྒྱུ་དེ་ནི་མིན་ཡང་། ད་ནི་ལས་ཀ་གང་ཞིག་རེག་ན་དེ་བྱེད་དགོས་སྙམ་ནས་ཤ་རྩེད་ཞོར་དུ་བྱ་ཤ་དེ་དག་གཙང་བཟོ་བྱས་པ་དང་སྔོ་ཚལ་དང་ཤ་མོག་སོགས་མང་བོ་ཞིག་གཏུབ་རོགས་བྱས། ང་རང་གི་ཟ་མ་སྒོང་རུལ་སྔོ་ཚལ་གྱི་འབག་པ་དེ་བཟོ་སྟངས་མ་འདྲ་ཞིག་ཡིན་སྟབས། ང་རང་གིས་ཐེ་ལན་གྲིའི་བཟོ་སྟངས་དེ་ཤེས་རྒྱུ་ལ་དཀའ་ངལ་ཅུང་ཙམ་ཞིག་འཕྲད་སོང་། ཡིན་ཡང་། ག་ལེར་ཤེས་མི་ཐུབ་པ་ཞིག་གཏན་ནས་རེད་མི་འདུག ང་རང་ལ་ཐབ་ཚང་དེ་ནས་ཐེ་ལན་གྲིའི་ཟ་མ་བཟོ་སྟངས་ཁ་ཤས་ཀྱི་ཉམ་མྱོང་རེག་སོང་ལ་ཞོར་དུ་ཁ་ལག་དེ་དག་ནི་མིའི་འཕྲོད་བརྟེན་ལ་མི་བཟང་བའི་ཟ་མ་བསྐོར་ཞིག་ཡོད་པ་ཡང་ཤེས་སུ་བཅུགས་སོང་།

དེ་རིང་གི་ཉིན་མོ་འདི་ནི་གངས་འཚོ་དང་ངེད་གཉིས་ཀྱི་ཁང་བ་གསར་བ་ཞིག་གླས་པ་དང་ཁང་གླ་ཟླ་གཅིག་ལ་ཤིས་ཀར་བརྒྱད་བརྒྱ་རེད། ང་རང་དེ་རིང་ཉིན་གང་བོར་ཐེ་ལན་གྲི་ཟ་ཁང་ཞིག་གི་ནང་དུ་ལས་ཀ་བྱས་པ་དང་། ཁོང་ཚོས་སང་ཉིན་ང་རང་ལ་ལས་ཀ་བྱེད་རྒྱུར་དགོས་མིན་གྱི་བསྐོར་ཁ་པར་གཏོང་ཆོག་ཟེར་བས། ད་ནི་ངེད་གཉིས་ཕྱིར་ནང་དུ་འབྱོར། མཚན་མོ་བཅུ་ཚོད་དང་བོ་ཟིན་འདུག  གངས་འཚོས་གྲོགས་མོ་ཁ་ཤས་དང་ལྷན་དུ་མཚན་མོའི་ཟ་ཁང་ཞིག་དུ་སོང་དེ་ཁོང་ཚོས་ཝུ་ཆང་ཉུང་ཉུང་རེ་འཐུང་ནས་ང་རང་གི་ཆུ་མངར་མོ་ཞིག་འཐུང་ཞོར་དུ་དཀར་ཐིགས་ཞིག་ཟས། ༢༡།༡།༠༩

ཉིན་གོང་བོར་རེ་སྒུག་བྱས་པ་ལྟར། ཕར་ལ་ཁ་པར་ཁ་ཤས་ཤིག་བཏང་བས་སྟབས་ཀྱིས་ཕྱི་དྲོར་དེར་ལན་ཞིག་འབྱོར་བ་ནི། གཟའ་ཉི་མའི་ཞོགས་པ་ཆུ་ཚོད་བཅུ་གཅིག་སྟེང་དུ་ཟ་ཁང་དུ་ཡོང་ནས་ཐོ་འགོད་བྱས་དེ་དེ་ནས་བདུན་ཕྲག་གཅིག་གི་རིང་དུ་ཚོད་ལྟ་བྱེད་ཀྱི་ཡིན། དེ་ནས་འགྲིག་སོང་བ་ཡིན་ན་རྒྱུན་ལྡན་གྱི་ལས་ཀ་སྤྲོད་ཀྱི་ཡིན་ཞེས་ལན་སྤྲད། ཁང་བ་གསར་བའི་ནང་དུ་གཙང་གྲ་བྱས་པ་དང་ནང་དུ་ཟ་མ་ཁ་ཤས་ཤིག་ཁྲོམ་ར་ཆེན་མོ་ནས་ཉོ་རུ་སོང་། ད་དུང་རླངས་འཁོར་བཟོ་ས་དང་ཅ་ལག་གཞན་ཉོ་ས་ཁ་ཤས་སུ་སོང་དེ་ཁང་བ་གསར་བའི་ནང་ལ་དགོས་པའི་ཅ་དངོས་ཕྲན་བུ་རེ་ཉོས། གངས་འཚོ་ནི་ཐང་ཆད་དེ་འགུལ་བསྐྱོད་ཀྱང་ཞེ་དྲག་རྒྱག་ཐུབ་ཀྱི་མི་འདུག ཕྱི་དྲོ་ས་མ་རུབ་ཡར་སྔོན་དུ་གངས་འཚོའི་གྲོགས་མོ་ཝན་གྱིས་ངེད་གཉིས་ལ་ཚལ་རླུང་ཆེ་ཆུང་གཉིས་དང་ཟ་མ་བཟོ་སའི་བ་མ་ཞིག་འཁུར་ནས་ཡོང་མ་ཐག ང་རང་གི་ཐིགས་པ་ཞིག་གང་མགྱོགས་ཀྱིས་བསྐོལ་ནས་འཐུང་བ་ཡིན། གངས་འཚོ་ཕྱི་རུ་གྲོགས་མོ་ཝན་གྱིས་གྲོགས་མོ་ཞིག་གི་གཏམ་བཤད་གནང་སར་བྱིན། ང་རང་གཅིག་བུ་ནང་དུ་ཐིགས་པ་དེ་འཐུང་ནས་བསམ་བློ་རེ་ཞིག་ལྷོད་དུ་འབབ། གཅིག་བྱས་ན་དེ་ནི་ལས་ཀ་ཤོག་ཟེར་བས་བརྡ་ལན་དེ་ཐོས་པའི་ཡང་ཡིན་སྲིད་པ་རེད། ངས་ཐིགས་པ་འཐུང་ཚར་ནས་གློག་ཀླད་ཀྱི་ཁ་ཕྱེ་ནས་ཉལ་ཁྲིའི་སྟེང་ནས་གཉིད་དུ་ཤོར་འདུག་ལ། ཆུ་ཚོད་གཉིས་ཙམ་རྗེས་སུ་གངས་འཚོ་ནང་དུ་སླེབས་པ་ཡང་མ་ཤེས། གངས་མཚོ་ངེད་གཉིས་ཀྱི་ལྷན་དུ་གློག་ཀླད་ནང་ནས་དབྱིན་ཇིའི་གློག་བརྙན་ཞིག་ལ་བལྟས། ཁོ་མོ་གློག་བརྙན་གྱི་བར་གསེང་ནས་ལག་པ་ཡ་གཅིག་ང་རང་གི་སྟེང་ལ་བཞག་ནས་གཉིད་དུ་ཤོར། གློག་བརྙན་རྫོགས་སོང་། ཁོ་མོ་ཡང་གཉིད་ལས་སད་ནས་ཐུག་པ་འཐུང་རྒྱུ་ཟེར་བས་ངས་ཐུག་པ་དེ་ཚ་བོ་བཟོས་དེ་ཁོ་མོ་ལ་སྤྲད་པ་ཡིན། ཁོ་མོ་ད་དུང་གཉིད་མ་སད་ཅིག་གི་སྒང་ནས་ང་རང་ལ་གྲོགས་མོ་ཝན་བཟའ་མི་གཉིས་ཀྱི་དོ་ནུབ་ཆུ་ཚོད་བཅུ་བའི་རྗེས་སུ་ཉི་ཧོང་གི་ཁ་ལག་ཟ་རུ་འགྲོ་ཟེར་བས་ང་རང་དེ་ལ་འགྲོ་འདོད་འདུག་ཟེར་ཞོར་དུ་མོ་རང་ཡང་བསྐྱར་སྐར་མ་ཁ་ཤས་རིང་དུ་གཉིད་རྒྱུ་ཡིན་ཟེར་བས་ང་རང་གི་སྙན་ངག་{ང་ཐང་ཆད་ཀི}་ཟེར་བ་ཞིག་བྲིས་དེ་ཁོ་མོ་གཉིད་ལས་ཕྱིར་སད་རྒྱུ་དེ་ལ་སྒུག་པ་ཡིན།

ཕྱིར་ནང་དུ་འབྱོར་དུས་མཚན་གོང་གི་ཆུ་ཚོད་དང་བོ་དང་སྐར་མ་བཞི་བཅུ་ཞེ་ལྔ་ཟིན་འདུག དོ་ནུབ་ཡང་མཚན་མོའི་ཟ་ཁང་གཞན་ཞིག་དུ་སོང་དེ་རིན་མེད་དུ་ཉི་ཧོང་གི་སྐད་གྲགས་ཅན་གྱི་ཟ་མ་སོས་ཤིས་ཟེར་བ་དེ་ཟོས་པ་དང་མི་དམངས་ཀྱི་དཀྱིལ་དུ་མིག་ཟུང་ཡང་ཡང་བསྐོར་དུས། རྒྱང་རིང་གི་མི་ཞིག་མིག་ལམ་དུ་ཡང་ཡང་འཁོར་ཞིང་། ཡིན་ཡང་། དེ་ནི་མིག་མ་བཙུམ་པིའ་རྨི་ལམ་ཞིག་ལས་གང་ཡང་མ་རེད། མི་ཚོགས་ནི་ཧ་ཅང་འཚང་ཁ་རྒོད་ན་ཡང་ཤར་ཕྱོགས་ཀྱི་བོད་མི་ནི་ང་རང་གཅིག་བུ་ལས་མི་འདུག་ཀྱང་། ཤར་ཕྱོགས་པའི་རྒྱ་ནག་ཕོ་གསར་གཉིས་ཀྱང་དེ་རུ་སླེབས། དེ་གཉིས་ཀྱི་ཐེངས་མ་ཁ་ཤས་ཀྱི་རིང་དུ་ང་རང་གི་ཕྱོགས་སུ་བལྟས། ཡིན་ཡང་ངེད་ཚོས་བར་དུ་སྐད་ཆ་གང་ཡང་མ་བྱུང་། ང་རང་ཆུ་ཚོད་གཉིས་དང་ཕྱེད་ལྷག་གི་རིང་དུ་མཚན་མོའི་ཟ་ཁང་གི་ཟིང་ཟིང་གིས་ཀླད་པ་ཡང་དཀྲུགས་དཀྲུགས་ཐེངས་མ་ཁ་ཤས་ཤིག་བཏང་སོང་། ངེད་ཅག་གི་བསྐོར་དེ་ལ་ཝན་བཟའ་མི་གཉིས་དང་ངེད་གཉིས་གཞན་པའི་བུད་མེད་བཞི་བཅས་ཡོད། ང་རང་དགའ་བའི་མཚན་མོའི་ཟ་ཁང་མིན་ན་ཡང་གངས་མཚོའི་རེ་འདོད་བཞིན་དེར་བཅར་བ་ཡིན། ང་རང་ནི་འདི་ལྟར་མི་ཚེ་ལ་དགའ་ཞེན་བྱེད་སྟངས་མི་ཤེས་པའི་ནུབ་ཕྱོགས་པའི་སྐྱིད་པོ་དང་སྤྲོ་སྐྱིད་དུ་རློམ་པ་འདི་ལ་དངོས་ནས་སྔ་མོ་ནས་སུན་སྣང་ཡོད།
༢༢།༡།༠༩ཨེས་ལ་ཀྲི་མཚོ་འགྲམ་གྱི་ཁང་བ་གཡར་མའི་ནང་དུ། 

མུ་འགོད།