བཀའ་བློན་འདི་གཉིས་ངར་༧པཎ་ཆེན་རིན་པོ་ཆེ་དྲན་དུ་བཅུག་སོང་།

གཞུང་ལུགས་སྨྲ་བའི་ཨ་ཁུ་གསེར་རྟ་བས།།
སྨྲ་བརྗོད་རང་དབང་ཁྱོན་ནས་འཕྲོག་མི་འདུག།
བདེན་དོན་གཏམ་ལ་རྒོལ་བའི་ལམ་ལུགས་ཤིག།
ཁྱེད་ཀྱང་སྨྲ་བ་འདི་གོ་དྲིན་དུ་ཆེ།།

ཕ་སྐད་ཕ་ཡིག་ཡལ་ནས་འགྲོ་བའི་དུས།།
ཕ་རྒན་པཎ་ཆེན་དྲན་པ་ངོ་ཚ་ཡང་།།
གནས་ལུགས་ལེར་ཞེན་ཟུང་གི་མཛེས་མ་ལ།།
འདི་ལས་མཛེས་ཉམས་སྟོན་རྒྱུ་མ་རྙེད་ཐལ།།

གངས་ཅན་སྐྱིད་གཞོངས་བོད་སྲོག་སྐྱོབ་ས་ཡིན།།
ལྷ་མོ་དོན་ཀུན་གྲུབ་པའི་གཡུལ་ས་ཡིན།།
བོད་དང་བོད་ཀྱི་དེའི་ཕྱིར་གཡུལ་ས་འདིར།།
སྐྱེ་བ་ཐེངས་གཅིག་བརྗེས་ན་དཔའ་རྒོད་ཡིན།།

རྒྱ་ཡིས་བསད་ཀྱང་སྐུ་ངོས་ཕུད་ཀྱང་རུང་།།
ལན་གཅིག་ལུས་ལ་རྟེན་པའི་གར་ཆུང་འདི།།
དུས་ཀྱི་ཆོས་ཉིད་དབང་དུ་འགྲོ་རག་བར།།
བོད་རུས་བླངས་པའི་ཟས་རིན་སྤྲོད་ལ་འབུངས།།

ཡུམ་ཆེན་ཨ་མ་རྒྱ་ཡི་འོག་ཏུ་ཡོད།།
ལན་གཅིག་འཕྲད་པའི་གོ་སྐབས་བདག་ལ་མེད།།
མ་ཤི་གསོན་བྲལ་བོད་ཀྱི་དུས་རབས་འདིར།།
རྡ་ཞོལ་བཙོན་དུ་བཅུགས་ཀྱང་ཨེན་ཙམ་གདའ།།

ཕ་སྐད་ཕ་ཡིག་མི་དགོས་ཡལ་བའི་དུས།།
ནག་པོའི་ལམ་གྱི་དབུ་ཁྱུད་བྲིས་འདུག་ལ།།
བགྲང་བྱ་རེ་འགའི་དབུ་ཁྲིད་འདི་ཚོ་ནི།།
ཁ་སང་མགྲོན་པོ་དེ་རིང་བུད་ལོས་འགྲོ།

ལོས་འདེད་འཁེང་ར་ནག་ཉེས་བཀལ་མེད་ཀྱང་།།
ཡ་ཆུང་སེམས་པ་མེ་ཡིས་བསྲེགས་འགྲོ་བས།།
ཉམས་ངའི་ངང་ཚུལ་འདི་གའི་དབུ་ཁྲིད་གཟུགས།།
གཞིས་ལུས་བོད་མིས་གསན་ན་ངོ་རེ་ཚ།།

ཁ་ཡིག་མཆོག་དང་ཕུལ་ཞེས་སྨྲས་མེད་ལ།།
གཞན་ཡིག་མི་དགོས་ཞེས་ཀྱང་མ་སྨྲས་མོད།།
རང་གི་དབུ་ལ་རང་སྐད་མ་འཛོམས་དུས།།
ཡ་ཆུང་སེམས་འདི་གྲི་ཡིས་བསྣུན་ལས་བཙོག།

གངས་རིའི་མགོན་པོའི་བཀའ་དྲིན་ཟླ་མེད་དེས།།
གཟིགས་པ་བསྐྱངས་པ་བྱམས་སེམས་འོ་མའི་མཚོ།།
མིད་པའི་ཕྲེང་ནས་བྲང་ཁོག་ཉུལ་བའི་དུས།།
རང་ཁེ་གཉེར་མཁས་ལམ་དེར་ཡི་ག་ལོག།

མི་རིགས་ཞིག་དང་རྒྱལ་ཁབ་ཅིག་གི་སྐད་ཡིག་མི་རིགས་དེ་དང་རྒྱལ་ཁབ་དེའི་དབུ་ཁྲིད་རིམ་པའི་ཁྱད་ཡོན་ནང་མ་ཚུད་པ་དང་། མེད་པ། ཟགས་པ་བཅས་བྱུང་བ་ནི་བོད་མིའི་སྒྲིག་འཛུགས་འདི་ཨང་དང་པོ་ཆགས་པ་རེད་ཅེས་པ་འདི་རྩ་དོན་འགག་ཅིག་ཡིན། དེ་ཡིད་ལ་ཟུངས།

སྐད་ཡིག་ག་ཚོད་ལྡན་མིན་ལ་མ་ལྟོས་པར། རྒྱལ་ཁབ་ཀྱི་དབུ་ཁྲིད་རིམ་པ་རང་གི་མི་རིགས་ཀྱི་ཕ་སྐད་ཕ་ཡིག་ལས་གཏན་དུ་གྱེས་པ་ཡིན་ན། སྐད་ཡིག་རྩ་དོན་ཡིན་པའི་མི་རིགས་ཀྱི་མདུན་ལམ་ནང་ཉེས་པ་དང་ནག་ཐིག་ག་ཚོད་བབས་དང་བཞག་ཡོད་མེད་གསལ་བོ་རེད།

ཡང་སྒོས་དབུ་མའི་སྒྲུབ་བྱའི་ཐད་ནས་ཞུས་ན་འདྲ། དབུ་མའི་ལམ་གྱི་བློས་གཏོང་དང་མངོན་འདོད་ཀྱི་ཆ་ནས་ཞུས་ནའང་འདྲ། སྐད་ཡིག། ཆོས་དང་རིག་གཞུང་གཙོ་འདོན་བྱེད་ཀྱི་ཡོད་པས། དེའི་རང་དབང་ཆ་ཚང་སྒྲུབ་མཁན་གྱི་དབུ་ཁྲིད་ཅིག་ལ་དེའི་ཐད་ཀྱི་ཤེས་ཡོན་ཚད་ལྡན་དགོས་པ་ནི་གཞི་རིམ་གྱི་འཛོམས་དགོས་པའི་ཆ་རྐྱེན་ཞིག་ཡིན། འདི་དངོས་ཡོད་ཀྱང་ཡིན།

ཤར་ཕྱོགས་ཁུག་རྟ་གས་ལགས།
རྡ་ས་ནས་རང་དང་ལྟ་བ་མ་མཐུན་ན་ལྟ་ལོག་དང་ལྟས་ངན་རྒྱ་མི་གསང་ཉུལ་བ་ཤུགས་ལྡན་ཚོགས་པ་རེད་ཟེར་བའི་སྐད་ཆ་འདི་ས་ཕྱོགས་འདིའི་ཆབ་སྲིད་པ་ཚོས་མི་མགོ་རྡུང་བའི་ཐོ་བ་ངོ་མ་དེ་རེད།ཁྱེད་ལ་ཡང་འདི་འདྲ་མི་བཤད་པའི་ངེས་པ་མེད།སྐད་ཆ་འདི་ཚོ་ལ་ཞེ་སུན་ནས་ཡོད།
ཁ་གསལ་པོ་བྱ་ནས་ཤེས་དགོས་བ་ཞིག་ལ་དེ་ིར་ང་གི་བོད་ཡིག་དང་བོད་ཀྱི་རིག་གཞུང་སྐད་ཡིག་གི་ཤེས་ཚད་དམའ་བའི་མགོ་ཁྲིད་རྐྱང་རྐྱང་ཞིག་བསླེབས་པ་འདི་མི་ལོ་ལྔ་བཅུའི་ནང་གི་སློབ་གསོ་འཐུས་ཤོར་ལས་བྱུང་བ་ཡིན་པ་ལས་མི་སྒེར་རེ་རེ་མཛུབ་མོ་འཛུགས་ས་ཁག་པོ་རེད་བཀའ་ཁྲི་དང་བཀའ་བློན་གསོ་སྐྱོངས་བྱ་སའི་ཤེས་ཡོན་ཁོར་ཡུག་མ་འགྲིགས་པའི་རྐྱེན་གྱིས་བྱུང་རེད་རྒྱབ་ལྗོངས་དང་མདུན་རྒྱབ་ཆ་ཚང་ལ་ལྟ་ནས་སྐད་ཆ་བཤད་དགོས་བ་གལ་ཆེ།
འཐུས་ཤོར་འདིའི་ནང་དུ་བླ་ཆེན་མི་ཆེན་སྐུ་དྲག་དགེ་རྒན་སློབ་སྤྱི་མདོར་ན་འགན་ཁུར་མཁན་ཚོས་འཐུས་ཤོར་བྱུང་བ་ཤེས་དགོས།

ང་འདྲེ་མགོ་མགོ་རྡོ་ཡོང་ནས་བཀླགས་ཟིན། ཁོམ་ལོང་བྱུང་ན་ད་དུང་འདི་འདྲ་རེ་གཏོར་རོགས་ཞུ།

ཁྲི་སྲོང་བཙན་གྱི་ཀླད་ཁམས་དང་གོ་བ་ཆེ་ས་རེད། ཀློག་པ་པོ་ཞིག་གིས་གོ་བ་ཁྲི་ཕྲག་བསྐྱོན་རྒྱུ་ནི་སྤྱིར་ཡར་ལུང་ཡར་རྒྱས་ཅན་གྱི་ཤེས་ལྡན་པ་ཚོའི་འགྲོ་སྟངས་རེད།

བསྟན་འཇམ་ལགས་ཀྱིས་གང་གསུངས་ཀྱི་ཡོད་མེད་བརྡ་འཕྲོད་མ་སོང་།

ལྷག་བསམ་རྣམ་དག་གི་སྐད་ཆ་ཡིན་ན་ཡག་པོ་རེད་དེ། ཤར་ཁུག་འདི་སྔ་ཕྱི་བར་གསུམ་དུ་སྲིད་སྐྱོང་མཆོག་ལ་མི་དགའ་སྡང་ཟུག་བྱེད་མཁན་ཞིག་ཡིན་པས། སྐད་ཆ འདི་ཚོ་སྐབས་འཚོལ་བའི་སྐད་ཆ་ཞིག་ལ་མ་རྩིས་རང་རྩིས་རེད། སྤྱིར་སྲིད་སྐྱོང་མཆོག་དང་ཕྱི་འབྲེལ་བཀའ་བློན་རྣམ་གཉིས་ལ་བོད་ཡིག་ཡག་པོ་མེད་པ་བདེན་ན་ཡང་། དེ་ནི་འདས་པའི་གཞུང་གིས་སློབ་སྦྱོང་སྤྲོད་བཏང་གི་འཐུས་ཤོར་ཞིག་ཡིན་པ་ལས་ཁོང་གཉིས་དགེར་གྱི་སྐྱོན་ལ་བརྩིས་ན་མི་འགྲིག་པར་སེམས། གང་ལག་ཞེ་ན་བཙན་བྱོལ་ནང་འཚར་ལོང་བྱུང་བའི་ཁོང་གཉིས་གྲལ་གྱི་མི་རབས་དེ་ཧ་ལམ་ཡོང་རྫོགས་ཁོང་གཉིས་ལྟ་བུ་ཞིག་རེད། ད་དུང་བཤད་རྒྱུ་ཞྀག་ལ་ཤར་ཁུག་ཁྱེད་ནས་ཀྱང་བོད་ཡིག་ད་དུང་སྦྱང་དགོས་རྒྱུ་གལ་ཆེན་རེད་འདུག

