༧གོང་ས་མཆོག་གི་མཇལ་ཁར་རིན་ལེན་པའི་སྲོལ་ཡོད་དམ།

༧གོང་ས་མཆོག་གིས་ཉིན་གསུམ་རིང་འཇར་མན་གྱི་གྲོང་ཁྱེར་ཧམ་བྷོག་དང་ཧེ་སིན་མངའ་སྡེའི་གནད་ཡོད་མི་སྣ་དག་དང་མཇལ་འཕྲད་ཀྱིས་རླབས་ཆེན་གྱི་མཛད་འཕྲིན་བསྐྱངས་ཡོད་ཀྱང་། གཟའ་ལྷག་པའི་ཉིན་བོད་རིགས་ཚོར་མཇལ་ཁ་གནང་སྐབས། བོད་རིགས་ཚོགས་པས་མི་རེར་ཡུ་སྒོར་བཅུ་རེ་བླངས་པའི་གནས་ཚུལ་ཞིག་བྱུང་ཡོད།

༧གོང་ས་སྐྱབས་མགོན་ཆེན་པོ་མཆོག་གིས་ཧྥ་སན་སི་དང་ཨེ་སི་ཏོ་ནེའུ། ཧྤིན་ལན་ཌི་སོགས་ཀྱི་ནང་གི་མཛད་འཕྲིན་ཁག་ལེགས་པར་གྲུབ་རྗེས་འཇར་མན་གྲོང་ཁྱེར་ཧམ་བྷོག་དང་། སྤྱི་ཚེས་ ༢༢ ཉིན་ཧེ་སིན་མངའ་སྡེའི་གྲོང་ཁྱེར་ཝེ་སི་བྷ་ཌན་ལ་ཕེབས་སྐབས། མངའ་སྡེ་གཞུང་གིས་ཕེབས་བསུ་གཟབ་རྒྱས་ཞུས་འདུག་ལ། ཉིན་གསུམ་རིང་མངའ་སྡེའི་སྤྱི་ཁྱབ་པ་གཙོས་བའི་སྲིད་དོན་མི་སྣ་དང་བོད་དོན་རྒྱབ་སྐྱོར་བ། གཞན་ཡང་སོག་རིགས་དང་རྒྱ་རིགས། ཡུ་གུར་བ་སོགས་ལ་མཇལ་ཕྲད་གནང་ཏེ་བོད་རྒྱའི་བར་གྱི་དཀའ་རྙོག་སྐོར་གྱི་བཀའ་སློབ་གནང་ཞིང་། ཚེས་ ༢༣ ཉིན་༧གོང་ས་མཆོག་བཞུགས་གནས་ཀྱི་མགྲོན་ཁང་ནས་མངའ་སྡེའི་གྲོས་ཚོགས་ཁང་བར་སྐར་མ་བཅུ་ཙམ་རིང་ཞབས་ཐང་དུ་ཕེབས་སྐབས། སྲང་ལམ་གཡས་གཡོན་དང་ཁང་བརྩེགས་དག་ཏུ་མི་ཧ་ཅང་མང་པོས་འཚངས་ཁ་ཤིག་ཤིག་གིས་༧གོང་ས་མཆོག་ཡུལ་འདིའི་ནང་སླར་ཡང་ཞབས་སོར་འཁོད་པར་དགའ་བསུ་ཆེན་པོ་ཞུས་སོང་།

མངའ་སྡེའི་གྲོས་ཚོགས་སུ་༧གོང་ས་མཆོག་གིས་ཧེ་སིན་ཡུལ་གྱི་གཞུང་དམངས་གཉིས་ཀྱིས་ད་ལྟའི་བར་བོད་དོན་ལ་རྒྱབ་སྐྱོར་དང་བོད་པར་རོགས་རམ་གནང་བར་ཐུགས་རྗེ་ཆེ་ཞེས་གསུང་བཤད་གནང་འདུག དེས་རྗེས་གྲོས་ཚོགས་ཀྱི་ཚོགས་གཙོ་མཆོག་གིས་གསུངས་དོན། “ ༧གོང་ས་ཏཱ་ལའི་བླ་མ་མཆོག་གྲོས་ཚོགས་འདིར་ཐོག་མར་ཆིབས་བསྒྱུར་བ་དེ་ ༡༩༩༥ ལོ་རེད། དུས་དེ་ནས་བཟུང་བོད་དང་ཧེ་སིན་མི་དམངས་ཀྱི་བར་ལ་ལོ་རྒྱུས་ཀྱི་རང་བཞིན་ལྡན་པའི་མཛའ་བརྩེའི་འབྲེལ་བ་ཆགས་ཡོད་པས། འབྱུང་འགྱུར་ཡང་༧གོང་ས་མཆོག་གྲོས་ཚོགས་འདིར་ཡང་ཡང་ཕེབས་པར་ཡུལ་འདིའི་གཞུང་དམངས་གཉིས་ནས་དགའ་བསུ་ཡོད ” ཅེས་བརྗོད་ཡོད་འདུག

