ང་རང་རྗོ་སུ་ལམ་དུ་འབྱོར་དུས་སུ་མོ་རང་ང་བསུ་བར་ཨ་མའི་རླངས་འཁོར་བཏང་ནས་འབྱོར་བ་མ་ཟད། ང་རང་ལ་ཟ་མ་ཕྱི་རྒྱལ་བའི་བག་ལེབ་སྟེང་དུ་ཕྱུ་ར་དང་སྔོ་ཚལ་ཡོད་པ་ཞིག་འཁུར་འདུག་པ་དེ་ང་རང་ལ་ཁོ་མོའི་ལག་གཉིས་ཀྱིས་སྐྱོར་ནས་སྤྲད་སོང་། ངེད་གཉིས་དེ་ནས་ཁོ་མོའི་ཕ་མ་གཉིས་གློག་བརྙན་བལྟ་རུ་བྱིན་འདུག་པ་དེ་བསུ་རུ་སོང་དེ་འཆིག་ཇ་འཐུང་ས་ནས་ང་རང་གི་དྲ་རྒྱ་བསྔོགས་ཞོར་དུ་བསྒུག་ནས་བསྡད་པ་ཡིན། གློག་བརྙན་ཚར་ནས་གངས་མཚོའི་ཕ་མ་གཉིས་དང་ང་ཚོ་བཞིའི་འཚིག་ཇ་འཐུང་ས་ནས་ཅུང་ཙམ་རིང་དུ་ཁ་བརྡ་བྱས། ཡུན་རིང་བོར་བཤད་མ་ཐུབ་པའི་མོ་རང་ལ་ཕྲུ་གུ་ཆགས་ཡོད་པའི་སྐོར་དེ་མོ་རང་གི་ཕ་རྒན་ལ་རེས་ལ་བཤད་དུས། ཁོ་མོའི་ཕ་རྒན་གྱི་ངོ་གདོང་ཅུང་ཙམ་སྐྱ་བོར་གྱུར་བ་ལས་བཟང་ངན་གྱི་སྐད་ཆ་གང་ཡང་བཤད་ཀྱི་མི་འདུག་པར་རེ་ཞིག་བསྡད་སྐབས་དེར། མོ་རང་ཡར་བླངས་དེ་བུད་སོང་། སྐབས་དེར་ཨ་མས་ཕ་རྒན་ལ་ཁྱེད་རང་གིས་རྟེན་འབྲེལ་མི་ཞུ་སྲོལ་ག་ལ་ཡོད། མོ་རང་ཁོང་ཁྲོ་བླངས་དེ་བུད་སོང་། ཁྱོད་སོང་ནས་སེམས་གསོ་ཞིག་བྱས་ན་མ་རེད་དམ་ཟེར། ང་རང་ཡང་ཁོ་གཉིས་ཀྱི་རྗེས་སུ་སོང་བ་ཡིན། མོ་རང་སྤྱོད་ཁང་དུ་བྱིན་འདུག་སྟབས། ང་ཚོས་སྤྱོད་ཁང་གི་ཕྱི་ལོག་ནས་ཁོ་མོ་སྒོ་རུ་ཡོང་རྒྱུར་སྒུག་ནས་བསྡད་པ་ཡིན།
ཕ་རྒན་གྱིས་གཅེས་ཕྲུག་མ། ཁྱེད་རང་ལ་རྟེན་འབྲེལ་ཞུ། ང་ཁྱེད་རང་ལ་བརྩེ་བ་ཡོད་ཟེར་ནས་གངས་མཚོས་ཕ་རྒན་གྱིས་གངས་མཚོའི་མགོ་ལ་ལག་པས་ཕྱིད་ཕྱིད་གཏོང་ཞོར་དུ་བཤད་དུས། གངས་མཚོ་མོ་རང་གིས་གདོང་ལ་ཡང་འཛུམ་གྱིས་འཁང་སོང་བ་དང་བསྟུན་ངེད་ཅག་ཚང་མ་གློག་བརྙན་ཁང་དེའི་སྒོའི་ཕྱི་ལ་འབུད། གངས་མཚོའི་ཕ་མ་གཉིས་ནི་ལོ་ངོ་ཁ་ཤས་ཀྱི་སྔོན་ནས་བཟུང་རང་རང་གི་ས་ནས་བསྡད་ཡོད་པ་རེད། དེའི་སྟབས་ཀྱི་གངས་མཚོའི་ཕ་རྒན་གྱིས་ང་ཚོ་ལ་བདེ་མོ་འཇོག་ཞོར་དུ། ང་རང་ལ་རྡོ་རྗེ་ཁྱེད་རང་ལ་རྟེན་འབྲེལ་ཞུ་ཟེར་ཞོར་དུ་འབུད་སོང་། ང་རང་གིས་ཚོར་བ་ལྟར་བཤད་པ་ཡིན་ན་གངས་མཚོའི་ཕ་རྒན་གྱིས་སེམས་ནང་དུ་མོ་རང་ལ་བྱིས་པ་ཆགས་ཡོད་ཅེས་བཤད་མ་ཐགབཟང་ངན་གང་ཡང་མི་བཤད་པའི་རྒྱུ་མཚན་གཉིས་འདུག གཅིག་ནི་མོ་རང་གི་བཟའ་སྟོན་མ་བྱས་པར་བྱིས་པ་འཁོར་ཡོད་པ་དེ་ལ་སེམས་འཁྲལ་བྱས་པ་ཡིན་སྲིད་པ་དང་གཉིས་ནི་ང་རང་བོད་རིགས་ཤིག་ལས་ཁོང་ཚོས་མི་རིགས་རྗོ་ཤུ་མིན་པ་གཉིས་ཀྱི་གནད་དོན་ལས་ཡིན་རྒྱུ་རེད།གང་ཡིན་ཟེར་ན་ནང་མིའི་ནང་ནས་རྗོ་ཤུ་ཆོས་ལུགས་པའི་ལམ་སྲོལ་གྱི་ཆོས་ལུགས་པའི་བྱེད་སྒོ་ཁག་ལ་བརྩི་བཀུར་བྱེད་མཁན་གྱི་མི་ཞིག་ཡོད་པ་ཁོ་རང་གཅིག་བུ་ཆགས་ཡོད་པས་ཡིན་མི་སྲིད་པ་མ་རེད་སྙམ་སོང་། ང་ཚོ་གསུམ་རླངས་འཁོར་དུ་འབུད་དེ་གངས་མཚོའི་ཨ་མའི་ཁྱིམ་དུ་འབྱོར་ནས་ང་རང་གི་བོད་རིགས་གྲོགས་པོ་བཟའ་ཚང་ཆ་གསུམ་ལ་གངས་མཚོས་ང་རང་ལ་བསམ་བློ་བཏང་ནས་མགྲོན་འབོད་བྱས་ཡོད་པ་དེ་དག་ལ་ང་རང་གི་བོད་ཟས་དང་རྒྱ་ཟས་གསར་བ་ང་རང་གི་སྤྱངས་པའི་ཐེ་ལན་གྲི་ཁ་ལག་བཟོས་པ་ཡིན།
ང་ཚོ་འཛོམ་ནས་ཕན་ཚུན་ལ་ལབ་གླེང་མང་བོ་ཞིག་བྱུང་བའི་ནང་གི་དོན་དག་སྙིང་བོ་ནི་ཕྱི་རྒྱལ་གྱི་ཆུང་མ་འདི་དག་དང་ང་ཚོ་བོད་རིགས་སྐྱེ་བ་དག་གི་བར་གྱི་དཀའ་ངལ་ཡོང་སྟངས་བསྐོར་ཞིག་རེད། མཚན་མོ་དེར་བློ་དོན་ངེད་གཉིས་ཀྱིས་ཁ་བརྡ་ཡར་མར་མང་བོ་ཞིག་བྱས་པ་དང་དྲ་རྒྱའི་ནང་དུ་འཁོར་ནས་ཞོགས་པའི་ཆུ་ཚོད་བཞི་བ་བར་དུ་ལུས་སོང་། ང་ཚོ་མི་ཁྱོན་སྡོམ་མི་བཅུ་གཉིས་འཛོམ་པའི་ནང་གི་གསུམ་ནི་བྱིས་པ་ཡིན། རྡོར་