ཤར་ཕྱོགས་ཁུག་རྟ།
ཕོ་རོག་དཀར་པོ་ཆགས་ན་སྔོན་ཐོན་པ་ཞེས་འཕྱ་སྟངས་ཤིག་གངས་ཅན་སྐྱིད་གཞོངས་ན་དར་ནས་བསྡད་ཡོད་ཁར། ད་ཐེངས་ཁ་བཙུམས་ནས་མ་བསྡད་པ་ཨམ་གཤིས་སུ་བསྒྲགས་ནས་འཕྱ་སྨོད་ཀྱང་བྱེད་སྲིད་མོད། བསམ་བློ་ག་ལེར་བཏང་དུས། དངོས་གནས་ཤ་མཆིན་པའི་སྟེང་འོག་བརྗེས་པ་ཟེར་བའི་སེམས་པ་སྐྱོ་ཕྱོགས་དེ་དབང་མེད་དུ་ཡ་ཆུང་ལ་མ་ཤོང་བར་ཁ་ནས་ཤོར་འགྲོ་བ་ཞིག་ནི་ཆགས་སོང་།
དེ་ཡང་༧པཎ་ཆེན་རིན་པོ་ཆེས་དབུ་ཁྲིད་པའི་གཞིས་ལུས་མི་མང་ལོ་ངོ་ ༥༠ ལྷག་གི་རིང་ལ་མགོན་དཔུང་དབུ་ཁྲིད་གཞུང་དང་བཅས་པ་བྲལ་རྗེས། གཞན་གྱི་གནོན་བཙུར་དྲག་ཤུགས་འོག་སྟབས་བསྟུན་གྱིས་ཉི་མཚན་རྩིས་ན་མི་འགྲོ་བའི་ངང་མི་ཚེ་བསྐྱལ་དགོས་བྱུང་ཡང་། བོད་ཀྱི་རིག་གནས་སྐད་ཡིག་དང་བཅས་པ་མུན་ནག་གི་མཁའ་ལ་སྐར་མ་བཞིན་བྲིས་ནས། བོད་ཀྱི་འཆི་གསོན་ལ་བླ་ན་མེད་པའི་ཞབས་འདེགས་བསྒྲུབས་དང་སྒྲུབ་བཞིན་པ་ཡིན། ངས་ད་ལྟ་ཡི་གེ་འདི་འབྲི་བཞིན་པའི་སྐབས་སུའང་། བོད་ནང་དུ་སྐུ་གཞོགས་བློ་བཟང་སྐལ་བཟང་དང་བློ་བཟང་དཀོན་མཆོག་གཉིས་ཀྱིས་རང་གི་ཚེ་སྲོག་མེ་ལ་སྲེག་དང་སྲེག་བཞིན་པའི་སྒང་རེད། ཁོང་ཚོའི་ན་ཟུག་དང་གཏོང་ཕོད་ཀྱིས་ངས་ཡང་ཡང་༧པཎ་ཆེན་རིན་པོ་དྲན་ལ། པཎ་ཆེན་རིན་པོ་ཆེས་ཚེ་སྲོག་བློས་བཏང་གི་དཀའ་སྤྱད་ཀྱིས་ཁོང་ཚོ་རྣམས་ཀྱིས་བོད་དང་བོད་ཀྱི་དྲི་མ་དངོས་གནས་དེ་རྟོགས་ཡོད་ལ། བོད་དྲི་ཡོད་པའི་བོད་ཀྱི་མདུན་ལམ་གྱི་ཆེད་དུ་རང་གི་ཚེ་སྲོག་ནི་མེ་སྒྲོན་ཆོག་ཆོག་གི་མར་མེ་ཅིག་དང་གཉིས་མེད་བསྒོམས་བཞིན་ཡོད།
ཡིན་ནའང་། རང་ཅག་བཙན་བྱོལ་བ་རྣམས་ལ་ད་ལོ་ལོ་རྒྱུས་ནང་བྱུང་མ་མྱོང་བའི་དབུ་ཁྲིད་ཁག་ཅིག་བྱུང་སོང་བ་སྟེ། ཕ་སྐད་བོད་ཡིག་ཀློག་འདོན་ཙམ་ཡང་མི་འཁྱོང་མཁན་གཅིག་མིན་གཉིས་སུ་བྱུང་དང་འབྱུང་བཞིན་པ་རེད། ང་ལ་གྲོགས་བོན་རྒྱས་བོད་ནང་སྐུ་གཞོགས་རྣམ་གཉིས་ཀྱིས་རང་སྲོག་བློས་བཏང་བའི་བརྡ་འབྱོར་སྐབས། ངས་བཀའ་ཁྲི་མཆོག་དང་ཕྱི་དྲིལ་བཀའ་བློན་གྱི་ལས་སྡོམ་སྙན་སྒྲོན་ལ་ཉན་བསྡད་ཡོད། ང་སེམས་སྐྱོ་ནས་ཟུག་འདར་ལངས་ནས་སྡོད་པའི་སྐབས་དེ་ཤེད་དུ་སྐུ་གཞོགས་རྣམ་གཉིས་ཀྱིས་ང་ཡང་བསྐྱར་པཎ་ཆེན་རིན་པོ་ཆེ་དྲན་དུ་བཅུག་སོང་། ང་ལ་ཞེད་སྣང་དང་དངངས་སྐྲག་ལངས་སོང་། སྐུ་གཞོགས་རྣམ་གཉིས་གཙོ་བོར་གྱུར་བའི་ཁོང་ཚོ་སེམས་བསམ་པའི་དཀྱིལ་ནས་སྙིང་རྗེ་སོང་།
འབྲི་ཀློག་གལ་ཆེན་མ་རེད། དོན་དག་གལ་ཆེན་རེད་ཅེས་ཅིག་ཤེས་མདོག་མདོག་བྱེད་མཁན་དག་གིས་སྨྲ་སྲིད་ཀྱང་། བཙན་བྱོལ་ནས་ལོ་རྒན་ལྔ་བཅུ་ཕར་ལ་གཡུགས་ནས་དྲུག་ཅུའི་ཁའང་བཀང་ལ་ཉེ་ནས་འགྲོ་དུས། བཙན་བྱོལ་སྒྲིག་འཛུགས་ནང་བོད་ཡིག་བོད་སྐད་མི་དགོས་པའི་ཚད་རིམ་ཐ་ན་དབུ་ཁྲིད་རིམ་པའི་སྟེང་དུ་བསླེབས་སོང་། ༧རྒྱལ་མཆོག་ཐམས་ཅད་མཁྱེན་པས་སྲིད་དབང་རྩིས་སྤྲོད་གནང་ཚར་བ་དང་། བོད་ཡིག་འབྲི་ཀློག་ཙམ་ཡང་མི་འཁྱོང་བས་བཀའ་བློན་འདི་གཉིས་ཀྱིས་གྲོས་ཚོགས་སུ་ཀློག་སྟངས་ཆ་མ་ཆག་ཅིག་བཏོན་པ་ན། བཤད་ཡ་གང་ཡང་མེད་པར། ཐོལ་ཐོལ་ལ་སེམས་པ་སྐྱོ་ཞིང་། སྐད་ཡིག་གལ་ཆེན་ཡིན་པའི་རིགས་པའི་གཞུང་ལུགས་དག་གི་གལ་གནད་བསྐྱར་ཟློས་བྱེད་འདོད་ཀྱང་མི་འདུག་ལ། ཞལ་རས་འཛུམ་ཞིང་ལག་གཉིས་ཐལ་མོ་སྦྱོར་བའི་བོད་ཀྱི་སློང་མོ་བ་གྲགས་ཅན་སྐྱབས་མགོན་༧ཏཱ་ལའི་བླ་མ་མཆོག་གི་རེ་བཞག་ཀྱང་ས་ལ་བསྲེས་བཞིན་པ་ཚོར་ཞིང་། ཞིང་གཤེགས་བཀའ་དྲིན་ཟླ་མེད་༧ཚོང་པ་རྒྱག་པ་གང་དེ་ཉིད་དེ་བས་ཀྱང་དྲན་པས་མནར་འགྲོ་བ་ཞིག་བྱུང་།
ད་ནི་བསམ་བློ་གང་བཏང་དང་བསམ་ཚུལ་གང་ཞུས་ཀྱང་། བོད་སྐད་ཡིག་གི་ཚེ་སྲོག་རྨང་ནས་འགྱེལ་བཞིན་འགྱེལ་བཞིན་འགྲོ་དུས། བོད་ཀྱི་ལས་བྱེད་ནས་དབུ་ཁྲིད་རིམ་པའི་ནང་བོད་ཀྱི་སྐད་ཡིག་མི་དགོས་པའི་གནས་སྟངས་ཇེ་གསལ་ཇེ་གསལ་འགྲོ་བཞིན་པའི་སྐབས་སུ། རྒྱ་ནག་འཐབ་ཕྱོགས་གཅིག་གྱུར་ཁང་གིས་བསྐྱངས་པའི་བོད་སྐད་ཡིག་གི་ལྗིད་ཚད་ཀྱང་རྒྱ་མར་འཇོག་རིན་ཡང་ཡོད་པ་འདྲ་ཞིག་མཐོང་ལ། གལ་སྲིད་མི་རིགས་འདིའི་སྐད་ཡིག་འདི་ལྟར་ཉམས་སོང་དུས། འདིའི་ནག་ཉེས་རྒྱ་ནག་གཞུང་གཅིག་པུ་ཡེ་ནས་མིན་པའང་གསལ་ཞིང་གསལ་བོར་ཤེས་ཀྱི་འདུག