གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ང་དགུ

ཆུ་ཚོད་བཅུ་གཉིས་མ་ཟིན་བར་དུ་ཉལ་ནས་ཡར་བླངས་པ་དང་ཀུ་ཤུ་གཅིག ར་ཤེལ་ཆུང་ཆུང་ནང་གི་ཞོ་མངར་མོ་གཅིག སྟར་ཁའི་ནང་ཉུང་བཅས་དཀྲུགས་དཀྲུགས་བཏང་དེ་ཞོགས་ཇ་ཟོས་དེ་གངས་མཚོའི་ཁ་པར་སླེབས་པ་དེ་ལ་ཁ་བརྡ་ཉུང་ཉུང་ཞིག་བྱས། མཐར་རང་གི་གློག་ཀླད་ནང་དུ་ཨ་རབ་ཀྱི་རོལ་དབྱངས་ཚོགས་པ་ཞིག་ཨེས་སི་རལ་དུ་ཡོང་ནས་མགོ་འཁོར་ནས་མི་ཁ་ཤས་ཀྱི་རོགས་རམ་འོག་འཚོ་བཞིན་པའི་གློག་བརྙན་དེ་ལ་ལྟ་འཕྲོ་བྱས་དེ་ལས་ཀ་ལ་སོང་། ཆུ་ཚོད་གཉིས་པ་མ་ཟིན་ཙམ་ནས་དགོང་མོའི་ཆུ་ཚོད་བཅུ་གཅིག་བར་དུ་ཐབ་ཚང་ནང་དུ་མ་བྱན་དང་ངེད་གཉིས་ཀྱིས་བྱ་ཤ་མང་བོ་ཞིག་སྔོ་བསྲེག་དང་གཙང་བཟོ། ཚལ་རིགས་མང་བོ་ཞིག་གཏུབ་པ་བཅས་ཉིན་གང་བོ་ཐབ་ཚང་ནང་དུ་བསྐྱལ། ང་རང་གི་སེམས་ནང་དུ་བསམ་བློ་སྣ་ཚོགས་ཤིག་འཁོར་དེ་འོང་བ་ནི། རང་ཉིད་ཤ་མི་ཟ་བའི་མི་ཞིག་གིས་ལས་ཀ་ཤ་ལས་རྐྱང་རྐྱང་བྱས་དེ་འོང་དུས་དངོས་ནས་ཅུང་ཙམ་མ་བདེ་བ་ཞིག་འདུག་ན་ཡང་། གཞན་ཡུལ་ནས་རང་གི་ཤེས་པའི་ལས་ཀ་རེ་འཚོལ་དགོས་དུས་སྟབས་བདེ་དང་ལས་ཀ་རེག་པར་ཡང་དཀའ་ལས་མེད་པ་བཅས་ལ་བརྟེན་ནས་འདི་ལྟར་བྱེད་དགོས་པ་ནི། སྒོར་མོའི་ཆེད་དུ་ལས་གང་ཡང་མིན་པ་དང་དེ་ལས་གཞན་ཞིག་ཡོད་པ་ནི་ང་རང་གི་མིའི་སྤྱི་ཚོགས་ཁྲོད་དུ་ཉམ་མྱོང་ཞིག་བསགས་འདོད་ཀྱིས་ཀྱང་ལོས་ཡིན།

སང་ཉིན་ཆུ་ཚོད་གསུམ་པར་ཤོག་ཟེར་ནས་མ་བྱན་ལ་ལག་འཇུ་ཞིག་བྱས་དེ་རང་གི་བསྡོད་གནས་སུ་ལོག་ཡོང་བའི་ལམ་ཁར་གངས་མཚོ་ལ་ཁ་པར་ཞིག་བཏང་ཀྱང་ཁ་པར་སྒོ་བརྒྱབ་འདུག་སྟབས། ཁ་པར་ནང་ནས་གློག་འཕྲིན་ཞིག་བཏང་བ་ཡིན། ད་གློག་བརྙན་དེའི་འཕྲོ་མ་ལ་བལྟས་དེ་དེ་ནས་ཉལ་ན་མ་རེད་དམ་བསམ་ཞོར་དུ་རང་གི་གློག་ཀླད་ཀྱི་ཁ་མ་ཕྱེ་བའི་ཡར་སྔོན་དུ་ཐར་མདོ་ཐིགས་ཕྲེང་གཉིས་གསུམ་ཞིག་ཀློག་པ་ཡིན། དེ་ནི་ང་རང་གི་བྱེད་བཞིན་པའི་ལས་ཀ་དེ་དག་གི་སྡུག་གཤེགས་ཆེད་དུ་ཡིན་པར་སྙམ་གྱི་ཡོད། ༢༦།༡།༠༩   

ཞོགས་པ་སྔ་བོ་གངས་མཚོའི་གྲོགས་མོ་ཝན་གྱིས་ང་རང་ལ་ཁ་པར་སླེབས་ནས་ཁོ་མོ་ང་རང་ལ་ལྟ་རུ་ཡོང་གི་ཡོད་ཟེར་བ་དང་དེ་ནས་ངེད་གཉིས་འཚིག་ཇ་འཐུང་ས་ཞིག་དུ་འགྲོ་ཟེར་བ་ལྟར། ང་རང་ཆུ་ཚོད་བཅུ་བའི་རྗེས་སུ་ཡར་བླངས་པ་ཡིན། ཁོ་མོས་ང་རང་ངོ་ཆུང་ཞིག་ཡིན་པས་གང་ཡང་བཤད་ཐུབ་ཀྱི་མ་རེད་ཟེར་ནས་ང་རང་ལ་ཟ་རྒྱུ་དང་ཤིང་ཏོག་ཚལ་རིགས་བཅས་མང་བོ་ཞིག་ཉོས་དེ་སྤྲད། ངེད་གཉིས་འཚིག་ཇ་འཐུང་སར་སོང་དེ་གང་ཟས་གང་འཐུང་གི་རིན་ཡོད་ཚད་ཁོ་མོས་སྤྲད། ང་རང་ལ་བཤད་དོན་ང་རང་གལ་སྲིད་ཕྱི་རྒྱལ་གང་རུང་ཞིག་དུ་ཡོད་པ་ཡིན་ན་ནི་རང་ཉིད་ལ་ངོ་ཤེས་དང་ཡང་ན་རོགས་པ་བྱེད་མཁན་རེ་ཡོད་ན་སྐྱིད་པོ་ཡོད་ས་རེད། ངས་དེ་ལྟར་བསམ་ནས་ཁྱེད་རང་ལ་རོགས་པ་ཆུང་ཆུང་ཞིག་བྱས་པ་ལས་གང་ཡང་མ་རེད་ཟེར། དངོས་ནས་ཁོ་མོ་ནི་ང་རང་ལ་ཧ་ཅང་བཟང་གི་འགྲོ་ཁར་སང་ཉིན་ཡང་ཁ་པར་གཏོང་ཆོག་ཟེར། ང་རང་འཚིག་ཇ་འཐུང་ས་དེ་ནས་ཆུ་ཚོད་གཉིས་ལྷག་གི་རིང་དུ་གློག་ཀླད་ནང་ནས་དྲ་རྒྱ་འདྲ་མིན་ནང་དུ་བསྐོར་ཉུལ་བྱས་པ་ཡིན།

གངས་མཚོས་ཁ་པར་འབྱོར་ནས་ཁ་བརྡ་བྱས་པ་ལྟར་ང་རང་གིས་བོད་ནང་གི་ནང་མི་ལ་ཁ་པར་བཏང་བ་དང་དེ་རིང་ཨ་མདོའི་ལོ་སར་ལ་འཁེལ་ཡོད་ན་ཡང་། ངས་ཁོང་ཚོ་ལ་ལོ་གསར་བཟང་སོགས་གང་ཡང་མ་བཤད་པར་ཁོང་ཚོ་ལ་འཚམ་འདྲི་བྱས་དུས། ཕ་རྒན་དྲིན་ཆེན་གྱིས་དེ་རིང་ནི་ཉིན་མ་ག་རེ་ཡིན་པ་ཁྱེད་རང་གི་ཤེས་ཀྱི་ཨེ་ཡོད་ཟེར། ངས་ཤེས་ཀྱི་ཡོད། ཡིན་ན་ཡང་། ཁྱེད་རང་ཚོ་ལ་ལོ་གསར་བཟང་ངམ་ཞེས་མི་འདྲི་དོན་ཁྱེད་རང་གི་ཤེས་རྒྱུ་རེད་ཅེས་བཤད་དུས། རེད་རེད་ལོས་ཤེས། ང་ཚོས་ཀྱང་ལོ་གསར་བྱེད་ཀྱི་མེད་པ་མ་ཟད། ད་ལོ་བོད་ནང་གི་དོན་རྐྱེན་དེའི་སྟབས་ཀྱི་བླ་བྲང་ས་ཆ་ན་ལོ་གསར་བྱེད་ཀྱི་ཡོད་པ་མ་རེད་སོགས་མང་བོ་ཞིག་ཁ་བརྡ་བྱས་པ་ཡིན། དམིགས་གསལ་གྱིས་ཨ་མྱེའི་ལགས་ཀྱིས་ང་རང་ལ་འཇིག་རྟེན་མི་ལ་དགོས་པའི་བསླབ་བྱ་ཁ་ཤས་ཤིག་གནང་བ་དང་ང་རང་ལ་ཁྱེད་རང་གིས་ས་མཐའ་ནས་ཤུ་རེ་བྱོས། རྗེས་ཕྱོགས་ངོ་ཐུག་རྒྱུ་ཡིན་མིན་མི་ཤེས་ཀི  ང་རང་ནི་ལོ་གཅིག་གམ་གཉིས་ཀྱི་མི་རེད། དེ་ནས་ལས་རྒྱུ་འབྲས་བརྩི་བ་དང་རང་གི་དཀའ་ལས་བརྒྱབ་པའི་དངུལ་དེ་དག་འཕྲོ་བརླག་དུ་མ་གཏོང་བར་རང་ཚུགས་ཐུབ་པ་ཞིག་བྱེད་རྒྱུ་ནི་གལ་ཆེན་རེད་སོགས་མང་བོ་མང་བོ་ཞིག་གསུངས་སོང་།

སྐར་ཆ་ཁ་ཤས་ལས་མི་འདུག་ཆུ་ཚོད་གསུམ་པ་ཟིན་གྲབས་འདུག ང་རང་རྒྱུགས་ཤར་བྱས་དེ་ལས་ཀ་ལས་སའི་ཕྱོགས་སུ་རྒྱུགས་པ་ཡིན། ཁ་སང་ལྟར་དུ་ལས་ཀ་ཐབ་ཚང་ནང་དུ་ལས་ཀ་དམར་ལས་དང་དཀར་ལས་སོགས་མང་བོ་ཞིག་བྱེད་ཞོར་དུ་བསམ་བློ་ཕ་རྒན་དང་ཨ་མྱེ། ཨ་མའི་ང་རང་ཡིན་གཅིག་མིན་གཅིག་རྒྱ་གར་དུ་ད་ལོ་ཡོང་རྒྱུ་ཡིན། ཨ་མྱེ་མ་ཡོང་ན་ཨ་རྒྱ་ཡང་ཡོང་ཐུབ་རྒྱུ་མ་རེད་མོད། ཡིན་ཡང་། ང་རང་ནི་་ཡོང་རྒྱུ་ཡིན་ཟེར་ནས་ལྷ་མོ་སྐྱིད་ལ་མནའ་ཞིག་བསྐྱལ་བཞག་ཡོད། ལྷ་སྤེ་ངེད་གཉིས་ཁྱོས་ལྟོགས་སྐོམ་མྱོང་དུ་འཇུག་རྒྱུ་མ་རེད་ལ་ཟེར་བ་སོགས་ལ་འདང་རྒྱགས་ཞོར་དུ་ལས་ཀ་བྱས། ༢༧།༡།༠༩    

དུས་ཚོད་གསུམ་པ་ལ་མ་ཟིན་ཙམ་དུ་ཉིན་ལྟར་གྱི་ལས་ཀ་བྱེད་དུ་མཚོ་འགྲམ་བརྒྱུད་དེ་སོང་། ཐབ་ཚང་ནང་གི་སྔོ་ཚལ་གཏུབ་སྟངས་ཚང་མ་དང་ཤའི་རིགས་གཏུབ་སྟངས་དང་བརྔོ་བསྲེག་བྱེད་སྟངས་སོགས་ཉིན་མ་འདི་དག་གི་རིང་དུ་ཤེས་སོང་ཡང་། ཕྱི་དྲོ་སྐུ་མགྲོན་ཚོ་སླེབས་ནས་འོང་དུས་སུ་འགན་འཛིན་ཨེས་རྒོལ་ཟེར་བ་དེ་ཐབ་ཚང་ནང་དུ་ཡོང་དེ་ང་རང་ལ་ཁྱེད་ཀྱིས་ཨང་གྲངས་ཉེར་ལྔའི་སྟེང་གི་ཁུ་བ་དེའི་ནང་དུ་གང་གང་བླུགས་ཀྱི་ཡོད་མེད་ཤེས་ཀྱི་ཡོད་དམ་ཟེར་ནས་སྐད་ཚ་བོའི་སྒོ་ནས་དྲིས་དེ་འོང་དུས་ང་རང་གི་སེམས་པ་འཚབ་འཚུབ་དུ་གྱུར་ནས་གང་ཡང་དྲན་གྱི་མི་འདུག ལྷག་པར་དུ་ཐབ་ཚང་ནང་གི་ལས་རོགས་བུད་མེད་རྒྱགས་པ་ཆུང་ཆུང་དེའི་ང་རང་ལ་འདི་ཨང་གྲངས་འདི་རེད། འདི་གན་རེད་སོགས་བཤད་མ་སོང་ལ། འགན་འཛིན་ཁོས་ཀྱང་ང་རང་ལ་ཟས་ཐོའི་སྟེང་གི་ཨང་གྲངས་ཚོ་འདི་ལྟར་རེད་ཅེས་འགྲེལ་བཤད་ཙམ་ཡང་བྱས་མ་སོང་། སྐབས་དེར་ངས་གང་ཞིག་གྲ་སྒྲིག་བྱེད་དགོས་མིན་མ་ཤེས་པར་ཡོད་པའི་སྐབས་དེ་ལ་ཁོ་རང་གིས་ང་ལ་འདི་རེད་ཟེར་ནས་གང་མགྱོགས་མགྱོགས་ཀྱིས་ཟས་སྣ་ཁ་ཤས་ཤིག་གྲ་སྒྲིག་བྱས་དེ་སྐད་ཆ་ཡག་པོའི་སྒོ་ནས་འགྲེལ་བཤད་གང་ཡང་མི་བྱེད་པར་རྣམ་འགྱུར་གྱང་ཡག་པོ་གང་ཡང་མི་སྟོན་པར་ཁོ་རང་ལ་ཕར་དྲིས་དུས་འཐད་མི་འཐད་ཀྱི་རྣམ་འགྱུར་དང་བཅས་དེ་འདི་རེད་ཅེས་མཛུབ་མོ་ཙམ་བཙུགས་དེ་སྟོན་ཁུལ་བྱེད། མི་ཞིག་གི་སྐད་རིགས་རྒྱུས་མེད་ཅིག་གི་སྟེང་ནས་ཉིན་མ་བཞིའི་ནང་དུ་ཟས་ཐོའི་སྟེང་གི་ཟས་སྣ་བཞི་བཅུ་མ་ཟིན་ཙམ་ཞིག་ཡོད་པ་དེ་དག་གང་གང་ཡིན་མིན་ཤེས་འགྲོ་བ་ཞིག་ཡིན་ན་ནི། མི་ལ་མི་འདྲ་བའི་ཆ་དང