སྨོན་ལམ་ཚོགས་རྒྱུར་དགའ་བའི་ང་ཚོ།

སྟག་ཕྲུག་ལགས་དཔལ་ལྡན་བཀའ་བརྒྱུད་པ་དང་། དཔལ་ས་སྐྱ་བ་རྣམ་གཉིས་ཀྱིས་འདས་ཟིན་པའི་ལོ་རྒྱུས་ནང་ས་མཆོག་དེ་གཉིས་ལ་སྨོན་ལམ་ཚོགས་ཡོད་མེད་ཀྱི་བཀའ་ལན་གསལ་པོ་ཞིག་གནང་རོགས།

གཅེན་པོ་ལགས་སུ་ཁྱོད་ཀྱི་བསྐྱར་བཤད་འདི་དེ་ལས་ཛ་དྲག་ཆེ་བའི་བསྐུལ་མ་ཞིག་མི་འདུག་གམ། ཁྱོད་ཀྱིས། (བླ་གྲྭ་ཚོས་ཀྱང་བསླབ་སྡོམ་དང་ཉམས་ལེན་ལ་དོ་སྣང་མི་བྱེད་པར་མིའི་མདུན་དུ་འདྲ་ཆགས་པོས་སྨོན་ལམ་ཁོ་ན་འདོན། སྨོན་པའི་དོན་ལ་སློབ་མཁན་མི་སུ་གང་ཡང་མེད།)ཟེར་བ་འདི་ལ་ཁྱོད་ཀྱི་རིག་པ་ནང་དུ་ཁུག་ལ་ཡག་པོ་ཞིག་དཔྱོད་དང་། ངས་མང་པོ་ཞུ་གི་མིན། དགོས་པ་ཡང་དེ་ཙམ་མི་འདུག ཁྱོད་དང་ངེད་རང་གཉིས་ཀྱི་འཁོས་ལ་ལྟོས་ཚེ/ མི་སྐྱོན་གཅིག་པུ་བལྟ་རྟོག་བྱེད་དགོས་པའི་རྒྱུད་ལོག་ལྟས་ལྷད་ཚར་བ་ཞིག་ལས་རྗེས་སུ་ཡི་རང་བའི་ཡན་ལག་ནི་རྦད་དེ་བརླག་ཚར་འདུག མ་གོ་བ་ལ་ཆོས་མ་བཤད། མ་ཉན་པ་ལ་གཏམ་མ་བཤད་ཟེར་བ་འཇིག་རྟེན་གྱི་དཔེ་བཞིན་ཁྱོད་རང་གང་འདོད་པ་དེ་དེ་བཞིན་དུ་བྱོས་ཤིག རྒྱུད་བསྐུལ་འདི་ཚོས་གཞིས་བྱེས་བོད་མི་སྐྱ་སེར་ཡོང་ལ་ཕན་ཐོག་ཞིག་ཡོང་བའི་བསམ་བློ་འདུག་ན་ངོས་ལ་བསམ་འཆར་གང་ཡང་མེད། མ་གཞི་གནས་མཆོག་རྡོ་རྗེ་གདན་སོགས་འཕགས་ཡུལ་གྱི་གནས་ཆེན་ཁག་དང་དེ་བཞིན་བོད་གངས་ཅན་གྱི་ལྗོངས་སུ་ཡང་ཆོས་བརྒྱུད་རང་ས་རང་སའི་ཁྱབ་ཁོངས་སུ་སྨོན་ལམ་ཆེན་མོ་འཚོགས་པའི་སྐབས་སུ་རྟགས་དང་མཚན་མ་མི་ཀུན་གྱི་མཐོང་ཆོས་སུ་གྱུར་པ་མང་པོ་ཞིག་ཡོང་པའི་སྐད་ཆ་དེ་ཚོ་རྫུན་མ་དང་ཁྲལ་སོད་མ་བསླབ་པའི་ལག་རྗེས་རེད་ཞེས་ལབ་དགོས་ན་ངས་སྔར་གོང་དུ་སྨོས་པ་བཞིན་འདི་ཕྱི་ཀུན་ཏུ་དགེ་བའི་ཚོགས་བསོག་བརླབ་པོ་ཆེ་གཞན་གྱི་དངོས་སུ་བྱེད་ཐུབ་པ་ལ། དོན་རྡོག་ཏིལ་གྱི་འབྲུ་མ་ཙམ་མེད་པར་མི་ལ་ལོག་ལྟའི་བསྐུལ་མ་འདེབས་དགོས་པའི་བློ་ཁོག་ཆེན་པོ་ཞིག་སྐྱེ་ཡོང་བ་འདི་ངོ་མ་ངོ་མཚར། སྒོར་མོ་གཅིག་སྨོན་ལམ་དང་ཚོགས་གསོག་ལ་གཏོང་རྒྱུ་དང་ཕར་ཙམ་ཞོག དད་ལྡན་པ་གཏོང་ཕོད་ཅན་གྱི་གཏོང་བ་ལ་ཡང་དོན་མེད་ཁོ་ན་ཉིད་དུ་བསམ་ནས་འཇུར་གེག་ཆེན་པོའི་སེམས་ཁུར་དེ་ཙམ་གཏན་ནས་བྱེད་མི་དགོས་པར་སེམས། སྨོན་ལམ་རྒྱལ་པོ་འདི་དག་མཆོག་གི་གཙོ། །མཐའ་ཡས་འགྲོ་བ་ཀུན་ལ་ཕན་བྱེད་ཅིང། །ཀུན་ཏུ་བཟང་པོ་བརྒྱན་པའི་གཞུང་གྲུབ་ནས། །ངན་སོང་གནས་རྣམས་མ་ལུས་སྟོང་པར་ཤོག ཞེས་པ་ལ་ཁྱོད་རང་ནས་ཀྱང་འདི་ལ་ཐུགས་བསམ་ཡག་པོ་ཞིག་བཞེས་ནས་ཁུ་སིམ་མེར་བཞུགས་སྡོད་ན་མི་དགའམ། འབྲི་གུང་སྐྱབས་པ་རིན་པོ་ཆེས། ཚོགས་གཉིས་ཡིད་བཞིན་ནོར་བུ་ལ། །སྨོན་ལམ་གྱི་བྱི་དོར་མ་བྱས་ན། །དགོས་འདོད་ཀྱི་ཆར་རྒྱུན་མི་འབབ་པས། །འཇུག་བསྔོ་བ་འདི་ལ་ནན་ཏན་མཛོད། གསུང་པ་འདི་དགོས་པ་དང་རྒྱུ་མཚན་ཆེན་པོ་ཞིག་ཡོད་ནས་གསུང་པ་ཡིན་གྱི། དེ་འདྲ་མ་ཡིན་པར་ (རྗེ་ཙོང་ཁ་པ་ལ་བརྟེན་ནས་ལྷ་སར་སྨོན་ལམ་ཆེན་མོ་ཞེས་པ་དེ་ཚུགས་པ་རེད། ཐོག་མར་སྦྱིན་བདག་སོགས་མ་བསྐུལ་དང་བླང་ཡིན་རུང་། ཕྱིས་སུ་སྨོན་ལམ་གྱི་འགྲོ་གྲོན་གཏོང་སྒོ་ཁྲལ་འུལ་དུ་གྱུར་ཡོད། དེ་ནི་གནའ་གཏམ་ལ། བསྐལ་བ་བཟང་པོའི་ཇ་འདྲེན་དེ། །དུས་ཚོས་ངན་པའི་ཁྲལ་དུ་གྱུར།) ལབ་པ་འདི་དག་ནི་ཞྭ་དཔེ་ལྷམ་བསྐོར་ལས་དེང་གི་དུས་ཀྱི་སྨོན་ལམ་ནི་དེ་དང་མི་འདྲ་བའི་ལས་ཀའི་འདུ་འགོད་བླ་གྲྭ་རྣམས་ཀྱི་ཐུགས་བཞད། དཔལ་འབྱོར་གྱི་འདུ་འགོད་བྱེད་སྟང་སོ་སོ་ཡིན་པ་ཤེས་པར་གྱིས་ཤིག