འོན་ཀྱང་བོད་སྐད་ཡིག་གི་སྲོག་རྩ་བཙན་བྱོལ་ལ་ཐུག་ཡོད་མེད་ཀྱང་ད་ལྟ་ཤེས་ཚོད་དཀའ་བ་འདྲ་ཞིག་ཏུ་ཚོར།
༧གོང་ས་མཆོག་དང་པཎ་ཆེན་རིན་པོ་ཆེའི་དགོངས་གཞི་ལྟར་མ་སོང་བར། བོད་སྐད་ཡིག་གི་ཆེད་དུ་བོད་མི་ནང་ཁུལ་ལ་ལྟ་ཚུལ་འབྱུང་བཞིན་པའི་སྐབས་སུ། གཅིག་བྱས་ན་བོད་མི་རིགས་ལ་ཞེན་ཁོག་བྱེད་སྟངས་ཀྱི་ཆ་ནས་བོད་ཕྱི་ནང་གཉིས་ཀྱི་བར་ལ་རིང་ཐུང་ངེས་ཅན་ཞིག་ཤོར་སྲིད་ལ། དེས་༧གང་གིས་བྱས་པ་མཐའ་དག་ཀྱང་ནག་བསུབ་མི་གཏོང་བའི་ངེས་པ་མེད་པས་ན། ལར་ནས་བཀའ་བློན་དག་གི་འོས་ཆོས་སུ་བོད་པའི་སྐད་ཡིག་ལ་རང་ཚུགས་ཐུབ་པ་ཟེར་བའི་ཆ་རྐྱེན་ཞིག་བཀོད་ཐུབ་པ་ཡིན་ན་ཉི་མ་དེ་རིང་གི་གནས་ཚུལ་འདི་འདྲ་འབྱུང་མི་སྲིད་པ་རེད་ལ། བོད་ནས་གཅིག་གི་གཅིག་འཕྲོར་རང་སྲོག་མེ་ལ་སྦར་དུས། འདི་ནས་དབུ་ཁྲིད་ཚོས་བོད་ཡིག་ཀློག་མ་ཤེས་པར་བསྡད་ན་དངོས་གནས་པཎ་ཆེན་བླ་མ་ལྟ་བུའི་བོད་སྐད་ཡིག་གི་ཀ་ཆེན་ཚོ་དྲན་པ་ཞིག་རེད་ལ། གཟིམ་ཆུང་སྦུག་ན་ཐམས་ཅད་ལག་མཐིལ་གྱི་རི་མོ་བཞིན་གཟིགས་དང་གཟིགས་བཞིན་པའི་༧གོང་ས་མཆོག་དེའང་། པཎ་ཆེན་རིན་པོ་ཆེ་ལྟར་གངས་སྐྱིད་ལས་ཁུངས་དག་ཏུ་སྐུ་རླུང་ལངས་ནས་རྡུང་གི་མི་ཕེབས་ཀྱང་། ཐུགས་བསམ་ང་ཚོ་བོད་ཡིག་ལ་དགའ་མཁན་ཚོ་ལྟར་སྐྱོ་ནས་བཞུགས་པ་ནི་ཐེ་ཚོམ་མི་དགོས་པ་ཞིག་རེད།
གཞན་ཡང་སྐད་ཆ་འདི་ཙམ་གྱིས་ཁོ་བོ་དེ་ནས་དེ་རུ་སྤྱུགས་ཀྱི་ཡིན་ཞེས་དབང་ཆེན་པོ་ཁྲེད་ཀྱིས་ཚད་རུང་། རྩ་དོན་བརླག་པའི་མི་སྨྲའི་རྟུལ་ཞུགས་དེར་རྟག་ཏུ་འགྲོ་ཐུབ་པ་ཞིག་རེད་མི་འདུག་གོ།
གནད་དོན་གཉིས་ཁ་སྦྱར་ནས་ཐོན་པས་ཤར་མར་སྦྱར།
༢༠༡༡། ༩། ༢༦།
འབྱུང་འགྱུར་བསུ་བའི་རེ་བ་མག་མོག་དེས།།
སྦོམ་བཤད་གཏམ་གྱི་དང་ག་འགག་འགྲོ་བས།།
དགྲ་མེད་ཐང་གི་གླེན་པའི་ཀི་རིང་དེ།།
གཡུལ་ལས་རྒྱལ་བའི་དཔའ་སྐད་ཡིན་ཚོད་མེད།།
འོལ་ཚོད་གཏམ་དང་ཚོར་བའི་གཤོག་ཟུང་ཅན།།
སྐད་ཅིག་མཐོན་པོའི་ཁྲི་ལ་སླེབས་པ་ན།།
སྒམ་བརླིང་སྲ་བརྟན་སྲོང་བཙན་སྒམ་པོའི་དྲི།།
ཅུང་ཙམ་ཡོད་པ་འཁྲིས་ནས་མ་མཐོང་བས།།
ལུང་པའི་བྲག་ཆ་འབྲུག་སྒྲ་མིན་པར་རྟོགས།།
ཤར་ཕྱོགས་ཁུག་རྟའི་གཤོག་འགྱུར་རེ་རེ་ན།
དུངས་ཞེན་ཟབ་མོའི་སྐྱོ་སྣང་ལྗིད་ཏིག་ཏིག
ཕྱིར་དྲན་སྨོན་པའི་རྨི་ལམ་ལྗང་ཐིང་ཐིང།
འབྱུང་འགྱུར་བསུ་བའི་རེ་སྐུལ་གྲང་ཤུར་ཤུར།
བྱ་རྒྱལ་ཁུ་བྱུག་གསུང་སྐད་འདའ་ར་ར།
སྨྲ་མཁན་ནེ་ཙོའི་མཆུ་ཏོ་སྒུ་རུ་རུ།
ཁྭ་ཏ་ནག་པོའི་ཨག་སྐད་ཆ་ལ་ལ།
མགོན་པོའི་ལྷ་བྱའི་གྲོག་སྐད་གང་ན་མཆིས
གྲོགས་པོ་ཤེས་རབ་དེ་འདྲ་མ་གསུང་བོད་ཀྱི་སྐད་དང་ཡི་གེ་བོད་ཀ་ྱི་རྩ་དོན་ཡིན་ད་ཡིན་འོན་ཀྱང་ངས་གན་སྟངས་དེ་མ་ཤེས་བ་མ་ཟད་ད་རོང་བཀའ་བློན་སོགས་ཀྱིས་ཀྱང་མཁྱེན་གྱིན་ཡོད་དམ་གལ་སྲིད་མེད་ན་མི་འདུག་ཞེས་ནས་སྐོྱན་འཛུག་བྱེད་པ་ལས་རྒྱབ་སྐྱོལ་བྱེད་ན་དགའ་དྲང་མོ་ཡིན་འཇོན་མི་འཇོན་དང་ཇུས་གཏོགས་མི་གཏོགས་ཞིག་མ་རེད།
འཇིག་རྟེན་འདི་ཡང་མྱི་མི་འཇོན་ཇུས་གཏོགས་ཚ་བོ་ཞིག་ཡིན་ཁོ་ཐག་རེད། བོད་སྐད་ཡིག་བོད་ཀྱི་རྩ་དོན་མིན་པའི་གནས་སྟངས་ཤིག་ཡོང་ཤེས་ཀྱི་རེད་དམ།
གྲོགས་པོ་ཁུག་རྟ་ལགས་ངས་ཁྱེད་ལ་འཇིགས་སྐུལ་བྱེད་པ་མིན་བརྒྱ་བཤད་སྟོང་བཤད་ཀྱང་ང་ཚོ་བཙན་བྱོལ་བ་ལ་ཁོ་མ་གཏོགས་ཀྱང་མི་འདུག་མོད་ཁྱེད་ཀྱིས་ཁོ་ལས་ལྷག་པ་ཞིག་རྙེད་ཡོད་ན་གྲོགས་པོ་ང་ལ་གསུགས་རོགས་མེད་ན་ད་ཁོ་ལ་རྒྱབ་སྐྱོལ་བྱེད་ན་ཡག་པོ་མ་རེད་དངོས་གནས་ཡིན་ངས་གཞན་པ་གྱང་མཐོང་མ་སོང།ཡིན་ན་ཡང་སྔོན་གྱི་བཀའ་བློན་དག་ཀྱང་འདྲེའི་ཡ་མཚན་པ་གཅིག་ཀྱང་མེད་ཟེར་ན་ཆོག་མོད།
