དེ་རིང་སྔ་དྲོར་བཀའ་བློན་ཁྲི་པ་མཆོག་གིས་བཀའ་ཤག་ཚོགས་ཁང་དུ་བོད་པའི་གསར་འགོད་པ་དག་ལ་དྲི་བ་དྲིས་ལན་གྱི་གོ་སྐབས་ཕུལ་ཏེ། འདས་པའི་བཀའ་ཤག་སྐབས་གཉིས་རིང་གི་ལས་དོན་གྲུབ་འབྲས་དང་འཐུས་ཤོར། མ་འོངས་པར་བཀའ་བློན་ཁྲི་པའི་མཚན་ལ་༼ སྲིད་སྐྱོང་བ ༽ ཞེས་བཏགས་ན་འོས་སྐོར་བཅས་ཀྱི་བཀའ་ལན་གནང་སོང་།
བོད་ཀྱི་གསར་འགོད་པའི་མཐུན་ཚོགས་ཀྱི་རེ་སྐུལ་ལྟར། དེ་རིང་ཕྱི་ཚེས་ ༣ ཉིན་གྱི་སྔ་དྲོའི་ཆུ་ཚོད་༡༡།༣༠ སྟེང་། བཀའ་བློན་ཁྲི་པ་ཟམ་གདོང་རིན་པོ་ཆེ་མཆོག་གིས་གངས་སྐྱིད་བཀའ་ཤག་གསར་པའི་ཚོགས་ཁང་དུ་བཞུགས་སྒར་ཁུལ་གྱི་བོད་པའི་གསར་འགོད་པ་ཚོ་དང་ཐུག་འཕྲད་གནང་སྟེ། བཀའ་ཤག་སྐབས་གཉིས་རིང་གི་བཙན་བྱོལ་བོད་མིའི་ཤེས་ཡོན་སྲིད་བྱུས་གསར་པ་དང་ཚོང་ལས་སྒེར་བདག་ཅན་དུ་བསྒྱུར་བ། སྲོལ་རྒྱུན་སོ་ནམ་འདེབས་ལས་བཅས་ཀྱི་ཕན་གནོད་དང་། བོད་རྒྱ་འབྲེལ་མོལ་གྱི་གནས་སྟངས། “བཙན་བྱོལ་བོད་གཞུང” ནས “དབུས་བོདམིའི་སྒྲིག་འཛུགས” དང་། ད་ཆར་བསྐྱར་དུ་ “བོད་མིའི་གཞུང་གི་སྒྲིག་འཛུགས” སུ་འཕོ་འགྱུར་གཏོང་འཆར་བཅས་ཀྱི་ཐད་གསར་འགོད་པ་དག་གི་དྲི་བར་ལན་འདེབས་གནང་སོང་།
དྲི་བ་དྲིས་ལན་སྐབས་བཀའ་ཁྲི་མཆོག་གིས་འདས་པའི་ལས་རྒྱུན་རིང་གི་གཟེངས་སུ་ཐོན་པའི་གྲུབ་འབྲས་སྐོར་གསུངས་བའི་ནང་། ཁོང་ལ་འདས་པའི་མི་ལོ་བཅུའི་ལས་རྒྱུན་རིང་འདོད་བློ་ཚིམ་པའི་ལས་དོན་རིགས་གཅིག་ཀྱང་བྱུང་མེད་པ་དང་། བཀའ་ཁྲིའི་ལས་གནས་སུ་མ་ཞུགས་པའི་ཡར་སྔོན་ནས་འཛིན་སྐྱོང་གི་ལས་དོན་བསྒྲུབ་འདོད་མེད་པའི་སྐོར་གསལ་བོ་གསུངས་ཡོད་ཚུལ། ལོ་བཙུ་ཙམ་མིན་པར་ཝར་ན་མཐོ་སློབ་དང་སྤྱི་འཐུས་ཚོགས་གཙོ། བཀའ་བློན་ཁྲི་པ་བཅས་ཀྱི་ལས་ཀའི་བརྒྱུད་རིམ་ཁྲོད་ནས་ཀྱང་ཁོང་གི་འདོད་དོན་ཇི་བཞིན་འགྲུབ་མེད་སྐོར་སོགས་གསུངས་སོང་།
ཁོང་གིས་མུ་མཐུད་དུ་འདས་པའི་ལས་རྒྱུན་རིང་གི་ལས་དོན་གང་ཡིན་ཡང་ཐོག་མ་ནས་ཞིབ་འཇུག་དང་འབད་བརྩོན་བྱས་ཡོད་སྟབས། རེ་བ་ལྟར་འགྲུབ་སོན་མེད་ཀྱང་དེ་ལ་དམིགས་བསལ་བློ་ཕམ་གང་ཡང་མེད་པ་དང་། ཐོག་མར་བཀའ་ཤག་ཏུ་བསླེབས་སྐབས་བོད་གཞུང་གི་དཔལ་འབྱོར་གནས་བབ་ཧ་ཅང་ཉེན་ཁའི་གནས་སུ་ལྷག་ཡོད་ཀྱང་། འདས་པའི་བཀའ་ཤག་སྐབས་གཉིས་ཀྱི་འབད་བརྩོན་འོག་གཞུང་གི་དཔལ་འབྱོར་ཉམ་ཆག་སྲུང་སྐྱོབ་ཀྱི་ལས་དོན་ཐད་གྲུབ་འབྲས་གང་འཚམ་ཐོབ་སྟེ་ད་ཆར་རང་ཚུགས་ཐུབ་པའི་གནས་སྟངས་ཆགས་ཡོད་པ་དེ་བཀའ་ཤག་དུས་ཡུན་གཉིས་ཀྱི་གཟེངས་སུ་ཐོན་པའི་ལས་དོན་དུ་བརྩི་ཆོག་སྐོར་སོགས་གསུངས་སོང་།
གསར་འགོད་པས་ཤེས་ཡོན་སྲིད་བྱུས་གསར་པའི་སྐོར་ལ་བཀའ་འདྲི་གནང་བའི་ལན་དུ་བཀའ་ཁྲི་མཆོག་གིས་ཤེས་ཡོན་སྲིད་བྱུས་གསར་པ་དེ་༸གོང་ས་མཆོག་གིས་ཤེས་ཡོན་ཐོག་བཀའ་སློབ་གནང་བ་གཞི་རྩར་བཟུང་བ་ཞིག་ཡིན་ཚུལ་དང་། གཏན་འབེབས་མ་བྱས་པའི་ཡར་སྔོན་ཏུའང་༸གོང་ས་མཆོག་དབུ་བཞུགས་ཐོག་ཚོགས་འདུ་སྔ་རྗེས་ཚོགས་ཏེ་གཏན་འབེབས་བྱས་ཚུལ་གསུངས་སོང་ལ། གཞན་ཁོང་གིས། བཙན་བྱོལ་བོད་མིའི་ཤེས་ཡོན་སྲིད་བྱུས་གསར་པ་དེ་བོད་པའི་སྲོལ་རྒྱུན་རིག་གཞུང་འཛིན་སྐྱོང་སྤེལ་གསུམ་བྱེད་ཐབས་ཤིག་རེད། བོད་མི་ཞིག་ཡིན་ན། བོད་པའི་སྲོལ་རྒྱུན་རིག་གཞུང་གཅིག་པུ་ལས་དེང་རབས་རིག་གནས་མ་ཤེས་པ་ཡིན་ན། མི་དེ་ལ་ཞན་ཆ་རེ་ཟུང་ཡོད་སྲིད་ཀྱང་བོད་པའི་ངོ་བོ་ད་དུང་བསྡད་ཡོད་པ་རེད། གལ་སྲིད་དེང་རབས་རིག་གནས་གཅིག་པུ་ལས་བོད་པའི་སྲོལ་རྒྱུན་རིག་གནས་སྣེ་གཅིག་ཀྱང་མ་ཤེས་པ་ཡིན་ན། མི་དེའི་སྟེང་བོད་པའི་ངོ་བོ་གང་ཡང་ལྷག་ཡོད་པ་མ་རེད། ཤེས་ཡོན་སྲིད་བྱུས་འདིར་དེང་རབས་དང་སྲོལ་རྒྱུན་གཉིས་གལ་ཆེན་དུ་བརྩིས་ཏེ། འདབ་གཤོག་གཉིས་ལྡན་གྱི་མི་སྣ་གསོ་སྐྱོང་བྱ་རྒྱུ་དང་། ༸གོང་ས་མཆོག་གི་དགོངས་པ་དང་མཐུན་ཤོས་དེ་ཆགས་ཡོད་ཚུལ་བཅས་གསུངས་བྱུང་།
མཇུག་ཏུ་འདི་གའི་གསར་འགོད་པས་༧གོང་ས་མཆོག་གིས་བོད་པའི་ཆབ་སྲིད་དང་འཛིན་སྐྱོང་གི་ཐུགས་འགན་མཚམས་འཇོག་གནང་པའི་རྗེས་ལ། ༼ བཀའ་བློན་ཁྲི་པ ༽ཞེས་པའི་མཚན་ལ་འགྱུར་བ་འགྲོ་དགོས་སམ་ཞེས་བཀའ་འདྲི་ཞུས་པའི་ལན་དུ་ཁོང་གིས། “སྤྱིར་བཏང་དྲི་བ་འདི་གྲོས་ཚོགས་ལ་གནང་དགོས་པ་ཞིག་རེད། བཅའ་ཁྲིམས་ལ་འགྱུར་བ་གཏོང་རྒྱུ་དེ་གྲོས་ཚོགས་ཀྱི་སྐུ་དབང་རེད། འོན་ཀྱང་། བཀའ་ཤག་གིས་ད་སྐབས་ཚིག་ཅིག་བེད་སྤྱོད་གཏོང་གི་ཡོད། ཉེ་ཆར་སྐུའི་འཁྲུངས་སྐར་གྱི་གསུང་བཤད་ནང་དུའང་ཚིག་དེ་བེད་སྤྱོད་བཏང་ཡོད། སང་ཉིན་གནངས་ཉིན་ཚིག་དེ་ཡང་བསྐྱར་བེད་སྤྱོད་གཏོང་མདོག་ཁ་བོ་རེད། གཞུང་འབྲེལ་ཡིག་ཆའི་ནང་ཚིག་ཆུང་ཆུང་ཞིག་བསླེབས་ཀྱང་། དེའི་རྒྱབ་ལྗོངས་སུ་དགོས་པ་རྒྱུ་མཚན་ཞིག་ཡོད་པ་རེད། བཀའ་ཤག་གི་ཡིག་ཆ་ཁག་ཏུ་བར་ལམ་ཞིག་ནས་སྲིད་སྐྱོང་བཀའ་བློན་ཁྲི་པ་ཞེས་བྲིས་ཡོད། མ་འོངས་པར་སྲིད་སྐྱོང་ཞེས་པའི་ཚིག་དེ་བཅའ་ཁྲིམས་ནང་བསླེབ་པ་ཡིན་ན་ཡག་པོ་རེད་བསམ་གྱི་ཡོད། ༧རྒྱལ་བ་རིན་པོ་ཆེའི་སྐུ་དབང་རྩིས་སྤྲོད་གནང་ཟིན་པ་ཡིན་སྟབས། བཀའ་བློན་ཁྲི་པ་དེ་སུའི་བཀའ་ཡི་བློན་རེད་ཅེས་དྲི་བ་ལྷག་གི་ཡོད་པ་རེད། ད་ལྟ་༧རྒྱལ་བ་རིན་པོ་ཆེའི་བཀའ་བློན་རེད་ཟེར་ས་ཡོད་པ་མ་རེད། སྔོན་མ་བོད་ནང་༧རྒྱལ་བ་རིན་པོ་ཆེས་སྐུ་དབང་མ་བཞེས་པའི་སྐབས་སུ། སྲིད་སྐྱོང་སྟག་བྲག་རིན་པོ་ཆེ་དང་། སྲིད་སྐྱོང་ར་སྒྲེང་རིན་པོ་ཆེ་ཞེས་ལབ་ཀྱི་ཡོད། སྲིད་སྐྱོང་ར་སྒྲེང་རིན་པོ་ཆེ་ཡི་སྐུ་དབང་༧གོང་ས་མཆོག་ལ་འབུལ་བཞེས་གནང་བ་རེད། སྲིད་སྐྱོང་བློ་བཟང་སེང་གེ་ལ་༧གོང་ས་མཆོག་གི་སྐུ་དབང་རྩིས་སྤྲོད་གནང་བ་རེད། ཅེས་ལབ་པ་ཡིན་ན་ཚིག་དེ་སྙིང་རྗེ་བོ་ཆགས་རྒྱུ་རེད” ཅེས་བཀའ་ལན་བསྐྱོན་སོང་།
ཐེངས་འདིར་བཞུགས་སྒར་ཁུལ་གྱི་གཞུང་དང་གཞུང་འབྲེལ་མིན་པའི་ཚགས་ཤོག་དང་རླུང་འཕྲིན། བརྙན་འཕྲིན། དྲ་རྒྱ་བཅས་གསར་འགྱུར་བརྒྱུད་ལམ་ཁག་གི་བོད་རིགས་གསར་འགོད་པ་ ༤༠ ཙམ་ཕེབས་འདུག
གསར་འགོད་པ་དོན་གོ
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
སྲིད་སྐྱོང་བ་ཞེས་པའི་ཚིག་དེར་གཟི་བརྗིད་ཁྱོན་ནས་མི་འདུག་ན་ཁྱོད་རིང་ནས་མིང་ཞིག་ཐོག་དང་རྒྱུ་མཚན་ཁྱོན་ནས་མེད་པར་གཟི་བརྗིད་མི་འདུག་ཟེར་ན་ཕན་གི་མ་རེད་ལོ་་་་་་་་་་་་་་་་་་་་་་་་་་་་་་་་་་་་ལོ།།།།།།།།།།།།།།།།།།།།།།།
སྲིད་སྐྱོང་བ་ཞེས་པའི་ཚིག་དེར་གཟི་བརྗིད་ཁྱོན་ནས་མི་འདུག་ལ་ད་དུང་དེ་སྤྱིའི་མིང་འདྲ་བོ་ལས་གང་ཟག་བྱེ་བྲག་པ་ཞིག་གི་མིང་འདྲ་བོ་དེ་བས་མི་འདུག གལ་སྲིད་ཡིན་གཅིག་བརྗེ་དགོས་བྱུང་བ་ཡིན་ན། མིང་དོན་མཚུངས་པ་མ་ཟད་རྣ་བར་ཐོས་པ་དང་བོད་རྒྱ་ཆེ་མི་མང་གིས་གདམས་པའི་བླ་ན་མེད་པའི་དབུ་ཁྲིད་ཅིག་མཚན་རེད་བ་བསམ་པ་ཞིག་ངེས་པར་དུ་དགོས་ཀྱི་འདུག
དཀའ་སྒྱུད་་སྤྱི་མཐུས་སྐུ་ཞོག་བསྟན་པ་ཡར་འཕེལ་ལག
ངས་ཁྱེད་ལ་མོས་མཐུན་ཡོད་གང་ཡིན་ཞེ་ན་ངས་ཀྱང་འོས་ཁྱེད་ལ་འཕང་པ་ཡིན་
མ་འོང་པར་ཡང་ངས་འོས་ཁྱེད་ལ་འཕེན་རྒྱུ་ཡིན་
གང་ཡིན་ཟེར་ན་ཁྱོད་ནི་དེང་དུས་ཀྱི་དགེ་འདུན་པ་མཚན་ཉིད་ཚང་མཁན་ཐ་ཐོར་ནང་ནས་གཅིག་རེད་དེ་མ་ཚད་ཡ་རབ་བཟང་སྤྱོད་ལྡན་པ་ཀུན་ལ་གུས་སྐུར་ཤེས་པ་མཐོན་པོ་ལ་བརྟེན་ཤེས་པ་འདྲ་མཉམ་ལ་འགྲོག་ཤེས་པ་དམའ་བ་ལ་སྐྱོང་ཤེས་པ་ཡོན་བཏན་ཡོད་པ་གང་ཞིག་ལ་ང་རྒྱལ་མེད་པ་མདོར་ན་དེང་དུས་དང་གནའ་བོ་ཐམས་ཅད་ཀྱི་ཡོན་ཏན་ཡོངས་སུ་རྫོགས་པ་མངའ་བས་སོ།
དམང་གཙོའི་སྤྱི་ཚོགས་ནང་སྐྱོན་རྗོད་དང་བསམ་འཆར་དགོས་པ་གལ་ཆེ་ན་ཡང་། མགན་ཁུར་དགོས་པ་དེ་བས་ཀྱང་གལ་ཆེན་རེད། ང་ཚོའི་དྲ་འབུ་ཕལ་ཆེ་བས་སོ་སོའི་དངོས་མིང་ཡང་འབྲི་ཐུག་གི་མེད་ན་མགན་ཁུར་ཞེས་པ་ནི་ཕ་རིའི་སྤང་རྒྱན་རེད།
སྐྱོན་རྗོད་བྱས་ཚད་བཟང་པོར་རློམ་པ་འཁྲུལ། །སྐྱོན་རྗོད་ལ་ཡང་བཟང་ངན་སྣ་ཚོགས་ཡོད། །སྐྱོན་ཡོད་སྐྱོན་རྗོད་བྱེད་པ་མཁས་པའི་ལུག །སྐྱོན་མེད་སྐྱོན་རྗོད་བྱེད་པ་བླུན་པོའི་རྟགས།།
བཀའ་བློན་ཁྲི་པ་ཞེས་པའི་མཚན་དེ་སྲིད་སྐྱོང་ལ་བསྒྱུར་བ་ཡིན་ན་ཡག་པོ་འདུག དེ་ལ་མི་འགྲིག་པ་མིན་འདུག ཡིན་ན་ཡང་བསམ་འཆར་འདོན་མཁན་རིགས་ཡོད་ན་དེ་ལ་རང་དབང་དགོས་པ་ལས་འདིར་འགའ་ཞིག་གིས་རང་དང་འདོད་པ་མི་མཐུན་པའི་མཆན་འདེབས་སྐབས་ལམ་སེད་ཇུས་ཏོག་ཡོད་མ་རེད་ཟེར་བ་དང་། བཤད་རྒྱུ་མང་པོ་བྱེད་རྒྱུ་ཡོད་མ་རེད་ཟེར་བ་སོགས་ནི་རྣམ་དཔྱོད་མེད་པའི་སྐད་རང་རེད། དམངས་གཙོའི་སྤྱི་ཚོགས་ནང་ལ་སྐྱོན་བརྗོད་དང་བསམ་འཆར་ངེས་པར་དུ་དགོས་པ་ཡིན།
སྲིད་སྐྱོང་ཟེར་བ་འདི་ནི་འོས་ཞིང་འཚམས་པའི་བཀའ་ཁྲིའི་མིང་ཞིག་མ་རེད་།
གང་ཡིན་ཟེར་ན་། ༧རྒྱལ་དབང་མཆོག་བོད་ཀྱི་རྒྱལ་པོའི་འགན་ཁུར་མ་ཐུབ་པའི་སྐབས་སུ་། ཚབ་བྱེད་མཁན་མི་དེའི་གོ་གནས་མིང་རེད་། ནམ་ཞིག་༧རྒྱལ་དབང་མཆོག་གི་ཆབ་སྲིད་ལས་ཀ་གནང་རེན་པའི་དུས་སུ་སྲིད་སྐྱོང་གིས་ཡར་འབུལ་དགོས་གི་རེད་། དེ་འདྲ་བའི་འགྲོ་སྟངས་དེ་ལ་སྲིད་སྐྱོང་ལབ་པ་རེད་།
དངོས་ནས་བཤད་ན་མིང་དེ་གཞན་ཞིག་གི་ཚབ་མིང་རེད་།
ང་ཚོའི་བཀའ་ཁྲི་ནི་སུ་ཞིག་གི་ལས་ཚབ་མ་རེད་། དེ་ཕྱིར་མིང་དེ་མ་འོད་པ་རང་མཐོང་།
ཉེ་ཆར་བཀའ་བློན་ཁྲི་པ་མཆོག་གིས་བཀའ་ཤག་ཚོགས་ཁང་དུ་བོད་པའི་གསར་འགོད་པ་དག་ལ་དྲི་བ་དྲིས་ལན་གནང་སྐབས་《སྲིད་སྐྱོང་ར་སྒྲེང་རིན་པོ་ཆེ་ཡི་སྐུ་དབང་༧གོང་ས་མཆོག་ལ་འབུལ་བཞེས་གནང་བ་རེད། སྲིད་སྐྱོང་བློ་བཟང་སེང་གེ་ལ་༧གོང་ས་མཆོག་གི་སྐུ་དབང་རྩིས་སྤྲོད་གནང་བ་རེད། ཅེས་ལབ་པ་ཡིན་ན་ཚིག་དེ་སྙིང་རྗེ་བོ་ཆགས་རྒྱུ་རེད” 》ཅེས་པ་དེ་གའདྲ་སེ་གསུངས་པ་ཡིན་ན། བློ་བཟང་སེངྒེ་ལ་གོང་ས་མཆོག་གི་སྐུ་དབང་རྩིས་སྤྲོད་གནང་བ་རེད་ཅེས་ཚིག་ཐག་ཆོད་པོས་གསུངས་འདུག གོང་ས་མཆོག་གིས་བཀའ་སློབ་གསུང་འཕྲིན་སྔ་རྗེས་དག་ལས། ངོས་ཀྱི་ཆབ་སྲིད་ཀྱི་འགན་དབང་ཡོད་ཚད་འོས་འདེམས་བྱས་པའི་འགོ་ཁྲིད་ཚོར། ཞེས་གསུངས་པ་ལས་བཀའ་བློན་ཁྲི་པ་གཅིག་པུར་རྩིས་སྤྲད་ཡོད་ཅེས་རྩ་བ་ཉིད་ནས་གསུངས་མི་འདུག སྐད་ཆ་འདི་རིགས་ལ་ཞིབ་ཆ་དགོས་པ་ལས་གལ་ཆུང་དུ་བཞག་མི་རུང།
