ས་གནས་ཁག་བརྒྱད་ནས་མི་འགྲོ་གཏོང་མ་ཐུབ་པར་བློ་ཕམ་ཡོད།

དེ་རིང་དབུས་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་དུ་ཁྲིམས་རྩོད་པའི་སྦྱོང་བརྡར་ཐེངས་ ༤ དེ་དབུ་འཛུགས་ཀྱིས་ས་གནས་ནས་ཕེབས་པའི་མི་འགྲོ་ ༡༧ ཙམ་ལ་། བྱོལ་བོད་མིའི་བཅའ་ཁྲིམས་དང་སྤྱི་དམངས་གཏུག་བཤེར་འགྲོ་ལུགས་སྐོར་གྱི་སྦྱོང་བརྡར་སྤྲོད་བཞིན་ཡོད།  

ཟླ་འདིའི་ཚེས་ ༥ ནས་ ༡༤ བར་ཉིན་གྲངས་བཅུའི་རིང་ཆེས་མཐོའི་ཁྲིམས་ཁང་གི་གོ་སྒྲིག་འོག བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་ཚོགས་ཁང་དུ་བཙན་བྱོལ་བོད་མིའི་ཁྲིམས་རྩོད་པའི་སྦྱོང་བརྡར་ཐེངས་ ༤ དེ་ཚོགས་ཡོད་ཅིང་། སྦྱོང་བརྡར་དེར་མཉམ་ཞུགས་གནང་མཁན་རྒྱ་གར་དང་བལ་ཡུལ་ནང་ཡོད་གཅིག་ལྕོགས་ས་གནས་ཁྲིམས་ཞིབ་ཁང་མན་སྤར་ཕན་བདེ་གླིང་དང་། སྒང་ཏོག ར་སྦང་ལ་ཀུན་ཕན་གླིང་། བྷན་ད་ར་ནོར་རྒྱས་གླིང་། ཤེས་ལོངས། བལ་ཡུལ་བཅས་ནས་མི་འགྲོ་ ༡༥ དང་། དེ་བཞིན། དབུས་བོད་སྒྲིག་འཛུགས་ཀྱི་རྩིས་ཞིབ་ཁང་གི་ལས་བྱེད་ ༢ བཅས་ཁྱོན་བསྡོམས་མི་འགྲོ་ ༡༧ མཉམ་ཞུགས་གནང་འདུག ཐོག་མའི་འཆར་གཞི་ལྟར་ན། ས་གནས་ཁག་ ༡༦ ནས་མི་ ༣༢ ཙམ་མཉམ་ཞུགས་ཀྱི་འཆར་གཞི་ཡོད་ཀྱང་། ས་གནས་ཁག་བརྒྱད་སྦྱོང་བརྡར་ནང་ཞུགས་ཐུབ་ཡོད་མི་འདུག

ཐེངས་འདིའི་ཁྲིམས་རྩོད་སྦྱོང་བརྡར་སློབ་ཁྲིད་གནང་མཁན་ནི། དབུས་བོད་མིའི་སྒྲིག་འཛུགས་ཀྱི་ཁྲིམས་ཞིབ་པ་ཆེ་བ་ངག་དབང་འཕེལ་རྒྱས་མཆོག་དང་ཁྲིམས་ཞིབ་པ་ངག་དབང་ཐུབ་བསྟན། ཁྲིམས་ཞིབ་པ་ཚེ་རིང་དོན་གྲུབ། ཁྲིམས་ལུགས་རིག་པ་བ་སྡེ་འགན་བསྟན་འཛིན་ལྷུན་གྲུབ་དང་རིག་འཛིན་རྡོ་རྗེ་སོགས་ཡིན་པ་དང་། ཁྲིམས་རྩོད་སྦྱོང་བརྡར་གྱི་སློབ་ཚན་ནི་བཙན་བྱོལ་བོད་མིའི་བཅའ་ཁྲིམས་དང་། སྤྱི་དམངས་གཏུག་བཤེར་འགྲོ་ལུགས་རྩ་འཛིན་ཁྲིམས་ཡིག  ཁྲིམས་ལུགས་དབང་འཛིན་རྩ་འཛིན་ཁྲིམས་ཡིག དཔང་རྟགས་རྩ་འཛིན་ཁྲིམས་ཡིག བཙན་བྱོལ་བོད་མིའི་ཁྲིམས་རྩོད་པའི་བླང་དོར་ལམ་སྟོན་བཅས་ཡིན་འདུག 

