ཉིན་ཁ་ཤས་ཀྱི་སྔོན་ནས་བཟུང་། ང་རང་གི་མཛའ་མོ་ལ་བརྙན་འཕྲིན་ལས་ཁུངས་{རྗེས་ལ་མཇལ་ཡོང་}ཟེར་བ་དེ་ནས་ཁ་པར་ཞིག་འབྱོར་ནས། དེ་རིང་ཕྱི་དྲོ་ང་རང་ཆུ་ཚོད་དྲུག་པའི་སྟེང་། གྲོང་ཁྱེར་ཀྲེ་ལ་བས་ལ་འབྱོར་དགོས་རབས་བཤད་ཡོད་པ་ཡིན་དུས། ངས་ལས་རོགས་ཁ་ཆེ་བ་ཨེས་ས་ལ་ང་རང་དེ་རིང་ཀྲེ་ལ་བས་ལ་འགྲོ་དགོས་ཀྱི་ཡོད། ཆུ་ཚོད་གཅིག་ཙམ་གྱིས་ལས་ཀ་མ་གྲོལ་སྔོན་དུ་འགྲོ་དགོས་ཀྱི་ཡོད། འགྲིག་གི་རེད་དམ་ཞེས་དྲིས་པ་དེར། ཁོ་བོས་ཡིན་དང་ཡིན། སྐྱོན་མེད་ཀི ཁྱེད་རང་སོང་དང་། ཁྱེད་ཀྱི་ཚབ་དུ་ངས་གཙང་དཀྲུ་བྱེད་ཆོག་ཟེར།
མ་བྱན་ཆེན་མོ་དང་སྤྱིན་བདག་གཉིས་ལ་དེ་ལྟར་རང་ཉིད་ཆུ་ཚོད་གསུམ་པའི་སྟེང་ནས་ལས་ཀ་ནས་འགྲོ་དགོས་དོན་ཞིག་ཡོད་པར་བཤད་པ་དེར་ཁོ་གཉིས་ཀྱིས་ཀྱང་འགྲིག་གི་རེད། སྐྱོན་མེད་ཀི་ཞེས་བཤད་སྟབས། ང་རང་ཆུ་ཚོད་གསུམ་ལ་སྐར་མ་བཅོ་ལྔ་མ་ཟིན་ཙམ་ཞིག་ལ་གོན་པ་བརྗེ་རུ་སོང་ནས་ལམ་དུ་བུད། ལས་ཀ་བྱེད་ས་ནས་རླངས་འཁོར་འབབ་ཚིགས་བར་དུ་སྤྱི་སྤྱོད་རླངས་འཁོར་གཅིག་མ་གཏོགས་རྒྱུད་མི་དགོས་དུས། ང་རང་གི་ལས་ཀ་བྱེད་སའི་རྗོ་སུ་ལམ་གྱི་སློབ་ཆེན་གྱི་སྒོ་འགྲམ་དུ་སླེབས་པ་དང་། སྤྱི་སྤྱིད་རླངས་འཁོར་ཞིག་ཏག་ཏག་དེར་འདུག
རླངས་འཁོར་འབབ་ཚིགས་ནས་ཡར་འཛུལ་དུས་སུ། རྒྱུན་ལྡན་ལྟར་འགོག་སྲུང་བ་དེ་དག་གིས་བསྔོག་གཤེར་བྱས་པ་དང་ཅ་དངོས་གང་ཡོད་པ་དག་གློག་གི་འཕྲུུལ་ཆས་བརྟག་དཔྱད་བྱེད་སའི་ནང་དུ་བཞག ཐོག་ཁང་གསུམ་པ་ནི་རླངས་འཁོར་འབབ་ཚིགས་ཡིན་དུས། སྐད་སྐུར་འབྲི་སའི་བུད་མེད་དེ་ལ་ང་རང་འགྲོ་ཡུལ་གྱི་རླངས་འཁོར་འགག་སྒུག་བྱེད་སའི་ཨང་གྲངས་གང་ཡིན་མིན་དྲིས་པ་དེར། མོས་ཀྱས་ཨང་གྲངས་བཅོ་བརྒྱད་རེད་ཟེར། ཏག་ཏག་འགག་སྒུག་བྱེད་སར་འབྱོར་དུས། ཏག་ཏག་ཡང་རླངས་འཁོར་འགྲོ་བར་སྐར་མ་ཁ་ཤས་ཤིག་ལས་མེད་ཀི ཤིས་ཀར་སུམ་བཅུ་སོ་བཞི་ཡར་མར་གཉིས་ཀྱི་རིན་དུ་སྤྲད།