དྲ་འབུ་ཚོ་རྒན་ལྷ་མོ་སྐྱབས་ལགས་ཀྱི་བསམ་འཆར་འདི་ལྟུ་བུ་རེ་འདོན་རྒྱུ་མི་འདུག་གམ། འདི་འདྲ་རེ་འདོན་ཐུབ་ན་རང་གཞུང་ལ་ཕན་ཐོག་ཡོང་ངེས་རེད། དེ་མིན་ཆོ་མེད་པའི་བསམ་འཆར་བཤད་ནས་དུས་བབ་དྲ་རྒྱ་བཟང་པོ་འདི་གད་སྙིག་བླུག་སྣོད་ལྟ་བུ་ཞིག་མ་བཟོས་ན་མི་སེགས་སམ།
དགེན་ཆབ་བྲག་ལྷ་མོ་སྐྱབས་ཀྱིས་གསུང་པ་ལ་རྒྱ་ཆ་%100ཐམས་པ་མོས་མཐུན་ཡོད
སྲིད་སྐྱོང་ཁྲི་པ།
བཀའ་བློན་ཁྲི་པ་དང་བཀའ་བློན། བཀའ་ཤག་བཅས་ཀྱི་མིང་སྒྱུར་སྐོར།
ཁྲི་པ་ཞེས་པ་འདི་དབང་འཛིན་རིམ་པའི་གོ་གནས་མཐོ་ཤོས་རིགས་ཤིག་གི་ཆེད་སྤྱོད་ཐ་སྙད་ཅིག་ཆགས་ཡོད་པས་འདི་རང་སོར་འཇོག་གལ་ཆེ་ན་ཡང་བཀའ་བློན་ཞེས་པ་རྒྱལ་པོའི་བཀའ་བཞིན་དམངས་དོན་སྒྲུབ་མཁན་གྱི་བློན་པོའི་དོན་ཡིན་པས་བརྗེས་ན་ལེགས།
མ་འོངས་བོད་དེ་ཡུལ་མིའི་སྲིད་སྐྱོང་ཞིག་བྱ་རྒྱུ་བཅའ་ཁྲིམས་ཀྱི་དགོངས་དོན་ཡིན་པས་སྲིད་སྐྱོང་ཞེས་པ་འདི་བོད་ཀྱི་འདས་མ་ད་གསུམ་གང་གི་ཆ་ནས་ཀྱང་འོས་འཚམ་ཞིག་ཡིན་པས་བཀའ་བློན་ཁྲི་པ་ཞེས་པའི་མིང་འདི་སྲིད་སྐྱོང་ཁྲི་པ་ལ་བརྗེ་སྒྱུར་གནང་ན་བཀའ་བློན་གཞན་དག་ཀྱང་རང་བཞིན་གྱིས་སྲིད་སྐྱོང་པ་ཞེས་པར་འགྱུར་འོས།
བཀའ་ཤག་ཅེས་པའི་མིང་འདིར་སྲིད་སྐྱོང་གཙོ་འཛིན་རྣམ་པས་བཀའ་གྲོས་དང་ཕྱག་ལས་གནང་སའི་ལས་ཤག་ཅེས་མཆན་བུ་ཞིག་བཏབ་ནས་རང་སོར་འཇོག་ཆོག་ལ། ཡང་ན་སྲིད་སྐྱོང་གཞུང་ལས་ཁང་ལྟ་བུར་སྒྱུར་ཆོག
ཨ་ཙི་་་་་་་་ད་ཕྲུག་ནང་ཞིག་མ་བྱས་རོགས་་་་མི་གསར་པ་གཅིག་སླེབས་བ་དང་མིང་གསར་པ་གཅིག་བྱས་ན་ལས་ཁུང་ཁག་གི་མིང་ལ་ག་རེད་ལབ་དགོས་རེད་དེབ་ལྗང་ཁུའི་མིང་ལ་ག་རེད་བལ་དགོས་རེད་ད་དུང་དེ་ལས་མང་་་་་་ཨ་རོ་་་དཀའ་ལས་ལ་་་་ད་མིང་མང་པོ་བརྟགས་དགོས་མ་རེད་་་་་ཐམས་ཅད་མཁྱེན་པ་ཁོང་གི་གང་གསུངས་པ་དེ་བཞག་རོགས་མ་གསུངས་པ་དེ་མ་བྱས་རོགས་་་་་་་་་་བྱེད་རྒྱུ་མང་ན་གསེར་སྐུ་གཟང་དུ་འགྱུར་ཡོད་དོ།
དྲ་གྲོགས། ཁ་་་ཁ་བསྡད་ཡག་གི་རེ། ཁ་ཁ་བསྡད་ན་ཁ་མཆི་མེད་ མགོ་རུམ་ནང་བཅུག་ན་རླུང་བུ་མེད། ཟེར་བའི་དཔེ་ལྟར་ཆུ་ཏོག་མ་བྱེད་ན་ཡག་གི་རེ། སྡེ་སྲིད་མགོ་ལེབ་གི་བྱེད་འགྲོ་གི་རེ། ང་གཉིས་ཆུ་ཏོག་ན་ཕན་ཐོག་མ་རེ། མི་ཚོ་ཉན་གི་མ་རེ་ལོ།
ད་མང་པོ་མ་བཤད། འདོག་འོས་པའི་མིང་ཞིག་བཏག་ཡོང་གི་རེད། གང་ཡང་མི་འཇོན་པའི་དྲ་འབུ་ཚོས་བྱེད་རྗེས་ཅན་གྱི་བཀའ་ཁྲི་མཆོག་ལ་སྐྱོན་བརྗོད་འདྲ་ཞིག་བྱེད་ཁུལ་བྱས་པ་ནི་གད་མོའི་གནས་རེད། ཁ་ནས་བཤད་བསྡད་པ་ལས་ལག་གིས་གཅིག་ལས་དང་དེ་ནས་ཧ་གོ་ཡོང་།
རྒྱལ་ཚབ་ར་སྒྲེང་ཟེར་བ་ལས་སྲིད་སྐྱོང་ར་སྒྲེང་ཟེར་བ་ཞིག་ཨེ་ཡོད། ཨེ་རླུང་དང་ཨ་རིའི་རླུང་འཕྲིན་ཁང་གིས་སྲིད་སྐྱོང་བ་ཟེར་ན་མངའ་སྡེ་བློན་ཆེན་གི་མིང་ལ་སྤྱོད་བཞིན་པའི་མིང་ཚིག་ཅིག་རེད། བོད་ལ་རང་སྐྱོང་དགོས། ཁོང་ནི་རང་སྐྱོང་གི་སྲིད་སྐྱོང་བ་རེད་ཟེར་ནས་རྒྱ་ནག་གི་རྐུབ་ལྡུག་གི་ཡོད་པ་རེད། ཕན་ནི་མ་རེད། ལོ་ངོ་དྲུག་ཅུ་ལ་ལྡུག་པ་རེད། ཕན་སོང་ངམ།
