ཞོགས་པ་ཆུ་ཚོད་བཅུ་བའི་རླངས་འཁོར་རྗོ་སུ་ལམ་ནས་ཨེས་ལ་གྲི་ལ་ཡོང་བས་རླངས་འཁོར་གྱི་འཛིན་བྱང་བསྔགས་ཉོ་བྱས་ཡོད་པ་ལྟར་གངས་མཚོ་ངེད་གཉིས་ཕྱིར་ཨེས་ལ་གྲི་ལ་མ་ལོག་སྔོན་དུ་མོ་རང་གི་གཟུགས་གཞི་ཅུང་ཙམ་མི་བདེ་བར་བཤད། ངས་ཁྱེད་རང་གི་གཟུགས་གཞི་མི་བདེ་ན་ཁྱེད་རང་འདི་ནས་བསྡད་ན་ཡག་པོ་རེད་ང་གཅིག་བུ་སོང་ན་འགྲིག་ཞེས་བཤད་དུས། མོ་རང་གི་སྐྱོན་ནི་མ་རེད། ང་དེ་རིང་མ་སོང་བ་ཡིན་ན་ངེད་གཉིས་བདུན་ཕྲག་གཅིག་གི་རིང་དུ་ཁ་ཁར་ནས་འདུག་དགོས་དུས་ཁྱེད་རང་གཅིག་བུ་ཨེས་ལ་གྲི་ནས་སུན་སྣང་སྐྱེ་ངེས་རེད་ཟེར་ནས་ང་རང་ལ་བསམ་བློ་བཏང་ནས་མོ་རང་གི་གཟུགས་གཞི་ཅུང་ཙམ་བདེ་བོ་མེད་ན་ཡང་རླངས་འཁོར་ནང་དུ་ལམ་ལ་འབུད།
ལམ་བར་གྱི་རིང་ཐུང་གང་བོར་རྐུབ་སྟེགས་སྟེང་ནས་ཡར་ལོག་མར་ལོག་བརྒྱབ་ནས་ནད་ཀྱི་འདུག་ཟེར་བས་ང་རང་ཡང་བདེ་བོ་མེད་པ་ཞིག་ཆགས། ཨེས་ལ་གྲི་ལ་མ་སླེབས་པའི་སྐར་མ་ཁ་ཤས་ཀྱི་སྔོན་དེ་ལ་ང་རང་ལ་ལས་ཀ་བྱེད་སའི་ལས་ཁུངས་ནང་གི་བུ་མོ་ཞིག་གི་ཁ་པར་འབྱོར་ནས་ཁྱེད་རང་དེ་རིང་ལས་ཀ་བྱེད་དུ་མ་ཡོང་བ་ཡིན་ན་འགྲིག་གི་འདུག ཐབ་ཚང་ནང་དུ་མེ་སྐྱོན་ཤོར་འདུག རྗེས་སུ་གལ་ཏེ་ལས་ཀ་མགོ་བཙུགས་པ་ཡིན་ན་ཁྱེད་རང་ལ་འབྲེལ་བ་བྱེད་ཆོག་ཟེར། ངས་མེ་ཚབ་ཆེན་ཤོར་འདུག་གམ་ཟེར་ནས་དྲིས་དུས། དེ་ང་རང་གིས་ཀྱང་ཤེས་མ་སོང་། ང་རང་ལས་ཁུངས་དུ་ཡོད་ཟེར། གང་ལྟར། དེ་རིང་ལས་ཀ་འགྲོ་མ་དགོས་པ་དེ་ནི་དངོས་ནས་ཡག་པོ་ཆགས། གངས་མཚོ་ནད་བཞིན་འདུག་ལ། མོ་རང་ལ་ཡང་འདུག་རོགས་དགོས་ཀྱི་ཡོད་པ་རེད།ངས་མོ་རང་ལ་ཐེངས་མ་མང་བོ་ཞིག་