དེ་རིང་བཞུགས་སྒར་དུ་གཞུང་འབྲེལ་མིན་པའི་ཚོགས་པ་འགས་རྒྱ་གར་རང་བཙན་གྱི་ཉིན་མོ་སྲུང་གཙི་གནང་སྟེ། རྒྱ་གར་གྱིས་ལོ་ངོ་མང་པོར་རང་བཙན་འཐབ་རྩོད་བྱས་པ་དང་། ལྷག་པར་དུ་འཚེ་མེད་ཞི་བའི་ལམ་ནས་འཐབ་རྩོད་བྱས་ཏེ་རྒྱལ་ཁ་ཐོབ་པ་དེ་མིག་དཔེར་སྟོན་ཆེད་ཡིན་ཟེར།
དེ་རིང་ཕྱི་ཚེས་ ༡༥སྟེ་རྒྱ་གར་རང་བཙན་ཐོབ་པའི་ཉིན་མོར་བོད་རང་བཙན་སློབ་ཕྲུག་ཚོགས་པ་དང་བོད་ཀྱི་དགུ་བཅུ་གསུམ། ངྷ་ས་ས་གནས་གཞོན་ནུ་དང་བུད་མེད། བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་བཅས་ཚོགས་པ་ལྔས་གོ་སྒྲིག་འོག་ངྷ་ས་ཉིན་མོ་སློབ་གྲྭའི་ཚོགས་ཁང་དུ་རྒྱ་གར་རང་བཙན་གྱི་ཉིན་མོ་ཐེངས་ ༦༥ པ་སྲུང་གཙི་བྱས་ཡོད་ཅིང་། དུས་དྲན་གྱི་སྐུ་མགྲོན་གཙོ་བོར་བཞུགས་སྒར་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨཱ་རྗེལ་མོན་གྷོ་ཌི་ཡཱ་དང་དྲུང་ཆེ་ཕུ་རེམ་སཱ་གྷ་རྣམ་གཉིས་གཙོས། གཞུང་འབྲེལ་མིན་པའི་ཚོགས་པ་ཁག་གི་ཚོགས་མི་དང་བཞུགས་སྒར་མི་མང་བཅས་མི་གྲངས་ ༢༠༠ ལྷག་འདུ་འཛོམས་བྱུང་ཡོད།
མཛད་སྒོའི་ཐོག་སྐུ་མགྲོན་གཙོ་བོ་མཆོག་ནས་རྒྱ་གར་གྱི་རྒྱལ་དར་བསྒྲེངས་འཛུགས་དང་ས་གནས་མི་མང་མཉམ་འཛོམས་ཐོག་རྒྱ་གར་གྱི་རྒྱལ་གླུ་དང་བོད་ཀྱི་རྒྱལ་གླུ་གྱེར་འདོན་གནང་རྗེས། ངྷ་ས་ས་གནས་གཞོན་ནུའི་ཚོགས་གཙོ་བསྟན་འཛིན་བརྩོན་འགྲུས་ལགས་ཀྱིས་ཐེངས་འདིའི་དུས་དྲན་ངོ་སྤྲོད་དང་འབྲེལ། སྔོན་མར་བཞུགས་སྒར་དུ་བོད་པ་ཚོར་རྒྱ་གར་རང་བཙན་གྱི་ཉིན་མོ་སྲུང་གཙི་བྱས་པའི་ལུགས་སྲོལ་ཡོད་ཀྱང་། བར་སྐབས་ཤིག་ནས་དུས་དྲན་སྲུང་གཙི་མེད་པར་ཆགས་ཡོད་སྟབས། ད་ལོ་ལས་འགུལ་དེ་བསྐྱར་འཛུགས་ཀྱིས་སྔར་གྱི་ལུགས་སྲོལ་རྒྱུན་འཁྱོང་བྱ་འཆར་ཡོད་ཚུལ་བརྗོད་བྱུང་།
རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ཀྱིས། “རྒྱ་ནག་གཞུང་གིས་དྲག་གནོན་གདུག་རྩུབ་འོག་བོད་པའི་རང་བཙན་འཐབ་རྩོད་པ་མང་པོ་རྐྱེན་འདས་དང་བཙོན་འཇུག་བྱེད་བཞིན་ཡོད་སྟབས། སྐབས་རེར་བོད་མི་མང་པོ་ཞིག་ང་ཚོའི་འཐབ་རྩོད་ལ་གྲུབ་འབྲས་མེད་པའི་ཐེ་ཚོམ་སྐྱེ་བཞིན་ཡོད་ཀྱང་། རྒྱ་གར་འདི་ཡང་ད་ལྟ་ང་ཚོའི་ཁ་གཏད་ལས་ལྷག་པའི་སྟོབས་ཆེན་དབྱིན་ཇིའི་འོག་ལོ་ ༢༠༠ རིང་གི་འཐབ་རྩོད་བརྒྱུད་རང་བཙན་ཐོབ་ཡོད་སྟབས། ང་ཚོས་རྒྱ་གར་བས་ལོ་དུ་མར་འཐབ་རྩོད་བྱས་པ་དང་། ལྷག་པར་དུ་ཞི་བའི་ལམ་ནས་འཐབ་རྩོད་བྱས་པ་དེ་མིག་དཔེར་བཟུང་དུས་དྲན་འདི་སྲུང་གཙི་བྱེད་ཀྱི་ཡོད”། ཅེས་བརྗོད་བྱུང་།
བསྟན་འཛིན་བརྩོན་འགྲུས་ལགས་ཀྱིས་ད་ལྟ་རྒྱ་ནག་གིས་བོད་མི་ཚོར་ཁྲིམས་དང་དམག་གིས་བཙན་གནོན་བྱེད་ཀྱི་ཡོད་ཀྱང་། ད་དུང་བོད་མི་ཚོའི་སེམས་ཀྱི་རང་དབང་ཤོར་མེད་སྟབས། རང་བཙན་ཐོབ་རྒྱུར་རེ་བ་བྲལ་བའི་གནས་སྟངས་ཆགས་མེད་པའི་དྲན་གསོ་བྱ་ཆེད་ཡིན་སྐོར་ཡང་བརྗོད།
དེ་བཞིན་སྐུ་མགྲོན་གཙོ་བོ་སྐུ་ཞབས་ཨཱ་རྗེལ་མོན་གྷོ་ཌི་ཡཱ་མཆོག་གིས་ཀྱང་། བོད་མི་ཚོར་འཛམ་གླིང་ནང་སྙན་གྲགས་དང་ཀུན་གྱི་གཙུག་ཏུ་བཀུར་བཞིན་པའི་དབུ་ཁྲིད་༸གོང་ས་མཆོག་ཡོད་པ་དེ་གཞན་དང་མི་འདྲ་བའི་ནུས་པ་ཞིག་ཡིན་པ་དང་། དེ་ཡང་བོད་པ་ཙམ་མིན་པར་རྒྱལ་གར་བ་དང་ཕྱི་གླིང་བ་ཚང་མས་ཁོང་གི་བཞུགས་གནས་ལ་བདེ་འཇགས་དང་གཙང་སྤྲ་བྱ་རྒྱུ་དང་། རྒྱལ་ཁབ་དང་ཡུལ་ཁྲིམས་བརྩི་སྲུང་ཡག་པོ་བྱ་དགོས་པའི་ལམ་སྟོན་གནང་བྱུང་བར་མ་ཟད། ད་ལྟ་བོད་མི་ཚོས་རྒྱ་གར་གྱི་རང་བཙན་ཉིན་མོ་སྲུང་གཙི་བྱེད་བཞིན་པ་ལྟར། མ་འོངས་པར་རྒྱ་གར་དང་བོད་པ་མཉམ་རུབ་ཐོག་རྒྱལ་ས་ལྷ་སར་བོད་རང་བཙན་གྱི་ཉིན་མོ་སྲུང་གཙི་བྱ་རྒྱུའི་ཉིན་མོ་ཞིག་ཡོང་བར་འབད་བརྩོན་བྱ་དགོས་སྐོར་སོགས་གསུངས་བྱུང་།
ཐེངས་འདིའི་དུས་དྲན་ཐོག་སྐུ་མགྲོན་རིམ་པའི་རྒྱ་བོད་དབྱིན་གསུམ་གྱི་འདས་པའི་རྒྱ་གར་རང་བཙན་གྱི་ལོ་རྒྱུས་དང་འབྲེལ་ཏེ་མ་འོངས་བོད་ཀྱི་གནད་དོན་སེལ་ཐབས་ཀྱི་ཐད་ནས་གཏམ་བཤད་གནང་བར་མ་ཟད། ཐང་སྟོང་གླུ་གར་ཚོགས་པ་དང་རྒྱ་གར་གྱི་ཇཱ་ཀོ་རེ་བུད་མེད་ཚོགས་པ། ངྷ་ས་ཉིན་མོ་སློབ་གྲྭ ཡོངས་གླིང་སློབ་གྲྭ་བཅས་ཚོགས་པ་དང་སློབ་གྲྭ་ཁག་ཅིག་གིས་གཞས་སྣ་འཁྲབ་སྟོན་ཡང་གནང་སོང་།
གསར་འགོད་པ། དོན་གོ