བཀའ་བློན་ཁྲི་པ་ཞེས་པའི་མིང་ཚིག་འདིར་ཡང་འགྱུར་བ་གཏོང་དགོས་མདོག་མདོག་གསུངས་ཀྱི་ཡོད་པ་དང་འགྲེལ་བཤད་མི་འདྲ་བ་བརྒྱབས་ཀྱི་ཡོད་པ་རྣམས་སུ་བསམ་ཚུལ་ཞིག་ཞུ་འདོད་པ་ནི།
བཀའ་བློན་ཞེས་པ་འདི་་་་་བོད་གངས་ཅན་པའི་ཆོས་སྲིད་གཉིས་ཀྱི་དོན་གྱི་བདག་པོ་༧གོང་ས་མཆོག་གི་བཀའ་ཡི་བློན་པོ་ཞིག་ལ་གོ་དགོས་པ་ཡིན་སྲིད། ཡང་གཅིག་བྱས་ན་བོད་ཆོས་ལྡན་གྱི་རྒྱལ་ཁབ་ཤིག་ཡིན་པས་སངས་རྒྱས་ཀྱི་བཀའ་ཡི་བློན་པོ་ཞིག་ལ་གོ་ཆོག་པ་ཡང་ཡོད་སྲིད།
སྡུག་སར་ནས་ཞུས་ན་བཀའ་བཀོད་རྒྱུད་འཛིན་གྱི་བཀའ་ཡི་བློན་པོ་ཞིག་ལ་གོ་ཆོག་པ་ཡང་ཡོད་སྲིད། བཀའ་ཞེས་པར་སངས་རྒྱས་ཀྱི་བཀའ་དང་༧གོང་ས་མཆོག་གི་བཀའ་་་་་་་རྒྱལ་པོའི་བཀའ་་་་ཆབ་སྲིད་དབང་འཛིན་པའི་བཀའ་་་་་་སོགས་མང་པོ་ཡོད་པར་འདོད།
བཙན་བྱོལ་བོད་མིའི་བཅའ་ཁྲིམས་ནང་དུ་ཡང་ཆབ་སྲིད་དབང་འཛིན་པའི་བཀའ་ཞེས་གསལ་ཡོད། བཀའ་བློན་ཁྲི་པ་ཡིན་ན་བཀའ་བཀོད་རྒྱུད་འཛིན་གྱི་བཀའ་ཡི་བློན་པོ་ཡིན་མི་དགོས་ལ་་་་མང་གཙོ་ཚད་དང་ལྡན་པའི་གྲོས་འཚོགས་ཀྱི་བཀའ་ཡི་བློན་པོ་ཡིན་ཆོག བོད་རྒྱ་ཆེན་མི་དམངས་ཀྱི་བཀའ་ཡི་བློན་པོ་ཡང་ཡིན་ཆོག་པར་འདོད།
བོད་རྒྱལ་ཁབ་ཀྱི་བདག་པོ་ངོ་མ་བོད་རྒྱ་ཆེན་མི་དམངས་ཡིན་པར་དངོས་ཡོད་གནས་ཚུལ་རེད། མི་དམངས་ཀྱིས་འོས་འདེབས་བྱུང་བའི་བཀའ་ཁྲི་འདི་རྒྱ་ཆེན་མི་དམངས་ཀྱི་བཀའ་ཡི་བློན་པོ་ཞིག་ཡིན་པ་ནི་དངོས་ཡོད་གནས་ཚུལ་རེད།
དེ་བརྟེན་སྲོལ་རྒྱུན་ལྡན་པའི་མིང་ཚིག་རྣམས་རྩ་མེད་མ་བཟོས་ན་ཡག་བ་ཡོད་པར་འདོད།
ཞོར་དུ་་་དྲ་གྲོགས་ནད་པ་ལགས།
བཀྲ་མ་ཤིས་པའི་སྐད་ཆ་དེ་འདྲ་བཤད་མ་བསྡད། ༨་ཞེས་པའི་གྲངས་ཀ་འདིར་སྡུག་སྐྱ་ཞིག་དང་ཨེ་ཡིན་ན། བཀྲ་ཤིས་རྟགས་བརྒྱད་ཟེར་བ་དང་བརྒྱད་ཁ་ཡར་དར་ཞེས་པ་སོགས་ཟེར་སྲོལ་ཡོད། བོད་ཀྱི་སྲོལ་རྒྱུན་གྱི་ཐོག་ནས་༨་ཞེས་པ་ཡག་པོ་བརྩི་གི་མེད་ན་་་་བཀྲ་ཤིས་རྟགས་བརྒྱད་ག་རེ་བྱས་ནས་བཟོས་པ་རེད་དམ།
བཀྲ་ཤིས་རྟགས་གཅིག་ཟེར་བ་དང་བཀྲ་ཤིས་རྟགས་གཉིས་ཟེར་བ་མི་འདུག་ག མང་དགོས་ན་བཀྲ་ཤིས་རྟགས་བརྒྱ་དང་སྟོང་ཟེར་དགོས་ཡང་་་དེ་འདྲ་ཡང་མི་འདུག དོན་མེད་མི་དམངས་ཀྱིས་སྡོམ་པའི་བཀའ་བློན་ཁྲི་པ་བློ་བཟང་སེང་གེ་ལ་རྣམ་རྟོག་མ་སློང་རོགས་ཞུ།།།།
བཀའ་ཁྲིའི་མིང་ལ་ག་རེ་ལབ་ཀྱང་གནད་འགའ་ཆེན་པོ་མེད་པ་འདྲ་། ལོ་རྒྱུས་དང་མཐུན་དགོས་ན་ བཙན་པོ་ཞེས་ ལབ་དགོས་སོ་། གནའ་སྔ་མོར་ བོད་ཀྱི་བཙན་པོ་ཟེར་དུས་བོད་མིའི་ནང་ནས་གོ་གནས་མཐོ་ཤོས་དེ་ལ་ཟེར་། དེང་ཡང་བཙན་བྱུལ་གཞུང་གི་བཙན་པོ་ལབ་ན་ད་ཡོད་བཙན་བྱོལ་བོད་མིའི་ནང་ནས་གོ་གནས་མཐོ་ཤོས་ཟེར་བ་ཡིན་པས་སྐྱོན་ཆ་མེད་འདུག་།
ངེས་པར་དགོས་རྒྱུ་ནི་བོད་མིའི་སྒྲིག་འཛུགས་ཟེར་བའི་མིང་དེ་མེད་པ་བཟོ་དགོས་། སླར་ཡང་བཙན་བྱུལ་བོད་གཞུང་ལ་སྒྱུར་ཐུབ་ན་གློ་བུར་གྱི་བར་ཆད་ཆེན་པོ་ཞིག་ནས་ཐར་པ་ཡིན་པས་བཙན་བྱུལ་བོད་གཞུང་ཐར་པར་ཐོབ་རེད་།
ད་ལོ་རྡ་སར་རིག་གནས་གསར་རྗེས་སླེབས་འདུག།
རྙིང་བ་ཚང་མ་གསར་བར་བསྒྱུར་དགོས་ཟེར།
ཐམས་ཅད་རྩ་མེད་དུ་མ་བཏང་ན་བློ་མི་བདེ་ཟེར། རྩ་རྫོགས་བྱས་ཚར་ན་བོད་ལ་བདེ་སྐྱིད་ཡོངས་ཟེར།
སངས་རྒྱས་པའི་རྣལ་འབྱོར་གྱི་ཞིག་གིས་ངོས་ནས་བཤད་ན་རྣམ་དོགས་ཟེར་བ་དེར་རྒྱུ་མཚན་གང་ཡང་མེད་པར་འདོད་པ་ཡིན། དེ་ཡང་ལས་འབྲས་དང་རྟོགས་པ་ཚད་མཐོན་པོར་སླེབས་པའི་གང་ཟག་ཞིག་གིས་ངོ་བོར་ཁོ་ནར་གནས།