མཛད་སྒོའི་སྟེང་ཁྲིམས་ཞིབ་པ་ཆེ་བ་ངག་དབང་འཕེལ་རྒྱས་མཆོག་གིས།  བཙན་བྱོལ་སྤྱི་ཚོགས་ནང་ཆེས་མཐོའི་ཁྲིམས་ཞིབ་ཁང་གིས་མཚོན་པའི་ཁྲིམས་ལུགས་དབང་འཛིན་སྡེ་ཡི་བྱུང་རིམ་དང་འཕེལ་རྒྱུས། དེ་བཞིན་བཙན་བྱོལ་སྤྱི་ཚོགས་ནང་མང་ཚོགས་སྤྱི་ཡོངས་ཀྱིས་ཁྲིམས་ཀྱི་འགྲོ་སྟངས་ཆ་ཚང་ཤེས་མཁན་དང་། ཁྲིམས་རྩོད་པར་མ་བརྟེན་པར་སོ་སོ་རང་རྐྱ་འཕེར་བའི་སྒོ་ནས་ཁྲིམས་ལུགས་ཁུངས་སྐྱེལ་ཐུབ་རྒྱུ་ཁག་པོ་ཡིན་སྟབས། སྤྱི་ཚོགས་ནང་ཁྲིམས་རྩོད་པ་དེ་ཧ་ཅང་གལ་ཆེན་པོ་ཆགས་ཡོད་སྐོར་ངོ་སྤྲོད་གནང་བྱུང་། ཁྲིམས་ཞིབ་པ་ཆེ་བ་མཆོག་གིས་” ང་ཚོ་ཆེས་མཐོའི་ཁྲིམས་ཞིབ་ཁང་ནས། ལས་ཀ་གང་ཡང་མེད་པར་དུས་ཚོད་ཡོལ་ཐབས་བྱ་བཞིན་པ་དེ་འདྲ་མ་རེད།  འདིའི་འགྲོ་སོང་ཡོང་རྫོགས་བཙན་བྱོལ་བོད་གཞུང་གི་སྔོན་རྩིས་ནང་ལ་སྐྱབས་འཇུག་ཞུ་བཞིན་ཡོད་ལ། ཁྲིམས་རྩོད་པ་དེ་ང་ཚོའི་སྤྱི་ཚོགས་ནང་དགོས་མཁོ་ཧ་ཅང་གལ་ཆེན་པོ་ཆགས་ཡོད། དམིགས་ཡུལ་རྒྱ་ཆེན་པའི་སྒོ་ནས་འཕྲལ་ཕུགས་གཉིས་ཀྱི་ཐོག་ལ་གནད་འགག་ཆེན་པོ་ཆགས་སྟབས།  ང་ཚོས་ངོས་ནས་ལས་གཞི་འདི་གལ་ཆེན་པོར་བརྩི་ཡི་ཡོད། ཡིན་ནའང་། ས་གནས་ཁག་བརྒྱད་ནས་མི་འགྲོ་བཏང་མི་འདུག  “ཅེས་གསུངས་ཏེ།  ཆེས་མཐོའི་ཁྲིམས་ཞིབ་ཁང་གི་ངོས་ནས་ས་གནས་མི་འགྲོ་ཆ་ཚང་མཉམ་ཞུགས་གནང་ཐུབ་ཆེད་དུ།  བལ་གོས་བཙོང་བའི་དུས་ཚིགས་མ་སླེབས་པའི་སྔོན་ཏག་ཏག་ལ་གོ་སྒྲིག་བྱས་ཡོད་ནའང་། ས་གནས་ཁག་མང་པོ་ནས་མི་འགྲོ་བཏང་མེད་པའི་ཐད་བློ་ཕམ་ཡོད་སྐོར་བརྗོད་སོང་། 

ཐེངས་འདིའི་ཟབ་སྦྱོང་དངོས་གཞི་གྲུབ་རྗེས་ཚེས་ ༡༤ ཉིན་གྱི་སྔ་དྲོར། ཁྲིད་ཟིན་པའི་རྩ་འཛིན་ཁྲིམས་ཡིག་ཁག་གསུམ་དང་བཅའ་ཁྲིམས། ཁྲིམས་རྩོད་པའི་བླང་དོར་ལམ་སྟོན། ཟུར་སྣོན་ཡིག་ཆ་ཁག་གི་དྭོགས་འདྲི་ཁག་ལ་ཁྲིམས་ཞིབ་པ་ཆེ་དང་། སློབ་ཁྲིད་གནང་མཁན་རྣམ་པས་གསལ་བཤད་དང་རྒྱུས་སྟོན་གནང་རྒྱུ་ཡིན་པ་དང་། སྦྱོང་བརྡར་བ་རྣམས་ནས་བཙན་བྱོལ་བོད་མིའི་ཁྲིམས་རྩོད་པའི་དེབ་སྐྱེལ་ལག་ཁྱེར་ཞུ་ཆེད་དུ་སྙན་ཞུ་དང་། དཔལ་ལྡན་ཁྲིམས་ཞིབ་པ་ཆེ་བའི་མདུན་དུ་ཁྲིམས་རྩོད་པའི་ཁས་ལེན་དམ་ཡིག་འབུལ་རྒྱུ། ཉིན་དེའི་ཕྱི་དྲོར་ཁྲིམས་ཞིབ་པ་ངག་དབང་ཐུབ་བསྟན་ལགས་ནས་སྦྱོང་བརྡར་བ་རྣམས་ལ་བཙན་བྱོལ་བོད་མིའི་ཁྲིམས་རྩོད་པའི་སྦྱོང་བརྡར་གྱི་ལག་ཁྱེར་གནང་རྒྱུ་དང་། ཁྲིམས་ཞིབ་པ་ཆེ་བ་མཆོག་ནས་བཙན་བྱོལ་བོད་མིའི་ཁྲིམས་རྩོད་པའི་མིང་ཐོ་དེབ་འགོད་བགྱིས་པ་རྣམས་ལ་ཁྲིམས་རྩོད་པའི་ལག་ཁྱེར་གནང་རྒྱུ་ཡིན་འདུག 

ད་ལྟའི་ཆར་བཙན་བྱོལ་བོད་མིའི་གནས་ཡུལ་རྒྱ་གར་ནང་ཁྲིམས་ཞིབ་ཁང་ ༡༢ དང་། བལ་ཡུལ་ནང་ ༤ ། སུད་སིར་ ༡ བཅས་ཁྱོན་བསྡོམས་ཁྲིམས་ཞིབ་ཁང་ ༡༧ དང་རྩོད་པ་ ༦༣ ཡོད་འདུག 

གསར་འགོད་པ། ཚེ་རིང་རྒྱལ།