པོ་ཏ་ལའི་འཇིམ་བཟོའི་སྣང་བརྙན།

དེ་རིང་ཞོགས་པར་གངས་སྐྱིད་དཔེ་མཛོད་ཁང་དུ་བོད་རིགས་བློ་གྲོས་བཟང་པོ་ལགས་ཀྱིས་བཞེངས་སྐྲུན་གནང་བའི་པོ་ཏ་ལའི་འཇིམ་བཟོའི་སྣང་བརྙན་གསུམ་བཀའ་ཁྲི་ཟམ་གདོང་རིན་པོ་ཆེ་མཆོག་གིས་དབུ་བྱེད་གནང་སོང་། 

དེ་རིང་ཞོགས་པའི་ཆུ་ཚོད་ ༡༠ དང་ཕྱེད་ཀའི་ཐོག་གངས་སྐྱིད་བོད་ཀྱི་དཔེ་མཛོད་ཚོགས་ཁང་དུ། བོད་རིགས་སྒྱུ་རྩལ་པ་བློ་གྲོས་བཟང་པོ་ལགས་ཀྱིས་གསར་བཞེངས་ལེགས་འགྲུབ་ཟིན་པའི་ཕོ་བྲང་པོ་ཏ་ལའི་འཇིམ་བཟོའི་སྣང་བརྙན། རྒྱུ་ཆ་སྤོས་དཀར་ལས་གྲུབ་ཅིང་ལྗིད་ཚད་ལ་སྤྱི་རྒྱ་ ༢༥ ཙམ་ཡོད་པ། པོ་ཏ་ལའི་རྒྱབ་མདུན་གཉིས་དང་མདུན་དང་ཟུར་སོགས་ཀྱི་བཀོད་པ་ཆ་ཚང་ཡོད་པའི་འཇིམ་བརྙན་གསུམ་བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་དབུ་འབྱེད་གནང་སོང་། འཇིམ་བརྙན་འདི་ཐོག་མ་ ༢༠༠༥ ལོར་མགོ་འཛུགས་གནང་ཡོད་ཅིང་། ལས་གཞི་འདིའི་ཇུས་འགོད་དང་འགན་འཁུར་བ་བློ་གྲོས་བཟང་པོ་ལགས་ཀྱིས་བཞེས་ཤིང་། རྒྱ་གར་འཇིམ་བཟོ་ལག་རྩལ་པ་ཁག་ཅིག་གིས་འཇིམ་བཟོའི་ལས་དོན་བསྒྲུབས་ཡོད་འདུག  

པོ་ཏ་ལའི་འཇིམ་བཟོའི་སྣང་བརྙན་ལས་དོན་འདིའི་ཐད་མཁས་དབང་ཁག་ཅིག་དང་བཀའ་ཁྲི་ཟམ་གདོང་རིན་པོ་ཆེ་མཆོག སྤྱི་འཐུས་ཚོགས་གཙོ་དང་ཚོགས་གཞོན། ས་སྐྱ་བདག་རིན་པོ་ཆེ། དཔལ་རྒྱལ་བ་ཀརྨ་པ་མཆོག་བཅས་ལ་དགོངས་འཆར་ལམ་སྟོན་ཞུས་ཤིང་། ༧གོང་ས་མཆོག་ལ་སྤྱན་འབུལ་ཞུས་པ་བརྒྱུད་སྤོས་དཀར་གྱི་རྒྱུ་ཆ་ཁོ་ན་ལས་བཞེངས་སྐྲུན་གནང་པ་ཞིག་ཡིན་འདུག ཐེངས་འདིར་པོ་ཏ་ལའི་འཇིམ་བཟོའི་སྣང་བརྙན་གསུམ་བཞེངས་ཡོད་པ་ལས་གཅིག་༧གོང་ས་མཆོག་ལ་འབུལ་འཆར་ཡོད་པ་དང་། གཞན་གཉིས་རྣམ་རྒྱལ་གྲྭ་ཚང་དང་བཀའ་ཤག་ལ་འབུལ་རྒྱུ་ཡིན་འདུག

དབུ་འབྱེད་མཛད་སྒོའི་ཐོག་བཀའ་ཁྲི་མཆོག་གིས་ “ད་སྔ་པོ་ཏ་ལའི་འཇིམ་བཟོའི་སྣང་བརྙན་བཟོ་མཁན་མང་པོ་ཡོད་ཀྱང་ཆ་ཚང་པ་ཞིག་ད་ལྟའི་བར་བྱུང་མེད། ལོ་མང་རིང་དཀའ་ལས་བརྒྱབ་སྟེ་པོ་ཏ་ལའི་སྣང་བརྙན་ཇི་མ་ཇི་བཞིན་ཞིག་འཇིམ་བཟོ་གནང་ཐུབ་པ་འདི་ཐེངས་དང་པོ་རེད། འོན་ཀྱང་། པོ་ཏ་ལའི་སྣང་བརྙན་འདི་ང་བརྒྱད་ཀྱི་སྔོན་དང་རྗེས་སོགས་དུས་ཚིགས་གང་འདྲ་ཞིག་ལ་གཞི་བཅོལ་ཡོད་མེད་ཀྱི་ལོ་ཚིགས་གསལ་བོར་བཟོས་ཡོད་པ་ཡིན་ན་ཡག་པོ་ཡོང་གི་རེད། ” ཅེས་གསུངས་སོང་།

