གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ང་ལྔ།

ལས་ཀ་བྱེད་ས་ནས་དེ་རིང་དངོས་ནས་དཀའ་ལས་ཁག་ནས་ཤི་ལ་ཁལ་ཞིག་མྱངས་སོང་། མཛའ་མོས་དེ་རིང་ནི་སྒེར་གཉེར་བྱིས་སྐྱོང་གི་ལས་ཀ་དེ་མཇུག་རྫོགས་པ་ཡིན་ལ། ཁོ་མོ་ང་རང་གི་ལས་ཀ་བྱེད་སའི་འགྲམ་གྱི་མི་ཚང་ཞིག་དུ་ཡོང་ཡོད་པ་ཡིན་དུས། ང་རང་གི་ལས་ཀ་གྲོལ་ནས་གོན་པ་བརྗེ་བཞིན་པའི་སྐབས་སུ་ཁ་པར་སླེབས་སོང་། དེ་དུས་ངས་ཁྱེད་རང་གང་དུ་ཡོད་ཅེས་དྲིས་པ་ན། ཁོ་མོས་ཁྱེད་རང་གིས་དེ་རིང་ང་ཁྱེད་ཀྱི་འགྲམ་དུ་ལས་ཀ་བྱེད་དུ་ཡོང་ཡོད་པ་ཤེས་བཞིན་དུ་ཁ་པར་ཁྱེད་རང་གི་འགྲམ་དུ་མི་གཉར་བར་གང་བྱེད་ཅེས་བཤད་པ་དེར། ངས་ད་ལྟ་རང་ལས་ཀ་ཚར་སོང་། ཁྱེད་རང་གང་དུ་ཡོད་ཅེས་དྲིས་པའི་ལན་ཏུ། མོ་རང་འཚིག་ཇ་ཁང་ཞིག་ཡོད་པ་དེ་རུ་སྒུག་ཡོད་ཟེར།

ནང་དུ་ཕྱིར་ལོག་པའི་ལམ་བར་ཏུ་ཁོ་མོའི་ཕོ་བ་ལྟོགས་ཀྱི་འདུག  སྟབས་བདེ་བག་ལེབ་ཞིག་ཉོ་རོགས་ཟེར་ནས་ང་རང་གིས་བག་ལེབ་ནང་དུ་ཚལ་རིགས་གཏུབ་མ་དང་སྣུམ་བསྲེག་ཚལ་སྒོང་ཞིག་ཡོད་པ་དེར་ཉོས་ནས་ཁོ་མོར་སྤྲད། ངེད་གཉིས་ཕྱིར་ནང་དུ་སླེབས་ནས་ཅུང་མ་འགོར་བར་མོ་རང་གི་མ་རྒན་ཡང་ལས་ཀ་ནས་ནང་དུ་འབྱོར་སོང་། ཁོ་མོས་བཤད་ན། སང་ཉིན་ལས་ཀ་ཚར་བ་དེ་ཡི་ཆེད་དུ། བྱིས་པའི་འཕྲོད་བརྟེན་ཟས་རིགས་ཀྱི་ཟས་ཐོ་ཞིག་ཁོ་མོས་ཕྱོགས་བསྒྲིགས་བྱས་ནས་བྲིས་ཡོད་པ་དེ་དཔར་བཤུ་བྱེད་དུ་ཚོང་རྭ་ཆེན་མོ་ལ་འགྲོ་དགོས་ཟེར། དེ་དུས་ངས་རང་གི་ནུ་མོ་ལྷ་མོ་སྐྱིད་ལ་རྔན་པ་ཞིག་ཉོ་རོགས། སང་ཉིན་ཁྱེད་རང་ཁོམ་པ་ཡོད་ན། ངའི་ནུ་མོ་ལྷ་མོ་སྐྱིད་ལ་ཞིམ་པོའི་རིགས་དང་འདྲ་དཔར་ཁ་ཤས་ཤིག་སྐུར་རོགས་ཞུས་པ་དེར། ཁོ་མོས་འགྲིག་གི་རེད་ཟེར་ནས་དཔར་ཆས་ནང་གི་བྱང་བུ་འཁུར་ནས་ལམ་དུ་ཆས་སོང་།