བོད་ཡིག་བོད་སྐད་ཡག་ཙམ་བྱུང་ན་བོད་ཀྱི་བདེན་མཐའ་སེལ་ལ་ཉེ་སེ་ཡོད་ན། ད་ཡོད་སྤྱིའཐུས་གསར་ཞུགས་འགའ་བོད་ཡིག་གསར་འགོད་ལས་རིགས་ནས་སྤྱི་འཐུས་ཀྱི་གྲལ་ཏུ་ཕེབས་ཡོད། དེ་ཚོ་ཡོད་པས་བོད་སྤྱིའི་བདེ་བ་གསར་བ་ཞིག་བསྐྲུན་པ་དང་སྡུག་བསྔལ་རྙིང་པ་འགའ་རྩ་མེད་བཟོས་ཟིན་པ་གང་ནས་ཤེས་ཡོད།
སྤྱི་འཐུས་ཁྲོད་བོད་ཡིག་ཡག་ཙམ་ཡོད་པའི་རོང་བོ་བློ་བཟང་སྙན་གྲགས། ལི་ཐང་འཇམ་བཟོད ། གངས་ལྷ་མོ ། རྨོག་རུ་བསྟན་པ། སྒྲོན་དཀར་སྐྱབས་སོགས་ཡོད་པས་སྤྱི་འཐུས་ཀྱི་དཀྱིལ་འཁོར་ལ་དམིགས་གསལ་གྱི་འོད་འདང་འཚེར་བ་དང་ཁྱད་འཕགས་ཀྱི་ནུས་པ་ཅི་ཞིག་འདོན་ཐུབ་ཡོད ། རྩོམ་འཁྱོག་ཐུ་ཆད་རེ་འབྲི་ཤེས་དུས་རང་ཉིད་བླ་མེད་དུ་སྒོམ་པ་ནི་རྒྱ་ཁམས་མ་མཐོང་བའི་ཆེས་ཞ་ར་དང་གླེན་ལྐུག་ངག་མ་འཁྲོལ་པའི་སྐྱེས་བུ་ཞིག་དང་གཉིས་སུ་མ་མཆིས་སོ ། དབུས་བོད་མིའི་སྒྲིག་འཛུགས་ཀྱི་ལས་བྱེད་པ་ཞིག་ཡིན་ཕྱིན་ཆེད་རྩོམ་འགྲན་བསྡུར་བྱེད་སའི་སྟེགས་བུའི་སྟེང་དུ་འཛུག་དགོས་པའི་གོ་བ་ལེན་པ་ནི་བོད་ཀྱི་འཐབ་རྩོད་ཀྱི་ངོ་བོ་ལ་གོ་བ་ཏོག་ཙམ་ཡང་མ་ལོན་པའི་གླེན་རྟགས་ཀྱི་ཤུན་འཚང་གསལ་བོར་བསྟན་པ་རེད །
བཀའ་ཁྲི་གཙོས་བཀའ་བློན་དང་སྤྱི་འཐུས་ཚོ་བོད་ཡིག་ཀློག་སྤྱོར་མི་ལེགས་པའི་ལྟ་སྟངས་འཛིན་མཁན་ཚོར་བོད་ཡིག་གི་རྒྱུགས་ཚད་ཚད་དང་ལྡན་པ་ཞིག་ལེན་རྒྱུ་ན་ཕལ་ཆེར་རྒྱུགས་ཚད་ལོན་མཁན་ཉུང་ཉུང་ཡིན་པ་ངན་རྟགས་སྔོན་དུ་སོང་ཡོད ། ངན་རྟགས་དེ་དག་ཡོད་པ་ཤེས་བཞིན་དུ་རང་ཉིན་གྱི་འཚང་ཕྱི་རུ་བརྡོལ་གྱིན་པ་ཚོར་མེད་དུ་གནས་པ་འདི་དོན་དངོས་གནས་གཉུག་གཤིས་ཡིན་ནམ་ཐོལ་བྱུང་གི་བསམ་བློ་ཞིག་ཡིན།
བོད་ཡིག་ཕྲན་ཚེགས་ཡག་ཙམ་ཡོད་པ་དང་ཕྱིའི་སྐད་ཡིག་དུ་འབྲུ་ཙམ་མི་ཤེས་པའི་སྤྱི་འཐུས་ཚོ་ཕྱོགས་གཅིག་ནས་བེད་མེད་ནུས་སྟོང་རེད་ལབས་ན་མ་འགྲིག་པ་ཆེས་ཆེར་མེད། ད་ལྟའི་བོད་ཀྱི་ལས་དོན་གཙོ་ཆེས་ཤོས་ཕྱི་འབྲེལ་ཡིན་པས་རང་སྐད་ལས་ཕྱི་སྐད་གཙོ་ཆེར་དགོས་སྟབས་ད་ལྟའི་སྤྱི་འཐུས་རེ་འགའ་མི་གཞན་ཞིག་སླེབས་དུས་གཞའ་ཅི་ཐབས་བྱེད་པ་ཁྱེད་ཚོས་ཚོར་ཨེ་བྱུང་།

ད་ག་རེ་གླེང་གི་ཡོད། ཟླ་བ་འགའ་ཤས་ཀྱི་ཡར་སྔོན་ལ་ག་རེ་བྱས་ནས་གླེང་མེད། ༼བསམ་བློ་སྔོན་ལ་བཏང་ན་མཁས་པ་དང་། འགྱོད་པ་རྗེས་ནས་གླེན་པ་༽ཞེས་པ་མ་རེད་དམ།

དེ་ལས་ཁོང་གི་སྲིད་བྱུས་ལ་ལྟོས། ལྷག་པར་དུ་ཤེས་ཡོན་སྲིད་བྱུས་གང་འདྲ་རེད། རྒྱལ་སྤྱིའི་འབྲེལ་བ་གང་འདྲ་ཡོང་གི་འདུག འདི་དག་གི་ཕྱོགས་གླེང་རྒྱུ་གལ་ཆེ་གི་རེད་མ་གཏོགས། ཚང་མས་དམ་འབུལ་ཞུས་ཤིང་། གདན་གྲལ་ལ་འཁོད་ཚར་བའི་ཕྱི་ཉིན་དེར་འགྱོད་པའི་མིག་ཆུ་འདྲ་ཕུད་བསྡད་ན་ཕན་ཐོགས་ཡོད་པ་མ་རེད།