ལ་ཇ་བསྐོལ་བ་དང་མོ་རང་གི་ཟ་མ་གང་ཡང་ཟོས་མེད་སྟབས། ངས་འཐེན་ཐུག་ཞིག་བསྐོལ་ནས་མོ་རང་ལ་སྤྲད་དུས། མོ་རང་གི་ཉུང་ཉུང་ཞིག་ལས་འཐུང་མ་སོང་། ང་རང་ལ་ཡང་ཐབས་ཤེས་གང་ཡང་མི་འདུག་པར་མོ་རང་གི་ཨ་ཡ་དང་ཨ་ན་ཟེར་བ་ལ་ཉན་ནས་འདུག་རྒྱུ་ལས་ཐབས་ཤེས་གང་ཡང་མེད་པ་དང་ཞོར་ནས་ལས་ཁུངས་ནས་ཁ་པར་རེ་སླེབས་མི་ཡོང་ངམ་སྙམ་ནས་སེམས་འཚབ་བྱེད་བཞིན་བསྡད།
བར་སྐབས་ཤིག་ལ་ངས་མོ་རང་གི་ཐོད་པ་ལ་རེག་དུས་དངོས་ནས་ཚ་བ་ཆེན་པོ་འདུག་པས་སྨན་ཞིག་ཐབས་ཤེས་བྱས་ན་ཁྱེད་རང་གི་འཐུང་རྒྱུ་ཨེ་ཡིན་ཞེས་དྲིས་དུས་མོ་རང་གི་ཁྱིམ་ཚེས་བུད་མེད་དེ་ལ་ཚ་བ་བརྟག་དབྱད་བྱེད་པའི་ནད་བརྟག་ཆུང་ཆུང་དེ་ཨེ་ཡོད་ཟེར་ནས་དྲིས་དང་ཟེར་བས་ང་རང་འདྲི་རུ་སོང་དུས། བུད་མེད་ཁྱིམ་ཚེས་དེ་ནི་དངོས་ནས་ཡ་རབས་ཤིག་རེད། མོ་རང་ལ་ནད་བརྟག་དབྱད་བྱེད་སྤྱད་དེ་མེད། ཡིན་ཡང་། ཚ་སྨན་ཡོད། འདི་འཁུར་ནས་སོང་དེ་འཐུང་དུ་བཅུགས། ད་གཞན་པའི་ཁྱེད་རང་ལ་དགོས་པ་གང་ཡོད་ན་གསུང་རོགས་ཞུ་ཟེར་བས། ངས་ཐུགས་རྗེ་ཆེ་གཞན་གང་ཡང་མི་དགོས་ཟེར་ནས་སྨན་འཁུར་ནས་ཕྱིར་ལོག་ནས་ཡོང་བ་ཡིན།
ངས་རྗེས་དེར་བུད་མེད་དེས་འདི་ཚ་བ་ལ་ཕན་ངེས་ཡིན་ཟེར་ནས་ཇ་ཞིག་དང་ཤེལ་གྱི་ཇ་དེམ་ཞིག་འཁུར་ནས་ངེད་གཉིས་ནང་དུ་སླེབས་སོང་། ངས་བུད་མེད་དེར་ཐུགས་རྗེ་ཆེ་ཟེར་ཞོར་དུ་ལག་གཉིས་ཀྱིས་ཇ་དང་ཤེལ་གྱི་ཇ་དེམ་དེ་ཚུར་བླངས་པ་ཡིན། ངས་ཇ་དེ་བསྐོལ་ནས་མོ་རང་ལ་ལུད་པ་དང་སྨན་ཡང་འཐུང་དུ་བཅུགས་རྗེས། ཆུ་ཚོད་གཅིག་ཙམ་གྱི་རྗེས་སུ་ཅུང་ཙམ་ལྷོད་དུ་འབབ་སོང་། མོ་རང་གི་དཀྲུས་རྒྱག་གི་ཡིན་ཟེར་བས་ངས་དེ་ནི་ཐབས་ཤེས་ཡག་པོ་ཞིག་ཡིན་རྒྱུ་མ་རེད་ཟེར་ནས་བཤད་ཀྱང་། མོ་རང་གིས་དཀྲུས་རྒྱག་པ་དེ་ནི་སྐྱོན་མི་ཡོང་ཟེར་ནས་དཀྲུས་ཁང་དུ་འཛུལ་སོང་། ངས་འཐེན་ཐུག་ཚ་བོ་བཟོས་དེ་དགོང་ཟས་བྱས་པ་ཡིན། ༨།༢།༠༩
དེ་རིང་ཕལ་ཆེར་ཉིན་བཀང་བོར་ངས་གངས་མཚོ་ནད་བཞིན་ཡོད་པ་དེ་ལ་ལྟ་བཞིན་ལས་ཀའི་ཕྱོགས་ནས་གནས་ཚུལ་རེ་ཨེ་ཡོང་བལྟས་མོད། ཕར་ཁ་པར་ཞིག་བཏང་བས་ལས་ཁུངས་ནང་གི་བུད་མེད་དེའི་ང་རང་ལ་ཚུར་གནས་ཚུལ་གང་ཡོད་མེད་དེ་ཁ་པར་གཏོང་ཡང་ཟེར་ན་ཡང་ལན་གང་ཡང་འབྱོར་མ་སོང་། ཕྱི་དྲོ་ཆུ་ཚོད་དྲུག་པ་ཡོལ་ནས་གངས་མཚོ་མོ་རང་གྲོགས་མོ་ཞིག་གི་གསོལ་སྟོན་དུ་འགྲོ་དགོས་པར་བཤད་པ་ལྟར་ལམ་ཁ་ནས་ང་རང་འཚིག་ཇ་འཐུང་ས་རུ་སོང་ནས་གློག་ཀླད་ཀྱི་ཁ་ཕྱེ་ནས་དྲ་ཚིགས་ཁ་ཤས་ལ་ཉུལ་བ་ཡིན། གནས་ཚུལ་ངན་པ་ཞིག་ཡོད་པ་ནི་རྒྱ་ནག་གི་གསར་འགྱུར་སྡེ་ཚན་ཆེ་ཤོས་ཤིག་ལ་མེ་སྐྱོན་ཤོར་བས་གནས་ཚུལ་དེ་ནི་དྲ་ཚིགས་ཁ་ཤས་ཤིག་དུ་བཀོད་འདུག་པ་དང། ༧གོང་ས་མཆོག་ཕྱི་རྒྱལ་ཞིག་ལ་ཕེབས་ཡོད་པ་དང་སྐུ་གཟུགས་བདེ་ཐང་ཡིན་པ་ཡང་ཞོར་ནས་ཤེས་སོང་། དགོང་མོ་གངས་མཚོ་ངེད་གཉིས་ཀྱི་གལ་སྲིད་ངེད་གཉིས་ཀྱི་བྱིས་པ་དེ་ནི་བུ་ཞིག་ཡིན་པ་ཡིན་ན་ནི། དེ་ནི་རྗོ་ཤུ་ལུགས་སྲོལ་ལྟར་ཕོ་མཚན་གྱི་ཤུན་འཔག་སྐྱེ་ནས་བདུན་ཕྲག་ཁ་ཤས་ཀྱི་རྗེས་སུ་གཏུབ་ཀྱི་ཡོད་པ་དེ་བྱེད་རྒྱུ་ཡིན་མིན་བསྐོར་སྐད་ཆ་བཤད་དུས། མོ་རང་གི་ཡིན་དང་ཡིན། དེ་ནི་གཏུབ་དགོས་ཀྱི་རེད་ཟེར་བས་ང་རང་གི་སེམས་ནང་དུ་མི་བདེ་བ་ཞིག་བཟོས་སོང་། དངོས་ནས་མི་ཟེར་བ་ནི་འདི་འདྲའི་ཨུ་ཚུགས་ཆེན་པོ་ཡོད་མཁན་ཞིག་ཡིན་དགོས་དོན་གང་ཡིན་ནམ་སྙམ་པ་དང་ང་རང་གི་ནོར་འཁྲུལ་གྱི་ལམ་ཁ་འདི་ལ་ཡང་ཕྱིར་དྲན་ཐེངས་ཤིག་བྱེད་དུ་བཅུགས། ཡིན་ཡང་། ད་དུང་སྐྱེ་སྲིད་པའི་བྱིས་པ་དེ་ནི་བུ་དང་བུ་མོ་གང་ཞིག་ཆགས་མིན་མི་ཤེས་ཀྱང་། བུ་ཞིག་སྐྱེ་བ་ཡིན་ན་ནི་ངེད་གཉིས་ཀྱི་བསམ་ཚུལ་མི་མཐུན་པ་འདིའི་དབང་གིས་དཀའ་ངལ་ཞིག་འཕྲད་ངེས་རེད། ངས་བསམ་མེད་ཀྱི་བྱིས་པ་དེའི་ཐོབ་ཐང་ཕ་མས་འཕྲོག་འདོད་གཏན་ནས་མེད་པར་ཁོ་རང་གི་འཚར་ལོངས་ཀྱི་རྒྱུད་རིམ་ཁྲོད་ནས་ཁོ་རང་ལ་འདམ་ག་སྟེར་འདོད་ཡོད་པ་ལས་བསམ་མེད་ཀྱི་བྱིས་པ་དེ་འདྲ་ཞིག་སྐྱེ་མ་ཐག་ནས་ཁོ་རང་གི་ལྷན་སྐྱེས་ཀྱི་གྲུབ་པའི་ལུས་ཀྱི་ཆ་ཤས་གང་རུང་ལ་གཏུབ་ཟུག་གི་མནར་གཅོད་དེ་འདྲ་གཏོང་འདོད་དབྱེ་ནས་མེད། ད་དུང་། འཛམ་གླིང་འདིར་འཚོ་ཞིང་གནས་པའི་སྐྱེ་བོ་དུང་ཕྱུར་མང་བོ་ཞིག་གིས་རང་ཉིད་ཀྱི་ལུས་ཀྱི་ཆ་ཤས་ཙམ་ལ་ཡང་ན་ཟུག་སེན་མོ་ཙམ་ཡང་མི་བྱུང་བར་རེ་བ་རྒྱག་བཞིན་ཡོད་ན། བསམ་བཞིན་དུ་ན་ཟུག་སྤྲད་དེ་དེ་ནི་འཕྲོད་བརྟེན་དུ་ཁས་ལེན་བྱེད་མཁན་འདི་ལ་ང་རང་གི་གཏན་ནས་རྒྱབ་སྐྱོར་བྱེད་ཐུབ་ཀྱི་མི་འདུག གང་ལྟར། ད་ནི་སྐྱེ་སྲིད་པའི་བྱིས་པ་དེ་བུ་དང་བུ་མོ་གང་ཞིག་དུ་ཆགས་རྒྱུ་ཡིན་མིན་དེ་རེད། བྱིས་པ་དེ་ནི་བུ་མོ་ཞིག་ཆགས་པ་ཡིན་ན་ནི་ངེད་གཉིས་ལ་དཀའ་ངལ་གང་ཡང་འཕྲད་མི་སྲིད། བུ་ཞིག་ཆགས་པ་ཡིན་ན་ནི་ངེད་གཉིས་ལ་དཀའ་ངལ་འཕྲད་རྒྱུའི་མགོ་བརྩམས་པ་རེད་བསམ་ཞོར་དུ་གཉིད་དུ་གཡུར་བས་གངས་མཚོ་ལ་ལྟ་ཞོར་དུ་སྒོ་རུ་འབུད་དེ་ཐ་མག་རྐང་གཅིག་ལ་མེ་སྒྲོན། ༡༠།༢།༠༩