ཡུན་རིང་མ་སོང་བར་ཁོ་མོས་མ་རྒན་གྱིས་བུ་མོ་ངེད་གཉིས་རྩེད་མོ་རྩེ་ནས་བསྡད་ཡོད་པའི་སྐབས་དེ་འདྲ་ཞིག་ལ། བུ་མོས་ང་ལ་ཁ་པར། ཁ་པར་གཏོང་དགོས་ཀྱི་ཡོད་ཀི ཨ་ཕ། ཨ་ཕ་ཟེར་ནས་བཤད་དུས། ངས་ཁ་པར་ཞིག་མེད་ཀི་ཞེས་བོད་སྐད་ཀྱིས་ལན་བཏབས་དུས། བུ་མོ་ངུས་སོང་། མཛའ་མོའི་མ་རྒན་ངེད་གཉིས་ཀྱི་འགྲམ་དུ་ཡོང་ཞོར་དུ། ཁྱེད་རང་ལ་ཁོ་མོས་སྐད་ཆ་བཤད་པ་དེ་མ་གོ་སྟབས་ངུས་པ་རེད་ཟེར། དེ་དུས་ངས་རེད་དམ་ཞེས་རང་ཉིད་ཀྱིས་བུ་མོའི་བཤད་པ་གོ་ན་ཡང་། འགྱིག་གི་ཁང་ཆུང་དེ་ཡི་ནང་དུ་ཁ་པར་གཏོང་ས་ཡིན་པ་མ་ཤེས་པ་དེར་མཛའ་མོའི་མ་རྒན་གྱིས་བུ་མོ་ལ། ཁྱེད་རང་གིས་མི་འདི་ལ་ཁ་པར་གཏོང་དུ་འཇུག་འདོད་ཡོད་དམ་ཟེར་བ་དེར། བུ་མོས་ཀྱང་ཡིན་ཟེར་ནས་ངུ་མཚམས་ཆད་སོང་། དེ་དུས་གཞི་ནས་ངས་འགྱིག་གི་ཁང་ཆུང་ནང་དུ་ཁ་པར་གཏོང་ས་ཡོད་པ་ཤེས་དུས། མཛའ་མོའི་མ་རྒན་གྱི་བཤད་པ་དེ་བདེན་པ་ཡིན་པ་ཤེས་ན་ཡང་། ཁྱེད་ཀྱི་གསུངས་པ་བདེན་པ་རེད་ཟེར་ནས་བཤད་མ་འཕོད་པར། ཁ་རོག་གེར་ཁོ་གཉིས་ལ་བལྟས་དེ་བསྡད་དུས། མཛའ་མོའི་མ་རྒན་གྱིས་ང་ལ་ཁོ་མོ་ཡང་ཅུང་ཙམ་རྗེས་སུ་གློག་བརྙན་དུ་བལྟ་རུ་འགྲོ་ཡི་ཡོད། ལ་རས་དང་མཉམ་དུ་ཟེར། ལ་རས་ནི་མཛའ་མོའི་ཕ་རྒན་ཡིན། མཛའ་མོའི་ཕ་མ་གཉིས་མཉམ་དུ་བསྡད་མེད་པ་རེད།

ངས་ཡིན་དང་ཡིན། ཁྱེད་རང་སོང་ན་འགྲིག་གི་རེད། ངས་བུ་མོ་ལ་བལྟས་ཆོག སེམས་ཁྲལ་མ་བྱེད་ཅེས་བཤད་དེ་བུ་མོ་ལ་མུ་མཐུད་དུ་བོད་སྐད་བཤད་ནས་རྩེད་རོགས་བྱས་པ་ཡིན། ད་ནི་བུ་མོ་ངེད་གཉིས་གཅིག་བུ་ཤུལ་དུ་ནང་ལ་ཡོད་དུས། བུ་མོས་ཀྱང་ང་ལ་རྙོག་དྲ་འདྲ་མིན་མི་བཤད་པར། ང་དང་མཉམ་དུ་རྩེད་མོ་འདྲ་རྩེས་ཀྱིན་བསྡད། སྐབས་ཤིག་ལ་ངས་བུ་མོ་ལ་གློག་ཀླད་དྲ་རྒྱའི་ནང་ནས། བྱིས་སྒྲུང་གྲགས་ཅན་ཞིག་ཨ་མདོའི་སྐད་དུ་ཡོད་པ་ཐེངས་འགར་བསྟན་རྗེས། བོད་སྐད་ཀྱི་གླུ་དབྱངས་ཆེས་མི་ཉུང་བ་ཞིག་ལ་ཉན་དུ་བཅུགས་པ་ཡིན། ཆུ་ཚོད་དགུ་བ་ཟིན་གྲབས་ཡོད་དུས། བུ་མོས་ཧེས་པོས་སྐད་དུ་ང་རང་ཉལ་དུ་འགྲོ་རྒྱུ་ཡིན་ཟེར། ངས་ཀྱང་ཆུ་ཚོད་བརྒྱད་པ་ཡོལ་ནས་ཁོ་མོའི་སོ་ཡང་དཀྲུས་དེ་ཉལ་སའི་ནང་དུ་འཇོག་པར་གྲྭ་སྒྲིག་བྱས་ནས་བསྡད་ཡོད།