ངའི་བསམ་ཚུལ་ལ། སྲིད་དོན་དཔྱད་བརྗོད་བྱ་སྟངས་འདི་འདྲ་མ་རེད་འདོད། དགོངས་དག

ཤར་ཕྱོགས་ཁུག་རྟས་དོན་དངོས་དང་ལྡན་པའི་རྩོམ་ཡིག་ཡག་པོ་ཚད་དང་ལྡན་པ་ཞིག་བྲིས་འདུག་ཐུགས་རྗེ། ད་དུང་ང་ཚོས་རྒྱལ་བ་ཡབ་སྲས་གཉིས་ཀྱི་བཀའ་སློབ་འབུམ་ཕྲག་གནང་བ་རྣམས་ལ་བསམ་བློ་ཡག་པོ་མ་གཏང་བར་ཕྲུ་གུ་ཨ་མའི་ཁོག་པ་ནས་མ་སྐྱེས་གོང་ཨིན་ཇི་་སློབ་བསམ་པའི་བསམ་བློ་དང་རང་མི་རིགས་ཀྱི་སྐད་ཡིག་ཡག་པོ་མི་ཤེས་པའི་མགོ་འཁྲིད་མུ་མཐུད་འདེམས་ན་བོད་མི་རིགས་འདི་མེད་པར་འགྱུར་བར་ལོ་ངོ་མང་པོ་འགོར་མི་སྲིད།

ཁུག་རྟ་ལགས། འགོ་བཀའ་ཤག་ཚུད་ལ་བོད་ཡིག་མི་དགོས་ཤག་ཇི་ལྟར་བྱེད་ཀྱིན་འདུག ད་ལྟའི་བར་དུ་བཀའ་ཤག་སྐབས་ཇི་ཙམ་ཕྱིན་པ་དེ་དག་ཀུན་གྱིས་བཀའ་སྤྱི་གང་རུང་ལ་བོད་ཡིག་གཞི་རྩའི་ཆ་རྐྱེན་དུ་མི་འཇོག་པ་གང་ཡིན་ནམ། བཀའ་བློན་ཁོང་རྣམས་ཀུན་གྱིས་ཡག་ངན་ལ་མ་ལྟོས་པའི་བོད་ཡིག་ཤེས་པ་འདིའང་ཡག་པོ་རེད། ལར་གངས་སྐྱིད་ཀྱི་ལས་བྱེད་ཕལ་ཆེ་བས་བོད་ཡིག་རྒྱུགས་འཕྲོད་མི་སྲིད་པ་དངོས་དོན་ཡིན་པ་ལ་བཀའ་བློན་གཅིག་པུར་སྡང་བ་བྱེད་དགོས་མེད། དེ་ནི་ང་ཚོས་ཡར་རྒྱས་གཏོང་དགོས་པ་ཞིག་ལོས་ཡིན་ཏེ། ངོས་ནས་ཁོར་ཡུག་གི་འོག་ནས་གཞན་ཡུལ་གྱི་བོད་མི་ཚོས་སྐད་རིགས་མི་གཅིག་པའི་མི་དུང་ཕྱིར་མང་པོའི་དཀྱིལ་དུ་རང་གི་སྐད་ཡིག་ད་ལྟའི་གནས་བབས་འདི་འདྲ་ཞིག་ཉར་ཐུབ་པའང་ཧ་ཅང་གི་རླབས་ཆེན་དུ་མཐོང་གིན་འདུག

ད་འུ་ཅག་ལུང་པ་མེད་པའི་སྐྱབས་བཅོལ་བ་ཡིན་པའི་ཐོག་ནས་ཞུས་ན། དབུ་མའི་ལམ་གྱི་སྐབས་བབས་ཀྱི་ཛ་དྲག་གི་སྒྲུབ་བྱའི་ཐོག་ནས་ཞུས་ན། རང་གི་མི་རིགས་ཀྱི་ལར་ཞེན་དང་ངོ་བོ་ཉམས་མེད་རྒྱུན་འཛིན་བྱེད་ཐབས་ནས་ཞུས་ན་འདྲ། གང་ལྟར་ད་ལྟ། བཙན་བྱོལ་སྤྱི་ཚོགས་ནང་བོད་ཡིག་མི་དགོས་སློབ་གྲྭ་འགྲིམས་ཀྱི་ཡོད་ལ། དེ་བཞིན་མཐོ་རིམ་སློབ་གྲྭ། དེ་བཞིན་ལས་བྱེད་པ། དེ་བཞིན་འགོ་བཀའ་ཁྲི་ཚུན་ཆད་དུ་ད་ནི་བོད་ཡིག་མི་དགོས་པ་ཁོ་ཐག་འདྲ་བོ་ཆོད་ནས་འགྲོ་བ་འདི། ལོ་རྒྱུས་གསར་བའི་ནང་གི་ཤོག་ལྷེ་ནག་པོ་རེད་མ་གཏོགས་གཞན་གང་ཡང་མ་རེད། འདི་ལྟར་ལྟ་དུས་ཡིག་རྨོངས་མེད་པས་ཀྱང་ཕན་གི་མ་རེད་ལ། བཙན་བྱོལ་སྤྱི་ཚོགས་ཀྱི་དཔལ་འབྱོར་ཡར་རྒྱས་ཕྱིན་པས་ཀྱང་ཕན་གི་མ་རེད། དོན་དག་ཛ་དྲག་དེ་རྩ་དོན་ཐོག་ནད་པ་ཆགས་ནས་ཤི་བའི་ལམ་དུ་བསྐྱོད་པ་དེ་རེད།

དཔེར་ན། ད་ཐེངས་བོད་ཡིག་མི་དགོས་པའི་དབུ་ཁྲིད་རིམ་པ་སླེབས་པ་འདིས་གཞི་རིམ་མི་མང་དང་སློབ་གྲྭའི་སློབ་མ་ཚོའི་ནང་བག་ཆགས་ག་འདྲ་ཞིག་བཞག་ཡོད་པ་རེད་དམ། དོན་དངོས་བྱས་ན། འདི་ལ་ཁྲིམས་དང་ལ་རྒྱ། ལས་རྒྱུ་འབྲས་གང་ཐད་ནས་ནག་ཉེས་གནམ་ལ་མི་ཤོང་བ་ཞིག་འབབ་པ་ནི་ཚད་གྲུབ་རང་རེད།

