དེ་རིང་ཕྱི་ཚེས་ ༡༧ ཉིན་ཞོགས་པར་ངྷ་ས་བཞུགས་སྒར་ཕོ་བྲང་དུ་དུས་ཡུན་ཉིན་ལྔའི་རིང་གི་༼ སེམས་དང་སྲོག་གི་བགྲོ་གླེང་ཚོགས་འདུ་ཐེངས་ཉེར་གསུམ་པ། ༽ཞེས་པའི་༧གོང་ས་མཆོག་གིས་སྣེ་འཁྲིད་པའི་ནང་ཆོས་དང་ཚན་རིག་ཟུང་དུ་འབྲེལ་བའི་སེམས་དང་སྲོག་ལ་དཔྱད་ཞིབ་ཀྱི་བགྲོ་གླེང་དེ་དབུ་འཛུགས་གནང་འདུག
ཐེངས་འདིའི་བགླེ་གླེང་ཐོག་༧གོང་ས་མཆོག་མཆོག་གིས། ཨ་རི་དང་དབྱིན་ཇི། རྒྱ་གར་བཅས་ནས་ཕེབས་པའི་གྲགས་ཅན་ཚན་རིག་པ་དང་ཉམས་ཞིབ་པ་ ༡༢ དང་ལྷན་དུ། ཚན་རིག་གིས་རང་བྱུང་ཁོག་ཡུག་ལ་ཤུགས་རྐྱེན་ཇི་ལྟར་ཐེབས་ཀྱི་ཡོད་མེད་ཐོག་བགྲོ་གླེང་གོ་བསྡུར་གནང་བཞིན་ཡོད་པ་དང་། བགྲོ་གླེང་ཚོགས་འདུ་དེར་དཔལ་རྒྱལ་བ་ཀརྨ་པ་མཆོག་གིས་གཙོས་པའི་རྣམ་རྒྱལ་གྲྭ་ཚང་གི་མཁན་རིན་པོ་ཆེ་དང་། བོད་ཀྱི་བླ་སྤྲུལ་དགེ་བཤེས། དེ་བཞིན། འཛམ་གླིང་རྒྱལ་ཁབ་ཁག་ནས་ཤེས་ཡོན་ཅན་ཁྱོན་མི་ ༡༥༠ ཙམ་མཉམ་ཞུགས་གནང་ཡོད་པ་རེད།
གསར་འགོད་པས་སྐུ་སྒེར་དྲུང་ཆེ་བསྟན་འཛིན་སྟག་ལྷ་མཆོག་ལགས་སུ་བཀའ་འདྲི་ཞུས་སྐབས། དེ་རིང་གི་བགྲོ་གླེང་གཙོ་བོ་ཚན་རིག་གིས་ཁོར་ཡུག་ལ་ཤུགས་རྐྱེན་ཐེབས་སྟངས་སྐོར་གོ་བསྡུར་གནང་གི་ཡོད་པ་དང་། སང་ཉིན་ནང་པ་དང་ཡེ་ཤུ་ཆོས་ལུགས་ཀྱིས་ཁོར་ཡུག་ལ་ལྟ་སྟངས་ཅི་ཡོད་སྐོར་གོ་བསྡུར་གནང་རྩིས་འདུག་ཅེས་བརྗོད་སོང་།
སེམས་དང་སྲོག་གི་བགྲོ་གླེང་ཚོགས་འདུ་ཞེས་པ་འདི་ནི་དང་ཐོག་༧གོང་ས་མཆོག་སྐུ་སྒེར་ནས་མགོ་འཛུགས་གནང་བ་ཞིག་ཡིན་ཞིང་། ལས་གཞི་འདི་མགོ་འཛུགས་བྱས་ཏེ་ད་བར་ལོ་ ༣༠ ཙམ་ཕྱིན་ཡོད་འདུག
གསར་འགོད་པ། དཔལ་ལྡན།
པར་ཞིག་ཕུལ་ཡོད་ན་དགེ་མཚན་ཆེ་བ་འདུག་བསམ།
༧གོང་ས་མཆོག་གི་ཐབས་མཁས་རྗེ་ལ་བརྟེན་ནས་དེང་སྐབས་ཚན་རིག་པས་ཀྱང་ནང་ཆོས་དང་མཉམ་བསྡུར་གྱིས་སེམས་དང་ཚེ་སྲོག་གི་འབྲེལ་བར་ཞིབ་འཇུག་བྱེད་ཤུགས་ཆེ་རུ་འགྲོ་བཞིན་པ་རེད། བོད་ཀྱི་བླ་སྤྲུལ་དང་དགེ་བཤེས་རྣམས་ཀྱིས་ཀྱང་༧གོང་ས་མཆོག་གི་རླབས་པོ་ཆེའི་ཕྱག་ལས་འདིར་རྒྱབ་སྐྱོར་ཞུ་དགོས་པ་མ་ཟད། རང་རེ་བོད་ཀྱི་ཆོས་རྒྱུད་ནང་ཕན་ཚུན་གྱི་ཡིག་ཆའི་བཞེད་མཚམས་དང་ལྟ་བའི་འབབ་ཕྱོགས་ལ་ཡང་འདི་ལྟ་བུའི་བགྲོ་གླེང་ལྷུག་པོ་རེ་གནང་ན་ཅི་འདྲའི་དགའ་བ་ལ་ཨང་། བདེན་པ་ཉིད་རྣམ་པར་རྒྱལ་གྱུར་ཅིག