ཁོང་ཚོས་བཟོད་པའི་གོ་ཁྲབ་གྱོན་འདུག

རིགས་སློབ། རིན་ཆེན།

ང་ཚོའི་བོད་ལ་ཤིན་ཏུ་ནས་དྲག་བསྐྱེད་དཀའ་བའི་ནད་རྙིང་གཅིག་ཡོད་པ་ནི་གནད་དོན་ཆུང་ངུ་ཙམ་གྱིས་ནང་དམེ་རྒྱུན་མ་ཆད་པ་དེ་ཡིན། བོད་ས་ཁྱོན་ཡོངས་སུ་རྩ་ས་རྩོད་གླེང་དང་། རྐུན་ཅག་འཕྲོག་གསུམ། གཉེན་སྒྲིག་སོགས་ཀྱི་དོན་དུ་སྡེ་བ་ཕན་ཚུན་དང་ཕྱོགས་ཁག་ཕན་ཚུན་མི་སྒེར་ཕན་ཚུན་བར་དུ་འཁྲུག་འཛིང་ཤོར་ཏེ་རང་གི་བུ་ཤི་ན་ཕ་རྒན་ཡང་ཤི་ཞིང་རང་གི་ཚ་བོ་ཤི་ན་ཨ་ཁུ་ཡང་ཤི་བའི་གནས་ཚུལ་བྱུང་མྱོང་ཡོད་ལ། ས་ཆ་འགའ་ཞིག་ཏུ་ད་དུང་ཡང་གནས་ཚུལ་དེ་འདྲ་ཪིགས་མུ་མཐུད་དུ་འབྱུང་བཞིན་ཡོད། ལྷག་པར་དུ་ད་ལོ་བོད་ལ་སོང་བའི་ཕ་ཡུལ་ནས་གནས་ཚུལ་གོ་བ་ལྟར་ན་རང་རེའི་ལུང་པ་ཞིག་ཏུ་བོད་རིགས་དཔོན་པོ་ཞིག་གིས་སྒོར་ལ་ངོམས་ཏེ་སྤུན་ཟླ་དྲུག་བདུན་ཙམ་བསད་དེ་སྲོག་ཐོག་གི་ཉེས་པ་ཕོགས་པ་དང་། རང་གི་རྫོང་དུ་མི་བསད་འཕྲོག་བཅོམ་གྱིས་ལས་བྱས་ཏེ་འདུག་ས་མེད་པར་རྫོང་གཞན་དུ་གནས་སྤོ་མཁན་ཡང་མི་ཉུང་བ་ཞིག་ཡོད་རབས་འདུག འདིའི་སྐོར་རྩད་གཅོད་བྱེད་ཚེ་དོན་རྐྱེན་འབྱུང་གཞི་དངོས་ནི་རྒྱ་ནག་གཞུང་གིས་བོད་ལ་ཡར་རྒྱས་གཏོང་ཟེར་བའི་ཁྲོད་དུ་གནད་དོན་མང་པོ་ཞིག་འཕྲད་ཀྱིན་ཡོད་པའི་ནང་གི་གཅིག་ཡིན།

ལར་ནས་ང་ཚོ་བོད་ལ་དགྲ་འདུལ་གཉེན་སྐྱོང་ཞེས་པའི་སྐྱེས་པ་ཕོ་རྣམས་ལ་སློབ་གསོ་ཐེབས་པའི་ཚིག་ཅིག་ཡོད་ལ། གོ་དོན་ནི་རང་ཕྱོགས་སུ་དགྲ་ཚུར་བྱུང་བའམ་ཡང་ན་དགྲ་ཕར་འདུལ་བའི་ཚེ་འདུལ་མ་ཐུབ་པའམ་མ་ཕོད་ཚེ་དེ་ནི་སྐྱེས་པ་ཕོ་ཞིག་ཏུ་སྐྱེས་གོ་མ་ཆོད་པའམ་སྐྱེས་ཀྱང་སྐྱེས་དམན་ཞིག་གི་སྙིང་ལས་མི་འདུག་ཅེས་གྲོང་པ་ཁྱིམ་མཚེས་ཀུན་གྱིས་ཁྱོད་གྲལ་མགོ་ལ་ཡོད་ཚེ་མཇུག་གྲལ་དུ་ཕུད་ཅིང་གྲལ་མཇུག་ཏུ་ཡོད་ན་ཐག་རིང་ཞིག་ལ་རྒྱང་འཕེན་དུ་ བཏང་སྟེ་མཐོང་ཆུང་དང་གཉའ་གནོན་གྱི་བརྙས་བཅོས་བཟེད་དགོས་པ་ནི་དུས་ད་ལྟའང་བོད་རིགས་གང་མང་ཞིག་གི་ཤ་གསེང་རུས་གསེང་དུ་ལུས་དང་གྲིབ་མ་བཞིན་དུ་འཐིམས་ནས་ཡོད་པས། ངས་བསམ་པར་བོད་ལ་ནང་དམེ་དངོས་རྒྱུན་མ་ཆད་པར་འབྱུང་དགོས་དོན་ཡང་ཚིག་འདིའི་ནུས་པས་སློབ་གསོ་མི་ཉུང་བ་ཞིག་ཐེབས་ཡོད་པས་ཀྱང་ལོས་ཡིན་ལ། ཚིག་འདི་མི་ཞིག་གིས་བསྟན་བཅོས་ཤིག་ཏུ་རང་བཟོ་བྱས་ཏེ་བོད་རིགས་མི་མང་ཡོངས་ཀྱི་སེམས་ལ་བག་ཆགས་ཟབ་མོ་བཞག་སྟེ་བཙན་གྱིས་མི་ཆོས་ཀྱི་ཁ་ཕྱོགས་བསྒྱུར་ཡོད་མིན་བཤད་དཀའ་ཡང་། གེ་སར་ཞེས་པའི་ང་རྒྱལ་ཁྱོད་ཕམ་གྱི་ལྷ་སྒྲུང་ངམ་མི་ཆོས་ཀྱི་གཏམ་རྒྱུད་ཁ་རུལ་ཅན་དེ་བོད་རིགས་དམངས་ཁྲོད་དུ་དར་བ་ནས་ཚིག་འདིའི་ནུས་པ་སྔར་བས་སད་ཅིང་འཕེལ་ཏེ་ཏག་ཏག་གདོད་མའི་མི་རིགས་ཀྱི་གཤིས་ཀ་རྩུབ་མོ་འདི་མུ་ནས་མུ་རུ་རྒྱུད་སྤྲོད་དང་རྒྱུན་འཛིན་གྱིས་ལས་ལ་གཞོལ་ཏེ་ད་བར་དུ་དར་རྒྱས་བྱུང་ཡོད་པས། དངོས་གནས་དྲག་བསྐྱེད་ཤིན་ཏུ་འབྱུང་དཀའ་བའི་ནད་རྙིང་ཚབས་ཆེན་གཅིག་རེད། ཡིན་ན་ཡང་། ངས་འདི་ནས་ཚིག་འདིའི་འབྱུང་ཁུངས་དང་གོ་དོན་དངོས་ལ་དཔྱད་དེ་བོད་རིགས་ཕལ་ཆེ་བའི་གཤིས་ཀ་ལ་སྐྱོན་ཡོན་སུན་འབྱིན་རྒྱུ་མིན་པར། དེ་ལས་ལྡོག་སྟེ། ཉེ་ཆར་སུ་ཇཱ་སློབ་གྲཱའི་སློབ་མ་འདས་པོ་དེའི་སྤུན་མཆེད་སྐུ་ཞབས་རྣམས་ཀྱིས་བཟོད་བསྲན་ཆེ་བའི་སྤྱོད་ཚུལ་དེར་རང་ཉིད་ཀྱི་མྱོང་ཚོར་བཤད་རྒྱུ་ཡིན།

མ་གཞི་དེང་གི་སྤྱི་ཚོགས་སུ་རང་ངོས་དང་གཞན་ངོས་གཉིས་ཀ་ནས་གྲྭ་པ་ཞེས་པ་འདི་སྤྱི་ཚོགས་ཀྱི་ཁུར་པོ་ཞིག་ལ་འགྲེལ་བཤད་བརྒྱབ་སྟེ་མང་པོ་ཞིག་གིས་དེ་ལ་དགག་པ་དང་སུན་འབྱིན་བྱེད་ཅིང་། གྲྭ་པ་སྣང་བ་སྐྱིིད་པོ་འགའ་ཞིག་གིས་ཀྱང་དེ་ནི་དངོས་ཡོད་དུ་བསམ་སྟེ་གྲྭ་ཆས་དང་ཚུལ་ཁྲིམས་ཆོས་གོས་སོགས་ཐམས་ཅད་གཅིན་སྐྱག་བཞིན་དུ་དོར་ཏེ་གང་ས་གང་དུ་སྤྱི་ཚོགས་ཀྱི་ཁུར་པོ་གྲཱ་པ་ལས་ཀྱང་ལྕི་བའི་རྡོག་ཁྲེས་ཤིག་ཏུ་འགྱུར་བཞིན་པ་ནི་འགའ་ཞིག་གིས་བློ་ཡིད་དུ་མི་ཤོང་བ་ཞིག་ཡིན་སྲིད་ཀྱང་། ངས་ནི་དེ་ནི་ཆོས་ཉིད་ཅིག་ལས་མ་འདས་སྙམ་སྟེ་བཏང་སྙོམས་རང་གི་གནས་སུ་བཞག་རྐྱང་བྱེད་ཀྱིན་ཡོད་མོད། འོན་ཀྱང་ན་ནིང་འཇིགས་ཤིང་སྐྱི་གཡའ་བའི་ཡུལ་ཤུལ་གྱི་ས་ཡོམ་རྒུད་སྐྱོབ་ཁྲོད་དུ་ནམ་རྒྱུན་གུང་ཁྲན་ཏང་གིས་ང་ཚོའི་དམར་དམག་རྣམས་ནི་མི་མང་གི་བདེ་འཇགས་སྲུང་སྐྱོབ་བྱེད་མཁན་ཡིན་ཞེས་དབུགས་འགག་འགག་བར་དུ་བཤད་པའི་མི་དེ་དག་ནི་གཞན་དག་རྒུད་པའི་གཡང་ནས་སྐྱོབ་རྒྱུ་ཕར་ཞོག་རང་ཉིད་ཀྱི་སྲོག་འཆོར་བའི་འཇིགས་སྐྲག་གིས་གང་ས་གང་དུ་བྲོས་ཏེ་སྣང་མེད་དུ་ལུས་སྐབས། ཤི་རོ་དང་རྨས་མ་རྣམས་ལ་རང་གི་སྲོག་བཞིན་དུ་གཅེས་ཤིང་ཕོངས་པའི་སྒོ་ནས་ཤི་འཐམས་རོ་འཐམས་ཀྱིས་རྒུད་སྐྱོབ་ཀྱི་བྱ་བ་རྩོམ་མཁན་རྣམས་ནི་དཱངས་གཙང་ལྷད་མེད་ཀྱི་གཞན་དོན་ལྷུན་ལེན་པའི་སྐུ་ཞབས་མགོ་རིལ་ཚོ་ཡིན་པར་མཐོང་དུས་རང་རེའི་བོད་ལ་རང་དོན་ལས་གཞན་དོན་གཙིགས་སུ་བཟུང་བའི་ཁྱད་འཕགས་ཀྱི་སྲོལ་རྒྱུན་ཡོད་པ་འགའ་ཞིག་ལ་དངོས་སུ་ར་འཕྲོད་བྱུང་ཡོད་པ་སྨོས་ཅི་དགོས།