ལས་གཞི་འདི་ཐོག་མར་དབུ་འཛུགས་སྐབས། བཀའ་ཁྲི་མཆོག་གིས་པོ་ཏ་ལའི་སྣང་བརྙན་འཇིམ་བཟོ་དང་ལྷན་དུ་པོ་ཏ་ལའི་ལོ་རྒྱུས་རྒྱས་འབྲིང་བསྡུས་གསུམ་ཞིག་ཕྱོགས་བསྒྲིགས་ཐུབ་ན་ལེགས་པའི་དགོངས་འཆར་བཏོན་ཡོད་པ་ལྟར། ༢༠༠༩ ནས་སྐུ་བཅར་རྣམ་རྒྱལ་གྲྭ་ཚང་གི་གྲྭ་ཐུབ་བསྟན་ཡར་འཕེལ་ལགས་ཀྱིས་པོ་ཏ་ལའི་ལོ་རྒྱུས་ཕྱོགས་བསྒྲིགས་མགོ་འཛུགས་གནང་ཡོད་པ་དང་། དེ་ལ་རྒྱས་འབྲིང་བསྡུས་གསུམ་དུ་དབྱེ་སྟེ། རྒྱས་པར་ཤོག་ངོས་ ༡༠༠༠ ལྷག་དང་འབྲིང་པར་ཤོག་ངོས་ ༡༠༠ ལྷག བསྡུས་པ་དེ་གཙོ་བོ་སློབ་ཕྲུག་དང་བྱིས་པར་དམིགས་ཏེ། པར་རིས་དང་ལྷན་དུ་ངོ་སྤྲོད་ཡོད་པ་ཞིག་རྩོམ་སྒྲིག་གནང་བཞིན་ཡོད་འདུག  

ལོ་རྒྱུས་ཕྱོགས་སྒྲིག་པ་གྲྭ་ཐུབ་བསྟན་ལགས་ཀྱིས་ “པོ་ཏ་ལའི་ལོ་རྒྱུས་ཕྱོགས་བསྒྲིགས་འདིའི་ཐད་དཔྱད་གཞིའི་དཔེ་དེབ་ ༡༢༠ ཙམ་བཀླགས་པ་ཡིན། ད་སྔ་༧གོང་ས་མཆོག་གི་བཀའ་སློབ་སོགས་དཔེ་དེབ་མང་པོ་ཞིག་ཕྱོགས་བསྒྲིགས་བྱས་མྱོང་ཡང་། ད་ཐེངས་དཔྱད་གཞིའི་ཡིག་ཆ་དང་དུས་ཡུན་སོགས་གང་ཅིའི་ཐད་ནས་དཀའ་ངལ་གང་མང་ཞིག་འཕྲད་སོང་” ཞེས་བརྗོད་བྱུང་།

སྒྱུ་རྩལ་པ་བློ་གྲོས་བཟང་པོ་ལགས་ཀྱིས་མ་འོངས་པར་མུ་མཐུད་པོ་ཏ་ལའི་སྣང་བརྙན་འཇིམ་བཟོའི་ལས་དོན་སྒྲུབ་འཆར་ཡོད་པ་དང་། འཇིམ་བཟོ་དེ་དག་ཚོང་བསྒྱུར་བྱ་རྒྱུ་མ་ཡིན་པར་བོད་ཕྱི་ནང་གཉིས་དང་ཕྱི་རྒྱལ་ཡུལ་གྲུ་ཁག་ཏུ་བཏང་སྟེ། བོད་ཀྱི་མཚོན་དོན་དང་བོད་མིའི་བློ་གྲོས་ཉིང་བཅུད་ཀྱི་དྲན་རྟེན་ཆེད་དུ་འགྲེམས་སྤེལ་གནང་རྒྱུ་ཡིན་འདུག   

ཞིབ་ཕྲའི་གནས་ཚུལ་ཕྱི་ཟླ་ ༨ ཚེས་ ༡༠ ཉིན་འདོན་སྤེལ་བྱ་འཆར་གྱི་བོད་ཀྱི་དུས་བབ་ཚགས་ཤོག་ལ་གཟིགས་པར་ཞུ།