སྐྱེ་མ་ཐག་པའི་བུ་ཆུང་ཁྱོད
ཡུལ་གྲུ་གང་ཞིག་ནས་འོང་བའི་མགྲོན་པོ་བཞིན
སྐྱེ་བ་སྔ་གཞུག་གི་འབྲེལ་ཐག་དང་
འདས་མ་ད་གསུམ་གྱི་ལས་དབང་ལ་འཐིམ་པའི
ང་དང་ངའི་མི་ཚེ་ཁྲོད་སླེབས་སོང་
བོད་ཟླ་བདུན་པའི་ཚེས་དྲུག
སྤྱི་ཟླ་དགུ་བའི་ཚེས་གསུམ
ཕྱི་དྲོ་སྟེ ཆུ་ཚོད་བཞི་ཏག་ཏག
འཇིག་རྟེན་མི་ཡུལ་འདིར ཉིད་ནས་ངུ་སྐད་ཐོག་མ
ཁུ་ཁྲག་བརྣག་གཤེར་གྱི་བརླན་པའི་གཅེར་བུ་ཁྱོད
ངོ་མི་ཤེས་པའི་ཕ་རྒན་ངའི་ངོ་གདོང་ལ་བལྟས
མིག་ཆུང་ཆུང་དེ་གཉིས་ནི
གསར་དུ་ཕྱེ་མ་ཐག དོན་དངོས་སུ
ཁྱོད་ཀྱིས་ཅི་ཞིག་མཐོང་ཡོད་དམ
ཕ་རྒན་ང་མིག་ལམ་ཏུ་ཤར་ཡོད་དམ
ཡང་ན འོད་ཕྲ་མོ་ཞིག
ཤ་རྡོག་སྤྱི་རྒྱ་གསུམ་དང་ཚག་དྲུག་གི་ཕུང་བོ་ཆུང་ཆུང་ཁྱོད
དོན་དངོས་སུ འཇིག་རྟེན་འདིར་སུའི་ཆེད་དུ་ཡོང་བ་ཡིན
སྡུག་བདེན་གྱི་ཕུང་བོ་འདི་ཡི་ཚུལ་བཟུང་དེ
རང་གཞན་སེམས་ཅན་ལ་ཕན་པའི་ལས་ཤིག་བྱེད་དུ
ཡང་ན རང་དོན་ཁོ་ན་གཉེར་བའི་མི་བུ་ཆུང་ཆུང་ཞིག་དུ
དེ་མིན ཐར་བ་དོན་གཉེར་གྱི་བྱང་ཆུབ་ཀྱི་སེམས་མངའ་བའི་ཁྱེའུ་ཞིག་ཡིན་ནམ
གང་ལྟར ཕ་རྒན་ངས ཁྱེད་ལ་རེ་བ་ཞིག་བརྒྱབས་ཡོད
སྐྱེ་བ་ལས་གསོན་པ་ལས་སླ་བོ་མིན
གསོན་པ་དེ་ཡང་དོན་སྙིང་ཡོད་པ་ཞིག་དང་
གཟི་བརྗིད་ལྡན་པའི་མི་ཚེ་སྟེ
འགྲོ་བ་མི་ཞེས་སེམས་བྱུང་གི་འདུ་ཤེས་ཟབ་མོ་ཞིག་འཁུར་ནས
མི་ཡུལ་འདིར་ཞབས་ཞུ་ཡག་པོ་ཞིག་བྱེད་ཐུབ་པར་སྨོན
བཀླགས་ཡོད། ཚང་མ་བདེ་མོ་ཡིན་པར་སྨོན།
གཅེས་ཕྲུག་དེར་མིང་ཞིག་དགོས་ན་ངས་སྐུ་སྒེར་གྱི་མིང་གནང་ས་ནས་ལེན་འོང་་་དེ་མིན་ན་ངས་བཏགས་ཀྱང་ཆོག་་་་དེང་སང་ངས་བུ་བུ་མོ་མང་པོར་མིང་འདོག་གི་ཡོད། ཁྱོད་ཀྱིས་ལྟོས་ཨ་་ཧཧཧ
ངས་ཁྱེད་ཀྱི་གཅེས་ཕྲུག་དེར་གཅེས་མིང་ཞིག་འདོགས་འདུན་བྱུང་།
གངས་ལྗོངས: རིག་པ་རང་གྲོལ།