རྒྱལ་ནི་མདོ་སྨད་མཚོ་སྔོན་ཕྱོགས་ནས་ཡིན་ལ་ཁོ་རང་དང་སྐྱེས་དམན་གཉིས་ལ་ཟླ་བ་ཁ་ཤས་ལས་མ་སོང་བའི་བྱིས་པ་ཞིག་ཡོད་པ་དེ་ནི་བུ་མོ་ཞིག་ཡིན། བུ་ཆུང་ནི་རྒྱ་གར་ནས་འཚར་ལོངས་བྱུང་བའི་བོད་རིགས་ཤིག་ཡིན། ཁོ་རང་དང་སྐྱེས་དམན་གཉིས་ལ་ཟླ་བ་གཉིས་ཙམ་ལ་སོན་པའི་བྱིས་པ་ཞིག་ཡོད། དེ་ཡང་བུ་མོ་ཡིན། བློ་དོན་དང་སྐྱེས་དམན་གཉིས་ལ་ཡང་བྱིས་པ་ཞིག་ཡོད། ཡང་དེ་བུ་མོ་ཡིན། ལོ་ན་བཞི་ལ་སོན་ཙམ་རེད། ད་ནི་ངེད་བཟའ་མི་གཉིས་ལ་ཡང་ཁོང་ཚོ་ལ་གཏམ་བཟང་ཞིག་བཤད་རྒྱུ་ཡོད་པ་དེ་ནི་ངེད་གཉིས་ཀྱང་བྱིས་པ་ཞིག་གི་ཕ་མ་ཆགས་ཡོད་པ་དེ་རེད། མཚན་མོ་དེར་ཚང་མས་ངེད་གཉིས་ལ་རྟེན་འབྲེལ་བཀྲ་ཤིས་བདེ་ལེགས་ཞུས་སོང་། ༦།༢།༠༩
ཞོགས་པ་ཆུ་ཚོད་དགུ་བ་མ་ཟིན་ཙམ་དུ་ཡར་ལ་བླངས་དེ་བློ་དོན་བཟའ་མི་གསུམ་ལམ་འཇུག་བྱས་ཚར་ནས་ང་ཚོ་བཟའ་མི་གསུམ་ཡང་གངས་མཚོའི་ཨ་ཅེའི་བུ་མོ་ཆུང་ཆུང་དེའི་སྐྱེས་སྐར་ཡིན་སྟབས་དེ་རུ་བྱིན་པ་ཡིན།གངས་མཚོའི་ཨ་ཅེའི་ནང་དུ་ཁྱིམ་ཚང་བཞི་ལྔ་ཞིག་གི་ནང་མི་སླེབས་འདུག་པ་དང་བྱིས་པ་ཡང་མི་ཉུང་བ་ཞིག་ཀྱང་འདུས་འདུག ང་རང་གི་གང་ཐུབ་ཐུབ་ཞིག་གངས་མཚོའི་ཨ་ཅེ་ལ་རོགས་བྱས་པ་ཡིན། བར་སྐབས་ཤིག་ལ་མི་མང་གིས་ཁ་ལག་ཟ་བར་གྲ་སྒྲིག་བྱས་དེ་ཅོག་རྩེ་མཐའ་རུ་རང་རང་གི་འདུག་སྟེགས་རེ་བཟུང་དེ་བསྡད་འདུག་པ་དེའི་ནང་ནས་གངས་མཚོས་ཀྱང་ང་རང་ལ་སྐད་བཏང་བ་ལྟར་ང་རང་ཡང་གངས་མཚོས་འགྲམ་དུ་བཙོག་ནས་གང་ཡང་མ་ཟོས་པར་ཆུ་ཞིག་འཐུང་ནས་བསྡད་པ་ཡིན།
