སེར་བྱེས་བྱ་བྲལ་བློ་བཟང་དཔལ་ལྡན།
གངས་ལྗོངས་མི་རིགས་ཀྱི་སླད་དུ་སྐྱེ་བོ་གྲངས་ལས་འདས་པ་ཞིག་གིས་ཚེ་སྲོག་བཏང་བ་དང་། ཉམས་ང་འཇིག་ཉེན་གྱི་གནས་སྐབས་འདི་འདྲ་ལ་མ་འོངས་པར་གྲངས་ལས་འདས་པའི་ཚེ་སྲོག་ལ་ཉམས་ཉེས་འབྱུང་ངེས་ཀྱི་ཚོད་དཔག་ཐུབ་པ་ཞིག་རེད། སྤྱིར་བཏང་ནས་བཙན་པོའི་རྒྱལ་རབས་ཀྱིས་མདོ་དབུས་མཐོ་སྒང་གཅིག་གྱུར་བྱས་པའི་ཐོག་མའི་དུས་རིམ་ནས་ད་ལྟའི་བར་བོད་མི་རིགས་སམ་ཡང་ན་བོད་རྒྱལ་ཁབ་ཀྱི་སླད་དུ་བཏང་བའི་ཚེ་སྲོག་གི་གྲངས་ཀ་དེ་དཔག་དཀའ་བའི་ཚོད་དུ་ཡོད་ལ། དེ་དག་རེ་རེ་ཡི་ཚེ་སྲོག་གི་རིན་ཐང་གཅིག་མཚུངས་དང་འདྲ་མཉམ་དུ་གནས་པ་རེད། ལོ་རྒྱུས་ཀྱི་དཀྱོགས་མཚམས་གཅིག་ཁོ་ན་སྟེ་སྤྱི་ལོ་ ༡༩༥༠ ཡས་མས་ནས་ད་ལྟའི་བར་ལ་ཡང་གཡུལ་ས་དང་བཙོན་ཁང་། མུ་གེ རང་ཤི་བརྒྱབ་པ་སོགས་མདོར་ན་མི་རིགས་འདིའི་ལོ་རྒྱུས་ཀྱི་འགན་དབང་དང་། བདེ་སྡུག་མངའ་ཐང་གི་ཆེད་དུ་ཐོས་ན་སྐྱི་གཡའ་ཞིང་། བསམ་ན་སྙིང་འདར་བའི་སྐྱོ་གར་ཅི་འདྲའི་མང་པོ་ཞིག་བྱུང་བ་རེད་ཨང་། དུས་རབས་ཉེར་གཅིག་པ་མགོ་ཚེས་མ་ཐག་པའི་ལོ་གྲངས་བཅུ་ལྷག་འདིའི་རིང་ལ་ཡང་རྒྱ་ནག་དམར་གཞུང་གིས་ལྐོག་ནས་སྡིག་ལག་བསྲིངས་ཏེ་བོད་རིགས་སྤུན་ཟླ་ཆེས་མང་པོ་ཞིག་གི་དམར་ཆུང་ཚེ་སྲོག་རྩེད་མོར་སྤྱད་ཡོད་པ་དང་། ཡོངས་སུ་གྲགས་པའི་བཤད་རྒྱུན་ལ་༸ཀུན་གཟིགས་པཎ་ཆེན་ཐམས་ཅད་མཁྱེན་པ་མཆོག་གི་གཞལ་དཀའ་བའི་སྐུ་སྲོག་གསེར་གྱི་བ་གམ་ལ་ཡང་རྒྱ་ནག་དམར་གཞུང་གིས་གཤེད་མའི་སྡིག་ལག་བསྲིངས་ཡོད་པ་རེད།
མདོར་ན་བོད་མི་རིགས་ཀྱི་ལས་འགན་ཕྲག་ཏུ་ལེན་པའི་སྐྱེ་བོ་ཞིག་བྱུང་ཕྱིན་མངོན་ལྐོག་ཅི་རིགས་ན་སྲོག་ལ་རྒོལ་བའི་སྤུ་གྲི་རྣོ་ཟིང་ངེ་བ་རེ་ཡོད་པ་ནི་རྒྱ་གཞུང་གི་ལས་འགན་ལྟ་བུར་གྱུར་ཡོད། རང་ཉིད་ཀྱི་ཚེ་སྲོག་དམར་པོ་མེ་ལ་མཆོད་ནས་མི་རིགས་ཀྱི་བདེན་པ་རྩོད་པ་དང་། རྒྱ་གཞུང་ལ་རྒོལ་ལན་སྤྲོད་པ། རང་རིགས་ལ་འབོད་སྐུལ་གཏོང་མཁན་དཔའ་བོ་ཐུབ་བསྟན་དངོས་གྲུབ་དང་། རྔ་བ་ཀིརྟི་དགོན་པའི་བཀྲ་བྷེ། རྔ་བ་ཀིརྟི་དགོན་པའི་གྲྭ་བློ་བཟང་ཕུན་ཚོགས། གཞོན་ནུའི་ཚོགས་མི་ལྷག་པ་ཚེ་རིང་། རྟའུ་ཉིན་མཚོ་དགོན་པའི་གྲྭ་ཚེ་དབང་ནོར་བུ་བཅས་མི་ལྔ་ཏག་ཏག་བྱུང་བའི་ཁྲོད་གསུམ་སྐུ་སྲོག་ཤོར་བ་དང་། གཉིས་ད་ལྟ་འཚོ་བཞུགས་ཀྱི་སྐལ་བ་ལྡན་ཡོད། དེ་མིན་སྙིང་སྟོབས་དང་ལྷག་བསམ་གྱིས་རང་ལུས་མེ་ལ་བསྒྲོན་པ་དང་། ཆུ་ལ་མཆོངས་པ། བཙོན་དུ་སྐྱེལ་བ་སོགས་ལ་ཅི་སྙམ་པའི་ལྷག་བསམ་རྩལ་དུ་ཐོན་ཡང་བསམ་འདུན་ལྟར་ལམ་དུ་མ་ལྷོང་པའང་མང་པོ་ཞིག་ཡོད་ཀྱང་། ལོ་སྔ་ཕྱི་འདི་དག་ལ། ལི་ཐང་བ་བློ་བཟང་དོན་གྲུབ་སོགས་མང་པོ་ཞིག་གི་རིན་ཆེན་ཚེ་སྲོག་གི་དབང་པོ་རྒྱ་ནག་དམར་གཞུང་གི་མེ་མདའི་སོ་ཁར་ལྷུང་སོང་ལ། རྭ་རྒྱ་བཀྲ་ཤིས་བཟང་པོ་སྔོན་མོ་ཆུ་ལ་བསྟིམས་སོང་།
དཔེ་མཚོན་དུ་གྱུར་པའི་དཔའ་བོ་འདི་དག་ལང་ཚོ་དར་ལ། རྣམ་རིག་རྒྱས་ཤིང་། མ་འོངས་པའི་མི་ཚེའི་བདེ་སྐྱིད་ལ་རེ་ལྟོས་ཀྱིས་ཁེངས་པ་ཤ་སྟག་རེད་མོད། ཁོང་ཚོ་དང་ཁོང་ཚོ་ལྟ་བུ་ཆེས་མང་པོ་ཞིག་བོད་གངས་ཅན་པའི་མ་འོངས་པའི་འཚོ་གནས་ཀྱི་ཆེད་དང་། བོད་གངས་ཅན་པའི་བདེ་སྐྱིད་ཀྱི་ཆེད་དུ། ཤིན་ཏུ་ཕངས་པའི་མི་ཡུལ་གྱི་བདེ་སྐྱིད་དང་། གཅེས་ཤིང་བྱམས་པའི་ནང་མི་སྤུན་ཟླ་ཚོ་དང་ཁ་བྲལ་ཏེ་ཕྱི་མར་བཞུད་སོང་མོད། རང་རེའི་རིགས་སུ་སྐྱེས་པ་ཆེས་མང་པོ་ཞིག་གིས་སྟོང་སྐད་རྒྱགས་གཏམ་གྱིས་གནམ་ས་འགེངས་ལ་ཁད་པ་རེ་བྱས་རྗེས། ཐ་ན་ཉིན་གཅིག་གི་ཚ་གྲང་གི་དཀའ་སྡུག་ཙམ་བཟོད་པར་ནུས་པའི་དཔའ་སེམས་ཀྱང་མེད། ཆུ་ཚོད་གཅིག་གཉིས་རིང་གི་སྐད་འབོད་ཁྲོམ་སྐོར་ལ་ཡང་དགོས་པ་མེད་མདོག་གི་རྣམ་འགྱུར་གྱིས་གཡོལ་གང་ཐུབ་བྱེད་ཀྱི་ཡོད། མིང་གནས་རྗེས་འབྲེལ་ལ་ཐོབ་ཐང་ཞིག་དང་སྙན་གྲགས་ཞིག་ཡོད་དུ་གྱུར་ན་སྔ་བའི་སྔུན་མ་དང་། མགྱོགས་པའི་རྟིང་མ་སུས་ལོན་ལ་འགྲན་བསྡུར་གྱི་ཡོ་ལང་ཅི་བས་ཆེ། ད་དུང་རང་རིགས་གསར་འགོད་བརྒྱུད་ལམ་དང་། ལོ་རྒྱུས་ཡིག་ཚགས། མི་སྒེར་གྱི་བརྩམས་ཆོས་གང་ནས་ཀྱང་བཞུད་ཟིན་པའི་དཔའ་བོ་དཔའ་མོ་ཚོའི་བྱས་རྗེས་དྲང་པོར་སྨྲ་བ་དང་། སྙིང་སྟོབས་གསལ་བོར་སྒྲོག་པ། ཆོད་སེམས་རིས་མེད་དུ་སྟོན་དགོས་པ་ལས། དམངས་ཕལ་བའི་དཔའ་བོ་དག་ལོ་རྒྱུས་ཀྱི་ཤོག་ངོས་ནས་ཡལ་འགྲོ་བའམ། ཕྱོགས་གང་རུང་གི་ཚེ་སྲོག་ལ་སྣང་མེད་བྱེད་པ་བཅས་གཏན་ནས་འབྱུང་མི་རུང་།
རང་རེའི་བཙན་བྱོལ་གྱི་སྣང་ཚུལ་རེ་འགའ་ནི་མི་རིགས་ལ་འགན་མི་ཁུར་བ་དང་། ལོ་རྒྱུས་ལ་འགན་མི་ཁུར་བ། ཐ་ན་རང་ཉིད་ལ་ཡང་འགན་མི་ཁུར་བའི་བྱེད་སྟངས་མང་དུ་འབྱུང་བཞིན་འདུག་སྟེ། ཁ་སྔོན་རྒྱལ་གཅེས་དཔའ་བོ་གྲྭ་བློ་བཟང་ཕུན་ཚོགས་ལགས་ཀྱི་སྐུ་སྲོག་ཞུགས་ལ་ཕུལ་རྗེས་མདོ་སྨད་རྔ་བའི་ཡུལ་དུ་ཛ་དྲག་གི་གནས་སྟངས་ཧ་ཅང་ཆེ་བའི་སྐབས། ༸གོང་ས་ཐམས་ཅད་མཁྱེན་པས་ཛ་དྲག་གི་གསལ་བསྒྲགས་སྤེལ་གནང་ཞིང་། དེ་བཞིན་བཀའ་ཤག་དང་། བོད་མི་དམངས་སྤྱི་འཐུས་སོགས་ཀྱིས་ཀྱང་རྒྱལ་སྤྱིའི་ཐོག་ཛ་དྲག་གི་སྙན་ཞུ་ཕུལ་ཡོད། དེ་བཞིན་ཨ་རི་སོགས་ཀྱིས་རྒྱབ་སྐྱོར་དང་འབྲེལ་རྒྱ་ནག་དམར་གཞུང་ལ་སྐུལ་འདེད་ཀྱི་བསྒྲགས་གཏམ་སྤེལ་བ་སོགས་ཀྱི་དོན་དག་བྱུང་སྐབས། གཞིས་ཆགས་ཆེན་པོ་དག་ཏུ་གོ་མེད་ཚོར་མེད་ཀྱི་ངང་དུ་གནས་པ་མ་ཟད་། ཚོགས་སྡེ་འགས་སྣེ་ཁྲིད་ཀྱིས་གསལ་བསྒྲགས་སྔོན་སོང་གི་མར་མེ་ཁྲོམ་སྐོར་ཙམ་ལ་ཡང་མི་དམངས་འདུ་འཛོམས་བྱུང་ཐུབ་ཀྱི་མེད།
ཉེ་ཆར་རྒྱལ་གཅེས་དཔའ་བོ་ཁམས་རྟའུ་ཉིན་འཚོའི་གྲྭ་ཚེ་དབང་ནོར་བུ་མཆོག་གིས་བོད་མི་རིགས་བསྟན་སྲིད་ཀྱི་ཆེད་དུ་གཅེས་པའི་རང་ལུས་མེ་རུ་བསྲེགས་ཏེ་རྐྱེན་འདས་སུ་སོང་སྐབས་ཀྱང་ང་ཚོའི་སྤྱི་ཚོགས་ནང་གྲགས་འགུལ་ཅི་ཙམ་འདུག