དམ་འབུལ་ཐོབ་སྐར་གོར་ཐིག་རེད།

འདྲེ་མགོ་རྡོ།

དེ་རིང་སང་ཉིན་སྐད་ཆ་གསར་བ་ཞིག་ཡོད་པ་ནི། འབུམ་རམས་པ་བློ་བཟང་སེང་གེས་དམ་འབུལ་དུས་ཚེས་སྐོར་རེད། སྐུ་ཞབས་བློ་སེང་དེང་དུས་ཤེས་ཡོན་གྱི་གནས་ཚད་མཐོ་བོ་ཡིན་པ་དང་། ཡུལ་ལུང་འདྲ་མིན་གྱི་ཆབ་སྲིད་ལ་རྒྱུས་མངའ་ཡོད་སྟབས། ཁོང་གིས་མ་འདྲ་བ་ཞིག་གནང་གི་རེད་ཟེར་མཁན་དག་ནི། ཕལ་ཆེར་ཁོང་གིས་བདམས་པའི་དམ་འབུལ་དུས་ཚེས་ལ་མོས་མཐུན་ཡོད་ཀྱི་རེད། དེ་ནི་ཁོ་པ་དག་གིས་གནང་སྟངས་དེའང་དེང་དུས་དང་མཐུན་ལ། རྒྱལ་སྤྱིའི་ཆབ་སྲིད་ཀྱི་འགྲོས་དང་མཐུན་པར་རྨོངས་དད་བྱེད་པ་དེ་རེད། འདིའི་དོན་དངོས་ཀྱང་ཉིན་ཁ་ཤས་རྗེས་སུ་མངོན་འགྱུར་བྱ་རྒྱུ་རེད།

ཡིན་ནའང་། ང་ཚོས་བསམ་བློ་ནན་ཏན་དང་གཟབ་ནན་གྱིས་གཏོང་ལོས་དགོས་ཏེ། ༧གོང་ས་མཆོག་གིས་ཆབ་སྲིད་ནང་ཐུགས་འགན་བཞེས་ཀྱི་མེད་པས། ཁོང་གིས་གནད་དོན་བཟང་ངན་གང་ལྷག་སྐབས་སུའང་དགོངས་འཆར་དང་ལམ་སྟོན་བྱ་རྒྱུ་ཁག་པོ་ཡིན་སྟབས། རང་རེ་བ་རྣམས་ལ་ནི། ད་གཟོད་མིག་བཙུམ་ནས་གཉིད་ཁུག་ནས་ཡིད་ཆེས་བྱ་ཆོག་པའི་གནས་སྟངས་མེད་པ་གསལ་བོ་རེད། ད་ནས་བཟུང་གནང་སྟངས་གང་ལའང་༧གོང་ས་མཆོག་གི་དགོངས་པ་ཟེར་བའི་ཚིག་ཡ་མེད་འདིའང་མེད་སྟབས། ང་ཚོས་བློ་སེང་ལ་དོགས་འདྲི་བྱེད་རྒྱུ་རྒྱུ་མཚན་ཡོད་ན་ཧ་ཅང་ལས་སླ་བོ་རེད།

འོ་ན། ང་ཚོས་ཁོང་གི་༼ པཱ་ཅུག ༽ སྐོར་ལ་དོགས་སློང་ཅུང་ཙམ་བྱས་ན། ཁོང་གིས་བཤད་ན། པཱ་ནི་རྒྱུ་འབྱོར་ལ་དམིགས་པ་དང་། ཅུག་ནི་ཚེ་རིང་པོའི་མཚོན་དོན་ཡིན་པས་དེ་ལྟར་ཐག་གིས་བཅད་པ་ཡིན་ཟེར། སྐབས་འདིར་ང་ཚོའི་མི་ལ་ལས་པཱ་དང་ཅུག་གི་ནང་དོན་ལ་འགྲེལ་བཤད་ཀྱིས་ཁོང་གི་གནང་སྟངས་དེ་འགྲིག་ཡོད་མེད་ཟེར་མདོག་ཁ་བོ་རེད་དེ། དེ་ནི་རིག་པ་རྣལ་དུ་གནས་མཁན་ཞིག་ཡིན་ན། བོད་ཀྱི་སྲིད་སྐྱོང་པའི་དམ་འབུལ་དུས་ཚེས་རྒྱ་ནག་གི་ཡི་གེའི་ནང་དོན་དང་བསྟུན་པ། རྒྱ་མིའི་བསམ་ཕྱོགས་དང་བསྟུན་པ་བཅས་ནི་རིགས་ཞེན་དང་རུས་པ། ལ་རྒྱ་ཟེར་བའི་ངོས་ནས་བཤད་ན་རྦད་དེ་ཐོབ་སྐར་ཀླད་ཀོར་རང་རེད།

