དངོས་ནས་བདག་གི་བུ་ཆུང་ཁྱོད
ཡོང་ལ་ཉེ་བ་ཡིན་ནམ
ཁྱོད་ཀྱི་ཨ་མས་བཤད་ན
ང་ལ་གྲྭ་སྒྲིག་བྱོས་ནས་བསྡོད་ཟེར
མོ་རང་རླངས་འཁོར་གྱི་ཁ་ལོ་བ་རེད
ད་དུང་ ཁྱེད་ཀྱི་ཨ་ཅེ་ཐར་མ་མཚོ་ཡང་ཡོད
དེ་བས་ག་ལ་ཚད ཁྱེད་ཀྱི་ཨ་མྱེ་ལ་རས་ཀྱང་ཡོད
ཁྱོད་ཀྱིས་རང་གི་དྲིན་ཆེན་མ་ལ་དཀའ་ལས་མ་བཟོ
ཕ་རྒན་ངས་འདི་ན་སྒུག་ཡོད
ཁྱེད་རང་ཡོང་བར་སྒུག་ཡོད
འཇིག་རྟེན་ཁམས་ཆེན་མོ་འདིར་གོམ་པ་འཇོག་པར་སྒུག་ཡོད
རེ་བས་བལྟས་དེ་ཡོད སྐྱེ་བ་དོན་ཡོད་པ་ཞིག་ཡོང་བར་ཤོག
མི་ལུས་བླངས་པ་དོན་གོ་ཡོད་མཁན་ཞིག་འཁྱོངས་པར་ཤོག
ཕ་རྒན་ངས འདི་ན་རྟེན་འབྲེལ་བསྒྲིགས་བཞིན་ཡོད
ཁ་གཡང་འབོད་བཞིན་ཡོད
སྙིང་གི་བུ་ལོ་ཆུང་ཆུང་ ད་དུང་ ཁྱེད་ལ་མིང་ཡང་མེད
ངའི་རེ་བ་ལ ཁྱེད་ཀྱིས་རང་གི་མིང་ཡང་འཁུར་ནས་ཤོག
ཁྱེད་ཀྱིས་མི་ཡུལ་འདི་ལ་ཞི་བདེ་དང་སྤྲོ་སྐྱིད་ཅིག་འཁྱེར་ནས་ཤོག
ཁྱེད་ཀྱི་ཨ་མས་རླངས་འཁོར་གཏོང་བཞིན་ཡོད་ཟེར
ཁྱེད་རང་མ་རྒན་གྱི་གྲོད་ཁོག་ནང་དུ་འཕག་འཚག་བརྒྱབས
སྐར་མ་གཉིས་དང་གསུམ་གྱི་བར
ཁ་སང་ཉིན་བཀང་བོར ང་ཚོས་ཁྱེད་རང་ལ་སྒུག
དེ་རིང་ང་རང་ལས་ཀར་སེམས་ལྷོད་དུ་འབབ་ནས་སོང་མེད
གཅིག་བྱས་ན ཁྱེད་ཀྱི་ཨ་མས་ང་ལ་ཁ་པར་སླེབས་ཡོང་སྙམ
ལས་ཀ་གྲོལ་སོང་ གྲོད་ཁོག་ཡང་ལྟོགས་ཀྱི་འདུག
ལམ་ཁ་ནས ངས་ཁྱེད་ཀྱི་ཨ་མར་ཁ་པར་ཞིག་བཏང་
ཡོད་ཚད་བདེ་ལེགས་རེད་ཟེར དངོས་ནས་བཟང་གི
ངས་དེ་རིང་ཁྱེད་རང་མ་ཡོང་བ་རེད་སྙམ་ནས
སྤྱི་སྤྱོད་རླངས་འཁོར་དུ་བུད་ནས་ནང་དུ་འབྱོར
ཁ་པར་ཞིག་སླེབས་སོང་ ང་སྨན་ཁང་དུ་འགྲོ་བཞིན་ཡོད
དེ་ནི་ཁྱེད་ཀྱི་ཨ་མའི་སྐད་རེད
ང་རང་འཚབ་འཚུབ་དུ་གྱུར
ཁ་པར་སླེབས་ཐེངས་རེར
ངས་ཁྱེད་དང་ཁྱེད་ཀྱི་ཨ་མ་ལ་བདེ་ཐང་ཡོང་བར་སྒུག
ཁ་པར་ཡོང་བར་སྒུག སྒུག་སྒུག