ཤར་ཕྱོགས་ཁུག་རྟ་ལགས། ཁྱེད་ཀྱིས་རྒྱ་གཞུག་གི་གཏམ་བཤད་ལ་ལན་འདེབས་བྱས་པར་ཐུགས་རྗེ་ཆེ་ཞུ། བོད་ཕྱི་ནང་ཁྱད་པར་ཕྱེ་མི་རུང་། བཙན་བྱོལ་བོད་མི་འབུམ་གཅིག་ཙམ་ནང་སྤོ་ལགས་རྨོ་ལགས་ཕལ་ཆེ་བ་ཡིག་རྨོངས་ཡིན་པ་བོད་ནང་དང་གཅིག་པ་རེད། གཞན་རྣམས་གཞན་ཡུལ་དུ་འཚོ་བ་ཇི་ལྟར་བསྐྱལ་ནས་ཡོང་བ་བསམ་ཤེས་ལོས་དགོས། བོད་ནང་བོད་མི་འབུམ་ཕྲག་ལྔ་བཅུ་དྲུག་ཅུ་ཙམ་ཡོད་པས་གྲངས་འབོར་ལ་དཔགས་པའི་བོད་ཡིག་ཤེས་མཁན་ལོས་ཡོང་། ཡིན་ནའང་༌པཎ་ཆེན་ཐམས་ཅད་མཁྱེན་པ་སོགས་ཀྱི་དཀའ་བརྒྱ་ཕྲག་གིས་བོད་སྐད་ཡིག་སྐྱབས་པར་མཛད་པའི་དྲིན་ཀྱང་ལོས་ཡིན།

བཀའ་བློན་སུ་གཉིས་གསུང་གི་ཡོད།

བཀའ་ཁྲི་བློ་སེང་གི་དམ་འབུལ་མཛད་སྒོ་ཉིན་གཏམ་བཤད་སྒྲོགས་སྦྱང་གནང་སྟངས་དེས་ང་རང་ཚུད་པའི་མི་མང་པོ་ཞིག་ལ་སྐྱོ་སྣང་སྦྱིན་འདུག །

བོད་ཀྱི་ཤེས་རིག་བཀའ་བློན་ལ་བོད་ཀྱི་སྐད་ཡིག་གཞི་ནས་སྦྱང་དགོས་མཁན་བྱུང་བ་ཆེས་ཐན་ལྟས་རེད་སྙམ།

གང་ལྟར་ངས་བསམ་བློ་བཏང་བ་ཡིན་ན། ད་བར་རྒྱལ་ཁབ་ཅིག་དང་མི་རིགས་ཤིག་གི་དབུ་ཁྲིད་རིམ་པའི་ནང་རང་གི་ཕ་སྐད་ཕ་ཡིག་མི་དགོས་པའི་ཆ་རྐྱེན་བྱུང་བ་ཕལ་ཆེར་མིའི་རིགས་ཀྱི་ལོ་རྒྱུས་ནང་བོད་བཙན་བྱོལ་བ་ཨང་དང་པོ་ཡིན་རྒྱུ་རེད། དེ་ནི་བསམ་བློ་བཏང་གིན་བཏང་གིན་ཡ་མཚན་ཞིང་ཡིད་མུག་པ་ཞིག་རེད།

གསལ་བོ་ཞུས་ན། གངས་ཅན་སྐྱིད་གཞོངས་ནས་གད་པ་ལས་བྱེད་ཅིག་ལ་ཨིན་ཡིག་ཆ་རྐྱེན་དུ་མ་བཀོད་པ་ཡོད་པ་མ་རེད་ལ། དེ་བཞིན་འགོ་བཀའ་ཁྲི་སྤྱི་འཐུས་ཚུན་ཆུད་ལ་ཕ་སྐད་ཕ་ཡིག་ཆ་རྐྱེན་དུ་བཀོད་བཞག་པ་ཞིག་ཡོད་པ་མ་རེད།

བཀའ་ཁྲི་མཆོག་ཕྲན་ལ་བརྩེ་བ་དང་མཐོང་ཆེན་བྱེད་པ། ཕྱི་དྲིལ་བཀའ་བློན་མཆོག་ལ་འདྲིས་པོ་ཡོད་པ་དང་ལུང་ཚན་གཅིག་པ་ཡིན་ཙམ་གྱི་ངོ་སོ་སྲུང་ནས་ང་ལས་གནས་འདི་ནས་ཡར་འཕུར་ནས་སོང་ན། རྩ་དོན་ཕ་སྐད་བརྗེད་སོང་བའི་ལོ་རྒྱུས་ཀྱི་ནག་ཉེས་འདི་ངའི་བུ་རབས་ཚ་བརྒྱུད་ཀྱིས་ང་ལ་བཀལ་ཡོང་གི་རེད། དེ་བས་བརྩི་བཀུར་བརྩི་བཀུར་གྱི་ཁྱབ་ཁོངས་ནས་གནས་རྒྱུ་དང་། རྩ་དོན་རྩ་དོན་གྱི་ཁྱབ་ཁོངས་ནས་གླེང་རྒྱུ་འདི་ངའི་གཤིས་ཀ་ཡིན།

གངས་ཅན་ལགས་ཀྱིས་ཟུར་ཟ་དང་འཕྱ་སྨོད་ཁོ་ནའི་ངོ་བོར་བསྒོམས་ན་ཅུང་ཐལ་དྲགས་པ་རེད། ངས་གང་དགག་པའི་ཚབ་ཏུ་གཞན་ཅི་ཞིག་འཇོག་དགོས་མིན་གསལ་བཀོད་བྱས་ཡོད།

གུས་པས་བསམ་བློ་བཏང་ན། བཀའ་བློན་བདུན་གྱི་གྲས་སུ་བོད་ཡིག་ཀློག་འདོན་ལ་བྱང་ཆ་ཡོད་པའི་བཀའ་བློན་ལྔ་ཡོད་ན་འགྲིག་འདུག བཀའ་ཁྲི་དང་ཕྱི་དྲིལ་བཀའ་བློན་གཉིས་ལ་མཚོན་ན། བོད་འདི་འཛམ་གླིང་ལ་ཁྲིད་དགོས་པས། དབྱིན་ཡིག་དེ་ཧ་ཅང་གི་གལ་ཆེན་རེད་ལ། ཁོང་གཉིས་ཀྱིས་བོད་ཡིག་ཀློག་ཤེས་པ་དང་དོན་གོ་ཐུབ་ཀྱི་ཡོད་པའི་མ་འགྲིག་པ་ཞིག་མི་འདུག