ཚེས་ ༢༤ ཞོགས་པར་འཇར་མན་ཡུལ་དུ་གནས་སྡོད་བྱེད་མཁན་བོད་པ་ ༣༠༠ ལྷག་ལ་ཐུགས་དགྱེས་ཚོར་ཆེན་པོས་བཀའ་སློབ་བཀའ་དྲིན་བསྩལ་ཏེ། ཕྱིའི་རྒྱལ་ཁབ་ཁག་ཏུ་གནས་སྡོད་བྱེད་མཁན་བོད་པ་ཚོས་སོ་སོའི་ཕྲུ་གུ་ལ་བོད་ཡིག་བོད་སྐད་བསླབ་རྒྱུར་འབད་བརྩོན་བྱ་དགོས་བའི་ལམ་སྟོན་གནང་གྲུབ་རྗེས། ཕྲུ་གུ་དབང་བོ་སྐྱོན་ཅན་གྱི་སློབ་གྲྭ་ཞིག་ལ་འཚམས་གཟིགས་མཛད་ཏེ། ཕྲུ་གུའི་ཕ་མ་དང་དགེ་ལས་ཡོངས་ལ་ཕྲུ་གུ་འདི་དག་ལ་བརྩེ་བ་ཆེན་པོས་བྱམས་སྐྱོང་གནང་དགོས་བའི་བཀའ་སློབ་གནང་ཏེ། སློབ་གྲྭ་དེར་ཡུ་སྒོར་ཁྲི་ལྔ་ ༥༠༠༠༠ ཡི་ཞལ་འདེབས་བསྩལ་སོང་སྟེ། རྒྱལ་ཁབ་འདིར་བཙན་གཉོམ་དང་དབུལ་ཕྱུག་བར་དབྱེ་འབྱེད་མེད་པར། ཉམས་ཐག་ལ་རོགས་རམ་ཐོབ་པའི་ཡུལ་ཁྲིམས་ལ་བསྔགས་བརྗོད་གནང་འདུག

རྒྱ་གར་ནང་འཛམ་གླིང་ཤར་ནུབ་ཀུན་ནས་ཕེབས་པའི་དད་ལྡན་པ་ཚང་མར་༧གོང་ས་མཆོག་གི་གསུང་ཆོས་རིན་མེད་དུ་སྩོལ་བཞིན་ཡོད་ཀྱང་། ཕྱི་རྒྱལ་ཡུལ་གྲུ་ཁག་ཏུ་༧གོང་ས་མཆོག་གི་བཀའ་སློབ་གོ་སྒྲིག་གནང་སྐབས་ཚོགས་ཁང་དང་ཁྱབ་བསྒྲགས། བདེ་འཇགས་སྲུང་སྐྱོབ་བཅས་ཀྱི་འགྲོ་གྲོན་ཆེད་འཛིན་བྱང་བཙོང་བའི་ལམ་སྲོལ་ཞིག་སྔོན་ནས་ཡོད་རབས་འདུག ཉེ་བའི་ལོ་འགའི་ནང་ཆོས་ཚོགས་ཁ་ཤས་ཀྱིས་ཀྱང་སོ་སོའི་ཚོགས་པའི་མིང་ཁྱབ་བསྒྲགས་འགྲོ་ཐབས་དང་། དངུལ་བཟོ་ཐབས་སུ་གོང་ཚད་ཧ་ཅང་མཐོ་བའི་འཛིན་བྱང་བཙོང་ཞིང་། ༧གོང་ས་མཆོག་གི་ཆིབས་བསྒྱུར་དེ་གོ་སྐབས་ཤིག་ཏུ་བཟུང་སྟེ་གསུང་ཆོས་ཚོང་བསྒྱུར་བྱེད་བཞིན་ཡོད་སྟབས། ཡུལ་མི་སྐྱོ་བོ་དང་སློབ་ཕྲུག་སོགས་ཀྱིས་༧གོང་ས་མཆོག་གི་གསུང་ཆོས་ཞུ་བའི་སྐལ་བ་ལྡན་གྱི་མེད་པའི་དཀའ་ངལ་འཕྲད་བཞིན་ཡོད།

དེ་སྔ་ཕྱི་རྒྱལ་ཁག་གི་བོད་རིགས་ཚོར་༧གོང་ས་མཆོག་གིས་མཇལ་ཁ་གནང་སྐབས། འཛིན་བྱང་ཉོ་དགོས་པའི་ལམ་སྲོལ་ཡོད་རབས་མེད་ཀྱང་། དེ་རིང་ཞོགས་པ་བོད་པ་རྣམས་ཚོགས་ཁང་མདུན་དུ་འཛོམས་སྐབས། འཇར་མན་བོད་རིགས་ཚོགས་གཙོ་མཆོག་གིས་མི་རེར་ཡུ་སྒོར་ ༡༠ བླངས་ཏེ་མི་མང་བང་བསྒྲིགས་ཏེ་གཏོང་བཞིན་འདུག སྐབས་དེར་ས་གནས་བོད་པ་ཞིག་གིས་ཚོགས་གཙོ་ལ་ཁ་རྩོད་བརྒྱབ་སྟེ། བོད་པ་རང་གིས་༧གོང་ས་མཆོག་གི་བཀའ་ཆོས་ཚོང་བསྒྱུར་བྱས་ན་ཡག་པོ་མིན་སྐོར་བརྗོད་སྐབས། ཚོགས་གཙོའི་འགྲམ་དུ་སྡོད་མཁན་དངུལ་ལེན་མཁན་བུད་མེད་ཅིག་གིས་དངུལ་འདི་དག་ཚོགས་ཁང་གི་གླ་ཆ་རེད་ཅེས་ཡུ་སྒོར་བཅུ་དེ་ངེས་པར་དུ་སྤྲོད་དགོས་པའི་རྣམ་འགྱུར་བསྟན་སོང་།