ཐོག་ཁང་དུ་སོང་ནས་ངས་མོ་རང་གི་ཉལ་ཁྲིའི་ནང་དུ་བཞག་ནས། བོད་གླུ་ནམ་རྒྱུན་ཉལ་སའི་ནང་དུ་བཞག་རྗེས་སུ་ངས་ཁོ་མོར་ལེན་གྱི་ཡོད་པ་དེ་དག་གཅིག་གཅིག་གཉིས་གཉིས་བྱས་ནས་བླངས། ཆུ་ཚོད་དགུ་བའི་རྗེས་སུ་ངའི་ལག་པ་ལ་འཐམ་ནས་གཉིད་གྲབས་ཡོད་དུས། ང་རང་འགུལ་ཙམ་བྱས་པ་ན། གཉིད་ལས་སད་ནས་ང་རང་ལ་བཙོག་པ་ཡོད་ཟེར་ནས་ངུ་འགོ་བརྩམས། ངས་ཐེངས་ཁ་ཤས་ཤིག་ལ་མོ་རང་གཙང་སྤྱོད་དུ་ཁྲིད་ཀྱང་། བར་སྐབས་ཤིག་ལ་ཨ་མ་དགོས་ཟེར་ནས་ངུ་མཚམས་མ་བཞག་པར། ཉལ་སའི་ནང་དུ་མི་བསྡོད་པར། ངས་སྐད་ཆ་ལ་མི་ཉན་པར། ངུ་ཤུགས་ཆེ་རུ་སོང་ནས་ངའི་ལག་ནང་དུ་བཟུང་ན་ཡང་། འཕག་ར་བྱས། ངུ་རྒྱངས་བྱས། སྐར་མ་བཅོ་ལྔ་ཙམ་གྱི་རིང་དུ་ང་རང་ཐང་ཆད་ནས་ཡོད་པའི་སྒང་ལ་བུ་མོས་ཅུང་ཙམ་མིན་ན་སྨྱོན་པ་བཟོ་གྲབས་བྱས་སོང་།

སེམས་པ་སྐྱོ་ཞོར་དུ། ངས་འདི་ལྟར་ཉི་མ་རེ་རེ་བཞིན་བུ་མོ་ལ་བོད་སྐད་བཤད་ཀྱང་། བུ་མོས་ད་དུང་ང་ལ་བོད་སྐད་ཀྱི་ལན་ཁ་ཤས་ཤིག་ལས་གཞན་མེད་པ་དེར་ང་རང་བློ་ཕམ་མེད། ག་ལེར་ཆེན་པོ་ཆགས་ན་ཐབས་ཤེས་འགྲིག་འགྲོ་ངེས་རེད་མོད། མི་རིགས་ཤིག་གི་སྐད་དང་ཡི་གེ་ཤ་གསེང་རུས་གསེང་དུ་ཟུག་དགོས་ཚེ། ཕ་མ་གཉིས་ཀ་སྐད་ཡིག་གཅིག་པ་དང་གོམ་གཤིས་གཅིག་པ་ཏན་ཏན་དགོས་པའི་ངེས་ཤེས་ཟབ་དུ་བཏང་སོང་། མཇུག་དེར་ཐབས་ཤེས་འདྲ་མིན་ཞིག་རྒྱུད་ནས་ཁོ་མོ་ག་ལེར་རང་གི་ཉལ་སའི་ནང་དུ་གཉིད་དུ་ཤོར། ང་རང་འོག་ཁང་དུ་ཡོང་ནས་ཁྱམས་ར་ལ་སོང་ནས་ཐ་མག་རྐང་གཅིག་འཐེན་ནས་ནང་དུ་སླེབས་མ་ཐག ཐག་ཐག་ཐག  སྒོ་ཕྱེ་བའི་སྒྲ་གོ་སོང་ལ། སྐེས་འཛེགས་སྟེང་དུ་ག་ལེར་གོམ་པ་རྒྱགས་པའི་སྒྲ་ལ་ཉན་དུས། ངའི་མཛའ་མོ་ཡིན་པ་ཤེས་སོང་།

མཛའ་མོས་ང་རང་ལ་ཁྲོམ་རྭ་ནས་གང་བྱས་པ་དང་ང་རང་གི་ནུ་མོ་ལྷ་མོ་སྐྱིད་ལ་གྲྭ་སྒྲིག་བྱས་པའི་འདྲ་དཔར་དག་འདི་རེད་ཟེར་ནས་ང་རང་གི་འགྲམ་དུ་ཡོང་ནས་རེ་རེ་བཞིན་བསྟན་སོང་། ངས་ཐད་ཀར་དུ་གློག་ཀླད་ནང་དུ་ཡི་གེ་འབྲོ་ཞོར་དུ་དངོས་ནས་ཡག་པོ་འདུག་ཞེས་ལན་བཏབས་པ་ཡིན། སྐར་མ་བཅོ་ལྔ་ཙམ་གྱི་རྗེས་དེར་ཁོ་མོའི་མ་རྒན་ཡང་སླེབས། མ་རྒན་གྱིས་མཛའ་མོའི་ཕ་རྒན་གྱི་བཟོས་པའི་འདྲ་དཔར་ཆེན་པོ་ཁ་ཤས་ཤིག་འཁུར་ནས་སླེབས་འདུག་པ་ངེད་གཉིས་ལ་བསྟན། མཛའ་མོས་དེ་ལ་སྐྱོན་བརྗོད་བྱས། ངས་གང་བྱས་པ་དེར་ཁྱེད་ཀྱིས་བཀའ་དྲིན་ཞུས་ན་རེད་ཅེས་བུ་མོའི་སྐྱེ་སྐར་ལ་བཟོས་པའི་འདྲ་དཔར་ཆེ་ཤོས་དེ་དག་ལ་བལྟས། ༢༧།༧།༠༨

མུའགོད།