འདི་ནི་ཁོང་ཚོས་ཚེ་འདི་བློས་བཏང་གིས་འབྲོག་དགོན་པའི་ཡུལ་དུ་གནས་བཅས་ཏེ་ཤཀྱཱ་ཐུབ་པའི་མི་ཚེའི་མྱོང་ཚོར་ལ་གོ་བ་ཟབ་མོ་ལོན་ཡོད་པའི་རྟགས་ཡིན་ལ། འདི་ནི་གཞན་གྱིས་འགྲམ་མཆུ་ཤོར་སའི་རིག་གཞུང་འདིའི་གསང་བའི་སྒྱུ་རྩལ་གྱི་མཛེས་ཤིང་སྡུག་པའི་རི་མོ་རྣམས་ང་དང་ངའི་མ་གཏོགས་བསམ་དུ་མེད་པའི་འཛམ་གླིང་མི་མང་ཡོངས་ཀྱི་མིག་མདུན་དུ་མིག་དཔེར་འོས་པའི་འགྲེམ་སྟོན་ཐེངས་གཅིག་བྱས་པའམ་ཡིན། ལྷག་པར་དུ་དེང་སང་གི་འཇིག་རྟེན་འདི་ནི་ཆོས་ལུགས་དང་མི་རིགས་ཁ་ལ་འཁྱེར་ཏེ་གང་ས་གང་དུ་དྲག་སྤྱོད་པའི་དམག་འཁྲུག་གི་གཡུལ་སར་གྱུར་ཡོད་ལ། སྔ་ཕྱི་ཙམ་མ་གཏོགས་ས་ཆ་དང་སྐྱེ་འགྲོ་ཀུན་སྡེབ་གཅིག་ཏུ་ཐལ་བར་བརླག་སྲིད་པའི་འབམ་ཞེས་པའི་མཚོན་ཆ་ཆེས་འཇིགས་སྐྲག་སྐྱེ་ཡུལ་དེའི་དབང་འོག་ཏུ་ལྷུང་སྲིད་པ་ལྷ་དང་བླ་མའི་ལུང་བསྟན་ཡོད་མེད་ཅི་ལྟར་ཡང་ཚོད་དཔག་བྱེད་ཐུབ་པ་ཞིག་ཏུ་གྱུར་ཡོད་པར་མ་ཟད། ཉེ་ཆར་འཛམ་གླིང་གི་ཞི་བདེའི་རྒྱལ་ཁབ་ཏུ་གྲགས་པ་འབར་བའི་ནོ་ཝེ་རུ་མི་གཅིག་གིས་མེ་མདའ་བརྒྱབ་ཏེ་ཉེས་མེད་མི་གྲངས་དྲུག་ཅུ་ཡས་མས་ཤིག་རྐྱེན་ལམ་དུ་བཏང་བ་ང་ཚོས་མཐོང་མེད་ནའང་གོ་ཡོད་པ་རེད། ད་དུང་སྒེར་གྱི་དབང་ཆ་བདག་བཟུང་བྱ་ཕྱིར་ཏུ་མི་སེར་སྟོང་ཕྲག་དུ་མ་ཉིན་རེ་བཞིན་དུ་དམར་གསོད་བྱེད་བཞིན་པ་ཁ་སིང་དེ་རིང་གསར་འགྱུར་བརྒྱུད་ལམ་ཁག་ཏུ་ཡང་ཡང་བསྟན་དང་སྟོན་བཞིན་འདུག་པ་ཀུན་གྱི་མཐོང་ཆོས་སུ་གྱུར་ཡོད།

