གནའ་མི་ཚོས་བཤད་རྒྱུན་ཡིན་ན
ང་ནི་ཐན་ལྟས་ཤིག་དུ་གྱུར་ཡོད
རིགས་དང་རུས་པ་མི་གཅིག་པའི་བུད་མེད་ཀྱི་གམ་ན་ཡོད
ཁོག་པར་བུ་མོ་ཞིག་ཀྱང་བརྫངས
མི་ལོ་གཉིས་ཀྱི་གོང་ཏག་ཏག་ལ
དེ་རང་ངའི་བུ་མོས ང་རང་ལ་ཨ་ཕ ཨ་ཕ་ཟེར་ནས་འབོད
བྱམས་བྱམས་དུངས་དུངས་ཀྱིས
ངའི་བུ་མོ་བང་དུ་བླངས་རྗེས
སེམས་གཏིང་ནས་རང་གི་ཉེས་པ་གང་ན་ཡོད་མེད་བཙལ
བུ་མོའི་ཡིད་དུ་འོང་བའི་འཛུམས་མདངས་དང་
རྣ་ལ་ཉན་མི་བདེ་བའི་མི་རིགས་གཞན་གྱི་སྐད
ད་དུང་ ཨ་ཕ་ཟེར་བའི་གཞན་གྱི་གདངས་དེ
གང་ལྟར ཁོ་མོ་ནི་ང་ཡི་ཁྲག་རེད་དམ
ཁོ་མོ་ནི ང་ཡི་ཤ་རེད་དམ
བཤད་རྒྱུན་གང་ལ་བལྟས་དེ་བཤད་དགོས
ཁོ་མོ་ང་ཡི་ཁུ་ཁྲག་གང་གི་ཆ་ལས་ཐོན་པ་རེད
ང་ཡི་བུ་མོ་འདིའི་སྐྱེ་རྒྱུད་ཀྱི་གནས་ཚང་ནི་ང་རང་མིན
ཁོ་མོའི་མ་རྒན་རེད ཁོ་མོའི་མ་རྒན་གྱི་འཇིག་རྟེན་གྱི་དྲོད་གནས་ཡོད་ས་རེད
ང་ལ་བདག་པའི་ཤ་དང་སྐྱི་མོ་གང་ཞིག་ཡོད་དམ
དོན་དངོས་སུ ངའི་བུ་མོ་ལ
ཆེ་ཆུང་དང་ཡག་བཙོག་མེད་པའི་ཤ་སྐྱི་གང་ཞིག་སྤྲད་ཡོད་དམ
ངའི་ཤ་ལས་མཆེད་པར་ཇི་ལྟར་བརྩི་དགོས་སམ
ཤུ་རེ་གོ སྐྱེ་ཁུངས་འདེད་སྟངས་ཤེས་མཁན་དེ་སུ་ཡོད་དམ
གནམ་འོག་འདི་ནས རིགས་རུས་ཀྱི་གཙང་བཙོག
མི་རིགས་ཀྱི་དབྱེ་བ ཆོས་ལུགས་ཀྱི་ཤན་ཤུགས
དཀར་ནག་གི་ངོ་བོ མི་གཤིས་ཀྱི་གྲུབ་ཆ
གང་ནས་བཟུང་དེ འགོ་བརྩམས་པ་ཡིན་ནམ
དེ་དག་ནི་དངོས་ནས་གལ་ཆེའམ
གནད་ཆེ་བའི་དོན་དག་དེ་དག ངས་འཕྱུགས་པ་འདྲ
ཨ་ཕའི་ལོ་ལོ་མ གཞན་གྱིས་བཤད་ན
ཁྱེད་རང་ནི་བོད་མི་ཕྱེད་ཀ་རེད་ཟེར
བོད་མི་ཏག་ཏག་ཞིག་ཡོང་མིན་ནི
སུ་ལ་འདྲི་དགོས་སམ དེ་གང་འདྲ་ཞིག་ཡིན་ནམ
༢༤།༨།༡༡ལ་བྲིས།
སྤུན་ཆུང་ལགས། བསམ་ཚུལ་གཉིས་ལོག་ཀར་སོང་བ་ལ་དགོངས་སེལ་ཞུ་ག་ལ་དགོས། ངས་ཁྱོད་ཀྱི་བསམ་ཚུལ་བརྟན་པོར་བཟུང་བ་ལ་གུས་མདུད་ཞུ།
དེ་ཙམ་ཡིན།
སྙིང་ནས་བརྩེ་བའི་སྤུན་མཆེད་ཐ་ཧར་ལགས། འབོད་སྐུལ་དེར་དང་ལེན་མ་བྱས་པ་དེར་དགོངས་འགལ་མེད་པ་ཞུ།
སྤུན་ཟླ་གཞན་དག་ཕེབས་ནས་རང་རང་གི་བསམ་ཚུལ་ལྷུག་པོར་སྨྲས་པ་དེར་དགའ་ནས་ཡོད། རྗེས་སུ་ཕེབས་རྐྱང་བྱོས། ངས་ག་དུས་ཡིན་ཡང་རང་གི་ཟིན་བྲིས་ཀྱི་སྒོ་མོ་དྲ་ཐོག་གི་བོད་རིགས་སྤུན་ཟླ་བོད་ཡིག་གི་རྫི་བོ་ཡོངས་ལ་ཕྱེ་ནས་ཡོད།
ཕ་ལ་རིགས་ན་བོད་པ་གཙང་མ་རེད། མ་ལ་རིགས་ན་དབྱིན་ཇི་གཙང་མ་རེད། གཉིས་ཀྱི་བར་གྱི་བུ་ཕྲུག་གང་འདེམས་བྱ། ཧ་ཧ་ཧ་
རིགས་རུས་ལ་དབྱེ་བ་མེད་ཀྱང་མི་རིགས་རང་ག་བ་ཞིག་གིས་ངོས་ནས་བཤད་ན་ཁྱོད་ཀྱི་བུ་མོ་དེ་དངོས་གནས་བོད་མི་ཕྱེད་ཀ་ཞིག་ཡིན་ཐག་ཆོད་རེད། ཡིན་ན་ཡང་བུ་མོ་དེས་མ་འོངས་པར་འབད་རྩོལ་ལ་བརྟེན་ནས་བོད་མི་རིགས་ལ་སྨན་པའི་ལས་ཀ་བྱས་ནས་བོད་མི་ཆ་ཚང་ཞིག་ལས་ཁྱད་དུ་འཕགས་པ་ཞིག་ཏུ་ད་གཟོད་ཁྱོད་ཀྱི་ཁ་བསྒྱུར་རན་པ་རེད། ཤ་ཁྲག་ལགས་སེམས་མ་ཕམ་དང་འབྱུང་འགྱུར་ཁྱོད་ཀྱི་བུ་མོ་དེ་བོད་མི་རིགས་ཀྱི་སྲོག་རྩ་ཞིག་འབྱུང་བར་ངེས།
ཁ་དཔེ་ལ་་་་ལོ་རྒས་དུས་ཡུལ་དྲན་པ་དང་བྱ་རྒས་དུས་འཚང་ལ་འཁོར་བ་ཆོས་ཉིད་རེད། སྐྱོན་ཡོད་ནི་མ་རེད་་་ཤུ་རེ་བྱོས།
བོད་ཤ་ཁྲག་རུས་ལགས། ཁམས་བཟང་།
ངས་བསམ་པར་བུ་མོ་ཆུང་ཆུང་མ་ཁྱེད་ཀྱི་སྙིང་ཉེར་བའི་གཅེས་ཕྲུག་རེད། ཁོང་བོད་མི་རེད། ད་ལོའི་བོད་ཀྱི་མཛངས་མ་ཡང་མིག་སྔོན་པོ་རེད། མ་འོང་པ་ཁྱེད་ཀྱི་བུ་མོ་དཀར་པོ་འདི་ཡང་བོད་ཀྱི་མཛངས་མ་ཆགས་སྲིད་པ་རེད།
ཁྱེད་ཀྱི་མི་ཚེ་ཡོངས་རྫོགས་བུ་མོའི་ཨ་མའི་མཉམ་དུ་སྡོད་ཐུབ་ཀྱི་མ་རེད་འདོད། ཁྱེད་དང་ཁྱེད་འདྲ་བ་རེ་གཉིས་ཡོད་ཀྱང་མཐའ་མ་ཁ་བྲལ་འགྲོ་གི་འདུག རྒད་པོ་ཆགས་དུས་སུ་བོད་མོ་ཞིག་གི་དགའ་ནི་རེད། ཉིན་མ་གཅིག་ཁྱེད་ཀྱིས་བོད་མོ་ཞིག་ལ་མི་ཚེ་སྐྱེལ་རོགས་བྱེད་དགོས་པ་ནི་དངོས་པོ་ཆོས་ཉིད་འདྲ་རེད་དོ།
སྙན་ངག་ཟོ་ཆི་ཟིག་བྲིས་ན་འགྲིག་ནི་རེད། ལེན་དགོས་དོན་ཡོད་པ་མ་རེད། མ་གཞི་ནས་ཁྱོད་ཀྱི་བུ་མོའི་རུས་པ་ཁྱོད་ཡིན་ནི་རེད། ཤ་སྐྱི་གཉིས་ཀ་ཨ་མའི་ཡིན་ནི་རེད། འདི་སྨན་གཞུང་ནས་བཤད་སྟངས་རེད། གང་ལྟར་ངོ་ལྟོས་དང་། ཨ་ཕ་ཨ་ན་མ་ན་རེད། དེའི་ཕྱིར་ཤ་སྐྱི་གཉིས་ལའང་ཁྱོད་དང་འབྲེལ་བ་ལོས་ཡོད་བསམས་པ་ཞིག་རེད།
ངའི་རེ་བ་ཡིན་ན་ཁྱོད་ཀྱི་སྙན་རྩོམ་འདི་ཕྱིར་བསྡུ་བྱེད་རོགས། མ་དགའ་བ་དང་མ་འདོད་པ་སོགས་རྩ་བ་ནས་མིན། ཁྱོད་ཀྱི་བུ་མོ་བོད་པ་ཡིན་མིན་གཙོ་བོ་མ་རེད། གཙོ་བོ་བུ་མོ་ལ་མི་ཚེ་ཡག་པོ་ཞིག་ཡོང་མིན་དེ་རེད། ཁྱེད་རང་ཡིད་དུ་འོང་བའི་བུ་མོ་འདིའི་ཕ་རྒན་ཆགས་ལ་པ་ཉེས་པ་འདྲ་རྩ་བ་ནས་ཡོད་པ་མ་རེད་དེ་སེམས་ལ་བཟུང་། རང་གིས་རང་སྡུག་ལ་སྦྱར་བའམ་སེམས་སྡུག་བྱེད་སའི་ཐབས་ལམ་འདྲ་བཙལ་ནས་ཡོང་རྒྱུ་མེད་པ་ཤེས་དགོས།
ཁྱོད་ཀྱི་སྙན་རྩོམ་འདི་མི་ཡག་གི་དང་ཚོར་བ་མི་འདུག་ཟེར་ནས་བཤད་ཀྱི་མེད། ཡིན་ན་ཡང་སྙན་རྩོམ་འདི་ལེན་ཐུབ་ན་ལེན་རོགས་གནང་།