རྔ་པ་རྫོང་སྤྲོ་ཚིགས་ཞང་ཀ་ཉག་སྡེ་བའི་བར་མ་ཚང་གི་རང་ལོ་ ༣༨ ཡིན་པའི་དཔལ་འབྱོར་ལགས་སུ། འདི་ལོའི་ ༣ ཚེས་ ༡༦ ཉིན་གྱི་མི་མང་ཡར་ལངས་སྐབས་མཉམ་ཞུགས་བྱས་པའི་ཉེས་མིང་གཡོགས་ཏེ། ཕྱི་ཟླ་ ༣ ཚེས་ ༢༠ ཡས་མས་སུ་རྒྱ་གཞུང་གིས་འཛིན་བཟུང་བྱས་ཡོད་ཅིང་། རྗེས་སུ་ཤེས་རྟོགས་བྱུང་བར་ཁོང་ལ་ལོ་ ༣ གྱི་བཙོན་འཇུག་ཁྲིམས་ཐག་བཅད་དེ་སི་ཁྲན་གྱི་མེན་ཡཱང་བཙོན་ཁང་དུ་བཅུག་ཡོད་འདུག
ཁོང་གི་ཕ་མིང་ལ་རྒྱ་མཚོ་ཞུ་བ་སྔ་མོ་ནས་འདས་ཟིན་པ་དང་། མ་མིང་ལ་སྒྲོན་མཚོ་ཞུ་བར་སྙིང་གི་ན་ཚ་ཞིག་ཡོད་སྟབས། ཁོང་འཛིན་བཟུང་བྱས་པ་ནས་ཟླ་བ་གསུམ་ལྷག་རིང་གསང་བ་བྱས་ཡོད་པ་དང་། ཁོང་གི་ཁྱིམ་དུ་འཚོ་བའི་ཡོང་ཁུངས་གང་ཡང་མེད་པར་གཟའ་ཟླ་དང་ཕྲུ་གུ་གཉིས་བཅས་ནང་མི་གསུམ་ཡོད་འདུག
དེ་བཞིན་རྔ་པ་རྫོང་སྤྲོ་ཚིགས་ཞང་བསེ་སྐོར་སྡེ་བའི་རང་ལོ་ ༣༠ ཡིན་པའི་བསེ་སྲིབ་ཚང་གི་ཀིརྟི་དགོན་པའི་གྲྭ་ཚེ་ཁོ་དང་། རྔ་པ་རྫོང་བློན་ཚང་ཞང་རབ་རྒྱས་ཚང་གི་རང་ལོ་ ༡༦ ཡིན་པའི་རྔ་པ་ཀིརྟི་དགོན་པའི་གྲྭ་རྡོ་རྗེ་པ་གཉིས་སྔ་ཕྱིར་འདི་ལོའི་ཕྱི་ཟླ་ ༤ ཚེས་ཤར་ཙམ་ལ་འཛིན་བཟུང་བྱས་རྗེས་ད་བར་གནས་ཚུལ་གང་ཡང་ཤེས་རྟོགས་ཐུབ་མེད།
གཞན་ད་ལོའི་གསུམ་པའི་བཅུ་དྲུག་གི་རྗེས་སུ་འཛིན་བཟུང་བྱས་ཏེ་ད་བར་ཐག་གཅོད་གང་ཡང་བྱས་མེད་པ་དག་ནི། ཕྱི་ཟླ་ ༤ ཚེས་ ༢༢ སྔོན་ལ་འཛིན་བཟུང་བྱས་ཤིང་རང་ལོ་ ༣༠ ཡིན་པ། རྨ་ཆུ་རྫོང་ཁྲོ་ཁོ་སྨད་མའི་སྤྲུལ་སྐུ་ནོར་བུའི་བུ་རྔ་པ་ཀིརྟི་དགོན་པའི་གྲྭ་བློ་བཟང་འཇིགས་མེད། ཕྱི་ཟླ་ ༦ སྔོན་ལ་འཛིན་བཟུ་བྱས་ཤིང་རང་ལོ་ ༢༣ ཡིན་པ་རྔ་པ་རྫོང་རྨེའུ་རུ་མའི་རུ་ཆེན་གཉིས་པའི་ཨུ་རྒྱན་ཚེ་རིང་གི་ཀིརྟི་དགོན་པའི་གྲྭ་དགེ་འཕེལ། ཕྱི་ཟླ་ ༤ ཚེས་ ༡༢ ཉིན་བསྐྱར་དུ་འཛིན་བཟུང་བྱས་ཤིང་རང་ལོ་ ༢༢ ཡིན་པ། རྔ་པ་རྫོང་རྨེའུ་རུ་མའི་རུ་ཆེན་གཉིས་པའི་ཇ་རུ་ཚང་གི་ཀིརྟི་དགོན་པའི་གྲྭ་བློ་བཟང་དར་རྒྱས། ཕྱི་ཟླ་ ༣ ཚེས་ ༡༩ ཉིན་རང་ཁྱིམ་ནས་འཛིན་བཟུ་བྱས་ཤིང་རང་ལོ་ ༦༠ ཡིན་པ། རྔ་པ་རྫོང་རྨེའུ་རུ་མའི་རུ་ཆེན་གསུམ་པའི་དགེ་ཚང་གི་དགེ་རིག ཕྱི་ཟླ་ ༣ ཚེས་ ༡༦ ཉིན་འཛིན་བཟུང་བྱས་ཤིང་རང་ལོ་ ༤༡ ཡིན་པ། རྔ་པ་རྫོང་སྤྲོ་ཚིགས་ཞང་སྤྲོ་ཚིགས་སྡེ་བའི་བཀྲ་རྒྱལ་ཚང་གི་སྐལ་བཟང་སོགས་ཡིན་འདུག
གནས་ཚུལ་མཁོ་གཏོང་བ། གྲྭ་བློ་བཟང་ཡེ་ཤེས་དང་ཀ་ཉག་ཚེ་རིང་།
དངོས་གནས་བོད་ཀྱི་དཔའ་བོ་དང་བོད་པ་རུས་རྐང་ཅན་དེ་བོད་ན་བོད་པ་ཧ་གོ་བར་གྱིས་འདིར་སྐྱེས་ཀྱི་རོང་ཚ་རྣམས།