གཅེན་པོ་ལགས། སྨོན་ལམ་ཚོགས་སའི་ས་ཕྱོགས་དེ་ཚོ་དེ་ག་རང་མ་རེད། ༸དཔལ་ལྡན་ས་སྐྱ་པའི་སྨོན་ལམ་ཆེན་མོ་ལུམྦྷི་ནིར་ཚོགས་ཀྱི་ཡོད་པ་མ་ཟད། ཉེ་སྔོན་ཞིག་ཏུ་༸དཔལ་ས་སྐྱ་པའི་གནད་ཡོད་མི་སྣ་དག་གི་ཚོགས་འདུ་ཞིག་ཏུ་སྨོན་ལམ་རྡོ་རྗེ་གདན་དུ་ཚོགས་རྒྱུའི་གྲོས་གཞི་ཞིག་བཏོན་ཡོད་འདུག་ཀྱང་གྲོས་འཆམ་བྱུང་མེད་པ་རེད། འགྲོ་མགོན་༸བཀའ་བརྒྱུད་པའི་སྨོན་ལམ་ཡང་༸དཔལ་རྒྱལ་དབང་ཀརྨ་པའི་ཡང་སྤྲུལ་གཉིས་ཀས་གནས་མཆོག་རྡོ་རྗེ་གདན་དུ་ཚོགས་བཞིིན་ཡོད་དོ།།

གཅེན་པོ་ལགས་ཀྱི་བསམ་ཚུལ་ལ་བསམ་གཞིག་བྱ་དགོས་པ་འདུག་ལ། འོལ་ཚོད་དང་ནོར་བ་ཡང་འདུག སྨོན་ལམ་དུ་འགྲོ་མཁན་གྱི་གྲྭ་བཙུན་གྱི་ནང་བསམ་པའི་ཀུན་སློང་རྣམ་དག་མ་ཡིན་པར་བཤད་པ་ནི་འོལ་ཚོད་རང་རེད། ལུམ་བཱི་ནིར་བཀའ་བརྒྱུད་སྨོན་ལམ་ཆེན་མོ། ཝ་རཱ་ན་སིར་ས་སྐྱའི་སྨོན་ལམ་ཆེན་མོ། ཞེས་པ་ནི་ནོར་བ་རེད། བཀའ་བརྒྱུད་སྨོན་ལམ་ཆེན་མོ་རྡོ་རྗེ་གདན་དུ་ཚོགས་ཀྱི་ཡོད་ལ་ས་སྐྱའི་སྨོན་ལམ་ཆེན་མོ་ལུམྦྷི་ནིར་ཚོགས་ཀྱི་ཡོད། བསམ་ཚུལ་འདོན་པའི་རང་དབང་ཚང་མར་འདྲ་མཉམ་ཡོད་ཀྱང་ལག་ཏུ་སྨྱུ་གུ་ཐོག་པ་ཞིག་གི་ངོས་ནས་རང་ཉིད་སྤྱི་ཚོགས་ཀྱི་མདུན་དུ་འགྲེང་བསྡད་ཡོད་པའི་འདུ་ཤེས་དེ་མ་བརྗེད་པར་སྤྱི་ཚོགས་དང་དོན་དངོས་ཀྱི་འགན་འཁུར་ཡོད་ཙམ་བྱས་ན་རང་གཞན་ཚང་མར་ཕན་པ་ཆེ་བའི་བསྐུལ་མ་བྱ་འདོད་བྱུང་ངོ།།

༼སྨོན་ལམ་ཚོགས་རྒྱུ་ལ་དགའ་བའི་ང་ཚོ་༽ཞེས་པ་འདི་ངོ་མ་ཡག་པོ་བྲིས་འདུག་མཁས་དབང་ཞིག་གིས་གསུང་རང་རེད་བཞག