 འདི་དག་ཐམས་ཅད་མཐར་གཏུགས་ན་ང་དང་ངའི་ཞེས་པའི་འདུ་ཤེས་དྲག་པོ་དེས་བཟི་སྟེ་མགོ་རྨོངས་ཀྱིན་ཡོད་པ་ཐག་བཅད་ནས་བཤད་ཐུབ། དུས་སྐབས་འདི་འདྲ་ཞིག་ལ་གདན་ས་ཆེན་མོ་སེ་རའི་སྐུ་ཞབས་དེ་ཚོས་རང་གི་སྤུན་མཆེད་གཞན་གྱིས་རྐྱེན་ལམ་དུ་བཏང་བ་ལ་ཤིན་ཏུ་ནས་ཡིད་སྐྱོ་ཞིང་གནོང་འགྱོད་དྲག་པོ་ཡོད་པ་ལ་མ་བལྟས་པར་ཆེ་ས་ནས་བཤད་ན་རང་ལས་གཞན་གལ་ཆེ་ཞིང་། ཤི་བ་ལས་གསོན་པོར་འགངས་ཆེན་དུ་མཐོང་སྟེ་སྙིང་རྗེ་ཞིང་ཤ་ཚ་བ་དང་། ཆུང་ས་ནས་བཤད་ན་ཁོང་གཉིས་ཀྱང་རང་གི་གཅུང་པོ་འདས་པོ་དང་འདྲ་བར་རང་ཉིད་ཀྱི་ཤ་ཁྲག་ རུས་གསུམ་དང་འབྲེལ་ཞིང་སློབ་མ་གཞན་དང་འདྲ་བར་མི་རིགས་ཉམས་ཐག་པ་འདིའི་མ་འོངས་པའི་སྲོག་རྩ་དང་། རང་དབང་སླར་གསོ་ཡི་སྒྲོན་མེ། རང་ཡུལ་ཕ་མ་གཉིས་ཀྱི་སྙིང་གི་ཟུང་ཁྲག་དང་གཅེས་པའི་སྲོག་ཡིན་པས། ཁོང་གཉིས་ལ་མི་སྟོང་འཇལ་དུ་བཅུག་པ་དང། རྒྱ་གར་བའི་ཁྲིམས་འོག་ཏུ་བཙིར་བ། སློབ་གྲྭ་ནས་རྩ་དགོངས་ཞུ་རུ་བཅུག་པ་སོགས་ཀྱི་ཐ་ཤུལ་གྱི་སྤྱོད་ངན་མཐའ་དག་རྩ་བ་ནས་སྤངས་ཏེ་ཐ་ན་ཁོང་ཁྲོའི་རྣམ་འགྱུར་ཙམ་ཡང་མ་བསྟན་པ་ནི་དངོས་གནས་སྐུ་ཞབས་ཁོང་ཚོས་བཟོད་པའི་གོ་ཁྲབ་གྱོན་པ་མིན་ན་ཅི་ཞིག་ཡིན།

འདི་ནི་མི་ལོ་གཅིག་སྟོང་ལྷག་གི་གོང་དུ་སྲོང་བཙན་སྒམ་པོས་དཀའ་བ་བརྒྱ་ཕྲག་གི་སྒོ་ནས་རྒྱ་གར་ནས་ཚུར་བླངས་པའི་རིག་གཞུང་གཏིང་ཟབ་མོ་དེའི་བཟོད་པའི་ཉམས་ལེན་དངོས་དང་། མི་རིགས་འདིའི་ཡ་རབས་གཞུང་དྲང་གི་སྤྱོད་ཚུལ་དངོས་དེ་ཡིན་ལ། ནོ་བྷེལ་ཞི་བདེ་གཟེངས་རྟགས་བཞེས་མཁན་ཨ་མ་ཊི་རཱ་ས་ཡིས “མི་སྒེར་རེས་རང་ཉིད་ཀྱི་སྒོ་འགྲམ་དེ་གཙང་ཕྱག་བྱས་ན་འཛམ་གླིང་ཧྲིལ་པོའི་ཁོར་ཡུག་བག་གཙང་དུ་འགྱུར་གྱིན་རེད”ཅེས་གསུངས་པ་ལྟར། ངས་ཀྱང་མི་སྒེར་རེ་རེས་བཟོད་པའི་གོ་ཁྲབ་རེ་གྱོན་ན་འཛམ་གླིང་འདི་ཞི་བདེའི་ཁོར་ཡུག་ཅིག་ཏུ་འགྱུར་ཐུབ་ཅེས་ཀྱང་སྨོས་སོ། །