དེང་སང་འཛམ་གླིང་ནང་མི་རིགས་ཟེར་བ་འདི་རིག་གནས་ཀྱི་ངོས་ནས་འཇོག་རྒྱུའི་བདེན་མཐའ་སེལ་བཞིན་པ་རེད་ལ། རིག་གནས་གཅིག་པས་ད་གཟོད་མི་རིགས་གཅིག་གི་འདུ་ཤེས་དང་ཞེན་ཁོག་སླེབས་ཀྱི་ཡོད་པ་རེད། བོད་ཀྱི་བསམ་པའི་ཁྱེར་སོ་གཅིག་པུའི་ངོས་ནས་བལྟས་ཀྱང་། རྒྱ་ནག་དང་བསྡུར་ཐབས་ནམ་ཡང་མེད་ལ། རང་གི་མི་རིགས་ཀྱི་ལོ་རྒྱུས་དང་ཤེས་རིག་དར་རྒུད་མཚོན་ཐབས་བཅས་ཀྱི་དུས་ཆེན་རྣམས་ཀྱང་བོད་མི་རང་གི་བློ་གྲོས་ལས་བྱུང་བ་མ་གཏོགས། རྒྱ་མིས་བཞེད་ཕྱོགས་ལྟར་ད་བར་སུ་གང་གིས་གཏན་འབེབས་དང་ཐག་གཅོད་བྱས་མྱོང་མེད།

ཕྱོགས་འདི་ནས་བལྟས་ཚེ། བོད་ཀྱི་དམངས་གཙོའི་སྲིད་སྐྱོང་པ་ཁྲི་རབས་དང་པོ་འདི། བོད་ཀྱི་རིག་གནས་དང་སེམས་ཁམས་ལ་རྦད་དེ་ཀླད་ཀོར་ཡིན་པ་ནི་གསལ་བོ་ཆགས་བཞིན་པ་རེད་ལ། གལ་སྲིད་བོད་ནང་ནས་ཁོང་གི་གནང་ཕྱོགས་འདི་གསན་པ་ཡིན་ན། རང་སྲོག་དམར་པོ་བློས་བཏང་ཟིན་པ་དག་གིས་ཀྱང་གཤེགས་ཡུལ་ནས་གནས་སྟངས་འདི་ལ་དགོངས་པ་ཡིན་ན། བོད་ཀྱི་མི་རབས་གསར་བ་ཟེར་བའི་ཤེད་དང་དཔུང་ཤུགས་ཅན་གྱི་ཤེས་ཡོན་པའི་སྡེས་གནས་སྟངས་འདི་གསན་པ་ཡིན་ན། ཉེ་ཆར་བློ་སེང་གིས་ཁ་ནས་མང་པོ་བགྲངས་བའི་ཀིརྟི་དང་དཀར་མཛེས་ཡུལ་ནས་གནས་སྟངས་འདི་གསན་པ་ཡིན་ན། ཁོང་ལ་འཚམས་འདྲི་ཞུ་མཁན་དང་། ཤོག་སྦག་སྦར་མཁན་དག་གིས་མི་རབས་གསར་བའི་འབུམ་རམས་པས་ཁོང་གི་དམ་འབུལ་ཟླ་ཚེས་རྒྱ་མིའི་བཞེད་ཕྱོགས་ལྟར་གཏན་འབེབས་བྱས་ཚུལ་ཐོས་ན། ད་གཟོད། ཁོང་ཚོས་རང་དང་སྐུ་ཞབས་བློ་སེང་ལ་བར་ཐག་ཅི་ཙམ་ཡོད་པའི་བསམ་བློ་གཏོང་ངེས་པས། འདི་ནི་ཁོང་གིས་མ་མཐར་བོད་དང་བོད་མིར་རྒྱུས་མངའ་ཅི་ཙམ་བྱས་ཡོད་མེད་ཀྱི་ཚད་ཤིང་ཞིག་ཀྱང་རེད།

བོད་ལ་བྱས་རྗེས་བཞག་པའི་ཉིན་མོ་ཡོད་ལ། རྒྱལ་ཁབ་འཕྲོགས་པའི་ཉིན་མོའང་ཡོད། དེ་བཞིན་དགའ་སྐྱོའི་ཉིན་མོ་མང་པོ་ཡོད་པ་ནས། གལ་སྲིད་བློ་སེང་གིས་གཅིག་བདམས་ན། གལ་སྲིད་ཟླ་བ་བརྒྱད་པ་གཡས་གཡོན་ལ་དུས་ཚེས་རླབས་ཆེན་ཞིག་དགོས་ན། རང་སྲོག་བློས་གཏོང་བྱས་པའི་ཆབ་སྲིད་བཙོན་པའི་སྒྲིག་འཛུགས་ཀྱི་དགུ་བཅུ་གསུམ་ཚུགས་པའི་ཉིན་མོར། ཞེ་འཁོན་དང་། ན་ཟུག རྣམ་དཔྱོད་དང་བཅས་ཏེ་དམ་འབུལ་ཞུས་ན་གང་ལ་མི་འགྲིག་གམ། གང་དུ་ནོར་འཛོལ་འབྱུང་ངེས་སམ། སུས་ལོ་རྒྱུས་ལ་ནག་ཐིག་བབས་སོང་ཞེས་སྐད་ཅོར་རྒྱག་གི་རེད་དམ། རྩ་བ་ནས་མ་རེད།