ཤར་ཁུག་འདིས་ཨ་མདོ་ཀླུ་མཁར་བྱམས་ལ་སློབ་སྦྱོང་གནང་འགོ་ཚུགས་སོང་། ཡིན་ནའི། བཀའ་ཁྲི་བློ་སེང་ལགས་བཀའ་ཁྲི་ཟུར་བ་ཟམ་གདོང་མིན་པས། ཁྱོད་ཀྱི་ལྟོ་སྐལ་གཅོད་སྲིད་ཀྱི་མ་རེད། དེ་ལྟར་སྤྱི་འཐུས་ཚོགས་གཙོས་ཀྱང་ཁྱོད་རང་གྲོས་ཚོགས་ཀྱི་བགྲོ་གླེང་ནང་ཁྱེར་ཡོང་ཐུབ་རྒྱུ་མ་རེད།

གཞན་དེ་པཎ་ཆེན་རིན་པོ་ཆེ་མཆོག་ཁ་ཁྱེར་ཡོང་བཞིན་པ་འདིའང་དགོས་དབང་ཞིག་ལ་ཐུག་འདུག དེ་མ་གཏོགས་ན་ནིང་པཎ་ཆེན་གྲོངས་རྐྱེན་གསལ་བསྒྲགས་གནང་སྐབས། ཤར་ཕྱོགས་ཁུག་རྟ་ལགས་ཁུ་སིམ་མེར་བཞུགས་དོན་ཅི་ཡིན་ནམ། སྐབས་དེར་པཎ་ཆེན་རིན་པོ་ཆེར་བྱས་རྗེས་ཆེ་བ་རྟོགས་མེད་པ་ཡིན་ནམ། ཡང་ན། བདག་པོའི་ཚོད་འཛིན་འོག་ཐེབས་པ་ཡིན་ནམ།

བཀའ་ཁྲི་བློ་བཟང་སེང་གེ་མཆོག་གིས་གཙོ་བོས་ཕྱག་རོགས་བཀའ་བློན་རྣམ་པ་བཟང་ཡང་རུང་། ངན་ཡང་རུང་ང་ཚོའི་འགོ་ཁྲིད་ཆགས་ཚར་བ་རེད།
སྐྱོན་བརྗོད་བྱས་པ་དང་། བསམ་ཚུལ་འདོན་པ་ནི་མང་གཙོའི་སྤྱི་ཚོགས་ཀྱི་ལེགས་བྱང་ཞིག་ཡིན་པས་བཟང་སྤྱོད་དང་འགལ་བའི་ནོར་འཁྲུལ་གང་ཡང་མེད་མོད། དྲ་གྲོགས་ང་ཚོ་ཐུན་མོང་ལ་ལྷག་ཡོད་པའི་འགན་འཁྲི་ནི་རང་མི་ལ་རང་བརྩི་བྱེད་དགོས་པ་དང་། རང་མཐོང་སྤྲོད་དགོས་པ། ཚིག་ཙམ་ལས་མ་ཐུབ་ཀྱང་སྐུལ་འདེད་དང་རྒྱབ་སྐྱོར་བྱེད་དགོས་པ་དེ་ཡིན།
བཀའ་བློན་རེ་ཟུང་བོད་ཡིག་ཡག་པོ་མེད་པ་སོགས་ཀྱི་ཉེས་ཆ་དེ་དག་ཀྱང་གང་མགྱོགས་ལེགས་བཅོས་དང་། ཡར་རྒྱས་སུ་འགྲོ་བར་ང་ཚོས་ཡིད་ཆེས་བྱེད་ཆོག
མ་གླེང་ཐབས་མེད་ཀྱི་གནས་ཚུལ་རེ་བྱུང་ན་ང་ཚོས་ངེས་པར་གླེང་དགོས་པ་སྙུག་ཐོགས་པའི་འོས་འགན་ཡིན་མོད། གནད་དོན་ཆུང་ཆུང་ལ་བརྟེན་དེ་དོན་མེད་སྡིགས་ར་སྐུལ་བ་ནི་སེམས་ཤུགས་ལ་དོ་ཕོག་འགྲོ་བའི་རྒྱུ་ལས་མེད་པས་ངེས་པར་ཐུགས་གཟབ་གནང་བའི་ཡིད་ཆེས་ཡོད།
ངས་ནི་རང་ཉིད་ལ་བསམ་ཚུལ་འདོན་མཁན་གྱི་བསམ་ཚུལ་ལ་བརྩི་བཀུར་དང་སྐུལ་འདེད་དང་ལེན་བྱེད་ངེས་ཡིན།
མདོར་བསྡུས་ན། བཀའ་བློན་ཁྲི་བའི་ཆིག་བསྒྲིལ་གྱི་རྩ་དོན་ལ་ང་ཚོ་ཚང་མས་ཕྱར་གྲུ་མཉམ་འདེགས་བྱེད།

ང་ཚོས་ག་དུས་ཡིན་ཡང་། རྒྱ་མིས་བོད་ནང་ལ་བོད་ཀྱི་སྐད་ཡིག་བཀག་འགོག་བྱེད་ཀྱི་འདུག་ཟེར་ནས་ངོས་རྒོལ་བྱེད་ཀྱི་ཡོད་ལ། བཙན་བྱོལ་ནང་ལ་བོད་ཀྱི་སྐད་ཡིག་སློབ་སྤྱོང་ཡག་པོ་ཡོད་པ་དང་བོད་ནང་ལ་དགེ་རྒན་གཏོང་ཆོག་ན་འདི་ནས་གཏང་གི་ཡིན་ཞེས་ཧམ་པ་ཆེན་པོས་བཤད་གི་ཡོད་།
འོན་ཀྱང་ང་ཚོའི་བཀའ་བློན་ནང་ལ་ཅིག་ལྟོས་དང་། བོད་ཀྱི་སྐད་ཡིག་ལ་སློབ་སྤྱོང་ག་འདྲ་བྱུང་འདུག་མདོག་སྔོན་པོ་གསལ་པོར་བསྟན་སོང་། ཞབས་འདྲེན་བླ་ན་མེད་པ་རེད་། བོད་པའི་གོམ་གཤིས་དང་བོད་སྐད་དང་བོད་ཡིག་ལ་གོམ་འདྲིས་མིེད་མཁན་མི་ཞིག་བོད་ཀྱི་བཀའ་བློན་ལ་ཆགས་པ་འདི་ལྟས་ངན་ལས་གཞན་གང་

པ་པ་པ་ཅིགཅིགཅིག་གི་ཉིན་མོ་དེར། བཀའ་ཁྲི་བློ་སེང་གིས་༼ཞི་བའི་སྒོ་ནས་རང་གི་བསམ་ཚུལ་བརྗོད་པ་ཙམ་ལའང་ཉེས་རྡུང་ཚབས་ཆེ་གཏོང་བ་ཤེས་རྟོགས་ཡོད་པའི་ཆ་ནས་བོད་ནང་ངོ་རྒོལ་སྐད་འབོད་བྱེད་རྒྱུར་ང་ཚོས་སྐུལ་སློང་བྱེད་ཀྱི་མེད། འོན་ཀྱང་རྒྱལ་གཅེས་དཔའ་བོ་དཔའ་མོ་རྣམས་ཀྱི་བདེན་རྒྱབ་བྱ་རྒྱུ་དང༌། བདེ་སྡུག་ཤོད་དབང་མེད་པ་ཚོའི་མགྲིན་ཚབ་པ་བྱེད་རྒྱུ་ནི་ང་ཚོའི་རྩ་ཆེའི་ལས་འགན་ཞིག་ཡིན་པས། མུ་མཐུད་ཁོང་ཚོའི་བདེ་སྡུག་བརྒྱུད་བསྒྲགས་བྱ་རྒྱུ་ཡིན།༽ཞེས་པའི་ཚིག་དུམ་འདི་ཡང་ཚིག་གི་གཅོད་མཚམས་ཧ་ཅང་མི་བདེ་བ་བྱས་ནས་ཀློག་སོང་།

དེ་རིང་གཞོན་སྐྱེས་གཉིས་ཀྱིས་ལུས་སྲོག་མེ་ལ་སྦར་བ་རེད། དེར་བཀའ་ཤག་གིས་གསར་འགོད་གསལ་བསྒྲགས་ཤིག་སྤེལ་བ་ནི་དབྱིན་ཡིག་ནང་ལ་རེད། ཕྱི་དྲིལ་ལས་ཁུངས་ཀྱི་བོད་ཡིག་ཚན་པས་དེ་བོད་སྒྱུར་བྱས་ཡོད་པའི་དོན་བསྡུས་ཤིག་དང་དེ་མཐར་སོགས་སྒྲ་ཅན་དེ་བོད་མིའི་སྒྲིག་འཛུགས་ཀྱི་བོད་ཡིག་དྲ་ངོས་ན་འདུག བོད་སྒྱུར་དེའི་གཤམ་ན། ༼ གསལ་བསྒྲགས་ངོ་མ་དབྱིན་ཡིག་ཐོག་ཡོད་པ་ནས་ཕྱི་དྲིལ་བོད་ཡིག་ཚན་པས་ཕབ་བསྒྱུར་ཞུས་པས་དབྱིན་ཡིག་ལ་རྩ་འཛིན་ཡོང་བ་ཞུ།༽ཞེས་བྲིས་འདུག དེ་རིང་ནས་ང་ཚོས་དབྱིན་ཡིག་ལ་རྩ་འཛིན་ཞུ་དགོས་པའི་གསལ་བསྒྲགས་ཀྱང་ཡིན་ས་རེད།

ད་ནི་ཕྱི་དྲིལ་བོད་ཡིག་ཚན་པ་དེར། བཀའ་ཤག་དང་བཀའ་བློན་ཚོའི་དབྱིན་ཡིག་ཡིག་ཆ་དེ་ཚོ་བོད་སྒྱུར་གྱི་ལས་ཀ་ཐོལ་བ་ཞིག་མགོ་བཙུགས་ཡོད། འདི་ནི་བཀའ་ཤག་གསར་པའི་གསར་བཏོད་སྲིད་བྱུས་ཀྱི་ཆ་ཤས་ཤིག་ཡིན་རྒྱུ་རེད།

བཀའ་ཤག་གསར་པའི་བོད་སྐད་ཆ་མ་ཆག།
བཀའ་ཤག་བོད་ཡིག་ཀློག་སྟངས་ཆ་མ་ཆོལ།།
པཎ་ཆེན་བཅུ་པ་ཞིང་ལ་གཤེགས་པ་བཟང་།།
འདི་འདྲ་གསན་ན་ཐུགས་ཕམ་བཟོད་པ་དཀའ།།

ཨོ་ཧོ་ཧོ་ད་ཡིན་ན་ངོ་ཡང་ཚ་གི་འདུག་ལ་སེམས་སྐྱོ་ཡི་འདུག དེ་རིང་བོད་མིའི་སྒྲིག་འཛུགས་འཛིན་སྐྱོང་ལས་བསྡོམས་སྙན་ཐོ་མདོར་བསྡུས་འདོན་སྐབས། དྲི་བསྒྲགས་དང་ཕྱི་དྲིལ་བཀའ་བློན་གྱིས་བོད་ཡིག་ཀློག་སྟངས་དེ་དབྱིན་ཇིའི་བོད་ཡིག་ཀློག་པ་ལས་སྡུག་ས་རེད། ཀློག་སྟངས་ལ་བལྟ་དུས་ཉན་མཁན་ཡང་དཀའ་ལས་ཁ་ཡོང་གི་འདུག གོ་འཛུགས་དུས་ནས་བོད་མིའི་སྒྲིག་འཛུགས་ཞེས་པའི་ཚབ་ཏུ་བོད་གཞུང་ཅེས་ཀློག་སོང་དེ་ག་རང་ནས་ཆབ་སྲིད་དང་བོད་མིའི་གནས་སྟངས་གོ་རྟོགས་དང་དོ་སྣང་མེད་པ་གསལ་པོ་བསྟན་སོང། བོད་ཀྱི་སྐད་ཡིག་དང། རྒྱལ་རབས་ལོ་རྒྱུས། རིག་གཞུང། ད་ལྟའི་གནས་བབས་སོགས་ལ་རྒྱུས་མངའ་མེད་པའི་བཀའ་བློན་ཞིག་གིས་དགྲོ་བོར་རྒྱ་དམར་ལ་ཁ་གཏད་ཀྱིས་རྒོལ་ལན་དང། རྒྱལ་སྤྱིའི་ཐོག་བོད་ཀྱི་དངོས་ཡོད་དྲང་གཏམ་གང་འདྲ་བཤད་ཐུབ་ཡོང་བསམ་ནས་བློ་འཚབ་ཡོང་གི་འདུག