སྐར་མ་ལྔ་བཅུའི་རྗེས་སུ་ང་རང་མེ་འཁོར་ས་ཚིགས་ཀྱི་འགྲམ་དུ་ཡོད་པའི་རླངས་འཁོར་འབབ་ཚིགས་དེར་འབྱོར། དེ་ནས་སྤྱི་སྤྱོད་རླངས་འཁོར་ཨང་གྲངས་བཅོ་བརྒྱད་དང་ཡང་ན། བརྒྱ་དང་ང་གཉིས་གང་རུང་ཞིག་དུ་བསྡད་ནས་སྤྱི་ལེ་ཁ་ཤས་ཤིག་སོང་ན་ང་རང་འགྲོ་ཡུལ་ཡིན། ངས་དེ་ནས་སྤྱི་སྤྱོད་རླངས་འཁོར་དག་གི་ཨང་གྲངས་གཤིག་གཤེར་བྱས་ནས་བལྟ་བཞིན་དུ་སོང་དུས། ང་རང་གི་སྔོན་ཏག་ཏག་དེར་ཨང་གྲངས་བཅོ་བརྒྱད་ཅན་གྱི་སྤྱི་སྤྱོད་རླངས་འཁོར་འདུག སྤྱི་སྤྱོད་རླངས་འཁོར་དེ་ཡི་འགྲམ་དུ་བང་བསྒྲིགས་ནས་ཡོད་པའི་ཕོ་གསར་ཞིག་ལ་ང་རང་གི་ལག་ནང་གི་ཤོག་ལེབ་ཆུང་ཆུང་ངེས་སུ་མཛའ་མོས་ཧེས་པོས་ནས་བྲིས་པའི་ས་ཚིགས་དེ་བསྟན་དུས། ཁོས་འདི་རེད་ཅེས་ལན་བཏབས་པ་ལྟར་ནང་དུ་འཛུལ་ནས་ཁ་ལོ་བ་དེར་བསྐྱར་དུ་བསྟན་དུས། མགོ་བོ་ནང་དུ་བཀུགས་སོང་། ངས་ག་ཚོད་རེད་ཅེས་དྲིས་དུས། ཤིས་ཀར་དྲུག་དང་ཟུར་བཞི་རེད་ཟེར།
ལམ་བར་དུ་ང་རང་ཁ་ལོ་བའི་འགྲམ་དུ་ཡར་བླངས་ནས་བསྡད་དེ། ཁ་ལོ་བ་ང་རང་འབབ་ཚིགས་ཀྱི་ས་ཆ་དེར་སླེབས་དུས་ང་རང་ལ་བཤད་རོགས་ཞེས་བཤད་དུས། ཁོས་ད་དུང་ཐག་རིང་གི ཁྱེད་རང་སོང་ནས་རྐུབས་སྟེགས་སྟེང་དུ་བསྡད་ནས་གཉིད་བསྡད་ཀྱང་འགྲིག་གི་ཟེར་ན་ཡང་། ང་རང་གིས་དེ་ལྟར་མ་བྱས་པར་ཁོ་རང་གི་འགྲམ་དེར་ཡར་བླངས་ནས་བསྡད། མི་ཚོགས་མང་ས་དང་ཁྲོམ་ར་ཆེ་ས། གཞུང་ལམ་འདྲ་མིན། མཚོ་མོའི་འགྲམ་སོགས་རྒྱུད་མཐར། ཁ་ལོ་བས་འདི་ནས་ས་ལ་འབབ་དགོས་ཟེར།
ཨམ་ཕྲག་ལས་ཐ་མག་གི་སྒམ་ཆུང་ཕྱི་རུ་ལེན་ཞོར་དུ། མཛའ་མོ་ལ་ཁ་པར་བཏང་ནས་རང་ཉིད་ད་ལྟ་རང་སྤྱི་སྤྱོད་རླངས་འཁོར་ནས་འབབ་ཚུལ་དང་ད་ནི་གོམ་པ་བརྒྱབས་ནས་ས་ཁུལ་དེ་འཚོལ་བཞིན་ཡོད་ཅེས་བཤད་རྗེས་སུ། ཚ་བ་ཆེ་བའི་ཀྲི་ལེས་བས་ཀྱི་གྲོང་ཁྱེར་ནང་ནས་མི་ཁ་ཤས་ཤིག་ལ་སྐད་ཆ་འདྲི་བཞིན་