ཨ་ཁྱིག་གྲུབ་དབང་མཆོག་དགོངས་པ་རྫོཊ།

ཉེ་ལམ་དཀར་མཛེས་ཁུལ་དཔལ་ཡུལ་རྫོང་ཡ་ཆེན་ཨོ་རྒྱན་བསམ་གཏན་གླིང་དགོན་པའི་བླ་མ་ཨ་ཁྱིག་གྲུབ་དབང་འཇམ་དབྱངས་ལུང་རྟོགས་རྒྱལ་མཚན་མཆོག་དགོངས་པ་ཆོས་དབྱིངས་སུ་འཐིམ་ཡོད་འདུག

བཞུགས་སྒར་གནས་བཞུགས་ཐུབ་བསྟན་བློ་བཟང་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན།  ཕྱི་ཟླ་ ༧ པའི་ཚེས་ ༢༣ ཉིན་གྱི་བོད་ནང་གི་མཚན་གྱི་ཆུ་ཚོད་ ༢ དང་སྐར་མ་ ༡༥ སྟེང་། དཔལ་ཡུལ་ཡ་ཆེན་ཨོ་རྒྱན་བསམ་གཏན་གླིང་དགོན་པའི་བླ་མ་ཨ་ཁྱིག་གྲུབ་དབང་འཇམ་དབྱངས་ལུང་རྟོགས་རྒྱ་མཚོ་མཆོག་དགོངས་པ་ཆོས་དབྱིངས་སུ་འཐིམ་ཡོད་ཅིང་། ད་ལོ་དགུང་གྲངས་ ༨༤ ཡིན་འདུག  ཉིན་ ༧ རིང་གསང་བའི་ངང་གནས་ཚུལ་ཕྱིར་བསྒྲགས་བྱས་མེད་ཀྱང་། ཕྱི་ཚེས་ ༣༡ ཉིན་ནས་ཆོས་ཕྱོགས་ཀྱི་བྱེད་སྒོ་ཁག་སྤེལ་བ་དང་བསྟུན་ཏེ་མི་མང་ལ་སྐུ་གདུང་མཇལ་ཁ་གནང་གི་ཡོད་པ་དང་། དགུང་ཞག་ཞེ་དགུའི་ནང་སྐུ་གདུང་བཞུགས་འབུལ་ཞུ་རྒྱུ་ཡིན་འདུག

ཨ་ཁྱིག་རིན་པོ་ཆེ་གྲུབ་དབང་ལུང་རྟོགས་རྒྱལ་མཚན་མཆོག་ནི། དཀར་མཛེས་བོད་རིགས་རང་སྐྱོང་ཁུལ་དཔལ་ཡུལ་རྫོང་ཁྲོ་ཐལ་དུ་ཡབ་དབང་ལོ་དང་ཡུམ་ཨ་འཁོས་གཉིས་ཀྱི་སྲས་སུ་ཕྱི་ལོ་ ༡༩༢༧ ལོར་འཁྲུངས་ཤིང་། དགུང་ལོ་ ༡༥ སྟེང་རབ་བྱུང་གི་སྡོམ་པ་བཞེས་རྗེས། སྔ་ཕྱི་དགེ་བའི་བཤེས་གཉེན་དུ་མའི་ཞབས་ལ་གཏུགས་ཏེ་བོད་ཀྱི་ཐུན་མོང་མ་ཡིན་པའི་ནང་ཆོས་ལ་སློབ་གཉེར་མཐར་ཕྱིན་པ་གནང་མཁན་ཞིག་ཡིན་འདུག  ཁོང་གི་སྐུ་ཚེ་ཧྲིལ་བོར་ཐོས་བསམ་སྒོམ་གསུམ་དང་སྒྲུབ་པ་ཉམས་ལེན་ཕྱོགས་ལ་འབད་ཡོད་པ་མ་ཟད། ༡༩༨༤ ལོར་ཡ་ཆེན་ཨོ་རྒྱན་བསམ་གཏན་གླིང་ཕྱག་བཏབ་ཅིང་། སྒོམ་དང་སྒྲུབ་པ་ཉམས་ལེན་གྱི་ཐད་ནས་བོད་མདོ་དབུས་ཁམས་གསུམ་དང་རྒྱ་ནག་ནང་ཁུལ་གྱི་སློབ་མ་སྟོང་ཕྲག་མང་པོ་སྐྱེད་སྲིང་བྱས་ཏེ་ཆོས་ཕྱོགས་ཀྱི་མཛད་འཕྲིན་རྒྱ་ཆེར་བསྐྱངས་ཡོད་པ་དང་། ལོ་འགའི་རིང་དགོན་པའི་ནང་འཚེ་བ་སྦངས་བའི་ལས་འགུལ་སྤེལ་ཏེ་དཀར་ཟས་ཁོ་ན་རོལ་གྱིན་ཡོད་འདུག་ལ། མ་འོངས་པར་བཤད་གྲྭ་གསར་འཛུགས་བྱ་རྒྱུའི་འབད་པ་བྱེད་ཀྱིན་ཡོད་འདུག

རྒྱ་ནག་གཞུང་གིས་ཡ་ཆེན་བསམ་གཏན་གླིང་དགོན་པར་སུན་གཙེར་དང་དམ་དྲག་རིམ་པར་བྱས་ཏེ་དགོན་པའི་དགེ་འདུན་པ་ཚོར་གནོན་ཤུགས་སྤྲད་ཡོད་ཀྱང་། དགོན་པའི་འབྲེལ་ཡོད་དང་གྲྭ་བ་ཚོས་བཟོད་སེམས་བྱས་སྟབས། གཏོར་བཅོམ་བཏང་བའི་གནས་ཚུལ་གཅིག་ཀྱང་བྱུང་མེད་པ་དང་། ད་ལྟའི་ཆར་དགོན་པའི་ནང་གྲྭ་བཙུན་ཆིག་ཁྲི་ ༡༠༠༠༠ ཡས་མས་ཤིག་ཡོད་འདུག

གསར་འགོད་པ། དོན་ག