༧གོང་ས་མཆོག་དང་དབུས་བོད་མིའི་སྒྲིག་འཛུགས་བཀའ་ཤག བོད་མི་མང་སྤྱི་འཐུས་བཅས་ཀྱིས་འབྲས་ལྗོངས་ཁུལ་དུ་ས་ཡོམ་བརྒྱབ་པར་ཐུགས་གསོའི་འཚམས་འཕྲིན་བཏང་ཡོད།
ཉེ་ཆར་རྒྱ་གར་བྱང་ཤར་མངའ་སྡེ་འབྲས་ལྗོངས་གཙོས་པའི་ཧི་མ་ལ་ཡའི་རི་རྒྱུད་དུ་ས་ཡོམ་ཤུགས་ཚད་ ༦།༨ ཅན་ཞིག་བརྒྱབ་སྟེ། ཉུང་མཐར་མི་ ༨༠ ཙམ་ལ་སྲོག་སྐྱོན་དང་བརྒྱ་ཕྲག་བརྒལ་བར་རྨས་སྐྱོན་ཚབས་ཆེན་བྱུང་ཡོད་པ་མ་ཟད། ས་ཡོམ་དེའི་ཤུགས་རྐྱེན་བལ་ཡུལ་དང་བོད་ཀྱི་གྲོ་མོ་ས་ཁུལ་དུའང་ཐེབས་ཏེ་མི་བཅུ་གྲངས་ལྷག་ལ་ཤི་སྐྱོན་བྱུང་ཡོད། ཕྱི་ཚེས་ ༢༠ ཉིན་གོང་ས་མཆོག་གིས་འབྲས་ལྗོངས་མངའ་སྡེ་སྤྱི་ཁྱབ་བློན་ཆེན་ཊོག་ཊར་བྷ་ཝན་ཆིན་ལིན་ (Pawan Chamling)མཆོག་གི་མཚན་ཐོག་ཏུ་ཐུགས་གསོའི་འཚམས་འཕྲིན་ཞིག་བསྩལ་འདུག་ལ། དེ་དང་མཉམ་དུ་ཐེངས་འདིར་གོད་ཆག་བྱུང་མཁན་ཚོར་ཧིན་སྒོར་ལྔ་འབུམ་ ༥༠༠༠༠༠ ཙམ་ཞལ་འདེབས་གནང་ཡོད།
དེ་བཞིན། ཕྱི་ཚེས་ ༡༩ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཆོག་དང་དབུས་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་མཆོག་རྣམ་གཉིས་ཀྱིས། འབྲས་ལྗོངས་མངའ་སྡེ་བློན་ཆེན་མཆོག་གི་མཚན་ཐོག་ལ་གདུང་སེམས་མཉམ་སྐྱེད་ཀྱི་འཚམས་འཕྲིན་ཕུལ་ཡོད་འདུག ཐེངས་འདིའི་ས་ཡོམ་ནང་གོད་ཆག་བྱུང་མཁན་ཚོར་དམིགས་ཏེ། ཟླ་འདིའི་ཕྱི་ཚེས་ ༢༣ ཉིན་གྱི་ཞོགས་པའི་ཆུ་ཚོད་ ༨།༣༠ སྟེང་། བཞུགས་སྒར་ངྷ་ས་ཐེག་ཆེན་ཆོས་གླིང་གཙུག་ལག་ཁང་དུ་༧གོང་ས་མཆོག་དབུ་བཞུགས་ཐོག བོད་ཀྱི་ཆོས་རྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་བླ་ཆེན་རྣམས་ལྷན་བཞུགས་ཐོག་བསྔོ་བ་སྨོན་ལམ་འཚོགས་རྒྱུ་ཡིན་འདུག
གསར་འགོད་པ། དཔལ་ལྡན།
དྲ་གྲོགས་འཇམ་དབྱངས་ལགས་ལ་རྒྱབ་སྐྱོར་ཡོད། དེང་སང་གསར་འགོད་པ་དང་ཡིག་མཁན་ཕལ་ཆེར་གྱིས་མཁས་རྟགས་བསྟན་ནས་ཡིག་ནོར་མང་དག་ཅིག་བཀོལ་སྤྱོད་བྱེད་ཀྱི་འདུག ཅི་ཡིན་མི་ཤེས།
ངོ་མ་བློ་ཕམ་ཡོད། རང་རེ་བོད་རིགས་དང་ལོ་རྒྱུས་ཐོག་ཤ་ཁྲག་དང་འབྲེལ་བའི་ཧི་མ་ལ་ཡའི་མི་རིགས་ལ་གོས་ཆགས་གང་བྱུང་བ་ཡིན་ན་ཡང་ང་ཚོ་སྡུག་མཉམ་ལོས་ཡིན། ཞིག་གསོའི་ལས་གཞི་ལམ་ལྷོང་ཡོང་བའི་སྨོན་འདུན་ཡོད།
གཞུང་འབྲེལ་དྲྭ་རྒྱར་“རྟེན་མཆོག་སྤྱན་ལྔའི་དྲུང་དུ་”ཞེས་བྲིས་འདུག ཕལ་ཆེར་རྟེན་མཆོག་སྤྱན་སྔར་ཡིན་ཤས་ཆེ། གལ་སྲིད་དེ་ལྟ་མིན་ན་རྟེན་མཆོག་སྤྱན་ལྔ་དེ་གྲངས་འདྲེན་ཇི་ལྟར་བྱེད་དགོས་སམ། གཞུང་འབྲེལ་ཡིག་ཆ་ཆེ་ཆུང་ཅི་ཞིག་ཡིན་ཀྱང་ཡིག་ནོར་མི་ཡོང་རྒྱུ་གནད་དུ་ཆེ་བའི་རེ་སྐུལ་ཞུ།