ད་མགྱོགས་པོ་ཤོག་ཟེར་ནས་ཁ་པར་ཞིག་འབྱོར་ན་བསམ་བཞིན་ཡོད
༢༨།༨།༡༡།སྐྱེ་ལ་ཉེ་བའི་བདག་གི་བུ་ཆུང་གི་སྐོར་ལ་ཁ་པར་ཞིག་མཛའ་མོས་འབྱོར་ནས་ནང་དུ་ཁ་པར་སྒུག་ནས་བསྡད་ཡོད་སྐབས་སུ་ཤར་མར་བྲིས།
བརྩེ་བའི་སྤུན་མཆེད་དང་། སྨྱུག་མདའ། ལྷོ་ཕྱོགས་ཉི་ཟླ། ཀླུ་སྨྱོན་ཧེ་རུ་ཀ་བཅས་ཀྱིས་ཁ་གཡང་བོས་པ་དེར་སེམས་ཁོང་རུས་པའི་གཏིང་ནས་བཀའ་དྲིན་ཆེ་ཞུས་པ་ཡིན། ཁ་སང་ཕྱི་དྲོ་མཛའ་མོའི་གྲོད་ཁོག་ཟུག་གཟེར་ཡང་ཡང་བརྒྱབས་པར་བསྟེན། ང་ཚོ་སྨན་ཁང་དུ་སོང་ནས་བརྟག་དཔྱད་བྱས་དུས། ར་ཤི་ཡའི་སྨན་པ་བུད་མེད་མཛེས་མ་དེས། ད་ལྟ་སྐྱོན་གང་ཡང་མི་འདུག སྐྱེ་རན་མ་རེད། ཟུག་གཟེར་འདི་འདྲ་ཉུང་ཉུང་རེ་ཡོང་བ་དེར་སྐྱོན་ཡོད་པ་མ་རེད་གསུངས་སོང་། དེ་ནས་འདང་ནུབ་ཕྱིར་ནང་དུ་ཡོང་ནས་ང་རང་དེ་རིང་ཞོགས་པ་སྔ་བོ་ལས་ཀར་སོང་བ་ཡིན། སྨན་པས་བཤད་པའི་ཟླ་ཚེས་ཏག་ཏག་ལ་སྐྱེ་བ་ཡིན་ན། ད་དུང་བདུན་ཕྲག་གཅིག་ལྷག་ཡོད་པ་རེད། སྐྱེ་བ་དང་འདྲ་དཔར་དང་མཉམ་དུ་ངའི་ཟིན་བྲིས་ནང་དུ་འཇོག་ངེས་ཡིན། ཁྱེད་ཅག་གི་ཐུགས་འཁུར་དང་ཁ་གཡང་བོས་པ་དེར་དངོས་ནས་དགའ་ཡོད།
བུ་ཆུང་བདེ་བླགས་སྐྱེ་བར་ཤོག །སྐྱེས་ནས་ཚེ་རིང་དོན་འགྲུབ་ཤོག །
བཀླགས་ཟིན་ཡིན།
དྲ་གྲོགས་ལགས་ཁྱེད་ཀྱིས་བུ་ཆུང་བདེ་ལེགས་ངང་འཇིག་རྟེན་ཁམས་ཆེན་པོ་འདིར་ཡོང་བར་སྨོན་ལམ་གྲངས་མེད་ཡོད།བདེ་བར་བཞུགས།
སྤུན་ཆུང་ཤ་ཁྲག་ལགས། ཁྱེད་ཀྱི་བུ་དང་མཛའ་མོ་གཉིས་ཆ་བདེ་ཐང་ངང་ཕེབས་པར་ཡིད་ཆེས་ཡོད། ད་ལྟའི་ཁྱོད་ཀྱི་སེམས་ཁམས་ཧ་ཅང་འཁྲུག་པོ་ཡིན་པ་ངས་རྒྱུས་ལོན་བྱེད་ཐུབ་ཀྱི་འདུག ཡིན་ན་ཡང་བུ་རྒོད་པོ་སེམས་ལྷོད་ལ་ཕོབས། སེམས་ཚགས་བྱེད་མི་དགོས་པ་ཞིག་ཆགས་པར་སྨོན་ལམ་འདེབས། ཁྱོད་ཀྱི་མཛའ་མོ་དང་བུ་མོ། བུ་ཚང་མ་ལ་བཀྲིས་བདེ་ལེགས་ཡོད།