འདྲི་བཞིན། སྐར་མ་བཅོ་ལྔ་ནས་ཉི་ཤུའི་བར་དུ་གོམ་པ་བརྒྱབས་རྗེས། གཞི་ནས་བཞི་མདོ་དེར་སླེབས་པ་དང་། ལག་ནང་གི་ཤོག་ངོས་སུ་བྲིས་པའི་གཞུང་ལམ་གྱི་མིང་དང་གཅིག་པ་ཡིན་དུས། ལས་ཁུངས་ཀྱི་ཁ་པར་ཞིག་ཡོད་པ་དེར་ཁ་པར་བརྒྱབས་ནས་རང་ཉིད་དེར་འབྱོར་ཡོད་ཚུལ་བཤད་དུས། ཁ་པར་འཇོག་མཁན་གྱི་བུད་མེད་དེས་ང་རང་གི་གོན་པའི་ཁ་དོག་སོགས་དྲིས་ནས། མི་རིང་བར་ང་རང་ལེན་མཁན་གྱི་མི་ཞིག་ཡོང་ངེས་ཡིན་རབས་བཤད་སོང་།
ཚ་བ་ཧ་ཅང་ཆེ་བའི་སྐོམ་ཆུ་ཞིག་མ་ཉོས་ཐབས་མེད་རེད་འདུག འགྲམ་དེར་སྐོམ་ཆུ་བཙོང་མཁན་གྱི་ཚོང་ཁང་ཆུང་ཆུང་ཞིག་ཡོད་པ་དེ་ཡི་ནང་ནས་ཇ་འཁྱག་འགྱིག་དམ་ཆུང་ཆུང་ཞིག་ཉོས་ནས་ཁ་ཕྱེ་ནས་སྐར་མ་གཉིས་ཙམ་མ་སོང་བའི་སྐབས་དེ་འདྲ་ཞིག་ལ། ང་རང་གི་འགྲམ་དེར་ཤར་ཕྱོགས་ཀྱི་བུད་མེད་ཅིག་དང་ཕྱི་རྒྱལ་ཕོ་གསར་ཞིག་བཅས་འདུག ངས་འདི་གཉིས་ཀྱང་ང་དང་འདྲ་བོ་ཡིན་ས་རེད་སྙམ་ནས་བསྡད་ཡོད་དུས། ཕོ་གསར་བརྫིག་པོ་ཞིག་གིས་ང་རང་ལ་ཁྱེད་རང་འདིར་འཁྲབ་ཚན་ཚོད་ལྟ་བྱེད་དུ་ཡོང་མཁན་དེ་ཡིན་ནམ་ཞེས་དྲིས། ངས་ཡིན་ཞེས་བཤད་དུས། བུད་མེད་དེས་ཀྱང་ཁོ་མོ་ཡང་ཡིན་པར་བཤད་ནས་ལག་འཇུ་ཞིག་གནང་སོང་། ད་གཟོད་ང་ཚོ་འཛོམ་ཡུལ་ནི་ཁོར་ཡུག་དེ་ག་རང་ཡིན་པ་ཤེས་སོང་།
ཤར་ཕྱོགས་པའི་བུད་མེད་དེས། ང་རང་ལ་ཁྱེད་རང་ཉི་ཧོང་གི་མི་ཡིན་ནམ་ཟེར། ངས་མིན། ང་རང་བོད་པ་ཡིན། ཁྱེད་རང་གང་ནས་ཡིན་ཞེས་དྲིས་དུས། མོ་རང་རྒྱ་ནག་ནས་ཡིན་ཟེར། རྒྱ་ནག་གང་ནས་ཞེས་དྲིས་དུས་སི་ཁྲོན་ཟེར། ཁོ་མོ་དང་ངེད་གཉིས་ཀྱིས་རེ་ཞིག་རིང་དུ་ཁ་བརྡ་ཐུང་ཐུང་ཞིག་བྱས་ན་ཡང་། ཁོ་མོའི་དགའ་བོ་ཡིས་ཕྲག་དོག་བྱེད་ཀྱི་ལོས་ཡོད་བསམ་པ་ཞིག་འདུག་སྟབས། ངས་ག་ལེར་མོ་ལ་སྐད་ཆ་བཤད་མཚམས་བཞག་པ་ཡིན། མོ་རང་བོད་ཁུལ་ནས་འཚར་ལོངས་བྱུང་བའི་རྒྱ་རིགས་བུད་མེད་ཅིག་རེད་འདུག