ཡིན་ནའང་རྒྱུ་མ་རིག་པ་ཟེར་དེ་ཡོད་པའི་དབང་དུ་བཏང་ན་ཀུན་རྫོབ་འཇིག་རྟེན་པའི་ནང་གི་དངོས་པོའི་ཆོས་ཉིད་ལའང་རྟགས་དང་རྟེན་འབྲེལ་ཟེར་བ་དེ་བརྩི་སྲོལ་ཡོད།
བོད་གཞུང་སྨན་རྩིས་ཁང་གི་ལོ་ཐོའི་ནང་དུ་སྤྱི་ཟླ་ ༨ ཚེས་ ༨ ཉིན་ཉིན་འབྱུང་འཕྲོད་འཕྲོད་སྦྱོར་ཐོག་ནས་བལྟས་ནས་འབྱུང་འཕྲོད་སྡུག་ཤོས་དེ་འཕྲད་ཅིང་དེ་ཡང་ཚེས་ ༨ འབྱུང་འཕྲོད་མེ་ཆུ་འཕྲད་འདུག དེ་ཡང་རྩིས་གཞུང་ལས། མེ་ཆུ་འཕྲད་པ་འཆི་བའི་སྦྱོར། །འཆི་བའི་སྦྱོར་བས་སྲོག་འཕྲོག་བྱེད། །ཅེས་འཕྲོད་ཧ་ཅང་གི་ངན་པ་ཞིག་འཁེལ་འདུག
ད་ཡང་དེས་མ་ཚད་སྤྱི་ ༨ ཚེས་ཉིན་ལག་པ་སྟོང་པའི་རྟེན་འབྲེལ་ངན་པ་དབུལ་ལག་ཟེར་བ་དེ་འཁེལ་འདུག ལག་སྟོང་པའི་དབུལ་འཁེལ་བའི་ཉིན་བྱ་བ་གང་ཞིག་འགོ་འཛུགས་བྱས་ཀྱང་ཕྱི་འབྱུང་བྱ་བ་དེར་གྲུབ་འབྲས་ཅི་ཡང་མི་ཐོན་པར་དབུལ་ལག་ངན་པའི་ཉིན་ཞིག་འཁེལ་འདུག
རྒྱ་ནག་གིས་གྲངས་ ༨ དགུ་ཡག་པོར་རྩི་བཞིན་ཡོད་ཀྱང་བོད་པའི་སྲོལ་རྒྱུན་ལྟར་ན་གྲངས་དགུ་དེ་ཧ་ཅང་གི་ངན་པར་རྩི་སྲོལ་ཡོད། དཔེར་ན། བཟང་པོ་བཅུ་འཛོམས་དང་ངན་པ་དགུ་འཛོམས་ཞེས་གྲངས་དགུ་འཁེལ་བའི་རིགས་ངན་པར་བརྩི་བ་རེད། དཔེར་ན་ཚེས་གྲངས་བཟང་ངན་སྐབས། ཚེས་དྲུག་བཞི་དགུ་ཉིན་ཟླ་གཟའ་འཛིན་དང་། །གཟའ་སྐར་ངན་ངན་དང་མཚན་མོ་ལམ་བཞུགས་ངན། །ཞེས་ཚེས་དགུ་འཁེལ་བའི་ཉིན་དེ་བོད་སྲོལ་རྒྱུན་གསོ་རིག་གཞུང་ལས་ངན་པར་བཤད་འདུག
བོད་པའི་ལོ་རྒྱུས་ཐོག་ནས་བརྩིས་ན་༡༩༥༩ ཞེས་གྲངས་དགུ་འཁེལ་བའི་ལོ་དེར་བོད་ས་ཡོངས་རྫོགས་རྒྱ་དམར་གྱི་བཙན་འཛུལ་བྱས་ཏེ་༸ གོང་ས་མཆོག་གིས་གཙོས་པའི་བོད་མི་རྣམས་༥༩ ལོ་དེ་ནས་བཟུང་ད་བར་སྐྱབས་བཅོལ་བ་ཞིག་ཆགས་འགོ་ཚུགས་པ་རེད།
རྒྱ་ནག་གི་མེས་པོ་མའོ་ཙེ་ཏུང་ལ་ཆ་མཚོན་ན་ཡང་༡༩༡༩ ལོར་འབྲིང་རིམ་སློབ་གྲྭ་ནས་ཐོན་རྗེས་ཐོག་མར་གསར་ཤོག་གི་རྩོམ་སྒྲིག་ལས་ཀ་ཞིག་བརྩམས་ཀྱང་ཁུངས་མ་འཁྱོལ་བར་ལས་ཀ་དེ་གཡུགས་ནས་རྒྱ་ནག་ཧྲང་ཧེ་དུ་མེ་འཁོར་ནང་དུ་བསྐྱོད་པའི་ལོ་རྒྱུས་ཡོད།
ད་དུང་ནང་ཆོས་ནང་དེ་བཞིན་གཤེགས་པའི་གདུགས་དཀར་ལས། རྟགས་དང་རྟེན་འབྲེལ་ངན་པ་ཟློག །བལྟས་ངན་བརྒྱད་ཅུ་རྩ་གཅིག་ཟློག །དུས་མིན་འཆི་བ་རྣམ་བརྒྱད་ཟློག །བགེས་རིགས་སྟོང་ཕྲག་བརྒྱད་ཅུ་ཟློག །ཅེས་གྲངས་ ༨༡ གྲངས་ ༨ སོགས་ངན་པར་བརྩིས་ནས་ངན་ཟློག་གནང་བ་རེད་འདུག
སྤྱི་ལོ་ ༢༠༠༨ ལོར་བོད་ས་ཡོངས་སུ་མི་གསོད་ཁྲག་སྦྱོར་གྱི་ལས་ངན་ཚབས་ཆེན་ཞིག་བྱུང་བ་རེད། ད་དུང་ ༡༩༨༩ གྲངས་ ༨ དང་ དགུ་འཁེལ་བའི་ལོ་དེར་རྒྱ་ནག་ནང་དུ་ཁྲག་དྲི་བྲོ་བའི་དྲག་མནན་བརྩམས་པ་རེད།
ད་དུང་བོད་མིས་ཚོས་ཕྲུ་གུ་སྐྱེས་མ་ཐག་ཏུ་ཕ་མ་གཉིས་ཀྱི་བཙས་མ་ཐག་ཏུ་ལོ་བརྒྱ་འཚོ་ཞིང་སྟོན་བརྒྱ་མཐོང་བ་དང་། །ཚེ་རིང་དཔལ་ཐོབ་ངན་དགུ་ཐུབ་པ་དང་། །གྲང་དགུ་དེ་རིགས་ངན་ལ་ངན་པ་དགུ་འཛོམས་པའི་དབང་གིས་མི་ཚེའི་ནང་ངན་དགུ་ཐུབ་པའི་སྨོན་ལམ་བཏོན་སྲོལ་ཡོད།