སྤྱིར་སྨོན་པ་དང་འཇུག་པ་ཞེས་ནང་གཞུང་དག་གི་ནང་དུ་གསུངས་པ་ལ་གཞིག་ན། དང་པོ་སྨོན་པ་ཞིག་མེད་ན་རྗེས་ཀྱི་འཇུག་པ་ནི་འབྱུང་ཐུབ་ཀྱི་མེད་ལ། སྨོན་པ་དེ་མི་འགྱུར་བ་འཇུག་པ་ལ་དངོས་སུ་ཁེལ་དགོས་པ་ཡིན་སྟབས། སྟོན་པ་སངས་རྒྱས་ཀྱི་མཛད་པ་བསྐྱང་སའི་གནས་མཆོག་ཁྱད་པར་ཅན་འདི་ཚོ་ལ་སྨོན་ལམ་ལོ་ལྟར་འཚོག་པ་འདིའི་གྲུབ་འབྲས་ཆེན་པོ་ཡོད་པ་ནི་མིག་མཐོང་ལག་ཟིན་ལ་འདི་བསྐོར་མ་མཐོང་བ་དག་གི་བསམ་ཚུལ་སྤེལ་བ་རྣམས་ལ་ཅུང་ཙམ་གླེང་ཉན་སྤྲོ། ཅན་པོ་ལགས་ཀྱིས་ཟིན་བྲིས་དངོས་གནས་ཡག་པོ་འདུག་ཀྱང་། ཐལ་ཆ་ཤིན་ཏུ་ཆེ་དྲག་འདུག་སྙམས། གང་ཡིན་ཞུ་ན། ངེང་གི་དུས་སུ་རང་རེ་བོད་གངས་ཅན་པའི་ཆོས་བརྒྱུད་འདི་ནི་འཛམ་གླིང་གོ་ལ་ཧྲིལ་པོའི་ནང་ནང་པའི་ཆོས་བརྒྱུད་ཀྱི་སྒང་ལ་ལྷང་ངེར་བུད་པ་འདི་ནི་སྨོན་ལམ་གྱི་ཚོགས་བསགས་དང་བདེན་པའི་དངོས་སྟོབས་ལས་བྱུང་བ་ཞིག་ལས་སྟེས་དབང་གི་བྱུང་བ་ཞིག་གཏན་ནས་མ་རེད་སྙམས། བོད་ཀྱི་ཆོས་བརྒྱུད་ཡོད་དོ་ཅོག་གི་རང་ས་རང་སའི་སྨོན་ལམ་འཚོག་པའི་སྐབས་སུ་དགེ་འདུན་པའི་ཞལ་ལག་གི་འགྲོ་སོང་ཅུང་ཙམ་བཏང་བ་དེ་ཚོ་ཆོས་བརྒྱུད་དེས་འགྲོ་བ་ཡོང་ལ་སྨན་པའི་འདུ་ཤེས་མེད་པར་སྐད་གྲགས་ཅིག་པུའི་དོན་དང་། བསམ་རྒྱུ་དྲན་རྒྱུ་མེད་པར་ཁྲལ་སོད་དང་། འདོན་རྟ་གཅིག་པུའི་ཁ་གཡང་ཁོ་ན་ཡིན་པར་སེམས་པ་ནི་ཁྱོད་རང་ཉིད་ཀྱི་མཐོང་ཚུལ་འདི་གསར་འགོད་ཀྱི་ནང་དུ་སྤེལ་ཐུབ་པའི་སྙིང་སྟོབས་ནི་ངོ་མ་ཡ་མཚན་ཆེ། བདུད་ལྷས་སྦྱིན་སྣང་བ་མ་དག་ན། ལྷ་ཐུབ་པ་སྐྱོན་གྱི་རང་བཞིན་ཟེར་བ་བཞིན། སྔོན་དམར་མེས་མའོ་རྩེ་ཏུང་གི་བསམ་བློ་དང་ཁྱོད་ཀྱི་དོན་ངོ་མའི་དྲན་པ་གཉིས་བཤད་བཟོ་ཡག་སྡུག་ཙམ་ལས། ཁྱད་པར་དེ་ཙམ་མེད་པར་སེམས། ཁྱོད་ཀྱིས། (ཚོགས་མི་གྲྭ་བཙུན་དེ་རྣམས་ནི་སྐུ་འགྱེད་ཀྱི་ཆེད་དུ་རེད་ལ། སྦྱིན་བདག་ནི་སྨོན་ལམ་དེ་དང་དེ་ཡི་སྦྱིན་བདག་རེད་ཅེས་པའི་མིང་གྲགས་ཀྱི་ཆེད་དུ་རེད།) ད་དུང་། (དམིགས་ཡུལ་དངོས་ནི་རང་གི་གྲུབ་མཐའི་མིང་གི་སྟོབས་ཤུགས་ངོམ་རྒྱུའི་ཆེད་དུ་རེད། རྨོངས་པ་ཚོས་ད་དུང་འདི་དག་ལ་ནང་ཆོས་སུ་བརྩི་བ་འདི་སྙིང་རེ་རྗེ།)ཞེས་པ་སོགས་ནི། མའོས་ཀྱང་བོད་ཀྱི་དགོན་པ་ནང་དུ་བླ་མའི་རོ་ལ་གསེར་གདུང་དང་། འདུ་ཁང་གི་ཡང་སྟེང་དུ་གསེར་ཡབ། གསེར་སྐུ། གསེར་ཏོག གསེར་དངུལ་གྱི་མཆོད་ཆས་འདི་ཚོ་མི་སེར་བཤུ་ཞོག་ཁོ་ན་དང་མགོ་བསྐོར། མཐའ་ན་ལས་ཀ་གཅིག་ཀྱང་བྱ་མི་དགོས་པའི་བོད་བླ་རྒྱག་པ། སྤྲུལ་སྐུ་རྒྱག་པ། དགོན་པ་རྫིགས་པོ་འདི་ཚོ་ནི་དོན་མེད་ཀྱི་ཆེ་མཐོང་དང་མི་མང་ལ་ཕན་པའི་བྱ་བ་གཏན་ནས་མ་རེད། དོན་མེད་ཀྱི་བརྩི་བསྐུར་དང་རྨོང་དད་འཇིགས་བསྐུལ་ཁོ་ན་རེད་ཞེས་སྔོན་མར་མི་མང་གསར་རྗེ་ནང་ཟེར་སྲོལ་ཡོད་རེད་པ་མཁྱེན་གསལ་ལ་ཁྱེད་ཀྱི་ཐུགས་འཆར་དང་སྒོ་ཀུན་ནས་འདྲ་པོ་འདུག ཚོགས་ངོ་མ་བསགས་པ་དེང་གི་ཆོས་བརྒྱུད་རྣམས་ཀྱི་སྨོན་ལམ་ཆེན་མོའི་འགྲོ་སོང་ནི་ཆེན་པོ་གཏན་ནས་མ་རེད་སྙམས། དེང་སང་འཛམ་གླིང་ཁྱོན་ཡོངས་ཀྱི་དཔལ་འབྱོར་གྱི་འགྲོ་རྒྱུག་ལ་བལྟ་ན། དང་པོ་སྨོན་ལམ་གྱི་འགྲོ་སོང་ཙམ་ལྟ་ཞོག བོད་ཀྱི་དགོན་པ་ཆེ་ཤོས་ཞིག་གི་ཕྱི་ནང་ཡོངས་ཀྱི་འགྲོ་སོང་དང་། དམག་གི་སྦྱང་རྩལ་བྱེད་སའི་གནམ་གྲུ་གཅིག་དང་ཆ་བསྡུར་ན། བརྒྱ་ཆ་གཅིག་ཀྱང་ཟིན་གྱི་མེད། དེ་འདྲ་ཡིན་དུས་སྨོན་ལམ་གྱི་སྐབས་སུ་འགྲོ་གྲོན་ནི་དེ་ནང་གི་གྲངས་ཆུང་ཞིག་ཀྱང་ཟིན་གྱི་མེད་པ་དེ་འདྲ་འགྲོ་གྲོན་ཞིག་གི་སྟོན་པ་བཀའ་དྲིན་ཅན་ཞི་བའི་དད་དཔོན་ཆེན་པོ་གང་གི་གསུང་དྲི་མ་མེད་པ་གནས་ཁྱད་པར་ཅན་དེ་ཚོར་འདོན་ཀློག་བྱེད་ཐུབ་པ་ནི་ཆེས་ངོ་མཚར་ཆེ་བ་དང་། ཆེས་དོན་སྙིང་ལྡན་པ་ཞིག་ཅིའི་ཕྱིར་མིན། སྨོན་ལམ་ནི་བོད་ཀྱི་བླ་མས་བཟོས་པ་མ་ཡིན་པར། ནང་པའི་སྟོན་པ་འདི་ཉིད་ཀྱིས་ཀྱང་སྨོན་ལམ་ཆེན་པོ་ལྔ་བརྒྱ་བཏབ་ནས་སྙིགས་མའི་མགོན་དུ་ད་ལྟའི་སངས་རྒྱས་སུ་ཕེབས་པར་གསུངས་ཡོད་པ་དང་། དང་པོ་ཐར་པ་ལ་འཇུག་པའི་སྒོ་ངོ་མ་དེ་སྨོན་ལམ་ལས་ལོགས་སུ་གྱུར་པའི་ཐབས་གཉིས་པ་ཞིག་རྩ་བ་ཉིད་ནས་མེད། སེམས་ཅན་ལ་མོས་པ་སྣ་ཚོགས་ཞིག་ཡོད་པ་ཡིན་ཙང་། ཁ་ཤས་པད་ཤག་གི་དོན་དུ་ཕེབས་པ་ཡིན་ན་ཡང་ཉི་མ་རྟག་པར་དངུལ་གཅིག་པུ་མི་བསམ་པར་མཚམས་མཚམས་སུ་ཡང་དག་པའི་སྨོན་ལམ་འདེབས་ཀྱི་མེད་པ་སུས་ཀྱང་ཁ་ཚོན་གཅོད་མི་ཐུབ་སྙམས། སྨོན་ལམ་འདི་དེ་འདྲ་དགོས་པ་དང་རྒྱུ་མཚན་ཆེན་པོ་ཞིག་གི་སྐོང་འཚོགས་བྱེད་པ་ལ་འདི་ཕྱི་ཀུན་ཏུ་དོན་ཆེན་པོ་སྒྲུབ་པའི་ལམ་ཁ་མཐོང་ཐོས་དད་གསུམ་གྱིས་སྒོ་ནས་སུས་སྦྱིན་བདག་བྱེད་ཐུབ་པ་ལ་ཡི་རང་མེད་པར། མིང་དང་སྐད་གྲགས་བླུན་དད་ཁོ་ནས་གལ་སྲིད་སྒྲུབ་པ་ཡིན་པར་བསམ་ན། སྐད་གྲགས་དང་མིང་སྒྲུབ་སའི་སྟེགས་དེ་ནང་པ་སངས་རྒྱས་པ་ཕྱི་མ་དོན་དུ་གཉེར་བ་པོའི་ནང་དུ་གཏན་ནས་མེད་པར་སེམས། གྲགས་པ་གལ་སྲིད་སྒྲུབ་བསམ་ན་དེང་གི་དུས་སུ་དར་སྲོལ་ཆེ་ལ་མི་ཀུན་དགའ་མོས་བྱེད་ས། རྐང་རྩེད་པོ་ལུ། རྡོ་འབེན་དབྱུག་རྩེད་སོགས་ཀྱི་རིགས་བསམ་གྱིས་མི་ཁྱབ་པ་ཡོད་པ་ཤེས་ཤེས་གསལ་གསལ་དེ་ཚོ་ཡིན་པ་ལས་འདི་དང་འབྲེལ་བ་དེ་ཙམ་མེད་པར་སེམས། བོད་ཀྱི་སྲོག་ངོ་མ་ཤེས་ཡོན་དག་ནི་དེང་གི་དུས་སུ་དགོན་པ་ཁོ་ན་ལས། ཡོན་ཏན་ལ་ཕུ་ཐག་ཆོད་པ་གཞན་དུ་མེད་པ་གསལ་ཐིང་ཐིང་འདི་དག་ནི། སེར་མོ་བ་རྣམས་ཀྱི་སྡུག་དཀའ་ལས་ངལ་བ་འགྲོ་སོང་བཏང་ནས་བྱུང་བ་ཞིག་ལས་ཟ་ཉལ་ཁོ་ནས་མི་འབྱུང་བ་ཀུན་གྱིས་མཁྱེན་གསལ་ལ་གུས་པས་རྒྱས་བཤད་བྱེད་ཉན་མི་སྤྲོ། ཁྱོད་ཀྱིས། (ཀྱེ་མ་སངས་རྒྱས་ཀྱི་བསྟན་པ་དེ་འདུ་ལོང་ཁོ་ན་ལ་རེ། བསྟན་འགྲོའི་བྱ་བ་དེ་སྨོན་ལམ་ཁོ་ན་ལ་རེ། བོད་མི་རིགས་ཀྱི་ཕུགས་བསམ་དེ་སྨོན་ལམ་ཁོ་ན་ལ་རེ། རང་གཞན་འདི་ཕྱིའི་ལས་དོན་དེ་གསོལ་འདེབས་ཁོ་ན་ལ་རེ། དེ་ནི་དོན་དངོས་ལ་ཁ་གཏད་གཅོག་པ་དང་འགལ་བའི་བྱ་བ་ཐབས་སྐྱོ་བོ་ཞིག་རེད།) ཞེས་པ་འདི་ཚོ་ནི་མི་འདོད་པའི་ཞེ་འཁོན་སྐྱུར་མོ་ཁོག་ཏུ་ཉར་ནས་སེར་མོ་བ་ཡོངས་ལ་སྙད་བཙུག་པའི་ཚིག་ཁོ་ན་ཞིག་ཏུ་འདུག་པས། སེར་མོ་བས་བོད་དོན་བསམ་པ་བཞིན་བྱོས་དང་། མཐའ་དོན་ཁྱོད་ཀྱིས་སྨོན་ལམ་ལ་ཁ་གཡར་ནས་འགྲོ་གྲོན་ཚང་མ་ཕྲོ་བརླག་བསམ་པའི་ཞེ་འདོད་དེ་འདྲ་མི་འདོན་པར། བསམ་ཚུལ་དང་གནས་ཚུལ་སྤེལ་སྐབས་སུ་སྐྱ་སེར་བོད་མི་ཡོད་དོ་ཅོག་ཞེ་མི་ཁྲེལ་བར་རང་གཞན་ཕན་ཚུན་དཀྲུག་ཤིང་གི་རྒྱུ་མི་འགྲོ་བ་ཞིག་དགོས་ཀྱི་དྲན་ཚད་བཀོད་ཆེ་ན་བོད་མིའི་སྤྱི་ཚོགས་ལ་མི་ཕན་ཁར། ༧གོང་ས་ཡིད་བཞིན་ནོར་བུ་གཙོས་པའི་རིས་མེད་བསྟན་པ་འཛིན་པའི་སྐྱེས་བུ་གང་ན་སུ་བཞུགས་པ་རྣམས་ཐུགས་ཁྲེལ་བ་མ་ཚད་རང་ངན་སོང་མུ་མཐའ་མེད་པའི་གནས་སུ། དོན་མེད་པར། མི་ཨི་དགའ། རང་གཅེར་རྒྱུག་བྱེད་པའི་སྡིག་ཆེན་པོ་གསོག་པ་ཡིན་པས་འདི་རིགས་ལ་དོག་མི་བཅུག་པར་ཀུན་གྱིས་ཡི་རང་དང་གཟབ་རོག་གནང་ཞེས་འབོད་བསྐུལ་ཞུ་གི་ཡོད།