འོ་རྒྱ་ནག་གི་མའོ་ཙེ་ཏུང་ནས་ད་ལྟའི་ཧུའུ་ཅིན་ཐོའི་བར་གྱིས་ཨིན་ཡིག་ཤེས་ཀྱི་ཡོད་པ་མ་རེད། ཁོང་ཚོས་སྐད་བསྒྱུར་ཁྲིད་གནང་གི་ཡོད་པ་རེད།
དེ་བཞིན་སྐུ་ཞབས་ཨའོ་པ་མས་ཀྱང་རྒྱ་སྐད་ཤེས་ཀྱི་ཡོད་པ་མ་རེད། ཁོས་ཀྱང་སྐད་བསྒྱུར་ཁྲིད་ཀྱི་ཡོད་པ་རེད།
དབུ་ཁྲིད་རྣམས་པ་མང་ན་ལོ་བཅུ་དང་ཉུང་ན་ལོ་ལྔ་རེད། ལོ་ཉུང་ཉུང་དེ་ཙམ་གྱིས་ལོ་སྟོང་ཕྲག་ཡོད་སྐད་ཡིག་སྣང་མེད་དུ་བཞག། ཇི་སྲིད་སེམས་ཅན་གནས་པ་དེ་སྲིད་དུ་གནས་དགོས་པའི་བོད་ཀྱི་སྐད་ཡིག་གི་རེ་བ་རྔུལ་ནག་ལ་བསམས་ན། སེམས་སྐྱོ་ནས་མི་ངུ་མཁན་སྲིད་ན་དཀོན་པོ་རེད།
འཇིག་རྟེན་ལགས་ཀྱིས་འཇིགས་སྐུལ་ཉེན་བརྡ་གང་ཡིན་མི་ཤེས་པ་ཞིག་བཏང་འདུག་སྟེ། འཇིགས་སྐུལ་གནོན་ཤུགས་སྤྲད་སྤྲད་ནས་ད་འུ་ཐུག་སོང་། ག་རེ་གནང་རྒྱུ་ཡོད་ན་གནང་རོགས།
བོད་སྐད་ཡིག་བོད་ཀྱི་སྲོག་ཡིན། དབུ་མའི་ལམ་གྱི་སྒྲུབ་བྱའི་གཙོ་བོ་ཡིན། ༧རྒྱལ་པཎ་རྣམ་གཉིས་གཙོས་བོད་ཀྱི་དཔའ་བོ་དག་གིས་ཚེ་སྲོག་གིས་བསྐྲུན་པའི་རིན་ཆེན་ནོར་བུ་ཡིན། འདི་འུ་ཚོའི་དུས་རབས་འདིར་ཡལ་སོང་ན་ག་འདྲ་འདུག། འུ་ཚོའི་དུས་རབས་འདིའི་བོད་ཀྱི་དབུ་ཁྲིད་རིམ་པར་བོད་སྐད་བོད་ཡིག་མ་དགོས་པའི་ཚད་དུ་སླེབས་སོང་བ་འདི་ཡ་ང་ཞིང་ཡིད་སྐྱོ་བ་ཞིག་རེད།
ཤར་ཕྱོགས་ཁུག་རྟ་ལགས་གནམ་འཕང་མ་སྐྱོད་མ་གཏོགས་དཀའ་ལས་ཁག་ཡོང་ཁུག་རྟ་རེད་མོད་བྱེ་དྲག་འཕུར་ཐུབ་གི་མ་རེད་སྒོ་ཁྱིམ་པར་ནས་འཕུར་སྐྱོད་བྱེད་ནས་སྐད་རྒྱབ་ན་སྐྱིད་པོ་ཡོ་བ་རེད།
ཁུག་རྟ་ལགས་ཁྱེད་ཀྱིས་བཤད་པ་བདེན་པ་རེད་་དཔེ་སྣང་བ་འགྲོ་སོང་ཡིན་ན་ཡང་ཁྱེད་ཀྱི་གཤིས་ལུགས་པ་གལ་ཆེ་ཞིང་གལ་སྲིད་རྒྱུ་རྐྱེན་གཞན་ཞིག་ཡོད་ན་དྲ་གྲོགས་དག་གི་ལག་པ་ན་བ་རིང་རེད་དེ་མིན་ན་ངས་ཡང་ཁྱེད་ལ་རྒྱབས་སྐྱོར་མཐའ་ཅིག་དུ་ཡོད་མ་གཞི་ང་ཡང་བཀའ་ཁྲི་མཆོག་གི་མཚན་ཐོག་ན་ཡོད་པའི་མཁས་དབང་ཞེས་བའི་ཚིག་འབྲི་གཉིས་པོ་མེད་ན་ཡག་པོ་རེད།