དེར་བརྟེན་བཀའ་ཁྲིའི་ཁྲི་འདོན་གྱི་ལས་དོན་དེ་བོད་པའི་ངོས་ནས་བརྗོད་ན་བྱ་བ་གལ་ཆེན་ཞིག་ཆགས་ཡོད་ཀྱང་བོད་གཞུང་གིས་ངོས་ནས་སྤྱི་ ༨ ཚེས་ ༨ ཉིན་འབྱུང་འཕྲོད་སྡུག་ཤོས་དེ་དང་དབུལ་གལ་ངན་པའི་ཉིན་དེར་རང་དུ་ཁྲི་འདོན་བྱེད་དགོས་པའི་རྒྱུ་མཚན་དེ་ཆེད་དུ་བཟོས་པ་ཞིག་ཡིན་ནམ་ཡང་ན་སྣང་མེད་དུ་སྐྱུར་བ་ཞིག་ཡིན་མིན་ངས་མི་ཤེས་ཀྱང་རྟགས་དང་རྟེན་འབྲེལ་ངན་པ་ཟེར་འདྲ་འགྲིག་ན་ཏན་ཏན་དེར་བཀྲ་མི་ཤིས་པའི་གནས་ཚུལ་ཞིག་ཕྱིས་སུ་འབྱུང་བ་རེད།
དཔེར་ན་རྗེ་ཙོང་པས་ཀྱང་། རྟེན་འབྲེལ་ལེགས་པར་འགྲིག་པའི་རྩ་བ་ནི། །ཞེས་རྟེན་འབྲེལ་ལེགས་པར་འགྲིག་དགོས་རྒྱུ་དེ་གལ་ཆེན་ཞིག་ཡིན་པ་བསྟན་ཡོད། དེ་བཞིན་ཕར་པ་ལོ་ཙྰ་བ་དང་རྗེ་བཙུན་མི་ལ་ལོ་རྒྱུས་ནས་ཀྱང་ཟངས་ལུང་བཞི་པའི་སྟོང་པ་ཞིག་ཕུལ་བའི་རྟགས་དང་རྟེན་འབྲེལ་ལས་བཀའ་བརྒྱུད་པའི་བསྟན་པ་གསལ་བར་བྱེད་པའི་སྣོད་ལྡན་བུ་སློབ་རྩ་ཆེན་བཞི་འབྱུང་བའི་ལུང་བསྟན་པ་དང་། ཟངས྄སྟོང་པར་ཕུལ་བའི་རྟེན་འབྲེལ་གྱིས་མི་ལ་རས་པའི་སྐུ་ཚེ་ཧྲིལ་པོར་བཀྲས་ལྟོགས་དང་འཚོ་སྐྱོ་པོ་འབྱུང་བའི་ལུང་བསྟན་བྱུང་བ་ཡོད།
ད་དུང་བུད་མེད་ཀྱི་དམེ་བ་དགུ་མིག་དང་། སྐྱེས་པ་དགུ་མིག ངན་དགུ་སོགས་སྣ་ཚོགས་ཤིག་བརྩི་སྲོལ་ཡོད། ངས་བསམས་ན་སྤྱི་ ༨ ཚེས་ ༨ དེ་ གང་ནས་བརྩིས་ཀྱང་གཟའ་སྐར་དང་། འཕྲོད་སྦྱོར། འབྱུང་འཕྲོད། དབུལ་ལག ལོ་གྲངས། ཚེས་གྲངས་སོགས་ཕྱོགས་གང་ནས་བལྟས་ཀྱང་ཡག་ཡག་པོ་འགྲིག་མེད་སྟབས། བྱུང་ན་ཚེས་གཟའ་སྐར་དང་འབྱུང་འཕྲོད་དེ་གང་བཟང་བཟང་ཞིག་གནང་ཐུབ་ན་དགེ་མཚན་ཆེ་བར་མངོན།
བཀའ་ཁྲི་གསར་པའི་ལམ་སྟོན་འོག་བོད་མི་ཚང་མས་ཕྱ་གྲུ་མཉམ་འདེགས་ཐོག་འབྲས་བཟང་འཐོབ་པའི་སྨོན་འདུན་དེ་ངའི་རེ་བ་ཡིན།
བཤད་དགོས་པ་ཤེས་ལ་སྒྱུ་མཚན་གང་ཡང་མ་ཤེས་པའི་ཉི་མ་ཟེར་བའི་དྲ་གྲོགས་དེ་ལ་སྤྲིངས་བ།
ཁྱོད་ཀྱིས་
༼ཕྱི་ཟླ་ ༨ པའི་ཚེས་ ༨ ཉིན་རྡ་ས་གཙུག་ལག་ཁང་དུ་རྒྱལ་བ་རིན་པོ་ཆེ་དབུ་བཞུགས་ཐོག བཀའ་བློན་ཁྲི་པའི་མཚན་ལ་སྲིད་སྐྱོང་བ་ཞེས་བསྒྱུར་རྒྱུ་རེད།
འདིའི་སྐོར་ལ་རིང་ས་ནས་བཤད་འདོད་མེད། ཉེ་ས་དང་སྟབས་བདེ་ས་ཞིག་ནས་བཤད་ན། སྲིད་འཛིན་དང་སྲིད་བློན་ཟེར་ན་དེ་རྒྱལ་ཁབ་ཐུན་མོང་གི་སྤྱི་སྐད་ཅིག་རེད། ང་ཚོས་ནམ་རྒྱུན་རིག་གཞུང་ཐུན་མོང་མ་ཡིན་པ་དང་། གོམ་སྲོལ་ཐུན་མོང་མ་ཡིན་པ། སྐད་ཡིག་ཐུན་མོང་མ་ཡིན་པ། རང་གཤིས་ཐུན་མོང་མ་ཡིན་པ་སོགས་ཀྱིས་མི་རིགས་གཞན་དང་། རྒྱལ་ཁབ་གཞན་གྱི་ཆ་ཤས་དང་ཁོངས་གཏོགས་མ་ཡིན་པ་སྒྲུབ་ཀྱི་ཡོད་པ་མིན་ནམ།
བཀའ་བློན་ཁྲི་པ་ཟེར་བ་དེ་ང་ཚོ་བོད་པའི་ཐུན་མོང་མ་ཡིན་པའི་ཚིག་ཅིག་ཡིན་ལ། ཚིག་འདིའི་རྒྱབ་ལྗོངས་སུ་ཆབ་སྲིད་དང་ལོ་རྒྱུས་ཀྱི་འདས་དོན་མང་པོ་ཞིག་སྦེད་སྐུང་བྱས་ཡོད། ང་ཚོས་དགའ་ལྡན་པོ་བྲང་མཚན་བསྒྱུར་བྱས་དགོས་པ་དེ་ཆོས་ལུགས་རིས་མེད་དམངས་གཙོའི་ལྟ་གྲུབ་ཀྱི་གནད་འགག་ཅིག་ཡིན་སྲིད་མོད། བཙན་བྱོལ་བོད་གཞུང་ཞེས་པའི་བོད་པའི་སྲིད་གཞུང་གི་མཚན་དེ་རྡུམ་པ་དང་མཉམ་དུ་གཞུང་གི་ཆབ་སྲིད་ཀྱི་མགོ་ཁྲིད་བཀའ་བློན་ཁྲི་པའི་མཚན་ཡང་ཕྱིར་བསྡུ་བྱ་དགོས་པ་འདི་ཅི་ཡིན་ནམ། ༽ཟེར་བའི་དྲི་བ་དེ་ཅི་ཡིན་ནམ།