གངས་མཚོའི་རེ་འདོད་ལྟར་མོ་རང་གི་ནད་གཞི་སྔར་ལས་ཇེ་བཟང་དུ་དམིགས་བསལ་གང་ཡང་བྱིན་མེད་ཀྱང་། མོ་རང་གི་རྒྱལ་ཁབ་ཀྱི་འོས་ཤོག་གི་ཉིན་མོ་ཡིན་སྟབས། ང་རང་ཁོ་མོ་དང་འགྲོག་ནས་རྒྱལ་ཁབ་ཀྱི་སྲིད་འཛིན་གསར་བ་ལ་འོས་ཤོག་འཕེན་དུ་བསྐྱོད་པའི་ལམ་ཁར་མོ་རང་གི་གྲོགས་མོ་ཝན་ལ་མོ་རང་གི་ཉིན་གོང་བཞེས་ལག་མགྲོན་འབོད་བྱས་པ་ལྟར་ངེད་གསུམ་ཟ་ཁང་ཆུང་ཆུང་ཞིག་གི་ནང་དུ་ཨེས་སི་རལ་གྱི་ཟ་མཞིག་ཟ་རུ་སོང་། དེ་ནས་ཟ་མ་མང་ཤོས་ནི་སྔོ་ཚལ་རྐྱང་རྐྱང་དེ་གྲང་ཚལ་མང་ཤོས་ཡིན་པ་དང་མོ་རང་དང་གྲོགས་མོ་ཝན་གཉིས་ཀྱིས་བྱ་ཤ་ཞིག་ཀྱང་ཟོས། དེའི་རྗེས་སུ་མོ་རང་གི་གྲོགས་མོ་ཝན་ནི་སླར་ཡང་འོས་ཤོག་གི་འགན་འཛིན་ལས་ཁུངས་ཤིག་ལ་འོས་ཤོག་ལྟ་རྟོགས་བྱེད་མཁན་གྱི་འཁྲིས་སུ་ཡོད་པ་དེར་ཕྱིར་ལས་ཀ་བྱེད་དུ་བྱིན། ངེད་གཉིས་ཀྱིས་མོ་རང་གི་འོས་ཤོག་བླུགས་རྗེས་སུ་ཕྱིར་ནང་དུ་ལམ་ཁར་ནམ་རྒྱུན་དུ་ང་རང་འགྲོ་སའི་འཚིག་ཇ་འཐུང་ས་དེ་རུ་བྱིན་ནས་ཇ་གཉིས་བསྔགས་དེ་གློག་ཀླད་ནང་དུ་བོད་ཡིག་གི་དྲ་ཚིགས་ཁ་ཤས་སུ་རང་ཉིད་ཀྱི་ཟིན་བྲིས་འདེབས་ས་ཡོད་པ་དེ་དག་ལ་ལྟ་ཀློག་དང་ཟིན་བྲིས་རེ་ཟུང་ཞིག་བཏབས། དུས་ཚོད་གཉིས་ཙམ་མ་སོང་མོད། མོ་རང་གི་གཟུགས་གཞི་མི་བདེ་ཟེར་བས་ངེད་གཉིས་མོ་རང་གི་འདོད་པ་ལྟར་ཕྱིར་ནང་དུ་ལོག་པ་ཡིན།
ཕྱི་དྲོ་ཙམ་ལ་ང་རང་གིས་ངེད་གཉིས་ལ་ཟ་རྒྱུ་སྟབས་བདེ་ཞིག་བཟོས་པ་ཡིན། ཕལ་ཆེར་ཉིན་གོང་བོར་ངེད་གཉིས་ཀྱིས་ནང་ནས་གློག་བརྙན་ཁ་ཤས་ལ་བལྟས་པའི་ནང་གི་མང་ཤོས་ནི་རྗོ་ཤུ་མི་རིགས་དང་འབྲེལ་བ་ཡོད་པ་དང་ཨེས་སུ་རལ་གྱི་གློག་བརྙན་རེ་ཟུང་ཡིན། གློག་བརྙན་རྗེས་སུ་ངེད་གཉིས་ལ་ཁ་རྩོད་ཉུང་ངུ་ཞིག་ཤོར་སོང་བའི་ནང་དོན་ནི་ནི། ནམ་རྒྱུན་དུ་མོ་རང་གི་འདོད་པ་མ་འཁང་བས་དཀའ་ངལ་དེའི་དབང་གིས་ང་རང་གིས་གང་བྱས་ཀྱང་མོ་རང་གི་སྣེ་ཞིག་བཙལ་ནས་ང་རང་ལ་སྐད་རྒྱགས་པ་དེའི་སྟབས་ཀྱིས་བྱུང་། ངས་ཉིན་གོང་བོར་མོ་རང་གི་འདོད་པ་བསྟུན་གང་ཐུབ་བྱས་ཀྱང་། དགོང་མོ་ཇ་ཞིག་བཟོས་པའི་སྐབས་སུ་ངེད་གཉིས་ལ་ཁ་རྩོད་ཤོར། མོ་རང་གིས་ཁྱེད་ཀྱིས་ག་དུས་ཡིན་ཡང་ང་རང་གི་བཤད་པ་མི་ཉན་པར་ཇ་མང་བོ་ཞིག་བཟོས་དེ་གྲང་མོ་འཁྱག་དུ་བཅུགས་པ་དང་གློག་གི་འགྲོ་སོང་ཆེན་པོ་ཡོད་པ་སོགས་ལ་བསམ་བློ་གཏོང་གི་མི་འདུག་ཟེར། ངས་རང་གི་གང་ཐུབ་ཐུབ་ཀྱིས་འགྲོ་སོང་ཆུང་ཆུང་ཞིག་བྱེད་པར་བསམ་བློ་གཏོང་གང་ཐུབ་དང་ལག་ལེན་བྱས་པ་ཡིན་མོད། ད་དུང་། མོ་རང་གིས་དེ་དག་ལ་བསམ་ཤེས་བྱེད་རྒྱུ་ཕར་ཞོག ངས་འགྲོ་སོང་སོགས་ལ་བསམ་བློ་གཏོང་གི་མེད་རབས་རབ་དང་རིམ་པ་གླེང་དེ་འོང་དུས་དངོས་ནས་ང་རང་གིས་འདམ་པའི་ལམ་ཁ་འདི་ནི་ནོར་འཁྲུལ་ཡིན་པ་ཤེས་ཀྱང་། རེ་ཞིག་རང་ཁ་རོག་གེར་མི་འདུག་ཐབས་མེད་རེད། གང་ཡིན་ཟེར་ན་མོ་རང་གི་གང་བཤད་པ་ཚང་མ་བདེན་པ་ཡིན་དགོས་པ་དང་ངས་དེ་ལ་ལན་ལོག་པ་ཡིན་ན་ནི་མོ་རང་གིས་ཁ་བཙུམ་ཟེར་ནས་ཁ་འགོག་ཅི་ཐུབ་བྱེད། ངེད་གཉིས་གོམ་གཤིས་དང་འཚར་ལོངས་བྱུང་ས་མི་གཅིག་པའི་དབང་གིས་བྱ་སྤྱོད་འདུག་གསུམ་མང་བོ་ཞིག་ལ་དཀའ་ངལ་ཆུང་ཆུང་རིགས་རྒྱུན་དུ་བྱུང་གི་ཡོད་ཀྱང་ང་རང་གིས་དེ་དག་སྣང་མེད་དུ་འཇོག་གི་ཡོད། དཔེར་ན་མོ་རང་གི་རྐང་བ་ངའི་མགོ་སྟེང་ནས་ཡར་འཁྱེར་མར་འཁྱེར་བྱེད་པ་ལ་མོ་རང་ལ་དཀའ་ངལ་གང་ཡང་མི་འདུག་ཀྱང་། ང་རང་ལ་གཏན་ནས་བྱ་སྤྱོད་དེའི་རིགས་ལ་གོམ་འདྲིས་མེད་སྟབས་གཏན་ནས་བདེ་བོ་མེད་ཀྱང་ངས་ཁོ་མོ་ལ་གང་ཡང་ཟེར་གྱི་མེད། གལ་ཏེ། བོད་པ་ཚང་གི་གོམ་གཤིས་ལྟར་ན་ནི་ངའི་དྲིན་ཆེན་ཨ་མ་ལྟ་བའི་ཞིག་གིས་བྱ་སྤྱོད་དེ་དག་མཐོང་བ་ཡིན་ན་ནི། དངོས་ནས་རྣམ་དོག་ཟ་རྒྱུ་ཡིན་པ་ནི་བཤད་ག་ལ་དགོས། ཉིན་མ་དེ་ནས་བཟུང་ང་རང་བུད་མེད་དེ་འདྲ་ཞིག་དང་ལྷན་དུ་ཡོད་པ་ལ་སེམས་འཁྲལ་བྱེད་རྒྱུ་ནི་གདོན་མི་ཟ་བ་ཡིན་ལ། ང་རང་ལ་དམིགས་བསལ་གྱིས་ཁ་བརྡ་སློབ་གསོ་མི་ཉུང་བ་ཞིག་ཀྱང་རྒྱག་ཁོ་ཐག་ཡིན།
ངས་ཉིན་གང་བོར་མོ་རང་ལ་བསྟུན་གང་ཐུབ་བྱས་ཀྱང་། མོ་རང་གིས་ད་དུང་ཡང་མོ་རང་ལ་ཡག་པོ་བྱེད་ཀྱི་མེད་པ་ལྟ་བུ་བཤད་དེ་འོང་དུས་ང་རང་གི་སེམས་པ་ཡང་ཅུང་བདེ་བོ་མ་བྱུང་བ་དང་འགྲོག་ནས་ངེད་གཉིས་ལ་ཁ་རྩོད་དེ་འདྲ་ཞིག་ཤོར་བ་རེད། ང་རང་ལ་དམིགས་བསལ་གྱིས་དམིགས་ཡུལ་གཞན་ཞིག་ཡོད་པ་ནི་མོ་རང་གི་སེམས་ནང་དུ་གཏན་ནས་དྲན་མི་སྲིད་པ་ཡིན། ངས་མོ་དང་ཡང་ན་བུད་མེད་གཞན་སུ་ཞིག་དང་འགྲོག་རུང་། ང་རང་ལོ་ན་བཞི་བཅུ་བརྒལ་རོགས་བར་མ་གཏོགས་འདུག་རྩིས་མེད། དེའི་བར་དུ་ང་རང་གསོན་པོ་གནས་ཐུབ་སོང་བ་ཡིན་ན་ནི། ལོ་ངོ་བཞི་བཅུའི་རྗེས་སུ་ང་རང་གི་ནུ་མོ་ལྷ་མོ་སྐྱིད་ཀྱིས་ཀྱང་རང་མགོ་ཐོན་འགྲོ་ངེས་ཡིན་ལ་ང་རང་གི་ཕ་མ་གཉིས་ཀྱིས་རེ་སྐུལ་གྱང་འགྲུབ་སོང་བ་ཡིན་པས། དེ་ནས་བཟུང་ང་རང་གི་རྨི་ལམ་དང་དམིགས་ཡུལ་དེའི་ཕྱོགས་སུ་བསྐྱོད་འདོད་ཀྱི་སེམས་ཤུགས་ལ་ནམ་ཡང་འགྱུར་བ་སོང་མེད།