་མ་བྱན་དང་མ་གཡོག་ཞེས་ཁག་ཁག་ཞིག་ཡོང་དགོས་དོན་ཞིག་ལྷག་མེད་པ་རེད། གང་ལྟར། ང་རང་གིས་ཉིན་མ་འདི་དག་གི་རིང་དུ་ཟ་མ་བཟོ་ལུགས་མ་འདྲ་བ་ཁ་ཤས་ཤིག་ཐེས་ལན་གྲིའི་མ་བྱན་རྒན་པ་དེའི་དྲུང་ནས་ཤེས་སོང་། དེ་ནི་ཟ་མ་བཟོ་མཁན་ཞིག་ལ་མཚོན་ན་ཉམ་མྱོང་ཆེ་ཤོས་ཤིག་བསགས་པ་རེད་ལ་གལ་ཆེན་པོ་ཡང་རེད། གང་ལྟར། ཨེས་རྒོལ་ཟེར་བ་དེ་ནི་ང་རང་ཐབ་ཚང་ནང་དུ་ངོ་སྤྲོད་བྱེད་མཁན་ཡིན་པས་ཁོ་རང་ལ་ཡང་འགན་ཞིག་ལོས་ཡོད། ཁག་མེད་པ་རེད། ཡིན་ཡང་སྐད་ཆ་བཤད་ཕྱོགས་ཐད་ནས་ཁོ་རང་ལོ་མང་རིང་ཟ་ཁང་གི་ཉམ་མྱོང་བསགས་ན་ཡང་མི་ལ་སྐད་ཆ་བཤད་སྟངས་ཐད་ནས་ཉམ་མྱོང་གང་ཡང་མ་བསགས་པ་ཞིག་རེད་འདུག་པ་ལྟ་བའི་ཚོར་སྣང་ཞིག་སྤྲད་སོང་། གང་ཡིན་ཡང་། ང་རང་ཉིན་བདུན་ཚང་ན་ད་གཟོད་གང་ཆགས་ཀྱི་ཡོད་མེད་ཤེས་ངེས་རེད།

ཆུ་ཚོད་བཅུ་གཅིག་ཟིན་མ་ཐག་ལས་མཚམས་བཞག་ནས་ཕྱིར་ཡོང་བའི་ལམ་ཁ་ནས་གངས་མཚོས་ཁ་པར་འབྱོར་བ་ལྟར་ཉིན་བཀང་གི་བྱ་བ་དག་ལ་གླེང་མོལ་བྱས་པ་དང་སང་ཉིན་མོ་རང་གི་གྲོགས་མོ་སྒྲ་ཝས་བཟའ་མི་དང་འགྲོག་ནས་ང་རང་ཡོད་སར་ཡོང་ཉིན་རེད། དངོས་ནས་མགྲོན་ཁང་འདི་ནི་བཟོ་བཀོད་ཆེས་ལེགས་ཤོས་ཀྱི་ཤིང་རྐྱང་རྐྱང་གི་གྲུབ་པའི་མགྲོན་ཁང་ཆེན་མོ་ཞིག་ཡིན་པ་མ་ཟད། མགྲོན་ཁང་འདི་འདྲ་ཕལ་ཆེར་རྒྱལ་ཁབ་འདི་ན་གཞན་མེད་ཚོད་དུ་ཡང་བཤད་ཀྱི་འདུག བཟོ་བཀོད་ཀྱི་གྲུབ་སྟངས་དང་བཟོ་མཁན་ཚང་མ་ཐེ་ལན་གྲི་རང་གི་མི་འཁྲིད་ནས་འོང་དེ་བཟོས་པར་བཤད། གལ་སྲིད། མགྲོན་པོ་སུ་ཞིག་མགྲོན་ཁང་འདིར་སླེབས་པ་ཡིན་ན། ད་གཟོད་རྒྱལ་ཁབ་གཞན་ཞིག་གི་སྣང་བ་དབང་མེད་དུ་སྟེར་ངེས་རེད་འདུག ༢༨།༡།༠༩    

མུ་འགོད།