གཟུ་རྩ་སྡེ་དགུ་དང་སྨར་ཁམས་སོགས་ལ་རྒྱུས་མངའ་འདུག ཁོ་མོར་བོད་རིགས་གྲོགས་པོ་མང་བོ་ཡོད་རབས་བཤད་སོང་། གང་ལྟར། ངེད་གཉིས་ཀྱིས་མུ་མཐུད་དུ་ཁ་བརྡ་བྱེད་ཐུབ་མ་སོང་། ཁོ་མོ་སྔོན་དུ་འཁྲབ་ཚན་ཚོད་ལྟ་བྱེད་དུ་བུད་སོང་བའི་ཤུལ་དུ། ང་དང་ཁོ་མོའི་དགའ་བོ་ངེད་གཉིས་ཀྱིས་བོད་དང་རྒྱ་ནག་བར་གྱི་སྐད་ཆ་ཕྲན་པུ་ཞིག་ཁ་བརྡ་བྱས།
ད་དུང་། དེ་རུ་ཨ་ཧྥུ་རི་ག་ནས་ཡིན་པའི་བུད་མེད་གཉིས་ཀྱང་འདུག ཁོ་མོ་གཉིས་ཀྱང་འཁྲབ་ཚན་ཚོད་ལྟ་བྱེད་དུ་བཅར་བ་རེད། གཅིག་ནི་དངོས་ནས་གློག་བརྙན་ནང་གི་ཨ་ཧྥའི་རི་གའི་བུད་མེད་ཆགས་སྲེད་ཚ་ཤོས་ཀྱི་ཉམས་འགྱུར་དེ་ཡི་རིགས་ཤིག་འདྲ་བོ་འདུག གཞན་པ་དེ་དང་ངེད་གཉིས་ཀྱིས་ཕན་ཚུན་ངོ་སྤྲོད་དང་འབྲེལ་བའི་ཁ་བརྡ་ཉུང་ཉུང་ཞིག་བྱས། ཁོ་མོ་ནི་རྒྱལ་ཁབ་འདིར་སླེབས་ནས་ལོ་ངོ་བཅུ་སོང་འདུག་ན་ཡང་། རྒྱལ་ཁབ་འདིའི་མི་སེར་ཆགས་པར་རེ་བ་མེད་རབས་བཤད་ཀྱི་འདུག་པ་མ་ཟད། བྱིས་པ་གཉིས་ཡོད་པ་དང་ཁྱོ་ག་དང་ཁ་ཁར་སོང་ཡོད་ཅེས་བཤད་སོང་།
སྐབས་དེ་འདྲ་ཞིག་ལ་རྒྱ་མོ་དེས་འཁྲབ་ཚན་ཚོད་ལྟ་བྱས་ཚར་ནས་སླེབས་པ་དང་། དགའ་རོགས་དང་འགྲོག་ནས་འགྲོ་ཞོར་དུ། ངའི་ལག་འགོ་འཇར་ནས་ཁྱེད་དང་མཇལ་བ་དགའ་བོ་བྱུང་། རྒྱ་སྐད་ཀྱིས་བདེ་མོ་བྱོས་སམ་རྗེས་ལ་མཇལ་ཡོང་ཟེར་ཞོར་བུད་སོང་བའི་ཤུལ་དུ། ང་དང་ཨ་ཧྥའི་རི་ཀའི་བུད་མེད་གཅིག ངེད་གཉིས་གཞུག་དུ་ལུས་འདུག་པ་དེར་མཉམ་དུ་སྐད་བཏང་སོང་། འཁྲབ་ཚན་ཚོད་ལྟའི་ཁྲོད་དུ་བྱེད་དགོས་པ་ནི། རྒྱལ་ཁབ་འདིའི་ནང་གི་གླུ་བ་སྐད་གྲགས་ཅན་གསུམ་གྱིས་གླུ་གཞས་ལས་ཐུང་ངུ་རེ་ལེན་དགོས་པ་དང་། དེ་ཡི་རྗེས་སུ་ད་ལྟའི་འཆར་རྒྱལ་ཁབ་འདིའི་ནང་དུ་མི་མང་བོ་ཞིག་གིས་ཁང་རིན་ཆེ་དྲགས་པ་དང་ཁང་གླ་གཏོང་མི་ཐུབ་པར་ངོ་རྒོལ་གྱི་ལས་འགུལ་སྤེལ་བཞིན་པ་དེར་ཟུར་ཟའི་གཏམ་བརྗོད་འཁྲབ་ཚན་ཚན་པ་ཞིག་དབྱིན་སྐད་ནས་བཤད་དགོས་པ་དེ་རེད། ཡང་དང་བསྐྱར་དུ་ཐེངས་ཁ་ཤས་ཤིག་གླུ་དབྱངས་བླངས། གཏམ་བརྗོད་དེ་བསྐྱར་ཟློས་བྱས་པའི་མཇུག་དུ། ཐུགས་རྗེ་ཆེ་ཞེས་ལག་འཇུ་ཞིག་བྱས་ནས་བདེ་མོ་བཞག་སོང་། ཚོད་ལྟ་འདི་ལེགས་འགྲུབ་བྱུང་ཡོད་མེད་ནི་ད་ལྟ་ཤེས་ཀྱི་མེད་པ་ཡིན། གལ་སྲིད། ཁོང་ཚོས་བློར་འབབ་པ་ཡིན་ན་རྗེས་སུ་ཁ་པར་བཏང་ནས། བརྙན་འཕྲིན་ལས་ཁུངས་རང་དུ་འཁྲབ་དགོས་པ་དེ་ཡིན་པ་རེད།
ད་ནི་རང་ཉིད་ལ་རྒྱུས་མངའ་མེད་པའི་ས་ཁུལ་དེ་ནས་གང་དུ་ཕྱོགས་དགོས་མིན་གྱི་སྐོར་ནས་གསལ་བོ་ཞིག་མི་ཤེས་ཀྱང་། སྤྱི་སྤྱོད་རླངས་འཁོར་འགག་སྒུག་བྱེད་ས་ཞིག་ནས་སྐད་ཆ་དྲིས་དུས། དེ་ནས་ང་རང་ལ་རླངས་འཁོར་འབབ་ཚིགས་བར་དུ་འགྲོ་བའི་སྤྱི་སྤྱོད་རླངས་འཁོར་མི་རེག་པ་དང་གཞུང་ལམ་ཕར་ཕྱོགས་ཤིག་ལ་འགྲོ་དགོས་ཚུལ་བཤད་པ་ལྟར་ལམ་དུ་བུད་ནས་འདྲི་ཞོར་དུ་འགྲོ་ཞོར་དུ། མ་བསམ་ས་ནས་རླངས་འཁོར་འབབ་ཚིགས་ལ་རྐང་ཐང་དུ་སླེབས་སོང་། དངོས་ནས་དེ་རིང་ཚང་མ་སྟབས་འཁེལ་བོ་རྐྱང་རྐྱང་རེད་འདུག དེ་མ་ཐག་རྗོ་སུ་ལམ་དུ་འགྲོ་བའི་རླངས་འཁོར་ཞིག་ལམ་དུ་ཆས་ཀྱིན་ཡོད་པ་མ་ཟད། ནང་དུ་འདུག་སྟེགས་གཉིས་གསུམ་ཞིག་ལས་གང་ཡང་ལུས་མི་འདུག
མཛའ་མོ་ལ་རང་ཉིད་ཕྱིར་ཡོང་གི་ཡོད། ད་ལྟ་རྗོ་སུ་ལམ་དུ་ཡོང་བའི་ལམ་ཁ་ན་རླངས་འཁོར་དུ་ཡོད་ཅེས་འཕྲིན་ཐུང་ཞིག་སྐུར་དུས། ཁོ་མོས་ཚུར་ཁ་པར་སླེབས་ནས་ཁོ་མོ་རྗོ་སུ་ལམ་གྱི་རླངས་འཁོར་འབབ་ཚིགས་སུ་བསུ་རུ་ཡོང་ཆོག་ཟེར། ༢༦།༧།༡༡
མུ་འགོད།
ཐ་སྙད་ཁ་ཤས་ཤིག་སྔར་བཞིན་ཡིག་ནོར་རེད་ལ།
དངོས་གནས་ཐབས་ཤེས་མི་འདུག་གམ
ཀུ་རེ་ཡིན། བཀླགས་ཟིན།
དངོས་ནས་མ་བསམ་ས་ནས་འགོ་འཁོར་གྲབས་བྱས་ཀྱང་། སྐད་གཉིས་ཀ་འཁྱར་འཁྱོར་ཞིག་ཤེས་པ་དེས་དྲིན་རེད་ཡ ལམ་ཁ་རྙེད་སོང་།
ངས་ཁྱོད་རང་མགོ་འཁོར་ནས་འདུག་གི་རེད་བསམ་སོང་མོད། ཕྱིར་ནང་ལ་ལོག་པའི་ལམ་ཁ་རེག་པ་བཟང་འདུག