ལས་འགུལ་ཅི་འདྲ་སྤེལ། དེ་ཙམ་གྱིས་ག་ལ་ཚད་དྲ་ལམ་ཁ་ཤས་ན་མིང་རྫུན་འོག་ནས་ཆོལ་ཁའི་ཕྱོགས་ཞེན་གླེང་བཞིན་པ་དང་མི་རེ་ཟུང་གིས་རྒྱབ་སྐྱོར་བྱེད་ཁུལ་དང་རྫུན་མའི་དྲིལ་བསྒྲགས་གྱིས་འཁྲབ་སྟོན་སྐྱུག་བྲོ་བ་རེ་ཡང་བྱེད་ཀྱིན་མི་འདུག་གམ། དེ་ཙམ་མ་ཟད་རང་རེའི་རྩོམ་པ་པོར་གྲགས་པའི་ང་རྒྱལ་ཅན་ཚོས་སྨྱུག་ཁ་ན་རང་རེའི་མགོ་ཁྲིད་ཚོས་མ་འཇོན་ཚུལ་དང་མ་འཐུས་ཚུལ་གྱིས་གནས་ཚུལ་མ་གཏོགས་དཔའ་བོ་འདི་དག་གི་བདེ་སྡུག་བོར་སོང་བ་ལྟ་བུའི་སྣང་ཚུལ་འབྱུང་བཞིན་པ་ནི་བསམ་ཞིང་བསམ་ན་ཅི་འདྲའི་བློ་ཕམ་དགོས་པ་ཞིག་རེད་ཨང་།
རྒྱལ་གཅེས་དཔའ་བོ་ཁོང་ཅག་གི་བློས་གཏོང་འདི་ལྟ་བུའི་སྐབས་གཉའ་གནོན་བྱེད་མཁན་གང་མང་ཞིག་དང་མཉམ་དུ་རང་སྲོག་འགྲོ་ཐུབ་པ་སྨོས་མི་དགོས་པར་མ་ཟད། སྐྱེ་བོ་འབུམ་ཕྲག་མང་པོར་སྐྱི་གཡའ་བའི་འཇིགས་སྣང་བསྐུལ་ཐུབ་པ་ཤེས་བཞིན་དུ། འདི་ལྟར་སྐྱེ་འགྲོ་གཞན་ནམ། ཡང་ན་གཉའ་གནོན་པ་གཅིག་ལ་ཡང་འཇིགས་སྣང་མ་བསྐུལ་བར་མེ་རིའི་ཀློང་ནས་རེ་འདུན་གྱིས་ཞུ་འབོད་བྱེད་བཞིན་བཞུད་སོང་བ་ནི་འཚེ་བ་མེད་པའི་སྙིང་སྟོབས་དང་། དཔེ་མཚོན་བྲལ་བའི་བློས་གཏོང་ཞིག་ཡིན་ལ། བློས་གཏོང་འདིར་ད་ལྟའི་འཛམ་གླིང་ཁྲོད་ཀྱི་ཆབ་སྲིད་འཐབ་རྩོད་ནང་དོ་ཟླ་བྲལ་བའི་ཚོད་དུ་ཡོད། གང་ལྟར་ཡང་། ཤུལ་དུ་ལུས་པའི་རང་ཅག་གི་ཕྲག་ཏུ་བབས་ཡོད་པ་ནི། ཁོང་ཚོས་བློས་གཏོང་དེས་གང་ཞིག་འབོད་ཀྱིན་ཡོད་མེད་དེ་ཤེས་དགོས་པ་དང་། དེ་དོན་ང་ཚོས་བསྒྲུབ་དགོས་པ་དེ་ཧ་ཅང་གལ་ཆེན་དུ་གྱུར་ཡོད། ཁོང་ཚོར་ཚེ་སྲོག་མ་མཁོ་བ་མིན་ལ། ཁོ་ཚོར་སྡུག་བསྔལ་གྱི་ཚོར་བ་མེད་པའང་ག་ལ་ཡིན། ཁོ་ཚོར་མི་ཚེ་འདིའི་བདེ་སྐྱིད་དང་། དཀར་ངོགས་ཀྱི་ཉམས་སྣང་མ་དགོས་པ་དེ་བས་ཀྱང་ག་ལ་ཡིན། འོ་ན་ཅིའི་ཕྱིར་ཁོ་ཚོའི་ལང་ཚོ་དར་ཞིང་རྣམ་རིག་རྒྱས་པའི་སྐབས་དེར་བསམ་བཞིན་དུ་འཆི་ལམ་བདམས་པ་རེད། ཁོ་ཚོས་རང་ཉིད་ཀྱི་ནང་མི་ཕ་མ་སོགས་ལ་ཐེག་དཀའ་བའི་སྡུག་བསྔལ་འཇོག་དགོས་དོན་གང་ཡིན་ནམ། འདི་དང་ང་ཚོས་ངེས་པར་དུ་ཤེས་དགོས་པ་ཞིག་དང་། ཤེས་ཏེ་འགན་འཁུར་དགོས་པ་ཞིག་མ་ཡིན་ནམ།།
མཐའ་དོན་བརྗོད་འདོད་པ་ནི།
དཔའ་བོའི་བློ་སྟོབས་གངས་ཀྱི་རི་ལས་མཐོ། །
དཔའ་བོའི་བློས་གཏོང་བྱང་ཆུབ་སེམས་ལ་འགྲན། །
དཔའ་བོའི་ལྷག་སེམས་དུང་གི་མདངས་ལ་འཁུ། །
དཔའ་བོའི་རྣམ་ཤེས་བདེ་ནས་བདེ་བར་ཤོག །
ཕྱི་ལོ་ ༢༠༡༡ཟླ་ ༨ ཚེས་ ༢༡ ཉིན།
དེ་རེད་ངོ་མ་སེར་བྱེས་བྱ་བྲལ་བློ་བཟང་དཔལ་ལྡན་ལགས་ཁྱེད་ཀྱི་གནད་དུ་ཁེལ་བའི་རྒྱུད་བསྒྲག་ཡག་པོ་ཞིག་བཏང་འདུག ཁྱོང་ཚོས་ཁ་ཟས་དང་མེ་སྣུམ་བརྗེ། གསོན་པ་དང་ཤི་བ་བརྗེ། གཅེས་པའི་སྒྱུ་ལུས་དང་གནག་པའི་མེ་ལྕེ་བརྗེ། དར་ལ་བབ་པའི་ལང་ཚོ་དེ་ཡ་ང་ལ་འཇིགས་ཞུམ་པའི་གདོང་དུམ་དུ་འགྱུར་སོང་ཀྱང་། ལག་ཐལ་མོ་སྦྱར་ནས་མི་རིགས་ཀྱི་བདེ་སྡུག་གླེང་བ་འདི། ཁོང་ཚོ་ལ་ཤི་བ་གདམ་དགོས་པའི་སྡུག་བསྔལ་ཆེ་སོང་བ་ཞིག་གཏན་ནས་མིན་ལ། གཞིས་ལུས་བོད་མི་རྣམས་ལ་སྡུག་བསྔལ་ཆུང་སོང་བ་ཞིག་གཏན་ནས་མིན། སེམས་རྣལ་དུ་ཕོབ་ནས་བསམ་གཞིག་ནན་པོ་ཞིག་ཙམ་གཟན་བ་རྣམས་ཀྱིས་བཏང་དགོས་པའི་བསྐུལ་མ་དང་ལམ་སྟོན་ཡིན། ཕ་ས་དྲོན་མོ་བཙན་གྱིས་འཕྲོག ཕ་ནོར་གཅེས་དགུ་གཏོར་བཅོམ་བྱས། ཕ་མེས་དགུ་བརྒྱུད་རྩད་ནས་གཅོད་པ་པོའི། ཤ་པ་ལག་དམར་དེ་ངོ་ཤེས་དགོས་ལ། དུས་ནམ་ཡང་བརྗེད་རྒྱུ་མེད། ད་དུང་ཕ་བསད་པས་མི་ཚད་བུ་ལ་བརྡུང་བརྡེག་བཏང་སྟང་ལ་གཞིག་དུས། བྱ་བ་ག་འདྲ་ཞིག་དགོས་ཀྱི་འདུག བློ་སྟོབས་ག་འདྲ་ཞིག་འཆང་དགོས་ཀྱི་འདུག དེང་གི་དུས་སུ་མིག་ཡོད་པའི་མི་བཤར་རྐྱང་ལས་ལོང་བ་ཞར་རྒོག་སུ་ཅིག་ཀྱང་ལུས་མེད། དར་བ་ནི་སུ་ལ་ཡོད་ཀྱང་རྒུད་པ་ཡང་དེ་དང་ཆ་མཚུངས་ཡིན། བཟང་པོ་ནི་སུ་གི་ཡང་ཤེས་ལ། ངན་ལན་ཡང་སུ་གི་སྤྲོད་ཐུབ། ངོ་མ་སེམས་པ་གཏིང་ནས་སྡུག་གི་འདུག་ལ། སྐྱོ་གི་འདུག རྒྱལ་གཅེས་དཔའ་བོ་ཚོ་ཁྱེད་རྣམ་པ་ཤི་བའི་གོ་ཆོད་སོང་ལ། སྙིང་གཏིང་ནས་གུས་འདུད་ཡོད། ཁས་བཤད་རྐམ་པོའི་ཡམ་མིན་ལ་སྡུག་ཡུས་ལྕི་བའི་ན་ཟུག་ངོ་མ་ཡིན།