ཕྱི་ན་བྱིས་པ་དག་གི་སྐད་རྒྱགས་བཞིན་འདུག མི་མང་བོ་ཞིག་དེ་རུ་འགྲོ་བཞིན་འདུག་པས་ང་རང་ཕྱི་ལ་འབུད་ནས་གཅིག་བལྟས་དུས། བྱིས་པ་གཉིས་ཀྱིས་རུས་སྤལ་ཆུང་ཆུང་ཞིག་རི་མགོ་ནས་བཟུང་དེ་ཡོང་འདུག་པ་དེར་མི་ཚང་མས་ལྟད་མོ་བལྟ་བཞིན་མཛེས་པ་ལ་ཟེར་ཞོར་དུ་འདི་སུས་ཁྱིམ་ལ་འཁྱེར་འདོད་ཡོད་ཟེར་བ་སོགས་བཤད་བཞིན་འདུག་པས་སྐབས་དེར། ངས་འདི་ཁྱེད་གཉིས་ཀྱི་གང་ནས་བཟུང་དེ་ཡོང་བ་ཡིན་ཞེས་དྲིས་དུས་རི་མགོ་ཆུང་ཆུང་དེ་བསྟན་ནས་དེ་རུ་བཟུང་དེ་ཡོང་བ་ཡིན་ཟེར། ངས་འགྲོ ང་ཚོ་ཕྱི་ལ་གཏོང་དུ་འགྲོ ཁོ་རང་གང་ན་ཡོད་ན་དེ་རུ་ཕྱིར་གཏོང་དགོས་ཤེས་བཤད་དུས་བྱིས་པ་དེ་གཉིས་ཀྱིས་ཀྱང་ཡིན་མིན་གྱི་སྐད་ཆ་གང་ཡང་མི་བཤད་པར་ང་རང་གི་རྗེས་སུ་སླེབས་སོང་། ང་ཚོས་རུས་སྤལ་ཆུང་ཆུང་དེ་རི་ལ་ཕྱིར་བཏང་ནས་ཡོང་བཞིན་པའི་སྐབས་སུ་ཡང་བྱིས་པ་གཅིག་གིས་གྲོག་མ་ཆུང་ཆུང་ཞིག་བཟུང་དེ་ཁ་ནང་ལ་བཅུགས་དེ་ཟོས་སོང་། ངས་དེ་མཐོང་ནས་དེ་ཡག་པོ་མ་རེད་ཟེར་ནས་ཐད་གར་མ་བཤད་པར་ཁོ་རང་ལ་དཔེ་བཞག་ནས་བཤད་དུས་ཁོས་ཀྱང་ལགས་སོ་ཟེར་ནས་ལན་བཏབས་པ་དང་མཉམ་དུ་འབུ་རིགས་ཟ་མཁན་གྱི་མི་རིགས་མང་བོ་ཞིག་གི་མིང་གླེང་བཞིན་འདུག ངས་སྐབས་དེར་ལོ་བཅུ་ལས་མ་བརྒལ་བའི་བྱིས་པ་འདི་འདྲ་ཞིག་གིས་རྒྱལ་ཁབ་དེ་འདྲའི་མང་བོ་ཞིག་གི་བཟང་ཆ་མ་གོ་བར་ངན་ཆ་ཚང་མ་གོ་བའི་མ་ཚད་རང་གི་ལག་ལེན་ལ་བསྟར་ནས་ཚོད་ལྟ་བྱེད་ཀྱི་འདུག་པ་འདི་ནི་རང་དབང་ལ་ལོང་སྤྱོད་བྱེད་སྟངས་ཀྱི་སློབ་སྟོན་གྱི་མ་འདང་བའི་ནུབ་ཕྱོགས་པའི་བྱིས་པ་དག་ལ་འཕྲད་བཞིན་པའི་ཉེན་ཁ་ཆེན་པོ་ཞིག་མིན་ནམ་སྙམ་ཞོར་དུ་ང་ཚོ་ཕྱིར་རི་ནས་གངས་མཚོས་ཨ་ཅེའི་ནང་དུ་ལོག་པ་ཡིན།
གངས་མཚོའི་ཨ་ཅེ་འཚབ་འཚུབ་དང་བཅས་དེ་རྒྱུགས་ཡོང་ནས་མི་མང་བཙོག་ཡོད་སའི་ཅོག་རྩེའི་སྟེང་གི་གྲང་ཚལ་རིགས་གཅིག་གཉིས་ཤིག་ཕྱིར་འཁུར་ཞོར་དུ་མོ་རང་གི་ཨ་མ་ལ་ཁྱེད་རང་དེ་འདྲའི་བྲེལ་བ་བྱས་དེ་གང་བྱེད་ཀྱི་ཡོད་ཟེར་ཞོར་དུ་ང་ཚོས་ད་དུང་མེ་ཝལ་གྱི་ཕ་མ་གཉིས་ལ་སྒུག་དགོས་ཟེར་ནས་ཕྱིར་ཐབ་ཚང་དུ་འབུད་སོང་། མེ་ཝལ་ནི་མོ་རང་གི་ཁྱོ་ག་རེད། གང་ལྟར། སྐྱ་ཁའི་ཚང་ནང་དུ་རྡོ་འཕངས་པ་ལྟར་མི་ཚོས་རང་རང་གི་ས་ནས་བཤད་བཞིན་པའི་སྐད་ཆ་བཟང་ངན་ཡག་འདུག་གང་ཡིན་ཡང་རྫོགས་རྒྱུ་མི་འདུག ང་རང་ཟུར་ནས་རྐུབ་སྟེགས་སྙི་མོ་ཞིག་ཡོད་པ་དེའི་སྟེང་དུ་བསྡད་ནས་ཁོང་ཚོ་ལ་བལྟས་དེ་བསྡད། གང་ནས་སླེབས་པ་ཡང་མ་ཤེས་པར་མི་ཚང་མ་ཅོག་རྩེ་མཐའ་རུ་སླར་ཡང་འདུས་འདུག་པས་ང་རང་ཡང་གངས་མཚོའི་འཁྲིས་ཀྱི་རྐུབ་སྟེགས་སླར་ཡང་བཙོག་པ་ཡིན།
ངས་ཕར་ཕྱོགས་ཀྱི་ཁ་གཏད་དུ་བསྡད་ཡོད་པའི་མི་ངོ་གདོང་ན་འཛུམ་འདང་མེད་པ་དང་ཕར་བལྟས་ཚོད་ཀྱིས་མི་ཁོང་ཁྲོ་ཚ་བོ་ཞིག་ཡོད་པ་དེ་ནི་མེ་ཝལ་གྱི་ཕ་རྒན་ཡིན་པ་ཤེས་སོང་། མི་ཚང་མའི་རང་རང་གི་ས་ནས་ཁ་ལག་ཟ་མགོ་བཙུགས་བཞིན་འདུག་ལ་ཁོ་རང་གིས་སྐད་ཤུགས་ཆེན་པོ་དང་རྣམ་འགྱུར་མི་ལེགས་པ་ཞིག་དང་བཅས་མི་ཚང་མ་ལ་རྗོ་ཤུ་ལུགས་སྲོལ་ལ་བརྩི་བཀུར་དང་ཆོས་ལུགས་ཀྱི་ཉིན་མོ་ལ་བརྩི་སྲུང་བྱེད་དགོས་པ་སོགས་ཀྱི་བསྐོར་བཤད་དེ་འོང་དུས་སུ་མཐའ་ནས་མི་རེ་ཟུང་གིས་ཁོ་རང་གི་རྣམ་འགྱུར་ལ་བལྟ་བཞིན་དགད་མོ་ཤོར་གྱི་འདུག་ཀྱང་ཁོ་རང་གིས་མུ་མཐུད་དུ་སྐད་ཆ་ཚང་མ་བཤད་རྗེས་སུ་སྒོར་ཁུག་ཕྱི་ལ་བཏོན་ནས་ནང་ནས་སྒྲོ་ལོར་བརྒྱ་ཤོག་གཉིས་བཏོན་ནས་སྐྱེས་སྐར་གཉིས་ཡོད་པའི་ཁོ་རང་གི་ཕྲུ་གུ་གཉིས་ལ་རེ་རེ་བྱིན་ནས་རྐུབ་སྟེགས་སྟེང་དུ་སླར་ཡང་བཙོག་སོང་། དངོས་ནས་མི་འདི་འདྲ་ནི་སྤྱི་ཚོགས་གང་དུ་ཡོད་ན་ཡང་དེའི་རིགས་ཀྱི་མཐུན་སྒྲིལ་ལ་གཏོར་བཤིག་གཏོང་བ་ལས་ཕན་ཐོག་གང་ཡང་མེད་པ་ལྟ་བའི་ཚོར་བ་ཞིག་སྤྲད་སོང་། ཡ་མཚར་བ་