དེའི་བར་དུ་གངས་མཚོ་དང་ངེད་གཉིས་ཀྱི་བྱིས་པ་དེ་བུ་ཞིག་སྐྱེ་བ་ཡིན་ན་ནི་མོ་རང་གི་འདོད་པ་བཙན་པོ་དེ་ལ་འགྱུར་བ་མ་བཏང་བར་བུ་དེ་ནི་རྗོ་ཤུ་ལུགས་སྲོལ་བཞིན་བུ་ཆུང་གི་ཕོ་མཚན་གྱི་མགོ་ནས་ཤུན་འབག་ཆུང་ཆུང་ཞིག་གཏུབ་ཀྱི་ཡིན་ཟེར་ནས་གཏུབ་ཉིན་ནས་ངེད་གཉིས་ཁག་ཁག་བྱེད་རྒྱུའི་དམ་བཅའ་ཞིག་ང་རང་གི་སེམས་ཁོང་དུ་བཞག་ཡོད་ལ། ཉིན་མ་དེ་སླེབས་དུས་སུ་ངས་མོ་རང་ལ་སྐད་ཆ་རྣ་ལ་མི་ཉན་པ་དེ་བཤད་དགོས་བྱུང་གི་རེད།
ང་རང་གི་ལས་ཀའི་ཕྱོགས་ནས་བརྡ་ལན་གང་ཡང་འབྱོར་མ་སོང་། སང་ཉིན་ནས་ནངས་ཉིན། ད་དུང་ཉིན་ག་ཚོད་ལ་སྒུག་དགོས་མིན་བཤད་ཚོད་མི་ཐུག་གི ཡིན་ཡང་། ལས་ཀ་དེའི་ཕྱོགས་ནས་བཟང་ངན་གང་ཡིན་གྱི་བརྡ་ཞིག་མ་འབྱོར་བར་དུ་ང་རང་གི་འདི་ལྟར་ལས་མེད་དུ་འདུག་དགོས་པ་དེ་ནི་ལྡོག་དུ་མེད་པ་ཞིག་རེད། ང་རང་གི་རེ་བ་ལ་གངས་མཚོས་འཆམ་ནད་འདི་མགྱོགས་པོ་དྲག་ན་འདོད། མོ་རང་ལ་འཆམ་ནད་ཡོད་བཞིན་དུ་ད་དུང་ངེད་གཉིས་ལྷན་དུ་ཕོ་མོའི་འཁྲུག་སྲེད་ལ་སྤྱོད་དགོས་པར་ང་རང་ལ་སྐུལ་ན་ཡང་། ངས་དེ་ལ་གཏན་ནས་ཁས་ལེན་མ་བྱས་པ་ཡིན། མོ་རང་གིས་མི་འདོད་པའི་རྣམ་འགྱུར་རེ་ཟུང་བསྟན་ན་ཡང་སྣང་མེད་དུ་བཞག་ནས་ཉལ་བ་ཡིན། གཅིག་བྱས་ན་ང་རང་གི་བྱེད་སྟངས་འདི་གླེན་རྟགས་ཡིན་སྲིད་ཀྱང་། ངས་མོ་རང་གི་གཟུགས་གཞིའི་བདེ་ཐང་ལ་བསམ་པ་ཡིན། དངོས་ནས་འདོད་ཆགས་ཆེ་ཆུང་གི་ཆ་ནས་བཤད་ན་ནི། ང་རང་འདོད་ཆགས་ཆེ་བ་མེད་ན་ཆུང་བ་མེད་པ་ཡིན་མོད། གནད་ལ་ཐུག་དུས་ངས་འདི་ལྟར་བྱེད་ཐུབ་ཀྱི་ཡོད།༡༡།༢།༠༩
མུ་འགོད།
བཀླགས་པ་ཡིན། ངེད་ཚང་ལ་ཡོང་ནོ་ཤེས་ནས་མ་ཚད་དགའ་ཡོད།