དེ་ནི་དགའ་ལྡན་ཕོ་བྲང་མཚན་བསྒྱུར་བྱས་སྟེ་དེ་མ་ཚད་༧གོང་ས་མཆོག་གིས་སྐུ་དབང་ཡོངས་རྫོགས་འདེམས་ཐོན་བཀའ་བློན་ལ་གསོལ་རས་རྩལ་བས་ད་བཟོད་བཀའ་བློན་མཆོག་བོད་རྒྱལ་ཁབས་ཆེན་པོའི་རྒྱལ་པོ་ཟེར་ན་རེད་སྲིད་འཛིན་ཟེར་ན་རེད་སྲིད་སྐྱོངས་ཟེར་ན་རེད་མདོར་ན་ཁོང་གི་ཡན་ལ་སྲིད་སྐྱོངས་བ་གཞན་ཞིག་མེད་པས་ན་བོད་རྒྱལ་ཁབས་ཆེནཔོའི་རྒྱལ་པོ་འམ་སྲིད་སྐྱོང་ཞེས་པའི་ཐ་སྙད་དེ་ཁོངས་ལ་ཐབས་པ་རེད་ད་ཁོང་གི་འོག་ལ་ཁོང་གིས་བཀའ་ཡིས་བློན་ཆེན་ཞིག་ཡོད་ན་ཐང་།
སྲིད་སྐྱོང་བློ་བཟང་ཅེས་ལབ་པ་ཡིན་ན་ཚིག་དེ་སྙིང་རྗེ་བོ་ཆགས་རྒྱུ་ཡིན་པ་མཁྱེན་བཞིན་དུ་བཅའ་ཁྲིམས་བསྐྱར་བཅོས་སྐབས་བཟོ་བཅོས་མ་གནང་བ་ཅི་ཡིན་ནམ། ཨ་ལ་རྩེད་མོ་ཡིན། དཔོན་ཆེན་ལ་ཁ་གཏོང་མི་ཉན།
བཙན་བྱོལ་བོད་གཞུང་ནས་དབུས་བོད་མིའི་སྒྲིག་འཛུགས། ཡང་དེ་ནས་བོད་མིའི་གཞུང་གི་སྒྲིག་འཛུགས་སུ་འཕོ་བསྒྱུར་ཕྱིན་པ།
ཡུལ་ལུང་གཅིག་གི་མིང་དེ་ཡང་དེ་འདྲས་འགྱུར་ཆོག་ཆོག་ལ། ཐབས་སྐྱོ་མདོག ཡུལ་སྡེ་གཅིག་ལ་མཚོན་ན་མིང་བསྒྱུར་བྱེད་པ་ལ་འཆར་གཞི་བརྟན་པོ་ཞིག་སྔོན་དུ་འགྲོ་དགོས་པ་ལས་གློ་བུར་དུ་སེམས་ལ་གང་ཤར་འགྱུར་བ་གཏོང་ཆོག་གཏོང་ཆོག་དེ་འདྲ་གང་འདྲ་ཡིན་ནམ། སྤྱིར་བཀའ་ཁྲི་ཟམ་གདོང་བླ་མ་ཁོང་མཁས་དབང་དང་དྲང་བདེན་དང་ལྷག་བསམ་ཅན་ཞིག་ཡིན་ཀྱང་། ཁོང་ལ་ད་དུང་ཡང་གདན་ས་ཁག་གི་རྟོག་གེ་མགོ་འཁྲེགས་པ་དང་མཛུབ་མོ་གང་བསྟན་གྱི་རིང་ལུགས་ཀྱི་དྲི་མ་དེ་ལྷག་འདུག བོད་གཞུང་གི་སྤྱི་མཐུས་གྲོས་ཚོགས་གཉིད་ལ་ཡུར་བསྡད་ཡོད་དམ། ཡང་ན་གནས་སྟངས་དེ་ཚོ་ལ་ཚོར་ཤེས་གང་ཡང་མེད་པ་ཡིན་ནམ། གནས་ཚུལ་དེ་དག་ལ་འགྲིག་ན་འགྲིག་པ་དང་། ཡང་ན་མ་འགྲིག་ན་མ་འགྲིག་པའི་བསམ་ཚུལ་ཁ་ནས་དོན་པ་དགོས་ཀྱི་འདུག་སྙམ།
ཐད་ཀར་སྲིད་སྐྱོང་ཞེས་བརྗོད་ན་ཡག་ཤོས་རེད། སྲིད་སྐྱོང་བཀའ་བློན་ཁྲི་པ་ཞེས་ཚིག་རིང་དེ་འདྲ་དགོས་དོན་མི་འདུག དེ་ནི་ཚིག་ལྷག་ཅིག་ལས་མ་འདས། ལོ་རྒྱུས་རང་བཞིན་ཅན་གྱི་བཙན་བྱོལ་བོད་གཞུང་གི་མིང་དེ་ཅི་དགར་བསྒྱུར་བཅོས་བྱེད་ཐུབ་ས་ཞིག་ནས། དགོན་པའི་ལས་སྣེ་ཞིག་གི་མིང་འདྲ་བའི་བཀའ་བློན་ཁྲི་པའི་མིང་འདི་འདོར་མི་ཐུབ་དོན་ག་རེ་ཡོད་དམ།
ཕྱི་ཟླ་ ༨ པའི་ཚེས་ ༨ ཉིན་རྡ་ས་གཙུག་ལག་ཁང་དུ་རྒྱལ་བ་རིན་པོ་ཆེ་དབུ་བཞུགས་ཐོག བཀའ་བློན་ཁྲི་པའི་མཚན་ལ་སྲིད་སྐྱོང་བ་ཞེས་བསྒྱུར་རྒྱུ་རེད།
འདིའི་སྐོར་ལ་རིང་ས་ནས་བཤད་འདོད་མེད། ཉེ་ས་དང་སྟབས་བདེ་ས་ཞིག་ནས་བཤད་ན། སྲིད་འཛིན་དང་སྲིད་བློན་ཟེར་ན་དེ་རྒྱལ་ཁབ་ཐུན་མོང་གི་སྤྱི་སྐད་ཅིག་རེད། ང་ཚོས་ནམ་རྒྱུན་རིག་གཞུང་ཐུན་མོང་མ་ཡིན་པ་དང་། གོམ་སྲོལ་ཐུན་མོང་མ་ཡིན་པ། སྐད་ཡིག་ཐུན་མོང་མ་ཡིན་པ། རང་གཤིས་ཐུན་མོང་མ་ཡིན་པ་སོགས་ཀྱིས་མི་རིགས་གཞན་དང་། རྒྱལ་ཁབ་གཞན་གྱི་ཆ་ཤས་དང་ཁོངས་གཏོགས་མ་ཡིན་པ་སྒྲུབ་ཀྱི་ཡོད་པ་མིན་ནམ།
བཀའ་བློན་ཁྲི་པ་ཟེར་བ་དེ་ང་ཚོ་བོད་པའི་ཐུན་མོང་མ་ཡིན་པའི་ཚིག་ཅིག་ཡིན་ལ། ཚིག་འདིའི་རྒྱབ་ལྗོངས་སུ་ཆབ་སྲིད་དང་ལོ་རྒྱུས་ཀྱི་འདས་དོན་མང་པོ་ཞིག་སྦེད་སྐུང་བྱས་ཡོད། ང་ཚོས་དགའ་ལྡན་པོ་བྲང་མཚན་བསྒྱུར་བྱས་དགོས་པ་དེ་ཆོས་ལུགས་རིས་མེད་དམངས་གཙོའི་ལྟ་གྲུབ་ཀྱི་གནད་འགག་ཅིག་ཡིན་སྲིད་མོད། བཙན་བྱོལ་བོད་གཞུང་ཞེས་པའི་བོད་པའི་སྲིད་གཞུང་གི་མཚན་དེ་རྡུམ་པ་དང་མཉམ་དུ་གཞུང་གི་ཆབ་སྲིད་ཀྱི་མགོ་ཁྲིད་བཀའ་བློན་ཁྲི་པའི་མཚན་ཡང་ཕྱིར་བསྡུ་བྱ་དགོས་པ་འདི་ཅི་ཡིན་ནམ།