ཞིག་ལ་ཁོ་རང་གི་བུ་མེ་ཝལ་ནི་ང་རང་གི་ངོ་ཤེས་ཀྱི་ཡོད་ལ་མི་དེ་ནི་དངོས་ནས་ཡ་རབ་ཞིག་ཡིན། ཕ་དེ་འདྲའི་གཤིས་གྱོང་ཞིག་ལ་བུ་དེ་འདྲའི་བཟང་བོ་ཞིག་སྙམ་ཞོར་དུ་ཁ་ལག་ཟོས་པ་ཡིན། རྗེས་སུ་གངས་མཚོས་ཁ་ནས་གནས་ཚུལ་གསལ་བོ་གོ་བ་ལྟར་ན་མེ་ཝལ་གྱི་ཕ་རྒན་ནི་ག་དུས་ཡིན་ཡང་། དེ་འདྲའི་མི་གཤིས་གྱོང་དང་རང་ཤེད་ཚ་བ་མ་ཟད། ཁྱིམ་ཚང་ནང་གི་རྒྱལ་བོ་བྱེད་རྒྱུ་ཡིན་ཟེར་མཁན་ཞིག་ཡིན་པ་མ་ཟད། མེ་ཝལ་ནི་བུ་དང་བུ་མོ་གསུམ་གྱི་ནང་གི་བུ་ཡ་རབ་དེ་ཆགས་ཡོད་ལ། ནམ་ཡིན་ཡང་ཕ་རྒན་གྱིས་ཁ་བརྡུང་འདྲ་མིན་མྱོང་གི་ཡོད་པ་རེད་ཟེར་།
ཉིན་གུང་ཟ་མའི་རྗེས་སུ་ང་རང་མཚན་ལ་གཉིད་ཡག་པོ་མ་ཁུགས་སྟབས་ཧ་ཅང་ཐང་ཆད་འདུག་པའི་ཁང་མིག་་ཆུང་ཆུང་ཞིག་གི་ནང་དུ་བྱིས་པ་ཁ་ཤས་གློག་ཀླད་ནང་དུ་རྩེད་མོ་རྩེ་བཞིན་ཡོད་པ་དེ་རུ་སོང་ནས་བཙན་གྱིས་ཆུ་ཚོད་གཅིག་གཉིས་ཤིག་ལ་གཉིད་ཁུལ་བྱས་པ་ཡིན། ཕྱི་དྲོ་ང་ཚོ་ཆུ་ཚོད་ལྔ་བ་མ་ཟིན་ཙམ་ལ་ཕྱིར་ནང་དུ་ལོག་པའི་ལམ་ཁ་ནས་གངས་མཚོའི་ཨ་མ་རྒན་མོ་མོ་རང་གི་ནང་དུ་བསྐྱལ་ནས་ང་ཚོ་ཕྱིར་གངས་མཚོའི་ཨ་མའི་ནང་དུ་ལོག་ནས་ཡོང་བས་ལམ་ཁར་ང་རང་གི་སེམས་ནང་དུ་ལོ་ན་གྱ་བཅུ་གྱ་ལྔ་ལ་སོན་པའི་རྒན་མོ་ལོ་ལོན་ཞིག་རང་གི་བྱིས་པ་ཡོད་བཞིན་དུ་ཁེར་རྐྱང་དུ་ཁང་མིག་ཞིག་གི་ནང་དུ་རང་གི་བཟའ་བཏུང་ཚང་མ་རང་གི་འགན་འཁུར་བྱེད་པ་དང་རང་གིས་རང་ལ་བདག་སྐྱོང་བྱེད་དགོས་པའི་ནུབ་ཕྱོགས་པའི་ལུགས་སྲོལ་འདི་ནི་དངོས་ནས་ཡིད་སྐྱོ་བ་ཞིག་རེད། ལོ་ན་རྒས་དུས་སུ་རང་གི་ཕྲུ་གུའི་རང་ལ་བདག་སྐྱོང་བྱེད་མ་ཐུབ་པ་ཡིན་ན་ནི། དངོས་ནས་ཕ་མ་དང་བུ་ཕྲུག་ཟེར་བ་དེ་ལ་དགོས་པ་གང་ཞིག་ཡོད་དམ་སྙམ་པ་མ་ཟད། ནུབ་ཕྱོགས་པའི་རང་དབང་གི་