བོད་ཀྱི་ཆོས་དང་རིག་གཞུང་དང་། མཐའ་ན་བོད་ཡིག་དང་བོད་སྐད་ཀྱང་ཡག་པོ་མི་ཤེས་པའི་བཙན་བྱོལ་བོད་མིའི་བཀའ་ཤག ཡོད་ཚད་དབྱིང་ཡིག་གིས་ཡིད་དབང་འཕྲོག་པའི་བཙན་བྱོལ་བོད་མིའི་བཀའ་ཤག བཙན་བྱོལ་བོད་མིའི་སྒྲིག་འཛུགས་འདི་གང་གི་ཆེད་དུ་རེད། དཔལ་འབྱོར་དང་དམག་ཤུགས་ཀྱི་ཆེད་དུ་ཡིན་ན་ད་སྐབས་རྒྱ་ནག་གི་ལྷག་དུ་མེད། རིག་གཞུང་སྲུང་སྐྱོབ་ཀྱི་ཆེད་དུ་ལགས་ན་རང་གཞུང་གི་དབུ་ཁྲིད་དུ་མས་རྡ་སའི་གསང་ལམ་ནས་བག་ལེབ་འཚོང་མཁན་གྱི་མདུན་ནས་བོད་ཀྱི་ཆོས་དང་སྐད་ཡིག་ཡག་པོ་སྦྱོང་རོགས། སྐུ་མཁྱེན། །

རྫ་ཆུའི་ཁ་བ་སྐུ་མཁྱེན། ཞབས་འདྲེན་ཡང་ཡང་ཞུ་གི་མ་འདུག ཁ་བྱང་ནང་དུ་ཡིག་ནོར་གཅིག་ཀྱང་མི་འདུག རྩོམ་ཡིག་གི་གཞུང་ངོས་ན་ཡིག་ནོར་ཡོད་མེད་ཀློག་རྒྱུ་མ་བྱུང་། རྩོམ་བྱང་དེ་ལྷུག་པར་གྲོལ་ན། ༼ བཀའ་བློན་འདི་གཉིས་ཀྱིས་ང་ལ་༧པཎ་ཆེན་རིན་པོ་ཆེ་དྲན་དུ་བཅུག་སོང་། ༽ ཟེར་བ་འདི་རེད།
( ཀྱིས ) ཞེས་པ་དེ་མེད་པས་ཡིག་ནོར་དུ་བགྲང་ན་ནོར་བ་རེད། རྩོམ་བྱང་དཀར་ཆག་བཅད་པ་དག་ལ་ཚིག་སྡུད་གཅེས། ། ཞེས་བསྟན་ཡོད།
གོང་གི་རྩོམ་བྱང་ནང་གི་ཀྱིས་དེ་རྣམ་དབྱེ་གསུམ་པ་རེད། རྩོམ་བྱང་ལ་འབབ་ཐོབ་ལྟར་ཀྱིས་ཞེས་པའི་རྣམ་དབྱེ་གསུམ་པ་བསྡུས་ཡོད།
( ལ ) ཞེས་པ་མེད་པས་ཡིག་ནོར་དུ་བགྲང་ན་དེ་ཡང་ནོར།
ས་སུ་ག་བ་ད་དྲག་ཏུ།།
ང་ད་ན་མ་ར་ལ་དུ།།
འ་དང་མཐའ་རྟེན་མེད་མཐར་རུ།། ཞེས་བསྟན་ཡོད།
མཐའ་མེད་མིང་གཞི་( ང )ཡིག་ལ་འབབ་ཐོབ་ལྟར་ལ་དོན་གྱི་ཕྲད་( རུ )བསྡུས་པའི་ར་ཡིག་སྦྱར་འདུག ན་ལ་གཉིས་ཕྲད་རང་དབང་ཅན་རེད།
ཐོས་བྱུང་ངམ་་་་་་་་ཚེ་རིང་བཀྲ་ཤིས་་་་་་་་་

དེའི་ཁར་རྩོམ་འདིའི་ཁ་བྱང་གིས་ང་ལ་སྐུ་ཞབས་དོལ་ཤེར་ལགས་དྲན་བཅུགས་སོང་། ཨ་ལ་རྩེད་མོ་ཡིན། ཡིག་ནོར་ཡིན་པ་འདྲ། གང་ལྟར་ཅིག་འགྲིག་མི་འདུག
ཤར་ཕྱོགས་ཁུག་རྟ་ནི་རྒྱུན་དུ་མཐོང་དུ་ཡོད་པའི་ཅུང་ཚད་ལྡན་གྱི་རྩོམ་ཡིག་སྤེལ་མཁན་ཞིག་ཡིན་པའི་གུས་བརྩི་ཡོད།

ད་ལྟའི་དུས་ཚོད་འདིར་བོད་ཡིག་ཀློག་ཤེས་ཀྱི་མི་འདུག་ཅེས་འཕྱ་བ་དང་ཕན་ཚུན་ལ་ཟུར་ཟ་བྱེད་པའི་དུས་ཚོད་མིན་པར་གཞུག་ཕྱོགས་རྒྱལ་གཅེས་དཔའ་བོ་འདི་དག་གི་ཆེད་དུ་ལས་འགུལ་སྤེལ་ཕྱོགས་དང། ལས་རིམ་སྒྲིག་ཕྱོགས་ལ་ཁ་ནང་དུ་འཁོར་ནས་གྲོས་བསྡུས་བྱེད་པའི་དུས་སྐབས་རེད་འདུག་བསམ།