འཚོ་ལུགས་འདི་ལ་དངོས་ནས་སེམས་གཏིང་ནས་དགའ་རྒྱུ་ཕར་ཞོག་སེམས་གཏིང་ནས་སྐྱོ་བ་ཤུགས་དྲག་པོ་ཞིག་སྐྱེ་ཞོར་དུ། ཨ་ཙི། དཀོན་མཆོག་མཁྱེན། བོད་པ་འདི་ཚོ་ཡང་ཡར་རྒྱས་དང་རང་དབང་ཟེར་ནས་རྒྱུགས་རྒྱུགས་མཐར་ནུབ་ཕྱོགས་པ་འདི་ཚོ་ལྟ་བུ་ཞིག་ཆགས་ཉིན། དངོས་ནས་མི་ལ་ཆེ་ཆུང་དང་བརྩི་བཀུར་མེད་པ། རྒན་པ་ལ་གཉོར་སྐྱོང་དང་བྱིས་པ་བྱམས་སྐྱོང་བྱེད་ལུགས་ནོར་བའི་གོམ་གཤིས་འདི་འདྲ་ཞིག་ཆགས་ཉིན་དངོས་ནས་བོད་མི་ཟེར་བ་དེ་ཡང་ཚར་སོང་བ་རེད་སྙམ་ནས་སེམས་པ་སྐྱོ་ཞོར་དུ་རླངས་འཁོར་གྱི་སྒེའུ་ཁུང་ནང་ནས་ཕྱི་རོལ་གྱི་རྗོ་སུ་ལམ་གྲོང་ཁྱེར་གྱི་དགོང་ཁའི་རྣམ་པ་ལ་བལྟས།
ང་རང་གིས་ཆབ་བསྒྲགས་དང་ཟ་མ་བཟོ་སྟབས་ཁྲིད་རྒྱུ་ཡོད་པའི་བསྐོར་མང་བོ་ཞིག་བྱས་དེ་ཟླ་ངོི་གཉིས་གསུམ་ཞིག་བྱིན་ཡང་། དོ་ནུབ་བར་དུ་ཁྲིད་གླ་བྱིན་ནས་སློབ་དུ་ཡོང་བ་མ་བྱུང་མོད། དོ་ནུབ་བཟའ་མི་གངས་མཚོས་ངོ་ཤེས་གཉིས་ཡོང་བ་དེར་མོག་མོག་དང་ཨ་མདོའི་ཤ་འབྲས་བཟོ་སྟངས་གཉིས་བསླབ་པ་ཡིན་ལ། ཁོ་གཉིས་དངོས་ནས་དགའ་བོ་བྱུང་སོང་བ་མ་ཟད། ཟ་མ་དེ་གཉིས་ཀྱི་བྲོ་བ་ཡང་དངོས་ནས་ཞིམ་པོ་འདུག་ཟེར། འགྲོ་གར་ངས་ཁོ་གཉིས་ཟ་མ་དེ་དག་ལས་གང་ལུས་ཡོད་པའི་ནང་ནས་མང་ཤོས་བསྡུ་གསོག་བརྒྱབས་ནས་འཁུར་རོགས་གནོང་ཞེས་བཤད་དུས། བཟའ་མི་གཉིས་ཀྱི་གདོང་ལ་འཛུམ་གྱིས་བཀང་བཞིན་ཐུགས་རྗེ་ཆེ་ཞེས་བཤད་སོང་། ༧།༢།༠༩
མུ་འགོད།
ཇི་འདྲའི་སྙན་འཇེབས་ལྡན་པ་ལ།
གྲོགས་ལགས། མུ་མཐུད་དུ་འབད་རོགས།
ཁྱེད་ཀྱི་རེ་བསྐུལ་བཞིན་༧ཀརྨ་པ་བོད་ནང་བཞུགས་དུས་ཀྱི་གཏམ་བརྒྱུད་ཟེར་བ་དེ་མུ་འཐུད་བཀོད་ཡོད་པས་ཀློགས་རོགས་གནང་།
སྐུ་ངལ་སྐྱོན་འདུག བཀླགས་ཟིན་མུ་འཐུད་སྤེལ་རོགས་གནང་།